ᐯᒪᑎᓯᐧᐊᑦ ᐊᔕ ᐊᐧᐊᔑᒣ ᐊᓂᐊᔭᒪᑲᓐ ᓴᑲᐧᓭᐧᐃᓐ

ᒋᐃᔑ ᑲᐧᑫᑌᐱᓂᑲᓂᐧᐊᑭᐸᓐ ᐊᓂᔑᓇᐯᒃ ᓴᑲᐧᓭᐧᐃᓐ ᒋᐊᔭᒪᑲᓯᓄᑭᐸᓐ
ᑭᐃᑭᑐ ᐯᒥᓇ ᐳᓫᑕᓐ ᐧᐊᐧᐁᓇᒋᑫᐧᐃᐧᑫ ᐃᐃᒪ ᐅᓐᑌᕆᐅ ᐅᑭᒪᑲᓇᒃ ᒥᐅᐧᐁ ᐁᓂᐧᐁᒃ ᒋᐅᒋ ᑲᔥᑭᒋᑲᑌᑭᐸᓐ ᑲᑲᓱᒥᐧᑕ ᐅᔥᑲᑎᓴᒃ ᐊᓂᔥ ᐊᒥ ᐅᑯᐧᐁᓂᐧᐊᒃ ᐊᓂ ᓂᑲᓐ ᑫᓂᑲᓂᑕᒪᑫᐧᐊᑦ ᑕᐧᐃᑕᒪᑫᐧᐊᒃ ᐁᑲ ᒋᓴᑲᐧᓭᓂᐧᐊᒃ ᒥᓇᐧᐊ ᒋᑲᓄᓇᐧᐊᑦ ᐅᓂᐧᐁᓂᐧᐊ ᑲᓂᑲᓂᑕᒪᑫᓂᑦ ᒋᑭᐱᑎᓇᒧᐧᐊᑦ ᓴᑲᐧᓭᐧᐃᓂ ᐊᒥ ᐊᓂᔥ ᐃᐃᒪ ᑫᐅᒋ ᒪᒋᑕᓂᐧᐊᑭᐸᓐ ᐧᐃᓇᐧᐊ ᐅᑭᒪᑲᓇᒃ ᑲᔦ ᐅᑭᒪᑲᓀᓴᒃ ᑭᔥᐱᓐ ᐃᐃᐧᐁᓂ ᑫᑯᓐ ᐧᐃᐊᓴᓇᒪᑫᐧᐊᑦ
ᒥᓇ ᑭᐊᓂ ᐃᑭᑐ ᐊᓇᐧᐃᓐ ᐁᑭᑫᓐᒋᑲᑌᒃ ᑲᐃᔑᓇᓂᓴᓇᒃ ᓴᑲᐧᓭᐧᐃᓐ ᐊᒥ ᐁᔑᒥᒋᓐᓇᐧᐁᑕᐧᑲᒃ ᐊᓇᑭ ᐃᓇᑯᓂᑲᓂᐧᐊᒃ ᐃᑕᔥ ᒥᓯᐧᐁ ᑭ ᑭᐱᑎᓇᑲᑌ ᐁᑲ ᒋᓴᑲᐧᓭᓇᓂᐧᐊᒃ ᐱᑎᒃ ᑲᐃᔑ ᑕᓇᓄᑭᓇᓂᐧᐊᒃ ᑲᔦ ᐱᑎᑲᒥᒃ ᐅᓇᑯᓂᑫᐧᐃ ᑭᐸᑭᑎᓂᑲᑌᐸᓐ ᒣ 31 2006 ᐸᑭ ᐁᑕ ᑲᓂᑲᓂᑕᒪᑫᐧᐊᑦ ᑕᔑᑫᐧᐃᓂᒃ ᐅᑭᐱᒥᓂᔕᐊᓂᐧᐊ
ᐧᐁᑯᓀᓐ ᐃᑕᔥ ᐧᐁᒋ ᓂᑲᓀᑕᐧᑲᓯᓄᒃ ᒥᓄᐊᔭᐧᐃᓐ ᑭᐃᔑᑲᐧᑫᐧᑌ ᐧᐁᑎ ᑲᑭᑕᓇᑲᒥᑲᒃ ᑕᓐ ᑐᕑᐯ ᐅᔥᑲᑎᓴᒃ ᑭᒪᐧᐊᑐᐱᐊᐧᐊᒃ ᒋᑕᔑᑕᒪᐧᐃᐧᑕ ᓴᑲᐧᓭᐧᐃᓂ ᐊᓂᓐ ᑲᔦ ᐁᑲ ᐧᐁᒋᑭ ᐅᓇᑌᒃ ᐊᔕ ᒋᑭ ᐸᐸᐊᑌᑭᐸᓂᓐ ᐅᓇᑕᒪᑎᐧᐃᓇᓐ ᒋᐃᔑ ᑭᑫᓐᒋᑲᑌᑭᓐ
ᐊᒥ ᐅᐅᐧᐁ ᑲᐧᑫᐧᑌᐧᐃᓐ ᑲᐧᐃᓐ ᐊᐧᐃᔭ ᑭᐅᒋᓯ ᒋᑭᓇᐧᑫᑕᒃ
ᐅᑕᓇᒃ ᒪᐧᐊᒋᐃᑎᐧᐃᓂᒃ ᒣᐧᑲ 1970 ᑭᑭᓄᐧᐃᓄᐧᐃᓐ ᐊᔕ ᑭᐃᔑ ᑭᑫᑕᐧᑲᓐ ᓂᐱᐧᐊ ᑲᓇᑕ ᐯᒪᑎᓯᐧᐊᑦ ᐸᑎᓄᐧᐊᒃ ᑲᓂᑕ ᑲᓴᑲᐧᓭᐧᐊᑦ
ᓄᑯᒥᑫ ᐃᑕᔥ ᐧᐃᓐ ᐊᔕ ᑲᐧᐃᓐ ᐊᐱᒋ ᑲᓴᑲᐧᓭᐧᐊᑦ ᐊᔭᓯᐧᐊᒃ
ᐊᒥ ᐧᐃᓐ ᐊᐧᐊᔑᒣ ᐊᐱᑕ ᑲᑭᓇ ᐊᓂᔑᓇᐯᒃ ᑲᓴᑲᐧᓭᐧᐊᒃ ᒪᔭ ᐱᑯ ᑲᒪᒋᑕᐧᐊᑦ ᐃᑭᐧᐁᓂᐧᐊᒃ ᒥᑕᓱᔑᓂᓯᓐ ᐱᓂᔥ ᒥᑕᓱᓂᑯᐧᑕᓱ ᑲᑕᓱᓯᐳᓀᐧᐊᑦ
ᐊᒥ ᐃᑕᔥ ᐧᐃᓐ ᑲᐅᒋ ᑭᒋᐊᓀᑕᐧᑲᒃ ᐅᐅᐧᐁ ᒪᐧᐊᒋᐃᑎᐧᐃᓐ ᐊᑕᐧᐁᑕᐧᑲᓐ ᐅᔥᑲᑎᓴᒃ ᒋᒪᒋᑕᓯᐧᑲᐸᓐ ᓴᑲᐧᓭᐧᐃᓐ
ᐧᐁᑎ ᑕᓐ ᑐᕑᐯ ᐯᔑᒃ ᑭᒋ ᒪᔥᑭᑭᐧᐃᐧᑫ ᑭᐃᔑ ᓇᑯᒧ ᐁᑭ ᐃᑭᑐᑦ ᑭᔥᐱᓐ ᐊᓂᔥ ᒪᒋᑕᓯᐧᑲ ᒣᐧᑲ ᑲᐱᒥ ᑭᑭᓄᐊᒪᑯᓯᐧᐊᑦ ᓴᑲᐧᓭᐧᐃᓂ ᑌᐧᐯ ᐃᔑᓇᐧᑲᓐ ᐁᑲ ᒋᐅᒋ ᓴᑲᐧᓭᐧᐊᑦ ᐊᓂ ᑭᒋᔭᐊᐧᐃᐧᐊᑦ
ᒥᓇᐧᐊ ᑭᐃᑭᑐ ᐯᒥᓇ ᐳᓫᑕᓐ ᐅᒋᑕ ᐱᑯ ᒋᐧᐃᑕᒪᐧᐃᐧᑕ ᐅᔥᑲᑎᓴᒃ ᑲᐃᔑ ᓇᓂᓴᓀᑕᐧᑲᒃ ᑲᐊᑕᐧᐊᓱᑦ ᓇᓭᒪ
ᒋᑭᑫᑕᒧᐧᐊᑦ ᐁᔑᒋᑫᒪᑲᒃ ᓴᑲᐧᓭᐧᐃᓐ ᐅᐧᐃᔭᐧᐃᒪᒃ ᐊᓂᔥ ᐅᔑᐅᒪᑲᓐ ᐊᑯᓯᐧᐃᓐ ᒪᔭ ᐯᔑᒃ ᑲᐊᒧᐧᐁᒪᑲᒃ ᐊᑯᓯᐧᐃᓐ ᒥᑲᐧᐊ ᑯᑕᑭᔭᓐ ᑲᔦ ᒋᑭ ᓂᓯᑐᑕᒧᐧᐊᐸᓐ ᐃᔑ ᐧᐃᒋᐧᑕᐧᐊᑦ ᐊᓂᔑᓇᐯ ᐃᔑᒋᑭᐧᐃᓇᓐ ᑲᐃᔑᐊᐸᑎᓯᑦ ᑲᐊᑕᐧᐊᓱᑦ ᓇᓭᒪ ᑭᐸᔥᑭᓀᒃ ᐃᑕᔥ ᒥᐃᒪ ᐧᐁᒋ ᐅᐧᑲᓇᒋᑲᑌᒃ ᐊᐧᑲᐸᑌ ᐯᔑᐧᑲᓐ ᐃᔑᓭ ᑲᐅᔑᐅᒪᑲᒃ ᐊᑯᓯᐧᐃᓐ ᒥᓇᐧᐊ ᒋᑭ ᑭᑫᑕᒧᐧᐊᑦ ᑲᔦ ᒋᓂᓯᑐᑕᒧᐧᐊᑦ ᐅᒋ ᑲᐊᑕᐧᐊᓱᓂᑦ ᓇᓭᒪᓐ ᑲᔦ ᑲᒧᒋ ᑭᑎᑲᓱᓂᑦ ᐸᔥᑭᓀᓯᑲᓐ
ᐯᔑᒃ ᒥᓇ ᐃᐧᑫ ᒣᐧᑲ ᑲᐱᒥ ᒪᐧᐊᒋᐃᑎᓇᓂᐧᐊᓂᓂᒃ ᑭᒋᔭᐊ ᐱᕑᓂᔅ ᔕᓐᑲᐯ ᑭ ᑭᑭᓄᐃᑫ ᑫᐃᔑᒋᑲᓂᐧᐊᒃ ᓇᓭᒪᑫᐧᐃᓐ ᐅᒋ ᒥᐱᑯᒃ ᒋᐃᔑ ᐊᐸᒋᐊᑲᓂᐧᐃᑦ ᐊᓂᔑᓇᐯ ᐃᔑᒋᑭᐧᐃᓇᓐ
ᐧᐃᑫ ᐅᑭᒋᐃᓀᑕ ᐯᔑᒃ ᓇᒣᑯᓯᐱᐧᐃᓂᓂ ᑌᓫᐅ ᓭᓇᐧᐊᑊ ᑲᑭᐱᑕᐧᑲᐱᑦ ᐅᒥᐧᓀᑕᓐ ᑭᐧᐊᐸᑫᑦ ᐁᔑᐊᑲᓂᐧᐃᓂᑦ ᓇᓭᒪᓐ
ᐅᑭ ᑭᒋᐃᓀᑕᓐ ᑲᑭᑫᑕᒃ ᑲᐅᔑᒋᑲᑌᓂᒃ ᐊᒥ ᑲᐃᑭᑐᑦ ᑭᒋᐃᓀᑕᐧᑲᓐ ᐊᓂᔑᓂᓂᐧᐊᒃ ᒋᐃᔑᑭᑫᑕᒧᐧᐊᑦ ᐧᐃᓇᐧᐊ ᐱᑯ ᓇᓭᒪᓐ ᒋᐅᔑᐊᐧᐊᑦ ᐁᑲ ᐧᐃᓐ ᑲᐊᑕᐧᐊᓱᓂᑦ ᓇᓭᒪᓐ ᒋᐊᐸᒋᐊᐧᐊᐸᓐ ᐊᓂᔥ ᑲᐧᐃᓐ ᒥᓄᔥᑲᑫᓯᓐ ᑲᔦ ᐊᒋᑫᐧᐃᓂᒃ ᑲᐃᔑᐊᐸᒋᐊᓂᐧᐃᑦ
ᐊᒥ ᐅᐅᐧᐁ ᑫᓂᓐ ᑫᐃᔑᐧᐃᑕᒪᑫᔭᓐ ᐃᑕᔑᓭᐧᐃᓂᒃ
ᓭᓇᐧᐊᑊ ᑭᐊᓂ ᐃᑭᑐ ᐧᐃᑫ ᓂᐱᐧᐊ ᐊᐧᐊᔑᒣ ᐁᑭ ᐅᒋ ᓂᓯᑐᑕᒪᓐ ᑲᑭᐱᐧᐃᒋᐧᑕᔭᓐ ᐅᓄᐧᐁᓂᐧᐊᓐ ᐊᓂᑫ ᐃᔑᒋᑫᐧᐃᓐ ᑲᐃᔑ ᐊᐸᑎᓯᑦ ᓇᓭᒪᓐ ᑲᔦ ᑲᐃᔑᐸᑲᓂᓯᑦ ᑲᐊᑕᐧᐊᓱᓂᑦ ᓇᓭᒪ
ᐁᓂᐧᐁᒃ ᐊᓂᔥ ᒣᐧᐃᔕ ᐊᔕ ᐅᒋᐃᔑᒋᑲᓂᐧᐊᓐ ᐊᔭᒥᒋᑫᐧᐃᓐ ᒋᑭᐯᑲᒃ ᓇᓇᑲᑕᐧᐁᑕᒧᐧᐃᓐ ᒥᓇ ᐊᒐᑯᐧᐃ ᐱᒪᑎᓯᐧᐃᓐ ᑲᔦ ᒥᓄᐊᔭᐧᐃᓂᒃ ᐁᐧᑲ ᑲᒥᐧᑫᒋᐧᐁᓂᒥᑦ ᑲᑭᐅᔑᐃᐧᐁᑦ ᐃᐃᒪ ᑲᔦ ᑭᑕᑭᒥᓇᓂᒃ
ᑲᐊᑕᐧᐊᓱᑦ ᓇᓭᒪ ᐧᐃᑫ ᓂᐱᐧᐊ ᑫᑯᓐ ᐅᒋᒪᑲᓐ ᓂᐧᐃᓐ ᒥᑕᐧᓴᒃ ᒥᓂᑯᒃ ᐁᐧᑲ ᒥᑕᓱᔑᐯᔑᒃ ᑭᑫᑕᐧᑲᓄᓐ ᑲᐊᒧᐧᐁᒪᑲᒃ ᐊᑯᓯᐧᐃᓐ ᐁᐅᒋᒪᑲᑭᓐ
ᒥᓇ ᑫᐧᐃᓐ ᑭᐃᑭᑐ ᐧᐊᔾᐃᑦ ᑲᑭᐱ ᐧᐃᑐᑲᑫᑦ ᑲᔦ ᑯᑕᑭᔭᓐ ᑌᐧᐯ ᑲᐊᒧᐧᐁᒪᑲᒃ ᐊᑯᓯᐧᐃᓐ ᐁᐅᒋᒪᑲᑭᓐ ᓂᓱᑯᓐ ᑲᑭᑕᔑᑲᒧᐧᐊᑦ ᐃᐃᒪ ᒪᐧᐊᒋᐃᑎᐧᐃᓐ
ᑲᔦ ᓂᐱᐧᐊ ᑫᑯᓇᓐ ᐅᒋᐧᐊᓐ ᑲᓂᓯᑯᐧᐊᑦ ᑕᐱᔥᑯ ᑲᐅᓐᑕᐸᑌᒃ ᐅᑕᐸᓀᓯᒃ ᑲᒥᓇᒋᑲᑌᒃ
ᓴᑲᐧᓭᐧᐃᓐ ᐅᒋ ᑭᑫᑕᐧᑲᓐ ᐧᐃᑫ ᐧᐃᓇᐧᐊ ᐊᓂᔑᓇᐯᒃ ᓂᑕ ᓴᑲᐧᓭᐧᐊᒃ
ᑭᑲᐧᑫᑌ ᓂᐱᐧᐊ ᑫᑯᓇᓐ ᐃᐃᒪ ᑲᑭ ᑕᓇᑲᒥᑭᓯᐧᐊᑦ
ᑭᒋᓇᓭᒪ ᐃᓇ ᐅᓂᔑᔑ ᐱᒋᐧᐃᓐ ᓇᓭᒪᓴᒃ
ᑲᐧᐃᓐ ᐊᒥ ᐱᑯ ᐯᔑᐧᑲᓐ ᒥᓇ ᐧᐃᑫ ᐊᐊᐧᐁᑎ ᑭᒋᓇᓭᒪ ᓇᐧᐊᒋᒪᔥᑲᐧᐃᒪᓯᑫ ᐁᐧᑲ ᓂᔥᑕᓇᔑᓂᔑᓐ ᒥᓂᑯᒃ ᓇᓭᒪᓴᒃ ᐊᐱᑌᑕᑯᓯ ᐯᔑᒃ ᑭᒋᓇᓭᒪ ᑭᑲᐧᑫᑌᐧᐃᓐ ᑭᔥᐱᓐ ᐊᑲ ᐧᐃᐧᑲᓇᑕᒪᓐ ᓇᓭᒪᓯᒃ
ᐊᓂᔕ ᑲᐃᑭᑐᐧᐊᑦ ᐊᒥ ᐱᑯ ᐯᔑᐧᑲᓐ ᒋᐧᐃᐧᑲᓇᑕᒪᐸᓐ
ᐃᐃᐧᐁ ᐅᑕᔥ ᐧᐃᓐ ᐸᑲᓐ ᑲᐅᒋᓭᒃ ᐊᐧᑲᐸᑌ
ᒥᓯᐧᐁ ᐊᓂᔥ ᐊᑯᔥᑲᒪᑲᓐ ᑭᑭᔥᑭᑲᓂᒃ ᐅᒋ ᒥᓇᒋᑲᑌ ᑲᔦ ᐧᐊᓭᒋᑲᓂᑭᓄᒃ ᐊᒥ ᑲᔦ ᐃᐃᒪ ᒪᔭ ᑲᑕᓇᐸᓯᑲᓂᐧᐊᒃ ᒥᓇ ᐊᐊᐧᐁ ᑭᓴᑲᐅᑦ ᓇᓭᒪᓯᒃ ᑲᒥᓇᒪᑦ ᐊᓂᔥ ᐃᓇᐸᓱ
ᐊᔭᒪᑲᓄᓐ ᑫᑯᓇᓐ ᒥᓇ ᐅᒋᓂᐧᐊᓐ ᑲᐅᒋᒥᓇᒪᑦ ᓇᓭᒪᓯᒃ