ᑲᑭᐱᒧᓭᐊᐧᐨ $78,000 ᑭᔓᓂᔭᑫᐊᐧᐠ ᒋᐅᔑᒋᑲᑌᐠ ᐃᐧᒋᐦᐃᐁᐧᐃᐧᑲᒥᐠ

ᕑᐃᐠ ᑲᕑᐃᐠ
ᐊᐧᐊᐧᑌ ᐊᒋᒧᐃᐧᓇᐣ
ᐅᑭᐢᑭᒪᓂᓯᐊᐧᐳ ᐅᓇᔓᐁᐧᐃᐧᓂᓂ ᐃᐧᓂᔭᑦ ᒥᑭᓇᐠ ᐁᑲᐧ ᐯᔑᐠ ᐅᐡᑲᑎᐢ ᑊᕑᐊᔭᐣ ᓯᓇᐊᐧᑊ $78,000 ᑭᔓᓂᔭᑫᐊᐧᐠ ᑲᑭᐱᒧᓭᐊᐧᐨ 500 ᑭᓫᐊᒥᑐᕑᐢ ᐊᐧᓂᓇᐊᐧᑲᐠ ᑲᑭᐃᓇᐦᐊᑐᐊᐧᐨ ᐃᐁᐧᓂ ᐅᐣᒋ ᑲᐸᑯᓭᐣᑕᑲᐧᐠ ᒋᐅᔑᒋᑲᑌᓂᐠ ᐃᐧᒋᐦᐃᐁᐧᐃᐧᑲᒥᑯᓂ.
“ᒪᐊᐧᐨ ᐃᑯ ᑭᑭᒋᒪᒪᒋᑭᔑᑲ ᒣᑲᐧᐨ ᐃᐁᐧ ᐊᐱ, ᑭᒪᒥᑯᒥᐃᐧᐱᓴᐦᐊᐣ, ᒥᑕᐡ ᑲᑭᐅᐣᒋᐸᐧᑕᐃᐧᓭᐠ ᒋᑭᔑᑐᔭᐠ ᑲᑭᐱᒧᓭᔭᐠ,” ᐃᑭᑐ ᒥᑭᓇᐠ, ᐃᐧᐣ ᐅᐁᐧᓂ ᐅᑭᔭᓂ ᒪᒥᑐᓀᑕᓇᐸᐣ ᒋᑭᐃᔑᒋᑫᐸᐣ ᐅᑕᓇᐠ ᑕᑲᐧᑯᐠ ᐊᐧᑌᐸᑲᐃᐧᐱᓯᒧᐣ 2011 ᐊᐱ ᐃᒪ ᐅᑕᔑᑫᐃᐧᓂᐠ ᑲᑭᐊᐧᓂᐦᐊᐊᐧᐸᐣ ᓂᔑᐣ ᐅᑕᓂᔑᓂᓂᒥᐊᐧ ᒪᐡᑭᑭᑫᐃᐧᐣ ᑲᑭᐅᐣᑕᐱᓇᓂᑯᐊᐧᐨ. “(ᑲᐃᐧᐣ ᑲᓇᑫ ᓂᐦᓱᑯᐣ ᒋᐅᒋᐱᒥᓭᐠ ᐊᐱᐣ ᑲᑭᓂᐣᑭᑌᐠ ᐱᐳᓂᒥᑲᓇ. ᒪᐊᐧᐨ ᑭᔭᓂᒪᐣ ᐃᒪ ᒋᐱᒧᓭᓇᓂᐊᐧᐠ).”
ᐃᐧᐸᐨ ᐃᑯ ᑭᔭᓂᐃᓯᓭᓂ ᒥᑭᓇᐠ ᑲᑭᔭᓂᐱᑫᐧᐱᐡᑲᐠ ᐅᒪᑭᓯᓇᐣ ᐃᒪ ᐱᐳᓂᒥᑲᓇᐠ.
“ᐁᒪᐧᔦ ᑲᔭᓂᑕᑲᐧᐦᐊᑐᔭᐣᐠ ᑲᔭᓄᒋᐸᑫᑕᒧᐠ ᓂᐱᓇᒥᐠ ᑲᐃᓇᒧᐠ ᒥᐦᐃᒪ ᐊᔕ ᒥᑐᓂ ᑲᑭᐱᑯᐡᑲᒪᐣ ᓂᒪᑭᓯᓇᐣ,” ᑭᐃᑭᑐ ᒥᑭᓇᐠ. “ᒥᔑᐣ ᒪᑭᓯᓇᐣ ᐣᑭᐱᑯᐡᑲᒥᐣ. ᔑᐸᐧᑲᒪ ᐱᒧᒋᑫᐃᐧᓂᐠ ᐣᑭᐅᒋᒥᓂᑯᒥᐣ ᒪᑭᓯᓇᐣ ᑫᐱᒧᓭᐊᐧᑫᔭᐣᐠ, ᑐᑲᐣ ᐃᓂᐁᐧᓂᐊᐧᐣ ᐱᒧᓭᐊᐧᑭᓯᓇᐣ ᕑᐃᐸᐧᐠ ᒥᓇ ᓇᔾᑭ.”
ᑭᐃᑭᑐ ᒥᑭᓇᐠ ᑭᒥᓄᐁᐧᐸᐣ ᒣᑲᐧᐨ ᑲᑲᑭᔑᑲᐠ ᑲᐱᒧᓭᐊᐧᐨ, ᐁᑲᐧ ᐊᐱᐣ ᑲᔭᓂᐅᓇᑯᔑᓂᐠ ᒥᑐᓂ ᑭᔭᓂᑕᑭᓇᑯᔑᓂ. ᐃᒪ ᐱᑯ ᓇᐣᑕ ᓂᔓᔕᐳᐊᐧᑲᓭ, 7 ᐁᑭᔐᐸᔭᓂᐠ ᐊᑯᓇᐠ 7 ᑲᐅᓇᑯᔑᓂᐠ ᑭᐱᒧᓭᐊᐧᐠ.
“ᓇᐣᑕ ᐱᑯ ᓂᐦᓴᐧᓱ ᑲᐅᓇᑯᔑᐠ ᐊᐱᐣ ᑲᑭᔭᓂᐸᐣᑭᔑᒧᐣᐠ,” ᑭᐃᑭᑐ ᒥᑭᓇᐠ. “ᐣᑭᑐᑕᒥᐣ ᐁᑭᑭᐁᐧᐡᑲᔭᐣᐠ ᑲᑭᐅᐣᒋᒪᒋᐦᐊᑐᔭᐠ ᒥᓇᐊᐧ ᑕᐡ ᐊᐱᐣ ᐃᒪ ᐣᑭᐅᒋᒪᒐᒥᐣ ᓂᐦᓴᐧᓱ ᑲᑭᔐᐸᔭᐠ.”
ᐅᑯᐁᐧᓂᐊᐧᐠ ᓂᔑᐣ ᑲᑭᐱᒧᓭᐊᐧᐨ ᐅᑭᑭᔑᑐᓇᐊᐧ ᑲᑲᑫᐧᔕᓂᔭᑫᑐᐊᐧᐨ ᐅᐱᒧᓭᐃᐧᓂᐊᐧ ᒣᑲᐧᐨ ᓂᑭᑯᐱᓯᑦ 3 ᑲᐃᓇᑭᓱᓂᐨ ᐁᑲᐧ ᒣᑲᐧᐨ ᒥᑭᓯᐃᐧᐱᓯᑦ 14 ᑲᐃᓇᑭᓱᓂᐨ ᐅᑕᔑᑫᐃᐧᓂᐊᐧ ᑲᑭᐅᐣᒋ ᒪᒋᐦᐊᑐᐊᐧᐸᐣ ᐱᐳᓂᒥᑲᓇᐠ.
“ᑲᑭᓇ ᐊᐃᐧᔭᐠ ᐣᑭᐱᓇᑭᐡᑲᑯᒥᐣ ᐊᐊᐧᓯᑌ ᐊᐧᓂᓇᐊᐧᑲᐠ ᐱᒥᓭᐃᐧᐳᐃᐧᓂᑲᒥᑯᐠ ᐁᑭᐱ ᐃᐧᒋᐱᒧᓭᒥᑯᔭᐣᐠ,” ᐃᑭᑐ ᒥᑭᓇᐠ, ᐁᑲᐧ ᐃᓂᐁᐧᓂᐊᐧᐣ ᑲᑭᐱᓇᑭᐡᑲᑯᐨ ᑭᒋᐅᑭᒪᑲᓇᐣ ᐢᑕᐣ ᐯᕑᑎ, ᑭᒋᐅᑭᒪᑲᓀᐢ ᒥᔐᐣ ᒥᑕᐟ ᐁᑲᐧ ᒥᓇ ᐊᑎᐟ ᐯᓫᐃᑲᐣ ᐸᐧᓫᐢ ᐦᐊᔾ ᐢᑯᓫ ᐅᑎᐡᑯᓂᐠ ᒥᓇ ᔑᐸᐧᑲᒪ ᐅᑕᓄᑭᐠ ᒥᐅᑯ ᑲᑭᐱᐃᐧᒋᐊᐧᐊᐧᐨ ᒋᑭᔑᑐᓂᐨ ᐅᐱᒧᓭᐃᐧᓂᐊᐧ. “ᒪᐊᐧᐨ ᑭᑭᒋᒥᓀᐧᐣᑕᑲᐧᐣ.”
ᒥᑭᓇᐠ ᒥᓇ ᓯᓇᐊᐧᑊ ᑭᓇᓇᑯᒪᐊᐧᐠ ᒣᑲᐧᐨ ᐃᒪ ᑲᑭᒪᒪᐃᐧᐡᑲᓄᐊᐧᐠ ᓇᓯᐱᐠ ᐊᐧᓂᓇᐊᐧᑲᐠ ᐁᑲᐧ ᐊᐱᐣ ᒥᓇᐊᐧ ᐁᐧᑎ ᑭᑭᒋᒪᐃᐧᐡᑲᓄᐊᐧᐣ ᐊᐱ ᑲᑭᐁᐧᐊᐧᐨ ᐅᑕᔑᑫᐃᐧᓂᐊᐧ ᑭᐢᑭᒪᓂᓯᐊᐧᐳᐠ ᒣᑲᐧᐨ ᓂᑭᑯᐱᓯᑦ 4 ᑲᐃᓇᑭᓱᐨ.
“ᒥᐢᑕᐦᐃ ᑭᐊᔭᒪᑲᐣ ᒧᔑᐦᐅᐃᐧᐣ ᐁᑭᐊᐧᐊᐧᒋᔦᒥᑯᔭᐣᐠ,” ᐃᑭᑐ ᒥᑭᓇᐠ. “ᐣᑭᓇᓇᑯᒥᑯᒥᐣ ᐅᐁᐧ ᑲᑭ ᑭᔑᑐᔭᐣᐠ.”
ᐊᓇᐃᐧᐣ ᐁᑲ ᐁᑭᐅᐣᒋ ᑌᐱᓇᒧᐊᐧᐨ ᑲᑭᐸᑯᓭᐣᑕᒧᐊᐧᐸᐣ ᒥᓂᑯᐠ $150,000 ᒋᔓᓂᔭᑫᐊᐧᐨ, ᒥᐱᑯ ᔕᑯᐨ ᒥᑭᓇᐠ ᐁᐱᒋᑌᐱᓇᐁᐧᓯᐨ ᒥᓂᑯᐠ ᑲᑭᐸᐸᑭᑎᓂᑫᐊᐧᐨ ᐊᐃᐧᔭᐠ ᒣᑲᐧᐨ ᑲᑭᐱᒧᓭᐨ.
“ᒥᓂᑯᐠ ᑲᑭᐸᑭᑎᓂᑫᐊᐧᐨ ᒪᐊᐧᐨ ᐃᑯ ᐣᑲᐅᒋᐃᐧᒋᐦᐃᑯᒥᐣ ᒋᒪᑕᓄᑲᑕᒪᐣᐠ ᐃᐧᒋᐦᐃᐁᐧᐃᐧᑲᒥᐠ,” ᐃᑭᑐ ᒥᑭᓇᐠ. ᒪᐊᐧᐨ ᒥᐢᑕᐦᐃ ᐃᐁᐧ 78,000 ᑕᓴᐧᐱᐠ.”
ᑯᑕᑭᓂ ᒥᓇᐊᐧ ᐅᒪᒥᑐᓀᑕᐣ ᒥᑭᓇᐠ ᐁᐃᐧᑲᑫᐧ ᔓᓂᔭᑫᑐᐨ ᐅᐱᒧᓭᐃᐧᐣ ᓄᑯᑦ ᑫᔭᓂ ᓂᐱᓂᐠ ᐊᐧᓂᓇᐊᐧᑲᐠ ᒋᐅᐣᒋᒪᒐᐠ ᐁᐧᑎ ᒋᐃᓇᐦᐊᑐᐨ ᐊᑐᐊᐧ ᑭᔭᐱᐨ ᐁᐃᐧᑲᑫᐧ ᑌᐱᓇᐨ $72,000 ᔓᓂᔭᐣ.
“ᒥᐱᑯ ᑭᔭᐱᐨ ᐁᔑᐱᒥᓭᐠ, ᐸᐢᑲᐣ ᐃᑯ ᐊᓂᒪᒋᓭ,” ᐃᑭᑐ ᒥᑭᓇᐠ. “ᑭᔭᑦ ᐃᑯ ᑭᔭᐱᑦ ᐊᐃᐧᔭᐠ ᑕᑭᐸᑭᑎᓂᑫᐊᐧᐠ.”
ᐁᑲᐧ ᐃᒪ ᑭᐢᑭᒪᓂᓯᐊᐧᐳᐠ ᑲᐃᐧᒋᐦᐃᑕᐧ ᒋᐳᓂᑐᐊᐧᐨ ᑲᑲᐧᒋᔭᐸᒋᑐᐊᐧᐨ ᒪᐡᑭᑭᑫᐃᐧᐣ ᐊᔕ ᓂᔕᐧ ᑭᐅᐣᒋᐱᒥ ᐃᐧᒋᐦᐊᑲᓄᐊᐧᐠ ᐃᒪ ᐊᑯᓯᐃᐧᑲᒥᑯᐠ, ᒪᒪᐤ 23 ᐊᐃᐧᔭᐠ ᑭᐃᐧᒋᐦᐊᐊᐧᐠ ᒣᑲᐧᐨ ᐊᐧᑌᐸᑲᐃᐧᐱᓯᑦ 2011 ᐁᑲᐧ ᒥᓇᐊᐧ 18 ᐅᑕᓇᐠ ᒉᐣᐁᐧᕑᐃ ᐱᓯᑦ.
ᒥᑕᐡ ᑲᑭᐃᔑ ᐅᓀᑕᑕᒧᐊᐧᐨ ᐅᐁᐧᓂ ᐅᑐᓇᒋᑫᐃᐧᓂᐊᐧ ᑲᐃᐧᐅᔑᑐᐊᐧᐨ ᐃᐧᒋᐦᐃᐁᐧᐃᐧᑲᒥᑯᓂ ᐅᒪ ᒋᐅᒋᐃᐧᒋᐦᐃᐧᑕ ᐊᓂᔑᓂᓂᐊᐧᐠ ᔑᐸᐧᑲᒪ ᑕᔑᑫᐃᐧᓇᐣ ᑲᐅᐣᒋ ᑎᐯᐣᑕᑯᓯᐊᐧᐨ ᒥᓇ ᐱᑯ ᑌᑎᐸᐦᐃ ᑕᔑᑫᐃᐧᓇᐣ ᑲᐊᔭᑭᐣ.

See also

12/01/2015 - 19:37
12/01/2015 - 19:37
12/01/2015 - 19:37
12/01/2015 - 19:37