ᐅᐢᑭ ᒪᐢᑭᑭᐃᐧᑲᒥᐠ ᐅᒪᒪᐃᐧᓇᓇᐊᐧ ᐊᑯᓯᐃᐧ ᐱᒧᒋᑫᐃᐧᓇᐣ ᐊᐦᑎᑯᓴᑲᐦᐃᑲᓂᐠ

ᐊᑯᓯᐃᐧᑲᒥᐠ ᐁᐧᑎ ᐊᑎᑯᓴᑲᐦᐃᑲᓂᐠ ᐃᐢᑯᓂᑲᐣ ᐅᑲ ᒪᒪᐃᐧᓇᓇᐊᐧ ᐊᑯᓯᐃᐧ ᐱᒥᐃᐧᒋᑫᐃᐧᓇᐣ ᐃᒪ ᑲᔭᑭᐣ ᑕᔑᑫᐃᐧᓂᐠ ᐯᔑᑲᐧᔦᐠ ᒋᐃᔑ ᐅᑭᔭᑭᐣ ᐃᐧᒋᐦᐃᐁᐧᐃᐧᑲᒥᑯᐣ.
ᐃᐁᐧ $6.9 ᒥᓫᐃᔭᐣ ᑲᒣᑎᓂᑫᐃᐧᓂᐊᐧᐠ ᐊᓂᑭᐃᐧᐣ, ᔕᑯᐨ ᑲᐃᐧᐣ ᒪᔑ ᒋᑭᐦᒋ ᐸᑭᓂᑲᑌᐠ, ᐊᔕ ᐃᐧᓂᑯ ᓯᓂᐸᓂᔭᑊ ᐅᑭᐸᑭᔕᐧᐊᐧᐣ ᐁᑭ ᑭᑭᓇᐊᐧᒋᑐᐊᐧᐨ ᑲᐃᐧ ᐸᑭᓇᒧᐊᐧᐨ ᐅᐁᐧ ᐱᒥᐃᐧᒋᑫᐃᐧᐣ ᒣᑲᐧᐨ ᑎᕑᐃᑎ 5 ᒥᑕᓱᒥᑕᓇ ᐊᐦᑭᐃᐧ ᑭᑭᓇᐊᐧᒋᒋᑫᐃᐧᐣ ᑲᑭ ᓇᓇᑯᒥᓇᓂᐊᐧᐠ ᐃᒪ ᐊᑎᑯᓴᑲᐦᐃᑲᓂᐠ ᓴᑭᐸᑲᐃᐧᐱᓯᑦ 9 ᑲᐃᓇᑭᓯᐨ. ᒣᑲᐧᐨ ᑲᑭᓇ ᑫᑯᓇᐣ ᓂᑲᑫᐧ ᑭᔑᑐᒥᐣ ᑲᐃᓯᓭᑭᐣ ᒋᑭ ᑭᔑᐊᓂᑲᑕᒪᐣᑭᐣ. ᐃᑭᑐ ᐊᑎᑯᓴᑲᐦᐃᑲᓂᐃᐧ ᐅᓇᔓᐁᐧᐃᐧᓂ ᑌᕑᐅ ᒪᐊᐧᑭᓯᐠ ᐃᐁᐧᓂ ᐅᐣᒋ ᐁᑲ ᒪᔑ ᑲᑭᔑᒋᑲᑌᓂᐠ ᑲᐃᐧ ᐃᔑ ᐅᐢᑭ ᐃᐧᒋᐦᐃᐁᐧᐃᐧᑲᒥᑯᐊᐧᐨ. ᑲᑭᓇ ᑫᑯᓇᐣ ᐱᓇᒪ ᓂᑲᑫᐧ ᑭᑫᐣᑕᒥᐣ ᑲᐧᔭᐠ ᒋᐊᓂᑭᓭᑭᐣ, ᑐᑲᐣ ᓂᐱᐃᐧ ᑫᑯᓇᐣ, ᒪᐊᐧᑭᓯᐠ ᐃᑭᑐ.
ᑭᔭᐸᐨ ᓇᓇᐣᑐᐠ ᑫᑯᓇᐣ ᐊᓂᑲᑌᐊᐧᐣ, ᐃᑭᑐ ᒪᐊᐧᑭᓯᐠ. ᒪᐊᐧᑭᓯᐠ ᑲᔦ ᐃᑭᑐ ᐊᐧᑲᐦᐃᑫᐃᐧᑭᒪ ᑭᔭᐸᐨ ᑕᐱᓇᓇᑲᒋᒋᑫ ᒥᓂᑯᐠ ᑫᑭ ᐸᑭᓂᑲᑌᐠ ᐅᐁᐧ ᑭᒋ ᐊᓂᑭᐃᐧᑲᒥᐠ ᒥᓇ ᑲᔦ ᒋᑭ ᐊᐸᒋᑐᐊᐧᐨ ᐊᓂᔑᓂᓂᐊᐧᐠ ᐅᒪ ᑲᑲᐯᔑᐊᐧᐨ ᑕᔑᑫᐃᐧᓂᐠ.
ᐅᐁᐧ ᐊᓂᑭᐃᐧᑲᒥᐠ ᑲᐃᐧᐣ ᐅᐢᑭ ᐊᐧᑲᐦᐃᑲᓂᐊᐧᓯᓄᐣ, ᒧᐦᒋ ᐊᐧᐁᐧᔑᒋᑲᑌᐠ ᐁᐦᑕ ᒥᓯᐁᐧ ᐅᒪ ᒣᑲᐧᐨ ᑲᐊᐸᑕᐠ ᐊᑯᓯᐃᐧ ᐱᒥᐃᐧᒋᑫᐃᐧᓇᐣ ᑲᐃᔑ ᒪᓯᓇᐦᐃᑫᐃᐧᑲᒥᑯᐊᐧᐠ ᑕᑯ ᑲᔦ ᐁᓇᐣᑭᓂᑲᑌᐠ.
ᐁᑲᐧ ᑕᐢ ᒪᐊᐧᐨ ᑕᑭᐦᒋ ᒥᔕ ᐅᐁᐧ ᐊᓂᑭᐃᐧᑲᒥᐠ ᐅᒪ ᓂᑕᔑᑫᐃᐧᓂᓇᐣ. ᒪᐊᐧᑭᓯᐠ ᐃᑭᑐ.
ᐃᐁᐧ ᑕᐢ ᒪᐊᐧᐨ ᑫᐃᐧᒋᐦᐃᑯᐊᐧᐨ ᐅᐁᐧ ᐅᐣᒋ ᐊᑯᓯᐃᐧ ᐱᒧᐃᐧᒋᑫᐃᐧᑲᒥᐠ ᑲᐅᔑᒋᑲᑌᐠ ᒋᒪᒪᐃᐧᔭᒪᑲᑭᐣ ᐯᔑᑲᐧᔦᐠ ᒋᐃᔑ ᐅᑯᔭᑭᐣ ᐃᐧᒋᐦᐃᐁᐧᐃᐧᑲᒥᑯᐣ, ᐃᑫᐧᓂᐊᐧᐣ ᑲᔦ ᑲᐅᐣᒋ ᐱᒥᐃᐧᒋᐦᐊᑲᓄᐊᐧᐨ ᐊᓂᔑᓂᓂᐊᐧᐠ ᒥᓇ ᐅᒪᒥᓂᒧᐁᐧᐠ ᑲᐃᔑ ᐊᓂᑭᐊᐧᐨ ᑲᔦ ᐃᐧᐱᑎᒪᐢᑭᑭᐃᐧ ᐅᑕᓂᑭᑕᒪᑫᐠ.
ᑲᑭᓇ ᒪᐢᑭᑭᐃᐧᑲᒥᑯᐃᐧ ᐅᑕᓄᑭᐠ ᐯᔑᑲᐧᔦᐠ ᑕᒪᒪᐃᐧ ᑕᓇᓄᑭᐊᐧᐠ, ᒪᐊᐧᑭᓯᐠ ᐃᑭᑐ. ᑲᑭᓇ ᒪᐢᑭᑭᐃᐧ ᐱᒥᐃᐧᒋᑫᐃᐧᓇᐣ ᓂᑲᐃᔑᐊᐣᑕᑐᒥᐣ ᐃᒪ ᑲᐃᔑ ᐅᔑᒋᑲᑌᐠ ᐊᓂᑭᐃᐧᑲᒥᐠ.
ᑫᑲᐟ ᓂᓯᐊᐦᑭ ᑭᐃᓯᓭ ᐁᑭ ᐱᒥᐊᓂᒧᒋᑲᑌᐠ ᐅᐁᐧ ᑲᐃᐧ ᐅᔑᒋᑲᑌᑭᐠ ᐅᐢᑭ ᐃᐧᒋᐦᐃᐁᐧᐃᐧᑲᒥᐠ ᑕᑯ ᑲᔦ ᓂᔓᐊᐦᑭ ᐊᐊᐧᔑᒣ ᑭᐃᓯᓭ ᒋᐱᒥ ᐊᐧᐁᐧᔑᓂᑲᑌᐠ. ᓂᐢᑕᑦ ᐃᐧᓂᑯ, ᐅᐁᐧ ᐊᓂᑭᐃᐧᐣ ᑭᐃᓇᑭᐣᒋᑲᓂᐊᐧᓄᐸᐣ $6.5 ᒥᓫᐃᔭᐣ ᒋᒣᑎᓂᑲᓂᐊᐧᐠ, ᔕᑯᐨ ᑕᐢ ᐊᐦᐸᐣ ᑯᑕᑭᔭᐣ ᑫᑯᓇᐣ ᑭᐊᓂ ᒪᒧᑭᓭᐊᐧᐣ ᐃᒪ ᐊᐁᐧᔑᓂᑫᐃᐧᓂᐠ, ᑐᑲᐣ ᓂᐱᐃᐧ ᑫᑯᓇᐣ, ᑭᐊᓂ ᒣᑎᓂᑲᓂᐊᐧᐣ $6.9 ᒥᓫᐃᔭᐣ ᑭᔭᐸᐨ.
ᐅᐢᑭ ᒪᐢᑭᑭᐃᐧᑲᒥᐠ ᐅᒪᒪᐃᐧᓇᓇᐊᐧ ᐊᑯᓯᐃᐧ ᐱᒧᒋᑫᐃᐧᓇᐣ ᐊᐦᑎᑯᓴᑲᐦᐃᑲᓂᐠ
ᒪᐊᐧᑭᓯᐠ ᑭᐃᑭᑐ ᐯᔑᐠ ᐃᐧᒋᐦᐃᐁᐧᐃᐣ ᑫᐅᐢᑭ ᑕᑲᐧᐠ ᐊᐦᐃ ᐸᐸᔑ ᐊᐃᐧᔭ ᑲᐃᔑ ᓇᓇᑲᒋᐦᐊᑲᓂᐃᐧᐨ. ᑲᐃᐧᐣ ᐃᐧᑲ ᐅᐁᐧ ᓂᑭ ᐅᐣᒋ ᐊᔭᓯᒥᓇᐸᐣ, ᑭᐃᑭᑐ.
ᑲᔦ, ᓂᐊᐧᓄᐣ ᓂᐯᐃᐧᑲᒥᑯᐣ ᑫᐃᔑ ᑲᓇᐁᐧᐣᑕᑯᓯᐊᐧᐨ ᐅᑕᑯᓯᐠ
ᑲᑭᒋᐃᐧᓇᑲᓄᐊᐧᐨ ᐊᒋᓇ, ᐊᒥᐦᐅᐁᐧ ᑲᔦ ᑲᐅᐢᑭᔭᒪᑲᐠ ᐃᐧᒋᐦᐃᐁᐧᐃᐧᐣ ᐅᒪ ᐊᑎᑯᓴᑲᐦᐃᑲᓂᐠ. ᐊᒥᐦᐃ ᑲᔦ ᑲᐃᐧ ᑐᒋᑲᑌᐠ ᐁᐃᐧ ᐅᐢᑭᒋᑲᑌᑭᐣ ᑲᐃᔑ ᒪᓇᐱᑕᓂᐊᐧᐠ ᓇᐊᐧᐨ ᒋᒥᓄᐊᐧᔑᐠ ᑫᐃᔑ ᓇᓇᑲᒋᐦᐃᐣᑕᐧ ᐊᐃᐧᔭᐠ.
ᐅᑫᐧᓂᐊᐧᐣ ᑲᔦ ᐃᐧᒋᐦᐃᐁᐧᐃᐧᓇᐣ ᑕᔭᐊᐧᐣ ᒥᓄᑫᐊᐧᐱᓀᐃᐧᐣ ᑲᐊᓂᑲᑕᒧᐊᐧᐨ ᐅᐃᐧᒋᐦᐃᐁᐧᐠ, ᐊᓂᔑᓇᐯ ᐊᐢᑭ ᑲᑭᒋᓭᓇᓂᐊᐧᓂᐠ ᒪᒪᐤ ᐃᐧᒋᐦᐁᐧᐃᐧᑲᒥᐠ, ᐊᐱᓄᒋᔕᐠ ᑲᒪᑲᐱᓀᐊᐧᐨ ᑲᓂᑕᐃᐧᑭᐊᐧᐨ ᐃᐧᒋᐦᐃᐁᐧ ᐱᒥᐃᐧᒋᑫᐃᐧᐣ, ᑲᓇᑕ ᐅᑭᐢᑭᑲᐊᐧᓱᐠ ᑲᑭᑭᓄᐦᐊᒪᐃᐧᐣᑕᐧ ᑫᐃᓇᐣᒋᑫᐊᐧᐨ ᐱᒥᐃᐧᒋᑫᐃᐧᐣ, ᐊᐱᓄᒋᔕᐠ ᑲᐊᑲᔐᔑᐊᐧᐨ ᑲᐅᐣᒋ ᐃᐧᒋᐦᐃᐣᑕᐧ, ᐊᓂᔑᓇᐯ ᐅᒪᒪᒥᒪᐠ ᑲᒪᑲᑎᓯᓂᐠ ᐅᓂᒐᓂᔑᐊᐧᐣ ᑲᐅᐣᒋ ᐃᐧᒋᐦᐊᑲᓄᐊᐧᐨ ᐱᒥᐃᐧᒋᑫᐃᐧᐣ, ᐅᑕᑯᓯᐠ ᑲᐅᐣᒋ ᐃᐧᒋᐦᐃᐣᑕ ᐅᑲᐯᔑᐃᐧᓂᐊᐧ, ᐃᐧᐱᑎᒪᐢᑭᑭᐃᐧ ᐃᐧᒋᐦᐃᐁᐧᐃᐧᐣ ᒥᓇ ᑲᔦ ᑯᑕᑭᔭᐣ ᒪᐢᑭᑭᐃᐧ ᐃᐧᒋᐦᐃᐁᐧᐃᐧᓇᐣ ᑲᐸᑭᑎᓂᑲᑌᑭᐣ ᐃᒪ ᒪᐢᑭᑭᐃᐧᑲᒥᐠ.
ᐅᐁᐧ ᑕᐢ ᑲᐃᐧ ᒪᒪᐃᐧᓂᑲᑌᑭᐣ ᑲᑭᓇ ᒪᐢᑭᑭᐃᐧ ᐃᐧᒋᐦᐃᐁᐧᐃᐧᓇᐣ ᐊᐊᐧᔑᒣ ᑕᐅᐣᒋ ᒥᓄᓭ ᒋᐅᐣᒋ ᐊᓂᑲᑌᑭᐣ ᐅᑫᐧᓂᐊᐧᐣ ᐃᐧᒋᐦᐃᐁᐧᐃᐧᓇᐣ ᐅᒪ ᓂᑕᔑᑫᐃᐧᓂᓇᐣ, ᒪᐊᐧᑭᓯᐠ ᐃᑭᑐ.