ᐗᐱᑭᑲ ᐅᑕᒋᑲᓇᐗᐸᑕᓇᐗ ᔑᒪᑲᓂᔑᑫᐎᐣ

Create: 12/01/2015 - 19:25

ᐁᐃᔑᓂᑲᑕᒧᐗᐨ “ᑲᓇᑭᐡᑭᑲᑌᐠ” ᐅᓂᑲᓂᑕᒪᑫᐠ ᐃᐃᒪ ᐗᐱᑭᑲ ᐃᐡᑯᓂᑲᓂᐠ ᐅᑭᑭᐡᑭᓇᓇᐗ ᓇᑯᒥᑎᐎᓂᓂ ᑲᐃᔑᓂᑲᑌᓂᐠ ᓂᔑᓇᐯ ᐊᐢᑭ ᔑᒪᑲᓂᔑᑫᐎᐣ ᐱᒥᐎᒋᑫᐎᐣ (NAPS) ᐁᑭᒪᓯᓇᐦᐊᒧᐗᐨ ᐅᐣᑌᕒᐃᔪ ᐊᓂᔑᓂᓂᐤ ᔑᒪᑲᓂᔑᑫᐎᐣ ᓇᑯᒥᑎᐎᐣ᙮
ᐁᑭᒪᓯᓇᐦᐅᑎᓱᐗᐨ ᒣᑾᐨ ᒫᕒᐨ 22 ᐃᐃᒪ ᐗᓂᓇᐗᑲᐣᐠ ᐗᐱᑭᑲ ᐅᑭᒪᑲᐣ ᓈᕒᒪᐣ ᐳᕒᐋᐣ ᐁᐃᓯᓭᓂᐠ ᐊᓂᔑᓂᓂᐗᐠ ᒋᓇᓇᑲᑕᐌᑕᒧᐗᐨ ᑫᐃᔑ ᒥᓄᓭᓂᐠ ᔑᒪᑲᓂᔑᑫᐎᐣ ᐃᐃᒪ ᐃᐡᑯᓂᑲᓂᐠ - ᑲᔦᒪ ᒋᓇᑯᒥᑎᐗᐨ ᐅᐣᑌᕒᐃᔪ ᔑᒪᑲᓂᔕᐣ (OPP) ᑲᔦᒪ ᐎᓇᐗ ᐃᐡᑯᓂᑲᓂᐠ ᒋᐅᒋ ᐱᒥᐎᒋᑲᑌᐠ ᔑᒪᑲᓂᔑᑫᐎᐣ᙮
“ᑲᐯ ᑭᒋᐊᓄᑭᒥᐣ ᐅᐅᐌ ᐅᑕᓇᐠ ᑲᐃᐸᐦᑭᐗᐠ ᐁᑲᑴᑲᒋᑎᓇᒪᐠ ᔑᒪᑲᓂᐡ ᐱᒥᐎᒋᑫᐎᐣ ᒋᑭᐅᒋ ᓇᑲᒋᒋᑲᑌᐠ ᑎᐡᑯᓂᑲᓂᓇᐣ ᒋᒥᓄᔭᐗᐨ ᒥᓇ ᒋᐊᐣᑾᒥᒋᑲᓂᐗᐠ ᒋᓂᑲᓂ ᑲᓇᐗᐸᒋᑲᑌᐠ,” ᐃᑭᑐ ᑖᕒᓯ ᐦᐋᕒᐳᕒ, ᐗᐱᑭᑲ ᑲᑭᓂᑲᓂᑲᓇᐗᐸᑕᐠ ᑲᑭᑲᑴᑲᐡᑭᑕᒪᓱᐗᐨ ᒋᑭᒪᓯᓇᐦᐊᒧᐗᐨ ᓇᑯᒥᑎᐎᓂᓂ᙮
“ᐊᓂᔑᓂᓂᐗᐠ ᒥᓉᑕᒧᐗᐠ ᒥᓇ ᐅᑭᒋᓀᑕᓇᐗ, ᒥᓇ ᐅᓂᑲᓂᑕᒪᑫᐠ ᐅᒥᓉᑕᓇᐗ ᒋᑭᑌᐱᓇᒧᐗᐨ ᐅᐅᐌᓂ ᓇᑯᒥᑎᐎᓂᓂ,” ᐦᐋᕒᐳᕒ ᐃᑭᑐ᙮
ᐗᐱᑭᑲ ᐃᐡᑯᓂᑲᐣ ᐅᑭᓇᓇᑐᑭᑫᑕᓇᐗ ᐁᓀᑕᒧᐗᐨ ᐊᓂᔑᓂᓂᐗᐠ ᒣᑾᐨ 2009 ᒋᑭᐅᓀᑕᒧᐗᐨ ᑭᔭᐸᐨ ᒋᑭᓇᓇᑲᒋᒋᑫᐗᐨ ᓂᔑᓇᐯ ᐊᐢᑭ ᔑᒪᑲᓂᔕᐠ ᑲᔦᒪ ᒋᑭᑲᑴᒋᒪᑲᓀᐗᐨ ᐅᐣᑌᕒᐃᔪ ᔑᒪᑲᓂᔕᐠ᙮ ᑲᑭᔑᒥᑲᒧᐗᐨ ᐁᐃᓀᑕᒧᐗᐨ ᐊᓂᔑᓂᓂᐗᐠ ᐅᐣᑌᕒᐃᔪ ᔑᒪᑲᓂᔕᐠ ᒋᑭᓇᓇᑲᒋᒋᑫᐗᐨ᙮
ᐦᐋᐳᕒ ᐅᑭᐎᑕᐣ ᐃᐃᒪ ᐅᐣᑌᕒᐃᔪ ᐊᓂᔑᓂᓂ ᔑᒪᑲᓂᔑᑫᐎᐣ ᓇᑯᒥᑎᐎᐣ ᑲᐃᓇᓯᓇᐦᐃᑲᑌᐠ, ᑕᑭᐃᓯᓭ ᐊᓂᔑᓂᓂᐗᐠ ᒋᑭᐊᓄᑭᐦᐊᐗᐨ ᒥᓇ ᒋᑭᐱᒥᐎᑐᐗᐨ ᔑᒪᑲᓂᔑᐎ ᐱᒥᐎᒋᑫᐎᐣ᙮ ᑲᑭ ᐃᐡᑾᒪᓯᓇᐦᐊᒧᐗᐨ ᓇᑯᒥᑎᐎᓂᓂ ᐊᓂᔑᓇᐯᐠ ᐅᑲᓇᓇᑲᒋᑐᓇᐗ ᐊᓂᐣ ᑫᑭᑐᑕᒧᐗᐨ, ᑲᔦᒪ ᐅᐣᑌᕒᐃᔪ ᔑᒪᑲᓂᔕᐣ ᒋᓇᓇᑲᒋᒋᑫᓂᐨ ᐃᐃᒪ ᐗᐱᑭᑲ, ᐦᐋᕒᐳᕒ ᐃᑭᑐ᙮
“ᑲᑲᑴᑲᒋᑎᓇᒪᐠ ᐃᐃᐌ ᐊᓂᔑᓂᓂᐗᐠ ᒋᐎᑕᓄᑭᒪᐗᐨ ᐊᐗᓀᓇᐣ ᔑᒪᑲᓂᔑᐎ ᐱᒥᐎᒋᑫᐎᐣ ᑫᐅᓀᓂᒪᐗᐨ, ᒋᑭᐅᒋ ᐃᓯᓭᐠ ᑾᔭᐠ ᐎᑕᓄᑭᒥᑎᐎᐣ ᔑᒪᑲᓂᔕᐠ ᒥᓇ ᐊᓂᔑᓇᐯᐠ ᐃᐃᒪ ᐃᐡᑯᓂᑲᓂᐠ,” ᐦᐋᕒᐳᕒ ᐃᑭᑐ᙮
ᒥᓇ ᑭᐃᑭᑐ ᐃᐃᐌ ᑲᑐᑕᒧᐗᐨ ᐊᓂᔑᓇᐯᐠ ᑲᑲᑴᐱᒥᐎᒋᑫᑕᒪᓱᐗᐨ ᔑᒪᑲᓂᔑᑫᐎᐣ ᑕᑭᐅᒋ ᐃᓯᓭ ᐃᑭᐌᓂᐗᐠ ᐅᐡᑲᑎᓴᐠ ᒋᑭᓇᑲᑕᐌᑕᒧᐗᐨ ᒋᑭ ᐃᓇᓄᑭᐗᐨ ᔑᒪᑲᓂᐡ ᐅᐅᐌᑎ ᓂᑲᐣ᙮
“ᒥᔑᐣ ᑕᔭᐗᒥᐣ ᐅᐡᑲᑎᓴᐠ, ᒥᓇ ᑕᑭᐃᓯᓭ ᒋᑭᓇᑲᑕᐌᑕᒧᐗᐨ ᑫᑭᐃᓇᓄᑭᐗᐨ ᐃᐃᒪ ᒥᓄᔭᐎᐣ ᒥᓇ ᐊᐣᑾᒥᓯᑫᐎᓇᐣ,” ᐦᐋᕒᐳᕒ ᐃᑭᑐ᙮
ᐦᐋᕒᐳᕒ ᐅᑭᐎᑕᐣ ᐃᐃᒪ ᐗᐱᑭᑲ ᐁᑭᓇᓇᑲᑕᐌᑕᒧᐗᐨ ᒥᓂᑯᐠ ᑲᐃᔑᓇᓇᑲᒋᒋᑫᐗᐨ ᓂᔑᓇᐯ ᐊᐢᑭ ᔑᒪᑲᓂᔕᐠ ᑲᐃᔑᓄᑌᓭᓂᐠ ᐅᑕᓄᑭᐎᓂᐗ, ᑲᑭᔑᐎᑕᒧᐗᐸᐣ ᓄᑯᒥᑫ ᐊᓂᔑᓇᐯ ᐊᐢᑭ ᐱᒥᐎᒋᑫᐎᐣ᙮
“ᑲᐃᔑᓄᑌᓭᐗᐨ ᔓᓂᔭᓇᐣ (ᐃᑭᐌᓂᐗᐠ ᓂᔑᓇᐯ ᐊᐢᑭ ᔑᒪᑲᓂᔕᐠ), ᑲᐎᐣ ᑭᑌᐱᓭᓯᐗᐠ ᒋᑭᓇᓇᑲᒋᒋᑫᐗᐨ ᑲᐃᔑᓇᑕᐌᒋᑲᑌᐠ ᓇᓇᑲᒋᒋᑫᐎᐣ,” ᐦᐋᕒᐳᕒ ᐃᑭᑐ᙮ “ᑭᓇᓇᑲᒋᑐᒥᐣ ᑲᔭᓂᔑᒪᒐᔭᐠ ᐁᓇᑕᐌᑕᑯᐠ ᑾᔭᐠ ᒋᓇᓇᑲᒋᐦᐊᑲᓀᐗᐨ ᐊᓂᔑᓂᓂᐗᐠ ᐅᒥᓄᔭᐎᒥᐗ ᒥᓇ ᐊᐣᑾᒥᓯᐎᓇᐣ᙮”
ᑲᐃᔑᓇᑭᐡᑲᒧᐗᐨ ᓂᔑᓇᐯ ᐊᐢᑭ ᔑᒪᑲᓂᔑᑫᐎᐣ ᑲᐃᔑᓄᑌᓭᓂᐠ ᐅᑕᓄᑭᐎᓂᐗ ᐅᐅᐌᑎᓀᑫ ᑭᐌᑎᓄᐠ ᑭᐎᒋᑲᑌ ᓄᑯᒥᑫ, ᐅᐅᐌ ᒣᑾᐨ ᐁᐱᒥᑲᑴᑌᐗᐨ ᒋᑭᓇᑭᓂᑲᑌᓂᐠ ᒥᓂᑯᐠ ᑲᒥᓇᑲᓀᐗᐨ ᔓᓂᔭᓇᐣ ᒋᑭᑌᐱᓭᐗᐨ ᑎᓄᑲᐣ ᑲᐃᔑᐱᒥᐎᒋᑫᐗᐨ ᔑᒪᑲᓂᔕᐠ ᐅᐅᒪ ᐅᐣᑌᕒᐃᔪ ᒥᓇ ᐅᑌᓇᐠ᙮ ᓂᔑᓇᐯ ᐊᐢᑭ ᔑᒪᑲᓂᔑᑫᐎᐣ ᑲᔦ ᑲᑴᑌᐗᐠ ᒋᑭ ᐃᓇᑯᓂᑫᐎᓂᐗᑎᓂᐠ ᐅᑕᓄᑭᐎᓂᐗ, ᐁᑲ ᒋᔑᑲᓇᐗᐸᒋᑲᑌᐠ ᐱᒥᐎᒋᑫᐎᐣ᙮
ᑲᓇᑕ ᐅᑭᒪᐎᐣ ᐅᑭᐎᑕᓇᐗ ᒋᐸᑭᑎᓇᐗᐨ ᔓᓂᔭᓇᐣ ᒋᓇᑭᓂᑲᑌᐠ ᓂᔑᓇᐯ ᐊᐢᑭ ᔑᒪᑲᓂᔑᑫᐎᐣ ᐱᒥᐎᒋᑫᐎᐣ ᑲᑌᐱᓇᐗᐨ ᔓᓂᔭᐣ ᒥᓂᑯᐠ ᓂᔭᓄᐊᐦᑭ, ᔕᑯᐨ ᑲᐎᐣ ᑕᑭᓇᑭᓇᑲᓀᓯᐣ ᐊᐊᐌ ᔓᓂᔭ ᒥᓂᑯᐠ ᑲᒥᓇᑲᓀᐗᐨ ᑲᐅᔑ ᐱᒥᐎᑐᐗᐨ ᐅᑕᓄᑭᐎᓂᐗ᙮
ᓂᔑᓇᐯ ᐊᐢᑭ ᔑᒪᑲᓂᔑᑫᐎᐣ ᐱᒥᐎᒋᑫᐎᐣ ᓇᑯᒥᑎᐎᐣ ᑕᑭᔑᐱᓭ ᐅᐅᐌ ᐊᓂ ᐃᐡᑾᔭᑭᓱᐨ ᒫᕒᐨ᙮ ᓂᔑᓇᐯ ᐊᐢᑭ ᑭᐃᑭᑐᐗᐠ ᐁᑲ ᒋᒪᓯᓇᐦᐅᑎᓱᐗᐨ ᐅᐡᑭ ᓇᑯᒥᑎᐎᐣ ᐁᑲ ᐁᐅᒋᓇᑴᒋᑲᑌᓂᐠ ᑲᑭᔑᑲᑴᑌᐗᐨ ᒥᓂᑯᐠ ᔓᓂᔭᓇᐣ ᒥᓇ ᒋᑭ ᐃᓇᑯᓂᑫᐗᐠ ᐱᒥᐎᒋᑫᐎᐣ ᐁᑲ ᐁᐅᒋ ᐊᓂᒧᒋᑲᑌᐠ᙮
ᐎᓇᐗ ᐗᐱᑭᑲ, ᑲᑭᒪᓯᓇᐦᐅᑎᓱᐗᐨ ᐅᐣᑌᕒᐃᔪ ᐊᓂᔑᓂᓂ ᔑᒪᑲᓂᔑᑫᐎᐣ ᓇᑯᒥᑎᐎᐣ ᑫᑲᐟ ᐊᔕ ᐁᑌᐱᓇᒪᓱᐗᐨ ᑲᑲᑴᐅᓇᒋᑫᐗᐨ ᒋᑭᑲᓇᐗᐸᑕᒧᐗᐨ ᔑᒪᑲᓂᔑᑫᐎᐣ ᐃᐃᒪ ᐃᐡᑯᓂᑲᓂᐠ᙮ ᐦᐋᕒᐳᕒ ᐁᐎᑕᐠ, ᑭᔭᐸᐨ ᐊᓄᑭᐎᐣ ᑕᓂᑐᒋᑲᑌ ᑲᐎᐣ ᐃᑴᑕ ᐊᓂᐣ ᑫᐃᔑ ᑲᓇᐗᐸᒋᑲᑌᐠ ᔑᒪᑲᓂᔑᑫᐎᐣ ᐃᐃᐌᑕᐡ ᑲᔦ ᒋᐊᓄᑭᒋᑲᑌᐠ ᓇᑯᒥᑎᐎᐣ ᐊᐣᑎᓀᑫ ᒋᐊᓂᑯᓭᐠ᙮ ᓄᑯᒼ ᐗᐱᑭᑲ ᐅᑭᑌᐱᓇᓇᐗ ᐯᔑᑯ-ᐊᐦᑭ ᓇᑯᒥᑎᐎᐣ, ᔕᑯᐨ ᐅᑎᓀᑕᓇᐗ ᐊᓂᔑᓇᐯᐠ ᒋᑭᓇᑭᒋᑲᑌᐠ ᓂᔭᓄᐊᐦᑭ ᓇᑯᒥᑎᐎᐣ ᒥᓂᑯᐠ ᒥᓇᐗ ᐊᐦᑭᐗᐠ᙮
ᐦᐋᕒᐳᕒ ᑭᐃᑭᑐ ᐗᐱᑭᑲ ᑲᓂᑲᓂᑕᒪᑫᐗᐨ ᐁᓇᓇᑲᑕᐌᓂᒪᐗᐨ ᐃᐡᑯᓂᑲᓂᐠ ᐅᐡᑲᑎᓴᐣ ᑲᑭᒪᓯᓇᐦᐊᒧᐗᐨ ᓇᑯᒥᑎᐎᓂᓂ᙮
“ᑲᑯᒋᑐᒥᐣ ᒋᒪᒥᓄᒋᑲᑌᐠ ᔑᒪᑲᓂᔑᑫᐎᐣ ᑫᐃᔑᒥᓄᓭᐠ ᐃᐃᒪ ᐃᐡᑯᓂᑲᓂᐠ ᒋᑭᐅᒋ ᒥᓄᓭᐗᐨ ᐊᓂᔑᓇᐯᐠ ᐅᐅᐌᑎᓀᑫ ᓂᑲᐣ,” ᐦᐋᕒᐳᕒ ᐃᑭᑐ᙮ “ᑭᐡᐱᐣ ᑲᐡᑭᑐᔭᐠ, ᑕᑭᐅᒋ ᒥᓄᐗᑕᒧᐗᐨ ᐊᓂᔑᓇᐯᐠ ᐃᐃᒪ ᐃᐡᑯᓂᑲᓂᐠ᙮”

See also

12/01/2015 - 19:37
12/01/2015 - 19:37
12/01/2015 - 19:37
12/01/2015 - 19:37