ᑲᐧᔭᐠ ᐅᑐᐣᒋ ᑭᑭᓄᐦᐊᒪᑯᓇᐊᐧ ᐅᐡᑲᑎᓴᐠ ᑲᑭᐱᒧᓭᐃᐧᓂᑫᐊᐧᐨ

ᐊᒥ ᐊᔕ ᓂᐦᓱᓂᐱᐣ ᐁᑐᑕᒧᐊᐧᐨ ᑕᓱᓂᐱᐣ ᐱᒧᓭᐃᐧᐣ ᑲᐃᔑᒋᑫᐊᐧᐨ ᐁᐃᐧᐅᐣᒋ ᑭᑭᓇᐊᐧᐸᐣᑎᓂᐁᐧᐊᐧᐨ ᐁᐱᒧᓴᑕᒧᐊᐧᐨ ᑲᐃᔑᐊᓂᒧᑕᒧᐊᐧᐨ ᑲᐱᒥᓂᔕᐦᐊᒧᐊᐧᐨ ᒥᓄᐱᒪᑎᓯᐃᐧᓂ.
“ᐣᑭᐅᒋ ᓂᓯᑕᐁᐧᐣᑕᐣ ᐁᑲ ᐃᐧᐣ ᓇᐣᑕ ᐁᔑᑭᒋᐃᓀᐣᑕᑲᐧᐠ ᐁᑲ ᑫᑯᐣ ᑲᑐᑕᒪᐣ ᓇᐣᑕ ᒥᓇ ᑲᐃᔑᐸᐸᓂᓭᔭᐣ; ᐃᐁᐧ ᐃᔑᑭᒋᓀᐣᑕᑲᐧᐣ ᑲᑐᑕᒪᐣ ᒥᓇ ᑫᑯᓀᐣ ᑲᑭᑭᐡᑲᑯᔭᐣ,” ᑭᐃᑭᑐ ᓫᐊᕑᐃᓴ ᑎᕑᐅᓯᔦ, ᑲᓂᑲᓂᐡᑲᒪᑫᐨ ᐃᒪ ᐅᐡᑭ ᐊᔭᐊᐠ ᒥᓄᐱᒪᑎᓯᐃᐧᐣ ᑲᐃᔑᓂᑲᑌᐠ. “ᐃᐁᐧ ᐱᑯ ᐁᑕᐃᐧᓂᑲᑌᐠ ᒋᐱᒧᓴᑕᒪᐣ ᑲᐃᔑᓇᑯᑐᔭᐣ ᑭᐱᒪᑎᓯᐃᐧᐣ… ᐁᐃᐧᐊᐣᒋᑐᔭᐣ ᒥᓇ ᒥᓄᑫᑯᓇᐣ ᐁᐃᐧᑐᑕᒪᐣ.”
ᐅᒪ ᑲᑕᑭᐧᓇᓄᐊᐧᐠ ᐱᒧᓭᐃᐧᓂᐠ ᐅᐣᒋ ᑭᑭᓄᐦᐊᒪᑫᒪᑲᐣ ᒋᒪᐡᑲᐃᐧᑲᐸᐃᐧᐨ, ᑫᐅᐣᒋᑲᐧᔭᑯᔑᐣᐠ ᒥᓇ ᒋᐅᔑᐯᐣᑕᒧᐃᐧᓂᐨ, ᐃᑭᑐ ᑎᕑᐅᓯᔦ, ᐊᔕ ᑫᐃᐧᐣ ᓂᔓᓂᐱᐣ ᐅᑭᑐᑕᓇᐣ ᐱᒧᓭᐃᐧᐣ ᑲᑭᑐᒋᑲᑌᐠ ᒣᑲᐧᐨ 2009 ᒥᓇ 2010 ᑲᑭᐱᒧᓭᐨ.
ᐁᑲᐧ ᐃᓂᐁᐧᓂᐊᐧᐣ ᑲᑭᐅᐣᒋ ᐃᐧᒋᐱᒧᓭᒪᐨ ᑕᐱᐡᑯᐨ ᐃᑯ ᓂᐊᐧᑯᒪᑲᓇᐠ ᐣᑭᔭᓂᐃᓀᓂᒪᐠ, ᐃᑭᑐ.
“ᓂᐣ ᐃᐧᓂᑯ ᐁᔑᐯᔑᑯᔭᐣ, ᐊᒥ ᐁᔑᓂᑲᓇᑲᐧ ᑯᑕᑭᔭᐠ ᓂᐊᐧᑯᒪᑲᓇᐠ ᒣᑲᐧᐨ ᑲᓂᐱᐠ. ᒪᐊᐧᐨ ᐃᑯ ᐣᑐᒋᐯᔐᐧᓂᒥᑎᒥᐣ ᐁᑲᐧ ᒥᓇ ᓄᑯᑦ ᑲᓂᐱᐠ ᒪᐊᐧᐨ ᑭᒥᔑᓄᐊᐧᐠ, ᐊᑎᐟ ᑫᑯᓇᐣ ᑭᐅᐣᒋᐊᓂᒥᓭᐊᐧᐣ, ᔕᑯᐨ ᐣᑭᐅᐣᒋ ᐃᐧᒋᐦᐃᑯᒥᐣ ᐊᐊᐧᔑᒣ ᒋᐅᐣᒋ ᒪᐡᑲᐃᐧᓯᔭᐣᐠ ᑲᔭᓂᑭᔑᑐᔭᐣᐠ ᐣᐱᒧᓭᐃᐧᓂᓇᐣ,” ᐃᑭᑐ.
ᑯᒋᒋᐣᐠ ᐁᐅᐣᒋᐨ ᒐᐢᑎᐣ ᒪᐧᕑᐃᓴᐣ ᑫᐃᐧᐣ ᐊᔕ ᓂᐦᓴᐧ ᐅᑭᑭᔑᑐᐣ ᐊᐁᐧᓂ ᑲᐱᒧᓭᓇᓂᐊᐧᓂᐠ.
“ᒪᐊᐧᐨ ᒥᓀᐧᐣᑕᑲᐧᐣ,” ᐃᑭᑐ. “ᐊᔕ ᓂᐦᓱᓂᐱᐣ ᐣᑐᒋᑐᑕᐣ ᐅᐁᐧ ᐁᑲᐧ ᑕᓴᐧ ᑲᐃᔕᔭᐣ ᐅᐡᑭᑫᑯᓇᐣ ᐣᑐᑎᓇᓇᐣ ᐁᐅᐣᒋ ᑲᑭᑫᐣᑕᒪᐣ ᐃᒪ ᑎᐱᓇᐁᐧ ᓂᐱᒪᑎᓯᐃᐧᓂᐠ ᒥᓇ ᐁᐅᐣᒋ ᓂᓯᑕᐁᐧᐣᑕᒪᐣ.”
ᐃᒪ ᓇᐣᑕ 20 ᐅᐡᑲᑎᓴᐠ ᐁᐧᑎ ᑯᒋᐣᐠ, ᐅᓂᑲᒥᐣᐠ, ᐱᐠ ᐠᕑᐊᓯ, ᕑᐁᓂ ᕑᐃᐳᕑ ᐃᐡᑯᓂᑲᓂᐠ, ᐊᐧᓂᓇᐊᐧᑲᐠ, ᒪᓂᑐᐸ ᒥᓇ ᐃᐧᐢᑲᐣᓯᐣ ᑭᑕᑭᐧᐊᐧᐠ ᓄᑯᑦ ᑲᑭᓂᐱᐠ ᐱᒧᓭᐃᐧᓂᐠ, ᐁᑲᐧ ᑫᐃᐧᐣ ᐊᓫ ᐦᐊᐣᑐᕑ, ᑲᑭᐅᐡᑭᒪᒋᑐᐸᐣ ᒥᓇ ᑲᓂᑲᓂᐱᒧᑐᐨ ᐅᐡᑭ ᐊᔭᐊᐠ ᒥᓄᐱᒪᑎᓯᐃᐧᐣ.
“ᒪᐊᐧᐨ ᐊᑯ ᐣᑐᐣᒋᒥᓀᐧᐣᑕᐣ ᑲᐊᐧᐸᒪᑲᐧ ᐊᐱ ᓂᐢᑕᑦ ᑲᒪᒋᑕᐊᐧᐨ ᐅᐱᒧᓭᐃᐧᓂᐊᐧ ᐁᑲᐧ ᐊᐱᐣ ᑲᑭᔑᑐᐊᐧᐨ,” ᐃᑭᑐ ᐦᐊᐣᑐᕑ, ᐅᑭᐅᔑᑐᓇᐸᐣ ᒪᓯᓇᐦᐃᑲᐣ ᑲᑭᐊᒋᒪᐨ ᒥᑕᑎᒧᐣ ᐁᑲᐧ ᒥᓇ ᑭᐅᑭᒪᑲᓂᐃᐧᐸᐣ ᐃᒪ ᕑᐁᓂ ᕑᐃᐳᕑ.
“ᐅᐣᒋᓇᐣᑫᓂᒧᐊᐧᐠ ᒥᓇ ᒥᐧᓀᐣᑕᒧᐠ ᒥᓇ ᓴᑭᐦᐃᑐᐊᐧᐠ ᒥᓇ ᐅᓴᑭᑐᓇᐊᐧ ᑲᐅᐣᑕᑲᓀᓯᐊᐧᐨ ­– ᒪᐊᐧᐨ ᐃᑯ ᒪᒪᑲᑌᐣᑕᑲᐧᐣ ᑲᐃᔑᐡᑲᑫᒪᑲᐠ.”
ᐅᐡᑲᑎᓴᐠ ᑭᐱᐦᑲᓄᐊᐧᐠ ᐊᐱ ᑲᐱᑕᑲᐧᐦᐊᑐᐊᐧᐨ ᐁᑭᑲᐧᔭᐣᑕᒋᑲᑌᓂᐠ ᒥᒋᒪᐣ ᒥᓇ ᑫᐃᔑᑲᐯᔑᐊᐧᐨ ᐃᒪ ᑕᔑᑫᐃᐧᓇᐣ ᑲᑭᔭᓂᐊᐃᔕᐊᐧᐨ 500 ᑎᐸᐦᐊᑲᐣ ᑲᑭᐱᒪᐦᐊᑐᐊᐧᐨ, ᐁᑲᐧ ᑭᒪᒋᑕᐊᐧᐠ ᐅᐸᐦᐅᐃᐧᐱᓯᑦ ᑲᐅᐡᑲᑭᓱᓂᐨ ᐃᒪ ᒥᑭᓯᐃᐧᓴᑲᐃᑲᓂᐠ ᑭᐅᐣᒋᒪᒋᐦᐊᑐᐊᐧᐠ ᐁᑲᐧ ᐊᐱᐣ ᑭᑭᓂᑲᐧᓂᐡᑲᐊᐧᐠ ᐁᐧᑎ ᑯᒋᒋᐣᐠ, ᕑᐁᓂ ᕑᐃᐳᕑ, ᐅᓂᑲᒥᐣᐠ ᒥᓇ ᓇᕑᐟ ᐁᐧᐢᐠ ᐁᐣᑯᓫ #37 ᐁᒪᐧᔦ ᒥᓇᐊᐧ ᐱᑭᐁᐧ ᑕᑲᐧᐦᐊᑐᐊᐧᐨ ᒥᑭᓯᐃᐧᓴᑲᐃᑲᓂᐠ ᐅᐸᐦᐅᐃᐧᐱᓯᑦ 8 ᑲᐃᓇᑭᓱᓂᐨ.
ᑲᑭᐊᓄᓂᐣᑕᐧ ᒋᑎᐸᒥᒧᐊᐧᐨ ᑲᑭᐃᔑᐊᔭᑭᓀ ᑭᒋᐱᐊᐧᐨ ᑭᑎᐸᒋᒧᐊᐧᐠ ᐅᑎᐸᒋᒧᐃᐧᓂᐊᐧ, ᐅᑕᓂᔑᓂᓂᐃᐧ ᑭᑭᓄᐦᐊᒪᑫᐃᐧᓂᐊᐧ ᒥᓇ ᐊᓂᐣ ᐁᔑᐸᑯᓭᓂᒧᐊᐧᐨ, ᑲᑭᐃᔑ ᑲᐡᑭᐦᐅᐊᐧᐨ ᒥᓇ ᑲᐃᔑᒥᐣᒋᒥᓇᒧᐊᐧᐨ ᐅᐸᐊᐧᒧᐃᐧᓂᐊᐧ ᒥᓇ ᑲᐃᐧᐃᔑᑲᑫᐧ ᑲᒋᑎᓂᑫᑕᒪᐊᐧᐊᐧᐨ ᐅᑐᐡᑲᑎᓯᒥᐊᐧᐣ.
ᐊᐧᐁᐧ ᑎᕑᐅᓯᔦ, ᐅᓂᑲᒧ ᒥᓇ ᑲᐅᔑᑐᐨ ᓂᑲᒧᓇᐣ, ᐁᑲᐧ ᒥᓇ ᒉᕑᐃᒥ ᒐᐧᕑᑎᐣ, ᐅᐡᑭ ᓂᑲᒧᓇᐣ ᑲᐃᓀᐧᐦᐊᒪᓱᐨ ᑲᐃᔑᓂᑲᓂᑎᓱᐨ ᒪᐠ ᓯᐠᐢ, ᑫᐃᐧᐣ ᑭᓇᓂᑲᒧ ᒣᑲᐧᐨ ᑲᑭᐱᒥ ᐱᒧᓭᐊᐧᐨ ᑲᑭᐱᒥ ᐊᐧᐃᐧᐣᑕᒪᑎᐊᐧᐨ ᐅᑎᐸᒋᒥᑎᓱᐃᐧᓂᐊᐧ ᒥᓇ ᑲᐃᔑᐸᐊᐧᑕᒧᐊᐧᐨ ᒥᓄᐱᒪᑎᓯᐃᐧᓂ.
“ᐁᑲᓇᐊᐧᐸᒪᑲᐧ ᐅᐡᑲᑎᓴᐠ ᐁᐅᐣᒋ ᐊᐧᐃᐧᒋᐦᐃᑎᐊᐧᐨ ᒣᑲᐧᐨ ᑲᐱᒧᓭᐊᐧᐨ ᒪᐊᐧᐨ ᐃᑯ ᑭᒥᓀᐧᐣᑕᑲᐧᐣ, ᔕᑯᐨ ᑲᔦ ᑲᑭᐃᔑᐊᐧᐸᒪᑲᐧ ᐁᐱᒥ ᐃᐧᒋᐦᐃᑎᐊᐧᐨ ᒣᑲᐧᐨ ᑲᐱᑭᐊᓂᒣᐣᑕᒧᐊᐧᐨ ᐅᒧᔑᐦᐅᐃᐧᓂᐊᐧᐠ ᒪᐊᐧᐨ ᐃᑯ ᑭᐅᐣᒋ ᑭᒋᐃᐧᒋᐦᐃᐁᐧᒪᑲᐣ,” ᐃᑭᑐ ᑐᕑᐃᓴ ᐦᐁᓱ, ᑲᐅᑭᒪᐃᐧᐨ ᐅᐡᑭ ᐊᔭᐊᐠ ᒥᓄ ᐱᒪᑎᓯᐃᐧᐣ. “ᒥᑐᓂ ᐱᑯ ᑭᑭᒋᓀᐣᑕᑲᐧᐣ ᑲᑭᐱᒧᓭᓇᓂᐊᐧᐠ.”
ᐦᐁᓱ ᐅᑭᐊᐧᐸᐣᑕᐣ ᒪᐡᑲᐃᐧᓯᐃᐧᐣ, ᑲᐡᑭᐦᐅᐃᐧᐣ ᒥᓇ ᑭᑌᓂᒧᐃᐧᐣ ᐁᑭ ᐅᐣᒋ ᑲᒋᑎᓇᒧᐊᐧᐨ ᐅᐡᑲᑎᓴᐠ ᐊᐱᐣ ᑲᔭᓂ ᑭᔑᑐᐊᐧᐨ ᐅᐱᒧᓭᐃᐧᓂᐊᐧ.
“ᐣᑭᐊᐧᐸᒪᐠ ᐅᐡᑲᑎᓴᐠ ᐁᑭᑭᐡᑲᑯᐊᐧᐨ ᑭᑌᓂᒥᑎᓱᐃᐧᐣ ᐅᐃᐧᐣᑲᐧᓂᐊᐧᐠ ᐊᐱᐣ ᑲᐱᑕᑯᔑᓄᐊᐧᐨ,” ᐦᐁᓱ ᐃᑭᑐ. “ᐸᐸᑲᐣ ᐅᑭᐃᔑ ᓇᓇᑭᐡᑲᓇᐊᐧ ᑫᑯᓇᐣ ᐅᑎᓇᒪᐣᒋᐦᐅᐃᐧᓂᐊᐧᐠ ᒣᑲᐧᐨ ᑲᑭᐱᒧᓭᐊᐧᐨ ᒥᑲᓇᐠ, ᐃᐧᓇᐊᐧ ᐱᑯ ᑎᐱᓇᐁᐧ ᐁᐱᒥᐃᐧᓂᑎᓱᐊᐧᐨ ᑭᒋᒥᑲᓇᐠ. ᐅᑭᐊᐧᐸᐣᑕᓇᐊᐧ ᒥᓇ ᐅᑭᒥᑫᐧᐣᑕᓇᐊᐧ ᐸᐸᑲᐣ ᑫᑯᓇᐣ, ᒥᑕᐡ ᐃᒪ ᒥᓄᑫᑯᓇᐣ ᑲᑭᐅᐣᒋ ᑲᒋᒋᐡᑲᑯᐊᐧᐨ ᐅᐱᒪᑎᓯᐃᐧᓂᐊᐧᐠ.”
ᐅᐡᑲᑎᓴᐠ ᒥᓇᐊᐧ ᑭᔭᓂ ᑭᓂᑲᐧᓇᐱᑕᑎᐊᐧᐠ ᐁᑭᐃᐧᑕᐱᒥᑯᐊᐧᐨ ᑭᒋᐅᑭᒪᑲᓇᐣ ᒋᕑᐃᑎ 3 ᐅᑭᒋᑕ ᐊᕑᓄᐟ ᑲᕑᐟᓄᕑ ᐊᐱ ᑲᑭᔑᑐᐊᐧᐨ ᐅᐱᒥᒧᓭᐃᐧᓂᐊᐧ. ᐊᑎᐟ ᑲᔦ ᐅᐡᑲᑎᓴᐠ ᑭᐱᐣᒋᐊᐧᐠ ᒪᐣᑐᐃᐧᑭᐊᐧᒥᐠ ᑲᑭᐱᒧᑐᐨ ᓇᐧᐸᐟ ᑫᓫᐃ. ᐁᑲᐧ ᒥᓇᐊᐧ ᓂᐱᐠ ᓂᐊᐧ ᐱᒧᓭᐃᐧᐣ ᑕᑐᒋᑲᑌ.