ᑭᓇᓇᑯᒧᓇᓂᐊᐧᐣ ᐃᐧᓂᔭᑦ ᐁᐧᐣᑕᕑ ᐊᓂᑭᐃᐧᓇᐣ ᑲᑭᑐᑕᑭᐣ ᒣᑲᐧᐨ ᑲᑭ ᐱᒪᑎᓯᐨ

ᐃᐧᓂᔭᑦ ᐁᐧᐣᑕᕑ ᑲᑭ ᐃᓇᑲᓄᐨ ᒥᑐᓂ ᑲᐧᔭᐠ ᐅᑭᐱᒥᐃᐧᑐᐣ ᐅᑕᒐᐦᑯᐊᓄᑭᐃᐧᐣ ᒥᓇ ᑲᔦ ᐁᑭ ᐱᒥᓂᔕᐦᐊᐣᑭᐣ ᑲᑭ ᐃᔑ ᑭᑭᓄᐦᐊᒪᑫᐨ.
“ᐃᐁᐧ ᑲᑭᐱᔑ ᐅᓇᑕᒪᑯᔭᐠ ᐅᑭᑭᓄᐦᐊᒪᑫᐃᐧᓇᐣ ᑫᒋᐊᐧᐠ ᑭᐊᐧᐸᐣᑕᐦᐃᐁᐧ ᑲᑭᐱᑐᐣᑕᐠ ᒣᑲᐧᐨ ᑲᑭᐱᒪᑎᓯᐨ,” ᐃᑭᑐ ᐊᓂᔑᓇᐯ ᐊᐢᑭ ᑭᒋ ᐅᓇᑭᒪᑲᐣ ᐢᑕᐣ ᐯᔭᑎ. “ᒪᐊᐧᐨ ᑭᑭᔐᐊᐧᑎᓯ, ᐁᑭ ᑭᒋᓀᓂᒪ̇ᒋᐣ ᑲᑭᓇ ᐊᐃᐧᔭᐣ ᒥᐦᐃᐁᐧ ᑲᑭᐃᔑᓇᑯᑐᐨ ᐅᐱᒪᑎᓯᐃᐧᐣ.”
ᐯᔭᑎ ᑭᐁᐧᒥᐦᑲᐃᐧ ᐊᐱ ᓂᐢᑕᑦ ᑲᑭ ᐅᓇᑭᒪᑲᓄᐸᐣ ᒋᐅᑭᒪᑲᓂᐃᐧᐨ ᐃᒪ ᐅᑕᔑᑫᐃᐧᓂᐣᐠ ᐃᐁᐧᓂ ᐃᐧᓂᔭᑦ ᐁᐧᐣᑕᕑ ᐅᑭᔐᐊᐧᑎᓯᐃᐧᐣ ᐁᑭ ᐅᐣᒋ ᑭᑭᓄᔥᑲᒪᑯᐨ ᐊᓂᐣ ᑫᐃᔑᐱᒧᑐᐨ ᐅᑕᓄᑭᐃᐧᐣ.
“ᓂᑭ ᐅᑭᒪᑲᓂᐦᐃᑯᓇᐸᐣ ᒣᑲᐧᐨ ᐁᐅᐢᑲᑎᓯᔭᐣ, ᐁᑲ ᒪᔑ 30 ᐁᐣᑕᓱᐱᐳᓀᔭᐣ,” ᐯᔭᑎ ᐃᑭᑐ. “ᐣᑭ ᐱᓇᓯᑲᑯᐸᐣ ᒣᑲᐧᐨ ᐁᐅᐢᑲᑎᓯᔭᐣ ᑲᐅᑭᒪᑲᓂᐃᐧᔭᐣ ᐁᑭ ᐱᐃᐧᐣᑕᒪᐃᐧᔑᐨ ᒋᐅᐣᒋ ᐊᓴᐧᐸᒥᔑᐨ ᑭᐢᐱᐣ ᓇᐣᑕᐁᐧᐣᑕᒪᐣ ᐃᐁᐧ ᒋᐃᔑ ᐃᐧᒋᐦᐃᔑᐨ. ᐁᑲᐧ ᑕᔥ ᒥᔑᓇᐧ ᐣᑭ ᓇᒋᐸᐦᐃᐊᐧᓇ ᒣᑲᐧᐨ ᑲᐱᒥ ᐊᓄᑭᑕᒪᑫᔭᐣ ᐅᒪ ᐊᐦᑭᐃᐧ ᐱᒧᒋᑫᐃᐧᓂᐣᐠ ᒪᐊᐧᐨ ᑕᔥ ᓂᓇᓇᑯᑦ ᐃᐁᐧ ᑲᑭᐃᓯᓭᐠ.”
ᐁᐧᐣᑕᕑ, ᐃᐧᐣ ᓂᐢᑕᑦ ᑲᐊᓂᔑᓇᐯᐃᐧᔭᐠ ᐁᑭ ᑭᒋᔭᒥᐦᐃᐁᐧᑭᒪᔑᔑᐃᐧᐦᐊᑲᓄᐨ ᐅᒪ ᑭᐁᐧᑎᓄᐠ ᐅᐣᑌᕑᐃᔪ, ᑭᐳᓂᐱᒪᑎᓯ ᒥᑭᓯᐃᐧᐱᓯᑦ 31 ᑲᐃᓇᐣᑭᓯᐨ ᐁᑲᐧ ᑕᔥ 89 ᑭᑕᓱᐱᐳᓀ ᐅᑎᐯᐣᒋᑫᐃᐧᓇᐣ ᐁᑭ ᓄᓴᐊᐧᐸᒥᑯᐨ ᐃᒪ ᐊᐧᓂᓇᐊᐧᑲᐠ.
“ᐊᒥᐦᐃᒪ ᐣᑫᓂᐣ ᑲᐦᐊᔭᔭᐣ ᒣᑲᐧᐨ ᐊᐸᐣ ᑲᐃᔥᑲᐧᓇᒧᐨ,” ᐃᑭᑐ ᐊᐧᐱᐢᑭᔭᒥᐦᐊᐃᐧ ᑭᒋ ᐊᔭᒥᐦᐁᐃᐧᑭᒪ ᓫᐁᑎᔭ ᒣᒣᑫᐧ ᑭᐁᐧᑎᓄᐠ ᐅᐣᑌᕑᐃᔪ ᐃᒪ ᑭᐁᐧᑎᐣ ᑕᔭᓯᐢ ᑲᐅᐢᒋ ᑎᐯᐣᑕᑯᓯᐨ ᒥᓇ ᑲᔦ ᐁᑭ ᐅᑐᔑᒥᑫᐧᒥᑯᐨ ᐃᐧᓂᔭᒧᐣ.
“ᐊᑎᐟ (ᐊᓂᔑᓂᓂᐊᐧᐠ) ᑭᐅᐣᒋᑲᐊᐧᐳᐊᐧᐠ ᒥᓇ ᑭᓂᑲᒧᐊᐧᐠ ᐁᑭ ᐃᓇᐦᐊᒪᓱᐊᐧᐨ ᑐᑲᐣ ᐊᐃᐧᔭ ᑲᓇᑲᑕᐦᑭᐨ ᒥᓇ ᑭᒋᑭᔑᑯᐃᐧ ᐅᑌᓇᐣᐠ ᑲᐃᔕᐨ.”
ᐁᐧᐣᑕᕑ ᑭᓇᐦᐃᑲᓇᑲᓄ ᓂᑭᐱᓯᑦ 4 ᑲᐃᓇᐣᑭᓯᐨ ᐅᑕᔑᑫᐃᐧᓂᐠ ᑭᐢᑭᒪᓂᓯᐊᐧᐳ ᐃᒪ ᐃᐢᑯᓄᐃᐧᑲᒥᑯᐃᐧ ᑭᒋᐊᐧᑲᐦᐃᑲᓂᐣᐠ ᒣᕑᐃᔭᐣ ᐊᑲᓇᔥ ᐃᐢᑯᓄᐃᐧᑲᒥᐠ ᒥᔑᐣ ᐊᐃᐧᔭᐠ ᒥᓯᐁᐧᑲᒥᐠ ᐁᑭ ᐊᐧᐅᐣᑎᓭᐊᐧᐨ, ᑕᑯ ᑲᔦ ᐯᔭᑎ, ᐊᓂᔑᓇᐯ ᑭᒋ ᐅᑭᒪᑲᓀᐢ ᒪᐃᐠ ᒥᑕᑎᐊᐧᐱᐣ ᒥᓇ ᑭᒋᐊᐧᐱᐢᑭᐊᔭᒥᐦᐃᐁᐧᑭᒪᔑᔥ ᑲᓂᑲᓂᐢᑲᐠ ᐱᕑᐁᐟ ᐦᐃᓫᐟᐢ.
“ᑭᓇᓇᑯᒧᐊᐧᑌᓂ ᑲᑭ ᐃᔑ ᒪᑎᓯᐃᐨ, ᒥᓇ ᐁᑭ ᓇᓇᑯᒧᓇᓂᐊᐧᐣᐠ ᑲᑭ ᐱᐊᓄᑲᑕᑭᐣ ᒥᓇ ᐱᑯ ᑲᑭ ᐱᑲᐢᑭᑕᒪᑯᔭᐣᐠ,” ᐯᔭᑎ ᐃᑭᑐ. “ᒥᑐᓂ ᑲᐧᔭᐠ ᐅᑭᑭᔑᑐᐣ ᐅᐱᒪᑎᓯᐃᐧᐣ ᒥᓇ ᑲᔦ ᑲᑭᓇ ᐯᒪᑎᓯᓂᐨ ᒥᐢᑕᐦᐃ ᐅᑭ ᐱᒥ ᐊᐧᐃᐧᒋᐦᐊᐣ. ᒥᔑᐣ ᐃᐢᑯᓂᑲᓂᐣᐠ ᑭᐱ ᐊᐧᐅᐣᑎᓭᐊᐧᐠ ᐁᑭ ᐱᓄᓴᐊᐧᐸᒪᐊᐧᐨ ᐁᑲᐧ ᑕᔥ ᒥᐦᐃᒪ ᐁᐅᐣᒋ ᑭᑫᐣᑕᑲᐧᐠ ᒪᐊᐧᐨ ᑲᑭᓇ ᐊᐃᐧᔭᐣ ᐁᑭ ᑭᒋᓀᓂᒥᑯᐨ.”
ᒣᒣᑫᐧ, ᐁᑭ ᓂᑲᓂᐱᒥᐃᐧᑐᐨ ᐱᐣᑎᑫᐃᐧᐣ, ᑭᐃᑭᑐ ᐃᐁᐧ ᑲᑭ ᐱᐣᑎᑲᓂᐊᐧᐠ “ᒪᐊᐧᐨ ᐁᑭ ᑐᑭᓂᐁᐧᒪᑲᐠ ᒥᓇ ᒪᐊᐧᐨ ᐁᑭ ᑭᒋᔕᐧᐁᐧᐣᑕᑲᐧᐠ.”
“ᐃᐧᓂᔭᑦ ᒥᐢᑕᐦᐃ ᐅᑭᐸᑭᑎᓇᐣ ᐅᑲᑭᑕᐁᐧᐣᑕᒪᐃᐧᐣ ᐃᐁᐧ ᑲᑭ ᐊᔭᒥᐦᐁᐃᐧᑭᒪᐃᐧᐨ ᒥᓇ ᑲᔦ ᐃᒪ ᑲᑭ ᑕᔑᐱᒪᑎᓯᐨ ᐅᑕᔑᑫᐃᐧᓂᐣᐠ,” ᒣᒣᑫᐧ ᐃᑭᑐ.
“ᐊᒥᐱᑯ ᑲᐯᐦᐃ ᑲᑭᐱᒪᑎᓯᐨ ᒥᓂᑯᐠ ᐊᐸᐣ ᐁᑲ ᓇᐣᑕ ᑲᑭᐃᓇᓄᑭᑕᒪᑫᐨ, ᐊᒥᐱᑯ ᐃᐁᐧᓂ ᑲᑭ ᓂᑲᓀᐣᑕᐠ ᐅᑌᐯᐧᑕᒧᐃᐧᐣ ᒥᓇ ᑲᑭᒋ̇ᓇᐣᑭᑕᑭᐣ ᑫᑯᓇᐣ. ᐃᐁᐧ ᑕᔥ ᒪᐊᐧᐨ ᑲᑭ ᑭᒋ̇ᓀᐣᑕᐣᐠ ᑲᑭ ᑌᐯᐧᔦᓂᒪᐨ ᒪᓂᑐᐣ.”
ᒣᒣᑫᐧ ᐊᒥᐦᐃ ᐁᐃᔑ ᒥᑲᐃᐧᐣᑕᐊᐧᐨ ᐃᐧᓂᔭᒧᐣ ᒪᐊᐧᐨ ᑲᑭᓇ ᐊᐃᐧᔭᐣ ᐁᑭᓴᑭᐦᐊᐨ, ᐅᑭᔐᐊᐧᑎᓯᐧᐃᐣ ᒥᓇ ᑲᔦ ᐅᑕᐸᓭᓂᒥᑎᓱᐃᐧᐣ.
“ᐊᓂᓂᑯ ᒥᓴᐊᐧᐨ ᑫᑯᐣ ᑲᐊᔦᓯᓭᐠ, ᑭᐢᐱᐣ ᐁᓇᑭᔥᑲᐣᐠ ᒪᐊᐧᐨ ᐁᔭᓂᒣᐣᑕᑲᐧᓂᐠ ᑫᑯᓂ ᐃᐁᐧ ᒣᑲᐧᐨ ᑲᐊᔭᒥᐦᐁᐃᐧᑭᒪᔑᔑᐃᐧᐨ, ᐊᒥᐱᑯ ᑲᑭᑐᑕᐣᐠ ᐁᑭ ᓇᓇᐣᑐᓇᐣᐠ ᐊᓂᐣ ᑫᑭ ᐃᔑ ᒥᓄᓭᓂᑭᐸᐣ ᐁᑲᐧ ᑕᔥ ᑭᑕᐧᑦ ᒥᓇ ᒋᑭ ᒥᓇᑐᐸᐣ ᑫᐃᔑ ᒥᓄᓭᓂᐠ,” ᒣᒣᑫᐧ ᐃᑭᑐ. “ᒥᐦᐅᐁᐧ ᒪᐊᐧᐨ ᑲᑭ ᓇᐣᑕᐁᐧᐣᑕᐣᐠ ᒋᑐᑕᐣᐠ. ᒧᔕᐠ ᑭᐱ̇ᑭᑐ ᑭᐢᐱᐣ ᐊᐃᐧᔭ ᐁᐸᐣᑭᔑᐠ ᓇᐣᑕ ᑲᔦ ᐁᐊᐧᓂᑐᑕᐣᐠ, ᒥᔕᐱᑯ ᒋᐃᐧᒋᐦᐊᑲᓄᐨ ᒥᓇᐊᐧ ᒋᑭᐁᐧ ᐅᑦᐱᑲᐸᐃᐧᐨ.”
ᒣᒣᑫᐧ ᐃᑭᑐ ᐃᑫᐧᓂᐊᐧᐣ ᑭᒋᔭᐦᐊᐣ ᐁᐧᐣᑕᕑ ᐅᑭ ᑲᓇᐊᐧᐸᒪᐣ ᑲᑭ ᐱᐃᓇᓄᑭᓂᐨ ᒣᑲᐧᐨ ᐁᐅᐢᑲᑎᓯᐨ ᒥᓇ ᐁᑭ ᐱᑭᑭᓄᐦᐊᒪᑯᐨ ᒋᐱᒥᓂᔕᐦᐊᐧ̇ᐨ ᐃᒪ ᑲᑭ ᐃᔑ ᐱᒧᓭᓂᐨ ᐊᐧᐱᐢᑭᐊᔭᒥᐦᐊᐃᐧᓂᐣᐠ.
“ᐃᐧᐣ ᐯᔑᐠ ᑭᒋᔭᐦᐊ ᒣᑲᐧᐨ 1970 ᑲᐊᐦᑭᐊᐧᐠ ᑲᑭ ᐃᔑᓇᒧᐊᐧᐸᐣ ᐊᓂᔑᓂᓂᐊᐧᐠ ᒋᐊᓂᐊᔭᐊᐧᐊᐧᐨ ᐊᓂᔑᓂᓂᐃᐧ ᑭᒋ ᐊᔭᒥᐦᐁᐃᐧᑭᒪᐣ ᐁᐧᑎ ᓂᑲᐣ ᐃᒪ ᑲᐃᔑ ᑎᐯᐣᒋᑫᐊᐧᐨ,” ᒣᒣᑫᐧ ᐃᑭᑐ.
ᐁᐧᐣᑕᕑ ᑭᓂᑕᐃᐧᑭᑯᐸᐣ 1921 ᐃᒪ ᑲᓂᔓᓯᐣᐠ, ᐃᒪ ᐊᐱᑕ ᑭᐢᑭᒪᓂᓯᐊᐧᐳ ᒥᓇ ᑭᒋᓇᒣᑯᓯᐱᐠ, ᑲᑭ ᐱᐃᔑ ᐅᑦᐱᑭᐨ ᐊᓂᔑᓂᓂᐃᐧ ᐱᒪᑎᓯᐃᐧᓂᐣᐠ, ᒥᓇ ᐊᒐᑯᐱᒪᑎᓯᐃᐧ ᑭᑭᓄᐦᐊᒪᑫᐃᐧᓂᐣᐠ.
ᑫᐃᐧᐣ ᑭᐃᐢᑯᓄᐃᐧᑯᐸᐣ ᓂᐃᐧᐊᐦᑭ ᐊᓂᔑᓂᓂᐃᐧ ᐊᔭᒥᐦᐁᐃᐧᑭᒪᐃᐧ ᑭᑭᓄᐦᐊᒪᑫᐃᐧᐣ ᒣᑲᐧᐨ 1971 ᑲᐊᐦᑭᐊᐧᐠ ᐁᑲᐧ ᑕᔥ ᑭᐊᔭᒥᐦᐁᐃᐧᑭᒪᐃᐧᐦᐊᑲᓄ ᐃᒪ ᐊᐧᐱᐢᑭᐊᔭᒥᐦᐊᐃᐧᓂᐠ ᒣᑲᐧᐨ 1974 ᑲᐊᐦᑭᐊᐧᐠ, ᓂᓴᐧᓯ ᐊᓂᔑᓂᓂᐊᐧᐠ ᐁᑭ ᐊᔭᒥᐦᐁᐃᐧᑭᒪᐃᐧᐦᐊᑲᓄᐊᐧᐸᐣ ᐃᒪ ᑕᔭᓯᐢ ᑭᐁᐧᑎᐣ ᑲᐅᐣᒋ ᑎᐯᐣᑕᑯᓯᐊᐧᐨᐊᐱ ᑲᑭ ᐃᐢᑲᐧ ᐅᓇᑭᒪᑲᓄᐸᐣ ᒋᐊᓂᔑᓇᐯᐃᐧ ᑭᒋᐊᔭᒥᐦᐁᐃᐧᑭᒪᔑᔑᐃᐧᐨ ᐃᒪ ᑕᔭᓯᐢ ᑭᐁᐧᑎᐣ ᑲᐅᐣᒋ ᑎᐯᐣᑕᑲᐧᐠ ᒣᑲᐧᐨ 1983 ᑲᐊᐦᑭᐊᐧᐠ, ᐁᐧᐣᑕᕑ ᐅᑭ ᐅᓇᑐᓇᐸᐣ ᐃᐁᐧ ᒥᓯᐁᐧ ᑭᐁᐧᑎᓄᐠ ᐅᐣᑌᕑᐃᔪ ᐊᔭᒥᐦᐊᐃᐧᐣ ᐁᑲᐧ ᑕᔥ ᐅᑭ ᐊᐧᐅᓇᓴᐣ ᐊᔭᒥᐦᐁᐃᐧᑭᒪᐣ ᑫᓇᓂᑲᓂᐢᑲᒧᓂᐨ ᐊᔭᒥᐦᐁᐃᐧᑲᒥᑯᐣ ᐃᐁᐧ ᑭᐁᐧᑎᓄᐣᐠ ᐅᐣᑌᕑᐃᔪ ᐃᐢᑯᓂᑲᓇᐣ ᑲᐃᔑᔭᑭᐣ.
ᒣᑲᐧᐨ ᐊᐱ 1970 ᑲᐱᓭᐠ ᐊᐦᑭᐃᐧᐣ, ᐁᐧᐣᑕᕑ ᒥᓇ ᑯᑕᑭᔭᐣ ᑲᑭ ᐃᐧᑕᓄᑭᒪᐨ ᐅᑭ ᒪᒋ̇ ᐊᓂᒧᑕᓇᐊᐧ ᒋᑭ ᐅᓇᓴᑲᓄᐸᐣ ᐅᒪ ᒥᓯᐁᐧ ᐅᐣᑌᕑᐃᔪ ᒋᑭ ᐊᔭᐸᐣ ᐊᓂᔑᓇᐯᐃᐧ ᑭᒋ ᐊᔭᒥᐦᐁᐃᐧᑭᒪ, ᒥᑕᔥ ᐃᐁᐧ ᑲᑭ ᐊᓂᓯᓭᐠ ᒣᒣᑫᐧ ᒋᐅᓇᑭᒪᑲᓄᐨ ᒋᑭᒋ ᐊᔭᒥᐦᐁᐃᐧᑭᒪᐃᐧᐦᐊᑲᓄᐨ 2010 ᑲᐊᐦᑭᐊᐧᐠ.