ᑭᒪᒥᓇᐊᐧᐠ ᐅᓇᑯᑕᒪᑯᐃᐧᓂᐊᐧ ᑕᔑᑫᐃᐧᓂᐠ ᑲᑭᐱᑕᓇᓄᑭᑕᒪᑫᐊᐧᐨ

Create: 12/01/2015 - 19:41

ᒥᐢᓯᓇᐱ ᑲᐅᒋᐨ ᔑᕑᓫᐃ ᐦᐊᕑᐣ ᑭᒥᓇᑲᓂᐃᐧ ᐁᒥᐣ ᓇᑯᒋ ᓂᑲᓂᑕᒪᑫᐃᐧᓂᐠ ᐃᓀᑫ ᑲᐃᔑᑲᐡᑭᐦᐅᐨ ᐁᐅᒋ ᓇᓇᑯᒪᑲᓄᐨ ᒣᑲᐧᐨ ᓂᔑᑕᓇᓴᑲᓱᔕᐸᐧ ᑕᓱᔭᑭ ᑭᐁᐧᐃᐧᐣ ᑲᐸᑭᑎᓂᑲᑌᑭᐣ ᑲᐊᐧᐸᑕᐦᐃᐊᐧᓄᐊᐧᐠ ᑲᐅᒋᓇᓇᑯᒥᑕᐧ ᐊᐃᐧᔭᐠ ᐅᑕᓄᑭᐃᐧᑲᐡᑭᑕᒪᓱᐃᐧᓂᐊᐧ.
ᐁᐅᒋ ᑭᑭᓇᐊᐧᓯᓇᑯᑕᒪᐃᐧᑕᐧ ᒪᐊᐧᐨ ᑲᑭᒋᓀᑕᑲᐧᓂᐠ ᐃᑫᐧᐊᐧᐠ ᑲᐱᒥᐃᐧᑐᐊᐧᐨ ᐅᑕᓄᑭᐃᐧᓂᐊᐧ, ᐁᑲᐧ ᑕᐡ ᑲᐃᐧᐣ ᐃᑯ ᐁᑕ ᓂᐣ ᑲᑲᓇᐊᐧᐸᒥᑎᓱᔭᐣ ᐅᐁᐧ ᑲᐅᑕᐱᓇᒪᐣ ᐃᐁᐧ ᐱᑯ ᑲᔦ ᑯᑕᔭᑭᐠ ᐃᑫᐧᐊᐧᐠ ᐁᐅᒋᐅᑕᐱᓂᑫᑕᒪᐊᐧᑲᐧ, ᑭᐃᑭᑐ ᐦᐊᕑᐣ ᒣᑲᐧᐨ ᓴᑭᐸᑲᐃᐧᐱᓯᑦ 9 ᑲᑭᐸᑭᑎᓂᑲᑌᑭᐣ ᓇᑯᑕᒪᑫᐃᐧᓇᐣ ᐁᐧᑎ ᓀᑲᐃᐧᓴᑲᐃᑲᓂᐠ. ᒪᒪᐤ ᑕᔑᑫᐃᐧᓂᐠ ᐁᐅᒋ ᐃᐧᒋᐦᐃᑎᓇᓂᐊᐧᐠ, ᐊᓂᐡ ᑲᐃᐧᐣ ᑭᐯᔑᑯᑐᒋᑲᑌᓯᐣ, ᒥᑕᐡ ᑲᐅᒋ ᐅᑕᐱᓇᒪᐣ ᐅᐁᐧ ᓇᓇᑯᒥᑯᐃᐧᐣ ᑯᑕᑭᔭᐠ ᐁᐅᒋᐅᑕᐱᓂᑫᑕᒪᐊᐧᑲᐧ.
ᐊᐧᐁᐧ ᐦᐊᕑᐣ ᒣᑲᐧᐨ ᓂᑲᓂ ᐊᐱᑕᒪᑫ ᒥᐢᓯᓇᐱ ᐅᒪᐡᑭᑯᐠ ᑭᒋᐦᐊᐠ ᑲᐅᑭᐧᓄᐊᐧᐨ, ᐁᑲᐧ ᒥᓇ ᓂᑲᓂ ᐊᐱᑕᒪᑫ ᑭᒋᐦᐊᐠ ᑲᐅᑭᐧᓄᐊᐧᐨ ᑭᐁᐧᑎᓄᐠ ᐊᐧᐸᓄᐠ ᐃᓀᑫ ᐅᑭᒪᑲᓇᐠ ᑲᐅᒋᐃᐧᑕᓄᑭᒥᑐᐊᐧᐨ, ᐁᑲᐧ ᒥᓇ ᐃᐧᐣ ᐅᓂᑲᓂᐅᓇᑐᐣ ᒥᓯᐁᐧᐁᑲᒥᐠ ᑲᒪᑌᐧᐦᐃᑫᐊᐧᐨ ᑲᒣᑕᐁᐧᐊᐧᐨ, ᒥᓇ ᐃᒪ ᐃᔑᑕᑭᐧ ᒪᐡᑭᑯᐊᐧᐠ ᐊᐦᑭᐃᐧ ᓇᓇᑲᒋᒋᑫᐃᐧᐣ ᐊᐱᑕᒪᑫᐃᐧᓂᐠ ᒥᓇ ᐅᑕᓇᐠ ᑭᐱᐅᑭᒪᑲᓂᐃᐧᐸᐣ, ᑭᐃᑭᑐ ᐃᐧᓇᐊᐧ ᑭᒋᐦᐊᐠ ᐃᓇᐸᑎᓯᐊᐧᐠ ᒋᔭᓂ ᐊᓂᑫᐃᐧᐣᑕᒪᑫᐊᐧᐨ ᑲᑭᐱᐃᔑ ᑲᑭᑫᐣᑕᒧᐊᐧᐨ ᑫᑯᓇᐣ ᐁᑲᐧ ᒥᓇ ᑲᐧᔭᐠ ᒋᐃᔑ ᑭᑭᓄᐦᐊᒪᐊᐧᐊᐧᐨ ᐅᐡᑲᑎᓴᐣ.
ᒥᐦᐅᐁᐧ ᓄᑯᑦ ᐁᓂᔑᒥᓂᑕᐧ ᒋᔭᓂ ᐃᓇᓄᑭᑕᒪᑫᐊᐧᐨ ᑭᒋᐦᐊᐠ, ᐃᑭᑐ ᐦᐊᕑᐣ. ᐊᓂᐡ ᑲᐃᐧᐣ ᐯᔑᑲᐧᐣ ᒋᐃᓯᓭᓂᐠ ᐅᑎᓇᓄᑭᐃᐧᓂᐊᐧ ᓄᑯᑦ ᑲᑭᔑᑲᓂᐠ ᐊᐱᐨ ᐃᐧᐣ ᑲᔭᐡ ᐅᑕᓇᐠ ᑲᑭᐱᐃᓇᓄᑭᐊᐧᐸᐣ. ᑭᑭᔭᓂ ᑭᑫᐣᑕᒥᐣ ᒋᐅᑕᐱᓇᒪᓱᔭᐠ ᐃᐡᑯᓄᐃᐧᐣ ᐁᑲᐧ ᐊᐱᐣ ᒋᐃᔑᒪᒪᐃᐧᓇᒪᐠ ᒥᓇ ᐊᐱᐣ ᑎᐱᓇᐁᐧ ᒋᐃᔑᐊᐸᒋᑕᒪᓱᔭᐠ ᒥᓇ ᒋᐃᔑ ᑲᑫᐧᑭᑕᐸᒋᑐᔭᐠ ᐊᓂᐣ ᑫᑭᐃᔑ ᒥᓄᓭᓇᓂᐊᐧᐠ.
ᐦᐊᕑᐣ ᐅᑌᐯᐧᑕᐣ ᒥᓂᑯᐠ ᐃᑯ ᑲᐱᒪᑎᓯᓇᓂᐊᐧᐠ ᒋᑭᐱᒥ ᑭᑭᓄᐦᐊᒪᑯᓯᓇᓄᐊᐧᐠ ᑫᑯᓇᐣ, ᓄᑯᒥᑫ ᐅᑭᑭᔑᑐᓇᐸᐣ ᐅᑎᐡᑯᓄᐃᐧᐣ ᐁᐧᑎ ᑭᒋᐃᐡᑯᓄᑲᒥᑯᐠ 2009 ᑲᔭᑭᐊᐧᐠ ᒣᑲᐧᐨ 69 ᑲᑕᓱᔭᑭᐃᐧᓀᐨ.
ᒥᐱᑯ ᑭᔭᐱᐨ ᐁᔑᐱᒥᐃᐧᑕᓄᑭᒪᑲᐧ ᓂᒋ ᑭᒋᐦᐊᐠ, ᐃᑭᑐ ᐦᐊᕑᐣ. ᓂᐃᐧ ᐃᐧᑕᓄᑭᒪᐠ ᑲᔦ ᐅᐡᑲᑎᓴᐠ.
ᐦᐊᕑᐣ ᐅᑌᐯᐧᑕᐣ ᒪᓂᑐᐣ ᐁᑭᒥᓂᑯᐨ ᒪᐡᑲᐃᐧᓯᐃᐧᐣ ᒋᐅᒋ ᐊᐧᐃᒋᐦᐃᐁᐧᐨ ᐃᒪ ᐃᓀᑫ ᓂᑲᓂᑕᒪᑫᐃᐧ ᐊᓄᑭᑕᒪᑫᐃᐧᓂᐠ.
ᓂᑲᓂᑕᒪᑫᐃᐧ ᐊᓄᑭᐃᐧᐣ ᑲᐃᒋᑲᑌᐠ ᒥᔑᓇᐧᔦᑲᐣ ᐃᓇᓄᑭᐃᐧᐣ, ᐃᑭᑐ ᐦᐊᕑᐣ. ᓇᐱᐨ ᐊᑲᓭᐣᑕᑲᐧᓄᐣ ᐅᓄᐁᐧᓂᐊᐧᐣ ᑐᑲᐣ ᐃᓇᓄᑭᐃᐧᓇᐣ ᑭᑕᔑᑫᐃᐧᓂᐠ ᒥᓇ ᑭᑎᐯᐣᒋᑫᐃᐧᓂᐠ ᐁᑲᐧ ᐊᐱᐣ ᑭᒋᐊᓄᑭᐃᐧᓇᐣ ᐊᔭᒪᑲᓄᐣ ᒪᔭᑦ ᑲᐃᔑᐊᔭᒪᑲᐠ ᑭᐱᒥᐃᐧᒋᑫᐃᐧᓂᑲᐠ. ᐅᐣᒋᑕ ᐱᑯ ᐃᒪ ᑲᑭᓇ ᐊᐃᐧᔭᐠ ᑫᑯᐣ ᒋᑭ ᐃᓇᓄᑭᐸᐣ. ᐣᑎᓀᑕᐣ ᒥᓇ ᐁᑭᒋᓀᑕᑲᐧᐠ ᑭᐡᐱᐣ ᐃᐧᑲᑫᐧᑲᐡᑭᑐᔭᐠ ᒋᐅᐱᑭᔭᐠ ᑲᐊᓂᔑᓂᓂᐃᐧᔭᐠ, ᑭᐡᐱᐣ ᑌᐯᐧ ᒋᑭᔭᓂᔑᓇᑯᓯᔭᐠ ᐊᔕ ᑲᑭᐱᐃᔑ ᓂᑲᓇᒋᒥᑯᓯᐊᐧᐨ ᑲᓂᑲᓂᑕᒪᑯᔭᐠ ᐅᐁᐧᑎ ᐃᓀᑫᑲᒥᐠ, ᐁᐧᑲ ᒥᓇ ᒋᑭᑭᓄᐦᐊᒪᐊᐧᑭᑕᐧ ᐊᐃᐧᔭᐠ ᑲᐧᔭᐠ ᒋᑲᑫᐧᐃᔑᐱᒪᑎᓯᐊᐧᐨ ᐅᒪ ᐊᐦᑭᐠ, ᒋᑲᓇᑌᑕᒧᐊᐧᐨ ᐊᐦᑭᓂ ᒥᓇ ᐱᑯ ᒋᑭᑌᓂᒥᑎᓇᓂᐊᐧᐠ.
ᐦᐊᕑᐣ ᑭᔕᔑᑭᒥᐁᐧ ᐁᑲ ᒋᔕᑫᐧᓂᒧᐨ ᐊᐃᐧᔭ ᐃᐧᐅᑕᐱᓇᐠ ᓂᑲᓂᑕᒪᑫᐃᐧ ᐊᓄᑭᐃᐧᐣ.
ᐊᑎᑲ ᐊᐧᐁᐧ ᐯᔑᐠ ᐅᑭᒋ ᑭᑭᓄᐦᐊᒪᑫ ᑲᑭᐃᑭᑐᐸᐣ, ᒪᐦᒋᐱᒧᓭᐃᐧᐣ ᐅᐣᒋ ᒪᒋᓭ ᓂᐢᑕᑦ ᑲᐊᐣᒋᑕᑯᑭᓇᓂᐊᐧᐠ, ᐃᑭᑐ ᐦᐊᕑᐣ. ᐣᑌᐯᐧᑕᐣ ᐅᐁᐧ ᐃᑭᑐᐃᐧᐣ, ᓂᒪᐡᑲᐁᐧᐣᑕᐣ ᐅᐁᐧ ᐣᑌᐯᐧᑕᒧᐃᐧᐣ.
ᐃᐧᓇᐢᐠ ᐁᐅᒋᐨ ᒥᔐᐣ ᐦᐊᐣᑐᕑ ᐅᐡᑲᑎᐢ ᑭᒥᓇᑲᓂᐃᐧ ᐊᓂᔑᓇᐯ ᐊᐢᑭ ᑭᒋᐦᐊ ᓇᓇᑯᒧᐃᐧ ᒥᑭᐁᐧᐃᐧᐣ, ᒉᒥᐢ ᐯᐣᓴᐣ ᓭᐱᐣ ᐅᐡᑲᑎᓯᐃᐧ ᒪᒥᓄᐡᑲᒪᑫᐃᐧ ᐊᐱᑕᒪᑫᐃᐧᐣ ᑲᐃᔑᐊᐱᑕᒪᑫᐨ, ᐅᑭᐅᑕᐱᓇᐣ ᐊᓂᔑᓇᐯ ᐊᐢᑭ ᐅᐡᑲᑎᐢ ᓂᑲᓂᑕᒪᑫᐃᐧᐣ ᒥᓇ ᑕᔑᑫᐃᐧᓂᐠ ᑲᐃᔑᐃᐧᒋᑕᐧᐊᐧᐨ ᓇᓇᑯᒧᐃᐧ ᒥᑭᐁᐧᐃᐧᐣ, ᒥᒋᑲᐣᓴᑲᐃᑲᓂᐠ ᑲᐅᒋᐨ ᐁᐢᑐᕑ ᒪᐠᑫ ᑭᐃᓀᓂᒪᑲᓂᐧᐃ ᒋᒥᓇᑲᓂᐧᐃᐨ ᐊᓂᔑᓇᐯ ᐊᐢᑭ ᐅᐡᑲᑎᐢ ᑲᐃᐡᑯᓄᐃᐧ ᑭᑫᐣᑕᓱᐨ ᑲᐃᔑᑲᐡᑭᐦᐅᐨ ᐁᐅᒋ ᐊᐧᐸᑕᐦᐃᐨ, ᐊᐧᓇᒪᐣᓴᑲᐃᑲᓂᐠ ᕑᐊᐱᕑᑕ ᒣᒣᑫᐧ ᑭᐃᓀᓂᒪᑲᓂᐃᐧ ᒋᒥᓇᑲᓂᐃᐧᐨ ᐊᓂᔑᓇᐯ ᐊᐢᑭ ᐅᐡᑲᑎᐢ ᐅᒣᑕᐁᐧ ᑲᐃᔑᑲᐡᑭᐦᐅᐨ ᐁᐅᒋ ᐊᐧᐸᑕᐦᐃᐨ, ᐊᐧᐃᐧᔦᑲᒪᐠ ᒐᐧᕑᑎᐣ ᑭᐧᑭᐧᐡ ᑭᒥᓇ ᐊᓂᔑᓂᓂᐊᐧᑎᓯᐃᐧ ᓂᑲᓂᑕᐧᑫᐃᐧᐣ ᑲᐃᔑᑲᐡᑭᐦᐅᐨ ᐁᐅᒋ ᐊᐧᐸᑕᐦᐃᐨ. ᑕᑲᐧ ᑕᑲᒪᐤ ᑲᐅᒋᐨ ᑎᓇ ᑲᐣᔭᐣ ᑭᒥᓇ ᐊᓂᔑᓇᐯ ᐊᐢᑭ ᐃᑫᐧ ᑲᐃᔑᑲᐡᑭᐦᐅᐨ ᐁᐅᒋ ᐊᐧᐸᑕᐦᐃᐨ, ᐊᓂᔑᓇᐯ ᐊᐢᑭ ᑲᐅᒋᑎᐯᐣᑕᑯᓯᐨ ᑕᐧᓇ ᑭᐨᒪᐣ ᑭᒥᓇ ᐊᓂᔑᓇᐯ ᐊᐢᑭ ᐊᓄᑭᐃᐧᐣ ᑲᐃᔑᑲᐡᑭᐦᐅᐨ ᐁᐅᒋ ᐊᐧᐸᑕᐦᐃᐨ ᐁᑲᐧ ᐊᑎᑯᓴᑲᐃᑲᐣ ᒥᓇ ᓀᑲᐃᐧᓴᑲᐃᑲᐣ ᐊᓂᔑᓂᓂᐊᐧᐠ ᑭᒥᓇᐊᐧᐠ ᑕᔑᑫᐃᐧᐣ ᒥᑭᐁᐧᐃᐧᐣ.
ᑲᐃᐧᐣ ᐣᑐᒋᐃᓀᑕᓇᐸᐣ ᒋᒥᓂᑯᔭᐣ ᐅᐁᐧ ᒥᑭᐁᐧᐃᐧᐣ, ᐃᑭᑐ ᐦᐊᐣᑐᕑ, ᐅᑕᓇᐠ ᑲᑭᐱᐅᑭᒪᑲᓂᐃᐧᐸᐣ ᐅᑕᔑᑫᐃᐧᓂᐠ ᒥᔑᐣ ᑫᑯᓇᐣ ᑲᑭᐱᐊᐃᓇᓄᑭᑕᒪᑫᐨ ᐁᐊᓄᑲᑌᑭᐣ ᑫᑯᓇᐣ ᐅᑕᔑᑫᐃᐧᓂᐠ ᒥᓇ ᐱᑯ ᒉᒥᐢ ᐯ ᐃᓀᑫ ᒥᔑᓄᔭᑭ. ᐣᑕᑕᒥᑲᐠ ᐃᑯ ᑲᑭᓇ ᑫᑯᐣ ᐣᑭᐅᒋ ᑭᑫᐣᑕᐣ ᒥᓇ ᐱᑯ ᓂᒥᔓᑦ ᒥᓇ ᓄᑯᒥᐢ ᑲᑭᐱ ᑭᑭᓄᐦᐊᒪᐃᐧᔑᐊᐧᐨ.
ᐁᑲᐧ ᒥᓇ ᐊᐧᐁᐧ ᐦᐊᐣᑐᕑ ᐅᑭᐃᐧᒋᑐᐣ ᓂᐢᑕᑦ ᐁᑲᒪᒋᒋᑲᑌᐠ ᐊᐧᐊᐧᑌ ᐱᒧᒋᑫᐃᐧᐣ ᒥᓇ ᒣᑲᐧᐨ ᐃᒪ ᐊᐱᑕᒪᑫ ᒥᓇ ᐱᑯ ᑭᐃᐧᒋᑕᐧᐸᐣ ᐁᐅᐡᑭᒪᑕᓄᑲᑌᐠ ᐯᔭᑯᑌᓄ ᐊᐊᐧᔑᔑᐃᐧᑭᒪᐃᐧᐣ 1998 ᐊᐱᐣ ᑲᑭᐳᓇᓄᑭᑕᒪᑫᐨ ᐃᒪ.
ᐯᔑᑯᔕᐳᔭ ᐣᑭᐱᓂᑲᓂᐡᑲᒪᑫ ᐃᒪ ᐯᔭᑯᑌᓄ ᐊᐊᐧᔑᔑᐃᐧᑭᒪᐃᐧᓂᐠ ᐁᐧᑎ ᒧᓱᓂᐠ, ᐃᑭᑐ ᐦᐊᐣᑐᕑ. ᐊᐱ ᒪᐊᐧᐨ ᓂᐢᑕᑦ ᑲᒪᒋᑕᔭᑭᐸᐣ, ᑭᐃᑭᑐᐸᓂᐠ ᐅᑭᒪᑲᓇᐠ ᐅᓴᑦ ᒥᔑᐣ ᐣᑕᐊᐧᔑᔑᒥᓇᓂᐠ ᐁᑭᐱᐊᐧᓂᐦᐊᑭᑕᐧ
ᑭᐁᐧᐃᐧᐣ ᑲᑭᐸᑭᑎᓂᑲᑌᑭᐣ ᓇᑯᑕᒪᑫᐃᐧᓇᐣ ᑲᑭᒥᓂᑕᐧ ᑲᓂᓯᑕᐁᐧᑕᒧᐊᐧᐨ ᐁᑲᐃᐧᑲ ᐁᐡᑲᐧᓭᐠ ᑭᑭᓄᐦᐊᒪᑫᐃᐧᐣ
ᐁᐧᑎ ᐁᐧᒥᑎᑯᔑᐃᐧ ᐊᐊᐧᔑᔑᐃᐧᑭᒪᐃᐧᓂᐠ ᔕᐊᐧᓄᐠ. ᓂᔓᔭᑭ ᐣᑭᑕᔑᑲᒥᐣ ᒥᓂᑯᐠ ᐊᐱᐣ ᑲᑭᔭᓂᐃᓯᓭᐠ ᒋᒪᒋᑐᔭᐠ. ᑭᒥᔑᓇᑎᐣ ᑫᑯᐣ ᑫᑭᐅᒋ ᑲᑫᐧ ᑭᐱᐡᑲᑯᔭᐠ ᐊᓂᐡ ᐁᑭᐃᑭᔭᐠ ᒋᐱᒥᓂᔕᐦᐊᒪᐠ ᐅᑭᒪᐅᐣ ᐅᑐᓇᔓᐁᐧᐃᐧᓇᐣ.
ᒉᒥᐢ ᐯᐣᓴᐣ ᐅᑭᐅᑕᐱᓇᐣ ᐊᓂᔑᓇᐯ ᐊᐢᑭ ᐅᐡᑲᑎᐢ ᓂᑲᓂᑕᒪᑫᐃᐧᐣ ᒥᓇ ᑕᔑᑫᐃᐧᓂᐠ ᐸᐸᒥᓯᐃᐧᐣ ᑲᑭᒥᓂᑕᐧ ᓭᐱᐣ ᐅᐡᑲᑎᓯᐃᐧ ᒪᒥᓄᐡᑲᒪᑫᐃᐧ ᐊᐱᑕᒪᑫᐃᐧᐣ ᑲᐃᔑᐊᐱᑕᒪᑫᐊᐧᐨ.
ᒥᐢᑕᐦᐃ ᐣᑭᒋᓀᑕᒥᐦᐃᑯᐣ ᐅᐁᐧ, ᐃᑭᑐ ᐯᐣᓴᐣ. ᐅᐁᐧ ᑲᑭᒥᓂᑯᔭᐠ ᑲᐃᐧᓂᐣ ᐃᑯ ᐁᑕ ᓂᓇᐃᐧᐟ, ᑲᑭᓇ ᐱᑯ ᐊᐃᐧᔭ ᐅᒪ ᐊᓂᔑᓇᐯ ᐊᐢᑭ ᑲᐊᐱᑕᑲᒥᑲᐠ ᐁᐅᒋ ᒥᓇᑲᓂᐃᐧᐨ.
ᐊᒥ ᐁᑐᑕᐠ ᐯᐣᓴᐣ ᐁᒪᓯᓇᐦᐊᑭᐣ ᑫᑯᓇᐣ, ᐁᐊᒋᒧᐃᐧᓂᑫᐱᐦᐃᑫᐨ ᒥᓇ ᐅᑭᑭᓄᐦᐊᒪᐊᐧᐣ ᐅᐡᑲᑎᓴᐣ ᒋᓂᑕ ᒪᓯᓇᑭᓯᑫᐊᐧᐨ ᒥᓇ ᒋᒪᓯᓇᑌᓯᒋᑫᐊᐧᐨ ᐃᒪ ᑲᐃᔑᐸᐸᒥᓯᐨ ᓭᐱᐣ ᐅᐡᑲᑎᓯᐃᐧ ᑎᐸᒋᒧᐃᐧᓂᑫᐃᐧᐣ. ᐁᑲᐧ ᒥᓇ ᐃᒪ ᐃᔑᐊᓄᑭ ᕑᐁᐢ ᓀᔑᐣ ᒪᓯᓇᑭᓯᑫᐃᐧᐣ ᐁᐅᒋ ᐃᐧᑕᓄᑭᒥᑯᐨ ᑫᕑᐃᓇ ᐊᐧᐸᐢ ᐁᐧᐱᑫᐠ ᐁᐅᒋᐨ, ᒥᐦᐃᒪ ᑫᐃᐧᐣ ᐁᔑᑕᑭᐧᐨ ᓭᐱᐣ ᐅᐡᑲᑎᓯᐃᐧ ᒪᒥᓄᐡᑲᒪᑫᐃᐧ ᐊᐱᑕᒪᑫᐃᐧᐣ ᑲᐃᔑᐊᐱᑕᒪᑫᐊᐧᐨ. ᓂᐱᓇᒥᐠ ᑲᐅᒋᐨ ᓫᐊᔾᒐ ᐦᐊᐊᐧᕑᐟ ᔓᑲᐣᐦᐁᐟ ᒥᓇ ᐊᑕᐊᐧᐱᐢᑲᐟ ᑲᐅᒋᐨ ᐊᓫᐃᓴᐣ ᑫᔾ ᑫᐃᐧᓇᐊᐧ ᐃᒪ ᐅᐡᑲᑎᓯᐃᐧ ᒪᒥᓄᐡᑲᒪᑫᐃᐧ ᐊᐱᑕᒪᑫᐃᐧᓂᐠ ᐃᔑᐊᐱᑕᒪᑫᐊᐧᐠ.
ᐊᐧᐸᐢ ᐅᒥᓀᐣᑕᐣ ᐁᒪᓯᓇᐦᐃᑫᐨ ᒥᓇ ᐁᑭᑐᒋᑲᑫᐨ ᑭᑐᒋᑫᐃᐧ ᐊᐸᒋᒋᑲᓇᐣ ᒥᓇ ᐁᒣᑕᐁᐧᐨ ᑐᐦᐊᐣ ᑲᐸᐸᒪᑫᐧᐸᐦᐅᐨ ᒥᓇ ᐸᐸᒪᑫᐧᐸᐦᐃᑫᐃᐧᐣ, ᔓᑲᐣᐦᐁᐟ ᐅᑕᔑᑫᐃᐧᓂᐠ ᐅᐡᑲᑎᓯᐃᐧ ᐊᓄᑭᑕᒪᑫ ᐁᑲᐧ ᒥᓇ ᒧᒋᐊᓄᑭᑕᒪᑫ ᑭᐁᐧᑎᓄᐠ ᔕᐊᐧᓄᐠ ᐃᐧᑕᓄᑭᒥᑐᐃᐧᓂᐠ, ᑫᔾ ᐃᐧᐣ ᐅᑭᑭᔑᑐᐣ ᐅᑎᐡᑯᓄᐃᐧᐣ ᓭᐣᐟ ᓫᐊᕑᐃᐣᐢ ᑲᐧᓫᐃᐨ ᒥᓇ ᑯᑕᑭᓂ ᐃᐡᑯᓄᐃᐧᓂ ᐅᑭᐅᑕᐱᓇᐣ ᐁᐧᑎ ᑫᑦᑊᕑᐃᔭᐣ ᑲᐧᓫᐃᐨ ᐁᑲᐧ ᒣᑲᐧᐨ ᑭᐣᐢᑎᐣ ᐃᔑᑲᐯᔑ.
ᓂᐃᐧᒪᓇᒋᑐᒥᐣ ᐣᑎᔑᑭᔐᐧᐃᐧᓂᓇᐣ, ᓂᐃᐧᒪᓇᒋᑐᒥᐣ ᐣᑕᓂᔑᓂᓂᐊᐧᑎᓯᐃᐧᓂᓇᐣ ᐃᒪ ᐃᓀᑫ ᒪᓯᓇᑌᓯᒋᑫᐃᐧᓂᑫᐃᐧᓂᐠ ᒥᓇ ᐁᐃᐧᐅᒋ ᐊᐧᐸᑕᐦᐊᑭᑕᐧ ᐊᐃᐧᔭᐠ ᒥᓯᐁᐧᑲᒥᐠ ᑫᓂᓇᐃᐧᐟ ᐁᑲᐡᑭᑐᔭᐠ ᒋᑐᑕᒪᐠ ᑫᑯᓇᐣ, ᐃᑭᑐ ᐯᐣᓴᐣ. ᓂᐃᐧᐊᐧᐸᑎᓂᐁᐧᒥᐣ ᐁᐊᔭᔭᐠ ᒥᓂᑯᐃᐧᓇᐣ, ᑲᐡᑭᐦᐅᐃᐧᓇᐣ, ᐁᑲᐡᑭᐦᐅᔭᐠ ᑫᑯᓇᐣ ᒋᐊᐃᑐᑕᒪᐠ.
ᐯᐣᓴᐣ ᐃᑭᑐ ᓭᐱᐣ ᐅᐡᑲᑎᓯᐃᐧ ᒪᒥᓄᐡᑲᒪᑫᐃᐧ ᐊᐱᑕᒪᑫᐃᐧᐣ ᑲᐃᔑᐊᐱᑕᒪᑫᐊᐧᐨ ᒣᑲᐧᐨ ᐅᐃᐧᑲᑫᐧ ᐅᔑᑐᓇᐊᐧ 24 ᒋᑕᓱ ᐸᐸᑭᑭᓂᑲᓀᔭᓂᐠ ᓭᐱᐣ ᑎᐸᒋᒧᒪᓯᓇᐦᐃᑲᓂ ᒋᔑᐸᐸᑭᑎᓂᑲᑌᑭᐣ ᐃᐡᑯᓂᑲᓇᐣ.
ᒥᑐᓂ ᑕᐡ ᒋᑫᐣᑕᑲᐧᐣ ᐅᐁᐧ, ᑲᐃᐧᐣ ᒥᓇ ᑲᔦ ᒋᑲᑫᐧ ᒥᔕᑐᔭᐠ ᐅᐁᐧ ᑲᐱᒪᓄᑲᑕᒪᐠ, ᒥᐱᑯ ᐁᔑᐸᐱᒪᓄᑭᔭᐠ, ᐃᑭᑐ ᐯᐣᓴᐣ. ᓂᐊᐧᐃᒋᐦᐃᑎᒥᐣ, ᓂᑲᑫᐧᔕᔑᐯᐣᑕᒥᐣ, ᒥᓇ ᒥᐢᑕᐦᐃ ᑕᑲᐧᐣ ᐊᓄᑭᐃᐧᐣ. ᑭᒋᓀᑕᑲᐧᐣ ᐅᒪ ᑲᑕᓇᓄᑭᔭᐣ ᓭᐱᐣ ᐊᒋᒧᒪᓯᓇᐦᐃᑲᐣ ᑲᐅᔑᒋᑲᑌᐠ ᒥᓇ ᓇᐱᐨ ᓂᒥᓀᐧᑕᐣ ᐅᐁᐧ ᑲᑐᑕᒪᐣ.
ᑭᐧᑭᐧᐡ ᐅᑭᐅᑕᐱᓇᐣ ᐊᓂᔑᓇᐯ ᐊᐢᑭ ᐅᐡᑲᑎᐢ ᐊᓂᔑᓂᓂᐊᐧᑎᓯᐃᐧ ᐃᔑᒋᑫᐃᐧᐣ ᓇᓇᑯᒧᐃᐧ ᐊᐧᐸᑕᐦᐃᑯᐃᐧᐣ ᒥᓯᐁᐧ ᐁᐅᒋ ᐊᐧᐸᑕᐦᐃᑕᐧ ᐅᐡᑲᑎᓴᐠ ᑲᐃᐧ ᓇᓇᑕᐃᐧ ᑭᑫᐣᑕᒧᐊᐧᐨ ᐅᑕᓂᔑᓂᓂᐊᐧᑎᓯᐃᐧᓂᐊᐧ ᒥᓇ ᑲᐃᔑᐱᒪᑎᓯᐨ ᐊᓂᔑᓂᓂ ᒥᓇ ᑫᐃᔑ ᓇᓂᓯᑕᐁᐧᑕᐠ ᐊᐦᑭᑲᐠ ᑲᐊᔭᐨ ᒥᓇ ᐊᐣᑎ ᑲᐱᐅᐣᑕᑲᓀᓯᐨ.
ᐊᓂᐡ ᐊᒥᐦᐅᒪ ᒪᔭᑦ ᑲᑭᐱᐅᐣᒋᔭᐠ, ᐃᑭᑐ ᑭᐧᑭᐧᐡ. ᐊᓂᐡ ᐊᒥᐦᐅᐁᐧ ᑭᓇᐃᐧᐟ ᐁᔑᐱᒪᑎᓯᔭᐠ. ᑭᓇᐃᐧᐟ ᑲᓂᑕᒪᑲᓀᓯᔭᐠ.
ᑭᐧᑭᐧᐡ ᓂᔑᐣ ᐊᐊᐧᔑᔕᐣ ᐅᑕᔭᐊᐧᐣ ᒥᓇ ᐃᒪ ᐃᔑᑕᑭᐧ ᐊᓂᔑᓇᐯ ᐊᐢᑭ ᐅᐡᑲᑎᓴᐠ ᑲᐊᐱᑕᒪᑫᐊᐧᐨ, ᐁᑲᐧ ᒥᓇ ᐃᒪ ᐅᒋᐱᒧᒋᑫᑕᒪᑫ ᐅᐣᑌᕑᐃᔪ ᐊᓂᔑᓂᓂᐃᐧ ᐅᐡᑲᑎᓴᐠ ᑲᐊᐱᑕᒪᑫᐊᐧᐨ ᐁᑲᐧ ᒥᓇ ᐃᒪ ᐃᔑᐸᐸᒥᓯ ᑲᒪᒪᐃᐧᓄᐊᐧᐨ ᐊᓂᔑᓂᓂᐃᐧ ᐅᐡᑲᑎᓴᐠ ᑲᐃᐧᑕᓄᑭᒥᑐᐊᐧᐨ, ᑭᐃᑭᑐ ᐁᐱᒥᓂᔕᐦᐊᐠ ᐊᓂᔑᓂᓂᐃᐧ ᑭᑭᓄᐦᐊᒪᑫᐃᐧᓂ ᑕᓱᐯᔑᑯᑭᔑᑲ.
ᐣᑌᐦᐃᐠ ᐣᑐᒋᐱᒥᓂᔕᐦᐊᐣ, ᐃᑭᑐ ᑭᐧᑭᐧᐡ. ᓇᐱᐨ ᑕᐡ ᐣᑭᒋᓀᑕᐣ ᑲᐅᑕᐱᓇᒪᐣ ᐅᐁᐧ ᒥᑭᐁᐧᐃᐧᐣ. ᒥᑐᓂ ᑲᔦ ᐣᑭᒋᓀᑕᒥᐦᐃᑯᐣ ᑲᐃᐧᑕᓄᑭᒪᑲᐧ ᐣᑕᓂᔑᓂᓂᒪᐠ, ᐊᓂᔑᓇᐯ, ᐅᓂᑕᒪᓀᓯᐊᐧᐠ. ᐅᑭᓇᑕᐁᐧᓂᒪᐊᐧᐣ ᑫᑲᓄᒋᑫᑕᒪᑯᐊᐧᐨ ᑲᐅᐡᑲᑎᓯᓂᐨ, ᓂᐣ ᑕᐡ ᐃᒪ ᐣᑎᔑᑲᑫᐧ ᐊᓄᑭᑕᒪᑫ.