ᑲᓴᐸᓇᑲ ᐅᑭᒪᑲᐣ ᐅᐃᐧᑭᑫᐣᑕᐣ ᑫᑯᓀᐣ ᑲᑭᐅᐣᒋ ᐃᐡᑲᐧᐱᒪᑎᓯᐨ ᐃᑫ ᒣᑲᐧᐨ ᐁᑕᑯᓇᑲᓄᐸᐣ

ᑲᓴᐸᓇᑲ ᐅᑭᒪᑲᐣ ᑲᐧᕑᑎᐣ ᐊᐣᑐᕑᓴᐣ ᐅᑭᔭᓂᒧᑕᐣ ᐅᑕᔑᑫᐃᐧᓂᐠ ᐁᑲ ᑲᑕᑲᐧᓂᐠ ᑭᐸᐦᐅᑎᐃᐧᑲᒥᑯᓂ ᐊᐱ ᐊᐧᐁᐧ ᓂᔑᑕᓇ ᓂᐦᓱᔕᑊ ᐁᑕᓱᔭᑭᐃᐧᓀᐸᐣ ᐅᐡᑭᓂᑭᑫᐧ ᐁᑭᐅᐣᒋ ᐃᐡᑲᐧᐱᒪᑎᓯᐸᐣ ᒣᑲᐧᐨ ᐁᑕᑯᓇᑲᓄᐸᐣ ᐃᒪ ᑲᓴᐸᓇᑲᐠ.
“ᐊᒥ ᑲᐃᔑᓂᓯᑐᑕᒪᐣ ᐊᓂᔑᓇᐯ ᐊᐢᑭ ᔑᒪᑲᓂᔑᐃᐧ ᐊᓄᑭᓇᑲᐣ ᐁᑭᐅᑕᐱᓇᐨ ᐃᓂᐁᐧᓂᐊᐧᐣ ᐃᑫᐧᐊᐧᐣ ᐁᑲᐧ ᐃᒪ ᔑᒪᑲᓂᔑᐃᐧᑕᐸᓂᐠ ᐁᑭᐃᔑᐳᓯᐦᐊᐨ ᒋᑕᓇᐡᑭᓀᓂ,” ᑭᐃᑭᑐ ᐊᐣᑐᕑᓴᐣ. “ᐊᔕ ᓂᔓᔭᑭ ᓇᐣᑕ ᓂᐦᓱᔭᑭ ᐅᑕᓇᐠ ᑲᐃᐧᐣ ᐣᑐᒋᐊᔭᓯᒥᐣ ᔑᒪᑲᓂᔑᐃᐧᑲᒥᐠ ᑫᑭᐃᔑᑭᐸᐦᐅᐣᑕᐧᐸᐣ ᐊᐃᐧᔭᐠ. ᐊᑯᓇᐠ ᐊᐱᐣ ᐁᐧᑎ ᑭᔐᒋᐊᐧᐣ ᓇᓇᑕᐃᐧᑭᑫᒋᑫᐃᐧᐣ ᑲᑭᐊᓄᑲᑌᑭᐸᐣ, ᐊᒥ ᐊᐱ ᑲᑭ ᑲᐃᐧᓂᑲᑌᑭᐸᐣ ᐣᔑᒪᑲᓂᔑᐃᐧᑲᒥᑯᓇᐣ ᐁᑲᐧ ᑲᐃᐧᐣ ᐃᐧᑲ ᒪᔑ ᑯᑕᐠ ᒋᑭᐅᐣᒋ ᐅᔑᒋᑲᑌᐠ, ᒥᐱᑯ ᐁᑕ ᐃᐁᐧ ᑲᑕᑲᐧᐠ ᐊᓂᔑᓇᐯ ᐊᐢᑭ ᔑᒪᑲᓂᔑᐃᐧᑲᒥᐠ.”
ᓫᐃᐅᓇ ᐊᐣᑐᕑᓴᐣ ᑭᐃᔑᓂᑲᓱ ᑲᓴᐸᓇᑲᐠ ᑭᐅᒋ ᐁᑲᐧ ᑭᐃᐡᑲᐧᐱᒪᑎᓯ ᒣᑲᐧᐨ ᐁᑕᑯᓇᑲᓄᐸᐣ ᐃᒪ ᐃᐡᑯᓂᑲᓂᐠ ᑲᐅᐡᑲᑭᓱᓂᐨ ᑭᔐᐱᓯᒧᐣ.
ᐁᑲᐧ ᐅᑯᐁᐧᓂᐊᐧᐠ ᐅᐣᑌᕑᐃᔪ ᔑᒪᑲᓂᔕᐠ ᑲᓂᑲᓂᐡᑲᒧᐊᐧᐨ ᑭᒋᒪᒪᓂᐃᐧ ᓇᓇᑕᐃᐧᑭᑫᐣᒋᑫᐃᐧᓂ ᐃᐧᓇᐊᐧ ᐅᑕᓄᑲᑕᓇᐊᐧ ᐁᓇᓇᑕᐃᐧᑭᑫᑕᒧᐊᐧᐨ ᐊᐧᐁᐧ ᑲᑭᐃᐡᑲᐧᐱᒪᑎᓯᐨ ᐃᑫᐧ.
ᐊᐣᑐᕑᓴᐣ ᐃᑭᑐ ᓂᐦᓱᔭᑭ ᐅᑕᓇᐠ ᒣᑲᐧᐨ ᑲᐅᑭᒪᑲᓄᐸᐣ ᐅᑭᐸᑭᑎᓇᐊᐧᐸᓂᐣ $50,000 ᐅᔓᓂᔭᒥᐊᐧᐣ ᐁᑭᐅᐣᑎᓇᒧᐊᐧᐨ ᑲᒧᒋᐱᒥᑕᐸᑌᐠ ᐊᐧᑲᐦᐃᑲᐣ ᔑᒪᑲᓂᔑᐃᐧᑲᒥᐠ ᒋᐃᓇᐧᑌᐠ ᐁᑲᐧ ᐊᔑᐨ ᐃᒪ ᒋᐃᓇᐸᑕᑭᐣ ᑫᐃᔑᑲᓇᐁᐧᐣᑕᑯᓯᐊᐧᐨ ᑲᑕᑯᓂᑕᐧ ᐊᐃᐧᔭᐠ ᒋᔭᐸᒋᑐᐊᐧᐨ ᐊᓂᔑᓇᐯ ᐊᐢᑭ ᔑᒪᑲᓂᔕᐠ, ᐁᑲᐧ ᔕᑯᐨ ᑲᐃᐧᐣ ᒪᔑ ᔑᒪᑲᓂᔕᐠ ᒋᑭᐅᐣᒋ ᐱᐣᑎᑫᑯᓯᐣᑕᒧᐊᐧᐨ ᐃᐁᐧᓂ ᐊᐧᑲᐦᐃᑲᓂ. ᒥᓇᐊᐧ ᑕᐡ ᐊᐣᑐᕑᓴᐣ ᑭᑭᐁᐧ ᐅᑕᐱᓇᑲᓄᐸᐣ ᐅᑭᒪᑲᓂᐃᐧ ᓂᑲᓂᑕᒪᑫᐃᐧᓂᐠ ᐅᑕᓇᐠ ᒥᑭᓯᐃᐧᐱᓯᑦ ᐃᓂᐁᐧᓂᐊᐧᐣ ᑲᑭᒥᐡᑲᐧᒋᐡᑲᐊᐧᐨ ᐃᓄ ᐊᐣᑐᕑᓴᐣᓄᐣ ᑲᑭᐅᑭᒪᑲᓄᐸᐣ.
“ᐁᐧᓇᐠ ᐣᑭᐃᓀᑕᓇᐸᐣ ᒋᐸᑭᑎᓇᐠ $50,000 ᐃᐧᐸᐨ ᒋᔭᓂᑲᑫᐧᐅᐣᑎᓇᒪᐠ ᐃᐁᐧ ᐊᐧᑲᐦᐃᑲᐣ (ᑲᐱᒥᑕᐸᑌᐠ ᐊᐧᑲᐦᐃᑲᐣ ᔑᒪᑲᓂᔑᐃᐧᑲᒥᐠ ᒋᐃᓇᐧᑌᐠ),” ᑭᐃᑭᑐ ᐊᐣᑐᕑᓴᐣ. “ᐊᔕ ᑕᐡ ᐅᐁᐧ ᓂᐦᓱᔭᑭ, ᒥᐦᐅᐁᐧ ᑭᔭᐱᐨ ᐁᐱᐦᐅᔭᐣ ᐁᒧᒋᑲᓇᐊᐧᐸᑕᐣ ᐃᐁᐧ ᐊᐧᑲᐦᐃᑲᐣ.”
ᐊᐣᑐᕑᓴᐣ ᐃᑭᑐ ᐊᓂᔑᓇᐯ ᐊᐢᑭ ᔑᒪᑲᓂᔕᐠ ᒣᑲᐧᐨ ᐃᒪ ᑕᓇᓄᑭᐊᐧᐠ ᐸᐣᐟ ᐊᐸᐢ ᐁᑲᐧ ᑲᐃᐧᐣ ᐅᑕᔭᓇᐊᐧᓯᐣ ᑲᓇᐁᐧᐣᒋᑫᐃᐧᑲᒥᑯᐣ ᑲᑕᑯᓂᑕᐧ ᐊᐃᐧᔭᐠ.
“ᑲᐧᐃᐣ ᑲᓇᑫ ᒪᔑ ᒋᔭᐸᒋᑐᐊᐧᐨ ᐃᐁᐧᓂ ᐊᐧᑲᐦᐃᑲᓂ ᑲᑭᐅᐣᑎᓂᑲᑌᑭᐸᐣ ᒋᔭᐸᒋᑐᐊᐧᐨ,” ᐃᑭᑐ ᐊᐣᑐᕑᓴᐣ. “ᒥᑕᐡ ᐁᑐᑕᒧᐊᐧᐨ ᔑᒪᑲᓂᔕᐠ ᑲᐅᑕᐱᓇᐊᐧᐨ ᐊᐃᐧᔭᐣ ᐃᒪ ᐱᐣᒋᑕᐸᐣ ᐁᔑᐊᓴᐊᐧᐨ ᒋᑕᓇᐡᑭᓀᓂᐨ. ᒥᑐᓂ ᑕᐡ ᐊᐧᐊᐧᓀᐣᑕᑲᐧᐣ. ᑭᐡᐱᐣ ᐊᐃᐧᔭᐠ ᑲᑭᐊᐧᐡᑫᐧᐱᐊᐧᐨ ᓇᐣᑕ ᑲᐃᓯᓭᓂᐠ ᒋᑲᓇᐁᐧᐣᑕᑯᓯᐊᐧᐨ, ᒥᐱᑯ ᐃᒪ ᐱᐣᒋᑕᐸᐣ ᐁᔑᐳᓯᐁᐧᐱᓇᐊᐧᐨ ᐃᒪ ᒋᐊᔭᓂᐨ ᐁᑲᐧ ᐊᐱᐣ ᓇᑫ ᐅᐸᑭᑎᓇᐊᐧᐣ ᐁᔭᓂᑭᐁᐧᐃᐧᓇᐊᐧᐨ, ᒪᐊᐧᐨ ᑕᐡ ᐅᓇᓂᓴᓂᐦᐊᐊᐧᐣ ᐅᐁᐧ ᑲᑐᑕᒧᐊᐧᐨ.”
ᐊᐣᑐᕑᓴᐣ ᐃᑭᑐ ᐃᐁᐧ ᐊᐧᑲᐦᐃᑲᐣ ᐊᔕ ᓄᒪᑫ ᑭᐅᐣᒋᑲᐧᔭᐣᑕᐣ ᒋᐊᐸᒋᑐᐊᐧᐨ ᔑᒪᑲᓂᔕᐠ, ᐁᑲᐧ ᒥᓇ ᐃᑭᐁᐧᓂᐊᐧᐠ ᑲᐃᓇᓄᑭᐊᐧᐨ ᐊᔕ ᑲᔦ ᐅᑭᓇᐸᐱᑫᓯᑐᓇᐊᐧᐸᐣ ᓂᐱᓂ ᒥᓇ ᐃᐡᑯᑌᐃᐧᔭᐱᓂ.
ᑭᒋᒪᐡᑭᑭᐃᐧᓂᓂ ᒪᐃᑯ ᐃᐧᓫᓴᐣ, ᑲᓂᑲᓂᐡᑲᐠ ᓂᐳᐃᐧᐣ ᑲᓇᓇᑲᒋᑐᐨ ᐃᒪ ᑕᐣᑐᕑ ᐯ, ᑭᐃᑭᑐ ᐊᒥ ᐁᐃᓀᐣᑕᐠ ᒋᑲᑫᐧᑌᐧᓇᓄᐊᐧᐠ ᓇᓇᑲᒋᒋᑫᐃᐧᐣ ᒋᑐᒋᑲᑌᐠ ᐊᐧᐁᐧ ᐃᑫᐧ ᑲᑭᐳᓂᐱᒪᑎᓯᐨ.
“ᐊᒥ ᐁᔑᓂᓯᑐᑕᒪᐣ ᐅᐁᐧ ᑲᑭᐃᔑᐁᐧᐸᐠ ᒣᑲᐧᐨ ᐁᑭᑕᑯᓇᑲᓄᐨ ᐃᒪ ᐁᑭ ᐅᐣᒋᐃᐡᑲᐧᐱᒪᑎᓯᐨ, ᐃᓇᔓᐊᐧᑌ ᑕᐡ ᐃᒪ ᓂᐳᐃᐧᐣ ᓇᓇᑕᐃᐧᑭᑫᐣᒋᑫᐃᐧ ᐅᓇᑯᓂᑫᐃᐧᓂᐠ ᐅᐣᒋᑕ ᐱᑯ ᒋᓇᓇᑕᐃᐧ ᑭᑫᐣᒋᑲᓄᐊᐧᐠ,” ᑭᐃᑭᑐ ᐃᐧᓫᓴᐣ ᒣᑲᐧᐨ ᐊᐱ ᑭᔐᐱᓯᑦ 5.
ᐃᐧᓫᓴᐣ ᐅᐱᒥᐊᔭᒥᐦᐊᐣ ᐅᐣᑌᕑᐃᔪ ᔑᒪᑲᓂᔑᐃᐧ ᓇᓇᑕᐃᐧᑭᑫᐣᒋᑫᐠ ᐁᑲᐧ ᒥᓇ ᐃᒪ ᐃᐡᑯᓂᑲᓂᐠ ᑲᓂᑲᓂᑕᒪᑫᐊᐧᐨ ᐃᐁᐧᓂ ᐅᒋ ᑲᑭᐃᐡᑲᐧᐱᒪᑎᓯᐨ ᐃᑫᐧ.
ᐃᑫᐧ ᑲᑭᐃᐡᑲᐧ
“ᐁᑲᐧ ᒥᓇ ᑎᐱᓇᐁᐧ ᐣᑲᐃᔕ ᐁᐧᑎ ᐃᐡᑯᓂᑲᓂᐠ ᐃᐧᐸᐨ ᓇᐊᐧᐨ ᑭᔭᐱᐨ ᒋᔭᐣᑕᐃᐧ ᐊᔭᒥᐦᐊᑲᐧ,” ᐃᑭᑐ ᐃᐧᓫᓴᐣ.
ᐃᐧᓫᓴᐣ ᑭᐃᑭᑐ ᐃᐁᐧ ᑲᐃᓇᒋᒧᓇᓂᐊᐧᐠ ᐁᑲ ᑲᑕᑲᐧᐠ ᑫᐃᔑ ᑲᓇᐁᐧᐣᑕᑯᓯᐊᐧᐨ ᑲᑕᑯᓂᑕᐧ ᐊᐃᐧᔭᐠ ᐃᒪ ᐃᐡᑯᓂᑲᓂᐠ ᒥᐦᐅᐁᐧ ᑲᔦ ᑫᓇᓇᑲᒋᒋᑲᑌᐠ.
“ᒥᐦᐅᐁᐧ ᑲᐸᔭᑌᓇᑲᐧᐠ ᒋᓇᓇᑲᑕᐊᐧᐸᒋᑲᑌᐠ ᐃᑭᐁᐧᓂᐊᐧᐠ ᐊᐃᐧᔭᐠ ᑲᑭᑕᑯᓂᑕᐧ ᐊᓂᐣ ᑲᑐᑕᐃᐧᐣᑕᐧ ᒣᑲᐧᐨ ᐁᑲᓇᐁᐧᓂᒥᑯᐊᐧᐨ ᔑᒪᑲᓂᔕᐣ,” ᐃᐧᓫᓴᐣ ᐃᑭᑐ.
ᐊᓂᔑᓇᐯ ᐊᐢᑭ ᔑᒪᑲᓂᔑᐃᐧ ᐊᓄᑭᐃᐧᐣ ᐊᓄᑭᓇᑲᐣ ᑭᐃᑭᑐ ᐅᐣᑌᕑᐃᔪ ᔑᒪᑲᓂᔕᐠ ᑭᑲᓄᓇᐊᐧᐠ ᐃᐧᓇᐊᐧ ᒋᔭᓄᑲᑕᒧᐊᐧᐨ ᓇᓇᑕᐃᐧᑭᑫᐣᒋᑫᐃᐧᓂ ᐁᑲᐧ ᐃᐧᐣ ᐊᓂᔑᓇᐯ ᐊᐢᑭ ᔑᒪᑲᓂᔑᐃᐧ ᐊᓄᑭᐃᐧᐣ ᑲᐃᐧᐣ ᐅᑕᓄᑲᑕᓯᓇᐊᐧ ᓇᓇᑕᐃᐧᑭᑫᒋᑫᐃᐧᓂ ᑲᐅᐣᒋ ᐱᒥᓂᔕᐦᐃᑲᑌᐠ ᐅᐣᑌᕑᐃᔪ ᔑᒪᑲᓂᔑᐃᐧ ᐅᓇᔓᐁᐧᐃᐧᐣ, ᒥᑕᐡ ᐁᔑᑲᓇᐊᐧᐸᒋᑲᑌᐠ ᐃᒪ ᑭᒋᔑᒪᑲᓂᔑᐃᐧ ᓇᓇᑲᒋᒋᑫᐃᐧᓂᐠ ᒋᐅᒋᐊᓄᑲᑌᐠ ᓇᓇᑕᐃᐧᑭᑫᐣᒋᑫᐃᐧᐣ ᑭᐡᐱᐣ ᑫᑯᐣ ᑲᑭᒋᐃᓯᓭᐠ ᑲᐊᔑᒋᓭᐊᐧᐨ ᔑᒪᑲᓂᔕᐠ ᒥᓇ ᐱᑯ ᐊᐃᐧᔭᐠ ᐃᒪ ᐃᓀᑫ ᐊᐃᐧᔭ ᑲᐅᐣᒋᐊᐧᓂᑐᐨ ᐅᐱᒪᑎᓯᐃᐧᐣ, ᑲᑭᐅᒋ ᑭᒋᒪᑭᐦᐊᑲᓄᐨ ᓇᐣᑕ ᐁᑭᑎᐸᒋᒧᓇᓂᐊᐧᐠ ᐱᔑᑲᐧᒋᑐᑕᑫᐃᐧᓂᐠ ᐃᓀᑫ ᐁᑭᐃᔑᐊᐧᓂᑐᑕᐊᐧᑲᓄᐨ.
ᒣᑲᐧᐨ ᑭᔐᐱᓯᑦ 3 ᑲᐃᓇᑭᓱᐨ ᑭᓇᓇᑲᒋᒋᑲᑌ ᒥᔭᐤ ᐁᐧᑎ ᑭᓇᐧᕑᐊ ᐁᑲᐧ ᐃᑭᐁᐧᓂᐊᐧᐠ ᑭᓇᐧᕑᐊ ᐅᐣᑌᓫᐃᔪ ᔑᒪᑲᓂᔕᐠ ᑲᐊᓄᑲᑕᒧᐊᐧᐨ ᑭᒋᒪᒪᓂᐃᐧᓇᐣ ᑭᐅᐣᒋ ᐃᐧᒋᑕᐧᐊᐠ.
ᑭᐡᐱᐣ ᐊᐃᐧᔭ ᐊᔭᑫᐧᐣ ᑎᐸᒋᒧᐃᐧᓂ ᐅᐁᐧᓂ ᒣᑲᐧᐨ ᑲᐱᒥ ᓇᓇᑕᐃᐧᑭᑫᐣᒋᑲᑌᓂᐠ ᑭᑲᑫᐧᒋᒥᑯᓇᐊᐧ ᒋᐃᔑᑎᐸᒋᒧᔦᐠ ᑭᑕᔑᑫᐃᐧᓂᐠ ᑲᑕᑲᐧᐠ ᔑᒪᑲᓂᔑᐃᐧ ᐊᓄᑭᐃᐧᓂᐠ.

See also

12/01/2015 - 19:37
12/01/2015 - 19:37
12/01/2015 - 19:37
12/01/2015 - 19:37