ᐊᐧᐊᐧᑌ ᐅᑎᐸᒋᒧ ᑭᑭᐢᑭᑲᑌᔕᐧᑲᓄ ᑲᔓᑲᐃᐧᐨ ᐅᐣᒋ

ᑲᔭᐢ ᐊᐧᐊᐧᑌ ᐊᐣᑐᑕᒧᐃᐧᐣ ᐅᑎᐸᒋᒧ ᑕᓂ ᑲᑭᐱᑕᑦ ᐅᑭᑫᐣᑕᐣ ᐊᓂᐣ ᐁᐱᒋ ᐊᓂᒪᐠ ᔓᓂᑲᐊᐧᐱᓀᐃᐧᐣ - ᓄᑯᒥᑫ ᓇᐊᐧᐨ ᑭᑭᐢᑭᑲᑌᔕᐧᑲᓄᐸᐣ ᓇᔑᔭᐦᐃ ᐅᑭᑎᑯᐠ ᓀᑫ.
“ᒣᑲᐧᐨ ᓂᑭᐱᓯᑦ ᑲᐃᓇᑭᓯᐨ, ᐅᑭ ᑭᐢᑭᐢᑭᔕᓇᐊᐧᐸᐣ ᐯᔑᐠ ᓂᑭᒋᓯᑕᐣᓂ,” ᑲᑭᐱᑕᑦ ᑭᐃᑭᑐ. “ᓂᑭᒪᓂᑲᔑᓭᓇᐸᐣ ᒥᑕᐢ ᐊᐱᐣ ᑲᑭ ᐃᔑ ᐱᒋᐳᐃᐧᓭᐠ.”
ᑲᑭᐱᑕᑦ ᑲᐃᐧᐣ ᑲᐧᔭᐠ ᒋᐅᐣᒋ ᑭᑫᐸᐣ ᑲᑭ ᑭᐢᑭᑲᑌᔕᐧᑲᓄᐸᐣ ᐁᑲᐧ ᑕᐢ ᐅᑎᐢᑫᐧᓯᑕᐣ ᑭᐊᓂ ᐱᒋᐳᐃᐧᓭᓂ, ᐊᒥᑕᐢ ᑲᑭ ᐃᓀᐣᑕᒧᐊᐧᐨ ᒪᐢᑭᑭᐃᐧᓂᐊᐧᐠ ᒋᑭᐢᑭᑫᑲᑌᐠ ᐃᐁᐧ ᑲᔦ. “ᑲᐧᐃᐣ ᑕᐢ ᒋᐅᐣᒋ ᑭᑫᑭᐸᐣ — ᐊᐊᐧᔑᒣ ᐱᑯ ᑭᐊᓂᔑᓇᑲᐧᐣ,” ᑲᑭᐱᑕᑦ ᑭᐃᑭᑐ. “ᐁᑲᐧ ᑕᐢ ᑭᐊᓂᓯᓭ (ᑲᐊᓂᐊᐱᑕᐊᐧᑭᓯᐨ ᐅᐸᐢᑯᐃᐧᐱᓯᑦ) ᐊᒥ ᑲᑐᑕᒧᐊᐧᐨ ᐁᑭ ᑭᐢᑭᑲᑌᔑᔓᐊᐧᐨ ᑕᐸᔑᐢ ᓂᑭᑎᑯᐠ ᓀᑫ. ᐊᐊᐧᔑᒣ ᑭᐊᓂᔑᓇᑲᐧᐣ, ᑭᐊᓂᒪᑲᑌᐃᐧᓭ ᓂᓯᐟ ᐁᑲ ᐁᑭ ᐅᐣᒋ ᑭᑫᔭᐣ.”
ᑲᑭᐱᑕᑦ ᐃᑭᑐ ᐁᑭ ᒪᓂᑲᔑᓭᐸᐣ ᒣᑲᐧᐨ ᐅᑲᐸᐧᔭᑭᓯᐣ ᐁᑭᑭᐢᑲᐠ, ᔕᑯᐨ ᑲᐃᐧᐣ ᐃᐧᐸᐨ ᒋᐅᐣᒋ ᑭᑫᐣᑕᐠ ᐅᓴᑦ ᐁᑲ ᐁᑭ ᐅᐣᒋ ᓂᓯᑎᓯᐨ ᐅᓯᑕᐣᐠ ᐃᐁᐧ ᑲᔓᑲᐃᐧᐨ ᐁᑲ ᒥᐢᑕᐦᐃ ᐁᐃᔕᒪᑲᓂᐠ ᒥᐢᑭᐧ ᐅᑲᑎᐣᐠ.
“ᓂᑭ ᐊᒋᑕᐃᐧ ᐊᑲᓴᑭᐦᓯᓀᓇᐸᐣ, ᐁᑭ ᓴᓴᒥᓯᑌᔑᓂᔭᐣ ᓂᑭᒋᓯᑕᓂᐠ ᐃᒪ ᓂᒪᑭᓯᓂᐠ, ᐊᒥᐦᐃ ᑲᑭ ᐅᐣᒋ ᒪᓂᑲᔑᓭᔭᐣ,” ᑲᑭᐱᑕᑦ ᐃᑭᑐ. “ᑭᓯᐣᑕᐊᐧᐣ ᓂᒪᑭᓯᓇᐣ. ᑲᐃᐧᐣ ᓂᑕᐃᓇᓯᐣ ᑲᔓᑲᐃᐧᐊᐧᐨ ᑲᐸᐧᔭᑭᓯᓇᐣ ᒋᑭᑭᐢᑲᒧᐊᐧᐨ.”
ᑲᑭᐱᑕᑦ, ᓄᑯᑦ ᐅᑭᐢᑲᓇᐣ ᑲᒪᐣᑲᓇᐢᑲᓂᐠ ᒪᑭᓯᓂ ᒪᐊᐧᐨ
“ᐁᒥᓄᐢᑲᑭᐣ,” ᓂᐢᑕᑦ ᑲᑭ ᑭᑫᐣᑕᐠ ᐁᔓᑲᐃᐧᐨ 1980 ᑲᐊᑭᐊᐧᐠ ᒣᑲᐧᐨ ᐊᐧᓂᓇᐊᐧᑲᐠ ᐁᐃᐧ ᐱᐊᐣᑐᒪᒋᔕᐧᑲᓄᐸᐣ.
“ᐊᒥ ᑲᑭ ᐃᓂᔑᐊᐧᐸᐣ ᐅᓴᑦ ᐁᑭᒋ̇ᐢᐱᓭᐨ ᓂᔓᑲᑦ ᐁᑲ ᐊᐱᐣ ᒋᑭ ᒪᒋᔑᔓᐊᐧᐨ,” ᑲᑭᐱᑕᑦ ᑭᐃᑭᑐ. “ᒪᐧᔦ 1980 ᑲᐊᑭᐊᐧᐠ, ᐁᐧᑎ ᓀᐣᑲᐃᐧᓴᑲᐦᐃᑲᓂᐠ, ᓂᓂᐦᑕ ᓇᓂᑭᐢᑲᓇᐸᐣ ᐊᑯ ᑲᓄᐣᑌᐃᐧᓯᓂᔭᐣ. ᑲᐃᐧᐣ ᓂᑐᐣᒋ ᑭᑫᐣᑕᓯᓇᐸᐣ ᐃᓴᐣ ᐁᔓᑲᐃᐧᔭᐣ ᔕᑯᐨ ᑕᐢ ᓂᑭ ᐃᓇᐱᓀ ᑲᐃᔑᔭᓂᐊᐧᐠ ᑲᔓᑲᐃᐧᓇᓂᐊᐧᐠ.”
ᑲᑭᐱᑕᑦ ᐅᑭ ᐱᒥᓂᔕᐦᐊᐣ ᔓᑲᐃᐧ ᑭᑭᓄᐦᐊᒪᑫᐃᐧᐣ ᐊᐱ ᑲᑭ ᐃᐢᑲᐧ ᑭᑫᐣᑕᑕᐠ ᐃᐁᐧ ᐁᐃᓇᐱᓀᐨ.
“ᓂᑭ ᒥᓂᑯᐠ ᒪᐢᑭᑭᓂ ᐁᑲᐧ ᑕᐢ ᓂᑭ ᐃᓂᑯᐠ ᒋᐊᐣᑐᐊᐧᐸᒥᒪᐠ ᐊᐁᐧ ᑲᐃᐧᐣᑕᒪᑫᐨ ᑫᐃᓇᐣᒋᑲᓂᐊᐧᓂᐠ,” ᑲᑭᐱᑕᑦ ᑭᐃᑭᑐ. “ᐊᐁᐧ ᑲᐃᐧᐣᑕᒪᑫᐨ ᑫᐃᓇᐣᒋᑲᓂᐊᐧᓂᐠ (ᑫᑯᓀᐣ) ᐁᑲ ᑫᒥᒋᐨ ᒥᓇ ᑫᑯᓀᐣ ᑫᒥᒋᐨ, ᑫᑯᓀᐣ ᑲᔦ ᑫᒥᓂᐢᑲᑯᔭᐣ. ᓂᑭᐃᑯ ᑲᔦ ᒋᑲᑫᐧ ᓇᐣᑭᓯᔭᐣ ᓇᐊᐧᐨ.”
ᐃᐁᐧ ᑕᐢ ᑲᓇᑕ ᔓᑲᐃᐧ ᑭᑭᓄᐦᐊᒪᑫᐃᐧᐣ ᑲᐊᓂᑲᑕᒧᐊᐧᐨ ᐃᑭᑐᐊᐧᐠ ᑲᑭᓇ ᑲᔓᑲᐃᐧᐊᐧᐨ ᒋᓇᓇᐣᑎᓇᒧᐊᐧᐨ ᐃᐧᒋᐦᐃᐁᐧᐃᐧᐣ ᐃᒪ ᑲᐃᐧᐣᑕᒪᑫᐨ ᑫᐃᓇᐣᒋᑲᓂᐊᐧᐠ ᑲᐃᓇᓄᑭᐨ. ᐊᐃᐧᔭ ᑲᐧᔭᐠ ᑲᑲᓇᐁᐧᐣᑕᐠ ᐅᔓᑲᐊᐧᐱᓀᐃᐧᐣ ᑲᐧᔭᐠ ᒋᐃᓇᐣᒋᑫᐨ, ᒧᔕᐠ ᒋᐊᐧᑲᐃᐧᐨ ᒥᓇ ᒧᔕᐠ ᑲᐧᔭᐠ ᒋᐅᑕᐱᓇᐠ ᐅᒪᐢᑭᑭᑦ ᑲᒥᓇᑲᓄᐨ ᒋᐊᐸᒋᑐᐨ. ᐊᑫᐧᓂᐊᐧᐠ ᐅᑭᑭᓄᐦᐊᒪᑫᐠ ᐃᑭᑐᐊᐧᐨ ᑲᐧᔭᐠ ᑕᓴᐧ ᒋᑭᔐᐸᓀᑫᐧᐨ ᐊᐃᐧᔭ ᑕᐱᓇᑲ ᐊᒥᐦᐃᐁᐧ ᒪᐊᐧᐨ ᐁᑭᒋ̇ᓀᐣᑕᑲᐧᐠ ᐃᒪ ᒋᐅᐣᒋ ᒥᓄᔭᔭᐣ ᐁᑭᔑᑲᐠ.
ᑲᑭᐱᑕᑦ ᐃᑭᑐ ᒪᐊᐧᐨ ᐁᑭ ᐊᓂᒥᐃᐧᑐᐨ ᓂᐢᑕᑦ ᐊᐸᐣ ᑲᐸᑭᑎᓇᑭᐣ ᐃᑫᐧᓂᐊᐧᐣ ᒥᒋᒪᐣ ᒪᐊᐧᐨ ᑲᑭ ᒥᓀᐧᐁᐧᐣᑕᑭᐸᐣ ᐁᐊᐸᒋᑐᐨ, ᔕᑯᐨ ᑕᐢ ᒥᐢᑕᐦᐃ ᑭᐸᐸᒧᓭ ᐃᒪ ᐁᐅᐣᒋ ᔐᔕᐃᐧᐨ.
“ᐃᐁᐧ ᐁᐦᑕ ᑭᐃᓯᓭ, ᑭᐢᐱᐣ ᑲᐅᒥᑭᔭᐣ, ᑭᓇᐊᐧᑲᐢ ᑭᐃᓯᓭ ᒋᑭᑫᔭᐣ,” ᑲᑭᐱᑕᑦ ᐃᑭᑐ. “ᐊᒥᐦᐃ ᑲᔦ ᑲᑭᐃᓂᔑᐊᐧᐨ ᑲᐧᔭᐠ ᒋᓇᓇᑲᒋᑐᔭᐣ ᒧᔕᐠ ᓂᓯᑕᐣ ᒥᓇ ᑲᔦ ᐁᑲ ᒋᐅᒥᑭᔭᐣ ᓂᓯᑕᐣᐠ.”
ᑲᑭᐱᑕᑦ ᒣᑲᐧᐨ ᐱᐦᐅ ᒋᑭᑫᐨ ᐅᑲᑎᐠ ᒥᓂᑯᐠ ᑫᑭ ᐱᒋᐢᑲᐠ ᐅᑲᑎᑲᐣ — ᐅᑲᑎᑲᐣ ᑲᒧᒋ ᐅᔑᒋᑲᑌᐠ — ᐃᐁᐧ ᒋᑭ ᐱᒧᓭᐊᐧᑫᐨ. ᐁᑲᐧ ᑕᐢ ᓄᑯᑦ, ᑌᓴᐳᐃᐧᐣ ᑲᐸᐸᒪᑕᐦᐁᓂᑲᑌᓂᐠ ᐅᑕᐸᒋᑐᐣ ᒥᓇ ᑲᔦ ᒥᑎᑯᐣ ᑲᐸᐸᒪᑲᐧᐦᐅᑎᓴᐧᑫᐨ.
“ᒪᐊᐧᐨ ᐁᐢᑲᑦ ᓂᑭᒋ ᒪᒉᐣᑕᐣ ᐁᑲ ᑫᑯᐣ ᐁᑭ ᑐᑕᒪᐣ ᐅᑕᓇᐠ ᑲᑭ ᐱᑐᑕᒪᐸᓂᐣ,” ᑲᑭᐱᑕᑦ ᐃᑭᑐ, ᐁᐃᐧᑕᐣᐠ ᓄᑯᑦ 200 ᐁᑕᓱᑲᐧᓀᓯᐨ. “ᑲᐧᐃᐣ ᐊᐧᓴ ᒋᑭ ᐃᓇᑲᐧᐦᐅᑎᓯᔭᐣ ᐃᐁᐧ ᑲᔭᐱᑕᓂᔭᐣ.”
ᑲᑭᐱᑕᑦ ᐅᒣᑎᓴᐁᐧᐣᑕᐣ ᐅᑕᓄᑭᐃᐧᐣ ᐃᒪ ᐊᐧᐊᐧᑌ, ᐃᐁᐧ ᒪᐊᐧᐨ ᑲᑭᓇᐁᐧᐣᑕᐠ ᑲᐊᔭᒥᐦᐊᐸᐣ ᐊᓂᔑᓂᓂᐊᐧᐣ ᐁᐧᑎ ᑭᐁᐧᑎᓄᐠ ᑲᔭᐊᐧᐨ.
“ᐊᐧᐊᐧᑌ ᑭᒪᒋᒋᑲᑌᐸᐣ 1984 ᑲᐊᑭᐊᐧᐠ ᐁᑲᐧ ᑕᐢ ᓂᔑᐊᐦᑭ ᑲᐃᐢᑲᐧ ᐃᓯᓭᐠ
ᓂᑭ ᒪᑕᓄᑭᓇᐸᐣ,” ᑲᑭᐱᑕᑦ ᐃᑭᑐ. “ᓂᐃᐧᑕᓄᑭᒪᒥᓇᐸᐣ ᐊᐦᑯ ᐁᐢᑕᑦ CBC ᐁᑐᑕᒪᑭᐸᐣ ᐊᐦᑯ ᐊᓂᔑᓇᐯ ᐅᐃᐧᐣᑲᐧᐣ ᑲᐃᒋᑲᑌᑭᐸᐣ.”
ᑲᑭᐱᑕᑦ ᐅᑎᓇᐣ ᑲᑭᓇ ᐊᐧᐃᔭ ᑲᔓᑲᐃᐧᐊᐧᐨ ᑲᐧᔭᐠ ᒋᓇᓇᑲᒋᑐᐊᐧᐨ ᐅᓯᑎᐊᐧ.
“ᑲᐧᔭᐠ ᑲᓇᐁᐧᐣᑕᐣ ᑭᓯᑕᐣ ᐃᐁᐧ ᑕᐢ ᑲᐅᐣᒋ̇ᑭᑐᔭᐣ ᑭᐢᐱᐣ ᑲᐧᔭᐠ ᑲᓇᐁᐧᓂᒥᑎᓯᔭᐣ ᑲᔓᑲᐃᐧᔭᐣ ᑲᐃᐧᐣ ᓇᐣᑕ ᑲᐃᔑᔭᓯᐣ,” ᑲᑭᐱᑕᑦ ᐃᑭᑐ.
ᑲᑭᐱᑕᑦ ᑲᔦ ᐃᑭᑐ ᐁᑲ ᑲᔓᑲᐃᐧᐊᐧᐨ ᐊᐃᐧᔭᐠ: ᑲᐧᔭᐠ ᑲᓇᐁᐧᐣᑕᐣ ᑲᐃᓇᐣ ᑫᔭᐣ ᒥᓇ ᑲᐧᔭᐠ ᒋᐊᐧᐊᐧᑲᐃᐧᔭᐣ ᒧᔕᐠ.
ᑲᓇᑕ ᔓᑲᐃᐧ ᑭᑭᓄᐦᐊᒪᑫᐃᐧᐣ ᑲᐊᓂᑲᑕᒧᐊᐧᐨ ᐃᔑᐃᐧᑕᒪᑫᐊᐧᐠ ᑲᑭᓇ ᐊᐃᐧᔭᐠ ᒋᐅᓇᑕᒪᓱᐊᐧᐨ ᐯᔑᑲᐧ ᐁᐃᓯᓭᓂᐠ ᒋᑲᑫᐧᒋᐊᐧᐨ, ᒥᓇ ᒋᐊᐧᐊᐧᑲᐃᐧᐊᐧᐨ, ᒋᑲᑫᐧ ᐊᐧᐊᐧᑲᐃᐧᔭᐣ ᑲᐸᐱᒧᑯᓇᑲᐠ, ᒋᐱᒧᓭᔭᐣ ᑲᐃᓯᓭᐠ ᐁᑲ ᐅᓴᑦ ᓇᔑᓀ ᒋᐱᒥᑕᐸᓱᔭᐣ, ᐯᑲ ᓇᐊᐧᐨ ᓂᐢᑕᑦ ᒋᐊᓂᒪᒋᑐᔭᐣ ᑭᑲᑫᐧᒋᐃᐧᐣ ᐁᑲᐧ ᑕᐢ ᒋᐊᓂ ᓇᐣᑭᓇᒪᐣ ᒥᓂᑯᐠ ᑫᐊᓂ ᑲᐢᑭᑐᔭᐣ, ᒋᐅᓇᑐᔭᐣ ᑭᑎᐯᐣᒋᑫᐃᐧᐣ ᑫᒪᒪᐤᐃᐧ ᑐᑕᒣᐠ ᐁᑲ ᐃᐧᓂᑯ ᒋᒧᒋ ᒪᓯᓇᑌᓯᒋᑫᐊᐧᐱᔦᐠ ᒥᓇ ᑲᔦ ᐯᐸᑲᐣ ᑫᑯᓇᐣ ᒋᑐᑕᒣᐠ ᑐᑲᐣ ᓂᒥᐃᐧᐣ, ᑐᐦᐁᐃᐧᐣ ᒥᓇ ᐸᐸᒥᐁᐧᐱᐢᑭᑫᐃᐧᐣ.
ᑲᑭᐱᑕᑦ ᑲᓄᑫ ᒪᐊᐧᐨ ᐁᑭ ᓂᐦᑕ ᑲᑫᐧᒋᐨ ᒣᑲᐧᐨ ᑲᐅᐢᑲᑎᓯᐨ, ᐃᐁᐧ ᒪᐊᐧᐨ ᐱᑲᐧᒋᔭᐦᐃᐠ ᑲᑭᐸᐸᒥᔭᐠ ᐊᓂᒧᔕᐣ ᑲᑭ ᐅᑕᐸᐦᐊᓯᒧᐁᐧᐊᐧᐸᐣ ᓇᐣᑕ ᑲᔦ ᑲᓇᓇᐣᑕᐃᐧ ᒧᓯᐧᐁᐧᐊᐧᐨ.
“ᓂᓂᐦᑕ ᓂᑲᓂᐸᑐᓇᐸᐣ ᐊᐦᑯ,” ᑲᑭᐱᑕᑦ ᐃᑭᑐ ᐅᑕᔦᔕᐣ ᑲᐊᓂᒧᒪᐨ. “ᒥᔑᓄᑎᐸᐦᐊᑲᐣ ᓂᑭᔭ̇ᐃᐸᑐᓇᐸᐣ.”
“ᐁᑲᐧ ᑕᐢ ᒣᑲᐧᐨ ᑲᐱᐳᐠ, ᑲᐃᐧᓇᓇᐣᑕᐃᐧᒧᓯᐧᐁᐧᐊᐧᐨ, ᐅᑕᑭᒥᐊᐧᐣ ᐅᑭ ᐊᐸᒋᐦᐊᐊᐧᐸᓂᐣ. ᒪᐊᐧᐨ ᑭᐊᓂᒪᐣ ᒧᑕᑯᓇᐠ ᑲᐱᒧᓴᓂᐊᐧᐠ, ᒪᐊᐧᐨ ᑲᐧᔭᐠ ᐃᒪ ᐅᐣᒋ ᔑᔕᐃᐧᓇᓂᐊᐧᐣ — ᑲᐱᒪᑯᒥᓴᓂᐊᐧᐠ.”