ᑎᐯᐣᒋᑫᐃᐧᐣ ᑲᐊᐧᐅᐣᑕᑲᓀᓯᐊᐧᐨ ᑭᔭᐸᐨ ᐅᓇᓇᐣᑕᐃᐧ ᑭᑫᐣᑕᓇᐊᐧ

Create: 12/01/2015 - 19:41

ᑎᐯᐣᒋᑫᐃᐧᓇᐣ ᑲᐊᐧᐅᐣᑕᑲᓀᓯᐊᐧᐨ ᐊᔕ ᐅᑕᓂ ᒪᒥᑲᓇᐊᐧ ᓀᐣᑲᐃᐧᓴᑲᐦᐃᑲᓂᐃᐧᓂᐊᐧᐠ. ᐁᐧᐢᑲᐨ ᓂᑐᐣᒋ ᓇᓇᐣᑕᐃᐧᑭᑫᐣᑕᒥᐣ ᐅᐁᐧ ᑲᑐᑕᒪᐠ ᑲᓇᓇᐣᑕᐃᐧᑭᑫᐣᑕᒪᐠ ᐁᐧᐢᑲᐨ ᑲᑭ ᐱᒪᑎᓯᐊᐧᐨ ᐊᓂᔑᓂᓂᐊᐧᐨ, ᐃᑭᑐ ᑲᔭᐢ ᐅᑭᒪᑲᐣ ᐁᓂᐢ ᐱᐟᓫᐃᕑ ᒣᑲᐧᐨ ᐊᓂᔑᓇᐯ ᐊᐢᑭ ᑭᐁᐧᐃᐧᐣ ᑭᒋᒪᐊᐧᒋᐦᐃᑎᐃᐧᐣ ᑲᑭᔭᑭᐸᐣ. ᐱᐟᓫᐃᕑ ᓂᐢᑕᑦ ᐅᑭ ᒪᑕᓄᑲᑕᓇᐸᐣ ᐃᐧᓀᐦᑕ ᐊᐣᑎ ᑲᐅᐣᑕᑲᓀᓯᐨ ᐯᔑᑯᐊᐦᑭ ᒥᓇ ᐊᐦᐱᑕ ᐅᑕᓇᐠ ᒥᓇ ᑲᔦ ᐁᑭᐃᐧᒋᑕᐧᐨ ᐃᒪ ᐅᑕᔑᑫᐃᐧᓂᐠ ᑫᐃᐧᓂᐊᐧ ᑲᓇᓇᐣᑕᐃᐧ ᑭᑫᐣᑕᒧᐊᐧᐨ ᐊᐣᑎ ᑲᐅᐣᑕᑲᓀᓯᐊᐧᐨ ᓂᔭᓄᐱᓯᑦ ᐊᔕ ᐅᑐᐣᒋ ᓄᒋᑐᓇᐊᐧ. ᐁᑲᐧ ᑕᐢ ᐊᐦᐸᐣ, ᓂᑭ ᐊᓂᑭᑫᐣᑕᒥᐣ ᐊᐊᐧᓀᐣ ᐃᑫᐧᓂᐊᐧᐣ ᑲᑭ ᐅᓂᒐᓂᔑᐨ ᒥᓇ ᑲᐊᓂ ᐊᓂᑫ ᐅᓂᒐᔑᓂᐊᐧᐨ, ᐱᐟᓫᐸᕑ ᐃᑭᑐ. ᐊᐧᔑᒣ ᑕᐢ ᐣᑲᓇᓇᐣᑕᐃᐧᑭᑫᐣᑕᒪᐣ ᐅᑕᓇᐠ ᑲᑭ ᐱ ᐱᒪᑎᓯᐊᐧᐨ ᐊᓂᔑᓂᓂᐊᐧᐠ, ᐊᐊᐧᔑᒣ ᒥᔑᐣ ᑫᑯᓇᐣ ᑭᑕ ᐅᐣᒋ ᑭᑫᐣᑕᓇᐣ. ᐱᐟᓫᐃᕑ ᐅᑭ ᒧᑭᓇᓇᐣ ᐅᒪᓯᓇᐦᐃᑲᓇᐣ ᑲᑭ ᐃᔑ ᒥᐦᑭᑫᐨ ᑲᔦ ᑕᐢ ᐃᒪ ᒪᒪᐣᑕᐃᐧᐱᐊᐧᐱᑯᐠ ᐁᑭ ᐃᔑ ᒪᓇᒋᑐᒋᐣ ᐃᒪ ᐅᒥᑎᑯᐊᐧᑲᐦᐃᑲᓂᐠ ᕑᐃᐱᕑ ᑲᐃᒋᑲᑌᐠ ᑲᐃᔑ ᐸᐱᑭᔑᑕᐊᐧᐨ ᐃᒪ ᓀᐣᑲᐃᐧᓴᑲᐦᑲᓂᐠ ᒣᑲᐧᐨ ᐁᑭᔐᐸᔭᐠ ᑲᐃᐢᑲᐧ ᒪᐊᐧᐣᑐᐢᑲᓂᐊᐧᐠ ᑭᐁᐧᐃᐧᐣ ᑭᒋᒪᐊᐧᒋᐦᐃᑎᐃᐧᐣ. ᓂᐢᑕᑦ ᑲᑭ ᒪᐊᐧᒋᐦᐃᑎᔭᑭᐸᐣ ᓂᑯᑕᐧᓯ ᑭᒋᔭᐦᐊᐠ ᓂᑭ ᐊᔭᐊᐧᒥᐣ ᓂᐦᓴᐧᔦᐠ ᑭᐃᔑ ᐸᐱᑭᔑᓇᑲᓄᐊᐧᐠ ᒥᓇ ᑲᔦ ᑲᑭ ᓂᑲᓂᐢᑲᒪᑫᐊᐧᐨ ᐅᐁᐧ ᐃᔑᒋᑫᐃᐧᐣ ᐅᑭ ᐃᐧᑕᓄᑭᒪᐊᐧᐣ ᐅᑫᐧᓂᐊᐧᐣ ᑭᒋᔭᐦᐊᐣ ᐁᓇᓇᐣᑕᐃᐧᑭᑫᐣᑕᒧᐊᐧᐨ ᐃᔑᓂᑲᓱᐃᐧᓇᐣ, ᐱᐟᓫᐃᕑ ᐃᑭᑐ. ᓂᐢᑕᑦ ᒪᐊᐧᒋᐦᐃᑎᐃᐧᐣ ᑲᑭ ᐊᔭᒪᐣᑭᐸᐣ ᓂᑭ ᐊᐣᑐᒪᐸᐣ ᐅᑭᒪᑲᐣ ᒥᓇ ᐅᓇᔓᐁᐧᐃᐧᓂᐊᐧᐠ, ᐁᑲᐧ ᑕᐢ ᓂᐦᓯᐣ ᑲᑭ ᐱᔕᐊᐧᐸᐣ ᑲᐯᑭᔑᐠ ᑭᐊᓂᐊᔭᐊᐧᐠ
ᓀᐣᑲᐃᐧᓴᑲᐦᐃᑲᓂᐠ ᐊᓂᔑᓂᓂᐊᐧᐠ ᓇᓇᐣᑕᐃᐧᑭᑫᐣᑕᒧᐊᐧᐠ ᐅᑕᓇᐠ ᐱᒪᑎᓯᐃᐧᐣ, ᐁᓇᓇᐣᑕᐃᐧ ᑭᑫᐣᑕᒧᐊᐧᐨ ᐊᐣᑎ ᑲᐊᐧᐅᐣᑕᑲᓀᓯᐊᐧᐨ
ᐁᑭ ᓇᓇᐣᑕᐃᐧᑭᑫᐣᑕᓀᒧᐊᐧᐨ ᑫᐃᐧᓂᐊᐧ. (ᓄᑯᑦ ᑲᐅᑭᒪᑲᓂᐃᐧᐨ) ᐊᑕᑦ (ᐱᐟᓫᐃᕑ) ᔐᒪᐠ ᐅᑭ ᒪᑕᓄᑲᑕᐣ ᒪᐊᐧᐨ ᐁᑭ ᑭᒋ̇ᓀᐣᑕᐠ. ᐅᑫᐧᓂᐊᐧᐣ ᑲᓇᓇᐣᑕᐃᐧ ᑭᑫᐣᒋᑲᑌᑭᐣ ᑲᐊᐧᐅᐣᑕᑲᓀᓯᐊᐧᐨ ᓂᔭᓄᐱᓯᑦ ᐊᔕ ᓂᐦᓯᐣ ᐊᐃᐧᔭᐠ ᐅᐣᑐᐣᒋ ᐊᓂᑲᑕᓇᐊᐧ, ᐊᐃᑕ ᐊᓂᔑᓇᐯ, ᐸᐃᓫᐊᐟ ᒥᑭᐢ ᒥᓇ ᒧᓂᔭᐢ ᐱᐟᓫᐃᕑ, ᐊᑎᐟ ᑲᔦ ᓂᑭᒋᔭᐦᐊᒥᓇᓇᐠ ᒥᓇ ᑲᔦ ᐊᓂᐣᑕ ᑎᐯᐣᒋᑫᐃᐧᓇᐣ ᐅᒪ ᑲᑲᐯᔑᐊᐧᐨ ᑕᔑᑫᐃᐧᓂᐠ ᒥᓇ ᑲᔦ ᐅᒪ ᓀᐦᑫᑲᒥᐠ. ᒪᒪᐣᑕᐃᐧᐱᐊᐧᐱᑯᐠ ᓂᑐᐣᑎᓇᒥᐣ ᑲᐅᐣᒋ ᐊᐸᒋᑐᔭᐠ ᐅᐁᐧ ᑲᑐᑕᒪᐠ, ᑲᐊᐧᐅᐣᑕᑲᓀᓯᓇᓂᐊᐧᐠ ᑲᐅᐣᒋ ᐊᓂᑲᑌᐠ, ᐱᐟᓫᐃᕑ ᐃᑭᑐ. ᓂᑫᓂᐣ ᓂᑭ ᐊᓂᑲᑕᓇᐸᐣ ᐊᐣᑎ ᓂᑎᐯᐣᒋᑫᐃᐧᐣ ᑲᑭ ᐅᐣᑕᑲᓀᓯᔭᐠ
ᐯᔑᑯᐊᐦᑭ ᐊᐦᐱᑕ ᐅᑕᓇᐠ. ᑲᐃᐧᐣ ᒋᐅᐣᒋ ᐸᐸᔑᔭᐸᐣ. ᐃᐁᐧ Treaty No. 5 ᑭᒋ ᒪᐊᐧᒋᐦᐃᑎᐃᐧᐣ ᐃᐧᐸᐨ ᐁᑭ ᐊᓂᐯᔑᓇᑲᐧᐠ, ᐱᐟᓫᐃᕑ ᑭᐃᑭᑐ ᐃᑫᐧᓂᐊᐧᐠ ᑭᒋᒪᐊᐧᒋᐦᐃᑎᐃᐧᐣ ᑲᓂᑲᓂ ᑲᓇᐊᐧᐸᐣᑕᒧᐊᐧᐨ ᐅᑭ ᑲᑫᐧᒋᒪᐊᐧᐣ ᐅᐁᐧᓂ ᑲᐊᓂᑕᒧᓂᐨ ᑭᐢᐱᐣ ᑫᑭ ᐃᓯᓭᓂᑫᐧᐣ ᐊᔕ ᒋᑭᔑᑐᐊᐧᐨ ᒪᐧᔦ ᒪᒋᒋᑲᑌᑭᐠ ᑭᒋᒪᐊᐧᒋᐦᐃᑎᐃᐧᐣ, ᐊᒥᑕᐢ ᑲᑭ ᑐᑕᐠ ᐁᑭ ᐊᓂᒧᑕᒧᐊᐧᐨ ᐅᑭᒪᓇᐣ ᐊᓂᐣ ᑲᑭ ᐃᔑᒪᒥᑎᓀᐣᑕᐠ ᒋᑭ ᑐᒋᑲᑌᓂᑭᐸᐣ ᐃᐧᐸᐨ ᒋᑭᔑᒋᑲᑌᓂᐠ. ᓂᓯᐣ ᐊᐃᐧᔭᐠ ᓂᑭ ᑲᑫᐧᒋᒪᐠ ᒋᐃᐧᒋᑕᐧᐊᐧᐨ, ᑫᑲᐢᑭᑐᐊᐧᐨ ᒋᑲᑲᓄᓇᐊᐧᐨ ᐊᓂᔑᓂᓂᐊᐧᐣ ᒥᓇ ᑲᔦ ᒋᑲᐢᑭᑐᐊᐧᐨ ᒪᒪᐣᑕᐃᐧᐱᐊᐧᐱᐠ ᐁᑲᐧ ᑕᐢ ᓂᑭ ᐅᓇᐦᑐᒥᓇᐸᐣ ᒪᐊᐧᒋᐦᐃᑎᐃᐧᓀᓴᐣ ᑲᓇᓇᐣᑕᐃᐧ ᑭᑫᐣᒋᑲᑌᐠ ᐊᐣᑎ ᑲᐊᐧᐅᐣᑕᑲᓀᓯᓇᓂᐊᐧᐨ, ᐱᐟᓫᐃᕑ ᑭᐃᑭᑐ, ᐁᑭ ᐃᑭᑐᐨ ᓂᓯᐣ ᒪᐊᐧᒋᐦᐃᑎᐃᐧᓀᓴᐣ ᑲᑭ ᐅᓇᑐᐸᐣ, ᓂᐢᑕᑦ ᒪᐊᐧᒋᐦᐃᑎᐃᐧᐣ ᑭᐊᔭᐸᐣ ᑭᔐᐱᓯᑦ 6 ᑲᐃᓇᑭᓱᐨ ᒥᓇ ᑲᔦ ᑯᑕᐠ ᓂᐦᓱᐱᒧᑯᓇᑲ ᓇᑫ ᑭᐊᔭᐸᐣ. ᐃᐧᑫᐧᓂᐊᐧᐠ ᑕᐢ ᓂᓯᐣ ᐅᑕᓄᑭᐠ ᑲᐅᐣᒋ ᓂᑲᓂ ᐊᓂᑲᑕᒧᐊᐧᐨ ᐅᑭ ᐸᐱᑭᔑ ᐊᐧᐃᐧᒋᐦᐊᐊᐧᐣ ᑲᐃᔑ ᐊᐧᐅᑯᐃᐧᓂᐨ ᐁᑲᐧ ᑕᐢ ᐊᐦᐸᐣ ᒥᐦᐃᒪ ᑲᑭ ᐅᐣᒋ ᒪᑕᓄᑲᑕᒧᐊᐧᐨ ᐃᔑᓂᑲᓱᐃᐧᓂ, ᐊᐊᐧᓀᓇᐣ ᑲᑭ ᐅᑕᑕᒥᐨ ᒥᓇ ᐅᒪᒪᒪᐣ, ᐁᑲᐧ ᑕᐢ ᐊᐁᐧ ᐊᓂᔑᓂᓂ, ᐊᐊᐧᓀᓇᐣ ᑲᑭ ᐅᑕᑕᒥᐨ, ᐊᒥ ᑲᑭᑐᑕᒪᐠ ᐊᓂᐣ ᒥᓂᑯᐠ ᑲᐊᐦᑯᑲᓄᑫᐊᐧᐨ. ᐁᑲᐧ ᑕᐢ ᐊᐦᐱ ᑲᑭ ᐃᐧᐣᑕᒧᐊᐧᐨ ᐃᔑᓂᑲᓱᐃᐧᓇᐣ ᑭᒋᔭᐦᐊᐠ ᑲᔭᑯᑲᓄᑫᐊᐧᐨ, ᐱᐟᓫᐃᕑ ᐃᑭᑐ ᐁᑭ ᐊᓂᒪᓯᓇᐦᐊᒧᐊᐧᐨ ᐃᑫᐧᓂᐊᐧᐠ ᑲᐊᓂᑲᑕᒧᐊᐧᐨ ᒥᓇᐊᐧ ᐅᑭ ᒋᓇᓇᐱᑲᑫᐧᒋᒪᐊᐧᐨ ᑲᐊᑯᑲᓄᑫᐣᑕᓂᐨ. ᐊᐧᐦᐊᐁᐧ ᐁᐧᐢᑲᐨ ᐊᓂᔑᓂᓂ, ᐊᓂᐣ ᑲᑕᓯᓂᐨ ᐅᓂᒐᓂᔕᐣ, ᐱᐟᕑᐃᕑ ᐃᑭᑐ, ᐊᒥ ᑲᑭ ᐃᔑ ᑲᑫᐧᒋᒪᐊᐧᐨ ᑭᒋᔭᐦᐊᐣ. ᐁᑲᐧ ᑕᐢ ᑭᔭᐊᐧᐠ (ᑭᒋᔭᐦᐊᐠ) ᐅᑭ ᐃᐧᓇᐊᐧᐣ ᑲᑭ ᐃᔑᓂᑲᓯᓂᐨ ᐅᓂᒐᓂᔑᐊᐧᐣ, ᐊᐊᐧᓀᓇᐣ ᑲᔦ ᐅᐃᐧᒋᐊᐧᑲᓇᐣ ᐃᑫᐧᓂᐊᐧᐣ ᒥᓇ ᐊᓂᐣ ᑲᑭ ᐃᔑ ᐃᐢᑫᐧᓂᑲᓱᐸᐣ ᐃᑫᐧᐊᐧᐣ ᒪᐧᔦ ᐃᐧᑭᑎᓂᐨ? ᐊᐊᐧᓀᓇᐣ ᑲᑭ ᐅᓂᒐᓂᔑᐊᐧᐨ? ᐱᐟᓫᐃᕑ ᐃᑭᑐ ᐁᑭ ᐅᓂ ᑭᔑᑐᐊᐧᐨ ᐸᐣᑭ ᑲᑭ ᓇᓇᐣᑕᐃᐧᑭᑫᐣᑕᒧᐊᐧᐨ ᐃᑫᐧᓂᐊᐧᐣ ᑎᐯᐣᒋᑫᐃᐧᓇᐣ ᑲᑭ ᐅᐣᑕᑲᓀᓯᓂᐨ. ᐊᒥ ᑲᑭᑐᑕᒪᐠ ᐊᓂᐣ ᐃᓂᑯᐠ ᑫᑭ ᐊᑯᑭᑫᐣᑕᒪᐠ ᐁᑭ ᐃᔑᐊᓂᑲᑕᒪᐠ, ᐱᐟᓫᐃᕑ ᐃᑭᑐ. ᓂᑭ ᑭᑫᐣᑕᒥᐣ ᒋᐁᐧᐣᑕᐠ ᒋᒪᒧᐦᒋ ᒪᓯᓇᐦᐊᒪᐠ ᐃᑫᐧᓂᐊᐧᐠ ᑭᔭᐸᐨ ᑲᐱᒪᑎᓯᐊᐧᐨ ᓄᑯᑦ ᑲᑭᔑᑲᐠ. ᓂᑭ ᑲᑫᐧᒋᒪᒥᐣ ᑭᒋᔭᐦᐊᐠ ᐃᑫᐧᓂᐊᐧᐣ ᐁᐧᐢᑲᐨ ᑲᑭ ᐱᐱᒪᑎᓯᐊᐧᐨ ᐊᓂᔑᓂᓂᐊᐧᐠ. ᐊᒥᐦᐃᒪ ᑕᐢ ᐅᒥᐦᑭᑫᐃᐧᓂᐊᐧ ᐅᐁᐧ ᐅᐣᒋ ᑎᐯᐣᒋᑫᐃᐧᓇᐣ ᑭᓇᑯᒋᑲᑌᐊᐧᐣ ᐃᒪ ᑕᒪᐢ ᐱᐟᓫᐃᕑ ᑭᑭᓄᐦᐊᒪᑫᐃᐧᑲᒥᐠ ᓴᑭᐸᑲᐃᐧᐱᓯᑦ 10 ᑲᐃᓇᑭᓯᐨ, ᐃᐁᐧ ᑕᐢ ᒪᐊᐧᐨ ᑲᑭ ᐃᐢᐱᓭᐠ ᑎᐯᐣᒋᑫᐃᐧᐣ ᐱᐟᓫᐃᕑ ᑲᐃᐢᑫᐧᓂᑲᓱᐊᐧᐨ ᑲᑭ ᑭᒋᒥᔑᓄᐊᐧᐨ ᑲᑭ ᐃᔑ ᒪᓯᓇᐦᐃᑲᓱᐊᐧᐨ ᓂᓴᐧᔦᐠ ᐊᓴᒪᑎᐠ ᐁᑭ ᐃᔑ ᓇᑯᒋᑲᑌᑭᐣ ᐃᔑᓂᑲᓱᐃᐧᓇᐣ. ᐃᑫᐧᓂᐊᐧᐠ ᑕᐢ ᐱᐟᓫᐃᕑ ᑎᐯᐣᒋᑫᐃᐧᐣ ᐁᐦᑕ, 1,923 ᐊᓂᔑᓂᓂᐊᐧᐠ, ᐱᐟᓫᐃᕑ ᑭᐃᑭᑐ.
ᐊᒥᑕᐢ ᐁᐃᓀᐣᑕᒪᐣ ᓇᐣᑕ ᓂᓱᐧ ᓇᐣᑕ ᓂᐊᐧ ᑭᒋ ᒥᑕᓱᒥᑕᓇ ᐊᓂᔑᓂᓂᐊᐧᐠ ᐁᑭ ᐅᐣᒋ ᑭᑫᐣᑕᑯᓯᐊᐧᐨ ᐊᐣᑎ
ᑲᐅᐣᑕᑲᓀᓯᐊᐧᐨ. ᐱᐟᓫᐃᕑ ᐃᑭᑐ ᑲᐃᐧᐣ ᒪᔑ ᒋᐅᐣᒋ ᑐᑕᒪᐣᐠ ᓂᓂᒐᓂᔕᐠ ᑲᐅᐣᑕᑲᓀᓯᐊᐧᐨ, ᑐᑲᐣ ᐅᑭᒪᑲᐣ ᐊᑕᑦ ᐱᐟᓫᐃᕑ ᒥᓇ ᑲᔦ ᐅᓂᒐᓂᐊᐧᐣ ᒥᓇ ᐅᑕᓂᑯᑕᐸᓇᐣ.
ᐊᒥᐱᑯ ᑫᐃᔑ ᐱᒥᑐᑕᒪᐠ ᐅᐁᐧ, ᐱᐟᕑᐃᕑ ᐃᑭᑐ, ᐁᑭ ᐃᑭᑐᐨ ᒋᐱᒪᓄᑲᑕᒧᐊᐧᐨ ᑲᐧᔭᐠ ᒋᑐᒋᑲᑌᐠ ᒥᓇ ᑲᐧᔭᐠ ᒋᒪᓯᓇᐦᐃᑲᑌᑭᐣ ᐃᔑᓂᑲᓱᐃᐧᓇᐣ ᒥᓇ ᑲᔦ ᒋᒪᓯᓇᐦᐅᐣᑕᐧ ᓄᑯᑦ ᑲᐊᓂᑫ ᐱᒪᑎᓯᐊᐧᐨ ᐊᓂᔑᓂᓂᐊᐧᐠ. ᐸᓂᒪ ᑕᐢ ᐁᐧᑎ ᐊᓂ ᓂᑲᐣ ᓂᑲᐸᑭᑎᓇᒥᐣ ᒋᐊᐧᐸᐣᑕᐦᐃᐊᐧᓂᐊᐧᐠ ᑭᑭᔑᑐᔭᐠ. ᒪᐊᐧᐨ ᓂᒥᓄᐁᐧᐣᑕᒥᐣ ᐅᐁᐧ ᑲᐅᐣᒋ ᑐᑕᒪᐠ.