ᐊᓂᔑᓇᐯ ᐊᐢᑭ ᐅᑕᓂᐁᐧᐣᑕᓇᐊᐧ ᔑᒪᑲᓂᔑᐃᐧ ᔓᓂᔭᐃᐧ ᓇᑯᑕᒪᐃᐧᐣ

ᐊᓂᔑᓇᐯ ᐊᐢᑭ ᑲᐧᓂᐣ ᒋᐃᐧᓇᑯᑕᐠ ᐃᐃᐁᐧ ᑲᐃᓇᑌᓂᐠ ᔓᓂᔭᐃᐧ ᓇᑯᑕᒪᑫᐃᐧᐣ ᑫᑭᐅᒋᐱᒧᑐᐊᐧᐸᐣ ᐊᓂᔑᓇᐯ ᐊᐢᑭ ᔑᒪᑲᓂᔑᐃᐧ ᐱᒧᒋᑫᐃᐧᐣ ᐅᓴᑦ ᐅᑕᐱᑯ ᐊᐊᐧᔑᒣ ᒍᒋᐊᓂᒥᓭᐊᐧᐨ ᐃᐡᑯᓂᑲᓂᐃᐧᓂᐊᐧᐠ᙮
“ᐊᔕ ᒥᔑᓂᔭᑭ ᓇᐊᐧᐨ ᐅᒋᓄᑕᐸᑭᑎᓇᑲᓄ ᔓᓂᔭᐣ ᐅᐅᐁᐧ ᑭᔑᒪᑲᓂᔑᐃᐧ ᐱᒧᒋᑫᐃᐧᓂᓇᐣ ᐅᒋ ᒥᓇ ᐱᑯ ᐁᐅᒋᐊᓂᒥᓭᑭᐣ ᑭᑕᓇᐳᐃᐧᓇᓇᐣ ᐁᑲᐧ ᒥᓇ ᐊᐊᐧᔑᒣ ᐁᑲ ᑲᐧᔭᐠ ᑲᐅᓇᑌᐠ ᐅᐅᐁᐧ ᐊᓂᔑᓇᐯ ᐊᐢᑭ ᔑᒪᑲᓂᔑᐃᐧ ᐱᒧᒋᑫᐃᐧᐣ,” ᐃᑭᑐ ᑭᒋᐅᑭᒪᑲᓀᐡ ᐊᓫᐱᐣ ᐱᑎᓫᐊ ᐅᐅᐁᐧᓂ ᔑᒪᑲᓂᔑᐃᐧ ᐱᒧᒋᑫᐃᐧᓂᓂ ᑲᐅᒋᑲᓇᐊᐧᐸᑕᐠ ᐃᐃᒪ ᐊᓂᔑᓇᐯ ᐊᐢᑭ ᐱᒧᒋᑫᐃᐧᑲᒥᑯᐠ᙮
ᐅᑭᓇᑲᐁᐧᔑᑐᐣ ᐅᐅᐁᐧᓂ ᐅᑭᒪᐃᐧᐣ ᑲᑭᐃᐧᑕᐠ ᓂᐃᐧᐣ ᑲᐃᓇᑭᓯᓂᐨ ᒥᑭᓯᐱᓯᒧᐣ ᐁᑭᓇᑯᑕᐠ ᐁᓇᑭᐸᑭᑎᓇᐨ ᓂᔭᓄᔭᑭ ᔓᓂᔭᓇᐣ ᐅᑫᐧᓂᐊᐧᐠ ᐊᓂᔑᓂᐊᐧᐠ ᒥᓇ ᐁᓂᐃᐧᐟ ᔑᒪᑲᓂᔑᐃᐧ ᐱᒧᒋᑫᐃᐧᓇᐣ ᔕᑯᐨ ᐱᑎᓫᐊ ᐃᑭᑐ ᑲᐧᓂᐣ ᐊᓂᔑᓇᐯ ᐊᐢᑭ ᐊᐊᐧᔑᒣ ᐅᐅᒪ ᐅᑲᑭᐅᒋᐱᒧᑐᓯᐣ ᐅᔑᒪᑲᓂᔑᐃᐧ ᐱᒧᒋᑫᐃᐧᐣ ᐅᐅᐁᐧ ᐅᑕ ᐅᓴᑦ ᐯᔑᑲᐧᐣ ᑲᐃᓇᑌᐠ ᓇᑯᑕᒪᐃᐧᐣ᙮
“ᑲᐧᓂᐣ ᐊᓂᔑᓇᐯ ᐊᐢᑭ ᐊᐊᐧᔑᒣ ᐅᑲᑭᐱᒧᑐᓯᐣ ᐅᔑᒪᑲᓂᔑᐃᐧ ᐱᒧᒋᑫᐃᐧᐣ ᐅᐅᐁᐧ ᐅᑕᐃᐧᐣ ᑲᐃᓇᑌᐠ ᓇᑯᑕᒪᐃᐧᐣ ᐁᑲᐧ ᑲᐧᓂᐣ ᐊᐊᐧᔑᒣ ᒋᐃᐧᓇᑯᑕᒪᐠ ᐊᐱ ᐃᐡᑲᐧ ᔭᑭᓯᐨ ᒥᑭᓯᐱᓯᑦ ᐅᓴᑦ ᑕᐱᑯ ᑲᓇᓄᑕᓭᐠ ᐃᐧᒋᐦᐃᐁᐧᐃᐧᐣ ᒥᓯᐁᐧ ᐊᓂᔑᓇᐯ ᑕᔑᑫᐃᐧᓇᐣ ᑲᐃᔑᑕᑲᐧᑭᐣ,” ᐱᑎᓫᐊ ᐃᑭᑐ᙮
ᐱᑎᓫᐊ ᐃᑭᑐ ᐅᐅᐁᐧ ᓂᔭᓄᔭᑭ ᑲᓇᑭᐸᑭᑎᓇᑲᓄᐨ ᔓᓂᔭᐣ ᑕᐱᐡᑯᐨ ᑭᒋᐅᑭᒪ ᐱᐠ ᑌᐢ ᑲᑭᐃᐧᑕᐠ ᐊᒥᐁᐧᐱᑯ ᐁᐃᔑᓇᑲᐧᐠ ᐊᐊᐧᔑᒣ ᒋᒪᒋᓭᒪᑲᐠ ᐅᐅᐁᐧ ᐱᒧᒋᑫᐃᐧᐣ᙮
“ᑲᐧᓂᐣ ᒥᓇ ᑫᑯᐣ ᒋᐸᔭᑌᐃᐧᒋᑲᑌᐠ ᐅᐅᐁᐧ ᐊᔓᑕᒪᑫᐃᐧᐣ ᐅᒋ ᐁᑲᐧ ᒥᓇ ᑲᐧᓂᐣ ᒋᑭᑫᐣᑕᑲᐧᐠ ᑭᐡᐱᐣ ᑫᓇᑭᐸᑭᑎᓇᑲᓄᑫᐣ ᔓᓂᔭᐣ ᐁᑲᐧ ᒥᓇ ᐱᑯ ᑭᐡᐱᐣ ᔑᒪᑲᓂᔑᐃᐧ ᐊᓄᑭᐃᐧ ᐊᒋᑫᐃᐧᐣ ᑫᐅᐡᑭᒋᑲᑌᑫᐧᐣ,” ᐃᑭᑐ ᐱᑎᓫᐊ ᒥᑲᐧᐨ ᓂᔭᓇᐣ ᒥᑭᓯᐱᓯᑦ ᑲᐃᓇᑭᓯᓂᐨ᙮ “ᐊᒣᐁᐧᐱᑯ ᐁᐃᔑᓇᒪᐠ ᐁᑲᓇᐣᑕ ᒋᐃᔑᒪᒐᒪᑲᐠ ᐅᐅᐁᐧ ᑲᑭᐅᓇᒋᑲᑌᑭᐸᐣ 1994 ᑲᔭᑭᐊᐧᐠ ᒥᓴᐊᐧᐨ ᐊᓇ ᓇᑭᐸᑭᑎᓇᑲᓄᐨ ᔓᓂᔭᐣ᙮”
ᐱᑎᓫᐊ ᑭᐃᑭᑐ ᐁᑭᑲᑫᐧᑌᑯᐸᓀᐣ ᐅᐅᐁᐧ ᔑᒪᑲᓂᔑᐃᐧ ᐱᒧᒋᑫᐃᐧᐣ ᒋᑭᐱᑎᑫᓭᑭᐸᐣ ᐅᑭᒪᐃᐧᑲᒥᑯᐠ ᑕᐱᐡᑯᐨ ᑲᓇᑕ ᐅᑭᒪᐃᐧᐣ ᒥᓇ ᐅᐣᑌᕑᐃᔪ ᐅᑭᒪᐃᐧᐣ ᐁᑲᐧ ᒥᓇ ᑕᐃᐧᓂᐠ ᐅᑭᒪᐃᐧᐣ ᑲᐃᔑᐃᐧᒋᐦᐊᑲᓄᐊᐧᐨ ᐅᔑᒪᑲᓂᔑᐃᐧ ᐱᒧᒋᑫᐃᐧᓂᐊᐧ ᐅᒋ᙮
“ᓇᑕᐁᐧᓂᑕᑲᐧᐣ ᐊᓂᔑᓇᐯ ᐊᐢᑭ ᔑᒪᑲᓂᔑᐃᐧ ᐱᒧᒋᑫᐃᐧᐣ ᑲᐧᔭᐠ ᒋᐱᒧᒋᑲᑌᐠ ᐃᐃᒪ ᑭᑕᔑᑫᐃᐧᓂᓂᓇᐣ ᒥᓇ ᐱᑯ ᑲᐧᔭᐠ ᒋᐃᐧᒋᐦᐊᑲᓄᐊᐧᐨ ᐊᓂᔑᓂᓂᐊᐧᐠ ᐁᑲᐧ ᒥᓇ ᑲᐧᔭᐠ ᑭᔑᒪᑲᓂᔑᒥᓇᓇᐠ ᒋᐸᔦᑌ ᑭᑭᓇᐧᒋᔭᑲᓄᐊᐧᐨ ᐃᐃᒪ ᐅᓇᒋᐃᐧᓂᐠ,” ᐃᑭᑐ ᐱᑎᓫᐊ᙮ “ᓇᑊᐢ ᐅᔕ ᓇᑕᐁᐧᓂᑕᑲᐧᐣ ᔑᒪᑲᓂᔑᐃᐧ ᐅᓇᑯᓂᑫᐃᐧᓂᐠ ᒋᐅᒋᐊᓄᑭᒪᑲᐠ ᑕᐱᐡᑯᐨ ᑯᑕᑭᔭᐣ ᔑᒪᑲᓂᔑᐃᐧ ᐱᒧᒋᑫᐃᐧᓇᐣ ᑲᐅᒋᐊᓄᑭᒪᑲᑭᐣ᙮ ᐊᒥᐁᐧᔦᑕᐱᑯ ᑲᐧᔭᐠ ᑫᑭᐅᒋᐱᒧᒋᑲᑌᐠ ᑭᐡᐱᐣ ᑲᐧᔭᐠ ᐸᑭᑎᓇᑲᓄᐨ ᔓᓂᔭᐣ ᐁᑲᐧ ᒥᓇ ᑲᓇᑕ ᐁᑲᐧ ᐅᐣᑌᕑᐃᔪ ᒍᒋᑭᑫᐣᑕᒥᐊᐧᐨ ᑲᐧᔭᐠ ᒋᐃᐧᒋᑐᐊᐧᐨ ᐅᐅᐁᐧ ᐱᒧᒋᑫᐃᐧᐣ᙮ ᑲᐧᓂᐣ ᐃᐃᒪ ᐅᐅᐁᐧ ᒣᑲᐧᐨ ᒋᐊᔭᔭᐠ᙮”
ᐱᑎᓫᐊ ᐃᑭᑐ ᐅᑭᒪᑲᓇᐠ ᒥᓇ ᐃᐡᑯᓂᑲᓇᐣ ᐅᐃᐧᑕᓇᐊᐧ ᐅᐅᐁᐧ ᐊᓂᔑᓇᐯ ᐊᐢᑭ ᔑᒪᑲᓂᔑᐃᐧ ᐱᒧᒋᑫᐃᐧᐣ ᒥᐡᑕᐦᐃ ᐁᓇᓄᑕᓭᐠ ᐃᐧᒋᐦᐃᐁᐧᐃᐧᐣ ᑲᐅᒋᔭᓂᒪᐠ ᑲᐧᔭᐠ ᒋᑭᐱᒧᒋᑲᑌᐠ᙮
“ᐅᒋᔭᓂᒥᓭ ᑭᐱᒪᑎᓱᓂᓇᐣ ᐊᐦᐃ ᑕᐱᑯ ᑲᓇᓄᑕᓭᑭᐣ ᑫᑯᓇᐣ ᐃᐃᒪ ᐃᐡᑯᓂᑲᓂᐠ ᒥᓇ ᐱᑯ ᑭᔑᒪᑲᓂᔑᒥᓇᓇᐠ ᑲᔭᓄᑭᑕᒪᑯᔭᑲᐧ,” ᐃᑭᑐ ᐱᑎᓫᐊ᙮ “ᐊᔕ ᑭᑫᐣᑕᑲᐧᐣ ᓄᑕᓭᐃᐧᓇᐣ ᐁᓇᑕᐁᐧᓂᑕᑲᐧᑭᐣ ᑕᐱᐡᑯᐨ ᐃᐃᒪ ᐅᒋᑭᑫᐣᑕᑲᐧᐣ ᑭᒋᒪᑎᓭᐃᐧᓇᐣ ᑲᐃᓯᓭᑭᐣ ᐳᑕᓇᐠ ᑕᐱᐡᑯᐨ ᓂᔑᐣ ᐅᐡᑲᑎᓴᐠ ᑲᑭᒐᒋᓯᐊᐧᐸᐣ ᐃᐃᒪ ᑲᔑᒋᐊᐧᐣ 2006 ᑲᔭᑭᐊᐧᐠ ᐁᑲᐧ ᒥᓇ ᓄᑭᒣᑫ ᐅᐡᑭᓂᑭᑫᐧ ᑲᑭᐃᐡᑲᐧᐱᒪᑎᓯᐸᐣ ᐃᐃᒪ ᐊᓴᐸᓇᑲᐠ ᒣᑲᐧᐨ ᐯᔑᐠ ᑲᐃᓇᑭᓯᐨ ᑲᑕᑲᐧᑭᓯᐨ ᐱᓯᑦ᙮”
ᐱᑎᓫᐊ ᐅᑭᒪᓯᓇᐊᐧᒪᐧᐣ ᐅᑭᒪᐣ ᑌᐢ ᑲᐃᔑᓂᑲᓯᓂᐨ ᒥᑲᐧᐨ ᓂᔭᓇᐣ ᒥᑭᓯᐱᓯᑦ ᑲᐃᓇᑭᓯᐨ ᐁᑭᐃᐧᑕᒥᐊᐧᐨ ᐅᐅᐁᐧ ᑲᓇᑭᐸᑭᑎᓇᐨ ᔓᓂᔭᓇᐣ ᐁᑲ ᐊᐊᐧᔑᒣ ᒋᑭᐊᓄᑭᒪᑲᐠ ᐅᓴᑦ ᐅᑕᐱᑯ ᐸᑭ ᔓᓂᔭᐣ ᑲᒥᑲᐧᓂᐊᐧᐠ ᐁᑲᐧ ᑲᐧᓂᐣ ᐊᓂᔑᓇᐯ ᐊᐢᑭ ᑕᒪᓯᓇᐃᐧᑎᓯᐣ ᐅᐅᐁᐧ ᓂᓴᐧᔦᐠ ᑲᐅᒋᒪᑲᐠ ᓇᑯᒥᑐᐣ᙮
“ᐊᓂᔑᓇᐯ ᐊᐢᑭ ᑕᔑᑫᐃᐧᓇᐣ ᓇᐱᐨ ᐊᐊᐧᔑᒣ ᓇᓂᒋᔭᐊᐧᐠ ᐅᓴᑦ ᐅᑕᐱᑯ ᐁᑫᑌᔭᒪᑲᑭᐣ ᑫᑯᓇᐣ ᑐᑲᐣ ᒪᒋᑭᑐᓇᐣ ᒥᓇ ᐁᓄᑌᓭᐊᐧᐨ ᐊᓄᑭᓇᑲᓇᐠ ᐁᑲᐧ ᒥᓇ ᔑᒪᑲᓂᔑᐃᐧᑲᒥᑯᐣ ᐁᑫᑌᓇᑲᐧᑭᐣ,” ᐱᑎᓫᐊ ᐃᑭᑐ᙮ “ᑲᐧᓂᐣ ᐅᐅᐁᐧ ᐯᔑᑲᐧᐣ ᑕᑭᐊᐸᑕᓯᓄᐣ ᑕᐱᐡᑯᐨ ᐅᐅᐁᐧ ᓇᑊᐢ ᑲᐅᒋᐱᒧᑌᐠ᙮”
ᐊᓂᔑᓇᐯ ᐊᐢᑭ ᑭᐃᐧᑕᒧᐸᐣ ᓴᑲᓱᔕᑊ ᑲᐃᓇᑭᓯᓂᐨ ᑲᑕᑲᐧᑭᓯᓂᐨ ᐱᓯᒧᐣ ᐁᐊᐣ ᐁᑭᒪᓯᓇᐊᐧᒪᐧᐨ ᐅᓇᓇᑲᒋᒋᑫᐣ ᐅᐅᒪ ᐅᐣᑌᕑᐃᔪ ᒥᓇ ᓇᓇᑐᐠ ᐅᑭᒪᐣ ᑲᔭ ᑌᐢ ᑲᐃᔑᓂᑲᓯᓂᐨ ᐁᑭᐃᐧᑕᒥᐊᐧᐨ ᐅᓴᑦ ᐁᔭᓂᒪᐠ ᐅᐅᐁᐧ ᔑᒪᑲᓂᔑᐃᐧ ᐱᒧᒋᑫᐃᐧᐣ ᒥᓇ ᐱᑯ ᑲᐧᔭᐠ ᐊᔕ ᒋᑭᐅᓇᒋᑲᑌᑭᐸᐣ ᐅᐅᐁᐧ ᓇᑊᐢ ᔑᒪᑲᓂᔑᐃᐧ ᐱᒧᒋᑫᐃᐧᐣ᙮
ᑌᐢ ᐃᑭᑐ ᑲᓇᑕ ᐅᑭᒪᐃᐧᐣ ᐁᐃᐧᐃᐧᒋᑐᐨ ᑲᐧᔭᐠ ᒋᐃᐧᒋᐊᑲᓄᐊᐧᐨ ᐊᐧᐃᐧᔭᐠ ᐁᑲᒋᐅᒋᒪᑎᓭᐊᐧᐨ ᑭᐃᑭᑐ ᒥᑲᐧᐨ ᑲᑭᐊᔓᑕᒪᑫᐨ ᔓᓂᔭᓇᐣ᙮
“ᓄᑯᑦ ᐅᐅᐁᐧ ᐊᔓᑕᒪᑫᐃᐧᐣ ᑕᐃᐧᒋᐁᐧᒪᑲᐣ ᒋᓴᑯ ᒥᓂᑕᐧ ᔓᓂᔭᓇᐣ ᐃᑫᐧᓂᐊᐧᐠ ᐊᓂᔑᓇᐯᐠ ᒥᓇ ᐁᓂᐃᐧᐟ ᑲᐱᒧᑐᐊᐧᐨ ᐅᔑᒪᑲᓂᔑᐃᐧ ᐱᒧᒋᑫᐃᐧᓂᐊᐧ” ᑌᐢ ᐃᑭᑐ᙮ “ᐊᒥᐁᐧᐱᑯ ᐅᑭᒪᐃᐧᐣ ᑫᐃᔑᐱᒥᐃᐧᒋᑐᒋᐣ ᐊᓂᔑᓇᐯ ᒥᓇ ᐁᓂᐃᐧᐟ ᔑᒪᑲᓂᔑᐃᐧ ᐱᒧᒋᑫᐃᐧᓇᐣ᙮”
ᐊᓂᔑᓇᐯᐃᐧ ᔑᒪᑲᓂᔑᐃᐧ ᐱᒧᒋᑫᐃᐧᐣ ᑲᓂᑲᓂᐡᑲᐠ ᐸᐧᑊ ᐁᕑᒪᐣ ᑫᐃᐧᐣ ᐅᑭᐃᐧᑕᐣ ᑲᐧᔭᐠ ᒋᑭᐅᓇᒋᑲᓂᐊᐧᑭᐸᐣ ᒥᓇ ᐱᑯ ᒥᐡᑕᐦᐃ ᔓᓂᔭᐣ ᒋᑭᐸᑭᑎᓇᑲᓄᐸᐣ ᐁᑭᑫᐣᑕᐠ ᐁᑲᐃᐧᑲ ᑫᑲᐟ ᐁᓇᑭᐸᑭᑎᓇᑲᓄᐨ ᔓᓂᔭᐣ ᑕᐱᐡᑯᐨ ᐊᐱᐣ 2009 ᑲᔭᑭᐊᐧᐠ ᐃᐡᑲᐧᔭᐨ ᑲᑭᓇᑭᐸᑭᑎᓇᑲᓄᐸᐣ᙮
“ᑯᑕᑭᔭᐣ ᔑᒪᑲᓂᔑᐃᐧ ᐱᒧᒋᑫᐃᐧᓇᐣ ᑲᐧᔭᐠ ᒥᓇᑲᓄᐊᐧᐠ ᔓᓂᔭᓇᐣ ᐁᑲᐧ ᑕᓱᔭᑭ ᓇᑭᒥᓇᑲᓄᐊᐧᐠ ᑫᒋᓇᐨ ᐁᑲ ᒋᓄᑕᓭᐊᐧᐨ ᐅᒣᑎᓂᑫᐃᐧᓂᐊᐧ,” ᐃᑭᑐ ᐁᕑᒪᐣ᙮
ᑲᓇᑕ ᑭᒋᐅᑭᒪᑲᐣ ᔕᐧᐣ ᐊᐟᓫᐃᐅ ᐅᑭᓇᓇᑯᒪᐣ ᑌᐢ ᑲᑭᐊᔓᑕᒪᑫᓂᐨ ᐁᐃᐧᐸᑭᑎᓇᐊᐧᐨ ᔓᓂᔭᓇᐣ᙮
“ᐅᐅᐁᐧ ᑲᑭᐅᐡᑭ ᐸᑭᑎᓇᑲᓄᐨ ᔓᓂᔭᐣ ᐁᐧᑐᑕ ᓂᑲᐣ ᑫᐊᓂᔑᔭᐸᑎᓯᐟ ᐱᒧᒋᑫᐃᐧᓂᐠ ᐅᒋ ᒪᐊᐧᐨ ᑭᒋᓂᐣᑕᑲᐧᐣ,” ᐊᐟᓫᐃᐅ ᐃᑭᑐ᙮ “ᐊᒥᐁᐧ ᐁᑲᐧ ᒋᑲᓇᐊᐧᐸᑕᒪᐠ ᑫᒋᓇᐨ ᑲᑭᓇ ᒋᐃᐧᑕᓄᑭᒥᑎᔭᐠ ᒋᑲᑫᐧ ᒪᐡᑲᐊᐧᑐᔭᐠ ᐊᓂᔑᓇᐯ ᔑᒪᑲᓂᔑᐃᐧ ᐱᒧᒋᑫᐃᐧᐣ ᐊᐦᐃᐠ ᐅᑕ ᐃᐧᑕᓄᑭᒥᑐᐃᐧᓂᐠ ᐅᒋ᙮ ᒪᐊᐧᐨ ᑭᒋᓀᐣᑕᑲᐧᐣ ᑲᑭᓇ ᐃᐡᑯᓂᑲᓇᐣ ᑲᐧᔭᐠ ᒋᐃᐧᒋᐦᐃᑕᐧ᙮”
ᐊᓂᔑᓇᐯᐃᐧ ᔑᒪᑲᓂᔑᐃᐧ ᐱᒧᒋᑫᐃᐧᐣ ᒪᐊᐧᐨ ᑲᐧᔭᐠ ᐅᐊᐧᐃᐧᒋᑐᓇᐊᐧ ᑲᐧᔭᐠ ᒋᑲᑫᐧ ᑭᑫᓂᒪᐊᐧᐨ ᑲᔭᓂᑲᐊᐧᐊᐧᐨ ᐃᐃᒪ ᐊᓂᔑᓇᐯ ᒥᓇ ᐁᓂᐃᐧᐟ ᑕᔑᑫᐃᐧᓇᐣ ᑲᑕᑲᐧᑭᐣ᙮ ᐅᐅᐁᐧ ᐱᒧᒋᑫᐃᐧᐣ ᐊᐊᐧᔑᒣ ᐯᔑᑲᐧ ᒥᑕᓱᒥᑕᓇ ᑯᑕᐧᓱ ᒥᑕᓇ ᓂᐦᓱᔕᑊ ᑕᓯᓄᐣ ᓇᑯᑕᒪᐃᐧᓇᐣ ᐅᐅᐁᐧ 2012-2013 ᑲᐊᑭᐊᐧᐠ᙮