ᑭᒋᒪᐡᑭᑭᐃᐧᓂᓂ ᑭᐃᑭᑐ ᒋᒪᒪᐃᐧ ᐊᓄᑲᑌᐠ ᓇᓇᑕᐃᐧᑭᑫᐣᒋᑫᐃᐧᐣ ᑲᑭᐊᐧᐊᐧᓂᐦᐃᑕᐧᐸᐣ ᐅᐡᑲᑎᓴᐠ

ᕑᐃᐠ ᑲᕑᐃᐠ
ᐊᐧᐊᐧᑌ ᐊᒋᒧᐃᐧᓇᐣ
ᑭᐸᑭᑎᓂᑲᑌ ᑎᐸᒋᒧᐃᐧᐣ ᒋᒪᑕᓄᑲᑌᐠ ᒋᒪᒪᐊᐧᓄᑲᑌᐠ ᓇᓇᑕᐃᐧᑭᑫᐣᒋᑫᐃᐧᐣ ᐅᑯᐁᐧᓂᐊᐧᐠ ᓂᓴᐧᓱ ᐊᓂᔑᓇᐯ ᐊᐢᑭ ᐅᐡᑲᑎᓴᐠ ᑲᑭᐊᐧᓂᑐᐊᐧᐨ ᐅᐱᒪᑎᓯᐃᐧᓂᐊᐧ ᒣᑲᐧᐨ ᐁᐃᐡᑯᓄᐊᐧᐸᐣ ᐦᐊᔾ ᐢᑯᓫ ᐁᐧᑎ ᑕᐣᑐᕑ ᐯ ᐅᑌᓇᐠ.
“ᓂᒥᓀᐧᐣᑕᒥᐣ ᑲᓂᑲᓂᐡᑲᐠ ᓂᐳᐃᐧᐣ ᑲᓇᓇᑲᑐᐨ ᑲᑭᐸᑭᑎᓇᒪᐊᐧᐨ ᐊᓂᔑᓇᐯ ᐊᐢᑭ ᐅᓂᑲᓂᑕᒪᑫᐠ ᑲᑭ ᓇᑐᑕᒪᑫᐊᐧᐸᐣ ᐁᓇᑕᐁᐧᐣᑕᒧᐊᐧᐨ ᒋᒪᒪᐊᐧᓄᑲᑌᐠ ᓇᓇᑕᐃᐧᑭᑫᐣᒋᑫᐃᐧᐣ ᐁᑲᐧ ᐊᒥ ᑫᑲᐱ ᐁᐃᓯᓭᐠ ᒋᔭᓂ ᒪᑕᓄᑲᑌᑭᐣ ᐅᓄᐁᐧᓂᐊᐧᐣ ᓂᓴᐧᓱ ᐱᒪᑎᓯᐃᐧᓇᐣ ᑲᑭᐊᐧᓂᒋᑲᑌᑭᐣ ᒋᓇᓇᑕᐃᐧ ᑭᑫᐣᑕᑲᐧᑭᐣ ᒥᓇ ᒋᑭᔭᓂ ᒥᑭᑲᑌᐠ ᐊᓂᐣ ᑲᑭᐃᑭᓄᑫᐧᐣ ᑫᑭᐅᒋ ᑭᑫᐣᑕᒧᓂᑕᐧ ᐊᔕ ᒥᔑᓄᔭᑭ ᑲᐅᒋ ᐱᒥ ᑲᑫᐧᑌᐧᐊᐧᐨ ᐊᐧᑯᒪᑲᓇᐠ ᒥᓇ ᐱᑯ ᐃᒪ ᐅᑕᔑᑫᐃᐧᓂᐊᐧᐠ,” ᑭᐃᑭᑐ ᑭᒋ ᐅᑭᒪᑲᓀᐢ ᑌᕑᐃ ᐊᐧᐳᐢ. “ᒥᔑᐣ ᑲᑭᐱᐊᐧᓂᐦᐃᐧᑕ ᐅᐡᑲᑎᓴᐠ ᒥᐢᑕᐦᐃ ᑭᔭᓂᓭᑭᓯᐊᐧᐠ ᒥᓇ ᑯᑕᒋᐊᐧᐠ ᑌᑎᐸᐦᐃ ᐊᓂᔑᓇᐯ ᐊᐢᑭ ᐃᐡᑯᓂᑲᓇᐣ ᐁᑲᐧ ᑕᐡ ᐊᔕ ᑎᐱᓭ ᒋᑲᑫᐧ ᒥᑭᑲᑌᐠ ᐊᓂᐣ ᒪᔭᑦ ᑲᑭᐃᑭᓄᑫᐧᐣ ᐅᓄᐁᐧᓂᐊᐧᐣ ᐊᓂᒥᓭᐃᐧᓇᐣ.”
ᒉᐟᕑᐅ ᐊᐣᑕᓴᐣ, ᑲᓴᐸᓇᑲ ᑭᐅᐣᒋ, ᑭᐳᓂᐱᒪᑎᓯ ᑲᐡᑲᑎᓄᐱᓯᑦ 2000 15 ᑭᑕᓱᔭᑭᐃᐧᓀ; ᑭᕑᐊᐣ ᐢᑕᕑᐊᐣᐠ, ᐱᑲᐣᒋᑲᒥᐠ ᑭᐅᐣᒋ, ᑭᐳᓂᐱᒪᑎᓯ ᐊᐧᐣᐸᑲᐃᐧᐱᓯᑦ 2005 18 ᑭᑕᓱᔭᑭᐃᐧᓀ; ᐸᐧᓫ ᐸᓇᒋᐢ, ᒣᐡᑭᑲᐧᑲᒪᐠ ᑭᐅᐣᒋ, ᑭᐳᓂᐱᒪᑎᓯ ᑲᐡᑲᑎᓄᐱᓯᑦ 2006 21 ᑭᑕᓱᔭᑭᐃᐧᓀ; ᕑᐊᐱᐣ ᐦᐊᕑᐳᕑ, ᑭᐁᐧᐃᐧᐣ ᑭᐅᐣᒋ, ᑭᐳᓂᐱᒪᑎᓯ ᒉᐣᐁᐧᕑᐃ ᐱᓯᑦ 2007 10 ᑭᑕᓱᔭᑭᐃᐧᓀ; ᕑᐁᒋ ᐳᐦᔑ, ᐊᐧᐸᓴᑎᑲᐠ ᑭᐅᐣᒋ, ᑭᐳᓂᐱᒪᑎᓯ ᑲᐡᑲᑎᓄᐱᓯᑦ 2007 15 ᑭᑕᓱᔭᑭᐃᐧᓀ; ᑲᔭᓫ ᒪᐧᕑᓱ, ᑭᐁᐧᐃᐧᐣ ᑭᐅᐣᒋ, ᑭᐳᓂᐱᒪᑎᓯ ᑲᐡᑲᑎᓄᐱᓯᑦ 2009 17 ᑭᑕᓱᔭᑭᐃᐧᓀ; ᐁᑲᐧ ᒥᓇ ᒐᐧᕑᑎᐣ ᐊᐧᐸᐢ, ᐁᐧᐱᑫᐧ ᑭᐅᐣᒋ, ᑭᐳᓂᐱᒪᑎᓯ ᒪᑯᐱᓯᑦ 2011 15 ᑭᑕᓱᔭᑭᐃᐧᓀ.
ᐁᑲᐧ ᐅᒪ ᐅᐣᑌᕑᐃᔪ ᑲᑭᓂᑲᓂᐡᑲᑭᐸᐣ ᓂᐳᐃᐧᐣ ᑲᓇᓇᑲᒋᑐᐨ ᑭᒋᒪᐡᑭᑭᐃᐧᓂᓂ ᑭᐃᑭᑐᑯᐸᐣ ᒋᓇᓇᑕᐃᐧᑭᑫᒋᑲᑌᓂᐠ ᑲᑭᐳᓂᐱᒪᑎᓯᐸᐣ ᕑᐁᒋ ᐳᐦᔑ ᒣᑲᐧᐨ ᒉᐣᐁᐧᕑᐃ ᐱᓯᑦ 2009, ᐁᑲᐧ ᔕᑯᐨ ᐊᐱᐣ ᑲᑭᐃᐡᑲᐧ ᑲᑫᐧᒋᒪᐸᓂᐣ ᐊᓂᔑᓇᐯ ᐊᐢᑭ ᐅᓂᑲᓂᑕᒪᑫᐠ, ᐊᐧᐁᐧ ᑭᒋᒪᐡᑭᑭᐃᐧᓂᓂ ᐊᐣᐟᕑᐅ ᒥᐠᑲᐧᓫᐊᑦ, ᓄᑯᑦ ᑲᓂᑲᓂᐡᑲᐠ ᓂᐳᐃᐧᐣ ᑲᓇᓇᑲᒋᑐᐨ, ᐊᒥ ᑲᑭᐃᔑᐅᓀᐣᑕᐠ ᑲᑭᓇ ᐃᓂᐁᐧᓂᐊᐧᐣ ᓂᓴᐧᓱ ᓂᐳᐃᐧᓇᐣ ᒋᐊᔑᒋ ᓇᓇᑕᐃᐧᑭᑫᐣᒋᑲᑌᑭᐣ, ᐁᐧᓴ ᑫᑲᐟ ᐯᔑᑲᐧᐣ ᐁᑭᐃᔑᓇᑲᐧᑭᐣ ᑲᑭᐅᐣᑕᐱᓀᐊᐧᐨ.
ᐸᓂᒪ ᑕᔭᓂ ᐃᐧᐣᒋᑲᑌ ᐊᓂᐣ ᐊᐱ ᒥᓇ ᐊᐣᑎ ᑫᑕᓇᓄᑲᑌᑭᐣ ᐊᐱ ᒪᔭᑦ ᐊᓂᑭᑫᐣᑕᑲᐧᐠ.
ᐊᓂᔑᓇᐯ ᐊᐢᑭ ᑭᓇᑐᑕᒪᐸᐣ ᓇᓇᑕᐃᐧᑭᑫᐣᒋᑫᐃᐧᐣ ᒋᑐᒋᑲᑌᓂᐠ ᐃᐁᐧᓂ ᐅᒋ ᐅᑯᐁᐧᓂᐊᐧᐠ ᑲᑭᐊᐧᑯᒪᐊᐧᐨ ᓂᓴᐧᓱ ᐅᐡᑲᑎᓴᐠ ᐁᑭᓇᑕᐁᐧᐣᑕᒧᐊᐧᐨ ᐊᓂᐣ ᑲᑭᐃᐣᑎᓂᑫᐧᐣ ᐅᑕᐊᐧᔑᔑᒥᐊᐧᐣ ᑲᑭᐊᐧᓂᐦᐊᐊᐧᐨ.
“ᐊᓂᔑᓇᐯ ᐊᐢᑭ ᐅᑭᑲᑫᐧᒋᒪᐣ ᑭᒋᒪᐡᑭᑭᐃᐧᓂᓂᐊᐧᐣ ᒋᐅᓇᑐᓂᐨ ᓇᓇᑕᐃᐧᑭᑫᐣᒋᑫᐃᐧᐣ ᑫᑯᓀᐣ ᐅᑯᐁᐧᓂᐊᐧᐠ ᓂᓴᐧᓱ ᐅᐡᑲᑎᓴᐠ ᑲᑭᐅᐣᒋ ᐳᓂᐱᒪᑎᓯᐊᐧᐨ ᐁᑲᐧ ᒥᓇ ᒋᐅᒋ ᐃᐧᒋᐦᐃᑕᐧ ᐊᐧᑯᒪᑲᓇᐠ ᒋᔭᓂ ᓴᑲᑫᐣᑕᒧᐊᐧᐨ,” ᑭᐃᑭᑐ ᐊᐧᐳᐢ. “ᐊᑯᓇᐠ ᓄᑯᒥᑫ ᑲᑭᔭᓂ ᐊᐧᐊᐧᓂᐦᐃᑕᐧ ᐅᐡᑲᑎᓴᐠ, ᑭᔭᓂᑯᑕᒋᐊᐧᐠ ᒥᓇ ᓭᑭᓯᐊᐧᐠ ᑌᑎᐸᐦᐃ ᐊᓂᔑᓇᐯ ᐊᐢᑭ ᐃᐡᑯᓂᑲᓇᐣ ᑲᐅᒋᐊᐧᐨ ᐁᑲ ᐁᑭᑫᐣᑕᒧᐊᐧᐨ ᐊᓂᐣ ᒪᔭᑦ ᑲᐃᔑᐁᐧᐱᓯᐊᐧᑫᐧᐣ ᑲᑭᐅᐣᒋ ᐳᓂᐱᒪᑎᓯᐊᐧᐨ ᐅᐡᑲᑎᓴᐠ.”
ᐊᐧᐁᐧ ᐯᔑᐠ ᐅᐡᑲᑎᐢ ᕑᐁᒋ ᐳᐦᔑ ᐊᔕ ᑭᑭᔑ ᐅᓇᒋᑲᑌᓂᐸᐣ ᒋᒪᑕᓄᑲᑌᓂᐠ ᒋᓇᓇᑲᒋᒋᑲᑌᓂᐠ ᐅᓂᐳᐃᐧᐣ ᒉᐣᐁᐧᕑᐃ ᐱᓯᑦ 2009, ᐁᑲᐧ ᐊᐱᐣ ᑭᐳᓂᒋᑲᑌᐸᐣ ᐊᐱ ᐊᓂᔑᓇᐯ ᐊᐢᑭ ᒥᓇ ᑎᐸᑯᓂᑫ ᐅᑕᔭᒥᑕᒪᑫᐠ ᑲᑭᐱᒥᐃᐧᒋᐦᐊᐊᐧᐨ ᐳᐦᔑ ᑎᐯᐣᒋᑫᐃᐧᐣ ᐁᑭᑲᓄᑕᐠ ᑭᐡᐱᐣ ᑲᐧᔭᐠ ᑲᑐᒋᑲᑌᑫᐧᐣ ᑲᑭᐅᓂᓂᑕᐧ ᐃᒪ ᒋᐃᔑᐊᐱᐊᐧᐨ ᐅᓇᔓᐁᐧᐃᐧᑭᒪᔑᔑᐃᐧᓂᐠ ᑫᐅᐣᒋᐱᒥ ᐃᐧᒋᑕᐧᐊᐧᐨ ᓇᓇᑕᐃᐧᑭᑫᐣᒋᑫᐃᐧᓂᐠ.
ᑭᐃᔑᐃᐧᒋᑲᑌ ᑕᐡ ᐃᒪ ᓴᐱᕑᐃᔭᕑ ᑎᐸᑯᓂᑫᐃᐧᑲᒥᑯᐠ ᑕᐣᑐᕑ ᐯ ᐅᐁᐧᓂ ᑲᑭᑲᓄᑕᑭᐸᐣ ᐊᐱ ᒍᓫᐊᔾ ᐱᓯᑦ 2011 ᒣᑲᐧᐨ ᐁᔭᓂ ᐱᒥᑲᐧᔭᐣᒋᓇᓄᐊᐧᐠ ᒋᒪᐦᒋᔭᓂᒧᒋᑲᑌᓂᐠ ᑲᐃᐧᓇᓇᑕᐃᐧᑭᑫᐣᒋᑲᑌᓂᐠ ᐳᐦᔑ ᑲᑭᐳᓂᐱᒪᑎᓯᐨ.
ᐊᐧᐁᐧ ᑕᐡ ᑭᒋᒪᐡᑭᑭᐃᐧᓂᓂ ᓂᐳᐃᐧᓂ ᑲᓇᓇᑲᒋᑐᐨ ᑭᑭᔕᑯᓂᑫ ᐊᐧᑌᐸᑲᐃᐧᐱᓯᑦ 2011 ᑲᑭᐅᓂᓂᑕᐧ ᐅᓇᔓᐁᐧᐃᐧᑭᒪᔑᔑᐃᐧᓂᐠ ᒋᐃᔑᐊᔑᑕᐱᐊᐧᐨ ᐁᑲ ᐃᓴᐣ ᑲᐧᔭᐠ ᐁᑭᐅᐣᒋ ᑐᒋᑲᑌᐠ ᑲᑭᐅᓂᓂᑕᐧ ᒥᑕᐡ ᐊᐱᐣ ᑲᑭᐳᓂᒋᑲᑌᐠ ᓇᓇᑕᐃᐧᑭᑫᐣᒋᑫᐃᐧᐣ.
ᐊᓇᐃᐧᐣ ᑭᐃᔑᐅᓇᒋᑲᑌᐸᐣ ᒪᑯᐱᓯᑦ 23 ᒋᔭᓂ ᒪᐦᒋᑕᔑᐣᒋᑲᓂᐊᐧᐠ ᒋᓇᓇᑲᒋᒋᑲᑌᐠ ᐊᓂᐣ ᑫᑭᐃᔑ ᑲᐧᔭᑯᓇᑲᐧᑭᐸᐣ ᑲᐅᓂᓂᓂᑕᐧ ᐅᓇᔓᐁᐧᐃᐧᑭᒪᔑᔕᐠ, ᑭᐳᓂᒋᑲᑌᐸᐣ ᑕᐡ ᐱᓇᒪ ᐃᐧᐣ ᑭᒋᒪᐡᑭᑭᐃᐧᓂᓂ ᒋᐅᓀᐣᑕᐠ ᐊᓂᔑᓇᐯ ᐊᐢᑭ ᑲᑭᐃᔑᑲᑫᐧᑌᐧᐸᐣ.
ᐅᐁᐧ ᓇᓇᑕᐃᐧᑭᑫᐣᒋᑫᐃᐧᓂᐠ ᑫᐊᐱᐦᐃᐣᑕᐧ ᐅᓇᔓᐁᐧᐃᐧᑭᒪᔑᔕᐠ ᐃᐧᓇᐊᐧ ᒪᐡᑯᐨ ᐅᑲᑭᑐᑕᓇᐊᐧ ᒋᐅᓀᐣᑕᒧᐊᐧᐨ ᑫᑯᓀᓇᐣ ᑫᑲᐧᑫᑌᐧᐊᐧᐨ ᑫᑭᐃᐧᒋᐦᐃᐁᐧᒪᑲᑭᐣ ᐁᑲ ᐊᐊᐧᔑᒣ ᒥᓇᐊᐧ ᐅᐁᐧ ᒋᐃᔑᐁᐧᐱᓯᐊᐧᐨ ᐅᑎᐡᑯᓂᐠ ᐁᐧᑎ ᓄᐱᒪᑲᒥᐠ ᐃᐡᑯᓂᑲᓂᐠ ᑲᐱᐅᐣᑐᓭᐊᐧᐨ ᑲᓇᑕᐃᐧ ᐃᐡᑯᓄᐊᐧᐨ.

See also

12/01/2015 - 19:37
12/01/2015 - 19:37
12/01/2015 - 19:37
12/01/2015 - 19:37