ᕑᐊᔭᐣ ᒪᐧᕑᐃᐢ ᒪᐊᐧᐨ ᐅᑭᒋᓀᐣᑕᐣ ᑲᔭᓄᑲᑕᐠ ᒥᒋᒥᓂ ᑲᑭᔑᑌᐳᐨ

ᑭᐡᐱᐣ ᑫᑯᐣ ᑲᓇᓇᑭᐡᑲᐠ ᑫᐅᒋ ᐊᔭᓂᒥᓭᐨ ᐅᐱᒪᑎᓯᐃᐧᓂᐠ ᕑᐊᔭᐣ ᒪᐧᕑᐃᐢ, ᐊᒥᐦᐃᒪ ᐃᓀᑫ ᐁᐃᔑᐃᐧᒋᐦᐃᑎᓱᐨ ᐅᑕᓄᑭᐃᐧᓂᐠ ᑲᒋᐸᑫᐧᐃᐧᓂᓂᐃᐧᐨ.
ᐊᐱ ᑲᑭᐊᐧᓂᐦᐊᑭᐸᐣ ᐣᑐᓯᐢ ᑲᑭᓂᓯᑯᐸᐣ ᑲᔭᓂᒪᓂᐠ ᐊᑯᓯᐃᐧᓂ, ᐊᒥ ᑲᑐᑕᒪᐣ ᐁᑭᔭᓂᒪᐦᒋᒥᓂᑫᐧᔭᐣ, ᐃᑭᑐ. ᑲᐃᐧᐣ ᐣᑐᒋᑭᑫᑕᓯᐣ ᐊᓂᐣ ᑫᐃᓯᓭᐠ ᐣᐱᒪᑎᓯᐃᐧᐣ. ᒥᑕᐡ ᐃᑯ ᐁᑕ ᐃᐁᐧ ᐣᑕᓄᑭᐃᐧᐣ ᑲᑭᐃᐧᒋᐦᐃᑯᔭᐣ.
ᒪᐧᕑᐃᐢ, ᑭᒋᓇᒣᑯᓯᐱᐠ ᐅᐣᒋᑎᐯᐣᑕᑯᓯ, ᑭᒪᒋᑕᒪᓱ ᒪᐊᐧᐨ ᑲᐃᔑ ᑭᒋᓀᐣᑕᐠ ᐁᑐᑕᐠ ᒥᓇ ᐁᐃᓇᓄᑭᐨ ᐃᐧᐣ ᐁᓂᑲᓂᐱᒧᑐᐨ ᑭᔑᑌᐳᐃᐧᐊᓄᑭᐃᐧᓂᐠ ᑕᐣᑐᕑ ᐯ ᐅᑌᓇᐠ ᐃᐧᓯᓂᐃᐧᑲᒥᑯᓂ.
ᑲᐯᐦᐃ ᐣᑭᐱᓴᑭᑐᐣ ᒥᒋᑦ, ᐁᓄᒋᒥᒋᒣᔭᐣ, ᒪᐧᕑᐃᐢ ᐃᑭᑐ ᒣᑲᐧᐨ ᑲᐅᓇᑯᔑᓂᐠ ᑲᑭᒪᑯᔐᐦᐊᑲᓄᐨ ᓄᑯᒥᑫ ᐃᐧᐣ ᑲᑭᐅᑕᐱᓇᑲᓄᐨ ᒋᓂᑲᓂᐡᑲᐠ ᑭᔑᑌᐳᐃᐧᓂ ᒪᑯᔐᑭᔑᑲᐃᐧᐱᓯᑦ 6.
ᐁᐧᑎ ᐱᑯ ᑲᐱᐅᐡᑲᑎᓯᔭᐣ ᐣᑭᐅᒋᒥᓀᐧᑕᐣ ᒥᒋᑦ ᐁᓄᒋᑐᔭᐣ. ᐁᑲᓇᐊᐧᐸᒪᑭᐸᐣ ᐊᑯ ᓄᑯᑦ ᐁᐅᔑᐦᐊᐨ ᑭᓄᔐᐣ ᒥᓇ ᒧᓱᐃᐧᔭᓯᓂ ᐁᐅᔑᑐᐨ.
ᐣᑭᑭᑫᐣᑕᐣ ᑕᐡ ᐱᓂᐡ ᒋᔭᓂ ᐊᓄᑭᔭᐣ ᒋᐸᑫᐧᐃᐧᑲᒥᑯᐠ ᒥᓇ ᐊᓄᑭᐃᐧᐣ ᒋᐅᐣᑎᓇᒪᐣ ᒥᒋᑦ ᑲᑕᓇᓄᑲᑌᐠ. ᐣᑭᐃᔑᓇᑕᐁᐧᑕᐣ ᐅᓇᑲᓇᐣ ᐁᐃᐧᓄᒋᑐᔭᐣ, ᒥᔑᓇᐧᔦᐠ ᒋᐱᒥᑐᑕᒪᐣ ᒥᓇ ᐱᑯ ᑲᐧᔭᐠ ᒋᐃᔑᓇᑯᑐᔭᐣ ᐣᑕᓄᑭᐃᐧᐣ.
ᒥᑕᐡ ᑌᐯᐧ ᑲᑐᑕᐠ ᐃᒪ ᐃᐧᓯᓂᐃᐧᑲᒥᑯᐠ ᑲᑕᓇᓄᑭᐨ, ᐃᑭᑐ ᑲᑎᐯᐣᑕᐠ ᓫᐊᕑᐃ ᐯᕑᐊᐢ.
ᒪᐊᐧᐨ ᒥᐢᑕᐦᐃ ᐅᓇᑯᑐᐣ ᐁᑭᒋᓀᐣᑕᐠ ᐅᑕᓄᑭᐃᐧᐣ ᕑᐊᔭᐣ, ᐃᑭᑐ. ᒪᐊᐧᐨ ᐃᑯ ᐁᑭᒋᓀᐣᑕᐠ ᑲᐃᔑᐱᒥᑐᑕᐠ ᐅᑕᓄᑭᐃᐧᐣ. ᐣᑭᐃᔑᑭᑫᐣᑕᐣ ᑲᔦ ᑭᐡᐱᐣ ᐁᑲ ᐊᐃᐧᔭ ᑲᐱᔭᓄᑭᐨ ᓇᐣᑕ ᑲᓄᑌᐳᓇᓄᑭᐨ, ᐣᑭᓇᒋᐸᐦᐃᐊᐧᓇ ᕑᐊᔭᐣ ᒋᐃᐧᒋᐦᐃᔑᐨ.
ᐯᕑᐊᐢ ᑭᐃᑭᑐ ᐅᑭᓂᓯᑕᐃᐧᓇᐊᐧᐣ ᒪᐧᕑᐃᓱᐣ ᐁᑭᒋᓀᐣᑕᑯᓯᓂᐨ ᐁᑲᐧ ᐊᐱᐣ ᔐᒪᐠ ᐅᑭᔭᓂ ᑭᑭᓄᐦᐊᒪᐊᐧᐣ ᑯᑕᑭᔭᐣ ᑫᑯᓇᐣ ᐃᓇᓄᑭᐃᐧᓇᐣ ᑲᐱᒥᑐᒋᑲᑌᑭᐣ ᐃᒪ ᐃᐧᓯᓂᐃᐧᑲᒥᑯᐠ.
ᐣᑭᔭᓂᒪᐦᒋ ᑭᑭᓄᐦᐊᒪᐊᐧ ᑯᑕᑭᔭᐣ ᑫᑯᓇᐣ ᑫᔭᓂᔑ ᑲᐡᑭᐦᐅᐨ, ᑌᐯᐧ ᑕᐡ ᐃᑯ ᒥᑐᓂ ᑭᓇᐦᐃ ᑲᑭᔭᓂᔑᐊᓄᓇᐠ ᒋᑐᑕᐠ, ᐃᑭᑐ. ᑭᐡᐱᐣ ᐯᔑᑲᐧ ᐁᑲᓇᐊᐧᐸᒥᐠ ᑫᑯᐣ ᑲᑐᑕᒧᐊᐧᐨ, ᒥᐱᑯ ᐁᑲᐡᑭᑐᑦ ᒋᔭᓂᑐᑕᐠ. ᒥᓇᐊᐧ ᐊᐱ ᑲᔭᓂᑐᑕᐠ, ᒥᑐᓂ ᐱᑯ ᐅᑲᐡᑭᑐᐣ ᐁᑲᐧ ᒥᓇᐊᐧ ᓂᐦᓴᐧ ᑲᔭᓂᑲᑫᐧᒋᑐᐨ ᒪᐊᐧᐨ ᐃᑯ ᐅᑲᐡᑭᑐᐣ ᒥᓇ ᐅᒥᓄᓇᑯᑐᐣ ᑲᑐᑕᐠ.
ᐯᕑᐊᐢ ᒥᑐᓂ ᐱᑯ ᐅᑕᐯᓂᒧᐣᑕᐊᐧᐣ ᐅᑕᓄᑭᓇᑲᓂᒪᐣ ᒪᐧᕑᐃᓱᐣ.
ᑲᐃᐧᐣ ᐣᑕᑭᐅᒋ ᑲᐡᑭᑐᐣ ᓂᓀᑕ ᒋᐱᒧᑐᔭᐣ ᐅᐁᐧ ᐃᐧᓯᐃᐧᑲᒥᐠ ᑭᐡᐱᐣ ᐁᑲ ᐃᐧᒋᐦᐃᔑᐸᐣ, ᐃᑭᑐ.
ᐅᑎᔑᑲᓇᐊᐧᐸᑕᐣ ᐃᐧᓯᓂᐃᐧᑲᒥᑯᓂ ᑲᐱᒧᑐᐨ ᐅᐊᐧᑯᒪᑲᓂᐠ ᐁᑭᐅᒋ ᐊᓂᑫᓇᑲᑕᒪᐃᐧᐨ, ᐅᑕᐊᐧᔑᔑᒪᐣ ᓂᑲᑌ ᐊᔭᐊᐧᐣ ᐸᑲᐣ ᐁᑕᓇᓄᑭᓂᐨ, ᔕᑯᐨ ᑕᑭᐃᔑᓇᑲᐧᓂ ᒪᐧᕑᐃᐢ ᐯᔑᑲᐧ ᑭᔑᑲᓂᐠ ᒋᔭᓂᑌᐯᐣᑕᐠ ᐅᐁᐧᓂ ᐃᐧᓯᓂᐃᐧᑲᒥᑯᓂ.
ᐣᑎᔑᐊᐧᐸᐣᑕᐣ ᐃᑯ ᐯᔑᑲᐧ ᑭᔑᑲᐠ ᒋᓇᑲᑕᒪᐊᐧᐠ, ᐃᑭᑐ, ᐁᒧᔑᐦᐅᐨ. ᐊᓂᐡ ᑭᔭᓂᑌᐱᓇᒪᓱ, ᐁᑭᑌᓂᒪᐠ, ᐁᑭᒋᓀᓂᒪᐠ ᒥᓇ ᐁᑌᐸᑫᓂᒪᐠ.
ᒪᐧᕑᐃᐢ, 24 ᑕᓱᔭᑭᐃᐧᓀ, ᑭᒪᒋᑕ ᑭᔑᑌᐳᐃᐧ ᐊᓄᑭᐃᐧᓂ ᐁᐧᑎ ᑯᕑᐊᐣᐟ ᐸᐧᕑᑎᐨ ᓫᐊᐧᐨ ᒥᓇ ᑲᓯᓄ ᒪᓂᓱᑕ ᑭᒋᒧᑯᒪᐣᐊᐦᑭᐠ, ᓂᐢᑕᑦ ᑭᐃᓇᓄᑭ ᐁᑭ ᑭᔐᐸᓀᑫᐧ ᑭᔑᑌᐳᐃᐧᓂᓂᐃᐧᐨ.
ᒥᑕᐡ ᐊᐱ ᐅᐁᐧ ᒣᑲᐧᐨ 20 ᑲᑕᓱᔭᑭᐃᐧᓀᐸᐣ ᑲᐃᐧᐣ ᐃᑯ ᐁᑕ ᐊᓄᑭᐃᐧᐣ ᒋᐅᒋ ᐃᔑᑲᓇᐊᐧᐸᑕᐠ ᑲᑭᔑᑌᐳᐃᐧᐊᓄᑭᐨ.
ᒥᐦᐅᐁᐧ ᒪᐊᐧᐨ ᑲᒥᓀᐧᐣᑕᒪᐣ ᐁᑐᑕᒪᐣ, ᐃᑭᑐ, ᓂᐦᓱᐊᐧᐣ ᐅᓂᒐᓂᓴᐣ.
ᐱᓂᐡ ᑭᔭᓂᐃᓯᓭᓂ ᒋᐊᐣᑕᓄᑭᐨ ᒋᑕᔑᑲᑌᐳᐨ ᐃᒪ ᑕᐣᑕᕑ ᐯ, ᒥᓯᐁᐧ ᐱᑯ ᑲᐃᓇᐣᒋᑲᓄᐊᐧᐠ ᒋᐃᔑᑲᑌᐳᐨᐃᒪ ᓂᔑᐣ ᐃᐧᓯᓂᐃᐧᑲᒥᑯᐠ ᐃᒪ ᐯᔑᐠ ᒋᐸᑫᐧᐃᐧᑲᒥᑯᐠ.
ᐁᑲᐧ ᑕᐡ ᓂᐦᓱᔭᑭ ᐅᐁᐧ ᑭᐱᒥᑐᑕᑦ ᐃᒪ ᐸᐧᕑᐟ ᐊᕑᑎᕑ ᐱᓂᐡ ᐊᐱᐣ ᑲᑭᔭᓂᐳᑯᐡᑲᒪᑲᑭᐸᐣ.
ᒪᐧᕑᐃᐢ ᑭᓇᓇᑕᐊᐧᓄᑭ ᐃᒪ ᒣᑲᐧᐨ ᓄᑯᑦ ᑲᑕᓇᓄᑭᐨ ᐁᐃᐧᐅᒋ ᐱᒪᒋᐦᐊᐨ ᐅᑎᐯᓂᒪᑲᓇᐣ ᐁᑲᐧ ᑕᐡ ᒣᑲᐧᐨ ᑭᔐᐱᓯᑦ 13 ᑲᐃᓇᑭᓱᓂᐨ ᐊᐱᐣ ᑲᑭᒪᑕᓄᑭᑕᒪᐊᐧᐸᐣ ᒣᐧᑲᐨ ᓄᑯᑦ ᑲᐅᑐᑭᒪᒥᐨ.