ᐊᐸᒪᑐᐠ ᒪᒋᓭᐃᐧᓇᐣ ᑲᔭᓂᐱᒥ ᓇᐣᑭᐦᐅᒪᑲᓄᐣ

ᐁᐡᑲᑦ ᐊᑯ ᒪᐊᐧᐨ ᓂᓴᓯᐣᑌᑕᑦ.
ᒥᕑᓇ ᓯᐱᕑᒐᐠ, ᐅᑭᑭᓄᐦᐊᒪᑫ ᒣᑲᐧᐨ ᑭᐱᒋ ᐅᑕᓄᑭᐃᐧᓂᐠ ᐁᔭᑯᓯᐨ ᐃᒪ ᐊᐸᒪᑐᐠ. ᐃᑭᑐ ᐊᒥ ᐁᓀᐣᑕᐠ ᐊᑯ ᑲᐯᔑᑯ ᐸᐸᒧᓭᐨ ᐅᑕᔑᑫᐃᐧᓂᐠ.
ᑭᐊᓂᐅᑦᐯᐧᓭ ᑲᐊᐧᓂᐊᐸᒋᒋᑲᑌᑭᐣ ᒪᐡᑭᑭᐣ ᐱᓂᐡ ᐊᐱᐣ ᐃᒪ ᐁᑭᔭᓂ ᑕᑲᐧᐠ ᒪᓀᐣᒋᑫᐃᐧᐣ, ᓴᑲᐦᐃᑫᐃᐧᐣ ᒥᓇ ᓂᔕᐧ ᐁᑭᓂᐸᑕᑲᓄᐊᐧᐠ. ᐁᑲᐧ ᒣᑲᐧᐨ ᐅᐱᒪᐊᒧᐃᐧᐱᓯᑦ 22 ᑲᐃᓇᑭᓱᐨ ᐅᑭᒪᑲᐣ ᒥᓇ ᐅᓇᔓᐁᐧᐃᐧᓂᓂᐊᐧᐠ ᐅᑭᐸᑭᑎᓇᓇᐊᐧᐸᐣ ᐅᑎᐸᒋᒧᐃᐧᓂᐊᐧ ᐁᑭᒋᔭᓂᒥᓭᐊᐧᐨ ᐅᑕᔑᑫᐃᐧᓂᐊᐧᐠ.
ᒪᐊᐧᐨ ᓂᐣᑯᑕᐣ ᑯᑕᐠ ᐊᐃᐧᔭ ᒋᐊᐧᓂᐦᐊᔭᐠ ᓂᒋᑕᔑᑫᒪᑲᓂᓇᐣ, ᐃᑭᑐ ᓯᐱᕑᒐᐠ ᒣᑲᐧᐨ ᑲᑭᒪᒪᐃᐧ ᒪᐊᐧᒋᐦᐃᑐᐊᐧᐸᐣ ᑲᐡᑲᑎᓄᐱᓯᑦ 4 ᐊᐱ ᔐᕑᐊᐣ ᒐᐧᐣᓴᐣ, ᑭᒋᐅᑭᒪᑫᐧ ᐅᑕᓄᑭᓇᑲᓇᐣ ᐅᐃᐧᒋᐊᐧᑲᓇᐣ ᑌᐱᐟ ᒐᐧᐣᓴᐣ, ᐁᑲᐧ ᒥᓇ ᕑᐅᐟ ᐊᐣ ᐊᐣᓫᐃ, ᐅᐃᐧᒋᐊᐧᑲᓇᐣ ᐅᐣᑌᕑᐃᔪ ᑎᐸᑯᓂᑫᐃᐧᑭᒪ ᑌᐱᐟ ᐊᐣᓫᐃ, ᐁᑭᐊᐣᑕᐃᐧ ᑭᐅᑌᐊᐧᐨ ᐊᐸᒪᑐᐠ.
ᑯᑕᐠ ᐊᐸᒪᑐᐠ ᑲᐅᒋᐨ, ᑭᑲᑫᐧᑌᐧ ᐁᑲ ᒋᐃᐧᐣᒋᑲᑌᓂᐠ ᐅᐃᐧᓱᐃᐧᐣ, ᑫᐃᐧᐣ ᐅᑭᐊᓂᒧᑕᐣ ᑲᐃᔑᐊᐧᐸᐣᑕᐠ ᐊᔭᑲᐧᒥᓯᐃᐧᐣ ᐅᑕᔑᑫᐃᓂᐠ.
ᐁᐡᑲᑦ ᐊᑯ ᓂᑯᑕᐨ ᑲᑎᐱᑲᐠ, ᑭᔭᒥᑯ ᑲᔦ ᐱᐣᑎᑲᒥᐠ ᑲᐃᔑᑕᔭᐣ, ᑭᐃᑭᑐ ᐃᑫᐧ. ᒪᐊᐧᐨ ᐊᑯ ᓂᓭᑭᐢ ᑲᔭᓂᑲᐃᐧᔑᒧᔭᐣ, ᐁᐃᓀᐣᑕᒪᐣ, ᑲᓂᑲᐊᐱᐣ ᑫᐃᓯᓭᑫᐧᐣ…
ᑕᔑᑫᐃᐧᓂᐠ ᑲᑲᐯᔑᐊᐧᐨ ᒥᔑᓇᐧᔦᐠ ᐅᑎᔑᐊᐧᐸᑕᐣᑕᓇᐊᐧ ᐊᐣᑎ ᑲᐅᒋᓭᒪᑲᓂᑭᐣ ᑲᐅᒋᐊᔭᒪᑲᐠ ᒪᓀᐣᒋᑫᐧᐃᐣ.
ᓂᐣ ᐃᐧᐣ ᐣᑎᓀᑕᐣ ᒥᐢᑕᐦᐃ ᐁᔭᓂᒪᒋᓭᐠ ᐅᓂᑭᐦᐃᑯᒪᐃᐧᐣ ᑭᑕᔑᑫᐃᐧᓂᓇᓂᐠ, ᑭᐃᑭᑐ ᐃᑫᐧ. ᐊᐊᐧᔑᔕᐠ ᓂᐸᑲᒥᑭᓯᐊᐧᐠ ᐊᔕ ᒋᑭᓴᑲᑭᓂᑕᐧᐸᐣ.
ᓯᐱᕑᒐᐠ ᐅᑌᐯᐧᑕᐊᐧᐣ ᑲᑭᐃᑭᑐᓂᐨ.
ᑲᐃᐧᐣ ᐊᔕ ᒋᑕᑲᐧᐠ ᑲᓄᑕᐊᐧᓱᐃᐧᐣ, ᑭᐃᑭᑐ. ᐅᑯᐁᐧᓂᐊᐧᐠ ᐅᑎ ᑲᔭᓂᐅᐡᑲᑎᓯᐊᐧᐨ ᐅᓂᑭᐦᐃᑯᒪᐠ, ᐅᓴᑦ ᐁᐅᐣᑕᒥᐦᐃᑯᐊᐧᐨ ᑲᐃᔑᒪᒥᓀᐧᐣᑕᒧᐊᐧᐨ ᐁᑐᑕᒧᐊᐧᐨ ᒋᑭᑲᐧᔭᐠ ᑲᓇᐁᐧᓂᒪᐊᐧᐨ ᐅᑕᐊᐧᔑᔑᒥᐊᐧᐣ.
ᑭᐡᐱᐣ ᐁᑲ ᓇᑲᑕᐊᐧᐸᒪᐨ ᐅᐡᑲᑎᓴᐣ, ᒥᐱᑯ ᐊᐱᐣ ᐁᔭᓂ ᓇᓇᑐᓇᒪᓱᐊᐧᐨ ᑫᐅᒋ ᒪᒋᓀᐣᒋᑫᐊᐧᐨ, ᑭᐃᑭᑐ.
ᒥᑕᐡ ᑐᑲᐣ ᐁᑐᑕᒧᐊᐧᐨ ᐁᒪᓀᓂᒥᑐᐊᐧᐨ, ᐁᐊᐧᓂᔭᐸᒋᑐᐊᐧᐨ ᒪᐡᑭᑭᐣ ᓇᐣᑕ ᐁᓴᑲᐦᐊᐁᐧᐊᐧᐨ ᐁᑫᐧᓇᐃᐧᑐᑕᒧᐊᐧᐨ.
ᐊᒥ ᓂᐣ ᐁᓀᐣᑕᒪᐣ ᐊᐧᐊᔑᒣ ᒋᑭᐸᐸᒥᓯᔭᑭᐸᐣ ᑭᑕᔑᑫᐃᐧᓂᓇᓂᐠ, ᐃᑭᑐ ᑕᒥ ᐊᐟᓫᐅᑲᐣ, ᐅᐡᑭᐊᐊᐧᔑᔕᐠ ᑲᐅᒋᐃᐧᒋᐦᐃᑕᐧ ᑲᓂᑲᓂᔭᓄᑲᑕᐠ ᐊᐸᒪᑐᐠ. ᓇᐊᐧᐨ ᐃᑯ ᐊᐊᐧᔑᒣ ᒋᑭᑲᑫᐧ ᐊᐧᐃᐧᒋᐦᐃᑎᔭᑭᐸᐣ. ᑲᑭᓇ ᑲᑕᓯᔭᐠ ᒋᐊᐧᐃᐧᒋᐦᐃᑎᔭᐠ ᒥᓇ ᒋᐊᓄᑭᑕᒪᑫᔭᐠ.
ᓯᐟ ᐅᑭᐢ, ᑲᔭᓄᑭᑕᒪᑫᐨ ᑕᔑᑫᐃᐧᓂᐠ, ᐅᑎᓀᐣᑕᐣ ᒪᐡᑭᑭᑫᐃᐧᐣ ᒪᐊᐧᐨ ᑲᑭᒋᒪᒋᓭᐦᐃᐁᐧᒪᑲᐠ ᐅᑕᔑᑫᐃᐧᓂᐠ, ᔕᑯᐨ ᑲᔦ ᐅᑎᓀᐣᑕᐣ ᐁᑲ ᐃᐧᓀᑕᐊᐧ ᐅᐁᐧᓂ ᐁᔑᔭᓂᒥᓭᐊᐧᐨ ᑯᑕᑭᔭᐣ ᐃᐡᑯᓂᑲᓇᐣ ᑲᐃᔑᔭᓂᒥᓭᑭᐣ.
ᒥᓯᐁᐧ ᐊᔭᒪᑲᐣ ᒪᒋᒪᐡᑭᑭᑫᐃᐧᐣ, ᐃᑭᑐ, ᒥᓇ ᐅᑭᐃᐧᐣᑕᐣ ᑲᐃᐧᐣ ᐊᑯ ᓇᐣᑕ ᒋᐃᔑ ᑲᑭᑫᐣᑕᑭᐸᐣ ᒋᑕᑲᐧᓂᐠ ᒪᓀᐣᒋᑫᐃᐧᐣ ᒥᓇ ᑭᒧᑎᐃᐧᐣ ᐃᒪ ᑕᔑᑫᐃᐧᓂᐠ, ᐁᑲᐧ ᐃᐧᓂᑯ ᔕᑯᐨ ᐁᐡᑲᑦ ᐊᑯ ᑭᐅᒋᑲᑭᒧᑕᒪᐊᐧᑲᓄ ᑲᐢ ᐅᑐᑕᐸᓂᐠ.
ᑲᐃᐧᐣ ᓇᐣᑕ ᐣᑎᔑᑯᑕᒋᓯᐣ, ᐃᑭᑐ. ᐊᒥᐃᐧᐣ ᓂᐣ ᐁᓀᐣᑕᒪᐣ ᐃᒪ ᒪᔭᑦ ᐁᐅᐣᒋᒪᑲᐠ ᒪᓀᐣᒋᑫᐃᐧᐣ ᑲᒪᒋᑲᑲᓄᓂᑎᓇᓄᐊᐧᐠ.
ᑲᐃᐧᐣ ᑕᐡ ᐃᐧᐣ ᓇᐣᑕ ᐊᓂᐣ ᑲᐅᒋᐃᓭᐁᐧᐸᐠ, ᑌᐯᐧ ᐱᑯ ᐃᔑᐁᐧᐸᐣ ᒪᓀᐣᒋᑫᐃᐧᐣ ᒥᓇ ᐅᑕᓀᐣᑕᒥᐦᐃᑯᐣ ᑫᑌᐅᑭᒪᑲᐣ ᑲᐧᕑᓂ ᓀᐟ. ᐅᑎᔑᐊᐧᐸᐣᑕᐣ ᐃᑯ ᐁᔭᓂᐱᒥ ᓇᐣᑭᐦᐅᒪᑲᓂᐠ ᐊᑯᓇᐠ ᒥᑕᓱᔭᑭ ᒥᓂᑯᐠ.
ᓀᐟ, 11 ᑕᓱᐱᐳᐣ ᑭᐱᐅᑭᒪᑲᓂᐃᐧ, ᐃᑭᑐ ᑭᔭᓂᐱᒥ ᓇᐣᑭᐦᐅᒪᑲᐣ ᐃᑯ ᐃᐁᐧ ᑲᔭᓂᑕᑕᑯᐃᐧᒋᑲᑌᑭᐣ ᒪᐡᑭᑭᐣ ᑲᐧᐣᑕ ᑲᐃᓇᐸᒋᒋᑲᑌᑭᐣ ᐅᑕᔑᑫᐃᐧᓂᐠ.
ᐊᑎᑲ ᐊᐱᐣ ᑲᒐᑭᓭᐊᐧᐨ ᒪᐡᑭᑭᐣ, ᒥᐱᑯ ᐊᐱᐣ ᐁᒐᑭᐊᐧᐨ ᒥᓇ ᑲᐯᑭᔑᑲ ᐁᓂᐸᐊᐧᐨ, ᐃᑭᑐ. ᐅᐣᑕᒪᐱᓀᐊᐧᐠ ᑭᒋᑲᐧᔭᐠ ᑲᓇᐁᐧᓂᒪᐊᐧᐨ ᐅᑕᐊᐧᔑᔑᒥᐊᐧ.
ᐃᑭᑐ ᒥᓇ ᐃᑭᐁᐧᓂᐊᐧᐠ ᒥᓇ ᒪᐊᐧᐨ ᑲᑭᑫᐣᑕᑯᓯᐊᐧᐨ ᑲᐃᓯᓭᐦᐃᑯᐊᐧᐨ ᑲᐊᐱᑕᐊᐧᑎᓯᐊᐧᐨ ᑲᑭᒋᐦᐊᐃᐧᐊᐧᐨ. ᐁᑲᐧ ᐅᑕᐊᐧᔑᔑᒥᐊᐧ, ᓇᐣᑕ ᑯᑕᐧᓱ ᐱᓂᐡ ᓂᔓᔕᑊ ᑲᑕᓱᔭᑭᐃᐧᓀᓂᐨ ᒥᐅᑯ ᑲᓂᐸᑲᒥᑭᓯᐊᐧᐨ ᑲᐯᑎᐱᐠ, ᐃᑭᑐ ᓀᐟ.
ᒥᑕᐡ ᐅᑯ ᑲᔭᓂ ᒪᓀᐣᒋᑫᐊᐧᐨ ᐊᓂᐡ ᐁᔭᓂᑫᐧᓇᐃᐧᑐᑕᒧᐊᐧᐨ ᑫᒐᒋᑭᐦᐃᑯᐊᐧᐨ, ᐃᑭᑐ ᓀᐟ.
ᐅᓄᐁᐧᓂᐊᐧᐣ ᐃᓯᓭᐃᐧᓇᐣ ᑲᐱᒥᐊᓂᒥᐦᐃᐁᐧᒪᑲᑭᐣ ᐣᑕᔑᑫᐃᐧᓂᐠ ᑲᐃᐧᓂᐣ ᓄᑯᑦ ᐸᐢᑲᐣ ᑲᐃᔑᐁᐧᐸᐠ, ᐃᑭᑐ. ᐊᔕ ᐱᑯ ᓇᐣᑕ ᒥᑕᓱᐱᐳᐣ ᐅᐣᒋᐱᒥᓇᐣᑭᐦᐅᒪᑲᓄᐣ.
ᐊᐊᐧᔑᒣ ᑲᔦ ᐊᓂᐃᔑᐁᐧᐸᐣ ᐁᒥᑲᓂᑕᐧ ᐊᐃᐧᔭᐠ, ᐁᐊᐸᑕᑭᐣ ᐸᑲᒪᑲᓇᐣ ᒥᓇ ᐁᐅᒋᑲᑫᐧᑕᒋᐦᐃᑎᓇᓄᐊᐧᐠ, ᐃᑭᑐ ᓀᐟ.
ᐊᑎᐟ ᑲᔦ ᐅᐡᑲᑎᓴᐠ ᐃᐧᒪᓀᓂᒥᑎᐊᐧᐠ ᐁᒥᑲᑎᐊᐧᐨ … ᐁᑲᐧ ᐊᐱᐣ ᐊᑯ ᐁᒪᒋᐃᐧᓂᑕᐧ ᐊᑯᓯᐃᐧᐱᒥᓭᐃᐧᓂᐠ ᑲᐃᐡᑲᐧ ᐸᔑᐸᐦᐅᑎᐊᐧᐨ, ᐃᑭᑐ ᓀᐟ. ᑭᒋᐦᐊᐠ ᑭᐱᐃᑭᑐᐊᐧᐠ ᐊᐊᐧᔑᒣ ᒋᔭᓂᐃᔑᐁᐧᐸᐠ ᒪᓀᓂᒥᑎᐃᐧᐣ, ᐱᓂᐡ ᑲᔦ ᒋᔭᓂ ᓇᓂᓯᑎᓇᓂᐊᐧᐠ.
ᒥᑕᐡ ᑫᑲᐱ ᑌᐯᐧ ᑲᑭᐃᔑᐁᐧᐸᐣ ᓂᐱᓄᐠ.
ᐊᓂᔑᓇᐯ ᐊᐢᑭ ᔑᒪᑲᓂᔑᐃᐧ
ᑲᐃᐧᐣ ᒋᑌᐱᓭᐠ ᔑᒪᑲᔑᐃᐧᔭᓄᑭᑕᒪᑫᐃᐧᐣ ᒋᐃᐧᒋᒋᑲᑌᐠ ᑕᔑᑫᐃᐧᐣ
ᐊᓄᑭᑕᒪᑫᐃᐧᓂᐠ ᑫᐃᐧᓇᐊᐧ ᒪᐊᐧᐨ ᑲᑫᐧ ᐃᑭᑐᐊᐧᐠ ᐁᐃᐧᒋᑐᐊᐧᐨ ᑕᔑᑫᐃᐧᐣ ᑲᒪᓀᓂᒥᑎᐊᐧᐨ ᐊᐃᐧᔭᐠ, ᐃᑭᑐ ᔑᒪᑲᓂᐡ ᕑᐊᐱᐣ ᒍᐣᐢ.
ᓀᐱᐨ ᐃᑯ ᓇᑕᐁᐧᐣᑕᑲᐧᐣ ᒋᐊᔭᒪᑲᐠ ᔑᒪᑲᔑᐃᐧ ᐊᓄᑭᑕᒪᑫᐃᐧᐣ, ᐃᑭᑐ, ᑲᐃᐧᐣ ᑕᐡ ᒋᑭᑐᑕᐠ ᐊᓂᔑᓇᐯ ᐊᐢᑭ ᔑᒪᑲᓂᔑᐃᐧ ᐊᓄᑭᑕᒪᑫᐃᐧᓂᐠ ᐁᑲ ᐃᐧᑲ ᑲᑌᐱᓭᐨ ᔓᓂᔭᐣ.
ᐁᑲᐧ ᐃᒪ ᑕᔑᑫᐃᐧᓂᐠ ᓂᔭᓇᐣ ᐅᑕᔭᐊᐧᐊᐧᐣ ᔑᒪᑲᓂᔕᐣ ᒪᒪᐤ 1,200 ᑲᑲᐯᔑᐊᐧᐨ ᑕᔑᑫᐃᐧᓂᐠ.
ᑭᔭᐱᐨ ᑕᐡ ᓇᑕᐁᐧᑕᑯᓯᐊᐧᐠ ᔑᒪᑲᓂᔕᐠ, ᐃᑭᑐ. ᔕᑯᐨ ᑲᔦ ᑯᑕᑭᔭᐣ ᑕᔑᑫᐃᐧᓇᐣ ᓄᑌᓭᐊᐧᐠ ᔑᒪᑲᓂᔕᐣ.
ᒍᐣᐢ ᐃᑭᑐ ᑲᐃᐧᐣ ᐅᑭᑐᑕᓯᓇᐊᐧ ᒋᑭᐊᔭᐣᒋᓂᔕᐊᐧᐊᐧᐨ ᑭᔭᐱᐨ ᒋᐊᐣᑕᐃᐧ ᐊᓄᑭᐊᐧᐨ ᔑᒪᑲᓂᔕᐠ ᐃᒪ ᐊᐸᒪᑐᐠ ᐅᓴᑦ ᑯᑕᑭᔭᐣ ᑕᔑᑫᐃᐧᓇᐣ ᒋᓄᑌᓭᐊᐧᐨ ᐅᔑᒪᑲᓂᔑᒥᐊᐧ.
ᔕᑯᐨ ᓂᔑᐣ ᐅᐣᑌᕑᐃᔪ ᔑᒪᑲᓂᔕᐠ ᐅᑭᐅᐣᑎᓇᐊᐧᐣ ᐁᑲᐧ 12 ᑕᓱᐊᐧᑲᓭ ᒋᐃᔑᒪᒥᐡᑲᐧᑕᓄᐊᐧᐨ ᒣᑲᐧᐨ ᑲᐡᑲᑎᓄᐱᓯᑦ 2 ᑲᐃᓇᑭᓱᐨ. ᒣᑲᐧᐨ ᐱᒥᔭᓂᒧᑕᒪᑎᐊᐧᐠ ᐁᐃᐧᑲᑫᐧ ᐅᐣᑎᓂᑕᐧ ᑭᔭᐱᐨ ᓂᐦᓯᐣ ᐅᐣᑌᕑᐃᔪ ᔑᒪᑲᓂᔕᐠ ᐸᓂᒪ ᑭᔭᓂ ᓇᐦᐃᓯᒋᑲᑌᐠ ᐅᐁᐧ ᑲᐃᔑᓯᒥᐊᓂᒥᓭᐊᐧᐨ ᐊᓂᔑᓂᓂᐊᐧᐠ ᒣᑲᐧᐨ ᒥᑭᓯᐃᐧᐱᓯᒧᐣ.
ᐊᐸᒪᑐ ᐅᑭᒪᑲᐣ ᓫᐅᐃᐧᐢ ᓀᐟ ᐃᑭᑐ ᒥᑐᓂ ᒥᐢᑕᐦᐃ ᐅᑐᒋᐃᐧᒋᐦᐃᑯᓇᐊᐧ ᓂᔑᐣ ᔑᒪᑲᓂᔕᐠ ᑲᑭᐱᒋᓂᔕᐦᐅᑕᐧ ᒋᐱᐃᐧᒋᑕᐧᐊᐧᐨ ᔕᑯᐨ ᑕᑭᒥᓄᓭᐸᐣ ᑭᔭᐱᐨ ᐅᐣᑎᓂᑕᐧᐸᐣ.
ᓀᐟ ᐃᑭᑐ ᒪᐊᐧᐨ ᐃᑯ ᐁᓇᓇᑯᒧᐨ ᒥᓂᑯᐠ ᑲᐃᔑᐊᐧᐸᐣᑕᐦᐊᑲᓄᐨ ᐃᐧᒋᐦᐃᑯᐃᐧᐣ, ᐊᔑᐨ ᑲᔦ $50,000 ᔓᓂᔭᐣ ᑲᑭᐸᑭᑎᓇᐨ ᔓᓂᔭᐃᐧᑭᒪ ᒋᐊᐸᑎᓯᐨ ᑲᓇᐁᐧᐣᒋᑫᐃᐧᓂᐠ ᒥᓇ ᑯᑕᑭᔭᐣ ᐊᐸᒋᒋᑲᓇᐣ, ᐊᑯᓇᐠ ᐊᐱᐣ ᑲᑭᑎᐸᒋᒧᐊᐧᐸᐣ ᐁᑭᒋᐊᓂᒥᓭᐊᐧᐨ ᐅᑕᔑᑫᐃᐧᓂᐊᐧᐠ.
ᐊᐸᒪᑐᐠ ᑕᐡ ᑲᑭᐃᔕᐊᐧᐨ, ᒪᑕᐊᐧ ᐅᑭᒪᑲᓇᐠ ᑲᐅᒋ ᐃᐧᑕᓄᑭᒥᑐᐊᐧᐨ, ᒥᓇ ᐊᐧᐁᐧ ᐊᓂᔑᓂᓂᐃᐧ ᐃᐧᒋᐦᐃᐁᐧᐃᐧᓇᐣ ᑲᑲᓇᐊᐧᐸᑕᑭᐣ ᐅᑭᒪ ᑯᕑᐃᐢ ᐯᐣᐟᓫᐃ ᒥᓇ ᐊᓂᔑᓇᐯ ᐊᐢᑭ ᔑᒪᑲᓂᔑᐃᐧᑭᒪ ᕑᐊᐱᐣ ᒍᐣᐢ ᐊᔕ ᓂᐦᓴᐧ ᑭᐃᔕ.
ᑯᑕᑭᔭᐠ ᒪᑕᐊᐧ ᐊᓂᔑᓂᓂᐃᐧ ᓂᑲᓂᑕᒪᑫᐠ ᔐᒪᐠ ᑭᐱᔕᐊᐧᐠ ᐣᑕᔑᑫᐃᐧᓂᓇᓂᐠ ᒥᓇ ᐣᑭᐃᐧᒋᐦᐃᑯᒥᐣ ᒋᐊᔭᓂᑫ ᑲᓄᑕᒪᑯᔭᐠ, ᐃᑭᑐ ᓀᐟ. ᐅᐁᐧ ᐣᑕᓂᒥᓭᐃᐧᓂᓇᐣ ᑲᐃᐧᐣ ᐃᑯ ᐁᑕ ᐅᒪ ᐊᐸᒪᑐᐠ ᑲᐃᔑᓇᑭᐡᑲᒧᐊᐧᐨ, ᒥᔑᐣ ᑯᑕᑭᔭᐣ ᐊᓂᔑᓂᓂᐃᐧ ᑕᔑᑫᐃᐧᓇᐣ ᑫᐃᐧᓇᐊᐧ ᑕᑭᐃᓯᓭᐊᐧᐠ ᓇᐣᑕ ᐊᔕ ᐅᑭᐱᐃᔑ ᓇᑭᐡᑲᓇᐊᐧ ᐅᑕᓇᐠ.
ᒥᑐᓂ ᑕᐡ ᓂᓇᓇᑯᑦ. ᒥᓇ ᐁᑲ ᓂᓀᑕᐃᐧᐟ ᐁᐯᔑᑯᑲᐸᐃᐧᔭᐠ ᐁᐃᓀᑕᒪᐣ.
ᓀᐟ ᐃᑭᑐ ᐅᑕᓂᔑᓂᓂᒪᐣ ᐃᐧᒋᑕᐧᐊᐧᐠ ᑲᐅᓇᒋᑲᑌᐠ ᐊᓂᐣ ᑭᓀᐧᐡ ᑫᐃᔑᐱᒥᐃᐧᒋᑲᑌᐠ ᐅᓇᒋᑫᐃᐧᐣᑫᐱᒥᔭᐸᑕᐠ ᑕᔑᑫᐃᐧᓂᐠ.
ᐊᒋᓇ ᐃᐧᓂᑯ ᐅᐁᐧ ᑲᐃᐧᒋᐦᐃᑯᔭᐠ ᒋᐅᒋ ᑭᐁᐧᓂᐸᐃᐧᐦᐃᑎᓱᔭᐠ ᑲᐃᔑᑕᔭᐠ, ᐁᑲᐧ ᔕᑯᐨ ᓂᓄᑌᓭᒥᐣ ᐊᐸᒋᒋᑲᓇᐣ ᑫᑭᐅᒋ ᐃᐧᒋᐦᐃᑎᓱᐊᐧᑫᔭᑭᐸᐣ ᑭᓀᐧᐡ ᒋᐅᒋ ᐱᒥᔭᐸᒥᑐᔭᐠ ᐃᓂᐁᐧᓂᐊᐧᐣ ᑲᒪᐣᑫᑕᑲᐧᑭᐣ ᑐᑲᐣ ᒪᒋᒪᐡᑭᑭᑫᐃᐧᐣ ᑲᐅᒋᓭᐠ ᒪᒪᓂᐃᐧᐣ ᑭᑕᔑᑫᐃᐧᓂᓇᓂᐠ ᑲᐊᓂᔑᓂᓂᐃᐧᔭᐠ, ᑭᐃᑭᑐ.