ᒪᑕᐊᐧ ᑕᔑᑫᐃᐧᐣ ᑲᐃᐧᐣ ᓂᑕᑯᓂᑯᒥᐣ ᐅᑎᓀᐣᑕᓇᐊᐧ ᐃᒪ ᐱᐊᐧᐱᑯᑫᐃᐧᐣ ᑲᐱᒪᓄᑲᑌᐠ

ᐅᑭᒪᑲᓇᐠ ᐃᒪ ᒪᑕᐊᐧ ᐊᓂᔑᓇᐯ ᐃᐢᑯᓂᑲᓂᐠ ᐊᒥ ᐱᑯ ᑭᔭᐸᐨ ᐁᐃᔑ ᐱᒥ ᒪᒋᓭᐊᐧᑫᐣᑕᒧᐊᐧᐨ ᐁᑲ ᑲᑕᑯᓇᑲᓄᐊᐧᐨ ᐃᒪ ᐅᓇᒋᑫᐃᐧᓂᐠ ᒥᓇ ᑲᐱᒪᓄᑲᑌᐠ ᐃᐁᐧ ᐱᐊᐧᐱᑯᑲᐣ ᒣᑲᐧᐨ ᑲᐱᒥᐊᓂᒧᑌᐠ.
ᒣᑲᐧᐨ ᑲᑭ ᐸᐸᔑ ᒪᐊᐧᒋᐦᐃᑎᐊᐧᐸᐣ ᐅᐁᐧ ᐁᑭ ᐊᓂᒧᑕᒧᐊᐧᐸᐣ ᐅᑭᒪᐃᐧᐣ ᒥᓇ ᐃᑫᐧᓂᐊᐧᐠ ᑭᒋ ᐱᐊᐧᐱᑯᑫᐃᐧᓂᐊᐧᐠ ᐁᑲ ᑲᐧᔭᐠ ᑲᐊᓂᒧᑕᒪᐊᐧᐊᐧᐨ ᐊᓂᔑᓇᐯᐊᐧᐣ ᐅᐁᐧ ᐅᐣᒋ, ᐅᑭᒪᑲᓇᐠ ᐊᒥ ᐱᑯ ᑭᔭᐸᐨ ᐁᐃᔑ ᐱᒥ ᑲᑫᐧᑌᐊᐧᐨ ᑫᑯᓀᓂᐦᐃ ᐁᑲ ᑲᐅᐣᒋ ᑕᑯᓇᑲᓄᐊᐧᐨ ᐃᒪ ᐱᐊᐧᐱᑯᑫᐃᐧᐣ ᑲᐱᒥᐊᓂᑲᑌᐠ.
ᐃᒪ ᐯᔑᑲᐧᔦᐠ ᑲᐃᔑ ᑭᒋᔓᓂᔭᐊᐧᐠ ᐱᕑᐃᔭᐣ ᑲᐃᒋᑲᑌᐠ ᑲᐃᓀᐣᑕᒧᐊᐧᐨ ᒥᐢᑕᐦᐃ ᑲᐊᔭᐨ ᒪᑲᑌᐊᐧᓯᐣ ᑲᓇᓇᐣᑎᓇᐊᐧᐊᐧᐨ, ᐊᒥᐦᐃᒪ ᑲᐃᔑ ᒥᑲᐊᐧᐊᐧᐨ ᐊᑲᐧᑭᐣᐠ ᒥᓇ ᐁᐧᐱᑫᐧ ᑲᐃᔑ ᐅᑕᐦᑭᒥᐊᐧᐨ.
ᓴᓂ ᑲᐣᔭᐣ, ᐅᑭᒪᑲᐣ ᐁᕑᐅᓫᐊᐣᐟ ᐃᐢᑯᓂᑲᐣ, ᑭᐃᑭᑐ ᐅᑭᒪᐃᐧᑲᒥᑯᐣ ᐃᒪ ᑕᐣᑐᕑ ᐯ ᒥᓇ ᓴᐟᐱᕑᐃ ᒪᐃᐧᓀᐢᑲᑎᐊᐧᐠ ᐁᑲᑫᐧ ᑌᐱᓇᒧᐊᐧᐨ ᑫᑕᔑ ᓂᑭᓴᐧᐊᐧᐨ ᐅᓯᓂᐣ. ᐊᒥᑕᔥ ᑫᒋᓇᐨ ᑫᐊᓂᓯᓭᐠ ᒋᐊᓂ ᐅᔑᒋᑲᑌᐠ ᒥᑲᐦᓇ ᐃᒪ ᐁᕑᐅᓫᐊᐣᐟ ᑲᐃᔑ ᑎᐯᐣᑕᒧᐊᐧᐨ ᐊᐦᑭ, ᐁᑲ ᐁᓇᐦᐁᐣᑕᒧᐢᑲᑯᐨ ᑲᐣᔭᐣ.
“ᐊᓂᔑᓂᓂᐊᐧᐠ ᐃᒪ ᑲᐃᔑ ᑲᐯᔑᐊᐧᐨ ᒪᔭᑦ ᑲᐃᔑ ᓄᒋᒋᑲᓂᐊᐧᓂᐠ ᐱᐊᐧᐱᑯᑫᐃᐧᐣ, ᐊᒥᔕ ᐁᑲ ᒪᐦᔑ ᐁᐱᐊᐣᑕᐁᐧᓂᒥᐣᑕᐧ ᑲᐃᔑ ᐊᓂᒧᒋᑲᑌᐠ ᐅᐁᐧ ᐁᑲ ᑲᓇᑫ ᐁᑭ ᐊᓂᒧᑕᒧᐊᐧᐨ ᐊᓂᐣ ᑫᐃᓯᓭᐦᐃᑯᐊᐧᐨ ᐃᒪ ᐅᑕᔑᑫᐃᐧᓂᐊᐧ,” ᐃᑭᑐ.
ᐁᑲᐧ ᑕᔑᐣ ᒧᒋ ᐱᐦᐅᐊᐧᐨ ᒋᐊᐣᑐᒥᐣᑕᐧ, ᐁᕑᐅᓫᐊᐣᐟ ᐊᓂᔑᓇᐯᐠ ᑫᒋᐊᐧᐠ ᑭᐃᔕᐊᐧᐠ ᐃᒪ ᑲᐃᐧ ᐃᔑᐊᓂᒧᑌᐠ ᑲᐃᐧ ᑕᔑ ᓂᐣᑭᓴᐧᑲᓄᐊᐧᐨ ᐊᓯᓂᐠ.
ᐅᐁᐧ ᑕᔑᑫᐃᐧᐣ ᐱᒥ ᐊᓂᒧᑕᒪᑎᐊᐧᐠ ᑭᐢᐱᐣ ᑫᑭ ᐸᑭᑎᓂᑲᑌᑯᐸᓀᐣ ᐃᐁᐧ ᐊᓯᓂᐠ ᑲᐃᐧ ᐃᔑ ᓂᐣᑭᓯᐣᑕᐧ ᐯᔓᐣᐨ ᐃᐢᑯᓂᑲᓂᐠ ᒋᐊᔭᐠ, ᒥᓇ ᒋᒪᓯᓇᐦᐊᒧᐊᐧᐨ ᑭᕑᐃᐣᐢᑐᐣ ᐊᓄᑭᐃᐧᐣ ᓂᓯᑐᑕᒪᐃᐧᐣ ᒪᓯᓇᐦᐃᑲᐣ.
“ᐊᒥ ᐁᐃᔑ ᓂᓯᑕᐃᐧᓇᒪᐣᐠ ᒋᑭ ᐊᔭᑭᐸᐣ ᒋᐅᔑᒋᑲᑌᐠ ᐊᓯᓂᐠ ᑲᐃᐧ ᐃᔑ ᓂᐣᑭᓯᐣᑕᐧ ᐯᔓᐣᐨ ᓂᑕᐦᑭᒥᓇᐣ ᑲᐃᔑᔭᐠ ᒥᓇ ᒋᐅᐣᒋ ᐃᐧᒋᐦᐃᑯᐊᐧᐸᐣ ᐅᒪ ᑌᑎᐸᐦᐃ ᑲᐃᔑᔭᔭᐠ ᐃᒪ ᐊᓯᓂᐠ ᑲᐅᐣᒋ ᐅᑕᐱᓇᑲᓄᐊᐧᐨ,” ᑲᐣᔭᐣ ᑭᐃᑭᑐ.
“ᑕᑭ ᐃᓯᓭ ᐃᐧᓂᑯ ᐊᐧᑌᓂᑲᓂᔭᑊ ᒋᑭ ᐃᓇᐱᑫᓂᑲᑌᑭᐸᐣ ᐃᒪ ᑫᑕᔑ ᐱᐊᐧᐱᑯᑲᓂᐊᐧᐠ, ᔕᑯᐨ ᑕᔥ ᓂᑕ ᓇᐣᑕᐁᐧᓂᒪᒥᐣ ᐅᑭᒪᐃᐧᐣ ᒋᐃᐧᑐᑲᑯᔭᐣᐠ ᐅᐁᐧ ᒋᑭ ᑲᐢᑭᑐᔭᐣᐠ.”
ᐁᑲᐧ ᑕᔥ ᐸᓂᒪ ᐊᐦᑭ ᑭᓇᓇᑲᒋᒋᑲᑌᐠ ᒥᓇ ᐸᓂᒪ ᑭ ᐃᐢᑲᐧ ᐅᔑᒋᑲᑌᐠ ᑫᑕᔑ ᓂᐣᑭᓯᐣᑕᐧ ᐊᓯᓂᐠ, ᐱᓇᒪ ᐊᓂᔑᓇᐯᐠ ᑲᒪᒥᑎᓀᐣᑕᒧᐦᐃᑯᐊᐧᐨ ᑕᑭ ᐊᓂᑲᑌᐸᐣ, ᐃᑭᑐ ᐁᐧᐱᑫᐧ ᐅᑭᒪᑲᐣ ᑲᓀᓂᔭᐢ ᐊᐧᐸᐢ.
ᐊᒥ ᑲᑭ ᐃᑭᑐᐨ ᒪᑕᐊᐧ ᐃᐢᑯᓂᑲᐣ ᒥᔑᓄᐊᐦᑭ ᐊᔕ ᐅᑐᐣᒋ ᐱᒥ ᐊᓂᒧᑕᓇᐊᐧ ᐃᐁᐧᓂ ᓇᓇᐣᑕᐊᐧᓯᓂᐁᐧᐃᐧᐣ ᒥᓇ ᐱᐊᐧᐱᑯᑫᐃᐧᐣ ᑫᐃᓯᓭᐦᐃᑯᐊᐧᐨ ᐃᒪ ᐅᑕᔑᑫᐃᐧᓂᐊᐧ.
ᐅᓇᒋᑫᐃᐧᓇᐣ ᓇᐣᑕᐧᐁᐣᑕᑲᐧᐣ ᑲᐧᔭᐠ ᒋᑐᒋᑲᑌᐠ: ᑭᕑᐊᐱᓫ
ᒥᔑᐣ ᑫᑯᓇᐣ ᐅᒪᒥᑎᓀᐣᑕᒧᐦᐃᑯᓇᐊᐧ ᑐᑲᐣ ᐁᐧᓄᑎᓯᐃᐧᐣ ᒥᓇ ᐱᒪᑎᓯᐃᐧᐣ ᐊᓂᐣ ᑫᑭ ᐃᓭᐦᐃᐁᐧᒪᑲᑭᐸᐣ, ᐊᐦᑭᐃᐧ ᑫᑯᓇᐣ ᑐᑲᐣ ᓂᐱ ᑫᐃᓇᑲᒥᐣᐠ, ᐸᐢᑯᑲᐦᐃᑫᐃᐧᐣ ᒥᓇ ᐊᓂᐣ ᐊᐃᐧᔭᔑᔕᐠ ᑫᐃᓯᓭᐦᐃᑯᐊᐧᐸᐣ.
ᓄᑯᒥᑫ ᓇᐊᐧᐨ, ᐃᐁᐧ ᒪᐊᐧᐨ ᑲᑭ ᐊᓂᒧᒋᑲᑌᑭᐸᐣ ᐃᒪ ᐊᓂᔑᓂᓂᐊᐧᐠ ᒋᑭ ᐅᐣᑎᓇᒧᐊᐧᐸᐣ ᐊᓂᑭᐃᐧᓇᐣ, ᐅᐢᑭ ᒪᒋᑕᐃᐧᓇᐣ ᒥᓇ ᑭᑭᓄᐦᐊᒪᑫᐃᐧᓇᐣ ᐃᒪ ᐊᓂᔑᓂᓂᐊᐧᐠ ᑲᑲᐯᔑᐊᐧᐨ.
ᑲᐧᔭᐠ ᓇᐣᑕᐁᐧᐣᑕᑲᐧᓄᐣ ᐅᑫᐧᓂᐊᐧᐣ ᒋᑲᓄᒋᑲᑌᑭᐣ, ᐊᐧᐸᐢ ᐃᑭᑐ.
“ᐃᐁᐧ ᑲᑫᐧᒋᒥᐁᐧᐃᐧᐣ ᑲᐃᑕᒪᐣᐠ ᑫᒋᐊᐧᐠ ᒋᐱᓇᓯᑲᐊᐧᐊᐧᐨ ᐊᓂᔑᓂᓂᐊᐧᐣ ᐅᒪ ᑲᑲᐯᔑᓂᐣᐨ– ᐅᐢᑲᑎᓴᐣ, ᑭᒋᔭᐦᐊᐠ, ᐅᐊᐧᓂᐦᐃᑫᐠ – ᒋᑲᑫᐧᒋᒪᐊᐧᐨ ᐊᓂᐣ ᑫᐃᓯᓭᐦᐃᑯᐊᐧᐸᐣ ᐱᐊᐧᐱᑯᑫᐃᐧᐣ ᒪᒋᒋᑲᑌᐠ ᓇᐣᑕ ᑲᔦ ᒥᑲᓇᑫᐃᐧᐣ ᐱᒪᒧᒋᑲᑌᐠ ᐃᐁᐧ ᑲᐅᐣᑕᒋᐦᐅᐊᐧᑫᔭᐣᐠ ᐊᐦᑭᑲᐣᐠ ᒥᓇ ᐱᑯ ᐅᑕᔑᑫᐃᐧᓂᐊᐧ,” ᑭᐃᑭᑐ.
ᐅᐁᐧ ᑕᔥ ᑕᑲᐧᐨ ᑭᐃᓯᓭ, ᐊᐧᐸᐢ ᑭᐃᑭᑐ ᑕᑲᐧᐨ ᐅᑕᓂᔑᓂᓂᒪᐣ ᐸᑲᐣ ᐁᑭ ᐅᐣᒋ ᓄᐣᑕᒧᓂᐣᐨ ᑎᐸᒋᒧᐃᐧᓇᐣ ᑲᐅᐣᒋ ᐸᑭᑎᓂᑲᑌᑭᐣ ᐱᐊᐧᐱᑯᑫᐃᐧ ᐃᔑᒋᑫᐃᐧᓇᐣ ᐁᑐᒋᑲᑌᓂᐠ ᓇᐣᑕ ᑲᔦ ᐸᓂᒪ ᐁᐧᑎ ᐱᑲᐧᒋᔭᐦᐃᐣᐠ ᑲᐸᐸᒥᔭᓂᐣᐨ ᐸᔦᔥ ᐁᑭ ᐊᐧᐸᐣᑕᒧᐊᐧᐨ ᑎᐱᓇᐁᐧ ᐅᔥᑭᔑᑯᐊᐧ ᐃᐁᐧ ᐁᐃᓯᓭᓂᐣᐠ. ᐊᒥ ᑲᑭ ᐃᑭᑐᐨ ᐅᑕᓂᔑᓂᓂᒪᐣ ᐁᐃᐧ ᑭᑫᐣᑕᒧᓂᐣᐨ ᐊᓂᐣ ᑫᐃᔑ̇ᑲᐣᑕᐃᐧᐣᑕᐧ ᒥᓇ ᐊᓂᐣ ᑫᐃᔑ ᐃᐧᒋᐦᐃᑯᐊᐧᐨ ᐅᐁᐧ ᑲᑐᒋᑲᑌᓂᐠ.
“ᓂᓇᐃᐧᐣᐟ ᑲᓂᑲᓂᐢᑲᒪᑫᔭᐣᐠ ᑲᐃᐧᐣ ᓂᑕᔭᓯᒥᐣ ᑫᑭ ᐅᐣᒋ ᓇᓇᐣᑕᐃᐧᑭᑫᐣᑕᒪᑭᐸᐣ ᒥᓇ ᑲᐃᐧᐣ ᐊᐃᐧᔭ ᔓᓂᔭ ᑫᐃᓇᐸᒋᐦᐊᔭᐣᐠ ᒋᑭ ᐃᐧᐣᑕᒪᑯᔭᐣᑭᐸᐣ ᓂᑲᑫᐧᑌᐃᐧᓂᓇᐣ ᐁᑲᐧ ᑕᔥ ᑲᔦ ᐁᑲ ᑌᐯᐧ ᑲᐃᐧᑕᑯᓂᑯᔭᐣᐠ ᐅᑭᒪᐃᐧᐣ ᒥᓇ ᐱᐊᐧᐱᑯᑫᐃᐧᓂᐊᐧᐠ ᓂᑕᔑᑫᐃᐧᓂᓇᐣ ᐃᒪ ᑲᐃᔑ ᐊᓂᒧᒋᑲᓂᐊᐧᐠ ᓇᐱᐨ ᒪᒋᓇᑲᐧᐣ ᐃᐁᐧ ᑲᑐᑕᒧᐊᐧᐨ,” ᐊᐧᐸᐢ ᑭᐃᑭᑐ.
ᐊᓂᔑᓇᐯ ᐊᐢᑭ ᐅᑭᒪᑲᓀᐢ ᕑᐁᐢ ᕑᐅᑎᐟ ᑲᐃᐧᐣ ᒋᓇᐦᐊᐸᑕᐣᐠ ᐅᐁᐧ ᑲᐃᓯᓭᓂᐠ.
“ᐅᒪ ᐊᓂᔑᓇᐯ ᐊᐢᑭ ᐅᑎᐯᐣᒋᑫᐃᐧᓂᐠ, ᐅᑭᒪᐃᐧᓇᐣ ᒥᓇ ᑭᒋᐊᓂᑭᐃᐧᓇᐣ ᑲᐱᒥᐃᐧᑐᐊᐧᐨ ᓇᐣᑕᐁᐧᐣᑕᑯᓯᐊᐧᐠ ᐱᓇᒪ ᒋᑲᑫᐧᒋᒪᐊᐧᐨ ᐊᓂᔑᓂᓂᐊᐧᐣ ᒪᐧᔦ ᒪᑕᓄᑲᑕᒧᐊᐧᐨ ᐱᐊᐧᐱᑯᑫᐃᐧ ᐃᔑᒋᑫᐃᐧᓇᐣ ᐃᒪ ᐊᓂᔑᓇᐯ ᐅᑕᑭᒥᐣᐠ,” ᕑᐅᑎᐟ ᑭᐃᑭᑐ.
ᐃᑫᐧᓂᐊᐧᐣ ᑕᔑᑫᐃᐧᓇᐣ ᑲᐃᐧᐣ ᒋᑭᐸᑯᐢᑲᒧᐊᐧᐨ ᐃᐁᐧ ᑲᐃᐧᑐᒋᑲᑌᐠ, ᐃᑭᑐ.
ᔕᑯᐨ ᑕᔥ ᐱᓇᒪ ᑕᑭ ᐅᓇᑌᐸᐣ ᓇᑯᒥᑎᐃᐧᐣ ᒋᑫᒋᓇᐦᐅᐊᐧᐨ ᐊᓂᔑᓂᓂᐊᐧᐠ ᒋᑭ ᐅᐣᒋ ᒥᓄᓭᐦᐃᑯᐊᐧᐨ ᐃᐁᐧ ᐁᐧᓄᑎᓯᐃᐧᐣ ᑫᐅᐣᒋ ᒥᑭᑲᑌᐠ ᐅᒪ ᐱᐊᐧᐱᑯᑫᐃᐧᐣ, ᑐᑲᐣ ᐃᒪ ᑲᐃᔑ ᐊᐧᐸᐣᒋᑲᑌᐠ ᓄᑯᑦ ᐱᐊᐧᐱᑯᑲᐣ ᒣᑲᐧᐨ ᑲᐱᒪᓄᑲᑌᐠ ᐅᒪ ᓂᑕᑭᒥᓇᐣ ᓂᑫ.
“ᑲᐃᐧᐣ ᒥᓇᐊᐧ ᓂᑲ ᐅᑕᐱᓇᓯᒥᐣ ᐊᑲᐧᒋᔭᐦᐃᐣᐠ ᑲᐅᐣᒋ ᐅᓀᐣᑕᑲᐧᑭᐣ ᐁᑲ ᐊᓂᔑᓇᐯ ᐊᐢᑭ ᐃᐢᑯᓂᑲᓇᐣ ᑲᑕᑯᓂᑲᑌᑭᐣ ᐃᒪ ᑫᐃᐧᓇᐊᐧ ᒋᑕᑲᐧᐱᐊᐧᐨ ᐱᐊᐧᐱᑯᑫᐃᐧ ᐃᔑᒋᑫᐃᐧᓇᐣ ᑲᐊᓂᒧᒋᑲᑌᑭᐣ ᐅᒪ ᑲᐃᔑ ᑎᐯᐣᑕᒪᐣᐠ ᓂᑕᑭᒥᓇᐣ,” ᓫᐅᑎᐠ ᐃᑭᑐ.
ᒪᑕᐊᐧ ᐅᑭᒪᑲᓇᐠ ᐃᑭᑐᐊᐧᐠ ᐱᓇᒪ ᐱᐊᐧᐱᑯᑫᐃᐧ ᒥᓇ ᓇᓇᐣᑕᐊᐧᓯᓂᐁᐧᐃᐧ ᓇᑯᒥᑎᐃᐧᓇᐣ ᒋᐊᓂᒧᑕᒪᐃᐧᐣᑕᐧ
ᑲᑭᓇ ᐃᐢᑯᓂᑲᓇᐣ ᑲᐅᐣᒋ ᑕᑯᓭᑭᐣ.
ᑭᔭᑦ ᐱᑯ ᐯᐦᐱᑭᔥ ᓇᐣᑕ ᑲᔦ ᑲᑭᓇ ᒋᒪᐊᐧᐣᑐᓂᐣᑕᐧ ᒥᓇ ᐱᓇᒪ ᑲᐧᔭᐠ ᒋᐅᐣᒋ ᐃᐧᒋᒋᑲᑌᐠ ᐅᑭᒪᐃᐧᓂᐠ ᒥᓇ ᑭᒋ ᐱᐊᐧᐱᑯᑫᐃᐧᓂᐠ.
ᒥᔐᓫ ᑭᕑᐊᐱᕑ, ᐅᑭᒪᐃᐧᐣ ᑭᐁᐧᑎᓄᐠ ᐊᓄᑭᐃᐧᓇᐣ ᒥᓇ ᒧᓇᐦᐊᓯᓂᐁᐧᐃᐧᐣ ᒥᓇ ᒥᑎᑯᑫᐃᐧᐣ ᐊᓂᑭᓇᑲᐣ ᑭᐃᑭᑐ, ᑲᐃᐧᐣ ᒋᑭ ᐃᓯᓭᑭᐣ ᐊᐣᑕᐦᒋᑫᐃᐧᓇᐣ.
ᐃᐁᐧ ᑲᐃᔑ ᐃᐧᒋᐃᐧᑎᐊᐧᐨ ᐅᐣᑌᕑᐃᔪ ᐅᑭᒪᐃᐧᐣ, ᑭᒋ ᐱᐊᐧᐱᑯᑫᐃᐧᓂᐊᐧᐠ ᒥᓇ ᐊᓂᔑᓇᐯ ᐃᐢᑯᓂᑲᓇᐣ ᓇᐣᑕᐁᐧᐣᑕᑲᐧᐣ ᐃᒪ ᒋᑭ ᐅᐣᒋ ᐃᐧᑕᓄᑭᒥᑎᐊᐧᐸᐣ ᑭᐢᑌᓂᒥᑎᐃᐧᓂᐠ ᒥᓇ ᐊᐯᓂᒧᐃᐧᓂᐠ.
ᐊᒥ ᑲᑭ ᐃᑭᑐᐨ ᐅᐣᑌᕑᐃᔪ ᐅᑭᒪᐃᐧᐣ ᐁᐃᐧ ᐅᓇᑐᐨ ᐅᐢᑭ ᐊᓄᑭᐃᐧᐣ -ᐊᓂᔑᓇᐯᐣ ᑲᐅᐣᒋ ᐃᐧᑕᓄᑭᒪᐨ ᑲᐊᔑᒋᑕᐧᑭᐨ ᐊᓄᑭᐃᐧᓂᐠ- ᒋᐅᐣᒋ ᐊᔭᒥᑕᒪᑫᐨ ᑲᒪᒥᑎᓀᐣᑕᒥᐦᐃᑯᐊᐧᐨ ᒪᑕᐊᐧ ᑕᔑᑫᐃᐧᓇᐣ.
ᑭᕑᐱᓫ ᐅᓇᐣᑕᐁᐧᐣᑕᐣ ᐃᐧᐸᐨ ᐊᐃᐧᔭ ᒋᑭ ᐃᓇᓄᑭᓂᐸᐣ.
“ᒥᐢᑕᐦᐃ ᐊᔭᒪᑲᐣ ᑲᐃᓯᓭᑭᐣ ᐃᒪ ᐱᐊᐧᐱᑯᑫᐃᐧᓂᐠ,” ᑭᕑᐊᐱᓫ ᐃᑭᑐ. “ᔕᑯᐨ ᑕᔥ ᑭᒋᓀᐣᑕᑲᐧᐣ ᑲᐧᔭᐠ ᒋᑐᒋᑲᑌᑭᐣ.”
ᐃᑫᐧᓂᐊᐧᐣ ᑲᑭ ᐃᐧᐣᑕᒧᐊᐧᐸᐣ ᒪᑕᐊᐧ ᐅᑭᒪᑲᓇᐠ ᑲᒪᒥᑎᓀᐣᑕᒧᐦᐃᑯᐊᐧᐨ ᑕᑭ ᐃᓯᓭ ᒋᑭ ᐅᐣᒋ ᐊᓂᑲᑕᒧᐊᐧᐸᐣ ᑲᑭ ᐅᐢᑭ ᒪᑕᓄᑭᑕᒪᑫᐨ ᐃᒪ ᐱᐊᐧᐱᑯᑫᐃᐧᐣ ᑲᐱᒥ ᐊᓄᑲᑌᐠ ᑲᐊᐱᑕᒧᐊᐧᐨ.
“ᓂᓇᐣᑕᐁᐧᓂᒪᒥᐣ ᐊᓂᐣᑕ ᐊᐃᐧᔭᐠ ᒋᑲᐧᔭᐣᒋᐊᐧᐨ ᑫᐅᐣᒋ ᐊᐧᐃᐧᐣᑕᒪᑯᔭᐣ ᑫᑯᓇᐣ,” ᑭᕑᐊᐱᓫ ᐃᑭᑐ. “ᐅᑫᐧᓂᐊᐧᐠ ᑫᑭ ᐃᓇᐣᑭᓱᐊᐧᐸᐣ ᐊᔕ ᐅᑕᓇᐣᐠ ᑲᑭ ᐱᐊᓄᑲᑕᒧᐊᐧᐸᐣ ᐱᐊᐧᐱᑯᑫᐃᐧ ᐊᓂᑭᐃᐧᓇᐣ… ᒥᓇ ᒋᓂᓯᑎᑕᒧᐊᐧᐨ ᑲᑭᓇ ᐊᐃᐧᔭᐣ ᑲᒪᒥᑎᓀᐣᑕᒧᐦᐃᑯᐊᐧᐨ.”
ᒪᐧᔦ ᒪᒋᓭᑭᐣ ᐊᓂᑭᐃᐧᓇᐣ ᓇᑯᒥᑎᐃᐧᓇᐣ ᓇᐣᑕᐁᐧᐣᑕᑲᐧᓄᐣ ᐊᔕ ᒋᑭ ᐅᓇᑌᑲᐧᐸᐣ, ᑲᐣᔭᐣ ᐃᑭᑐ.
“ᐅᐁᐧ ᐱᐊᐧᐱᑯᑫᐃᐧ ᐊᓄᑭᐃᐧᐣ ᑲᐱᒪᓄᑲᑌᐠ ᑲᐃᐧᐣ ᑕᑭ ᐃᔑ ᐸᑭᑎᓂᑲᑌᓯᐣ ᐊᐊᐧᔑᒣ ᒋ ᒪ̇ᒋᑐᐊᐧᐨ ᐱᓇᒪ ᐊᓂᔑᓇᐯ ᐃᐢᑯᓂᑲᓇᐣ ᒋᑭ ᑲᑫᐧᒋᒪᑲᓄᐊᐧᐸᐣ ᒥᓇ ᑲᐧᔭᐠ ᒋᐃᔑᓇᑲᐧᐠ ᑲᐃᐧ ᐊᓄᑲᑕᒧᐊᐧᐨ,” ᑲᐣᔭᐣ ᐃᑭᑐ. “ᑲᑭᓇ ᑭᓇᐣᑕᐁᐧᐣᑕᒥᐣ ᒋᐅᐣᒋ ᒥᓄᓭᔭᐣᐠ ᐅᑫᐧᓂᐊᐧᐣ ᐱᐊᐧᐱᑯᑫᐃᐧᓇᐣ ᑫᐊᓂᔭᑭᐣ ᒥᓇ ᐊᓄᑭᐃᐧᓇᐣ ᒥᓇ ᐱᑯ ᒋᑭ ᒪᒋᑐᐊᐧᐸᐣ ᒪᒋᑕᐃᐧᓇᐣ ᑭᑕᓂᔑᓂᓂᒥᓇᐣ.
"ᑲᐃᐧᐣ ᓂᑲᐸᑭᑎᓇᓯᐣ ᒥᓇᐊᐧ ᒋᓇᐱ ᐃᓯᓭᐠ ᐅᑕᓇᐣᐠ ᑲᑭ ᐃᓯᓭᑭᐸᐣ ᐁᑭ ᒧᒋ ᑲᓇᐊᐧᐸᑕᒪᐣᐠ ᑲᐃᐧᑐᑕᒧᐊᐧᐨ ᐱᑯ ᐁᑭ ᑐᑕᒪᐊᐧᐨ ᐁᑲᐧ ᑕᔥ ᓄᓯᓴᐠ ᒋᑲᑫᐧᒋᒥᔑᐊᐧᐨ ᓂᔑᑕᓇ ᐊᐦᑭᐃᐧᐣ ᓂᑲᐣ ᑫᑯᓀᓂᐦᐃ ᑲᑭ ᐅᐣᒋ ᐁᑲ ᓇᐣᑕ ᐃᔑᑲᐣᑕᐃᐧᐣᑕᐧ ᐃᐧᓇᐊᐧ ᑕᔑᐣ ᐁᑭ ᐅᐣᒋ ᐁᐧᓄᑎᓯᐊᐧᐨ.”
ᑭᕑᐊᐱᓫ ᐅᐃᐧᒋᓀᐣᑕᐣ ᐅᐁᐧᓂ.
ᑭᒋ ᐱᐊᐧᐱᑯᑲᓇᐣ ᓇᐣᑕᐁᐧᐣᑕᑯᓯᐊᐧᐠ ᒋᑭᑫᐣᑕᒧᐊᐧᐨ ᐁᑲ ᒋᑭ ᐃᔑᒪᒋᑐᐊᐧᐨ ᐸᓂᒪ ᐁᐦᑕ ᑲᐧᔭᐠ ᑭᐅᑕᒪᐊᐧᐊᐧᐨ ᐊᓂᔑᓇᐯᐣ ᑫᐅᐣᒋ ᐃᐧᒋᐦᐃᑯᓂᐣᐨ,” ᑭᕑᐊᐱᓫ ᐃᑭᑐ.