ᐸᑲᐣ ᐃᐡᑯᓂᑲᓂᐠ ᐁᐅᒋᑎᐯᐣᑕᑯᓯᐨ ᑭᓴᑭᒋᓂᔕᐊᐧᑲᓂᐃᐧ ᓀᐣᑲᐃᐧᓴᑲᐦᐃᑲᓂᐠ ᐁᑲᐯᔑᐸᐣ

ᓀᐣᑲᐃᐧᓴᑲᐦᐃᑲᐣ ᐅᑭᒪᑲᐣ ᒥᓇ ᐅᓇᔓᐁᐧᐃᐧᓂᓂᐊᐧᐠ ᐅᑭᓴᑭᒋᓂᔕᐊᐧᐊᐧᐣ ᑲᑭᑕᔑᑲᐯᔑᓂᐨ ᐃᐡᑯᓂᑲᓂᐠ ᐃᐁᐧᓂ ᑕᐡ ᑲᑭᐅᐣᒋᑲᓄᓇᐊᐧᐨ ᒋᓂᑲᑌᐡᑲᓂᐨ ᐁᐧᓴ ᐁᒪᒪᒐᒋᒧᓂᐨ ᒥᓇ ᐱᑯ ᐃᒪ ᑕᔑᑫᐃᐧᓂᐠ ᐊᓂᓂᑯ ᐁᐊᐃᔑᓂᑲᑕᐠ ᑫᑯᓇᐣ.
“ᒥᑐᓂ ᓂᐃᐧᓴᑭᑌᐦᐁ ᐅᐁᐧ ᑲᑭᑐᑕᐃᐧᔑᐊᐧᐨ,” ᐃᑭᑐ ᐊᐣᒋᓫᐊ ᑲᒪᓫᐊᑎᓯᐟ, ᐱᑕᐯᑯᐠ ᐅᐣᒋᑎᐯᐣᑕᑯᓯ ᐁᑲᐧ ᒥᑕᓱᔭᑭ ᐅᐣᒋᑲᐯᔑ ᓀᐣᑲᐃᐧᓴᑲᐦᐃᑲᓂᐠ ᐁᐃᐧᒋᔭᒪᐨ ᓀᐣᑲᐃᐧᓴᑲᐦᐃᑲᓂᐃᐧᓂᓂᐊᐧᐣ ᕑᐃᐣᑯ ᐱᐟᓫᐊᕑ. “ᐣᑯᓯᐢ ᒥᓇ ᕑᐃᐣᑯ ᒥᐅᑯ ᒪᔭᑦ ᓂᐃᐧᒋᑕᒪᑲᓇᐠ. ᑲᐧᐣᑕ ᐣᑭᐊᐃᐣᑐᑕᑯᐠ ᐅᑭᒪᑲᐣ ᒥᓇ ᐅᓇᔓᐁᐧᐃᓂᓂᐊᐧᐠ.”
ᑲᒪᓫᐊᑎᓯᐟ ᐅᑭᐅᑎᓯᑯᐣ ᐅᑭᒪᑲᐣ ᒥᓇ ᐅᓇᔓᐁᐧᐃᐧᓂᓂᐊᐧᐠ ᐅᒪᓯᓇᐦᐃᑲᓂᐊᐧᐠ ᐁᑭᐅᔑᑐᐊᐧᐨ ᐊᑲᐢᐠ 7 ᑲᐃᓇᑭᓱᓂᐨ, ᒥᐃᐦᐃᒪ ᑲᑭᐃᐧᐣᑕᒪᐊᐧᑲᓄᐨ ᒋᓂᑲᑌᐡᑲᐨ ᐃᒪ ᐃᐡᑯᓂᑲᓂᐠ ᐊᑲᐢᐟ ᐱᓯᑦ 30 ᐃᓇᑭᓱᓂᐨ ᐃᐧᓂᑯ ᒋᑲᓇᐊᐧᐸᑕᐠ ᐅᐱᒥᔭᐃᐧ ᒣᑎᓂᑫᐃᐧᐣ. ᐃᐧᐸᐨ ᐃᑯ ᐊᐱᐣ ᑭᔭᓂᒪᒐ ᐁᑲᐧ ᓄᑯᑦ ᒣᑲᐧᐨ ᑲᐯᔑ ᑕᐣᑐᕑ ᐯ ᑲᐃᔑᐱᐣᑎᑲᓂᑕᐧ ᐁᑲ ᑲᐅᑲᐯᔑᐃᐧᓂᐊᐧᐨ.
“ᐃᐁᐧ ᒪᐃᐧᐣ ᐣᑎᓀᑕᐣ ᑲᑭᐅᐣᒋᑐᑕᐃᐧᔑᐊᐧᐨ ᑲᑭᐊᐃᑭᑐᔭᐣ ᐃᒪ ᒪᒪᑕᐊᐧᐱᑯᐠ ᐁᑭᐃᐧᐣᑕᒪᐸᐣ ᐣᑎᓯᓭᐃᐧᐣ,” ᑭᐃᑭᑐ ᑲᒪᓫᐊᑎᓯᐟ. “ᐣᑲᓄᑫ ᐯᔑᑲᐧ ᐁᑭᐃᑭᑐᔭᐣ ᐁᑭᐃᓀᐣᑕᒪᐣ ᐁᐃᐧᐅᐣᒋᒪᓀᓂᒥᑯᔭᐣ ᕑᐃᐣᑯ ᐅᐣᒋ ᒥᓇ ᐃᒪ ᓂᑲᓂᑕᒪᑫᐃᐧ ᐊᓄᑭᐃᐧᓂᐠ ᑲᐃᔑᐸᐸᒥᓯᐨ.”
ᑲᒪᓫᐊᑎᓯᐟ ᑭᐃᑭᑐ ᑲᐃᐧᐣ ᒋᒥᓀᐧᐣᑕᐠ ᒋᒪᓀᓂᒪᑲᓂᐃᐧᐨ ᓇᐣᑕ ᒥᓇ ᒋᒥᑯᐡᑲᒋᐦᐊᑲᓂᐃᐧᐨ.
“ᐊᒥ ᓂᐣ ᐁᔑᔭᔭᐣ ᑲᐃᐧᐣ ᐣᔕᑫᐧᓂᒧᓯᐣ ᒋᓇᑕᒪᓱᔭᐣ ᒥᓇ ᒋᓇᑕᒪᐊᐧᑲᐧ ᑲᐃᐧᒋᑕᒪᑲᐧ,” ᑲᒪᓫᐊᑎᓯᐟ ᐃᑭᑐ. “ᐣᑭᐸᑯᓭᓂᒪᐠ ᐁᑲ ᓇᐣᑕ ᒋᒥᑯᐡᑲᒋᐦᐃᑯᔭᑭᑕᐧ. ᑲᐃᐧᐣ ᑫᑯᐣ ᐣᑐᒋᔑᒪᒪᓂᓯᒥᐣ ᐅᒪ ᓀᐣᑲᐃᐧᓴᑲᐦᐃᑲᓂᐠ. ᒪᐊᐧᐨ ᓂᓇᑕᐁᐧᐣᑕᐣ ᐁᐃᐧᑭᐁᐧᐡᑲᔭᐣ ᓀᐣᑲᐃᐧᓴᑲᐦᐃᑲᓂᐠ - ᓴᑲᒪᐨ ᐃᑯ ᐁᑭᑲᐯᔑᔭᐣ ᒥᑕᓱᔭᑭ ᐃᒪ. ᑲᐃᐧᐣ ᑫᑯᐣ ᐣᑐᒋᔑᒪᒪᓂᓯᐣ.”
ᑲᒪᓫᐊᑎᓯᐟ ᑲᔦ ᑭᐃᑭᑐ ᐅᑭᐱᐊᐧᐃᐧᒋᐦᐊᐣ ᐅᐡᑲᑎᓴᐣ ᑲᐊᓂᒥᓭᐊᐧᐨ.
“ᐣᐸᐯᔑᑯ ᐊᔭᒥᐦᐊᐸᓂᐠ ᐊᑯ,” ᑭᐃᑭᑐ ᑲᒪᓫᐊᑎᓯᐟ. “ᒥᐦᐅᒪ ᑫᓂᐣ ᐣᑲᐯᔑᐃᐧᐣ ᑲᐃᓀᐣᑕᒪᐣ ᓀᐣᑲᐃᐧᓴᑲᐦᐃᑲᓂᐠ ᒥᓇ ᒥᐦᐃᒪ ᐁᑲᐯᔑᐨ ᑲᐃᐧᒋᑕᒪᐠ. ᐁᑲᐧ ᒥᓇ ᓂᓇᑕᐁᐧᐣᑕᐣ ᐁᐃᐧᐯᔕᐧᐸᒪᐠ ᓂᐃᐧᒋᑕᒪᑲᐣ.”
ᐁᑲᐧ ᐃᐁᐧᓂ ᐅᑭᒪᑲᐣ ᒥᓇ ᐅᓇᔓᐁᐧᐃᐧᓂᓂᐊᐧᐠ ᐅᒪᓯᓇᐦᐃᑲᓂᐊᐧ ᑭᐃᑭᑐᒪᑲᓂ ᑲᒪᓫᐊᑎᓯᐟ ᐁᑲ ᐁᓇᑕᐁᐧᓂᒥᐨ ᒥᓇᐊᐧ ᒋᐱᑭᐁᐧᐨ ᓀᐣᑲᐃᐧᓴᑲᐦᐃᑲᓂᐠ - ᑭᐡᐱᐣ ᑕᐡ ᐱᑭᐁᐧᐨ, ᐊᒥ ᑫᐃᓇᑭᐣᑕᒪᐊᐧᑲᓄᐨ ᑲᒥᐣᔑᐦᐅᓇᓂᐊᐧᐠ ᐱᐣᑎᑫᐡᑲᐃᐧᐣ ᐃᒪ ᐃᐡᑯᓂᑲᓂᐠ.
ᐃᑭᑐᒪᐣ ᒪᓯᓇᐦᐃᑲᐣ: “ᑭᑭᐃᓇᒋᒥᑯ ᑲᐧᐣᑕ ᐁᐊᐃᓇᒋᒧᔭᐣ ᐣᑕᔑᑫᐃᐧᓂᓇᓂᐠ. ᒥᐦᐅᒪ ᐊᐱᐣ ᐁᔭᓄᒋ ᐊᓂᒥᐦᐃᑯᐊᐧᐨ ᐣᑕᓂᔑᓂᓂᒥᓇᓂᐠ.”
ᐁᑲᐧ ᒥᓇ ᑭᔭᓂᓇᓯᓇᐦᐃᑲᑌ ᐅᑭᒪᑲᐣ ᒥᓇ ᐅᓇᔓᐁᐧᐃᐧᓂᓂᐊᐧᐠ ᑲᐃᐧᐣ ᐅᐸᑭᑎᓇᓇᐊᐧᓯᐣ ᐊᐃᐧᔭᐣ ᐅᐁᐧᓂ ᒋᐱᐃᔑᒋᑫᓂᐨ ᓇᐣᑕ ᒥᓇ ᒋᐱᓇᓇᑲᐊᐧᐣᑎᓯᓂᐨ ᐸᑲᐣ ᐃᐡᑯᓂᑲᓂᐠ ᑲᐅᐣᒋᐊᐧᐨ ᑲᐱᑲᐯᔑᐊᐧᐨ.
ᑲᒪᓫᐊᑎᓯᐟ ᐅᑯᓯᓴᐣ, ᑎᓫᐃᐣ ᓴᑲᓇᐡ, ᑫᐃᐧᐣ ᑭᐃᓇᑲᓄ ᒋᓂᑲᑌᐡᑲᐨ ᐊᑲᐢᐟ ᐱᓯᑦ 30 ᐃᐁᐧᓂ ᑲᑭᐱ ᐱᐣᑎᑫᐨ ᐃᐡᑯᓂᑲᓂᐠ ᐁᑲ ᓂᑲᐣ ᑲᑭᐱᐅᐣᒋ ᑲᑫᐧᑌᐧᐨ ᐃᐁᐧᓂ ᐅᑐᓇᑯᓂᑯᐃᐧᓂᐠ ᑲᑭᐃᓇᑕᐊᐧᑲᓄᐨ.
ᓀᐣᑲᐃᐧᓴᑲᐦᐃᑲᓂᐠ ᑭᐅᐣᒋᐸᑭᑎᓂᑲᑌ ᐃᐧᐣᑕᒪᑫᐃᐧᐣ ᐅᐁᐧ ᐊᓂᒧᒋᑫᐃᐧᐣ, ᐁᑭᑐᒪᑲᐠ ᐅᑭᒪᑲᐣ ᒥᓇ ᐅᓇᔓᐁᐧᐃᐧᓂᓂᐊᐧᐠ ᑭᒪᐊᐧᒋᐦᐃᑐᐊᐧᐠ ᐊᑲᐢᐟ ᐱᓯᑦ 30 ᐁᑭᐊᓂᒧᒪᐊᐧᐨ ᑲᒪᓫᐊᑎᓯᐟ ᒥᓇ ᓴᑲᓇᐡ.
ᑭᔭᓂᑭᑐᒪᑲᐣ ᐃᐧᐣᑕᒪᑫᐃᐧᐣ ᒥᑐᓂ ᐱᑯ ᑲᐧᔭᐠ ᐁᑭᓇᓇᑲᒋᑐᐊᐧᐨ ᑲᑭᐊᓂᒧᒪᐊᐧᐨ ᑲᒪᓫᐊᑎᓯᐟ ᒥᓇ ᓴᑲᓇᐡ, ᒥᓇ ᐅᑭᐃᐧᐣᑕᓇᐊᐧ ᓴᑲᓇᐡ ᐁᒥᔑᓇᑎᓂᑭᐣ ᐅᑐᓇᑯᓂᑯᐃᐧ ᐅᓇᔓᐊᐧᓂᑯᐃᐧᓇᐣ.
“ᑲᐃᐧᐣ ᑲᔦ ᐅᒪ ᐅᐣᒋᑎᐯᐣᑕᑯᓯᓯᐊᐧᐠ ᒥᓇ ᑲᐃᐧᐣ ᒋᑭᐅᐣᒋ ᑲᑫᐧᑌᐧᐊᐧᐸᐣ ᒋᑭᐱ ᐱᐣᑎᑫᐡᑲᐊᐧᐸᐣ ᐅᒪ ᐃᐡᑯᓂᑲᓂᐠ,” ᑭᐃᑭᑐᒪᑲᐣ ᒪᓯᓇᐦᐃᑲᐣ, ᐅᑯᐁᐧᓂᐊᐧᐠ ᓂᔑᐣ ᐊᐃᐧᔭᐠ ᑭᑲᓄᓇᑲᓄᐊᐧᐠ ᐃᐧᐸᐨ ᐃᑯ ᒋᔭᓂᑲᑫᐧ ᓂᑲᑌᐡᑲᐊᐧᐨ ᒥᓇ ᐃᐧᓇᐊᐧ ᐱᑯ ᒋᑎᐸᐦᐅᑎᓱᐊᐧᐨ.”
ᐱᐟᓫᐊᕑ ᐅᑭᓇᑫᐧᐁᐧᔑᑐᐣ ᑲᑭᐃᓇᔓᐊᐧᓇᑲᓄᐨ ᑲᒪᓫᐊᑎᓯᐟ ᐁᑭᐅᔑᑐᐨ ᐅᒪᓯᓇᐦᐃᑲᐣ ᐊᑲᐢᐟ ᐱᓯᑦ 31 ᐁᑭᒪᓯᓇᐦᐊᒪᐊᐧᐨ ᐅᑭᒪᑲᐣ ᒥᓇ ᐅᓇᔓᐁᐧᐃᐧᓂᓂᐊᐧᐠ, ᐅᑭᑲᑫᐧᑌᐧᑕᒪᐊᐧᐸᓂᐣ ᐅᒪ ᒋᐱᑲᐯᔑᐊᐧᐨ.
ᐁᑲᐧ ᒥᓇ ᐅᑭᑲᓄᓇᐣ ᐅᑭᒪᑲᓇᐣ ᒥᓇ ᐅᓇᔓᐁᐧᐃᐧᓂᓂᐊᐧᐣ ᑲᑭᒪᓯᓇᐦᐊᒪᐊᐧᐨ ᐃᐁᐧᓂ ᑲᓇᑕ ᐅᓇᔓᐁᐧᐃᐧᓂᐠ ᑲᒪᓯᓇᐦᐃᑲᑌᐠ ᑎᐯᓂᒧᐃᐧᐣ ᐊᔕ ᐊᐱᐣ ᐁᑭᐱᐣᑎᑫᓭᐊᐧᐨ ᑫᐃᐧᓇᐊᐧ ᐊᓂᔑᓂᓂᐊᐧᐠ ᐅᒪ ᒋᐅᒋ ᑲᓇᐊᐧᐸᒥᑕᐧ ᒣᑲᐧᐨ ᒍᓫᐊᔾ ᐱᓯᑦ 2011 ᑲᔭᑭᐊᐧᐠ, ᐊᔑᐨ ᑲᔦ ᐃᐁᐧ ᐁᐸᑭᑎᓂᑯᐃᐧᓯᐨ ᒋᐃᐧᐣᑕᐠ ᐊᓂᐣ ᑲᐃᓀᐣᑕᐠ.
ᐅᐁᐧ ᑭᒋᐅᓇᔓᐁᐧᐃᐧᐣ ᐃᓇᑌ ᑫᒋᓇᐨ ᑲᑭᓇ ᐊᐃᐧᔭ ᑕᐃᐧᓇᒪᑯᐃᐧᐣ ᐁᐊᔭᐨ: ᒋᐅᓀᓂᒧᐨ ᑲᐃᔑᒪᒥᑐᓀᑕᐠ ᒥᓇ ᒋᐅᓀᐣᑕᐠ ᑫᐃᔑᐅᑕᔭᒥᐦᐊᐃᐧᓂᐨ; ᒋᐃᓀᓂᒧᐨ ᑫᐃᓀᐣᑕᐠ, ᑫᐃᔑᐅᑌᐯᐧᑕᒧᐃᐧᓂᐨ, ᑲᐃᔑᐅᓂᓯᑕᐃᐧᓇᒧᐃᐧᓂᐨ ᒥᓇ ᐅᑕᔭᒥᐃᐧᓇᐣ, ᐊᔑᐨ ᐸᐸᑲᐣ ᑎᐸᒋᒧᐃᐧᓂᐠ ᑲᐅᒋᐃᐧᐣᒋᑲᑌᑭᐣ ᐃᓀᐣᑕᒧᐃᐧᓇᐣ; ᐅᓀᓂᒧᐃᐧᐣ ᓴᑲᒪᐨ ᒋᒪᒪᐃᐧᔭᓂᐊᐧᐠ; ᐁᑲᐧ ᒥᓇ ᐅᓀᓂᒧᐃᐧᐣ ᐊᐧᐁᓀᓇᐣ ᐃᑯ ᑫᐃᐧᒋᐊᐧᐨ.
ᓀᐣᑲᐃᐧᓴᑲᐦᐃᑲᐣ ᐅᑭᒪᑲᐣ ᐸᕑᐟ ᒥᑭᐢ ᑲᐃᐧᐣ ᐅᑐᐣᒋᓇᑫᐧᑕᓯᐣ ᐁᑭᑲᑫᐧᒋᒪᑲᓄᐨ ᑫᐃᐧᐣ ᓇᐣᑕ ᒋᐃᑭᑐᐨ ᐅᒪ ᑎᐸᒋᒧᐃᐧᓂᐠ.

See also

12/01/2015 - 19:37
12/01/2015 - 19:37
12/01/2015 - 19:37
12/01/2015 - 19:37