ᐱᒥᐊᓄᑲᑌ ᓇᑕᐃᐧᐦᐃᐁᐧᐃᐧᐣ ᒋᔭᓄᒥᓄᔭᐨ ᐊᓂᔑᓇᐯ

ᑲᑭᔕᐳᐡᑲᒧᐊᐧᐨ ᐁᐧᐡᑲᐨ ᑲᑭᐱᑲᓇᐁᐧᐣᑕᑯᓯᐊᐧᐨ ᑭᑭᓄᐦᐊᒪᑎᐃᐧᑲᒥᑯᐠ ᐊᓂᔑᓂᓂᐃᐧ ᐊᐊᐧᔑᔕᐠ ᑭᑕᐃᐧᓇᒪᐊᐧᐊᐧᐠ ᒋᐃᐧᐣᑕᒧᐊᐧᐨ ᐅᑎᐸᒋᒧᐃᐧᓂᐊᐧ ᒣᑲᐧᐨ
ᐊᓂᔑᓇᐯ ᐊᐢᑭ ᐁᐧᐡᑲᐨ ᑲᑭᐱᑲᓇᐁᐧᐣᑕᑯᓯᐊᐧᐨ ᑭᑭᓄᐦᐊᒪᑎᐃᐧᑲᒥᑯᐠ ᐊᓂᔑᓂᓂᐃᐧ ᐊᐊᐧᔑᔕᐠ ᒪᐊᐧᒋᐦᐃᑐᐃᐧᐣ ᒣᑲᐧᐨ ᓴᑭᐸᑲᐃᐧᐱᓯᑦ 11-12 ᐁᐧᑎ ᑕᐣᑐᕑ ᐯ.
ᕑᐊᓂ ᒧᓂᔭᐢ ᓀᐡᑲᐣᑕᑲᐣᐠ ᑲᐅᐣᒋᐨ ᐊᒥᐦᐊᐁᐧ ᐯᔑᐠ ᑲᑭᔕᐳᐡᑲᐠ. ᐁᐧᑎ ᑕᐡ ᓭᐣᐟ ᒍᓴᑊ ᐊᓂᔑᓇᐯ ᑭᑭᓄᐦᐊᒪᑎᐃᐧᑲᒥᑯᐠ (ᐸᐧᕑᐟ ᐃᐧᓫᔭᑦ ᐊᓂᔑᓇᐯ ᑭᑭᓄᐦᐊᒪᑎᐃᐧᑲᒥᐠ) ᐃᒪ ᑕᐣᑐᕑ ᐯ ᒣᑲᐧᐨ 1962 ᐊᑯᓇᐠ 1968 ᑭᐱᒥ ᑭᑭᓄᐦᐊᒪᐊᐧᑲᓂᐃᐧᑯᐸᐣ.
ᕑᐊᓂ ᐃᓇᒋᒧ ᒥᔑᐣ ᑫᑯᓇᐣ ᐁᑭᐊᐧᐸᐣᑕᐠ ᐁᐃᔑᐁᐧᐸᓂᐠ ᒣᑲᐧᐨ ᑲᑭᑲᓇᐁᐧᐣᑕᑯᓯᐨ ᑭᑭᓄᐦᐊᒪᑎᐃᐧᑲᒥᑯᐠ.
“ᒥᔑᐣ ᐊᐊᐧᔑᔕᐠ ᐣᑭᐊᐧᐸᒪᐠ ᐁᒪᐃᐧᐊᐧᐨ,” ᑭᐃᓇᒋᒧ. “ᐊᒥ ᑫᓂᐣ, ᓂᐣᑭᒪᐤ, ᐁᐃᐧᑭᐁᐧᔭᐣ, ᐁᑲᐡᑫᓂᒪᑲᐧ ᓂᐊᐧᑯᒪᑲᓇᐠ.”
ᐅᑕᓇᐠ ᑲᑭᔭᑭᐊᐧᐠ, ᐃᐧᐣ ᐊᔑᐨ ᐅᐃᐧᒋᐊᐧᑲᓇᐣ ᑭᐱᒧᓭᐃᐧᓂᑫᐸᓂᐠ ᐁᐅᒋ ᑲᓄᑫᐣᑕᐊᐧᐊᐧᐨ ᑲᑭ ᑭᑭᓄᐦᐊᒪᐃᐧᐣᑕᐧᐸᐣ ᐊᐊᐧᔑᔕᐠ ᐃᒪ ᓭᐣᐟ ᒍᓴᑊ ᑭᑭᓄᐦᐊᑎᐃᐧᑲᒥᑯᐠ.
“ᓂᐃᐧᒋᐊᐧᑲᐣ ᐃᐧᐣ ᐅᑭᐱᒧᑫᑕᒪᐊᐧᐣ ᐃᑫᐧᐊᐠ ᐁᑲᐧ ᐃᐧᐣ ᓂᐣ ᓇᐯᐊᐧᐠ,” ᒧᓂᔭᐢ ᐃᑭᑐ.
ᐁᑲᐧ ᑲᐃᐧᐣ ᒋᐃᓇᒧᓂᐠ ᐅᑕᓇᐸᓂᒥᑲᓇᓂ ᐅᑕᔑᑫᐃᐧᓂᐠ, ᒥᑕᐡ ᑲᑐᑕᒧᐊᐧᐨ ᐃᒪ ᓇᑭᓇ ᐅᐣᑌᕑᐃᔪ ᐁᑭᐅᐣᒋ ᒪᒋᐦᐊᑐᐊᐧᐨ. ᑭᒪᒋᑕᐊᐧᐠ ᒣᑲᐧᐨ ᓴᑭᐸᑲᐃᐧᐱᓯᒧᐣ 1 ᑲᐃᓇᑭᓱᓂᐨ, 2010 ᐁᑲᐧ ᐊᐱᐣ ᐁᐧᑎ ᑭᐃᓇᐦᐊᑐᐊᐧᐠ ᑕᐣᑐᕑ ᐯ. ᐁᑲᐧ ᑕᐡ 16 ᑭᓫᐊᒥᑕᕑᐢ ᐯᔑᑯᑭᔑᑲ ᑭᐱᒧᓭᐊᐧᐠ.
ᑭᓄᐣᑌᒪᒋᓭᐊᐧᐠ ᑕᐡ ᒣᑲᐧᐨ ᑲᔭᓂᐱᒧᓭᐊᐧᐨ, ᐯᔑᐠ ᑲᑭᐊᓂ ᐅᐡᑭ ᐃᐧᒋᐃᐧᑯᐊᐧᐸᐣ ᑭᑭᐱᒋᑌᐦᐁᓭ ᒣᑲᐧᐨ ᓴᑭᐸᑲᐃᐧᐱᓯᑦ. ᒥᐊᐱᐣ ᑕᐊᐧᐨ ᐱᓇᒪ ᐅᐱᒧᓭᐠ ᑲᑭ ᑭᐱᒋᐊᐧᐨ.
ᐊᓇᐃᐧᐣ ᐅᐁᐧᓂ ᑲᑭᐊᐧᓂᐦᐊᐊᐧᐨ ᐯᔑᐠ ᑲᑭᐃᐧᒋᐱᒧᓭᒪᐊᐧᐨ, ᐅᑭᐅᓀᐣᑕᓇᐊᐧ ᐁᑲ ᒋᐳᓂᑐᐊᐧᐨ ᐅᒥᒧᓭᐃᐧᓂᐊᐧ, ᒥᓇᐊᐧ ᑕᐡ ᑭᒪᒋᑕᐊᐧᐠ ᓴᑭᐸᑲᐃᐧᐱᓯᒧᐣ 9 ᑲᐃᓇᑭᓱᓂᐨ. ᐅᑭᑭᔑᑐᓇᐊᐧ ᐅᐱᒥᓭᐃᐧᓂᐊᐧ 11 ᑲᐃᓇᑭᓱᓂᐨ ᐃᒪ ᒥᑲᓇᐠ ᑊᕑᐊᐣᐟᓫᐃᐣ ᒥᓇ ᐊᕑᑐᕑ, ᑲᑭᐃᔑᐸᑕᑭᑌᑯᐸᓀᐣ ᑭᑭᓄᐦᐊᒪᑎᐃᐧᑲᒥᐠ. ᓄᑯᑦ ᑕᐡ ᐃᒪ ᐃᔑᐸᑕᑭᑌ ᐁᐧᒥᑎᑯᔑᐃᐧ ᐊᐊᐧᔑᔑᐃᐧ ᐃᐡᑯᓄᑲᒥᐠ.
ᒣᑲᐧᐨ ᑕᐡ ᑲᑭᒪᐊᐧᒋᐦᐃᑎᓇᓄᐊᐧᐠ, ᐃᒪ ᑲᐊᐱᑕᒪᑫᐊᐧᐨ ᑌᐯᐧᐃᐧᐣ ᒥᓇ ᑭᐁᐧᒥᓄᐃᐧᒋᐃᐧᑎᐃᐧᐣ ᑲᓂᑲᓂᐡᑲᒧᐊᐧᐨ ( TRC ) ᐅᒪ ᑲᓇᑕ ᐊᐦᑭᐠ ᑫᐃᐧᓇᐊᐧ ᑭᐱᔕᐊᐧᐠ ᐁᑭᐱᒪᐊᐧᐣᑐᓇᐊᐧᐨ ᐅᑎᐸᒋᒧᐃᐧᓂᐊᐧ ᑲᑭᔕᐳᐡᑲᒧᐊᐧᐨ ᐁᐧᐡᑲᐨ ᑲᑭᐱ ᐃᐡᑯᓄᐦᐃᑕᐧ.
“ᐣᑎᓇᓄᑭᒥᐣ ᐁᐸᐸᒥ ᒪᐊᐧᐣᑐᓇᒪᐠ ᐅᑎᐸᒋᒧᐃᐧᓂᐊᐧ ᐁᐧᐡᑲᐨ ᑲᑭᐱ ᔕᐳᐡᑲᒧᐊᐧᐨ, ᐅᑕᐊᐧᔑᔑᒥᐊᐧᐣ, ᑲᑭᐱᑕᓇᓄᑭᐊᐧᐨ ᒥᓇ ᐱᑯ ᐊᐁᓀᐧᐣ ᑲᐃᐧᑎᐸᒋᒧᐨ,” ᐃᑭᑐ ᐊᓫᐱᐣ ᐱᐟᓫᐊᕑ, ᑲᐅᐣᒋ ᐊᓂᑯᐃᐧᑕᓄᑭᒪᐨ TRC ᒥᓇ ᑲᑭᐱ ᑭᒋ ᐅᑭᒪᑲᓂᔑᔑᐃᐧᐸᐣ ᐊᐧᒐᐡᑯᓂᒥᐠ ᑲᐅᐣᒋᐨ.
ᑌᐯᐧᐃᐧᐣ ᒥᓇ ᑭᐁᐧᒥᓄᐃᐧᒋᐃᐧᑎᐃᐧᐣ ᑲᓂᑲᓂᐡᑲᒧᐊᐧᐨ ᑭᐅᓇᓴᐸᓂᐠ ᒋᐅᒋ ᐃᐧᑕᓄᑭᒥᑎᒪᑲᐠ ᐊᐱ ᑲᑭᐃᐡᑲᐧ ᐅᓇᑌᑭᐸᐣ ᐁᐧᐡᑲᐨ ᐊᓂᔑᓂᓂᐃᐧ ᐊᐊᐧᔑᔕᐠ ᑲᑭᑲᓇᐁᐧᐣᑕᑯᓯᐊᐧᐨ ᐃᐡᑯᓄᐃᐧᑲᒥᑯᐠ ᒥᓇᐧᑕᒪᑫᐃᐧ ᓇᑯᒥᑐᐃᐧᐣ. ᑭᐃᔑᐅᓇᑌ ᒋᓇᓇᑕᐃᐧᑭᑫᒋᑲᑌᐠ ᑌᐯᐃᐧᐣ ᐊᓂᐣ ᒪᔭᑦ ᑲᑭᐃᑭᐠ ᑲᑭᑕᔑ ᑲᓇᐁᐧᐣᑕᑯᓯᐊᐧᐨ ᒥᓇ ᐯᑭᐡ ᒋᑭᑫᐣᑕᒧᓂᑕᐧ ᑲᑭᓇ ᐅᒪ ᑲᓇᑕ ᐊᐦᑭᐠ ᑲᑲᐯᔑᐊᐧᐨ.
ᐱᐟᓫᐊᕑ ᐃᐧᐣ ᒪᔭᑦ ᐅᑐᐣᒋ ᓂᑲᓂᑲᓇᐊᐧᐸᑕᐣ ᑲᑭᓇ ᐃᓇᓄᑭᐃᐧᓇᐣ ᒥᓯᐁᐧ ᐅᒪ ᑲᓇᑕ ᐊᐦᑭᐠ. ᒥᑕᐡ ᐁᔑᐱᒧᒋᑫᐊᐧ ᐁᐸᑭᑎᓇᒧᐊᐧᐨ ᐃᐧᐣᑕᒪᑫᐃᐧᓇᐣ ᐃᒪ ᑲᐃᔑᐊᔭᑭᐣ ᐱᒧᒋᑫᐃᐧᓇᐣ, ᑕᔑᑫᐃᐧᓇᐣ ᒥᓇ ᐱᑯ ᑲᐃᔑᐸᐯᔑᑯᐊᐧᐨ ᐊᐃᐧᔭᐠ ᐊᐊᐧᔑᒣ ᒋᓂᓯᑕᐁᐧᐣᒋᑲᑌᐠ ᐅᐁᐧ ᐃᓇᓄᑭᑕᒪᑫᐃᐧᐣ. ᐁᑲᐧ ᒥᓇ ᐅᐣᒋ ᐃᐧᒋᐦᐃᐁᐧᐊᐧᐠ ᑲᐅᓇᒋᑲᑌᐠ ᒪᐊᐧᒋᐦᐃᑐᐃᐧᓂᑫᐃᐧᓇᐣ.
ᐊᐱ ᑭᐃᐡᑲᐧ ᒪᐊᐧᐣᑐᓂᑲᑌᓂᑭᐣ ᑲᑭᐱᔕᐳᐡᑲᒧᐊᐧᐨ ᐅᑎᐸᒋᒧᐃᐧᓂᐊᐧ, ᐃᒪ ᐃᔑᑲᓇᐁᐧᐣᒋᑲᑌᓂᐊᐧᐣ ᒪᒪᐤ ᑲᐃᔑᑲᐁᐧᐣᑕᑲᐧᑭᐣ ᓇᓇᑕᐃᐧᑭᑫᒋᑫᐃᐧᓇᐣ ᒋᐅᒋ ᑭᑫᐣᑕᒧᐊᐧᐨ ᑯᑕᑭᔭᐠ ᐊᐃᐧᔭᐠ.
ᐊᐣᓇ ᑭᐸᐧᐣ, ᐊᓂᔑᓂᓂᑲᐠ ᑲᐅᒋᐊᓄᑭᑕᒪᑫᐨ ᐃᒪ ᑕᐣᑐᕑ ᐯ ᐅᑌᓇᐠ, ᐅᑭᑎᐸᒋᒪᐣ ᐅᒪᒪᒪᐣ ᑲᑭᐱᐃᓯᓭᓂᐨ ᒣᑲᐧᐨ ᐃᒪ ᑲᑭᑲᓇᐁᐧᐣᑕᑯᓯᓂᐨ ᐃᐡᑯᓄᑲᒥᑯᐠ.
“ᐣᑯᑕᓱᔭᑭᐃᐧᓀᐸᐣ ᐊᐱᐣ ᑲᐅᑕᐱᓇᑲᓄᐠ ᐁᑲᐧ ᒥᓇ ᐅᔑᒣᔕᐣ ᑭᓂᐅᐊᐦᑭᐃᐧᓀᔭᐣ ᒣᑲᐧᐨ ᐊᐱ ᐃᐁᐧ,” ᑭᐸᐧᐣ ᑭᐃᓇᒋᒧᐣ. “ᑲᐃᐧᐣ ᑕᐡ ᑲᓇᑫ ᐯᔑᑯᑭᑐᐃᐧᐣ ᒋᑲᐡᑭᑐᐊᐧᐨ ᒋᐊᓂᔑᓂᓂᒧᐊᐧᐨ.”
ᑭᐸᐧᐣ ᐃᑭᑐ ᑕᓱᑭᔑᑲ ᐱᑯ ᒥᓂᑯᐠ ᐊᔕ 47 ᑲᑕᓱᔭᑭᐃᐧᓀᐨ ᐁᐱᒥ ᓄᒋᐦᐃᑯᐨ ᐃᐁᐧᓂ ᑲᑭᐃᔑᒪᒋᑐᑕᑯᐊᐧᐨ ᒥᓇ ᐸᑭᑌᐡᑲᑯᐊᐧᐨ ᐅᐊᐧᑯᓇᑲᓇᐣ ᐃᒪ ᑲᑭᐅᐣᒋᒪᑲᓂᐠ ᐊᓂᔑᓂᓂᐃᐧ ᐊᐊᐧᔑᔕᐠ ᑲᑭᐱᑕᔑᑲᓇᐁᐧᐣᑕᑯᓯᐊᐧᐨ ᑭᑭᓄᐦᐊᒪᑎᐃᐧᑲᒥᐠ.
“ᒥᐱᑯ ᑭᔭᐱᐨ ᐁᔑᐱᒥ ᐃᐧᒋᐃᐧᑯᔭᐣᐟ ᐣᐱᒪᑎᓯᐃᐧᓂᓇᐠ,” ᑭᐸᐧᐣ ᑭᐃᑐ. “ᑲᐃᐧᐣ ᑕᐡ ᐣᑭᑫᐣᑕᓯᐣ ᐃᐧᑲ ᒋᐅᒋ ᐳᓂᐦᐃᑯᐣᐠ. ᑌᐯᐧ ᒥᓇᐧᔑᐣ ᐅᒪ ᑲᑭᓇ ᒋᐅᒋ ᒪᒋᔭᓄᑲᑕᒪᑭᐸᐣ ᑭᑫᐃᐧᓂᐠ ᐃᓀᑫ.”
ᐊᓫᐊᐣ ᑐᐁᐧᑭᔑᐠ, ᑫᐃᐣ ᐃᒪ ᑭᐃᔕ ᓭᐣᐟ ᒍᓴᑊ ᒥᓇ ᒪᑭᐣᑕᐧᐡ ᑭᑭᓄᐦᐊᒪᑎᐃᐧᑲᒥᑯᐣ, ᑲᐃᔑᑕᑲᐧᐠ ᑭᐁᐧᑎᓄᐠ ᓀᐣᑲᐱᐦᐊᓄᐠ ᐃᓀᑫ ᐯᕑᒥᓫᐃᔭᐣ ᐯ, ᐅᐸᑯᓭᐣᑕᐣ ᑲᓇᑕ ᑲᑲᐯᔑᐊᐧᐨ ᒋᑭᑫᐣᑕᒧᐊᐧᐨ ᑭᔭᐱᐨ ᐊᓂᐣ ᑲᑭᐃᐣᑎᐊᐧᐨ ᐊᐊᐧᔑᔕᐠ ᐃᒪ ᑭᑭᓄᐦᐊᑎᐃᐧᑲᒥᑯᐠ.
“ᐃᒪ ᑲᔦ ᓄᑯᑦ ᑲᑕᔑ ᐃᐡᑯᓄᐊᐧᐨ, ᑲᑭᓇ ᐊᐊᐧᔑᔕᐠ ᒋᑭ ᑭᑫᐣᑕᒧᓂᑕᐧᐸᐣ ᐊᓂᐣ ᑲᑭᐃᔑᐁᐧᐸᐣ,” ᑐᐁᐧᑭᔑᐠ ᐃᑭᑐ.

See also

12/01/2015 - 19:37
12/01/2015 - 19:37
12/01/2015 - 19:37
12/01/2015 - 19:37