ᑲᐸᐸᒥᓯᑲᐣᑕᒧᐊᐧᐨ ᐃᐧᑲᐧᓯᑲᒪᐣᐠ ᑲᐊᔭᐠ ᐱᐊᐧᐱᑯᑲᐣ ᑭᒪᐊᐧᒋᐦᐃᑐᐊᐧᐠ

ᐃᐧᑲᓯᑲᒪᐣᐠ ᑲᐊᔭᐠ ᐱᐊᐧᐱᑯᑲᐣ ᐃᓇᒧᒋᑫᐃᐧᐣ ᒥᐦᐅᐁᐧ ᒪᔭᑦ ᑲᑭᐊᓂᒧᑕᒪᑎᓇᓄᐊᐧᐠ ᒣᑲᐧᐨ ᑲᑭᒪᐊᐧᒋᐦᐃᑎᓇᓄᐊᐧᐠ ᓴᑭᐸᑲᐃᐧᐱᓯᑦ 22-23 ᑕᐣᑐᕑ ᐯ ᐅᑌᓇᐠ.
“ᑭᐱᔕᐊᐧᐠ ᑲᐅᑭᒪᐃᐧᐊᐧᐨ ᐠᓫᐃᑊᐢ ᐱᐊᐧᐱᑯᑲᐣ ᐱᒧᒋᑫᐃᐧᐣ, ᑲᓂᑲᓂᐡᑲᐠ ᓇᐧᕑᐊᐣᐟ ᐱᐊᐧᐱᑯᑫᐃᐧ ᐊᓄᑭᐃᐧᐣ ᐁᑲᐧ ᒥᓇ KWG ᐱᐊᐧᐱᑯᐃᐧ ᐊᓄᑭᐃᐧᐣ ᐸᐸᑲᐣ ᐁᑭᐃᔑᓂᑲᑕᒧᐊᐧᐨ ᐊᓂᐣ ᑲᐃᔑᒥᓴᐁᐧᐣᑕᒧᐊᐧᐨ ᑲᐃᐧᐃᔑᒪᒋᐊᐧᐨ ᐃᓇᒧᒋᑫᐃᐧᓂ,” ᑭᐃᑭᑐ ᒪᔾᑯ ᐠᕑᐊᐳ, ᐅᑭᒪᐅᐣ ᑭᐁᑎᓄᐠ ᐊᓄᑭᐃᐧᐣ, ᐱᐊᐧᐱᑯᑲᐣ ᒥᓇ ᒪᓇᑎᑫᐃᐧᐣ. “ᑲᔭᐠ ᑭᐃᓯᓭ, ᒥᓇ ᒥᓄᐃᐧᒋᐃᐧᑎᐃᐧᓂᐠ ᑭᐃᔑᑲᓇᐊᐧᐸᒥᑎᓇᓄᐊᐧᐣ ᑲᐱᒥ ᒪᐊᐧᒋᐦᐃᑎᓇᓄᐊᐧᐠ, ᐊᓇᐃᐧᐣ ᐸᐸᑲᐣ ᑭᐃᓯᓭᐊᐧᐣ ᐃᓀᐣᑕᒧᐃᐧᓇᐣ. ᔕᑯᐨ ᐃᑯ ᐅᑭᓂᓯᑕᐁᐧᐣᑕᓇᐊᐧ ᐅᐣᒋᑕᐱ ᐱᑯ ᐁᑭᐃᓯᓭᓂᐠ ᒋᒪᒪᐃᐧᐡᑲᐊᐧᐨ ᒋᔭᓂᒧᑕᒪᑎᐊᐧᐨ ᐅᐁᐧᓂ ᐅᒋ. ᒥᐦᐅᐁᐧ ᑫᑭᑕᐸᑕᐠ ᐊᐱ ᐊᐱᐣ ᑭᑭᔑ ᐅᓀᐣᒋᑲᑌᑭᐣ ᑫᑯᓇᐣ.”
ᐃᒪ ᑕᐡ ᓄᑯᒥᑫ ᑲᑭᐱᑕᔑ ᓇᓇᑲᒋᒋᑫᐊᐧᐨ ᑲᓇᓇᑕᐊᐧᓯᓂᐁᐧᐊᐧᐨ, ᑲᑭᐃᔑ ᑭᑭᓇᐊᐧᒋᒋᑲᑌᐠ ᐃᐧᑲᓯᑲᒪᐣᐠ ᑕᓀᐣᑕᑯᓯ ᒥᐢᑕᐦᐃ ᐃᒪ ᐁᐱᒪᐱᑭᔑᐣᐠ ᐊᓯᐣ ᐠᕑᐅᒪᔾᐟ ᑲᐊᐧᔐᔭᐱᑭᓯᐨ ᐊᓯᐣ ᑲᐅᐣᒋᐅᔑᒋᑲᑌᐠ ᑲᒪᐡᑲᐊᐧᐱᑲᐠ ᐱᐊᐧᐱᐠ. ᐃᒪ ᐃᔑᑕᑲᐧᐣ ᑲᑕᓀᐣᑕᑯᓯᐨ ᐊᐧᐁᐧ ᐊᓯᐣ ᒉᒥᐢ ᐯ ᐃᓀᑫ ᐯᔓᐣᐨ ᐁᐧᐱᑫᐧᐣᐠ ᒥᓇ ᐃᐧᑲᐧᒋᐊᐧᓇᐣᐠ.
ᐠᕑᐊᐳ ᑭᐃᑭᑐ ᐯᔑᐠ ᐁᑕ ᑕᐸᑭᑎᓂᑲᑌ ᒋᐅᐣᒋ ᐃᓇᒧᒋᑲᑌᐠ ᐃᒪ ᒪᔭᑦ ᑲᐃᐧᐃᔑ ᐱᐊᐧᐱᑯᑲᓂᐊᐧᐠ.
“ᑭᓂᓯᑕᐃᐧᓇᑲᐧᐣ ᐁᓂᓯᑐᑕᑐᐊᐧᐨ ᐅᑯᐁᓂᐊᐧᐠ ᓂᐦᓯᐣ ᑲᑦᐸᓂᐠ ᐊᓇᐃᐧᐣ ᐸᐸᑲᐣ ᐁᐃᔑᐸᑯᓭᐣᑕᒧᐊᐧᐨ ᒋᑭᐃᔑᓇᑯᑐᐊᐧᐸᐣ ᐃᓇᒧᒋᑫᐃᐧᓂ, ᔕᑯᐨ ᐁᐃᔑᐸᑯᓭᐣᑕᒪᐣ ᐃᐧᐸᐨ ᒋᔭᓂᐃᓯᓭᐠ ᒋᑭᔑᐅᓀᐣᒋᑲᑌᐠ ᑲᐃᐧᑐᒋᑲᑌᐠ,” ᐠᕑᐊᐳ ᐃᑭᑐ.
ᓇᐣᑕ ᐱᑯ ᓂᔓᔭᑭ ᐅᑲᐱᒥᑲᓇᐊᐧ ᐃᑭᐁᐧᓂᐊᐧᐠ ᒋᐱᒥᔭᓄᑲᑕᒧᐊᐧᐨ ᑲᐊᐦᑭᐃᐧ ᓇᓇᑲᒋᒋᑫᐊᐧᐨ.
“ᑫᑭᔐᑊ ᐣᑭᓄᑕᐊᐧᒥᐣ ᐅᑯᐁᐧᓂᐊᐧᐠ ᐱᐊᐧᐱᑯᑫᐃᐧ ᑲᑦᐸᓂᐠ ᑲᑭᔭᓂᒧᑕᐊᐧᒧᐊᐧᐨ ᑭᐡᐱᐣ ᑲᑭᓇ ᑫᑯᓇᐣ ᐃᔑᐱᒥ ᒥᓄᓭᑭᐣ ᑐᑕᒧᐃᐧᓇᐣ, ᒥᐱᑯ ᐊᔕ ᒋᔭᓂᒪᑕᓄᑲᑌᐠ 2013 ᐊᐦᑭᐊᐧᐠ,” ᐠᕑᐊᐳ ᑭᐃᑭᑐ. “ᐊᒥᐃᐧᓂᑯ ᐅᐁᐧᓂ ᐁᔑᓇᑲᐧᓂᐠ, ᐃᐧᐸᐨ ᐃᐧᑲᑫᐧ ᒪᑕᓄᑲᑕᒧᐊᐧᐨ.”
ᐠᕑᐊᐳ ᐃᑭᑐ ᒥᓇᐊᐧ ᑫᔭᓂᑐᒋᑲᑌᐠ ᒋᐅᓀᐣᒋᑲᑌᐠ ᐊᐣᑎ ᑫᑭᐃᔑᒥᓇᐧᔑᑭᐸᐣ ᒋᐅᒋ ᐱᒪᒧᒋᑲᑌᐠ.
“ᓇᑕᐁᐧᐣᑕᑲᐧᐣ ᑲᐧᔭᐠ ᒋᐅᓀᐣᑕᒪᐠ ᐯᑭᐡ ᒋᐅᐣᒋ ᐃᐧᒋᐦᐃᑯᐊᐧᐨ ᑲᐅᐣᒋᐯᔓᓇᑲᐧᑭᐣ ᑕᔑᑫᐃᐧᓇᐣ, ᐃᓂᐁᐧᓂᐊᐧᐣ ᐅᑎ ᒪᐊᐧᐨ ᐊᓂᔑᓂᓂᐃᐧ ᑕᔑᑫᐃᐧᓇᐣ,” ᐠᕑᐊᐳ ᐃᑭᑐ.
“ᐃᐡᑯᑌᐃᐧᑕᐸᐣ ᓇᐦ, ᓇᐣᑕ ᐅᑕᐸᓂᒥᑲᓇ? ᐊᐣᑎ ᐃᓀᑫ ᑫᐅᐣᒋᒪᑕᒧᒋᑲᑌᐠ? ᐊᐧᐸᓄᐠ - ᓀᐣᑲᐱᐦᐊᓄᐠ ᓇᐦ ᓇᐣᑕ ᑭᐁᐧᑎᓄᐠ - ᔕᐊᐧᓄᐠ ᐃᓀᑫ?”
ᒪᔾᑯ ᐸᐧᐠᐢ, ᑲᐅᑭᒪᐅᐨ ᐃᒪ ᐦᐊᔾ ᐃᑦᐸᐠᐟ ᐊᓄᑭᑕᒪᑫᐃᐧᓂᐠ, ᑭᓇᑐᑕᒪᑫ ᐊᓂᔑᓂᓂ ᑫᐃᐧᐣ ᒋᑭᐊᔑᑕᑭᒪᑲᓄᐸᐣ ᐃᒪ ᑕᔑᑫᐃᐧᓇᐣ ᑲᐅᐣᒋᐯᔓᓇᑲᐧᑭᐣ ᐱᐊᐧᐱᑯᑲᓂᐠ ᒣᑲᐧᐨ ᓴᑭᐸᑲᐃᐧᐱᓯᑦ 23 ᑲᑭᐸᑭᑎᓇᐣᑭᐸᐣ ᐅᑕᔭᒥᐃᐧᐣ ᑲᑭᒪᐊᐧᒋᐦᐃᑎᓇᓄᐊᐧᓂᐠ.
“ᓂᐣ ᐃᐧᐣ ᐁᐃᓀᐣᑕᒪᐣ ᒪᐊᐧᐨ ᑕᑭᒥᓇᐧᔑᓄᐸᐣ ᑲᑭᓇ ᑕᔑᑫᐃᐧᓇᐣ ᑲᐅᐣᒋ ᐯᔓᓇᑲᐧᑭᐣ ᐃᒪ ᐱᐊᐧᐱᑯᓂᑲᐠ ᒋᑭᐅᓀᐣᑕᒧᐊᐧᐸᐣ ᐊᓂᐣ ᑫᐃᔑᓇᑯᑐᐊᐧᐨ ᐅᑐᓀᐣᑕᒧᐃᐧᓂᐊᐧ ᒥᓇ ᑲᐃᐧᐊᐸᑕᓂᐠ ᐅᑕᑭᒥᐊᐧ ᒥᓇ ᐅᑕᑭᒥᐊᐧ ᑲᐃᐧᒪᓂᔓᓂᔭᐊᐧᑌᓂᐠ ᓇᐣᑕ ᓂᔭᑲᓇ ᑭᑫᐣᑕᒧᓂᑯᐃᐧ ᐱᒥᓂᔕᐦᐃᑫᐃᐧᓇᐣ ᑫᐃᔑ ᑲᓇᐊᐧᐸᒥᐣᑕᐧ ᐃᒪ ᐱᐊᐧᐱᑯᑫᐃᐧ ᐱᒧᒋᑫᐃᐧᓂᐠ,” ᐸᐧᐠᐢ ᐃᑭᑐ.
ᒥᐦᐃᒪ ᑲᔦ ᑫᑭᐅᐣᒋ ᐃᐧᒋᐦᐃᑯᐊᐧᐸᐣ ᒋᔭᓂᒥᑲᒧᐊᐧᐨ “ᑌᐯᐧ ᐱᑯ ᒋᔭᓂᐱᒥᓂᔕᐦᐊᒧᐊᐧᐨ ᑲᑭᐃᔑ ᒪᒪᐃᐧ ᐅᓇᒋᑫᐊᐧᐸᐣ ᐃᒪ ᐊᓂᔑᓂᓂᐃᐧ ᑕᔑᑫᐃᐧᓇᐣ ᐯᑭᐡ ᒋᐅᐣᒋ ᐱᒥᓂᔕᐦᐊᒧᐊᐧᐨ ᑲᑭᐃᓇᑯᓂᑲᑌᐠ ᐊᐧᓴ ᑭᐁᐧᑎᓄᐠ ᐅᓇᑯᓂᑫᐃᐧᓂᐠ,” ᐸᐧᐠᐢ ᐃᑭᑐ.
ᐸᐧᐠᐢ ᑲᔦ ᐅᑭᔭᓂᒧᑕᐣ ᐊᐧᐢᑌᓂᑲᓂ ᐱᒪᐱᑫᒧᒋᑫᐃᐧᐣ ᑲᐅᓀᐣᑕᑲᐧᐠ ᑫᐃᓇᐱᑫᒧᒋᑲᑌᑭᐣ ᐁᑲᐧ ᒥᓇ ᐃᐡᑯᑌ ᑲᐅᐣᒋᐊᓄᑭᒪᑲᐠ ᑲᓇᓇᑐᓂᑲᑌᑭᐣ ᑫᐅᐣᒋᐅᔑᒋᑲᑌᑭᐣ ᑌᑎᐸᐦᐃ ᐊᐧᓴ ᑭᐁᐧᑎᓄᐠ; ᐊᓂᔑᓂᓂᐃᐧ ᑕᔑᑫᐃᐧᓂᐠ ᐊᐦᑭ ᑫᐃᓇᐸᑕᐠ ᐅᓇᒋᑫᐃᐧᐣ ᑲᐱᒥᔭᓄᑲᑌᐠ ᑲᐅᐣᒋ ᑲᓇᐊᐧᐸᐣᒋᑲᑌᐠ ᐊᐧᓴ ᑭᐁᐧᑎᓄᐠ ᐅᓇᑯᓂᑫᐃᐧᓂᐠ; ᒥᓇ ᐱᑯ ᑯᑕᑭᔭᐣ ᓇᓇᑐᐠ ᐊᓂᒧᒋᑫᐃᐧᓇᐣ.
ᐠᕑᐊᐳ ᐅᑭᒥᓄᑕᐊᐧᐣ ᐸᐧᐠᐢ ᑲᑭᐊᐃᑭᑐᓂᐨ.
“ᑲᑭᓇ ᐊᐃᐧᔭᐠ ᐅᒪ ᑲᑭᐅᑲᐧᐱᐦᑎᐊᐧᐨ ᐅᑭᐅᐣᒋ ᐃᐧᒋᐦᐃᑯᓇᐊᐧ ᑲᑭᐃᔑᐃᐧᐣᑕᒪᑫᓂᐨ ᐊᓂᐣ ᐁᐱᒋᑭᒋᓀᐣᑕᑲᐧᐠ ᒋᑲᑫᐧ ᓂᓯᑕᐃᐧᓇᒪᐠ ᓇᐱᐨ ᐁᒥᔑᓀᐧᑭᓇᑲᐧᐠ ᑲᐊᔭᑭᑕᐃᐧᑭᐣ ᑫᑯᓇᐣ ᒋᔭᓂᔑ ᐱᒥᔭᓄᑲᑌᑭᐣ ᑲᑲᑫᐧ ᑌᐱᓂᑲᑌᐠ ᐱᐊᐧᐱᑯᑫᐃᐧ ᐊᓄᑭᐃᐧᐣ,” ᐠᕑᐊᐳ ᑭᐃᑭᑐ. “ᑲᐃᐧᓂᐣ ᐃᑯ ᑌᐱᓇᐠ ᒋᒧᒋ ᑲᑫᐧᒋᒥᑎᓇᓄᐊᐧᐠ ᐊᓂᐣ ᑲᐃᐧᐃᔑ ᐅᓀᒋᑌᐠ ᑫᐃᔑᓇᑯᒋᑲᑌᐠ ᐃᓇᒧᒋᑫᐃᐧᐣ, ᑲᐃᐧᐣ ᒥᓇ ᒋᐁᐧᐣᑕᐠ ᑫᑯᐣ ᑲᑲᑫᐧ ᐅᓀᐣᒋᑲᑌᐠ ᐊᐣᑎ ᑫᔭᓂᔑ ᐱᒪᓄᑲᑌᐠ ᐃᐁᐧ ᑫᐅᐣᒋ ᐱᒪᒧᒋᑲᓄᐊᐧᐠ. ᒪᐊᐧᐨ ᐃᑯ ᐊᓂᒥᓇᑲᐧᓄᐣ ᑫᑯᓇᐣ ᐱᓇᒪ ᓂᑲᐣ ᒋᐱᒥᐊᓂᒧᑕᒪᑎᓇᓄᐊᐧᐠ, ᐊᓂᐡ ᑫᐃᐧᐣ ᐅᐣᑌᕑᐃᔪ ᐅᑭᒪᐅᐣ ᐅᑭᒋᓀᐣᑕᓇᐣ ᐁᑲ ᑲᐧᐣᑕ ᒋᑐᒋᑲᑌᓂᑭᐣ.”
ᐠᕑᐊᐳ ᑭᐃᑭᑐ ᑲᑭᓇ ᐃᒪ ᑲᐸᐸᒥᓯᐨ ᐱᐊᐧᐱᑯᑫᐃᐧ ᐊᓄᑭᐃᐧᓂᐠ ᓇᑕᐁᐧᐣᑕᑯᓯᐊᐧᐠ ᒋᐃᐧᑕᓄᑭᒥᑐᐊᐧᐨ ᒋᔭᓄᒋ ᑲᐡᑭᒋᑲᑌᐠ ᐊᓂᐣ ᑫᔭᓂᔑᓇᑲᐧᐠ ᑫᐃᔑᐱᒪᓄᑲᑌᐠ.
“ᒪᒪᐤ ᒋᐃᐧᑕᓄᑭᒥᑎᓇᓄᐊᐧᐠ, ᒥᓇ ᒋᑲᑫᐧ ᓂᓯᑕᐁᐧᐣᒋᑲᑌᐠ ᐃᒪ ᐁᑕ ᑫᑭᐅᐣᒋ ᑲᐡᑭᒋᑲᑌᐠ ᒋᑭᔭᓂ ᒥᓄᓭᐠ ᐅᐁᐧ ᒪᒋᑕᐃᐧᐣ, ᐅᐣᒋᑕ ᐱᑯ ᓇᑕᐁᐧᐣᑕᑲᐧᐠ ᐃᐧᒋᐦᐃᑐᐃᐧᐣ ᒋᑭᑭᒪᑲᐠ,” ᐠᕑᐊᐳ ᑭᐃᑭᑐ.
ᓇᑕᐁᐧᐣᑕᑲᐧᐣ ᓂᑲᐣ ᒋᑭ ᑲᑫᐧᒋᒥᑎᓇᓄᐊᐧᑭᐸᐣ ᐁᒪᐧᔦ ᑫᑯᐣ ᐊᓂᒪᑕᓄᑲᑌᐠ
“ᐊᔕ ᑲᔦ ᐣᑕᓂᐱᒥ ᐱᒋᓂ ᐸᔭᑌᓂᓯᑕᐃᐧᓇᐣ ᐃᓂᐁᐧᓂᐊᐧᐣ ᐊᓂᔑᓂᓂᐃᐧ ᑕᔑᑫᐃᐧᓇᐣ ᐁᓇᑕᐁᐧᐣᑕᒧᒪᑲᑭᐣ ᒋᑲᒋᑎᓇᒪᓱᒪᑲᑭᐣ ᐱᐊᐧᐱᑯᑫᐃᐧ ᐊᓄᑭᐃᐧᓇᐣ ᐁᑲᐧ ᑕᐡ ᒥᓇ ᐅᑭᐸᔭᑌᑕᑯᒧᑐᓇᐊᐧ ᐁᓇᑕᐁᐧᐣᑕᒧᐊᐧᐨ ᑫᒋᓇᐨ ᐃᑯ ᑲᐧᔭᐠ ᒋᐅᓇᑕᒪᐃᐧᐣᑕᐧ ᒥᓇ ᒋᐃᐧᒋᐦᐃᑯᐊᐧᐨ ᐅᑕᔑᑫᐃᐧᓂᐊᐧᐠ”
ᐠᕑᐊᐳ ᑭᐃᑭᑐ ᓇᑕᐁᐧᐣᑕᑲᐧᐣ ᒋᐃᔑᐅᓇᑌᐠ ᑭᓀᐧᐡ ᑫᐃᔑᐱᒥᓂᔕᐦᐃᑲᑌᐠ ᑫᒋᓇᐨ ᐃᒪ ᒋᑲᐧᔭᑯᓭᐠ ᐱᐊᐧᐱᑯᑲᓂ ᐊᓄᑭᐃᐧᐣ.
“ᒪᐊᐧᐨ ᐃᑯ ᑭᒋᑫᑯᓄᐊᐧᐣ ᐅᐁᐧ ᑫᔭᓂ ᐊᔭᒪᑲᐠ ᐊᓄᑭᐃᐧᐣ ᐱᓂᐡ ᐁᐧᑎ ᒥᑕᓱᒥᑕᓇ ᑕᓱᔭᑭᐃᐧ ᓂᑲᐣ, ᑫᔭᓂ ᐊᓂᑫᐱᒪᑎᓯᐊᐧᐨ ᒋᔭᓂᔑᐊᓄᑭᐊᐧᐨ,” ᐠᕑᐊᐳ ᐃᑭᑐ. “ᑲᐧᔭᐠ ᑕᐡ ᒋᑲᑫᑐᑕᐠ ᐅᓇᒋᑫᔭᐠ, ᒥᑕᐡ ᑲᑭᐧᐅᐣᒋ ᐅᓇᓴᑭᐣᑕᐧ ᑫᐅᐣᒋ ᓂᑲᓂᐡᑲᒪᑫᐨ ᐱᐊᐧᐱᑯᑲᓂ ᐊᓄᑭᐧᐃᓂ, ᐁᑲᐧ ᒥᓇ ᐊᐧᐁᐧ ᑯᑕᐠ ᑫᔭᓂ ᐊᓂᑯ ᓂᑲᓂᐡᑲᒪᑫᐨ ᐱᐊᐧᐱᑯᑲᓂ ᐊᓄᑭᐃᐧᓂ, ᑫᑯᓀᐣ ᑲᐅᐣᒋ ᑭᒋᐊᓄᑭᔭᐣᐠ ᑲᐅᐣᒋ ᐃᐧᑕᓄᑭᒪᐣᑭᑕᐧ, ᐊᓂᔑᓂᓂᐊᐧᐠ ᒥᓇ ᑲᑦᐸᓂᐠ, ᒋᐅᐣᒋ ᐃᐧᒋᐦᐃᑯᔭᐠ ᒪᒪᐤ ᑫᒋᓇᐨ ᒋᔭᓂ ᒪᒋᓂᐡᑲᔭᐠ. ᐊᓂᐡ ᒪᐊᐧᐨ ᐁᑭᒋᓀᐣᑕᑲᐧᐠ ᐅᐁᐧ.”
ᐠᕑᐊᐳ ᐃᔑᐸᑯᓭᓂᒧ ᐅᐁᐧᓂ ᐱᐊᐧᐱᑯᑲᓂ ᐊᓄᑭᐃᐧᓂ ᐸᐸᑲᐣ ᒋᐊᓂᔑᐊᓄᑲᑌᓂᐠ ᐯᔑᑲᐧᐣ ᐃᓀᑫ ᒋᐃᔑᐱᒥᐡᑲᒪᑲᓂᐠ ᑐᑲᐣ ᐊᑎᐟ ᑲᐊᔭᑭᐣ ᐅᐣᑌᕑᐃᔪ ᐊᐦᑭᐠ ᑯᑕᑭᔭᐣ ᐁᐧᐡᑲᐨ ᑲᐱᐅᐣᒋ ᐱᒪᓄᑲᑌᑭᐣ ᐱᐊᐧᐱᑯᑲᓇᐣ ᐁᐧᑎ ᒥᐢᑯᓴᑲᐦᐃᑲᓂᐠ, ᑭᕑᐠᓫᐊᐣᐟ ᓴᑲᐦᐃᑲᓂᐠ, ᑎᒥᐣᐢ ᒥᓇ ᐁᐧᑎ ᓴᐟᐯᕑᐃ ᐅᑌᓇᐠ.

See also

12/01/2015 - 19:37
12/01/2015 - 19:37
12/01/2015 - 19:37
12/01/2015 - 19:37