ᑲᔭᔥ ᑭᒋᐅᑭᒪᑲᓀᐢ ᓂᑯᑕᐧᓯ ᑎᐸᐦᐊᑲᐣ ᑲᑫᐧᑕᐦᐊᑐ ᑕᓯᑭᔑᑲ

“ᒧᔕᐠ ᐊᐧᑲᐃᐧᐣ, ᐊᓂᓂᑯ ᑲᐃᔑ ᑭᑫᐣᑕᒪᐣ ᒋᑐᑕᒪᐣ.”
ᐊᒥᐦᐃᐁᐧᓂ ᑲᑭ ᐃᔑ ᐃᐧᐣᑕᒪᑫᐨ ᑲᔭᔥ ᐊᓂᔑᓇᐯ ᐊᐢᑭ ᑭᒋ ᐅᑭᒪᑲᓀᐢ ᐯᐣᓫᐃ ᒋᒍ, ᓂᐃᐧᐊᐦᑭ ᐊᔕ ᐁᐅᐣᒋ ᐱᒥ ᑲᑫᐧᑕᐦᐊᑐᐨ.
“ᒥᐢᑕᐦᐃ ᐊᓂ ᐊᐧᐊᐧᑲᐃᐧᔭᐣ, ᑲᑭ ᐊᓄᐣᒋ ᒥᓇᒪᐣᒋᐤ ᐃᒪ ᑭᐱᒪᑎᓯᐃᐧᓂᐠ,” ᒋᒍ ᐃᑭᑐ, ᐁᑭ ᐃᐧᐣᑕᐠ ᐁᐱᒥ ᑲᑫᐧᑕᐦᐊᑐᐨ ᐣᑯᑕᐧᓯ ᑎᐸᐦᐊᑲᐣ ᑕᓯᑭᔑᑲ. “ᒥᓇ ᑲᔦ ᑲᐧᔭᐠ ᒋᐃᓇᐣᒋᑫᔭᐣ, ᑕᐱᓇᑲ ᒥᐢᑕᐦᐃ ᑫᑯᓇᐣ ᑕᑯᓂᑲᑌᐊᐧᐣ ᑲᐊᑕᐊᐧᑌᑭᐣ ᒥᒋᒪᐣ ᑲᐃᐧᐣ ᑲᐊᓂ ᒥᓂᑐᑕᑯᓯᒥᐣ ᑭᐱᒪᑎᓯᐃᐧᓂᓇᐣ.”
ᒋᒍ ᐃᑭᑐ ᐃᑫᐧᓂᐊᐧᐠ ᑲᐃᓯᓭᐊᐧᐨ ᒋᑌᐱᓇᒧᐊᐧᐨ ᐊᓂᔑᓇᐯᐃᐧ ᒥᒋᒪᐣ ᒋᑭ ᒥᒋᐊᐧᐸᐣ.
“ᒪᐊᐧᐨ ᒥᓄᐧᐊᐧᔑᐣ ᐃᐁᐧ ᒋᒥᒋᑲᑌᐠ,” ᒋᒍ ᐃᑭᑐ.
ᐁᑲᐧ ᑕᔥ ᐃᐁᐧ ᒋᒍ ᑲᑐᑕᐣᐠ ᐅᑲᑫᐧᒋᐃᐧᐣ ᒥᓇ ᑲᐃᓇᐣᒋᑫᐨ ᐁᒥᓂᑐᑕᑯᐨ, ᐃᐧᐣᑕᒪᐊᐧᑲᓄᐊᐧᐠ ᐊᐃᐧᔭᐠ ᐱᓇᒪ ᒋᓇᓇᑐᒧᐊᐧᐨ ᐃᒪ ᒪᐢᑭᑭᐃᐧᓂᓇᐣᐠ ᒪᐧᔦ ᒪᒋᑐᐊᐧᐨ ᑲᑫᐧᒋᐃᐧᐣ ᒥᓇ ᑲᔦ ᑫᐃᓇᐣᒋᑫᐨ ᑭᑭᓄᐦᐊᒪᑫᐃᐧᐣ.
ᒋᒍ ᐃᐧᐸᐨ ᐁᑭᔐᐸᔭᓂᐠ ᐊᐧᓂᐢᑲ ᓂᓱᑎᐸᐦᐊᑲᐣ ᐁᐱᒧᓭᐨ ᒪᐧᔦ ᑲᒪᑕᓄᑭᐨ ᐃᒪ ᐊᓂᔑᓇᐯ ᐊᐢᑭ ᒪᓯᓇᐦᐃᑫᐃᐧᑲᒥᐠ ᐃᒪ ᑕᐣᑐᕑ ᐯ.
“ᐊᓇᐦᐱ ᐱᑯ ᑲᐃᓯᓭᔭᐣ ᓂᐱᒪᐦᐊᑐ,” ᒋᒍ ᐃᑭᑐ, ᐁᑭ ᐃᐧᐣᑕᐣᐠ ᐃᒪ ᐁᑕᔑ ᐱᒪᐦᐊᑐᐨ ᑭᒋᒥᑲᓇᐣᐠ ᓀᑫ ᑲᐃᔑᑲᐯᔑᐨ ᑕᐣᑐᕑ ᐯ ᐁᑲᐧ ᑕᔥ ᒥᓇ ᑲᐃᔑᐱᑦᐸᑐᓇᓂᐊᐧᐠ ᑲᑫᐧᒋᐃᐧᐣ ᐃᒪ ᑲᐯᔑᐃᐧᑲᒥᑯᐣᐠ ᒣᑲᐧᐨ ᑲᐸᐸᒪᓄᑭᑕᐊᐧᐨ ᐊᓂᔑᓇᐯ ᐊᐢᑭ.
“ᐊᒥᐱᑯ ᐁᐃᔑ ᐱᒪᐦᐊᑐᔭᐣ ᐊᐣᑎ ᐱᑯ ᑲᐃᔑᐃᐧᓂᑯᔭᐣ.”
ᒋᒍ ᑭᒥᑲᒪᐊᐧᑲᓄᐸᐣ ᐁᔓᑲᐊᐧᐱᓀᐨ 2 ᑲᐊᑯᐢᑲᒪᑲᓂᐠ ᒣᑲᐧᐨ 2002 ᑲᐊᐦᑭᐊᐧᐠ, ᒥᓴᐊᐧᐨ ᐁᑭ ᒪᒋᑐᐸᐣ ᑲᑫᐧᒋᐃᐧᓂ, ᑲᐃᐧᐣ ᒧᔕᐠ ᒋᐅᐣᒋ ᑲᑫᐧᒋᐨ ᐁᔥᑲᑦ ᐁᑭ ᐳᓂᑐᐨ ᐸᓂᒪ ᑕᔥ 2007 ᑲᐊᐦᑭᐊᐧᓂᐠ ᐸᓂᒪ ᑲᐧᔭᐠ ᑲᑭ ᒪᒥᑎᓀᐣᑕᐠ ᑲᐧᔭᐠ ᒋᐱᒥᐃᐧᑐᐨ ᐅᑲᑫᐧᒋᐃᐧᐣ.
“ᐯᑲ ᓂᑭ ᐊᓂᒪᒋᑕ ᐁᑲᐧ ᑕᔥ ᓂᑭ ᐊᓂ ᑲᐢᑭᑐᐣ ᓂᔭᓄᑎᐸᐦᐊᑲᐣ ᐯᔑᑯᑭᔑᑲ ᒋᐱᒧᓭᔭᐣ,” ᒋᒍ ᐃᑭᑐ. “ᒥᓇᐊᐧ ᓂᑭ ᐸᐣᑭᔑᐣ ᑲᐱᒥ ᑲᑫᐧᑕᐦᐊᑐᔭᐣ ᐁᔥᑲᑦ ᑲᐃᐧᐣ ᒋᐅᐣᒋ ᑐᑕᒪᐣ ᐁᔥᑲᑦ ᒥᓇ ᓂᑭᑐᑕᐣ. ᐁᑲᐧ ᑕᔥ 2009 ᑲᐊᐦᑭᐊᐧᐠ, ᓂᑭ ᑲᐢᑭᑐᐣ ᒋᐱᒧᓭᔭᐣ ᑕᓯᑭᔑᑲ. ᐁᑭ ᐃᑭᑐᔭᐣ ᐁᑲ ᐁᑲᐧ ᑫᑯᐣ ᒋᐊᐧᓇᐦᐃᑯᔭᐣ— ᐊᒥᑕᔥ ᑭᔭᐸᐨ ᐁᐣᑐᑕᒪᐣ ᐊᔕ ᓂᔑᑕᓇ ᓂᓴᐧᓯᔕᑊ ᐱᓯᑦ.”
ᒋᒍ ᐱᒪᐦᐊᑐ ᓂᓯᑎᐸᐦᐊᑲᐣ ᐁᑫᑭᔐᐸᔭᓂᐠ ᒥᓇ ᓂᓯᑎᐸᐦᐊᑲᐣ ᑲᐅᓇᑯᔑᓂᐣᐠ.
“ᓂᑭ ᓂᓯᑕᐁᐧᐣᑕᐣ ᐁᐃᐧᒋᐦᐃᑯᔭᐣ ᐁᑭ ᐊᐧᐸᐣᑕᒪᐣ ᐁᑭ ᐅᐣᒋ ᓇᐣᑭᓯᔭᐣ ᓇᐊᐧᐨ,” ᒋᒍ ᐃᑭᑐ.
ᑲᑲᑫᐧᒋᓇᓂᐊᐧᐠ ᐅᐣᒋ ᒥᓀᐧᔭᓂᐊᐧᐣ
“ᑲᑭ ᒪᒋᑐᔭᐸᐣ 2009, 256 ᓂᑭᑕᓯᑲᐧᓀᐢ; ᓄᑯᑦ ᑕᔥ 208 ᓂᑕᐱᐦᑕᐣ.”
ᐃᐁᐧ ᐊᔑᐨ ᑲᐱᒧᓭᐨ, ᒋᒍ ᐅᐱᒥ ᓇᓇᑲᒋᑐᐣ ᑫᑯᓀᓇᐣ ᑲᒥᒋᒋᐣ ᐁᑲ ᐁᐧᓴ ᑲᔓᑲᐊᐧᓂᐣᐠ ᐁᒥᒋᐨ.
“ᒥᐢᑕᐦᐃ ᒧᓱᐃᐧᔭᐢ ᓂᒥᐣ ᒥᓇ ᑭᑎᑲᓇᐣ,” ᒋᒍ ᐃᑭᑐ.
ᒋᒍ ᐅᐱᒥ ᓇᓇᑲᒋᐦᐊᐣ ᐅᔓᑲᒪᐣ ᐊᓂᐣ ᐁᐊᐱᒋᐢᑲᓂᐨ, ᐃᒪ ᐁᐅᐣᒋ ᑭᑫᐣᑕᐣᐠ ᑲᑲᑫᐧᒋᐨ ᒥᓇ ᑲᒥᒋᐨ.
“ᓂᔓᑲᑦ ᑕᐸᓯᔥᑲ — ᐁᔥᑲᑦ ᒥᓄᐡᑲ: 5.1 ᒥᓇ 5.2,” ᒋᒍ ᐃᑭᑐ, ᐁᑭ ᐃᐧᐣᑕᐠ ᐅᒪᐢᑭᑭᐃᐧᓂᓂᒪᐣ ᐁᑭ ᐃᐧᐣᑕᒪᑯᐨ ᐁᒥᓄᐢᑲᓂᐨ ᐅᔓᑲᒪᐣ ᒣᑲᐧᐨ ᑲᑭ ᓇᓇᑲᒋᐦᐃᑯᐨ. “ᑭᐢᐱᐣ ᐁᑲ ᓇᐣᑕ ᐁᐃᔑ ᐊᐧᐊᐧᑲᐃᐧᔭᐣ ᐯᔑᑲᐧ ᑲᑭᔑᑲᐠ, ᐊᒥᔕ ᑭᔓᑲᑦ ᒋᐃᐢᐱᔥᑲᐨ.”
ᒋᒍ ᐃᑭᑐ ᐱᓇᒪ ᐱᑯ ᐊᐃᐧᔭ ᒋᐅᓇᑕᒪᓯᐨ ᐊᓂᐣ ᒥᓂᑯᐠ ᑲᐃᐧ ᑲᑫᐧᒋᐨ ᐃᐁᐧ ᑕᔥ ᑲᐅᐣᒋ ᐃᑭᑐᐨ ᒪᔥᑯᐨ ᑕᐅᐣᒋ ᒥᐣᒋᓇᐁᐧᓯ ᐁᑲ ᑭᑐᑕᐣᐠ ᑲᑭ ᐃᔓᓇᑕᒧᓱᐸᐣ.
“ᐊᐱ ᑲᑭ ᐅᓇᑕᒪᓯᔭᐸᐣ ᒋᑲᑫᐧ ᓇᐣᑭᓯᔭᐣ 20 ᑕᓯᑯᓯᑲᐧᐣ, ᑲᐃᐧᐣ ᒋᐅᐣᒋ ᑲᐢᑭᑐᔭᐣ,” ᒋᒍ ᐃᑭᑐ.
“ᐁᑲᐧ ᑕᔥ ᓄᑯᑦ ᑲᐃᔑ ᐅᓇᑕᒧᓯᔭᐣ ᐯᔑᑯᑯᓯᑲᐧᐣ ᒋᑲᑫᐧ ᓇᐣᑭᓯᔭᐣ. ᐊᐱ ᑕᔥ ᐃᐁᐧ ᑲᑲᐢᑭᑐᔭᐣ, ᐊᒥ ᑲᑭ ᐃᓂᑎᓯᔭᐣ ᒥᓇᐊᐧ ᓂᑲᐊᐧᓂᑐᐣ ᐯᔑᑯᑯᓯᑲᐧᐣ.”