ᑭᒋᐦᐊ ᑲᑭᓇᑲᑕᑭᐨ ᓄᑯᑦ ᐧᐃᐅᐣᒋᐃᔑᓂᑲᑌ ᐅᐡᑭ ᑲᐯᔑᐃᐧᑲᒥᐠ

ᒧᔑᐦᐅᐃᐧᐣ ᐅᑭᑐᑭᓂᑯᐣ ᐊᐱ ᒣᕑᐃ ᒪᑫ ᐁᐸᑭᑭᐱᑐᐨ ᐁᐊᑯᓀᑲᑯᑌᓂᑭᐸᐣ ᐅᐡᑭ ᑭᑭᓇᐊᐧᒋᒋᑲᓂ ᐊᑲᐧᒋᐠ ᐅᐡᑭ ᑲᐯᔑᐃᐧᑲᒥᑯᐠ ᐊᐧᓂᓇᐊᐧᑲᐠ.
ᒪᑫ ᓄᒪᑫ ᐅᑭᑲᓇᐊᐧᐸᐣᑕᐣ ᐃᐁᐧᓂ ᑲᐃᓇᓯᓇᐦᐃᑲᑌᓂᐠ.
ᒥᑕᐡ ᑭᐃᓇᓯᓇᐦᐃᑲᑌᐠ ᐃᐁᐧᓂ ᑲᑭᐸᑭᑭᓇᐠ, ᒉᓂᒪᔭ ᒪᑫ ᑲᐯᔑᐃᐧᑲᒥᐠ.
ᒉᓂᒪᔭᐦᐅᐣ ᑭᐅᑕᑕᒥ ᒥᓇ ᑭᑭᒋᐦᐊᐃᐧᐡᑲᒪᑫ ᐊᓂᔑᓇᐯ ᐊᐢᑭ ᓂᑲᓂᑕᒪᑫᐃᐧᓂᐠ ᐁᐧᑎ ᑲᑭᐅᒋᐨ ᑲᓴᐸᓇᑲᐠ. ᒥᐢᑕᐦᐃ ᐅᑭᐱᔭᓄᑲᑕᐣ ᐁᑭᐱᒥᔭᓂᒧᑕᐠ ᐊᑯᓯᐃᐧ ᐊᓄᑭᑕᒪᑫᐃᐧᐣ ᒋᐃᐧᔭᓂᒥᓄᓭᓂᐠ ᐁᐧᑎ ᑭᐁᐧᑎᓄᐠ ᐃᓀᑫ ᑲᑕᐊᐧᐨ ᐊᓂᔑᓂᓂᐊᐧᐠ. ᐁᑲᐧ ᑭᐃᐡᑲᐧᐱᒪᑎᓯ ᐊᐧᑌᐸᑲᐃᐧᐱᓯᑦ 17 ᑲᐃᓇᑭᓱᐨ 2008 ᑲᔭᑭᐊᐧᐠ 77 ᑭᑕᓱᔭᑭᐃᐧᓀ.
ᐁᑲᐧ ᒣᕑᐃ ᐁᑲᓇᐊᐧᐸᐣᑕᐠ ᐃᐁᐧᓂ ᑭᑭᓇᐊᐧᒋᒋᑲᓂ, ᐅᑭᒧᐡᑭᓀᐡᑲᑯᐣ ᐅᒧᔑᐦᐅᐃᐧᐣ. ᐅᐃᐧᒋᓂᑕᐃᐧᑭᒪᑲᓇᐣ ᑲᔦ ᐃᒪ ᑭᐊᔭᐊᐧᐣ ᒣᑲᐧᐨ ᐊᐱ ᑲᑭᐸᑭᔕᐧᑲᓄᐨ ᓭᓂᐸᐣ ᒥᓇ ᑲᑭ ᑭᑭᓇᐊᐧᒋᒋᑲᑌᐠ ᐅᐡᑭ ᑲᐯᔑᐃᐧᑲᒥᐠ ᒣᑲᐧᐨ ᐊᐧᑌᐸᑲᐃᐧᐱᓯᑦ 9 ᑲᐃᓇᑭᓱᐨ. ᒪᐊᐧᐨ ᐃᑯ ᐣᑕᑕ ᐅᑕᑭ ᑭᒋᓀᐣᑕᓇᐸᐣ ᑭᐡᐱᐣ ᐊᐧᐸᐣᑕᑭᐸᐣ ᐅᐁᐧᓂ ᐅᐡᑭ ᐊᐧᑲᐦᐃᑲᓂ, ᐃᑭᑐ ᓴᓫᐅᒪ ᐊᐣᑕᓴᐣ, ᑯᑕᑭᔭᐣ ᒉᓂᒪᔭ ᐅᑕᓂᓴᐣ.
ᐅᐁᐧ ᐅᐡᑭ ᐊᐧᑲᐦᐃᑲᐣ ᑲᑭᐅᔑᒋᑲᑌᐠ $14 ᒥᕑᐃᔭᐣ ᑕᐧᓴᐱᐠ ᑭᐃᓇᑭᐣᑌ ᐁᑲᐧ ᐊᔕ ᑲᑫ ᒥᑐᓂ ᑭᔕᓄᑲᒋᑲᑌ ᐁᑲᐧ ᒥᓇ ᐃᒪ ᐃᔑᐸᑕᑭᑌ ᑲᐱᒥᐅᔑᒋᑲᑌᐠ ᐅᐡᑭ ᒥᓄᔭᐃᐧᐣ ᐊᑯᓯᐃᐧᑲᒥᐠ.
ᐅᐁᐧ ᐅᐡᑭ ᑲᐯᔑᐃᐧᑲᒥᐠ ᑕᑕᐃᐧᓂᑲᑌ ᑯᑕᐠ ᐱᓯᑦ ᐅᐱᒪᐊᒧᐃᐧᐱᓯᑦ, ᒪᒪᐤ ᒥᑕᓱᒥᑕᓇ ᓂᐯᐃᐧᓇᐣ ᐊᔭᐊᐧᐣ, ᐃᐧᓯᓂᐃᐧᑲᒥᐠ ᑲᔦ ᐃᒪ ᑕᑕᑲᐧᐣ, ᐊᐱᐃᐧᑲᒥᐠ ᒥᓇ ᒣᑕᐁᐧᐃᐧᑲᒥᐠ ᒥᓇ ᐊᐊᐧᔑᔕᐠ ᑫᑕᔑᒣᑕᐁᐧᐊᐧᐨ.
ᐅᐡᑭ ᐅᑕᑯᓯ ᑲᐯᔑᐃᐧᑲᒥᑯᐠ ᒥᐦᐃᒪ ᑫᐱᔑᒥᐡᑲᐧᒋ ᑲᐯᔑᐊᐧᐨ ᒪᔭᑦ ᐅᑲᐯᔑᐃᐧᓂᐊᐧᐠ ᑲᐱᐅᒋᒪᒐᐊᐧᐨ
ᐃᐧᐁᐧ ᒣᑲᐧᐨ ᑲᐊᔭᒪᑲᐠ ᑲᐯᔑᐃᐧᑲᒥᐠ 39 ᐁᑕ ᐊᔭᐊᐧᐣ ᓂᐯᐃᐧᓇᐣ ᑲᐃᔑᑲᐯᔑᐦᐃᑕᐧ ᐅᑕᑯᓯᐠ ᐃᐡᑯᓂᑲᓇᐣ ᑲᐱᐅᐣᑐᓭᐊᐧᐨ ᑭᐁᐧᑎᓄᐠ.
ᐅᐁᐧ ᑲᔦ ᐅᐡᑭ ᑲᐯᔑᐃᐧᑲᒥᐠ ᑕᐸᑭᑎᓇᐊᐧᐠ ᐅᑕᑯᓯᐠ ᒋᐊᑐᐊᐧᐨ ᒥᓇ ᒋᐅᔑᑐᐊᐧᐨ ᐊᓂᔑᓂᓂᐃᐧ ᒥᒋᒪᐣ ᑲᐱᒪᒋᐃᐧᑐᐊᐧᐨ ᐁᐧᑎ ᑲᐱᐅᐣᒋᐊᐧᐨ.
ᑭᐃᓇᐧᑌᐸᐣ ᒋᐃᔑᓇᑯᒋᑲᑌᐠ ᐃᐁᐧ ᐅᐡᑭ ᑲᐯᔑᐃᐧᑲᒥᐠ ᒋᒥᓀᐧᐣᑕᑲᐧᐠ ᒥᓇ ᒋᐸᔭᑕᑫᐣᑕᑲᐧᐠ, ᑕᐱᐡᑯᐨ ᐃᑯ ᑫᑲᐟ ᑲᑭᐱᐅᒋᓇᑲᑕᐠ ᑲᐃᔑᑕᐨ ᒋᐃᓀᐣᑕᐧᑲᓂᐠ, ᐃᑭᐁᐧᓂᐊᐧᐠ ᐅᑕᑯᓯᐠ ᑲᓇᑲᑕᒧᐊᐧᐨ ᑲᐃᔑᓇᓇᒪᔦᐣᑕᒧᐊᐧᐨ ᑲᐃᔑᑲᐯᔑᐊᐧᐨ ᒥᓇ ᐱᑯ ᑲᓇᑲᓇᐊᐧᐨ ᐅᐊᐧᑯᒪᑲᓂᐊᐧ ᑲᐱᓇᒋ ᒪᐡᑭᑭᐃᐧᓂᓂᐁᐧᐊᐧᐨ.
ᒐᐧᐣ ᑲᐟᐱᐟ, ᑲᓂᑲᓂᐡᑲᐠ ᐊᐱᑕᒪᑫᐃᐧᐣ ᐃᒪ ᐊᐧᓂᓇᐊᐧᑲᐠ ᐊᓂᔑᓇᐯ ᒪᐡᑭᑭᐃᐧᑭᒪᐃᐧᐣ, ᐱᒧᒋᑫᐃᐧᐣ ᑲᐅᒋ ᓂᑲᓂ ᑲᓇᐊᐧᐸᒋᑲᑌᐠ ᐅᑕᑯᓯ ᑲᐯᔑᐃᐧᑲᒥᐠ, ᑭᐃᑭᑐ ᒥᐦᐅᒪ ᑫᐅᒋ ᐃᐧᒋᐦᐃᐁᐧᒪᑲᐠ ᒋᐅᒋ ᒥᓄᐡᑲᒪᑲᐠ ᑲᐃᔑᐱᒥᐃᐧᒋᐦᐃᑕᐧ ᐅᑕᑯᓯᐠ.
ᐁᑲᐧ ᑲᔦ ᐅᐁᐧ ᐅᐡᑭ ᐅᑕᑯᓯ ᑲᐯᔑᐃᐧᑲᒥᐠ ᑕᐃᐧᒋᐦᐃᐁᐧᒪᑲᐣ ᒋᐅᒋ ᐊᒋᐃᐧᓂᑫᒪᑲᐠ ᑲᐅᒋ ᒥᑯᐡᑲᑌᑕᒥᐦᐃᑯᐊᐧᐸᐣ ᐊᑯ ᐸᐸᑲᐣ ᑲᐊᐃᔑᐃᐧᓂᑕᐧ ᑲᐊᐣᑕᐃᐧᐃᔑ ᓇᓇᒋᒪᐡᑭᑭᐃᐧᓂᓂᐁᐧᐊᐧᐨ, ᑲᓇᓇᑕᐃᐧ ᑲᐯᔑᐦᐃᐣᑕᐧᐸᐣ ᒥᓇ ᑲᐊᐣᑕᐃᐧ ᐃᐧᓯᓂᐊᐧᐨ ᐁᑲᐧ ᐯᑭᐡ ᒋᐅᒋ ᐃᐧᒋᐦᐃᑯᐊᐧᐨ ᐃᐧᐸᐨ ᒋᔭᓂ ᒥᓄᔭᐊᐧᐨ ᐃᒪ ᑲᐃᔑ ᐸᔭᑕᑫᐣᑕᑲᐧᓂᐠ ᐅᐡᑭ ᑲᐯᔑᐃᐧᑲᒥᑯᐠ, ᐃᑭᑐ ᑲᐟᐱᐟ.
ᐊᓂᔑᓇᐯ ᐊᐢᑭ ᑭᒋᐅᑭᒪᑲᐣ ᐢᑕᐣ ᐯᕑᑎ ᑫᐃᐧᐣ ᑭᐱᔕ ᑲᑭᐸᑭᔕᐧᑲᓄᐨ ᓭᓂᐸ.
ᒪᐊᐧᐨ ᐃᑯ ᑫᐃᐧᐣ ᐅᑭᒪᒥᓄᓇᐣ ᑲᑭᐊᐱᒋ ᒪᒥᓇᐧᔑᒋᑲᑌᓂᐠ ᐅᐡᑭ ᑲᐯᔑᐃᐧᑲᒥᑯᓂ.
ᐊᒥ ᑫᓂᐣ ᐁᓀᐣᑕᒪᐣ ᐃᒪ ᒋᐅᒋ ᐃᐧᒋᐦᐃᑯᐊᐧᐨ ᐃᐧᐸᐨ ᒋᐅᒋ ᒥᓄᔭᐊᐧᐨ ᐅᒪ ᐊᔭᐊᐧᐨ, ᐃᑭᑐ ᐯᕑᑎ ᐃᑭᐁᐧᓂᐊᐧᐠ ᐅᑕᑯᓯᐠ ᐅᒪ ᑫᑲᐯᔑᐦᐃᑕᐧ.