ᓂᓴᐧᓯ ᑲᓇᒋ ᑭᑭᓄᐦᐊᒪᑫᐧᐃᓇᐣ ᒪᐧᐊᐨ ᑭᒥᓄᓭ

ᔕᓇᐣ ᑯᐢᑕᒋᐣ ᑲᑭ ᒪᐃᐧᓀᐢᑲᐣᑭᐸᐣ ᓇᐧᐊᐨ ᒋᑭ ᒥᓇᐧᔑᓂᑭᐸᐣ ᐅᑎᐢᑯᓄᐃᐧᑲᒥᐠ ᐃᒪ ᐅᑕᔑᑫᐃᐧᓂᐠ ᐊᒥᐦᐃᐁᐧ ᒪᐊᐧᐨ ᑲᑭ ᑭᒋ ᐊᓂᒧᒋᑲᑌᐠ ᐃᒪ ᑲᑭ ᒪᐊᐧᒋᐦᐃᑎᓇᓂᐊᐧᑭᐸᐣ ᓂᓴᐧᓯ ᑲᓇᒋ ᑭᑭᓄᐦᐊᒪᑫᐃᐧᓇᐣ ᑲᐃᔑᓂᑲᑌᐠ ᒪᐊᐧᒋᐦᐃᑎᐃᐧᐣ.
“ᐃᐧᐣ ᐅᑭ ᒪᒋᑐᐣ ᐁᑭ ᑭᒋ ᐊᐧᑲᐃᐧᓇᐣᐠ ᒪᐊᐧᐨ ᑲᒥᐦᔕᐠ ᐊᐊᐧᔑᔑᐃᐧ ᒪᐢᑲᐃᐧᓯᐃᐧᐣ ᐅᒪ ᑲᓇᑕ ᑲᐃᓂᑯᑲᐧᐠ,” ᐃᑭᑐ ᒐᐧᔾᐃᐢ ᐦᐊᐣᑎᕑ, ᑲᓂᑲᓂᐢᑲᐠ ᐅᐢᑲᑎᓯᐃᐧ ᑎᐸᒋᒧᒪᓯᓇᐦᐃᑲᐣ ᒥᓇ ᑲᔦ ᑲᑭ ᑭᑭᓄᐦᐊᒪᑫᐨ ᑲᐊᐣᑎᓇᑲᓄᐨ ᓂᑲᓂᑕᒪᑫᐃᐧᐣ ᒪᐊᐧᒋᐦᐃᑎᐃᐧᓂᐠ. “ᑭᐅᑕᐱᓇᑲᓄᐸᐣ ᐃᒪ ᐯᔑᐠ ᑭᒋᐸᑭᓇᑫᐃᐧᓂᐠ ᐅᑎᐸᒋᒧᐠ ᑲᐃᔑ ᑭᐦᑕᑭᒪᑲᓄᐊᐧᐨ ᐁᑲᐧ ᑕᔥ ᐁᑭ ᑲᐢᑭᑐᐨ ᐃᐁᐧ ᒋᑐᑕᐣᐠ ᐅᑎᐸᒋᒧᐃᐧᐣ..”
ᐊᒋᑯᐃᐧᓴᑲᐦᐃᑲᓂᐃᐧᓂ ᐯᓫᐃᑲᐣ ᒪᐣᕑᐅ ᒪᐊᐧᐨ ᐅᑭ ᒥᓀᐧᐣᑕᐣ ᒥᐢᑕᐦᐃ ᑫᑯᓇᐣ ᐁᑭ ᐅᐣᒋ ᑭᑫᐣᑕᑭᐣ ᐃᒪ ᒪᐊᐧᒋᐦᐃᑎᐃᐧᓂᐠ, ᒉᓯᑲ ᐁᑐᐧᐊᐟᐢ ᑫᐃᐧᐣ ᑲᑭ ᑭᑭᓄᐦᐊᒪᑫᐨ.
“ᐅᐁᐧ ᒪᐊᐧᒋᐦᐃᑎᐃᐧᐣ ᑲᑭᔭᔭᐣᐠ ᐣᑭ ᒪᒪᐃᐧᓇᒥᓇᐣ ᓂᑎᓀᐣᑕᒧᐃᐧᓂᓇᐣ ᒥᓇ ᐱᑯ ᑫᑯᓇᐣ ᐃᒪ ᓂᑕᔑᑫᐃᐧᓂᓇᐣ ᑫᐊᐸᒋᑐᔭᐠ ᑫᑭᐁᐧᐃᑐᔭᐣᐠ.” ᑭᐃᑭᑐ ᐊᐁᐧ ᓂᐢᑕᑦ ᑲᑭ ᐊᐣᑐᑕᐠ ᐃᒪ ᑭᒋ ᒪᐊᐧᒋᐦᐃᑎᐃᐧᓂᐠ. “ᒪᐊᐧᐨ ᑭᒥᓀᐧᐣᑕᑲᐧᐣ ᑫᑯᓇᐣ ᐁᑭ ᓄᐣᒋᑲᑌᑭᐣ — ᒥᐢᑕᐦᐃ ᑫᑯᓇᐣ ᐣᑭ ᐅᐣᒋ ᑭᑫᐣᑕᓇᐣ ᐃᒪ ᐅᐣᒋ ᑲᓇᒋ ᑭᑭᓄᐦᐊᒪᑫᐃᐧᓇᐣ ᒥᓇ ᑲᔦ ᐃᒪ ᒪᐊᐧᒋᐦᐃᑎᐃᐧᓂᐠ ᑲᑭ ᑭᑭᓄᐦᐊᒪᑲᓂᐊᐧᐠ.”
ᐊᓂᔑᓇᐯ ᐊᐢᑭ ᑭᒋ ᐅᑭᒪᑲᓀᐢ ᓫᐁᐢ ᓫᐅᑎᐟ ᐃᑭᑐ ᐅᐁᐧ ᑕᓯᐊᐦᑭ ᑲᐸᑭᑎᓂᑲᑌᐠ ᒪᐊᐧᒋᐦᐃᑎᐃᐧᐣ ᐅᐢᑲᑎᓴᐠ ᐅᒪ ᒥᓯᐁᐧ ᐊᓂᔑᓇᐯ ᐊᐢᑭ ᐅᐣᒋ̇ᓯᓭᓂ ᒋᐊᓂᒧᑕᒧᐧᐊᐨ ᐅᑎᓯᓭᐃᐧᓂᐊᐧ ᑲᓇᓇᑭᐢᑲᒧᐊᐧᐨ ᐅᐱᒪᑎᓯᐃᐧᓂᐊᐧ.
“ᐅᒪ ᐱᔕᐊᐧᐠ ᐁᑲᐧ ᑕᔥ ᐅᑐᐣᒋ ᑭᑫᐣᑕᓇᐊᐧ ᐁᑲ ᐃᐧᓀᐦᑕᐊᐧ ᒋᐱᒥᐃᐧᑐᐊᐧᐨ ᐊᐃᐧᔭᐣ ᐁᐃᐧᒋᐃᐧᑯᐊᐧᐨ— ᐊᒥᐱᑯ ᒥᓯᐁᐧ ᐁᐃᓯᓭᑭᐣ ᑕᔑᑫᐃᐧᓇᐣ,” ᓫᐅᑎᐟ ᐃᑭᑐ. “ᐊᒥᑕᔥ ᐃᒪ ᐁᐅᐣᒋ ᒪᒪᐃᐧᓂᑫᒪᑲᐠ ᒪᐊᐧᐨ ᑕᔥ ᒥᓄᓭ ᐅᐁᐧ ᑲᑐᒋᑲᑌᐠ... ᑫᐃᐧᓇᐊᐧ ᐊᐦᐸᐣ ᐃᐧᒋᐦᐃᐁᐧᐊᐧᐠ ᑲᐅᓇᒋᑲᑌᓂᐠ ᒪᐊᐧᒋᐦᐃᑎᐃᐧᐣ, ᐁᐅᓇᒋᑫᐊᐧᐨ ᒥᓇ ᐁᐅᓂᐣᑕᒧᐊᐧᐨ ᑫᑯᓀᓇᐣ ᑫᐊᓂᒧᒋᑲᑌᓂᐠ.”
ᐊᐊᐧᔑᒣ 100 ᐅᐢᑲᑎᓴᐠ 12-29 ᑲᑕᓯᐱᐳᓀᐊᐧᐨ ᒥᓯᐁᐧ ᐊᓂᔑᓇᐯ ᐊᐢᑭ ᑲᐃᔑ ᑎᐯᐣᒋᑫᐨ ᑭᐱᔕᐊᐧᐠ ᐅᒪ ᓂᓴᐧᓯ ᑲᓇᒋ ᑭᑭᓄᐦᐊᒪᑫᐃᐧᓇᐣ ᒪᐊᐧᒋᐦᐃᑎᐃᐧᓂᐠ, ᑲᑕᑲᐧᑭᓯᐨ ᐱᓯᑦ 12-14 ᑲᐃᓇᐣᑭᓯᐨ ᐃᒪ ᐯᔑᐠ ᓂᐯᐃᐧᑲᒥᑯᐠ ᑲᑭ ᑕᔑ ᒪᐊᐧᒋᐦᐃᑎᓇᓂᐊᐧᐠ ᑕᐣᑐᕑ ᐯ ᐊᐁᐧ ᑲᑭ ᐸᑭᓇᐠ ᐊᒥᒋᑫᐃᐧᓂᐠ ᐊᓂᔑᓇᐯ ᐊᐢᑭ ᑭᒋᔭᐦᐊ ᐸᐧᑊ ᓴᑕᓇᐣᐟ ᐁᑲᐧ ᑕᔥ ᒥᓇ ᑲᔦ ᑲᑭ ᐸᑭᑎᓇᐠ ᒪᐊᐧᒋᐦᐃᑎᐃᐧᓂ ᑭᒋ ᐅᑭᒪᑲᐣ ᐢᑕᐣ ᐯᔭᑎ, ᑭᒋ ᐅᑭᒪᑲᓀᐢ ᑌᕑᐃ ᐊᐧᐳᐢ, ᓫᐅᑎᐟ ᒥᓇ ᑲᔦ ᑕᐣᑐᕑ ᐯ ᑲᐅᑭᒪᐃᐧᐨ ᑭᐟ ᐦᐊᐧᑊᐢ.
“ᒪᐊᐧᐨ ᑭᒥᓄᓭ,” ᐃᑭᑐ ᒉᓯᐣ ᓯᒪᐸᐧᔾ, ᐊᓂᔑᓇᐯ ᐊᐢᑭ ᐅᐢᑭ ᒪᒋᑕᐃᐧᐣ ᑲᐅᐣᒋ ᐊᓂᑭᓇᑲᐣ ᒥᓇ ᑲᔦ ᑫᐃᐧᐣ ᑲᐅᐣᒋ ᓂᑲᓂ ᑲᓇᐊᐧᐸᐣᑕᐠ ᒪᐊᐧᒋᐦᐃᑎᐃᐧᐣ. “ᑲᑭᓇ ᐊᐃᐧᔭ ᑭᒥᓀᐧᐣᑕᑦ.”
ᐊᓯᐨ ᑲᔦ ᐅᑫᐧᓂᐊᐧᐣ ᒪᐊᐧᒋᐦᐃᑎᐃᐧᓇᐣ ᑲᑭᔭᑭᐣ, ᐅᐢᑲᑎᓴᐠ ᑭᐃᔕᐊᐧᐠ ᐁᑭ ᐊᐣᑐᐃᐧ ᓇᐣᑐᑕᐊᐧᐊᐧᐨ ᐅᓂᑲᒧᐣ ᑲᑕᑲᐧᑭᓯᐨ ᐱᓯᑦ 12 ᔕᔭᐣ ᐦᐳᕑᐊᑲ, ᒐᐃᐧ ᐢᑕᔪᐢ, ᐱᓂᐠᐢ ᒥᓇ ᓂᔭᓇᐣ ᐊᓂᔑᓇᐯ ᐅᐢᑲᑎᓴᐠ 2010 ᐅᐸᑭᓇᑫᐠ, ᒥᓇ ᑲᔦ ᑲᑕᑲᐧᑭᓯᐨ ᐱᓯᑦ 13 ᑲᐃᓇᐣᑭᓯᐨ ᐁᑭ ᐊᐣᑕᐃᐧ ᒪᓯᓇᑌᓯᒋᑫᐊᐧᐨ ᐁᑲᐧ ᑕᔥ ᑲᔦ ᐯᔑᐠ ᐊᓂᔑᓇᐯ ᐃᔑᒋᑫᐃᐧᐣ ᑲᐊᓄᓇᑯᔑᐠ ᐁᑭ ᑐᒋᑲᑌᐠ.
ᐃᒪ ᒪᐊᐧᒋᐦᐃᑎᐃᐧᓂᐠ ᑲᑭ ᐊᓂᒧᒋᑲᑌᑭᐣ ᓂᑲᓂᑕᒪᑫᐃᐧᐣ ᑲᐊᐣᒋᐦᐊᑲᓄᐨ, ᒪᓯᓇᐦᐃᑭᓯᑲᓂᐠ ᑲᐅᐣᒋ ᐃᐧᐣᑕᒪᑲᓂᐊᐧᐠ ᑫᑯᓇᐣ ᐊᓫᐃᐢ ᓴᐳᕑᐃᐣ, ᑲᑭᐢᑌᓂᒥᑎᓇᓂᐊᐧᐠ ᐁᐢᑕ ᒪᑫ ᑲᑭ ᐊᓂᒧᑕᐠ, ᓂᓴᐧᓯ ᐅᒥᔓᒥᒪ ᑭᑭᓄᐦᐊᒪᑫᐃᐧᓇᐣ ᕑᐧᐊᓂ ᐊᒥᐠ
ᑭᒋ ᐱᐣᒋᐁᐧᐱᓂᑫᐃᐧᐣ, ᐊᐊᐧᔑᔕᐠ ᑲᑭ ᐃᔑ ᑲᓇᐁᐧᐣᑕᑯᓯᐊᐧᐸᐣ ᑭᐊᓂᒧᒋᑲᑌᐊᐧᐣ
ᑲᑭ ᑭᑭᓄᐦᐊᒪᑫᐨ, ᐅᑕᓇᐣᐠ ᑲᑭ ᐱᐃᓯᓭᑭᐣ ᑫᑯᓇᐣ/ᑭᑭᓄᐦᐊᒪᑫᐃᐧᓇᐣ/ᐊᓂᔑᓇᐯᐊᐧᑎᓯᐃᐧᐣ ᑲᐃᔑᓇᑲᐧᐠ ᓴᑕᓫᐊᐣᐟ ᑲᑭ ᑭᑭᓄᐦᐊᒪᑫᐨ, ᐃᑫᐧᐊᐧᐠ ᐅᒪᐢᑲᐃᐧᓯᐃᐧᓂᐊᐧ ᑕᐧᓇ ᐅᕑ, ᒥᓄᔭᐃᐧᐣ ᐱᓫᐃᐢ ᔕᑲᐯ, ᐊᓂᔑᓇᐯ ᐃᔑᒋᑫᐃᐧᓇᐣ ᑭᑭᓄᐦᐊᒪᑫᐃᐧᐣ ᑲᐣᕑᐊᐟ ᐊᔾᑌᓫ, ᒪᑌᐧᐦᐃᑫᐃᐧᐣ ᒥᓇ ᐊᓂᔑᓇᐯᐃᐧ ᓂᑲᒧᐃᐧᐣ ᔕᑲᐯ ᐅᑭᑭᓄᐦᐊᒪᑫᐃᐧᐣ, ᑲᐃᔑ ᐊᔭᐣᒋᐁᐧᐸᐠ ᒥᓇ ᑲᔦ ᑭᒋ ᑭᐁᐧᑎᓄᐠ ᑎᓂᐢ ᑯᓫᑎᐣ ᐅᑭᑭᓄᐦᐊᒪᑫᐃᐧᐣ, ᑎᐸᑯ ᑭᑭᓄᐦᐊᒪᑫᐃᐧᓇᐣ ᓫᐊᕑᐊ ᑲᐧᑦᐃᐧᐣᐟ ᒥᓇ VSP Tool ᑭᑭᓄᐦᐊᒪᑫᐃᐧᐣ ᑲᑭᑐᑕᐠ ᑲᓫᐅᑎᐣ ᑭᒋ ᑭᑭᓄᐦᐊᒪᑫᐃᐧᑲᒥᐠ.
ᒪᔭᑦ ᑲᑭ ᑲᑭᑐᐊᐧᐨ ᑕᓂᔭᐣ ᓴᑭᒋᑲᐸᐤ ᒥᓇ ᒉᓯᑲ ᔦ ᒥᓇ ᑭᒋ ᑎᐸᒋᒧᐃᐧᓇᐣ ᑭᐸᑭᑎᓂᑲᑌᐊᐧᐣ ᐃᐁᐧ ᐅᐣᒋ ᐅᓇᒋᑫᐃᐧᐣ 571 — ᔕᓇᐣ ᐅᐸᐊᐧᒧᐃᐧᐣ, ᐅᑭᒪᐃᐧᐣ ᐅᑕᔑᑕᒪᑫᐃᐧᐣ ᐊᓂᒧᒋᑫᐃᐧᐣ, ᐊᓂᔑᓇᐯ ᐊᐢᑭ ᑭᒋ ᐱᐣᒋᐁᐧᐱᓂᑫᐃᐧᐣ ᒥᓇ ᐅᑕᓇᐣᐠ ᑲᑭᐱᐃᓯᓭᐠ ᐊᐊᐧᔑᔕᐠ ᑲᑭᑕᔑ ᑲᓇᐁᐧᐣᑕᑯᓯᐊᐧᐨ.
“ᒪᐊᐧᐨ ᒥᐢᑕᐦᐃ ᓂᑭ ᐅᐣᒋ ᑭᑫᐣᑕᓇᐣ ᒪᑌᐧᐦᐃᑲᓂᐃᐧ ᑭᑭᓄᐦᐊᒪᑫᐃᐧᓇᐣ ᒥᓇ ᐊᓂᔑᓇᐯᐃᐧ ᐃᔑᒋᑫᐃᐧᓇᐣ ᒥᓇ ᑲᓇᓇᐣᑎᓂᑲᑌᐠ ᑕᐱᑕ ᑫᑯᓇᐣ ᑫᐃᔑ ᑲᓇᐊᐧᐸᐣᒋᑲᑌᑭᐣ ᒪᐊᐧᐨ ᑭᒋᓀᐣᑕᑲᐧᐣ,” ᐸᑭᑐ ᐯᐨ ᒪᐊᐧᑭᓯᐠ, ᐅᐢᑲᑎᐢ ᐊᐧᐊᐧᑲᐱᐃᐧᓂᐠ ᐁᐅᐣᒋᐨ ᐊᔕ ᑫᑲᐟ ᑲᑭᓇ ᓂᓴᐧᓯ ᑲᓇᒋ ᑭᑭᓄᐦᐊᒪᑫᐃᐧᐣ ᒪᐊᐧᒋᐦᐃᑎᐃᐧᓇᐣ ᐁᐃᔕᐨ. “ᓇᔑᓀ ᐱᑯ ᐊᐃᐧᔭᐠ ᑲᐊᐧᐸᒪᐠ — ᑕᓯᐅᐦᑭ ᐱᑯ ᐊᓂ ᐊᐣᒋᓭ. ᑲᒪᒪᑲᑌᐣᑕᐣ ᔕ, ᐃᐁᐧ ᒪᐊᐧᐨ ᑫᒋᐊᐧᐠ ᑲᐃᐧᒋᑕᐧᔭᐣ ᐊᓂᔑᓇᐯᐃᐧ ᐃᔑᒋᑫᐃᐧᓇᐣ.”
ᑲᔪᓫ ᒐᐯ, ᐅᐢᑲᑎᐢ ᐃᒪ ᑭᓄᑲᒥᐣᐠ ᐁᐅᐣᒋᐨ, ᐅᑭᒥᓀᐧᐣᑕᓇᐣ ᐊᓂᔑᓇᐯᐃᐧ ᑭᑭᓄᐦᐊᒪᑫᐃᐧᓇᐣ.
“ᐣᑕᑭ ᐃᔕᓇᐸᐣ ᓄᑯᑦ ᑲᑭᔑᑲᐠ ᐣᑭ ᐅᐣᑕᒥᓭ ᐃᒪ ᒪᑌᐧᐦᐃᑫᐃᐧᐣ ᒥᓇ ᐊᓂᔑᓇᐯᐃᐧ ᓂᑲᒧᐃᐧᓇᐣ ᑲᐃᔑ ᑭᑭᓄᐦᐊᒪᑲᓂᐊᐧᐠ,” ᒐᐯ ᐃᑭᑐ. “ᓂᓂᐦᑕ ᒪᑌᐧᐦᐃᑫ ᑲᐃᔑ ᐸᐧᓂᔑᒧᓇᓂᐊᐧᐠ ᒥᓇ ᑲᔦ ᓂᓂᑦ, ᔕᑯᐨ ᑲᐃᐧᐣ ᒋᓂᐦᑕ ᓂᑲᒧᔭᐣ. ᓂᐃᐧ ᑲᑫᐧ ᑭᑫᐣᑕᐣ.”
ᒥᓫᐃᓴ ᒥᑭᐢ, ᐅᐢᑲᑎᐢ ᐊᑎᑯᓴᑲᐦᐃᑲᓂᐠ ᐁᐅᐣᒋᐨ, ᐅᑭ ᒥᓀᐧᐣᑕᐣ ᒪᓯᓇᑭᓯᑲᓂᐠ ᑲᐅᐣᒋ ᑭᑭᓄᐦᐊᒪᑲᓂᐊᐧᐠ ᒪᐊᐧᒋᐦᐃᑎᐃᐧᐣ.
“ᒥᐢᑕᐦᐃ ᓂᑭ ᒪᓯᓇᑭᓯᑫᒥᐣ (ᑲᐃᔑ ᐅᑲᐧᑯᑌᑭᐣ),” ᒥᑭᐢ ᐃᑭᑐ.