ᓂᐯᐃᐧᓂᐠ ᑲᑕᔑᑫᐊᐧᐨ ᒪᐣᒍᔕᐠ ᐊᓂ ᑭᒋᒪᒥᑎᓂᐣᑕᒥᐦᐃᐁᐧᐊᐧᐠ ᒥᓯᐁᐧ ᑭᐁᐧᑎᓄᐠ

ᒪᐡᑭᑲᐧᑲᒪᐃᐧᓂᓂ ᐃᐧᓫᐃᔭᑦ ᓴᑊᑯ ᐅᐃᐧᔭᐸᒋᑐᐣ ᑭᔕᐸᓯᑲᓂᓂ ᐁᐃᐧᓂᑲᑌᓇᐨ ᓂᐯᐃᐧᓂᐠ ᑲᑕᔑᑫᓂᐨ ᒪᐣᒍᔕᐣ ᐃᐃᐁᐧ ᒣᑲᐧᐨ ᐅᑭᔭᓂᒧᑕᐣ ᐊᓂᔑᓂᓂᐃᐧ ᐊᐧᑲᐦᐃᑫᐃᐧ ᒪᐊᐧᒋᐦᐃᑐᐃᐧᓂᐠ ᐊᒥᐁᐧ ᐊᔕ ᒪᒪᐤ ᐯᔑᑯᔕᐱᔭᑭ ᐁᐅᒋ ᒪᐊᐧᒋᐦᐃᑐᓇᓂᐊᐧᐠ᙮
“ᐊᔕᐱᐣ ᐁᑭᑫᐣᑕᒪᐣ ᐅᐅᐁᐧ ᑭᔕᐸᓯᑲᐣ ᐁᐃᓇᐸᑕᐠ ᐊᒥᐅᐁᐧ ᑲᐃᐧᔭᐸᒋᑐᔭᐠ,” ᐃᑭᑐ ᑲᓂᑲᓂᐡᑲᐠ ᐃᐃᒪ ᒪᐡᑭᑲᐧᑲᒪᐠ᙮ “ᓂᒣᑎᓂᑫᐃᐧᓂᓂᓇᐣ ᒥᐡᑕᐦᐃ ᑕᔭᒍᓭ ᑕᐱᓂᑲ ᓂᓇᐊᐧᐨ ᓂᑲᑎᐯᓂᑕᒥᐣ ᐁᑲᐧ ᒥᓇ ᓂᓇᐊᐧᐨ ᐱᑯ ᓂᑲᑐᑕᒪᓯᒥᐣ᙮ ᑲᐧᓂᐣ ᑕᑲᐨ ᐸᑲᐣ ᐊᐃᐧᔭ ᓂᑲᓇᑐᒪᓯᒥᐣ ᒋᐱᑐᒋᑫᑕᒪᑯᔭᐠ᙮”
ᓴᑊᑯ ᐃᑭᑐ ᐊᔕ ᓂᐦᓯᐣ ᐊᐧᑲᐦᐃᑲᓇᐣ ᐁᑲᐧ ᒥᓇ ᐃᐃᒪ ᑲᐯᔑᐃᐧᑲᒥᑯᐠ ᒥᑲᐊᐧᑲᓄᐊᐧᐠ ᐅᑫᐧᓂᐊᐧᐠ ᓂᐯᐃᐧᓂᐠ ᑲᑕᔑᑫᐊᐧᐨ ᒪᐣᒍᔕᐠ᙮
“ᓄᑭᒣᑫ ᐱᑯ ᑲᑭᑭᐣᑕᒪᐠ ᐁᐊᔭᐊᐧᐨ ᐃᐃᒪ ᑲᐯᔑᐃᐧᑲᒥᑯᐠ,” ᓴᑊᑯ ᐃᑭᑐ᙮ “ᓂᑭᓇᑐᒪᒥᐣ ᒪᐣᒍᔕᐣ ᑲᓄᒋᔭᐊᐧᐨ ᐁᑲᐧ ᒥᓇ ᐱᑯ ᑲᑭᓇ ᑫᑯᓇᐣ ᑭᓴᑭᒋᒋᑲᑌᐊᐧᓄᐣ᙮”
ᐁᓫᐟ ᑲᓇᑕ ᐊᓄᑭᓇᑲᐣ ᐁᒥ ᒪᐧᐣᐟᑲᐧᑦᒧᕑᐃ ᑭᐃᑭᑐ ᐃᐃᐁᐧ ᒣᑲᐧᐨ ᓂᐃᐧᔕᑊ ᑲᑕᑲᐧᑭᓯᓂᐨ ᐱᓯᒧᐣ ᐁᑭᑎᐸᒋᒪᐨ ᐅᑫᐧᓂᐊᐧᐣ ᓂᐯᐃᐧᓂᐠ ᑲᑕᔑᑫᓂᐨ ᒪᐣᒍᔕᐣ ᒥᓇ ᐱᑯ ᐁᑭᐃᐧᑕᐠ ᐊᔕ ᐯᔑᐠ ᐊᓂᔑᓇᐯᐃᐧ ᐃᐡᑯᓂᑲᐣ ᐁᑭᔭᑕᐁᐧᐨ ᑭᔕᐸᓯᑲᓂᓂ ᐁᐃᐧᓂᑲᑌᓇᐊᐧᐨ ᐅᑫᐧᓂᐊᐧᐣ ᒪᐣᒍᔕᐣ᙮
“ᐁᑭᓇᐊᐧᐸᑕᒥᐊᐧᐨ ᒥᑎᓂᑫᐃᐧᓂᓂ ᐊᐦᐃᓂ ᐅᑭᐊᐸᒋᑐᓇᐊᐧ ᑲᐃᓇᑭᔑᓂᐨ ᐅᑫᐧᓂᐊᐧᐣ ᒪᔭᑦ ᑭᐃᓇᓄᑭᓂᐨ ᒥᓇ ᐱᑯ ᑲᐃᓇᑭᑌᓂᐠ ᑭᔕᐸᓯᑲᓂᓂ᙮ ᐅᑭᒥᑲᓇᐊᐧ ᓂᔕᐧ ᐁᐱᔕᐨ ᐊᒥᐱᑯ ᒪᔭᑦ ᒥᓴᐊᐧᐨ ᑫᑲᐟ ᑫᒣᑎᓂᑫᐊᐧᐸᐣ ᐊᑕᐁᐧᐊᐧᐨ ᐅᐅᐁᐧᓂ ᑭᔕᐸᓯᑲᓂᓂ,” ᐃᑭᑐ ᒪᐧᐣᐟᑲᐧᑦᒧᕑᐃ᙮
ᒪᐧᐣᐟᑲᑦᒧᕑᐃ ᐃᑭᑐ ᐅᐅᐁᐧ ᑭᔕᐸᓯᑲᐣ ᐊᐸᑕᐣ ᐁᑭᔕᐸᓯᑲᑲᓂᐊᐧᐠ ᐱᒋᐊᐧᑲᐦᐃᑲᓂᐠ ᓇᐣᑕ ᐱᑯ 50 ᐊᐱᒋᑭᔕᐸᓯᑲᓂᐊᐧᐣ ᑕᑕᓱ ᐁᐃᓇᓀᐊᐧᑲᓭ ᐃᓂᑯᐠ ᐊᐱᐣ ᑲᓂᑲᑌᓇᑲᓄᐊᐧᐨ ᐅᑫᐧᓂᐊᐧᐠ ᓂᐯᐃᐧᓂᐠ ᑲᑕᔑᑫᐊᐧᐨ ᒪᐣᒍᔕᐠ ᒥᓇ ᐱᑯ ᐅᑐᐊᐧᐤᒥᐊᐧᐣ᙮
“ᑲᑭᓇ ᐅᔕ ᑫᑯᐣ ᑲᓴᑭᒋᑐᐣ ᐃᐃᒪ ᑲᐃᔑ ᒥᑲᐊᐧᑲᓄᐊᐧᐨ ᓇᐣᑕ ᐱᑯ ᑲᔭ ᐃᐃᒪ ᒥᓯᐁᐧ ᑭᑲᐯᔑᐃᐧᓂᐠ ᐁᑲᐧ ᒥᓇ ᓇᐣᑕ ᐊᑲᐧᒋᐠ ᐊᒋᑲᑌᐊᐧᓄᐣ ᐊᐦᐃᐣ ᐅᑕ ᑲᔭ ᑲᐊᐧᑫᐃᐧ ᓂᑭᑌᑭᐣ,” ᐃᑭᑐ ᒪᐧᐣᐟᑲᐧᑦᒧᕑᐃ᙮ “ᐅᑲᓇᐸᐱᑫᓇᓇᐊᐧ ᐁᑲᐧ ᐁᐃᓇᓀᐃᐧ ᓇᐣᑕ ᒥᑕᓴᐧᑲᓭ ᒥᓇ 50 ᒋᔭᐱᒋᑭᔕᐸᑌᐠ ᐊᐱ ᑲᑫᐧ ᓂᑲᑌᓇᑲᓄᐊᐧᐨ ᒪᐣᒍᔕᐠ ᔕᑯᐨ ᐁᐡᑲᑦ ᐊᓂᒪᐣ ᐅᓴᑦ ᐅᑕ ᐱᑯ ᑲᑭᔕᐸᑌᐠ ᐁᐅᒋ ᓴᑭᑕᐸᑌᐠ ᐸᐸᐳᓂᐠ᙮”
ᒪᐧᐣᐟᑲᐧᑦᒧᕑᐃ ᐃᑭᑐ ᒪᐊᐧᐨ ᐁᔭᓂᒪᐠ ᐊᐃᐧᔭᐠ ᒋᓴᑲᑲᑐᐊᐧᐨ ᐅᑕᔭᓂᐊᐧᐣ ᒥᑲᐧᐨ ᑲᑲᑫᐧᓂᑲᑌᓇᑲᓄᐊᐧᐨ ᐅᑫᐧᓂᐊᐧᐠ ᓂᐯᐃᐧᓂᐠ ᑲᑕᔑᑫᐊᐧᐨ ᒪᐣᒍᔕᐠ᙮
“ᐁᓇᑐᑕᒥᐊᐧᐨ ᐊᐧᐃᐧᔭᐠ ᐅᔕ ᒪᐊᐧᐨ ᐃᐧᒋᐦᐃᐁᐧᓭ,” ᒪᐧᐣᐟᑲᐧᑦᒧᕑᐃ ᐃᑭᑐ᙮ “ᒪᐊᐧᐨ ᐊᓂᒥᓭ ᑭᐡᐱᐣ ᐊᐧᐃᐧᔭ ᐁᑲ ᑲᓇᑕᐁᐧᐣᑕᐠ ᐅᑕᐸᒋᒋᑲᓇᐣ ᒋᐁᐧᐱᓂᑲᑌᓂᑭᐣ ᐅᓴᑦ ᐅᑕ ᐅᑫᐧᓂᐊᐧᐠ ᒪᐣᒍᔕᐠ ᑲᒥᐡᑌᐢᑲᐊᐧᐨ᙮
ᒪᐊᐧᐨ ᐊᓂᒪᐣ ᒋᑭᓂᑲᑌᓇᑲᓄᐊᐧᐨ ᐁᑲᐧ ᐯᔑᑯᑭᔑᑲ ᓇᐣᑕ ᓂᔓᑭᔑᑲ ᑲᓇᑲᑕᐣ ᑭᐊᐧᑲᐦᐃᑲᐣ ᒥᑲᐧᐨ ᑲᐸᒥᒋᑲᑌᐠ᙮
“ᑲᔭᑯᑌᑭᐣ ᐁᑲᐧ ᒥᓇ ᐃᐡᑯᑌᐃᐧᒐᑭᐢᒋᑲᓇᐣ ᑭᐸᐦᐃᑲᓇᐣ ᑕᒪᓂᐱᒋᑲᑌᐊᐧᓄᐣ ᐊᓂᐣ ᓴᐱᑯ ᑭᐃᔑᒥᓄᓭᐠ ᒋᓂᑲᑌᓇᑲᓄᐊᐧᐨ ᐅᑫᐧᓂᐊᐧᐠ ᒪᐣᒍᔕᐠ,” ᐃᑭᑐ ᒪᐧᐣᐟᑲᐧᑦᒧᕑᐃ᙮ “ᔕᑯᐨ ᐊᐃᐧᔭᐠ ᓂᑎᓇᐠ ᒋᐃᐧᒋᐊᐧᐊᐧᐨ ᐃᑫᐧᓂᐊᐧᐣ ᑲᐅᒪᓯᓇᐦᐃᑲᓂᓯᓂᐨ ᑭᐡᐱᐣ ᐱᒋᐳᐃᐧ ᒪᑯᒋᓂᑲᓂᓂ ᑲᐃᐧᐊᐸᑕᓂᓂᐠ ᐯᑭᐡ ᑲᔭ ᒍᒋᑭᑭᓄᐊᒪᐊᐧᑲᓄᐊᐧᐨ ᑫᑐᑕᒥᐊᐧᐨ ᑫᐃᐧᓇᐊᐧ ᐊᐸᒋᑐᐊᐧᐨ᙮ ᔕᑯᐨ ᒪᐊᐧᐨ ᑲᑭᒋᑕᑲᔭᐠ ᒥᓄᓭ ᑲᓂᑲᑌᓇᑲᓄᐊᐧᐨ
ᐅᑫᐧᓂᐊᐧᐠ ᒪᐣᒍᔕᐠ ᓇᐣᑕ ᐱᑯ ᐊᐊᐧᔑᒣ ᓂᓱᒥᑕᓇ ᒥᔑᓄᑭᔑᑲ ᒋᔭᐱᒋᑕᑲᔭᓂᐠ᙮
ᐸᐧᐟ ᐃᐧᓫᐃᔭᑦ ᐃᐡᑯᓂᑲᓂᐠ ᑲᐅᒋᐨ ᐯᐳᓫᐃ ᐸᓇᐣ ᐃᑭᑐ ᓄᑯᑦ ᒣᑫ ᐱᑯ ᐅᓂᑭᐦᐃᑯᐣ ᐁᑭᐃᐡᑲᐧ ᐊᐧᐊᐧᑕᐦᐃᐊᐧᑲᐦᐃᑲᓀᓂᐨ ᐁᐃᐧᓂᑲᑌᓇᐊᐧᐨ ᐅᑫᐧᓂᐊᐧᐣ ᓂᐯᐃᐧᓂᐠ ᑲᑕᔑᑫᓂᐨ ᒪᐣᒍᔕᐣ᙮ “ᒥᓯᐁᐧ ᔕᐱᑯ ᑭᓴᑲᑭᓂᑲᑌᓂ ᒥᓇ ᑭᐊᐧᐊᐧᑕᐦᐃᓂᑲᑌᓂ ᐅᐊᐧᑲᐦᐃᑲᓂᐊᐧ,” ᐸᓇᐣ ᐃᑭᑐ᙮ “ᑫᑲᐟ ᐯᔑᑯᐱᓯᑦ ᑭᑲᐯᔑᐊᐧᐠ ᑲᐯᔑᐃᐧᑲᒥᑯᐠ᙮”
ᐁᓫᐟ ᑲᓇᑕ ᐅᑎᐸᒋᒪᐣ ᓂᐯᐃᐧᓂᐠ ᑲᑕᔑᑫᓂᐨ ᒪᐣᒍᔕᐣ ᐃᐃᒪ ᒪᒪᑕᐃᐧ ᐱᐊᐧᐱᑯᐠ www.hc-sc.gc.ca/cps-spc/pubs/pest/_pnotes/bedbugs-punaises-lits/index-en...᙮
ᐃᑭᑐᒪᑲᐣ ᐊᔕ ᒥᓇ ᐁᓂᒥᔑᓂᐊᐧᐨ ᐅᑫᐧᓂᐊᐧᐠ ᓂᐯᐃᐧᓂᐠ ᑲᑕᔑᑫᐊᐧᐨ ᒪᐣᒍᔕᐠ ᐁᑲᐧ ᒥᓯᐁᐧ ᐊᔭᐊᐧᐠ ᐊᐦᐃᐠ ᑲᔭ ᑲᐯᔑᐃᐧᑲᒥᑯᐠ ᒥᓇ ᐱᑯ ᓇᓇᑐᐠ ᑲᐅᒋᐸᐸᒥᔭᓂᐊᐧᐠ᙮ ᐁᑲᐧ ᒥᓇ ᐃᑭᑐᒪᑲᐣ ᒪᐊᐧᐨ ᐁᒥᓄᓭᐠ ᐃᐧᐸᐨ ᑲᑭᑫᐣᒪᑲᓄᐊᐧᐨ ᑲᒪᐧᔦ ᐅᓴᑦ ᒥᔑᓂᐊᐧᐨ ᐅᓴᑦ ᐅᑕᐱᑯ ᐁᔭᓂᒪᐠ ᒋᑭᓂᑲᑌᓇᑲᓄᐊᐧᐨ᙮ ᐱᑯᔭᐣᑎ ᐸᐸᒥᔭᐊᐧᐠ ᐅᑫᐧᓂᐊᐧᐠ ᓂᐯᐃᐧᓂᐠ ᑲᑕᔑᑫᐊᐧᐨ ᒪᐣᒍᔕᐠ ᑭᔭᑦ ᑲᔭ ᑯᑕᑭᔭᐣ ᓂᐯᐃᐧᑲᒥᑯᐣ ᑕᑭᔕᐊᐧᐠ ᐊᒥᐁᐧᐱᑯ ᐁᐃᓯᓭᐠ ᒋᐸᒥᒋᑲᑌᑭᐣ ᐅᑫᐧᓂᐊᐧᐣ᙮ ᐁᑲᐧ ᑲᔭ ᐁᑲ ᐅᓴᑦ ᒋᐸᐱᑲᐧᒋᑲᓂᐊᐧᐠ ᐱᑎᑲᒥᐠ ᐁᑲ ᑕᐱᑯ ᐃᐃᒪ ᒋᐃᔑᑲᓯᐊᐧᐨ ᐅᑫᐧᓂᐊᐧᐠ ᒪᐣᒍᔕᐠ᙮