ᔑᐸᐧᑲᒪ ᐱᒧᒋᑫᐃᐧᓂᐠ ᑲᐅᑭᒪᐃᐧᐨ ᒪᔭᑦ ᐅᐃᐧᑭᑫᐣᑕᐣ ᑲᑭᐅᐣᒋ ᑭᐡᑭᓂᐨ ᔓᓂᔭ

ᔑᐸᐧᑲᒪ ᐅᑭᒪᑲᓇᐠ ᐅᐱᒧᒋᑫᐃᐧᓂᐊᐧ ᑲᐅᑭᒪᐃᐧᐨ ᒪᑲᓇᐟ ᑭᓂᑲᐧᓇᐡ ᐅᐃᐧᑭᑫᑕᐣ ᑫᑯᓀᐣ ᐊᐧᐁᐧ ᑲᓇᑕ ᐅᑭᒪᐃᐧᐣ ᑲᐱᒧᑕᒪᑫᐨ ᐊᓂᔑᓂᓂᐃᐧ ᑲᓇᐊᐧᐸᒋᑫᐃᐧᓇᐣ ᒥᓇ ᑭᐁᐧᑎᓄᐠ ᒪᒋᑕᐃᐧᓇᐣ ᑲᑭᐅᐣᒋ ᐃᑭᑐᐨ ᒋᑭᐡᑭᓇᐨ ᔓᓂᔭᐣ ᐃᒪ ᑲᐱᒥᐸᐸᑭᑎᓂᐨ ᐅᑭᒪᑲᓇᐠ ᐅᐱᒧᒋᑫᐃᐧᓂᐊᐧ ᑲᐅᒋ ᐊᓄᑲᑌᑭᐣ ᐃᐡᑯᓂᑲᓂ ᐊᓄᑭᑕᒪᑫᐃᐧ ᑲᓇᐊᐧᐸᒋᑫᐃᐧᓇᐣ.
“ᒥᐱᑯ ᐁᑕ ᑲᐃᑭᑐᐊᐧᐨ ᓇᐊᐧᐨ ᐊᐊᐧᔑᒣ ᒋᑭᑲᐧᑫ ᒥᓄᓭᓂᑭᐸᐣ ᑲᐃᔑ ᐱᒧᒋᑲᑌᑭᐣ ᐅᓄᐁᐧᓂᐊᐧᐣ ᐊᓄᑭᑕᒪᑫᐃᐧᓇᐣ ᐃᒪ ᐃᐡᑯᓂᑲᓂᐠ,” ᑭᐃᑭᑐ ᑭᓂᑲᐧᓇᐡ. “ᒥᓇᐦᐃᐁᐧᓂ ᑲᐃᑕᒧᐊᐧᐨ ᔓᓂᔭᐣ ᒋᓇᓇᐣᑭᐸᑭᑎᓇᐊᐧᐨ ᐃᐡᑯᓂᑲᓇᐣ ᑲᐃᔑᐊᔭᑭᐣ. ᒥᔑᐣ ᑭᔭᐱᐨ ᑫᑯᓇᐣ ᐊᔭᐊᐧᐣ ᑲᓇᑕᐁᐧᐣᑕᑲᐧᑭᐣ ᒋᑭᑲᑫᐧ ᐸᔭᑌᐃᐧᐣᒋᑲᑌᑲᐧᐸᐣ.”
ᐅᑭᒪᐃᐧᐣ ᑲᐱᒧᑕᒪᑫᐨ ᐊᓂᔑᓂᓂᐃᐧ ᑲᓇᐊᐧᐸᒋᑫᐃᐧᓇᐣ ᒥᓇ ᑭᐁᐧᑎᓄᐠ ᒪᒋᑕᐃᐧᓇᐣ ᒐᐧᐣ ᑕᐣᑲᐣ ᐅᑭᐸᑭᑎᓇᐣ ᐅᑎᐸᒋᒧᐃᐧᐣ ᐊᐧᑌᐸᑲᐃᐧᐱᓯᑦ 4 ᑲᐃᓇᑭᓱ ᐁᑭᐃᑭᑐᐨ ᑕᐃᔑᒋᑫ ᐅᑭᒪᐃᐧᐣ ᒋᐸᑲᓇᒋᑫᐨ ᑲᐃᔑᐱᒥ ᐸᐸᑭᑎᓇᐨ ᔓᓂᔭᐣ ᐃᒪ ᐅᑭᒪᑲᓇᐠ ᐅᐱᒧᒋᑫᐃᐧᓂᐊᐧ ᒥᓇ ᐃᒪ ᑲᐅᒋ ᐊᓄᑲᑌᑭᐣ ᐃᐡᑯᓂᑲᓂ ᐊᓄᑭᑕᒪᑫᐃᐧ ᑲᓇᐊᐧᐸᒋᑫᐃᐧᓇᐣ ᑲᐃᐧᐣ ᐁᑲᐧ ᐊᐱᐣ ᑲᑭᐱᔑ ᐱᒥᓂᔕᐦᐃᑲᑌᑭᐸᐣ ᑕᐃᔑᑲᓇᐊᐧᐸᒋᑲᑌᓯᐣ ᐃᐡᑯᓂᑲᓂ ᐊᓄᑭᑕᒪᑫᐃᐧ ᑲᓇᐊᐧᐸᒋᑫᐃᐧᓇᐣ, ᑫᒋᓇᐨ ᒋᐃᓯᓭᐠ ᐃᓂᐁᐧᓂᐊᐧᐣ ᐊᓄᑭᑕᒪᑫᐃᐧᓇᐣ ᒋᐅᒋ ᐃᐧᒋᐦᐃᐁᐧᒪᑲᑭᐣ ᐃᒪ ᐃᐡᑯᓂᑲᓂᐠ ᑲᐱᒥ ᐸᑭᑎᓂᑲᑌᑭᐣ ᑫᐱᒥᔭᐸᒋᒋᑲᑌᑭᐣ ᐊᓄᑭᐃᐧᓇᐣ ᒥᓇ ᐃᐧᒋᐦᐃᐁᐧᐃᐧᓇᐣ.
“ᐁᑲᐧ ᐅᓄᐁᐧᓂᐊᐧᐣ ᐸᐸᑲᐣ ᐊᓄᑭᑕᒪᑫᐃᐧᓇᐣ ᑲᓂᑲᓂ ᐱᒧᑕᒪᑫᔭᐣᐠ, ᐊᒥ ᑫᐃᔑ ᓇᑕᐁᐧᐣᑕᑲᐧᐠ ᒋᑲᑫᐧ ᒥᐡᑲᐧᑕᒋᑲᓂᐊᐧᐠ,” ᑭᐃᑭᑐ ᑭᓂᑲᐧᓇᐡ. “ᐊᐣᑎ ᑕᐡ ᑫᐅᐣᒋ ᑎᐸᐦᐃᑲᑌᑭᐣ ᐅᓄᐁᐧᓂᐊᐧᐣ ᒣᑎᓂᑫᐃᐧᓇᐣ. ᐊᒥ ᐁᑲᐧ ᐁᔑᓇᑲᐧᐠ ᐃᒪ ᐱᑯ ᐃᐡᑯᓂᑲᓂᐠ ᐃᐧᓇᐊᐧ ᒋᑲᓇᐊᐧᐸᐦᐃᑫᑕᒪᓱᐊᐧᐨ ᐅᓄᐁᐧᓂᐊᐧᐣ ᐅᑕᓄᑭᑕᒪᑯᐃᐧᓂᐊᐧ. ᑲᐃᐧᐣ ᑲᔦ ᐅᔓᓂᔭᒥᓯᐊᐧᐠ ᐃᐡᑯᓂᑲᓂᐠ ᐊᐣᑎ ᑕᐡ ᑫᑭᐅᐣᒋ ᑎᐸᐦᐊᒧᐊᐧᐨ ᐯᔑᑲᐧᐣ ᒋᐃᓯᓭᓂᑭᐣ ᐅᐃᐧᒋᐦᐃᑯᐃᐧᓂᐊᐧ ᐃᒪ ᐱᑯ ᐃᐧᓇᐊᐧ ᑎᐱᓇᐁᐧ ᒋᐅᒋ ᐱᒧᑕᒪᓱᐊᐧᐨ ᐃᐡᑯᓂᑲᓂᐠ.”
ᑭᓂᑲᐧᓇᐡ ᑭᐃᑭᑐ ᑭᐡᐱᐣ ᐃᐡᑯᓂᑲᓇᐣ ᐊᓄᓇᐊᐧᐨ ᐊᓄᑭᓇᑲᐣ ᑭᑫᐣᑕᓱᐃᐧᐣ ᑲᐊᔭᐊᐧᐨ ᒋᐊᓄᑲᑕᒪᑯᐊᐧᐨ ᐃᐡᑯᓂᑲᓂ ᐊᓄᑭᑕᒪᑫᐃᐧ ᑲᓇᐊᐧᐸᒋᑫᐃᐧᓇᐣ, ᒪᐊᐧᐨ ᐃᑯ ᒥᐢᑕᐦᐃ ᐅᑲ ᑭᒋᒣᑎᓂᑫᐦᐃᑯᓇᐊᐧᐠ.”
ᐁᑲᐧ ᑕᐣᑲᐣ ᑭᐃᑭᑐ ᐅᑭᒪᑲᓂ ᐱᒧᒋᑫᐃᐧᓇᐣ ᑲᐃᐧᐣ ᐁᑲᐧ ᐃᒪ ᑕᐅᒋ ᑲᓇᐊᐧᐸᒋᑲᑌᐊᐧᐣ ᐃᓂᐁᐧᓂᐊᐧᐣ ᒪᔭᑦ ᓂᔭᓇᐣ ᐃᐡᑯᓂᑲᓂ ᐊᓄᑭᑕᒪᑫᐃᐧ ᑲᓇᐊᐧᐸᒋᑫᐃᐧᓇᐣ ᒋᐃᔑᐱᒥᓂᔕᐦᐃᑲᑌᐠ ᒣᑲᐧᐨ ᑲᐃᓇᑌᐠ ᔓᓂᔭ ᑲᐃᔑ ᐅᓂᑎᐱ ᐸᐸᑭᑎᓂᐨ, ᐁᑲᐧ ᔕᑯᐨ ᐅᑭᒪᑲᓂ ᐱᒧᒋᑫᐃᐧᓇᐣ ᑭᔭᑦ ᐃᒪ ᑕᑭᐅᐣᒋ ᐊᓂᑫ ᐊᓄᑲᑌᐊᐧᐣ ᑭᐡᐱᐣ ᐃᒪ ᐃᐡᑯᓂᑲᓂᐠ ᐃᑭᑐᐊᐧᐨ ᒥᐦᐅᐁᐧ ᐁᔑᓇᑕᐁᐧᐣᑕᒧᐊᐧᐨ, ᐁᑲᐧ ᒥᓇ ᑭᐡᐱᐣ ᑲᑭᓇ ᑫᑯᐣ ᐃᔑᓇᐦᐃᓭᐠ.
ᐁᑲᐧ ᒥᓇ ᐃᒪ ᐊᓂᔑᓂᓂ ᔓᓂᔭ ᐱᒧᒋᑫᐃᐧ ᑲᓇᐊᐧᐸᒋᑫᐃᐧᐣ ᑲᐊᓄᑲᑕᒧᐊᐧᐨ ᑭᐃᑭᑐᐊᐧᐠ ᑲᐃᐧᐣ ᐃᓇᓄᑭᓯᐊᐧᐠ ᐃᒪ ᐃᐡᑯᓂᑲᓂ ᐊᓄᑭᑕᒪᑫᐃᐧ ᑲᓇᐊᐧᐸᒋᑫᐃᐧᓇᐣ ᒋᐃᔑᐸᐸᒥᓯᐊᐧᐨ ᐊᐧᐁᐧ ᑕᐣᑲᐣ ᑲᑭᐃᑭᑐᐨ.
“ᐊᓂᔑᓂᓂ ᔓᓂᔭ ᐱᒧᒋᑫᐃᐧ ᑲᓇᐊᐧᐸᒋᑫᐃᐧᐣ ᑲᐊᓄᑲᑕᒧᐊᐧᐨ ᐅᒪ ᑲᓇᑕ ᒥᓇ ᑲᐃᓇᑌᓂᐠ ᐅᑎᓇᓄᑭᐃᐧᓂᐊᐧ ᐸᔭᑌᓇᑲᐧᓂ ᑲᐃᓇᔓᐊᐧᓂᑕᐧ ᐊᓂᐣ ᑫᐃᓇᓄᑭᑕᒪᑫᐊᐧᐨ ᐃᒪ ᐃᓀᑫ ᔓᓂᔭᐃᐧ ᐱᒧᒋᑫᐃᐧᓂᐠ ᒥᓇ ᐱᑯ ᐊᓄᑭᐃᐧ ᓂᑲᓂᐱᒧᒋᑫᐃᐧᓂᐠ ᒋᐃᔑ ᐸᑭᑎᓇᒧᐊᐧᐨ ᑭᑭᓄᐦᐊᒪᑫᐃᐧᓇᐣ ᒋᑭᑭᓄᐦᐊᒪᐃᐧᑕᐧ ᐊᐃᐧᔭᐠ ᑫᑭᔭᓄᒋ ᐃᐧᒋᑐᐧᐊᐧᐨ ᐊᓂᔑᓂᓂᐃᐧ ᑕᔑᑫᐃᐧᓇᐣ ᒥᓇ ᐱᒧᒋᑫᐃᐧᓇᐣ ᒋᑭᔭᓂ ᑌᐱᓇᒪᓱᒪᑲᑭᐣ ᑲᐡᑭᐦᐅᐃᐧᓇᐣ,”ᑭᐃᑭᑐ ᑌᕑᐃ ᑯᐟᕑᐊᐠ, ᑲᐅᑭᒪᐃᐧᐨ ᐊᓂᔑᓂᓂ ᔓᓂᔭ ᐱᒧᒋᑫᐃᐧ ᑲᓇᐊᐧᐸᒋᑫᐃᐧᐣ ᑲᐊᓄᑲᑕᒧᐊᐧᐨ ᐅᒪ ᑲᓇᑕ.
“ᑲᐃᐧᐣ ᓂᓇᐃᐧᐟ ᐣᑎᓇᓄᑭᓯᒥᐣ ᒋᑐᑕᒪᐣᐠ ᑫᐃᔑᑭᑫᐣᑕᒧᐊᐧᐨ ᐅᔓᓂᔭᐃᐧ ᐱᒧᒋᑫᐃᐧᓂᐊᐧ ᐱᑯ ᐊᓂᐣ ᑲᐊᐱᑌᐣᑕᑲᐧᑭᐣ ᐱᒧᒋᑫᐃᐧᓇᐣ ᐁᑲᐧ ᐱᑯ ᐣᑭᐱ ᑭᑫᐣᑕᑯᓯᒥᐣ ᑲᐧᔭᐠ ᐁᔭᓄᑲᑕᐠ ᑲᐸᐸᑭᑎᓇᒪᐠ ᐊᓄᑭᐃᐧ ᑭᑭᓄᐦᐊᒪᑫᐃᐧᓇᐣ ᒥᓇ ᑲᑭᔑᑐᐊᐧᐨ ᐅᑭᑭᓄᐦᐊᒪᑯᐃᐧᓂᐊᐧ ᐁᒥᓇᑭᑕᐧ ᒪᓯᓇᐦᐃᑲᓂ ᐃᑭᐁᐧᓂᐊᐧᐠ ᒪᔭᑦ ᑲᓂᑲᓂᐱᒧᑐᐊᐧᐨ ᔓᓂᔭᐃᐧ ᐱᒧᒋᑫᐃᐧᓇᐣ ᒥᓇ ᑭᒋᐊᓄᑭᐃᐧ ᑲᓇᐊᐧᐸᒋᑫᐃᐧᓇᐣ.”
ᐁᑲᐧ ᒥᓇ ᐃᐁᐧᓂ ᐯᔑᐠ ᑯᑕᑭᓂ ᓂᔑᐣ ᐱᒧᒋᑫᐃᐧᓇᐣ ᑲᑭᒥᑯᑕᐠ ᐃᒪ ᑕᐣᑲᐣ ᐅᑎᐸᒋᒧᐃᐧᓂᐠ, ᒥᓯᐁᐧ ᑲᓇᑕ ᐊᓂᔑᓂᓂ ᔓᓂᔭᐃᐧ ᒪᒋᑕᒪᓱᐃᐧᐣ ᐊᐱᑕᒪᑫᐃᐧᐣ ᑲᐃᐧᐣ ᑫᐃᐧᓇᐊᐧ ᐃᓇᓄᑭᓯᐊᐧᐠ ᒋᐅᒋ ᐸᑭᑎᓇᒧᐊᐧᐨ ᐊᓄᑭᑕᒪᑫᐃᐧ ᑲᓇᐊᐧᐸᒋᑫᐃᐧᓇᐣ ᐃᒪ ᐃᐡᑯᓂᑲᓇᐣ.
ᐁᑲᐧ ᐅᐁᐧ ᐱᒧᒋᑫᐃᐧᐣ ᑭᐅᐡᑭᒪᒋᒋᑲᑌᐸᐣ ᒣᑲᐧᐨ 1990 ᐁᑭᐃᓇᐧᑌᐠ ᒋᐃᓇᓄᑭᐊᐧᐨ ᒋᐅᒋ ᑭᑭᓄᐡᑲᒪᐊᐧᐊᐧᐨ ᑲᓇᑕ ᐅᑭᒪᐃᐧᓇᐣ ᐊᓂᐣ ᒪᔭᑦ ᑫᑭᐃᔑᓇᑯᑲᐧᐸᐣ ᐅᓇᑯᓂᑫᐃᐧᓀᓴᐣ ᒥᓇ ᐅᔓᓂᔭᐃᐧᒋᐦᐃᑯᐃᐧᓂᐊᐧ ᐅᓄᐁᐧᓂᐊᐧᐣ ᐊᓂᔑᓂᓂᑲᐠ ᑲᔓᓂᔭᐃᐧ ᐱᒧᑕᒪᓱᒪᑲᑭᐣ.
ᑲᓇᑕ ᑭᒋᐅᑭᒪᑲᐣ ᔕᐧᐣ ᐁᐃᐣᔓᐟ ᐊᐟᓫᐃᐅ ᑭᐃᑭᑐ ᐅᓄᐁᐧᓂᐊᐧᐣ ᑲᑭᐊᔭᑭᓀ ᑲᑭᐡᑭᓂᑲᑌᑭᐣ ᐊᓂᔑᓂᓂᐃᐧ ᐱᒧᒋᑫᐃᐧᓇᐣ ᔓᓂᔭᐣ ᑲᐅᒋᒥᓂᑕᐧᐸᐣ ᒪᐊᐧᐨ ᐃᑯ ᑲᐧᐣᑕ ᐅᑭᐊᐃᐣᑐᑕᐣ ᐅᑭᒪᐃᐧᐣ, ᐃᐁᐧ ᐅᑎ ᐁᑲ ᐁᐃᔑᓇᐦᐃᓇᑲᐧᓂᐠ ᑲᑐᑕᐣᐠ ᒥᓯᐁᐧ ᐅᒪ ᑲᓇᑕ ᐊᔕ ᑲᑭᐃᐧᐣᑕᒪᑫᐸᐣ ᐯᔓᐨ ᒋᔭᓂ ᐃᐧᑕᓄᑭᒪᐨ ᐊᓂᔑᓂᓂᐊᐧᐣ ᐁᑲᐧ ᒥᓇ ᐊᐧᐁᐧ ᑲᓇᑕ ᑭᒋᐅᑭᒪ ᑲᑭᐃᑭᑐᐸᐣ ᒋᔭᓂ ᐊᓄᑲᑕᐠ ᓇᓇᐦᐊᑕᒪᑫᐃᐧᓂᐠ ᐃᒪ ᐃᓀᑫ ᑲᑭᐱᔑ ᐊᐧᓂᑐᑕᐃᐧᑕᐧᐸᐣ ᐊᓂᔑᓂᓂᐊᐧᐠ.
“ᔓᓂᔭᐃᐧ ᑭᐡᑭᓇᒪᑫᐃᐧᓇᐣ ᒥᑐᓂ ᐱᑯ ᐅᑲᑭᒋᒪᒋᓴᐦᐃᑯᓇᐊᐧ ᐊᓂᔑᓂᓂᐃᐧ ᑎᐯᐣᒋᑫᐃᐧᓇᐣ ᒥᓇ ᐱᑯ ᐃᒪ ᑲᐃᔑᐸᐱᑯᔭᑭᐣ ᑕᔑᑫᐃᐧᓇᐣ ᐱᓂᐡ ᐅᒪ ᒥᓯᐁᐧ ᑲᓇᑕ ᐊᐦᑭᐠ ᑲᑲᐯᔑᐊᐧᐨ,” ᑭᐃᑭᑐ ᐊᐟᓫᐃᐅ.
ᐊᐟᓫᐃᐅ ᒥᓇ ᑭᐃᑭᑐ ᑲᐊᓂᔑᓂᓂᐃᐧ ᓂᑲᓂᑕᒪᑫᐊᐧᐨ ᐊᔕ ᐅᑭᐸᔭᑌᐃᐧᐣᑕᓇᐊᐧᐸᐣ ᒪᐊᐧᐨ ᐁᑭᑕᐸᒋᑐᐊᐧᐨ ᐅᓄᐁᐧᓂᐊᐧᐣ ᑐᑲᓂ ᐃᐧᒋᐦᐃᐁᐧᐃᐧᓇᐣ ᐊᓂᔑᓂᓂᐊᐧᐠ ᐁᑲᐧ ᐁᑲ ᐁᓇᑕᐁᐧᐣᑕᒧᐊᐧᐨ ᐃᒪ ᒋᐅᒋ ᒪᒋᓴᐦᐃᑯᐊᐧᐨ ᑲᑭᐡᑭᓇᑲᓄᐨ ᔓᓂᔭ.

See also

12/01/2015 - 19:37
12/01/2015 - 19:37
12/01/2015 - 19:37
12/01/2015 - 19:37