ᑕᔑᑫᐃᐧᓇᐣ ᐅᓇᓇᐣᑎᓇᓇᐊᐧ ᐊᓂᐣ ᑫᑭᐃᔑ ᐃᐧᒋᒋᑲᑌᑭᐸᐣ ᐅᐁᐧ ᐃᓯᓭᐃᐧᐣ

“ᓂᔑᐣ ᑌᓇᐢ ᐱᕑᐊᐣᐠᕑᐃᐣ ᑲᓇᒧᑎ ᐅᑎᐢᑯᓂᐠ ᑭᑎᐸᒋᒧᐊᐧᐠ ᑲᑭ ᑎᐯᓂᒥᑯᐊᐧᐨ ᒪᒋᒪᐢᑭᑭᐣ ᐃᒪ ᒪᐊᐧᒋᐦᐃᑎᐃᐧᓂᐠ ᑲᑭᔭᑭᐸᐣ ᑕᐣᑐᕑ ᐯ.
“ᓂᐣ ᐅᑎᐢᑯᓂ ᐯᔑᑯᔕᑊ ᓂᑕᑯᐢᑲ ᐅᒪ ᑌᓇᐢ ᐱᕑᐊᐣᐠᕑᐃᐣ ᑭᑭᓄᐦᐊᒪᑫᐃᐧᑲᒥᐠ ᐁᑲᐧ ᑕᐢ ᒪᒋᒪᐢᑭᑭᐣ ᓂᑕᐸᒋᑐᓇᐣ,” ᐃᑭᑐ ᐊᓂᐦᑕ ᒥᑭᐢ, ᐅᑎᐢᑯᓂ ᓀᐣᑲᐃᐧᓴᑲᐦᐃᑲᓂᐠ ᐅᑭᑕᔑ ᒪᒋ̇ᐊᐸᒋᑐᓇᐣ ᐃᐧᓴᑫᐣᑕᒧᒪᐢᑭᑭᐣ ᓂᓯᐊᐦᑭ ᐅᑕᓇᐣᐠ ᓂᑯᑕᐧᓯᔕᑊ ᑲᑕᓱᐱᐳᓀᐸᐣ. “ᓂᑐᐢᑲᑎᓯᐢ ᐁᑲᐧ ᑕᐢ ᒥᓇ ᑲᔦ ᒥᐢᑕᐦᐃ ᐃᓯᓭᐃᐧᓇᐣ ᓂᐱᓇᑭᐢᑲᓇᐣ ᐅᑕᓇᐣᐠ ᑲᐱᐊᐦᑭᐊᐧᐠ.”
ᒥᑭᐢ ᑭᑕᑎᐸᒋᒧ ᐅᑕᓂᒥᓭᐃᐧᐣ ᐃᒪ ᐅᓂᑭᐦᐃᑯᒪᑲᐣᐠ. ᑲᐃᐧᒋᐊᐧᐨ ᓇᐯᐊᐧᐣ ᒥᓇ ᐅᑐᑌᒪᐣ.
“ᐁᑲᐧ ᑕᐢ ᐃᒪ ᐁᐦᑕ ᐃᐧᒋᐦᐃᑯᐃᐧᐣ ᑫᑭᐅᐣᑎᓇᐣᐠ ᐃᒪ ᐱᑲᐧᒋᔭᐦᐃ ᑭᑭᓄᐦᐊᒪᑫᐃᐧᐣ ᑲᐊᔭᓂᐠ ᐃᒪ ᐅᑕᔑᑫᐃᐧᓂᐠ, ᔕᑯᐨ ᑕᐢ ᑲᐃᐧᐣ ᒋᐅᐣᒋ̇ᔕᔭᐣ ᐅᓴᑦ ᐁᑭ ᒪᒪᒉᓂᒧᔭᐣ ᒋᓇᓇᐣᑎᓇᒪᐣ ᐃᐧᒋᐦᐃᑯᐃᐧᐣ,” ᒥᑭᐢ ᑭᐃᑭᑐ ᐃᒪ ᐅᑭᒪᑲᓇᐠ ᐅᒪᐊᐧᒋᐦᐃᑎᐃᐧᓂᐊᐧ ᒪᒋᒪᐢᑭᑭᑫᐃᐧᐣ ᑲᑭ ᐊᓂᒧᑕᒧᐊᐧᐨ ᒣᑲᐧᐨ ᑲᐢᑲᑎᓄᐱᓯᑦ 15 ᑲᐃᓇᑭᓯᐨ. “ᑲᐃᐧᐣ ᓂᑐᐣᒋ ᓇᐣᑕᐁᐧᓂᒪᓯᐠ ᐊᐦᑎᐠ ᐊᐃᐧᔭᐠ ᒋᑭᑫᓂᒥᔑᐊᐧᐨ ᐊᓂᐣ ᑲᐃᔑᒋᑫᐊᐧᐠ ᒥᓇ ᑫᑯ ᒪᒋᒪᐢᑭᑭᐣ ᑲᐊᐸᒋᑐᐊᐧᐠ.”
ᒥᑭᐢ ᐃᑭᑐ ᑫᑲᐟ ᐱᑯ ᒧᔕᐠ ᐁᒪᒉᓂᒧᐨ, ᐁᑭ ᐃᐧᐣᑕᐣᐠ ᒪᐊᐧᐨ ᐁᒥᓀᐧᐣᑕᐠ ᑲᐸᐧᓂᔑᒧᓇᓂᐊᐧᐠ ᒥᓇ ᑲᓂᑲᒧᓇᓂᐊᐧᐠ ᐁᑲᐧ ᑕᐢ ᑲᐃᐧᐣ ᒋᑭᐃᓯᓭᓂᐠ ᒋᐅᑕᐱᓇᐠ ᐅᒪᓯᓇᐦᐅᐣ ᑲᑭᑭᐢᑲᐠ ᑲᐸᐧᓂᔑᒧᐨ ᒥᓇ ᑲᔦ ᐁᑲ ᒋᑭ ᐱᒣᓂᒪᐨ ᒪᑌᐧᐦᐃᑲᓇᐣ ᒣᑲᐧᐨ ᒪᒋᒪᐢᑭᑭᐣ ᑲᐱᒪᐸᒋᑐᐨ.
“ᓂᐸᐧᓂᔑᑦ ᒥᓇ ᓂᑕᐊᓂᔑᓇᐯᐃᐧ ᓂᑲᒧᑕᒪᑫᐃᐧᓂᓂᐤ ᐃᒪ ᑲᐃᔑ ᐸᐧᓂᔑᒧᓇᓂᐊᐧᐠ,” ᒥᑭᐢ ᐃᑭᑐ. “ᓂᓇᐣᑕᐁᐧᐣᑕᐣ ᓂᑕᓂᔑᓂᓂᐊᐧᑎᓯᐃᐧᐣ ᒋᑭ ᑭᐁᐧ ᐊᐸᒋᑐᔭᐸᐣ. ᓂᒥᓴᐁᐧᐣᑕᐣ ᒋᑭ ᑭᐁᐧ ᓂᒥᔭᐸᐣ ᒥᓇ ᒋᓂᑲᒧᔭᐣ ᐃᒪ ᑲᐃᔑᐸᐧᓂᔑᒧᓇᓂᐊᐧᐠ.”
ᒥᑭᐢ ᐃᑭᑎ ᒪᐊᐧᐨ ᐁᐸᑯᓭᐣᑕᐠ ᒋᑭᒥᓂᓭᓂᑭᐸᐣ ᑲᐃᔑ ᐃᐧᒋᐊᐧᒋᐣ ᐅᓂᑭᐦᐃᑯᐣ ᒥᓇ ᐅᑐᑌᒪᐣ.
“ᓂᓇᐣᑕᐁᐧᓂᒪᐠ ᓂᑐᑌᒪᐠ ᐅᑕᓇᐣᐠ ᑲᑭ ᒥᓄᐃᐧᒋᐊᐧᑲᐧᐸᐣ,” ᒥᑭᐢ ᐃᑭᑐ. “ᑲᐃᐧᐣ ᓂᓇᐣᑕᐁᐧᐣᑕᓯᐣ ᒪᒋᒪᐢᑭᑭᐣ ᒋᐊᐸᒋᑐᔭᓇᐣ.”
ᒍᐊᐣ ᐯᔭᑎ, ᓴᐣᑲᓯ ᐁᔭᑯᐢᑲᐨ ᐃᒪ ᒥᒋᑲᐣᓴᑲᐦᐃᑲᓂᐠ ᐁᐅᐣᒋ̇ᐨ, ᑫᐃᐧᐣ ᑭᑎᐸᒋᒧ ᑲᔭᐸᒋᑐᐨ ᒪᒋᒪᐢᑭᑭᐣ.
“ᐅᐠᓯᐢ ᑲᐃᒋᑲᑌᑭᐣ ᐃᐧᓴᑫᐣᑕᒧᒪᐢᑭᑭᐣ ᓂᑲᐣ ᓂᑭ ᐊᐸᒋᑐᓇᐸᐣ ᐊᐦᐱ ᓂᐢᑕᑦ ᑲᒪᒋ ᐊᐸᑕᑲᐧᐸᐣ,” ᐱᔭᑎ ᑭᐃᑭᑐ. “ᓂᑎᓇᐁᐧᒪᑲᓇᐠ ᓂᑭ ᓂᐦᑕ ᐊᓄᓂᑯᐠ ᒋᐊᑕᐁᐧᑕᒪᐊᐧᑲᐧ ᐁᑲᐧ ᑕᐢ ᓂᑭ ᐅᐣᒋ ᑯᒋᑕᒧᐦᐃᑯᐠ ᒋᐅᑕᐱᓇᒪᐧᐠ. ᑲᐃᐧᐣ ᐃᐧᑲ ᒋᐅᐣᒋ ᐃᐧᐣᑕᒪᐃᐧᔑᐊᐧᐨ ᐊᓂᐣ ᑲᐃᔑᔭᓂᐊᐧᐠ ᑲᐊᓂᐳᓇᓄᑭᒪᑲᐠ ᐊᐸᐣ ᑲᐊᓂᒪᒋᐢᑲᑫᒪᑲᐠ ᐁᑲᐧ ᑕᐢ ᑲᔦ ᐊᓂᐣ ᐁᔭᐱᒋ ᑲᑲᐧᓂᓴᑫᐣᑕᑲᐧᐠ.”
ᐯᔭᑎ ᐃᑭᑐ ᐁᓇᐣᑕᐁᐧᐣᑕᐠ ᒋᑭ ᐳᓂᐊᐸᒋᑐᐸᐣ ᒪᒋᒪᐢᑭᑭᐣ ᑲᐊᐸᒋᑐᐨ.
ᐯᓫᐃᑲᐣ ᐸᐧᐢ ᑭᑭᓄᐦᐊᒪᑫᐃᐧᑲᒥᐠ ᑲᐅᑭᒪᐃᐧᐨ ᑌᕑᐅ ᑎᓂ ᐃᑭᑐ ᐊᑎᐟ ᑲᐃᓀᐣᑕᒧᐊᐧᐨ ᒪᐊᐧᐨ ᐁᐯᔭᑕᑫᐣᑕᑲᐧᐠ ᐅᒪ ᐃᐢᑯᓄᐃᐧᑲᒥᐠ, ᐊᒥᐱᑯ ᐯᔑᑲᐧᐣ ᐁᐃᓯᓭᐠ ᑯᑕᑭᔭᐣ ᑭᑭᓄᐦᐊᒪᑫᐃᑲᒥᑯᐣ ᑲᐃᓯᓭᑭᐣ ᐅᒪ ᒥᓯᐁᐧ ᐅᐣᑌᕑᐃᔪ.
“ᓂᑫᓂᓇᐃᐧᐣᐟ ᐊᔭᐊᐧᐣ ᒪᒋ ᑫᑯᓇᐣ ᑲᐊᐸᒋᑐᐊᐧᐨ ᐅᒪ,” ᑎᓂ ᐃᑭᑐ. “ᐊᑎᐟ ᑎᐸᒋᒧᐃᐧᓇᐣ ᑲᑭ ᓄᐣᑕᒪᑭᐣ ᒪᐊᐧᐨ ᑯᐸᒋᑕᑲᐧᓄᐣ, ᑐᑲᐣ ᐅᓂᑭᐦᐃᑯᒪᐠ ᑲᒐᑲᑕᐊᐧᑫᐊᐧᐨ ᐅᑌᐦᐃᒥᐊᐧᐣ ᐁᐃᐧ ᐅᐣᒋ ᑎᐸᐦᐊᒧᐊᐧᐨ ᐅᒪᒋ ᒪᐢᑭᑭᒥᐊᐧᐣ. ᐊᑎᐟ ᐅᑎᐢᑯᓂᐠ ᒣᑎᓂᑫᐊᐧᐠ ᐊᐊᐧᔑᒣ $3,000 ᑲᐊᓂᑭᐦᐊᑲᓄᐊᐧᐨ ᑲᓂᐱᓂᐠ ᐁᐅᐣᒋ ᐃᐧᒋᐦᐃᑎᓱᐊᐧᐨ ᑲᒪᒋᒪᐢᑭᑭᑫᐊᐧᐨ.”
ᑎᓂ ᐃᑭᑐ ᒪᒋᒪᐢᑭᑭᐃᐧ ᑭᑭᓄᐦᐊᒪᑫᐃᐧᐣ ᒥᓇ ᐃᐧᒋᐦᐃᐁᐧᐃᐧᐣ ᐸᑭᑎᓂᑲᑌ ᐃᒪ ᐯᓫᐃᑲᐣ ᐃᑫᐧᓂᐊᐧᐠ ᑲᓴᑭᓂᑯᐊᐧᐨ ᒪᒋᒪᐢᑭᑭᑫᐃᐧᐣ.
“ᐊᐱ ᑲᐊᔑᑕᒪᐊᐧᔭᐣᐠ ᐃᐧᒋᐦᐃᑯᐃᐧᐣ, ᒥᐦᐃᐁᐧ ᒪᐊᐧᐨ ᑲᐊᓂᒥᐦᐃᑯᔭᐣᐠ,” ᑎᓂ ᑭᐃᑭᑐ. “ᒪᐊᐧᐨ ᓂᑕᓂᒥᐃᐧᑐᒥᐣ ᒋᐃᓇᔭᐣ ᐃᐧᒋᐦᐃᐁᐧᐃᐧᐣ ᒋᓇᓇᐣᐁᐧᐣᑕᒧᐊᐧᐨ ᒥᓇ ᒋᐃᔑ ᐅᑕᐱᓇᒧᐊᐧᐨ ᑕᐱᓇᑲ ᐃᐁᐧ ᑲᐊᓂᐳᓇᓄᑭᒪᑲᐠ ᐊᐸᐣ ᑲᐊᓂᒪᒋᐢᑲᑫᒪᑲᐠ ᒪᐢᑭᑭ ᐅᓴᑦ ᐁᐦᐊᓂᒣᐣᑕᑲᐧᓂᐠ.”
ᑎᓂ ᐃᑭᑐ ᒥᓂᑫᐃᐧᐣ ᒥᓇ ᒪᒋᓇᓭᒪ ᑲᐊᐸᒋᑐᐊᐧᐨ ᐅᑎᐢᑯᓂᐠ ᓇᐊᐧᐨ “ᑭᒋ ᑕᐸᓯᓭ” ᓄᑯᑦ ᑲᐊᐦᑭᐊᐧᐠ ᐅᒪ ᐯᓫᐃᑲᐣ ᐸᐧᐢ ᑭᑭᓄᐦᐊᒪᑫᐃᐧᑲᒥᐠ.
“ᐁᑲᐧ ᑕᐢ ᒪᐊᐧᐨ ᑲᐊᓂᒥᐦᐃᑯᔭᐣᐠ ᐁᑲ ᐁᒥᓇᑲᐧᑭᐣ ᐃᑫᐧᓂᐊᐧᐣ ᒪᒋᒪᐢᑭᑭᐣ,”
ᑲᐃᐧᐣ ᐊᐃᐧᔭ ᒋᑭᓇᑲᐢᑲᐠ ᒪᒋᒪᐢᑭᑭ ᑲᐊᐸᑕᐠ
“ᑎᓂ ᐃᑭᑐ. “ᑲᐃᐧᐣ ᐁᐧᐣᑕᓯᓄᐣ ᒋᑭ ᒥᑭᑲᑌᑭᐣ ᐁᑲᐧ ᑕᐢ ᑲᔦ ᓂᑭᑫᓂᒪᐠ ᒥᔑᐣ ᐅᑎᐢᑯᓂᐠ, ᐅᒪ ᑲᐃᐢᑯᓄᐊᐧᐨ ᑲᐃᓇᑲᐧ, ᐁᐊᐣᒋᓇᑯᑐᐊᐧᐨ ᑲᐊᐸᒋᑐᐊᐧᐨ ᒪᒋᒪᐢᑭᑭᐣ.”
ᐅᑭᒪᑲᓇᐠ ᑲᑭ ᒪᐊᐧᒋᐦᐃᑎᐊᐧᐨ ᒪᒋᒪᐢᑭᑭᑫᐃᐧᐣ ᐃᒪ ᑭᐅᐣᒋ ᒪᐊᐧᒋᐦᐃᑎᐊᐧᐨ ᒪᒪᐣᑕᐃᐧᐱᐊᐧᐱᑯᐠ ᑲᐢᑲᑎᓄᐃᐧᐱᓯᑦ 15. ᐅᐸᓴᑎᑲᐣᐠ ᒥᓇ ᐊᐧᓂᓇᐊᐧᑲᐠ ᐊᓂᔑᓇᐯ ᒪᐢᑭᑭᐃᐧᑭᒪᐃᐧᐣ ᑫᐃᐧᐣ ᒋᑦ ᒪᐧᕑᐃᐢ, ᐊᐧᓂᓇᐊᐧᑲᐠ ᐊᓂᔑᓇᐯ ᒪᐢᑭᑭᐃᐧᑭᒪᐃᐧᐣ ᑲᐅᑭᒪᐃᐧᐨ, ᐅᑭ ᓂᑲᓂᐢᑲᐣ ᒪᐊᐧᒋᐦᐃᑎᐃᐧᐣ ᒥᓇ ᑲᔦ ᐊᐱᒪᑐᐠ ᐅᑭᒪᑲᐢᐣ ᓫᐅᐃᐧᐢ ᓀᐟ, ᐅᑭ ᐊᓂᑫᐅᑎᑲᐧᓂᐢᑲᐣ ᐃᐁᐧ ᒪᐊᐧᒋᐦᐃᑎᐃᐧᐣ.
ᐃᒪ ᑲᑭᑕᑲᐧᐱᐊᐧᐨ ᒪᒪᐣᑕᐃᐧᐱᐊᐧᐱᑯᐠ ᑲᑭ ᐅᐣᒋ ᒪᐊᐧᒋᐦᐃᑎᐊᐧᐨ ᐊᐁᐧ ᐊᓂᔑᓇᐯ ᐊᐢᑭ ᑭᒋ ᐅᑭᒪᑲᓀᐢ ᒪᐃᐠ ᒥᑕᐟ, ᑯᑕᑭᔭᐠ ᐊᓂᔑᓇᐯ ᐊᐢᑭ ᐅᑭᒪᑲᓇᐠ, ᐊᓂᐣᑕ ᑲᑭᐊᔭᒥᑕᒪᑫᐊᐧᐨ ᐃᒪ ᑲᐃᔑ ᐸᐱᑭᔑᓄᐊᐧᐨ ᐅᑭᒪᑲᓇᐠ, ᑲᓇᑕ ᑭᒋ ᒪᐢᑭᑭᐃᐧᑭᒪ, ᐊᐧᓂᓇᐊᐧᑲᐠ ᒥᓄᔭᐃᐧᐣ ᒪᐢᑭᑭᐃᐧᑲᒥᐠ, ᐅᐣᑌᕑᐃᔪ ᐅᑭᒪᐃᐧᐣ ᐃᐧᒋᐦᐃᐁᐧᐃᐧᓇᐣ, ᑕᐣᑐᕑ ᐯ ᔑᒪᑲᓂᔑᐃᐧᑭᒪᐃᐧᐣ ᒥᓇ ᐊᐧᓭᔭ ᐱᒥᓭᐃᐧᐣ.
ᐊᐧᓭᔭ ᐱᒥᓭᐃᐧᐣ ᐊᓂᑭᓇᑲᐣ ᒐᐧᐣ ᐯᔭᑎ ᐃᑭᑐ ᐅᐁᐧ ᐱᒥᓭᐃᐧᐣ ᐁᑭ ᐅᓀᐣᑕᒧᐊᐧᐨ ᒋᐊᐸᒋᑐᐊᐧᐨ ᔕᐸᐧᑌᐱᒋᑲᐣ ᑫᐃᔑ ᐊᐸᒋᒋᑲᑌᐠ ᐃᒪ ᐳᓯᑕᓯᓇᐣ ᑫᐅᐣᒋ ᓇᓇᑲᒋᒋᑲᑌᑭᐣ ᐃᒪ ᑕᐣᑐᕑ ᐯ, ᐊᐧᓂᓇᐊᐧᑲᐠ, ᐅᑲᐣᓴᑲᐦᐃᑲᓂᐠ ᒥᓇ ᒥᐢᑯᓴᑲᐦᐃᑲᓂᐠ ᐱᒥᓭᐃᐧᐳᓂᐃᐧᓇᐣ ᑲᐃᔑᔭᑭᐣ.
“ᑲᑭᓇ ᑕᔑᑫᐃᐧᓇᐣ ᐅᑲ ᐅᐣᒋ ᐃᐧᒋᐦᐃᑯᓇᐊᐧ,” ᐱᔭᑎ ᑭᐃᑭᑐ. “ᐊᒥᐦᐃ ᑲᐃᔑ ᐅᓀᐣᑕᒪᐠ ᑲᑭᓇ ᐳᓯᑕᓯᓇᐣ ᒋᓇᓇᑲᒋᑐᔭᐣᐠ ᐅᒪ ᑲᐱᐣᑎᑫᒪᑲᑭᐣ ᐊᐧᓭᔭ ᐱᒥᓭᐃᐧᐣ.”
ᐯᔭᑎ ᐃᑭᑐ ᐱᒥᓭᐃᐧᓇᐣ ᑲᐊᓂᑲᐊᐧᐊᐧᐨ ᑭᐁᐧᑎᓄᐠ ᒪᓇᑐᐸ ᐊᔕ ᐅᒪᒋᑐᓇᐊᐧ ᔕᐸᐧᑌᐱᒋᑲᐣ ᑲᐊᐸᑕᐠ ᐳᓯᑕᓯᓇᐣ ᑲᓇᓇᑲᒋᒋᑲᑌᑭᐣ ᒥᓇ ᑲᔦ ᑲᐳᓯᐊᐧᐨ ᐊᐃᐧᔭᐠ ᑲᓇᓇᑲᒋᐦᐃᐣᑕᐧ.
“ᐅᑕᓄᑭᐠ ᑲᓇᓇᑲᒋᒋᐦᐊᐊᐧᐨ ᑲᐳᓯᓂᐨ ᐊᐃᐧᔭᐣ ᑫᑯᓂ ᐅᑕᐸᒋᑐᓇᐊᐧ ᑲᓇᓇᔕᑲᐧᐦᐊᐊᐧᐨ ᑲᓇᓇᐣᑕᐃᐧᑭᑫᐣᑕᒧᐊᐧᐨ ᑭᐢᐱᐣ ᐱᐊᐧᐱᑯ ᑫᑯᓇᐣ ᑭᒧᒋ ᑭᑭᐊᐧᑫᐧᐣ ᓇᐣᑕ ᑲᔦ ᐃᑫᐧᓂᐊᐧᐣ ᑲᒪᐢᑲᐊᐧᑲᒥᑭᐣ ᑭᓯᓂᑫᐃᐧᐊᐸᒋᑕᑲᓇᐣ ᓇᐣᑕ ᑲᔦ ᐁᑲ ᐸᑭᑎᓂᑲᑌᑭᐣ ᒋᐳᓭᒋᑲᑌᑭᐣ ᑐᑲᐣ ᔓᐱᑲᐦᐃᑲᓇᐣ,” ᐯᔭᑎ ᐃᑭᑐ. “ᐊᒥᐦᐃ ᐁᐃᓀᐣᑕᒪᐣ ᓂᑫᓂᓇᐃᐧᐣᐟ ᐅᐁᐧ ᒋᐊᓂᒪᒥᑎᓀᐣᑕᒪᐣᐠ ᒋᐊᓂᑐᑕᒪᐠ.”
ᑭᒋᓇᒣᑯᓯᑊ ᐅᑭᒪᑲᐣ ᑕᐧᓂ ᒪᐧᕑᐃᐢ ᐅᑭ ᐊᓂᒧᑕᓇᐣ ᐊᑯᓯᐃᐧ ᐃᓯᓭᐃᐧᓇᐣ ᒥᓇ ᑲᓂᓯᑯᐊᐧᐨ ᒪᒋᒪᐢᑭᑭᐣ.
“ᑭᓇᐃᐧᐣᐟ ᑲᐅᑭᒪᑲᓂᐃᐧᔦᐠ, ᐯᔑᐠ ᑫᑯᐣ ᒋᒪᓇ ᐊᐧᓂᑫᐣᒋᑲᑌᐠ ᐃᐁᐧ ᓂᑲᐧᐦᐊᑲᓇᐣ ᓇᐱᐨ ᐁᒥᔑᓇᑎᐣᑭᐣ ᓂᑲᐧᐦᐊᑲᓀᓴᐣ,” ᒪᐧᕑᐃᐢ ᐃᑭᑐ. “ᐃᒪ ᓂᑕᔑᑫᐃᐧᓂᐠ, ᐊᔕ ᐊᔭ ᐃᒪ ᐅᑯᓂᐠ ᑲᐃᔑᐊᑯᓯᓇᓂᐊᐧᐠ hepatitis C ᑲᐃᒋᑲᑌᐠ. ᐃᐁᐧ ᑕᐢ, ᒪᒐᐱᓀᐃᐧᐣ ᑲᐃᐧᐣ ᓇᓇᐃᐧᓇᑲᐧᓯᓄᐣ ᓂᑎᔑᐃᐧᐣᑕᒪᑯᒥᐣ.”
ᒪᐧᕑᐃᐢ ᐃᑭᑐ ᑯᑕᑭᔭᐣ ᐃᓯᓭᐃᐧᓇᐣ ᐊᔭᐊᐧᐣ ᐊᓂᔑᓂᓂᐊᐧᐠ ᑲᐊᐸᒋᑐᐊᐧᐨ ᒪᒋᒪᐢᑭᑭᐣ ᑫᑭ ᓇᓇᑲᒋᒋᑲᑌᑭᐸᓂᐣ ᒥᓇ ᒋᑭ ᐊᓂᒧᒋᑲᑌᑭᐸᓂᐣ.
“ᐃᒪ ᔕ ᑲᔦ ᑲᐃᔑᓇᓇᑲᒋᑐᐣ, ᐊᔕ ᑲᑭ ᐃᑭᑐᔭᐸᐣ, ᑲᓄᐣᑌ ᓂᑕᐃᐧᑭᐊᐧᐨ ᐅᐢᑭ ᐊᐊᐧᔑᔕᐠ, ᑫᑯᓀᓂ ᑲᐅᐣᒋᓯᓭᐊᐧᐨ, ᒥᓇ ᑲᔦ ᑲᐊᑕᐊᐧᑲᓂᑎᓱᐊᐧᐨ ᒥᓇ ᐅᑯᓂᐠ ᑲᐃᔑ ᐊᑯᓯᐊᐧᐨ, ᒋᑕᐦᐃᑲᓇᐱᑯᐣ ᑲᒪᒪᐃᐧᐊᐸᒋᑐᐊᐧᐨ,” ᒪᐧᕑᐃᐢ ᐃᑭᑐ. “ᒥᔑᐣ ᐃᐢᑯᓂᑲᓇᐣ ᑲᐃᐧᐣ ᒋᑌᐯᐧᑕᒧᐊᐧᐨ ᐅᑫᐧᓂᐊᐧᐣ ᒋᑕᐦᐃᑲᓇᐱᑯᐣ ᑲᐊᐸᒋᑐᐊᐧᐨ ᐁᑭᒋ ᒪᒋᓭᐦᐃᐁᐧᒪᑲᑭᐣ ᔕᑯᐨ ᑕᐢ ᐊᒥᐱᑯ ᑌᐯᐧ ᐁᐃᓯᓭᐠ.”
ᐊᒥᐦᐃ ᐁᐃᑭᑐᐨ ᐅᑫᐧᓂᐊᐧᐣ ᒋᑕᐦᐃᑲᓇᐱᑯᐣ ᐁᐊᑕᐊᐧᑌᓂᑭᐣ ᐃᒪ ᐅᑕᔑᑫᐃᐧᓂᐠ $50 ᐯᔑᐠ ᐁᐃᓇᑭᑐᒧᐊᐧᐨ ᒥᓇ ᐃᑫᐧᓂᐊᐧᐠ ᑲᔓᑲᐊᐧᐱᓀᐊᐧᐨ ᐊᓂᑲᑫᐧᑌᐊᐧᐠ ᐊᐣᑎ ᐁᐊᓂᓯᓭᓂᑭᐣ ᐃᑫᐧᓂᐊᐧᐣ ᒋᑕᐦᐃᑲᓇᐱᑯᐣ.
ᓀᐣᑲᐃᐧᓴᑲᐦᐃᑲᓂᐃᐧ ᐅᑭᒪᑲᐣ ᐊᑕᑦ ᐱᐟᓫᐃᕑ ᐅᑭᐊᓂᒧᑕᐣ ᒪᒋᒪᐢᑭᑭᑫᐃᐧᐣ ᑲᒥᔕᐠ ᐅᒪ ᐊᓂᔑᓇᐯ ᐊᐢᑭ ᑎᐯᐣᒋᑫᐃᐧᐣ ᐁᑲ ᐃᐧᓂᑯ ᐃᐁᐧ ᑲᐅᐣᒋᓯᓭᐠ ᒪᐢᑭᑭᐃᐧᓂ ᑲᐸᑭᑎᓇᑭᐣ ᒪᐢᑭᑭᐣ, ᐃᐁᐧ ᑕᐢ ᒪᐢᑭᑭᐣ ᑲᐱᐣᑎᑲᒋᑲᑌᑭᐣ ᐱᐣᒋᐢᑯᓂᑲᓂᐠ ᐁᑲᐧ ᑕᐢ ᐊᐱᐣ ᑲᐊᓂᐊᑕᐊᐧᑕᒧᐊᐧᐨ ᐃᒪ ᐊᓂᔑᓂᓂᐊᐧᐠ ᑲᑲᐯᔑᐊᐧᐨ.
“ᐊᒥᐦᐃ ᓂᓇᐃᐧᐣᐟ ᐁᐃᔑᑭᑫᐣᑕᒪᐣᐠ ᐁᑲ ᐃᐧᓂᑯ ᐁᐅᓴᒥ ᒥᓂᑯᐊᐧᐨ ᐃᐧᓴᑫᐣᑕᒧᐃᐧ ᒪᐢᑭᑭᐣ ᒪᐢᑭᑭᐃᐧᓂᐊᐧᐣ,” ᐱᐟᓫᐃᕑ ᐃᑭᑐ. “ᐃᐁᐧ ᑕᐢ ᑲᐅᐣᒋ̇ᓯᓭᐠ ᐊᓂᔑᓂᓂᐊᐧᐠ ᒥᐢᑕᐦᐃ ᑲᐊᑕᐁᐧᐊᐧᐨ ᒪᒋᒪᐢᑭᑭᐣ ᐃᒪ ᐃᐧᓂᐯᐠ ᒥᓇ ᑕᐣᑐᕑ ᐯ ᐁᑲᐧ ᑕᐢ ᐊᒥᐦᐃᒪ ᑲᐊᓄᐣᒋᓯᓭᐠ ᓂᑕᔑᑫᐃᐧᓂᓇᐣ ᐁᐦᐊᓄᐣᒋ ᐱᐣᑎᑫᒪᑲᑭᐣ. ᑲᐃᐧᓂᓂᑯ ᑫᒋᓇᐨ ᐁᐅᓴᒥ ᒥᓇᑲᓄᐊᐧᐨ ᐅᒪᐢᑭᑭᐃᐧᓂᒥᐊᐧᐣ ᐅᑫᐧᓂᐊᐧᐣ ᒪᒋᒪᐢᑭᑭ ᑲᐃᔑᓂᑲᑕᒪᐠ, ᐁᐧᑎ ᔕ ᓂᑲᑌ ᑕᓇᑕᐊᐧᑌᐊᐧᐣ.”
ᐱᐟᓫᐃᕑ ᐃᑭᑐ ᓇᓇᑲᒋᒋᑫᐃᐧᐣ ᐃᔑᓇᑲᐧᐣ ᒋᑭᑐᒋᑲᑌᑭᐸᐣ ᐊᓂᐣ ᐊᐃᐧᔭ ᑲᓂᔑᐢᑲᑯᐨ ᐅᐁᐧᓂ ᒪᒋᒪᐢᑭᑭᐣ ᑲᐅᑕᐱᓇᑭᐣ.
“ᓂᑭᑫᐣᑕᒥᐣ ᐊᓂᐣ ᐁᐃᓯᓭᐦᐃᐁᐧᒪᑲᑭᐣ, ᓂᑭᑫᐣᑕᒥᐣ ᐊᓂᐣ ᑲᐃᔑᒪᒋᓭᐦᐃᐁᐧᒪᑲᑭᐣ ᐃᒪ ᑎᐯᐣᒋᑫᐃᐧᓂᐠ, ᒪᐊᐧᐨ ᐁᑭᒋ ᑲᑲᐧᑕᑭᐦᐃᑫᒪᑲᑭᐣ ᓂᑕᔑᑫᐃᐧᓂᓇᐣ ᑲᐊᐸᒋᑐᐊᐧᐨ ᒥᓇ ᑲᓴᑭᓂᑯᐊᐧᐨ ᒪᒋᒪᐢᑭᑭᐣ,” ᐱᐟᓫᐃᕑ ᐃᑭᑐ. “ᐃᐁᐧ ᑕᐢ ᐁᑲ ᒪᔑ ᑲᑭᑫᐣᑕᒪᐠ ᐊᓂᐣ ᐊᐸᐣ ᐁᐃᓯᓭᐦᐃᑯᐨ ᐊᐃᐧᔭ ᐊᐊᐧᔑᒣ ᓂᔭᓂᐊᐦᑭ ᑲᐊᐸᒋᑐᐨ ᑭᐢᐱᐣ ᐊᐃᐧᔭ ᑲᒧᒋᐃᑲᐧᓇᐣᑕᐠ ᓇᐣᑕ ᑲᔦ ᑲᒋᑕᐦᐅᑎᓯᐊᐧᐨ ᒪᒋᒪᐢᑭᑭᐣ ᐁᐣᑕᓱᑭᔑᑲᓂᐠ. ᐊᓂᐣ ᑕᐢ ᑫᐃᔑᔭᐨ ᐊᐦᐸᐣ ᐁᐧᑎ ᐃᔑᓂᑲᐣ ᐃᒪ ᐃᐧᔭᐃᐧᐣᐠ?”
ᐱᐟᓫᐃᕑ ᑲᔦ ᐅᑭ ᐊᓂᒧᑕᐣ ᐁᒪᒥᑎᓀᐣᑕᐠ ᐃᐁᐧ ᓴᑊᐅᐠᓱᐣ ᐃᐧᒋᐃᐦᐃᐁᐧᐃᐧᐣ ᑲᐃᒋᑲᑌᐠ ᐃᐁᐧ ᒪᐢᑭᑭ ᑲᒥᓇᑲᓄᐨ ᐸᐣᑭ ᒋᐅᐣᒋ ᐃᐧᒋᐦᐃᑯᐨ ᑲᑲᑫᐧ ᐳᓇᐸᒋᑐᐨ ᒪᒋᒪᐢᑭᑭᐣ ᑲᑎᐯᓂᒥᑯᐨ ᐃᒪ ᑲᑭ ᐊᓂᒧᑌᑭᐸᐣ ᒪᒪᐣᑕᐃᐧᐱᐊᐧᐱᑯᐠ ᑲᑭ ᐅᐣᒋ ᒪᐊᐧᒋᐦᐃᑎᐊᐧᐸᐣ.
“ᓂᓇᐣᑕᐁᐧᐣᑕᐣ ᐊᐊᐧᔑᒣ ᒋᑭ ᑭᑫᐣᑕᒪᐸᐣ ᐅᐁᐧ ᓴᑊᐅᐠᓱᐣ ᐃᐧᒋᐃᐦᐃᐁᐧᐃᐧᐣ ᑲᐃᒋᑲᑌᐠ ᑫᑯᓀᓂᐊᐧᐠ ᐃᐁᐧ,” ᐱᐟᓫᐃᕑ ᐃᑭᑐ. “ᐃᐁᐧ ᑲᐃᔑ ᓄᐣᑕᒪᐣ, ᓂᒥᓴᐁᐧᐣᑕᐣ ᓂᑫᓂᐣ ᓂᑕᔑᑫᐃᐧᐣ ᒋᑭᑕᔑ ᑯᒋᒋᑲᑌᑭᐸᐣ ᐅᐁᐧ ᑲᐊᓂᒧᑌᐠ... ᐁᐃᐧ ᓇᓇᐣᑕᐃᐧᑭᑫᐣᑕᒪᐣ ᑭᐢᐱᐣ ᑫᑭ ᐃᐧᒋᐦᐃᑯᐊᐧᐸᐣ ᑭᑕᓂᔑᓂᓂᒥᓇᐣ.”
ᐅᐁᐧ ᐃᐧᒋᐦᐃᐁᐧᐃᐧᐣ ᐊᔕ ᐸᑭᑎᓂᑲᑌ, ᑲᒥᓇᑲᓄᐊᐧᐨ ᐅᐁᐧ ᒪᐢᑭᑭ ᐁᑲ ᐃᐧᓂᑯ ᐊᑯᓯᐃᐧᑲᒥᐠ ᑲᐱᐣᑎᑫᐊᐧᐨ ᒥᓯᐁᐧ ᑲᓇᑕ ᐃᒪ ᑲᔦ ᑐᕑᐊᐣᑐ, ᐊᓇᑲᑫᐧ ᐃᐧᒋᐦᐊᑲᓄᐊᐧᐨ ᐃᐧᓴᑫᐣᑕᒧᐃᐧᒪᐢᑭᑭᐣ ᑲᑎᐯᓂᒥᑯᐊᐧᐨ ᒥᓇ ᑯᑕᑭᔭᐣ ᒪᒋᒪᐢᑭᑭᐣ ᑲᐊᐸᒋᑐᐊᐧᐨ ᐁᑲ ᐃᐧᓂᑯ ᓇᐱᐨ ᒋᐸᓂᓭᐊᐧᐨ ᑲᐃᔑ ᐊᓂᑭᐊᐧᐨ, ᐅᐱᒪᑎᓯᐃᐧᓂᐊᐧ ᒥᓇ ᐃᒪ ᐅᑎᐯᐣᒋᑫᐃᐧᓂᐊᐧ.
ᐅᑭᒪᑲᓇᐠ ᑲᑭᒪᐊᐧᒋᐦᐃᑎᐊᐧᐨ ᒪᒋᒪᐢᑭᑭᑫᐃᐧᐣ ᐅᐣᒋ ᑭᐊᓂᑭᔑᒋᑲᑌ ᑲᑭ ᐃᐢᑲᐧ ᑎᐸᒋᒋᑲᑌᐠ ᓀᐣᑲᐃᐧᓴᑲᐦᐃᑲᓂᐠ ᒪᒋᒪᐢᑭᑭᑫᐃᐧ ᐃᐧᒋᐦᐃᐁᐧᐃᑲᒥᐠ ᑲᑭ ᒪᒋᑐᐊᐧᐸᐣ ᐃᒪ ᐱᑲᐧᒋᔭᐦᐃᐣᐠ.
“ᐅᑭ ᐸᑭᑎᓇᐣ ᐅᑎᐸᒋᒧᐃᐧᐣ ᐁᑲᐧ ᑕᐢ ᒪᐊᐧᐨ ᑭᒪᐢᑲᐃᐧᑕᑲᐧᐣ,” ᐃᑭᑐ ᑎᓇ ᑲᑭᐱᑕᑦ -ᔕᓫᐟᐢ, ᐯᔑᐠ ᑲᑭ ᐱᒧᑐᐨ ᒪᐊᐧᒋᐦᐃᑎᐃᐧᐣ. “ᐅᑭ ᓇᓇᐱ ᓇᓇᑯᒪᐣ ᐅᑭᒪᑲᓇᐣ ᒥᓇ ᐅᓇᔓᐁᐧᐃᐧᓂᐊᐧᐣ ᑲᑭ ᐱᑐᐊᐧᐨ ᐅᐁᐧ ᑭᑭᓄᐦᐊᒪᑫᐃᐧᐣ ᑐᑲᐣ ᐃᐁᐧ ᐱᑲᐧᒋᐦᔭᐃᐣᐠ ᑲᐊᔭᐠ ᑲᑕᔑ ᐃᐧᒋᐦᐊᑲᓄᐊᐧᐨ ᐃᒪ ᓀᐣᑲᐃᐧᓴᑲᐦᐃᑲᓂᐠ.”
ᑲᑭᐱᑕᑦ -ᔕᓫᐟᐢ ᐃᑭᑐ ᐊᐁᐧ ᑲᐅᐣᒋ ᐃᐧᒋᐦᐊᑲᓄᐨ ᐅᑕᑯᓯ ᒥᓇ ᐅᐃᐧᒋᐊᐧᑲᓇᐣ ᑲᐃᐧᐣ ᑭᓇᐊᐧᑲᐢ ᒋᐅᐣᒋ ᑭᑫᓂᒥᑎᐊᐧᐨ ᒣᑲᐧᐨ ᑲᐱᒪᐸᒋᑐᐊᐧᐨ ᒪᒋᒪᐢᑭᑭ ᒥᓇ ᑲᔦ ᑲᐊᔭᒥᐦᐃᑐᐊᐧᐨ ᐊᒥᐱᑯ ᐁᑕ ᐃᐁᐧᓂ ᑲᑕᔑᐣᑕᒪᑎᐊᐧᐨ ᐊᐦᐱ ᑲᑭᔐᐸᐊᐧᓂᐢᑲᐊᐧᐨ ᐊᐣᑎ ᒥᓇᐊᐧ ᑫᑭ ᐅᐣᑎᓇᒧᐊᐧᐸᐣ ᒥᓇᐊᐧ ᑫᐊᓂ ᐊᐸᒋᑐᐊᐧᐨ ᒪᒋᒪᐢᑭᑭᓂ.
“ᐊᒥ ᑲᑭ ᐃᑭᑐᐨ ᒪᐊᐧᐨ ᒥᐢᑕᐦᐃ ᐃᐧᓴᑫᐣᑕᒧᐃᐧᐣ ᒥᓇ ᒪᒉᓂᒧᐃᐧᐣ ᐅᑭ ᐊᐧᐸᑕᐦᐊᐣ ᐃᒪ ᑲᐅᐣᒋ ᑎᐯᐣᑕᑯᓯᐨ,” ᑲᑭᐱᑕᑦ -ᔕᓫᐟᐢ ᐃᑭᑐ. “ᐊᒥ ᑲᑭ ᐃᑭᑐᐨ ᐃᐧᐣ ᒥᓇ ᐅᐃᐧᒋᐊᐧᑲᓇᐣ ᐁᑭ ᐃᔕᐊᐧᐨ ᐃᒪ ᐱᐊᐧᑲᒋᔭᐦᐃᐣᐠ ᑲᑕᑲᐧᐠ ᐃᐧᒋᐦᐃᐁᐧᐃᐧᑲᒥᐠ ᑲᑕᔑ ᑭᑭᓄᐦᐊᒪᐊᐧᑲᓄᐊᐧᐨ, ᑭᐊᐧᐃᐧᐣᑕᒪᐊᐧᑲᓄᐊᐧᐠ ᐊᓂᐣ ᐁᑐᑕᑯᐊᐧᐨ ᐃᐁᐧᓂ ᑲᐊᐸᒋᑐᐊᐧᐨ ᒪᒋᒪᐢᑭᑭᐣ, ᒥᓇ ᑲᔦ ᐃᐧᔭᐃᐧᐊᐧᑲᐠ ᒥᓇ ᐱᑯ ᐅᐱᒪᑎᓯᐃᐧᓂᐊᐧ ᒥᓇ ᓴᐱᑯ ᑲᔦ ᐃᒪ ᒥᓯᐁᐧ ᐅᑎᐯᐣᒋᑫᐃᐧᓂᐊᐧ.”
ᑲᑭᐱᑕᑦ -ᔕᓫᐟᐢ ᐃᑭᑐ ᐊᐁᐧ ᑲᐊᓂᒧᒪᐠ ᐅᑭ ᐊᐧᐸᑕᐣ ᐊᐣᑎ ᑲᐃᔑ ᐊᐧᓂᔑᐣᐠ ᐃᒪ ᒣᑲᐧᐨ ᐱᑲᐧᑕᑭᐣᐠ ᑲᑭ ᑕᔑ ᑭᑭᓄᐦᐊᒪᑯᐨ ᑭᒋᔭᐦᐊᐣ.
“ᐊᒥ ᑲᑭ ᐃᑭᑐᐊᐧᐣᐨ ᐃᑫᐧᓂᐊᐧᐣ ᑭᒋᔭᐦᐊᐣ ᐃᐧᐸᐨ ᐅᑭ ᐊᐧᓂᐢᑲᓂᔕᐦᐅᑯᐣ ᒪᐧᔦ ᓴᑲᐸᐠ ᒥᓇ ᐃᑭᑐ ᐊᔕ ᐁᑭ ᐸᐸᒥᔭᐨ ᐃᒪ ᓂᐱᑲᐠ ᑲᐱᓴᑲᐸᓂᐠ,” ᑲᑭᐱᑕᑦ -ᔕᓫᐟᐢ ᐃᑭᑐ. “ᒥᐦᐃᒪ ᑲᑭ ᑭᑫᐣᑕᐠ ᑫᑯᐣ ᐁᑭ ᒧᔑᑐᐨ ᐱᐣᒋ ᐅᐱᒪᑎᓯᐃᐧᓂᐠ. ᑭᐃᑭᑐ ᐁᑭ ᑯᐢᑯᐢᑲᐨ ᐃᒪ ᐅᑕᒐᑯᐠ ᐁᑲᐧ ᑕᐢ ᐁᑭ ᐊᐧᐸᑕᐠ ᐊᓂᐣ ᑲᐊᐱᒋ ᒥᓇᐧᔑᐣᐠ ᑲᐱᓴᑲᐸᓂᐠ. ᐊᒥᐦᐃᒪ ᐊᐦᐸᐣ ᑲᐅᐢᑭᓭᓂᐠ ᐅᐱᒪᑎᓯᐃᐧᐣ.”