ᑯᒋᒋᐣᐠ ᐅᐡᑲᑎᐢ ᑭᐅᑕᐱᓇ ᒋᑭᑭᓄᐦᐊᑯᓯᐨ ᐸᐡᑲᐧᐣᐠ ᑐᐦᐁᐃᐧᐣ ᑲᑕᔑ ᑭᑭᓄᐦᐊᒪᑎᓇᓄᐊᐧᐠ

ᕑᐃᐠ ᑲᕑᐃᐠ
ᐊᐧᐊᐧᑌ ᐊᒋᒧᐃᐧᓇᐣ
ᑯᒋᒋᐣᐠ ᑲᐅᐣᒋᐨ ᑕᔾᓴᐣ ᒪᐧᕑᓱ ᒪᐊᐧᐨ ᐃᑯ ᐸᐱᐦᐅ ᒋᒪᒋ ᑭᑭᓄᐦᐊᒪᑯᐨ ᑕᔾᑯᕑ ᐅᐟᐢ ᑲᑭᐱ ᑭᑭᓄᐦᐊᒪᑯᐸᐣ ᐁᐧᑎ ᑲᑭᐅᑕᐱᓇᑲᓄᐨ ᐦᐊᐣᐠ ᐦᐁᓂ ᒍᓂᔪᕑ ᐸᐡᑲᐧᐣᐠ ᑐᐦᐁᐃᐧᐣ ᑭᑭᓄᐦᐊᒪᑐᐃᐧᑲᒥᑯᐠ.
“ᒪᐊᐧᐨ ᐃᑯ ᐣᑭᑭᒋ ᒥᓀᐣᑕᐣ ᐁᑲᐧ ᒥᓇ ᑲᐃᐧᐣ ᓂᐢᑕᑦ ᒋᐅᐣᒋ ᑌᐯᐧᑕᒪᐣ ᐁᑭᐅᑕᐱᓂᑯᔭᐣ,” ᒪᐧᕑᓱ ᐃᑭᑐ. “ᒥᐦᐅᒪ ᐁᐅᐣᒋ ᑕᐃᐧᓭᐠ ᒋᑯᒋᑐᔭᐣ ᒪᐊᐧᐨ ᑲᒥᓀᐧᐣᑕᒪᐣ ᐁᑐᑕᒪᐣ ᐁᑲᐧ ᒥᓇ ᒋᐅᐣᒋ ᑭᑭᓇᐊᐧᐸᐣᑕᐦᐊᑲᐧ ᐊᓂᔑᓂᓂᐊᐧᐠ ᑲᓇᑕ ᒥᓇ ᑭᒋᒧᑯᒪᐣᐊᐦᑭᐠ ᑲᑲᐯᔑᐊᐧᐨ.”
ᐊᐃᓇᓀᐤ ᐊᐱᒋᑭᑫᐣᑕᓱ ᐊᐧᐁᐧ ᐅᑎᐡᑯᓂ ᐃᐧᐣ ᒪᐊᐧᐨ ᓂᐢᑕᑦ ᐁᐊᓂᔑᓂᓂᐃᐧᐨ ᑲᑭᐅᑕᐱᓇᑲᓄᐨ ᒋᐃᐡᑯᓄᐃᐧᐨ ᐃᒪ ᑭᒋᐃᐡᑯᓄᐃᐧᓂᐠ, ᐁᑲᐧ ᐁᐧᑎ ᐃᔑᑕᑲᐧᐣ ᔕᐊᐧᓄᐠ ᑫᕑᐅᓫᐊᔾᓇ ᔕᐊᐧᓄᐠ ᑭᒋᒧᑯᒪᐣᐊᐦᑭᐠ.
ᑭᐱᐃᐧᐣᑕᒪᐊᐧᑲᓄ ᑲᔭᓂ ᐳᓇᑭᓱᓂᐨ ᐅᐸᐅᐃᐧᐱᓯᒧᐣ ᐁᑭᐅᑕᐱᓇᑲᓄᐨ 2012/2013 ᐃᐡᑯᓄᐃᐧᐊᐦᑭᐃᐧᐣ ᐁᑲᐧ ᑭᒧᐡᑭᓀᐱᐦᐃᑫᐸᐣ ᒣᑲᐧᐨ ᓴᑭᐸᑲᐃᐧᐱᓯᒧᐣ.
“ᒪᐊᐧᐨ ᓂᓇᑲᒋᑐᐣ ᐅᐁᐧ ᑲᑐᑕᒪᐣ - ᒪᐊᐧᐨ ᑲᔦ ᐸᔭᑕᑫᐣᑕᑲᐧᐣ ᐅᐁᐧ ᒣᑕᐁᐧᐃᐧᐣ,” ᒪᐧᕑᓱ ᐃᑭᑐ, ᐅᑭᐊᔭᑭᓀᐃᐧᐣᑕᐣ ᐊᐣᑎ ᐁᔑᓇᐦᐃᐨ ᐅᐁᐧᓂ ᑐᑲᐣ ᒣᑕᐁᐧᐃᐧᐣ ᑲᑕᓱᑐᒋᑲᑌᐠ. “ᒪᔭᑦ ᐣᑎᓇᓇᐦᐁ ᒥᓇ ᐱᑯ ᑲᐃᐧᐣ ᐃᑲᐧ ᒧᔕᐠ ᒋᐊᐧᓇᓇᐦᐁᔭᐣ.”
ᒪᐧᕑᓱ ᐊᔕ ᓂᓱᔭᑭ ᐅᑐᐣᒋᐱᒥᑐᑕᐣ ᐅᐁᐧᓂ ᑐᐦᐁᐃᐧ ᒣᑕᐁᐧᐃᐧᓂ.
“ᐃᒪ ᐱᑯ ᓇᐣᑕ 50 ᑕᓱᒥᓯᐟ ᐃᓂᑯᐠ ᑲᑐᑕᐣᐠ, ᒥᐦᐅᐁᐧᓂ ᒪᐊᐧᐨ ᑲᓇᑲᒋᑐᐨ,” ᐃᑭᑐ ᒪᐧᕑᓱ ᐅᑕᑕᒪᐣ, ᑲᓫᐱᐣ ᒪᐧᕑᓱ. “ᒣᑲᐧᐨ ᐃᐧᓂᑯ ᓄᑯᑦ ᐅᐱᒥᓄᒋᑐᐣ ᑐᐦᐊᐣ ᑲᑲᑫᐧ ᑭᓂᑲᐧᓀᐧᐸᐊᐧᑲᓄᐨ ᑫᐃᔑᑭᐁᐧᑯᒋᐣᐠ ᑲᐃᔑ ᑲᑫᐧᐱᐣᒋᐁᐧᐸᐦᐅᐣᐨ ᑭᐡᐱᐣ ᑲᐸᔑᑕᑯᒋᓂᐨ”
ᒪᐧᕑᓱ ᐊᑯ ᓂᑕ ᑲᑫᐧᒋᐊᐧᑫ ᑲᑲᑫᐧᒋᐸᑭᑌᐦᐃᑫᐨ ᐃᒪ ᐁᐅᐣᑎᓇᐠ ᑭᑭᓄᐦᐊᒪᑫᐃᐧᓇᐣ ᒪᒪᐣᑕᐃᐧ ᐱᐊᐧᐱᑯᐟ ᒥᓇ ᑲᐃᔑᒪᓯᓇᑌᓭᐠ ᐅᐁᐧ ᒣᑕᐁᐧᐃᐧᐣ. ᑲᓫᐱᐣ ᑲᔦ ᐅᑭᐅᔑᑐᓇᐸᐣ ᐊᑲᐧᒋᐠ ᑲᐃᔑᑲᐯᔑᐊᐧᐨ ᑫᑕᔑᑲᑫᐧᒋᓂᐨ ᐅᑯᓯᓴᐣ.
“ᐊᒥ ᐁᑐᑕᐠ ᐁᓇᒋᐱᑐᐨ ᑲᐃᔑ ᐊᐧᐃᐣᑕᒪᑫᒪᑲᑭᐣ ᑫᐊᐃᐣᑐᑕᐠ ᐃᒪ ᐅᑭᑐᐃᐧᓂᐠ ᑲᒧᒋᐸᐸᒧᐃᐧᒋᑲᑌᐠ,” ᑲᓫᐱᐣ ᐃᑭᑐ. “ᑲᐯᐦᐃ ᑕᐡ ᐃᑯ ᑲᑫᐧᒋ ᑲᒪᒪᒋᔭᑫᐧᐸᐊᐧᐨ ᑐᐦᐊᓀᓴᐣ. ᑲᐯᐦᐃ ᑲᔦ ᐅᐸᐸᒥᑕᑯᓇᐣ ᐅᒥᑎᑯᑦ.”
ᒪᐧᕑᓱ ᐊᔕ ᒥᑕᓱᔭᑭ ᐅᐣᒋᒣᑕᐁᐧ ᐅᐁᐧᓂ ᑐᑲᓂ ᒣᑕᐁᐧᐃᐧᓂ ᐊᑯᓇᐠ ᑲᐅᐣᒋᓂᓱᔭᑭᐃᐧᓀᐨ.
“ᒪᐊᐧᐨ ᐃᑯ ᓂᐢᑕᑦ ᑲᐅᐡᑭᒪᒋᒋᑲᑌᑭᐸᐣ ᒋᒣᑕᐊᐧᓄᐊᐧᐠ ᐅᒪ ᑯᒋᒋᐣᐠ, ᐣᑭᐱᐃᐧᒋᐃᐧᑯᐸᐣ,” ᑲᓫᐱᐣ ᐃᑭᑐ. “ᐃᒪ ᐱᑯ ᓇᐣᑕ 8 ᐊᑯᓇᐠ 10 ᐅᑕᑯ ᑲᐡᑭᑐᐣ. ᐁᑲᐧ ᒥᓇ ᐁᐡᑲᑦ 82 ᐊᑯᓇᐠ 84 ᐃᑲᐧᓇᐦᐁ ᑲᒪᒪᒋᔭᑫᐧᐸᐦᐃᑫ, ᐊᓂᓂᑯ ᑲᐃᓇᒪᐣᒋᐦᐅᐨ ᐃᐁᐧᓂ ᑲᑭᔑᑲᓂᐠ.”
ᒪᐧᕑᓱ ᒣᑕᐁᐧ ᓂᐊᐧ ᓇᐣᑕ ᓂᔭᓇᐧ ᐯᔑᑲᐧ ᐯᔑᑯᐱᒥᑯᓇᑲ ᐁᐧᑎ ᐦᐁᕑᐊᐣ ᓇᓯᐱᐣᐠ ᑐᐦᐁᐃᐧ ᒪᐡᑯᔑᑲᐣᐠ, ᓇᐣᑕ ᐱᑯ ᓂᔭᓄᑎᐸᐦᐃᑲᓀᐢ ᐊᐱᓯᓇᑲᐧᓂ ᑲᐃᔑᑲᐯᔑᐨ ᐃᐡᑯᓂᑲᓂᐠ.
“ᐁᑲᐧ ᑲᔦ ᒥᐢᑕᐦᐃ ᓂᑲᑫᐧᒋ ᒋᔐᔕᐃᐧᒪᐣᒋᐦᔭᐣ,” ᒪᐧᕑᓱ ᐃᑭᑐ. “ᑲᓂᐊᐧᐅᑦᐱᓂᑎᐢ, ᓂᒐᒋᐸᑕᐱᐱᓂᑎᐢ ᒥᓇ ᓂᔓᑎᐸᐦᐊᑲᐣ ᓂᐱᒥᐸᑐ ᑕᓱᑭᔑ ᐁᑲᐧ ᒥᓇ ᓂᐣᑐᐱᓇᓇᐣ ᑲᑯᓯᑲᐧᑭᐣ ᐅᑦᐱᓂᑲᓇᐣ.”
ᒪᐧᕑᓱ ᑭᐅᓇᒋᑲᑌᓂ ᓂᔓᐱᒪᑯᓇᑲ ᒋᐃᔕᐨ ᐊᔕ ᑲᑭᑲᐧᔭᐣᐅᓇᑌᓂᐠ ᐃᒪ ᐦᐊᐣᐠ ᐦᐁᓂ ᒍᓂᔪᕑ ᐸᐡᑲᐧᐣᐠ ᑐᐦᐁᐃᐧᐣ ᑭᑭᓄᐦᐊᒪᑐᐃᐧᑲᒥᑯᐠ ᒣᑲᐧ ᐊᐱ ᒥᑭᓯᐃᐧᐱᓯᒧᐣ.
“ᒥᓇᐊᐧ ᐊᐧᑌᐸᑲᐃᐧᐱᓯᑦ ᑕᑭᐁᐧᐃᔕ ᒥᓇ ᑲᐯᐱᐳᐣ ᑲᐱᒥᐃᐡᑯᓄᐃᐧ ᐃᐁᐧᑎ,” ᑲᓫᐱᐣ ᐃᑭᑐ. “ᐃᐁᐧ ᑕᐡ ᑲᐃᔑᒥᓀᐧᐣᑕᒪᐣ ᐁᐧᑎ ᑲᑭᐃᔑ ᐅᑕᐱᓇᑲᓄᐨ ᒪᐊᐧᐨ ᐃᑯ ᑲᐧᔭᐠ ᐁᑭᑭᓄᐦᐊᒪᐃᐧᐣᐧᑕ ᐃᒪ ᑲᐃᐡᑯᓄᐦᐃᐣᑕᐧ. ᑲᑭᓇ ᐅᐡᑲᑎᓴᐠ ᐃᒪ ᑲᐃᔕᐊᐧᐨ ᑲᔭᐧᐠ ᐅᐣᒋ ᐱᒋᓂᑭᑫᐣᑕᓱᐊᐧᐠ ᐊᐱᐣ ᑲᔭᓂ ᑭᔑᐃᐡᑯᓄᐊᐧᐨ.”
ᒪᐧᕑᓱ ᑲᔦ ᑕᓇᑕᐁᐧᐣᑕᑯᓯ ᒋᐊᐃᔕᐨ ᑕᓯᐣ ᑲᐅᓇᒋᑲᑌᓂᑭᐣ ᐃᔑᐯᔑᑯᔭᑭ ᒣᑕᐁᐧᐃᓇᐣ ᑲᑲᑫᐧᒋ ᐸᑭᓇᑎᓇᓄᐊᐧᐠ ᒣᑲᐧᐨ ᐱᒥᐃᐡᑯᓄᐃᐧᐨ ᐃᒪ ᐦᐊᐣᐠ ᐦᐁᓂ ᒍᓂᔪᕑ ᐸᐡᑲᐧᐣᐠ ᑐᐦᐁᐃᐧᐣ ᑭᑭᓄᐦᐊᒪᑐᐃᐧᑲᒥᑯᐠ ᐁᑲᐧ ᒥᓇ ᐃᒪ ᑕᐅᐣᒋ ᐃᐡᐸᑭᒪᑲᓄ ᒥᓇ ᒥᓇᑲᓄ ᒋᑎᐸᐦᐃᑲᑌᓂᐠ ᒋᐃᐡᑯᓄᐦᐊᑲᓄᐨ ᑭᒋᐃᐡᑯᓄᑲᒥᑯᐠ ᑐᑲᐣ ᑲᐧᓫᐃᐨ ᓇᐣᑕ ᔪᓂᐯᕑᓯᑎ ᐱᑯ ᐊᐣᑎ ᑭᒋᒧᑯᒪᐣᐊᐦᑭᐠ.
“ᒥᐦᐅᒪ ᑫᑭᔭᓄᒋ ᑌᐱᓇᐠ ᒋᑕᑭᐧᐨ ᐃᒪ ᒥᓯᐁᐧᑲᒥᐠ ᑲᐅᐣᒋ ᐃᐧᒋᒣᑕᐁᐧᒥᑐᐊᐧᐨ ᐸᐡᑲᐧᐣᐠ ᑲᑐᐦᐁᐊᐧᐨ,” ᑲᓫᐱᐣ ᐃᑭᑐ.
ᐊᓇᐃᐧᐣ ᒪᐧᕑᓱ ᐅᑎᐯᐣᒋᑫᐃᐧᐣ ᒪᓯᓇᐦᐃᑫᐊᐧᐠ $65,690 ᐯᔑᑯᔭᑭ ᑲᐃᓇᑭᐣᑌᐠ ᐅᑎᐡᑯᓄᐃᐧᐣ, ᔕᑯᐨ ᐅᐣᒋᐃᐧᒋᐦᐊᑲᓄᐊᐧᐠ ᐃᒪ ᐅᑕᔑᑫᐃᐧᓂᐊᐧᐠ ᒋᑎᐸᐦᐃᑲᑌᓂᐠ ᑕᔾᓴᐣ ᐦᐊᔾ ᐢᑯᓫ ᑲᑎᐸᐦᐃᑲᑌᓂᐠ ᒥᐡᑲᐧᐨ ᐃᒪ ᒋᐃᔑᑎᐸᐦᐃᑲᑌᓂᐠ ᓄᑯᑦ ᑲᐃᐧᐊᐣᑕᐃᐧ ᐃᐡᑯᓄᐃᐧᐨ.
ᑭᐅᓇᒋᑫᐊᐧᐠ ᑲᔦ ᐁᐃᐧᑭᒋ ᐱᐣᑯᑫᐃᐧᓂᑫᐊᐧᐨ ᒋᐅᐣᒋ ᑎᐸᐦᐃᑲᑌᓂᐠ ᐅᑎᐡᑯᓄᐃᐧᐣ.
“ᐦᐊᐣᐠ ᐦᐁᓂ ᒍᓂᔪᕑ ᐸᐡᑲᐧᐣᐠ ᑐᐦᐁᐃᐧᐣ ᑭᑭᓄᐦᐊᒪᑐᐃᐧᑲᒥᑯᐠ ᑭᐅᐣᒋᒥᓇᑲᓄ $5,000 ᒋᐅᐣᒋ ᑎᐸᐦᐃᑲᑌᓂᐠ ᐅᑎᐡᑯᓄᐃᐧᐣ ᐃᐁᐧᓂ ᐃᐧᐣ ᒪᐊᐧᐨ ᓂᐢᑕᑦ ᑲᐊᓂᔑᓂᓂᐃᐧᐨ ᐅᒪ ᑲᐱᐃᐡᑯᓄᐃᐧᐨ,” ᑲᓫᐱᐣ ᐃᑭᑐ. “ᐁᐧᑎ ᑲᔦ ᐣᑭᐃᔑ ᒧᐡᑭᓀᐱᐦᐃᑫᒥᐣ ᐠᕑᐃᑦᑲᒍᕑ ᔓᓂᔭᐃᐧ ᐸᑭᑎᓂᑫᐃᐧᓂᐠ.”
ᑲᓫᐱᐣ ᐃᑭᑐ ᐅᑎᐯᐣᒋᑫᐃᐧᐣ ᑲᔦ ᐅᑲᒥᓂᑯᐊᐧᐣ ᑲᑭᒪᓯᓇᐦᐅᑎᓱᓂᐨ ᐅᒪᓯᓇᑭᓱᐃᐧᐣ ᑫᕑᐃ ᑊᕑᐊᔾᐢ ᐃᒪ ᒪᐧᐣᐟᕑᐃᐊᓫ ᑲᓀᑎᔭᐣᐢ ᑲᐃᔑᐱᒪᑕᐦᐁᐨ ᒋᐊᑕᐊᐧᑫᐊᐧᐨ ᒋᐅᐣᒋ ᔓᓂᔭᑲᑫᐊᐧᐨ.