ᑲᐅᔑᒋᑲᑌᑭᐣ ᑎᐱᓇᐁᐧ ᐅᓇᑯᓂᑫᐃᐧᓀᓴᐣ, ᑫᐱᒥᓂᔕᐦᐃᑲᑌᑭᐣ

ᓂᐦᓯᐣ ᐅᑭᒪᐃᐧᐣ ᐅᑕᓄᑭᓇᑲᓇᐣ ᐅᑭᒪᐊᐧᒋᐦᐊᐊᐧᐣ ᑭᒋᓇᒣᑯᓯᑊ ᐃᓂᓂᐊᐧᐠ ᐅᑕᓂᔑᓂᓂᒪᐣ ᑲᑲᐯᔑᓂᐨ ᐊᑲᐢᐟ 17-18 ᑲᑭ ᐃᓇᑭᓱᐨ ᐃᒪ ᑭᒋᓇᒣᑯᓯᑊ ᐃᐢᑯᓂᑲᓂᐠ.
ᑭᒋ ᐊᒥᑯᑭᒪ, ᐅᑭᒪᐃᐧᐣ ᑭᐁᐧᑎᓄᐣᐠ ᐊᓄᑭᐃᐧᐣ ᒥᓇ ᒧᓇᐦᐃᔓᓂᔭᐁᐧᐃᐧᐣ, ᒥᓇ ᒥᑎᑯᑫᐃᐧᐣ ᒥᓇ ᑲᔦ ᐅᑭᒪᐃᐧᐣ ᐊᓂᔑᓂᓂᐊᐧᐣ ᑲᐅᐣᒋ ᓂᑲᓂᑲᓇᐊᐧᐸᐨ ᐊᓂᑭᓇᑲᓇᐠ ᐅᑭ ᐊᓂᒧᑕᓇᐊᐧ ᓂᔭᓇᐣ ᑫᑯᓇᐣ ᒣᑲᐧᐨ ᓂᔓᑭᔑᑲ ᑲᑭᒪᐊᐧᒋᐦᐃᑎᓇᓂᐊᐧᐠ ᐁᑭ ᐸᑯᓭᐣᑕᒧᐊᐧᐨ ᒋᑭ ᐅᓇᒋᑲᑌᑭᐸᐣ ᐃᐁᐧ ᐊᓂᑭᐃᐧᐣ ᓂᓱᑎᑕᒧᐃᐧᐣ ᒋᒪᒪᐤ ᐃᐧᐣᑕᓄᑭᒥᑎᓇᓂᐊᐧᐠ ᓇᑯᒥᑎᐃᐧᐣ.
ᑭᐣ ᑕᐢ ᐊᓂᐣ ᐁᐃᓀᐣᑕᒧᐦᐃᑯᐊᐧᓀᐣ ᐅᐁᐧ ᒪᐊᐧᒋᐦᐃᑎᐃᐧᐣ ᐊᒥᐦᐃᒪ ᑫᐅᐣᒍᓀᐣᑕᑲᐧᐠ.
ᐊᒥᑕᐢ ᑲᑭ ᐃᑭᑐᐨ ᐅᑭᒪᐃᐧᐣ ᐊᓂᔑᓂᓂᐊᐧᐣ ᑲᐅᐣᒋ ᓂᑲᓂᑲᓇᐊᐧᐸᐨ ᐊᓂᑭᓇᑲᓇᐣ ᑲᑭ ᑲᑭᑐᑕᒪᑫᐨ ᑭᕑᐁᐠ ᐱᓫᐊᐟ: “ᐅᑭᒪᐃᐧᐣ ᐊᓂᑭᓇᑲᓇᐠ ᑭᓇᑭᐢᑲᑎᐊᐧᐠ ᐃᒪ ᑭᒋᓇᒣᑯᓯᐱᐠ ᒥᓇ ᐅᑭ ᐊᓂᒧᑕᒪᐊᐧᐊᐧᐣ ᐃᐁᐧᓂ ᐊᓂᑭᐃᐧᐣ ᓂᓱᑎᑕᒧᐃᐧᐣ ᒋᒪᒪᐤ ᐃᐧᑕᓄᑭᒥᑎᓇᓂᐊᐧᐠ ᓇᑯᒥᑎᐃᐧᐣ ᒋᒪᒥᑎᓀᐣᑕᒧᐊᐧᐨ.”
ᔕᑯᐨ ᑕᐢ ᐅᑭᒪᑲᐣ ᑕᐧᓂ ᒪᐧᕑᐃᐢ ᐸᑲᐣ ᐅᑭ ᐃᔑᐊᐧᐸᑕᐣ.
“ᐅᑭᐱᑐᓇᐊᐧ ᐊᔕ ᑲᑭ ᑭᔓᓇᑐᐊᐧᐨ ᐅᑐᓇᒋᑫᐃᐧᓂᐊᐧ ᐁᑲᐧ ᑕᐢ ᐁᑭᔑ ᓇᐣᑕᐁᐧᓂᒥᑯᔭᐠ ᒋᐃᐧᒋᓀᐣᑕᒧᐊᐧᔭᐠ,” ᒪᐧᕑᐃᐢ ᑭᐃᑭᑐ.
ᒪᐧᕑᐃᐢ ᐅᓇᐣᑕᐁᐧᐣᑕᐣ ᒥᑐᓂ ᐱᑯ ᒋᑕᑲᐧᐱᐨ ᐃᒪ ᐊᓂᒧᒋᑫᐃᐧᓇᐣ ᑲᐊᐧᐅᓇᑐᐊᐧᐨ .
“ᐁᑲᐧ ᑕᐢ ᐃᐁᐧ ᑫᐊᓂ ᒪᑕᓂᑲᑕᒪᐠ ᐊᓂᐣ ᑫᑭᐃᔑ ᒪᒋ ᒪᓯᓇᐦᐃᑲᑌᑭᐣ ᐊᓂᒧᒋᑫᐃᐧᓇᐣ, ᑭᑐᓇᑯᓂᑫᐃᐧᓀᓯᓇᐣ, ᑭᑐᓇᒋᑫᐃᐧᓇᐣ ᑫᐱᒥᓂᔕᐦᐃᑲᑌᑭᐣ? ᒥᐢᑕᐦᐃ ᑕᑲᐧᐣ ᐊᓂᑭᐃᐧᐣ ᐅᒪ ᐊᓂᔑᓇᐯᐊᐧᐠ ᐊᐦᑭᐣᐠ ᐊᓂᒧᒋᑫᐃᐧᓇᐣ ᑲᐃᐧ ᒪᑕᓄᑲᑕᒪᐣᑭᐣ.”
ᒉᑲᑊ ᐊᐢᑕᒪᐣ, ᑲᓂᑲᓂ ᑲᓇᐊᐧᐸᑕᐠ ᑭᒋᓇᒣᑯᓯᑊ ᐃᓂᓂᐊᐧᐠ ᐊᐦᑭ ᒥᓇ ᐊᐦᑭᑲᐠ ᑲᐅᐣᒋ ᓇᓇᑲᒋᒋᑲᑌᑭᐣ, ᑭᐃᐧᒋᑕᐧ ᐁᑭ ᐊᔭᒥᑕᒧᐊᐧᒋᐣ ᐊᓂᔑᓂᓂᐊᐧᐣ ᐃᒪ ᑲᑲᐯᔑᓂᐨ ᐁᑭ ᐊᐧᐃᐧᐣᑕᒪᑫᐨ ᑲᐃᓯᓭᓂᐠ ᐊᐦᑭᐃᐧ ᑫᑯᓇᐣ ᒣᑲᐧᐨ ᐅᑭᒪᐠ ᑲᑭᐱᑭᐅᑫᓂᐨ ᐅᑕᔑᑫᐃᐧᓂᐊᐧ.
ᑕᔑᑫᐃᐧᓂᐠ ᑲᔭᐊᐧᐨ ᐃᐧᓇᐊᐧ ᐅᑲᐅᓀᐣᑕᓇᐊᐧ ᑭᐢᐱᐣ ᑫᐅᑕᐱᓇᒧᐊᐧᑫᐧᐣ ᓇᑯᒥᑎᐃᐧᓂ
“ᐁᑲᐧ ᓂᐢᑕᑦ ᑫᐊᓂᑲᑌᐠ ᐃᐁᐧ ᑲᐊᑲᒥᑯᐊᐧᐠ ᑕᔑᑫᐃᐧᓂᐣᐠ, ᐃᒪ ᒣᑲᐧᐨ ᑲᐃᔑᑲᐯᔑᓇᓂᐊᐧᐠ, ᒥᓯᐁᐧ ᐃᐢᑯᓂᑲᐣ ᒋᐃᓇᑭᐣᑌᐠ, ᐁᑲ ᐅᑭᒪᐃᐧᐣ ᒋᑎᐯᐣᑕᐠ ᐊᐦᑭᓂ” ᐊᐢᑎᒪᐣ ᑭᐃᑭᑐ.
ᐁᑲᐧ ᓂᔑᐣ ᑫᑯᐣ ᑫᐊᓂᒪᑕᓄᑲᑌᐠ ᒋᑭᓯᓂᑲᑌᐠ ᐊᐦᑭ ᑲᐃᔑ ᐱᒋᐳᐃᐧᓂᐊᐧᐠ.
“ᓂᑭᑫᐣᑕᒥᐣ ᐱᒋᐳᐃᐧᐣ ᐁᐦᐊᔭᐠ ᐃᒪ ᐅᑭᒪᐃᐧᐣ ᑲᐃᔑᑎᐯᐣᑕᐠ ᐊᐦᑭ,” ᐊᐢᑎᒪᐣ ᑭᐃᑭᑐ. “ᒪᐧᔦ ᐃᐢᑯᓂᑲᐣ ᐃᓇᑭᐣᑌᐠ, ᓂᓇᐣᑕᐁᐧᓂᒪᒥᐣ ᐅᑭᒪᐃᐧᐣ ᐱᓇᒪ ᒋᑭᓯᓇᐣᐠ ᐃᐁᐧᓂᐊᐧᐣ ᐊᐦᑭᐣ.”
ᓂᐦᓯᐣ ᑫᑯᐣ ᑫᐊᓂᒧᒋᑲᑌᐠ ᐃᐁᐧ ᑲᒪᒥᑎᓀᐣᑕᑲᐧᐠ ᔓᓂᔭᐊᐧᓯᓂᑫᐃᐧᐣ ᒥᓇ ᐊᓂᑭᐃᐧᓇᐣ ᑫᑭ ᐊᓂᔭᑲᐧᐸᐣ ᐊᓂ ᐃᐧᑕᓄᑭᒪᑲᓄᐊᐧᐨ ᐅᑭᒪᐃᐧᐣ ᑭᐁᐧᑎᓄᐣᐠ ᐊᓄᑭᐃᐧᐣ ᒥᓇ ᒧᓇᐦᐃᔓᓂᔭᐁᐧᐃᐧᐣ, ᒥᓇ ᒥᑎᑯᑫᐃᐧᐣ.
ᔓᓂᔭᑫᐃᐧᐣ ᒪᒋᑕᐃᐧᓇᐣ ᑕᐅᐣᒋᔭᐊᐧᐣ ᐃᒪ ᐱᐊᐧᐱᑯᑫᐃᐧᐣ ᒥᓇ ᒣᑕᐁᐧᐃᐧ ᐊᓂᑭᐃᐧᓇᐣ ᒥᐦᐃᑫᐧᓂᐊᐧᐣ ᓂᐃᐧᐣ ᑫᑯᓇᐣ ᑫᐊᓂᒧᑌᑭᐣ ᐃᒪ ᐊᓂᑭᐃᐧᐣ ᓂᓱᑎᑕᒧᐃᐧᐣ ᒋᒪᒪᐤ ᐃᐧᑕᓄᑭᒥᑎᓇᓂᐊᐧᐠ ᒪᓯᓇᐦᐃᑲᐣ.
“ᐃᔑᓇᑲᐧᐣ ᒋᑭ ᒪᑕᓄᑲᑕᒪᐠ ᐃᐧᑕᓄᑭᒥᑎᐃᐧᐣ ᐃᐁᐧ ᐅᐣᒋ ᔓᓂᔭᑫᐃᐧ ᒪᒋᑕᐃᐧᐣ,” ᑭᐃᑭᑐ. “ᒥᔑᓇᑎᓄᐣ ᑫᑯᓇᐣ ᑫᑭ ᐅᐣᒋ ᐃᐧᒋᐦᐃᑯᐸᐣ ᐊᓂᑭᐃᓇᐣ ᐃᒪ ᑭᒋᓇᒣᑯᓯᐱᐠ.”
ᐁᑲᐧ ᑕᐢ ᐃᐁᐧ ᐃᐢᑲᐧᔭᐨ ᑫᐊᓂ ᐊᓂᒧᒋᑲᑌᐠ ᐃᒪ ᐊᓂᑭᐃᐧᐣ ᓂᓱᑎᑕᒧᐃᐧᐣ ᒋᒪᒪᐤ ᐃᐧᑕᓄᑭᒥᑎᓇᓂᐊᐧᐠ ᐃᐁᐧ ᐊᐦᑭ ᑫᐃᓇᐸᑕᐠ ᐅᓇᒋᑫᐃᐧᓇᐣ ᒥᓇ ᑯᑕᑭᔭᐣ ᐊᐦᑭᐃᐧ ᑫᑯᓇᐣ ᐊᑲᐧᒋ̇ᐢᑯᓇᑲᐣ ᑲᔭᑭᐣ ᐃᓯᓭᐃᐧᓇᐣ ᒥᓇ ᐊᐦᑭᑲᐠ ᑲᔭᑭᐣ ᑫᐅᐣᒋ ᐃᐧᒋᐦᐃᑯᐨ ᐯᒪᑎᓯᐨ. ᑭᒋᓇᒣᑯᓯᑊ ᐃᓂᓂᐊᐧᐠ ᐅᑕᔭᓇᐊᐧ ᐊᐦᑭᐃᐧ ᒪᓯᓇᐦᐃᑲᐣ ᐊᓂᑭᐃᐧᐣ ᐁᒪᓯᓇᐦᐃᑲᑌᓂᐠ ᑲᐃᔑ ᓇᓇᐣᑕᐁᐧᐣᒋᑫᐊᐧᐨ ᐅᑕᐦᑭᒥᐊᐧ, ᒥᓇ ᑲᔦ ᑲᐃᔓᐊᐧᑲᐦᐃᑲᓂᐊᐧᐨ ᒥᓇ ᑲᐃᓇᐸᒋᑐᐊᐧᐨ ᐅᑕᐦᑭᒥᐊᐧ.
ᐅᑭᒪᐃᐧᐣ ᑲᐅᐣᒋ ᐊᓂᑲᐊᐧᒋᐣ ᐊᓂᔑᓂᓂᐊᐧᐣ ᑫᐃᐧᐣ ᐅᑕᓄᑲᑕᐣ ᐅᐁᐧ ᐊᓂᑭᐃᐧᐣ, ᑭᐃᑭᑐ ᐊᐁᐧ ᑲᑲᑭᑐᑕᒪᐊᐧᐨ ᐅᑭᒪᐃᐧᓇᐣ.
“ᐅᐣᑌᕑᐃᔪ ᐅᑭᒪᐃᐧᐣ ᐅᑕᓄᑲᑕᐣ ᒋᒪᒪᐤ ᐃᐧᑕᓄᑭᒥᑎᓇᓂᐊᐧᐠ ᒋᒥᓄᓭᑭᐣ ᑫᑯᓇᐣ ᑐᑲᐣ ᔓᓂᔭᑫᐃᐧ ᒪᒋᑕᐃᐧᓇᐣ, ᐊᐦᑭᐃᐧ ᐅᓇᒋᑫᐃᐧᓇᐣ ᒥᓇ ᑯᑕᑭᔭᐣ ᐊᐦᑭᐃᐧ ᑫᑯᓇᐣ ᐃᒪ ᑭᒋᓇᒣᑯᓯᑊ ᐃᓂᓂᐊᐧᐠ ᐅᑕᐦᑭᐊᐧ,” ᐱᓫᐊᐟ ᑭᐃᓇᓯᓇᐦᐃᑫ ᐃᒪ ᒪᒪᐣᑕᐃᐧᐱᐊᐧᐱᑯᐠ.
“ᑲᑭᓇ ᑲᐸᐱᑭᔕᓄᑭᐊᐧᐨ ᐊᓂᑭᓇᑲᓇᐠ ᑭᐊᔭᐊᐧᐠ – ᐅᑭᒪᐃᐧᐣ ᐅᑕᓄᑭᓇᑲᓇᐣ, ᒪᔭᑦ ᐁᐦᑕ ᑭᒋᐅᑭᒪᐠ ᑲᐃᐧᐣ ᒋᑭ ᐅᐣᒋᐊᔭᐊᐧᐨ ᐃᒪ ᒪᐊᐧᒋᐦᐃᑎᐃᐧᓂᐠ,” ᒪᐧᕑᐃᐢ ᑭᐃᑭᑐ. “ᒥᔑᓇᐧᔦᑲᓄᐣ ᑫᑯᓇᐣ ᑫᑭ ᐅᐣᒋ ᐃᐧᑕᓄᑭᒪᑲᓄᐊᐧᐸᐣ, ᐃᒪ ᒪᒪᐤ ᐅᑭᒪᑫᐃᐧᓂᐠ ᒥᓇ ᒪᒪᐤ ᑲᓇᐊᐧᐸᐣᒋᑫᐃᐧᓂᐠ.”
ᐊᓂᔑᓂᓂᐊᐧᐠ ᐃᒪ ᑭᒋᓇᒣᑯᓯᑊ ᐃᓂᓂᐊᐧᐠ ᐃᐢᑯᓂᑲᓂᐠ, ᐊᒥᐦᐃᒪ ᐁᐃᔑᓇᑲᐧᐠ ᒋᒪᒪᐤ ᐃᐧᑕᓄᑭᒥᑎᓇᓂᐊᐧᐠ ᐁᐦᑕ. ᐊᒥᐦᐃ ᐁᐃᓀᐣᑕᒧᐊᐧᐨ ᐸᑲᐣ ᐁᐃᐧ ᐃᔑ ᓇᒋᑲᐸᐃᐧᑕᒧᐊᐧᐨ ᑲᐊᓂᔭᔭᐣᒋᓭᓂᑭᐣ ᑫᑯᓇᐣ ᒥᐦᐃᒪ ᑕᐢ ᑫᐊᓄᐣᒋ ᑭᑫᐣᑕᒧᐊᐧᐨ ᐊᓂᐣ ᑫᐊᓂᓯᓭᐦᐃᑯᐊᐧᐨ, ᒪᐧᕑᐃᐢ ᐃᑭᑐ.
“ᑲᐃᐧᐣ ᐊᐊᐧᔑᒣ ᐅᐁᐧ ᓂᑲᑐᑕᓯᒥᐣ, ᐃᐁᐧ ᐅᑭᒪᐃᐧᐣ ᑲᐃᔑ ᑲᓇᐊᐧᐸᑕᑭᐣ ᑫᑯᓇᐣ.”
ᒪᐧᕑᐃᐢ ᑭᐃᑭᑐ ᐃᐁᐧ ᐅᑕᐦᑭᒥᐊᐧ “ᑲᐃᐧᐣ ᓂᐸᑭᑎᓇᓯᒥᐣ ᐃᒪ ᒋᐃᔑ ᐊᓂᑭᓇᓂᐊᐧᐠ.”
ᔕᑯᐨ ᑕᐢ, ᐃᒪ ᐊᐦᑭᐣ ᑲᔭᑭᐣ ᐊᐸᑕᓄᐣ ᐁᐅᐣᒋ ᓇᓇᐣᑕᐁᐧᐣᒋᑲᓂᐊᐧᐠ, ᐁᐅᐣᒋ ᐸᑭᑕᐧᐦᐊᓂᐊᐧᐠ ᒥᓇ ᐁᐅᐣᒋ ᐊᐧᓂᐦᐃᑲᓂᐊᐧᐠ.
“ᐅᐣᒋᐦᑕ ᑭᐸᑭᑎᓂᑲᑌᐊᐧᐣ ᐅᑫᐧᓂᐊᐧᐣ ᐊᐦᑭᐣ ᐅᐁᐧ ᐅᐣᒋ ᒋᐃᓇᐸᒋᑐᔭᐠ,” ᒪᐧᕑᐃᐢ ᑭᐃᑭᑐ.
ᐃᐁᐧ ᓂᓱᑎᑕᒧᐃᐧᐣ ᒪᓯᓇᐦᐃᑲᐣ ᑕ ᐊᓂᔑᓇᐯᐃᐧᐱᐦᐃᑲᑌ ᑭᒋᔭᐦᐊᐠ ᑫᐃᐧᓇᐊᐧ ᒋᓇᓇᒋᑲᑐᐊᐧᐨ ᐊᓂᐣ ᐁᐃᑭᑐᒪᑲᓂᐠ. ᒥᓇᐊᐧ ᑕᐢ ᑕᒪᐊᐧᒋᐦᐃᑎᓇᓂᐊᐧᐣ ᑭᐃᐢᑲᐧ ᓇᓇᑲᒋᑐᐊᐧᐨ ᐃᐁᐧ ᑫᐊᓂᔑᓇᐯᐃᐧᐱᐦᐃᑲᑌᐠ ᒪᓯᓇᐦᐃᑲᐣ.
ᐊᓂᔑᓂᓂᐊᐧᐠ ᐃᒪ ᐃᐢᑯᓂᑲᓂᐠ ᑲᑲᐯᔑᐊᐧᐨ ᑭᐃᑭᑐᐊᐧᐠ ᐁᑲ ᐊᐊᐧᔑᒣ ᐊᐃᐧᔭ ᒋᒪᓯᓇᐦᐅᑎᓯᐨ ᐃᒪ ᒪᒪᐤ ᐃᐧᑕᓄᑭᒥᑎᐃᐧᐣ ᓇᑯᒥᑎᐃᐧᐣ ᐱᑯ ᐁᐦᑕ ᐊᐁᐧ ᐅᑭᒪᑲᐣ.
“ᓂᑭ ᒥᓇᒥᓇᐠ ᐊᓂᔑᓂᓂᐊᐧᐠ ᐃᐧᓇᐊᐧ ᒋᐅᓀᐣᑕᒧᐊᐧᐨ. ᐁᑲᐧ ᑕᐢ ᓂᑲ ᑭᐁᐧᐢᑲᒥᐣ ᒥᓇ ᒋᑭᐁᐧ ᐅᓇᒋᑫᔭᐠ ᐯᔑᑲᐧᐣ ᒋᐃᔑ ᐊᓂᑲᐊᐧᔭᐠ,” ᒪᐧᕑᐃᐢ ᑭᐃᑭᑐ. “ᓂᐣ ᐁᐅᑭᒪᐊᐧᑭᓯᔭᐣ, ᑲᐃᐧᐣ ᒋᑭᐃᓯᓭᐠ ᒋᒧᐦᒋ ᐊᔭᐱᔭᐣ ᐁᑲ ᓇᐣᑕ ᒋᐃᔑᒋᑫᔭᐣ, ᑭᐢᐱᐣ ᐃᐧᒋᑕᐧᐨ ᐅᐣᑌᕑᐃᔪ ᐅᑭᒪᐃᐧᐣ ᓇᐣᑕ ᑲᔦ ᑲᐃᐧᐣ.”
ᐊᐢᑕᒪᐣ ᐃᑭᑐ ᑭᒋᓇᒣᑯᓯᑊ ᐃᓂᓂᐊᐧᐠ ᐅᑭ ᑭᐸᑯᐢᑲᓇᐊᐧᐸᐣ ᐱᐊᐧᐱᑯᑫᐃᐧ ᐅᓇᑯᓂᑫᐃᐧᐣ, ᒥᓇ ᑲᔦ ᐅᓇᑯᓂᑫᐃᐧᐣ 191, ᑭᒋ ᑭᐁᐧᑎᓄᐣᐠ ᐅᓇᑯᓂᑫᐃᐧᐣ.
“ᒪᓯᓇᐦᐃᑲᑌ ᐃᒪ ᑭᒋᓇᒣᑯᓯᑊ ᐃᓂᓂᐊᐧᐠ ᐁᑭ ᑭᐸᑯᐢᑲᒧᐊᐧᐨ ᐅᓇᑯᓂᑫᐃᐧᓇᐣ ᐁᑲᐧ ᑕᐢ ᑲᔦ ᐊᒥᐱᑯ ᑫᐃᔑ ᑲᑭᐸᑯᐢᑲᒪᑭᐣ ᐃᑫᐧᓂᐊᐧᐣ ᐅᓇᑯᓂᑫᐃᐧᓇᐣ ᑕᐱᓇᑲ ᓂᑲᑫᐧ ᓂᓯᑕᐁᐧᐣᑕᒥᐣ ᓂᑕᓂᔑᓇᐯᐃᐧ ᒥᓂᑯᐃᐧᓂᓇᐣ ᒥᓇ ᓂᒪᓂᑐᐃᐧ ᒥᓂᑯᐃᐧᓂᓇᐣ. ᐅᑫᐧᓂᐊᐧᐣ ᓂᔑᐣ ᑲᐃᐧᐣ ᐊᓂᒧᒋᑲᑌᓯᓄᐊᐧᐣ ᐊᓂᔑᓇᐯ ᐅᒪᓂᑐᐃᐧ ᒥᓂᑯᐃᐧᓇᐣ.”
ᑭᐃᑭᑐ ᐱᕑᐊᐟ: “ᐃᐁᐧ ᓂᐢᑕᑦ ᑲᑭ ᐅᔑᐱᐦᐃᑲᑌᐠ ᐊᓂᑭᐃᐧᐣ ᓂᓱᑎᑕᒧᐃᐧᐣ ᒋᒪᒪᐤ ᐃᐧᐣᑕᓄᑭᒥᑎᓇᓂᐊᐧᐠ ᑲᐃᐧᐣ ᓇᐣᑕ ᑕᑐᒋᑫᒪᑲᓯᓄᐊᐧᐣ ᐃᒪ ᑭᒪᓂᑐᐃᐧ ᒥᓂᑯᐃᐧᓂᓇᐣ ᐅᒪ ᑭᒋᓇᒣᑯᓯᑊ ᐃᓂᓂᐊᐧᐠ ᑎᐯᐣᒋᑫᐃᐧᓂᐠ. ᐃᐁᐧ ᓂᐢᑕᑦ ᑲᑭ ᐅᔑᐱᐦᐃᑲᑌᐠ ᐊᓂᑭᐃᐧᐣ ᓂᓱᑎᑕᒧᐃᐧᐣ ᒋᒪᒪᐤ ᐃᐧᑕᓄᑭᒥᑎᓇᓂᐊᐧᐠ ᐃᐧᐣᒋᑫᒪᑲᐣ ᐅᐣᑌᕑᐃᔪ ᐅᑭᒪᐃᐧᐣ ᐁᑭᒋᓀᐣᑕᐠ ᑲᒪᓯᓇᐦᐃᑲᑌᐠ ᑲᒪᓇᒋᒋᑲᑌᐠ ᐊᓂᔑᓇᐯ ᐅᒪᐢᑲᐃᐧᓯᐃᐧᐣ ᒥᓇ ᐅᒪᓂᑐᐃᐧ ᒥᓂᑯᐃᐧᓂᐊᐧ ᐁᑭ ᓂᓯᑕᐃᐧᓂᑲᑌᐠ ᒥᓇ ᑲᔦ ᐁᑭ ᑭᒋ ᐅᓇᒋᑲᑌᐠ ᐃᒪ ᐸᑫᐱᐦᐃᑲᐣ 35 ᐃᒪ ᑭᒋ ᐅᓇᔓᐁᐧᐃᐧᐣ, 1982.”
ᑭᒋᓇᒣᑯᓯᑊ ᐃᓂᓂᐊᐧᐠ ᐅᑕᔭᓇᐊᐧ ᑲᐱᒥᓂᔕᐦᐊᒧᐊᐧᐨ ᐱᐣᒋᐁᐧᐱᓂᑫᐃᐧᐣ ᐊᓂᔑᓂᓂᐊᐧᐠ ᐃᓀᓂᒪᐊᐧᐨ ᒋᒪᓯᓇᐦᐅᑎᓯᓂᐨ ᐅᑭᒪᑲᓇᐣ ᒥᓇ ᐅᓇᔓᐁᐧᐃᐧᓂᐊᐧᐣ ᐃᐁᐧᓂ ᐊᓂᑭᐃᐧᐣ ᓂᓱᑎᑕᒧᐃᐧᐣ ᒋᒪᒪᐤ ᐃᐧᑕᓄᑭᒥᑎᓇᓂᐊᐧᐠ ᒪᓯᓇᐦᐃᑲᐣ.
ᑭᐢᐱᐣ ᐊᓂᔑᓂᓂᐊᐧᐠ ᐃᓀᐣᑕᒧᐊᐧᐨ ᒋᐃᐧᒋᑲᐸᐃᐧᑕᒧᐊᐧᐨ ᐊᓂᑭᐃᐧᐣ ᓂᓱᑎᑕᒧᐃᐧᐣ ᒋᒪᒪᐤ ᐃᐧᑕᓄᑭᒥᑎᓇᓂᐊᐧᐠ ᒪᓯᓇᐦᐃᑲᐣ, ᒪᐧᕑᐃᐢ ᐃᑭᑐ ᐁᓇᐣᑕᐁᐧᐣᑕᐠ ᒋᐊᐧᐸᒪᒋᐣ ᑭᒋᐅᑭᒪᐠ ᑫᐃᐧᓇᐊᐧ ᒋᐱᔕᐊᐧᐨ ᐃᒪ ᒪᐊᐧᒋᐦᐃᑎᐃᐧᓂᐠ ᐊᐦᐱ ᐃᐧᒪᓯᓇᐦᐅᑎᓯᓇᓂᐊᐧᐠ ᑫᐃᐧᓇᐊᐧ ᑫᒋᐊᐧᐠ ᒋᒪᓯᓇᐦᐅᑎᓯᐊᐧᐨ.