ᐊᔕ ᐊᓂᑭᑫᐣᑕᑲᐧᐣ ᑲᑭ ᓇᓇᑕᐃᐧᑭᑫᒋᑲᑌᐠ ᐊᓂᐣ ᑲᐃᔑᐁᐧᐱᓯᐨ ᐁᐧᐡᑲᐨ ᑲᑭᐳᓂᐱᒪᑎᓯᐸᐣ

ᒣᐡᑭᑲᑲᐧᒪᐃᐧᓂᓂ ᑲᕑᐃ ᐊᐧᓭᑭᓯᐠ ᑫᑲᐱ ᑭᒥᓇᑲᓄ ᔑᒪᑲᓂᐡ ᐅᑎᐸᒋᒧᐃᐧᐣ ᒣᑲᐧᐨ ᐊᐱ 1976 ᑲᔭᑭᐊᐧᓂᐠ ᑲᑭᐃᐡᑲᐧ ᐱᒪᑎᓯᓂᐸᐣ ᐅᒪᒪᒪᐣ ᓱᐱ ᐊᐧᓭᑭᓯᐠ.
“ᓂᔭᓄᔭᐊᑭ ᐣᑭᑕᔑᑲᐣ ᐁᑭᑲᑫᐧᑌᐱᓇᒪᐣ ᒋᒥᓂᑯᔭᐣ ᔑᒪᑲᓂᔕᐠ ᐅᑎᐸᒋᒧᐃᐧᓂᐊᐧ,” ᑭᐃᑭᑐ ᐊᐧᓭᑭᓯᐠ, ᐁᑲᐧ ᐅᑭᐃᐧᒋᐦᐃᑯᐣ ᐅᑕᔭᒥᑕᒪᑫᐣ ᑐᕑᐊᐣᑐ ᑲᑕᓇᓄᑭᓂᐨ ᐊᓂᔑᓂᓂᐊᐧᐠ ᑲᐅᒋᐃᐧᒋᐦᐃᑕᐧ ᑎᐸᑯᓂᑫᐃᐧ ᐃᐧᒋᐦᐃᐁᐧᐃᐧᓂᐠ ᐁᑭᐊᐸᒋᑐᓂᐨ ᑲᐸᑭᑕᔓᐊᐧᑌᐠ ᐃᐧᐣᑕᒪᑫᐃᐧᓇᐣ ᑲᒥᑭᐊᐧᓄᐊᐧᐠ. “ᒪᐊᐧᐨ ᐃᑯ ᑭᐸᐯᒋᓭ, ᑭᓇᑲᐧᐡ ᐁᑭᐱᒥᑲᒪᐣᐠ, ᑎᐱᓇᐁᐧ ᑫᑯᓇᐣ ᐣᑭᐅᒋᒣᑲᐧᐡᑲᓇᐣ. ᒥᔑᐣ ᐊᐃᐧᔭᐠ ᐣᑭᐱᓇᓇᑭᐡᑲᐊᐧᐠ ᒥᓇ ᐣᑭᐱᐊᔭᓱᓂᑯᐠ ᐊᑎᐟ ᐊᐃᐧᔭᐠ. ᒥᑕᐡ ᐊᓂᔕ ᑲᑭᐅᐣᒋ ᑲᐡᑭᑐᔭᐣ ᒋᑌᐱᓇᒪᐣ ᐅᐁᐧᓂ ᔑᒪᑲᓂᔕᐠ ᐅᑎᐸᒋᒧᐃᐧᓂᐊᐧ.”
ᐊᒥ ᑲᐯᐦᐃ ᑲᑭᐃᓇᑲᓄᐨ ᐊᐧᓭᑭᓯᐠ ᑲᑭᓇ ᔑᒪᑲᓂᔕᐠ ᐅᑎᐸᒋᒧᐃᐧᓂᐊᐧ ᑲᑭᑎᐸᒋᒪᐊᐧᐸᐣ ᐅᒪᒪᒪᐣ ᑲᑭᐃᐡᑲᐧᐱᒪᑎᓯᓂᐸᐣ ᑲᑭᓇ ᑭᒐᑭᑌᓂᐊᐧᐣ ᐊᐱ ᔑᒪᑲᓂᔑᐃᐧᑲᒥᑯᐠ ᑲᑭᐃᔑ ᑲᓇᐁᐧᐣᒋᑲᑌᑲᐧᐸᐣ ᑯᑯᑯᐦᐸᐃᐧᑎᑯᐠ ᑲᑭᓴᑭᑌᑭᐸᐣ ᐁᐧᐡᑲᐨ.
“ᐊᒥ ᑲᑐᑕᑯᔭᐣ ᐁᑭ ᓇᓇᐱᐃᐧᐣᑕᒪᐃᐧᔑᐊᐧᐨ ᐁᑲ ᑫᑯᐣ ᐁᑕᑲᐧᐠ ᑎᐸᒋᒧᐃᐧᐣ, ᐁᑭᒐᑭᑌᐠ ᔑᒪᑲᓂᔑᐃᐧᑲᒥᐠ ᒥᓇ ᐁᑲ ᓇᐣᑕ ᐁᔑᒪᓯᓇᐦᐃᑲᑌᐠ,” ᑭᐃᑭᑐ ᐊᐧᓭᑭᓯᐠ. “ᐃᐁᐧᓂ ᑕᐡ ᐁᑲ ᑲᑭᐅᐣᒋ ᑭᑫᐣᑕᒧᐊᐧᐨ ᐊᔕ ᐁᐧᑎ ᐁᑭᐅᐣᒋ ᓇᓇᑕᐃᐧᑭᑫᐣᑕᒪᐣ ᑲᐃᓇᑌᐠ ᔑᒪᑲᓂᔑᐃᐧ ᑲᓇᐊᐧᐸᒋᑫᐃᐧᐣ. ᑲᐯᐦᐃ ᐣᑭᐱ ᑭᑫᐣᑕᐣ ᐊᑯᓇᐠ ᐅᐁᐧ ᑲᑭᐱᒪᑕᓄᑲᑕᒪᐸᐣ ᐅᒪ ᑲᑕᔑᐱᒪᑎᓯᔭᐠ ᐃᒪ ᐁᑭᐅᒋ ᐅᐱᑲᐸᐃᐧᒪᑲᐠ ᑲᐱᒥᐊᔭᓂᑫ ᒪᓯᓇᐦᐃᑲᑌᑭᐣ ᑫᑯᓇᐣ. ᑭᔭᒥᑯ ᒣᑲᐧᐨ ᐧᐁᑎ 1970 ᑲᑭᐱᐃᓇᑭᑌᐠ ᐊᐦᑭᐃᐧᐣ ᑭᓇᑕᐁᐧᐣᑕᑯᓯᐊᐧᐠ ᒋᔭᓂᔑᑎᐸᒋᒧᐊᐧᐨ ᑲᐃᔑᐅᑐᑭᒪᒥᐊᐧᐨ.”
ᐊᒥ ᑲᑐᑕᐠ ᐊᐧᓭᑭᓯᐠ ᐁᑭᒪᑕᓄᑲᑕᐠ ᐁᐃᐧᓇᓇᑕᐃᐧᑭᑫᑕᐠ ᐊᓂᐣ ᑲᐃᔑᐁᐧᐱᓯᓂᐨ ᐅᒪᒪᒪᐣ ᑲᑭ ᐃᐡᑲᐧᐱᒪᑎᓯᓂᐨ ᐊᐱ ᑲᑭᐃᐡᑲᐧ ᑌᐱᓇᑭᐸᐣ ᐅᑎᐡᑯᓄᐃᐧ ᑎᐸᐦᐊᒪᑯᐃᐧᐣ, ᒥᐦᐃᒪ ᑲᑭᔭᓄᒋ ᑲᐡᑭᑐᐨ ᒋᐱᒥᑎᐸᐦᐊᐠ ᓂᔭᓄᔭᑭ ᑲᑭᑕᔑᑲᐣᐠ ᐁᑭᓇᓇᑐᓇᐠ ᑎᐸᒋᒧᐃᐧᓂ.
“ᐊᔕ ᑕᐡ ᐣᑭᑌᐱᓇᐣ ᔑᒪᑲᓂᔕᐠ ᐅᑎᐸᒋᒧᐃᐧᓂᐊᐧ, ᐊᒥ ᐁᑲᐧ ᓄᑯᑦ ᐁᑭᑫᐣᑕᒪᐣ ᐊᓂᐣ ᒪᔭᑦ ᑲᐃᔑᐁᐧᐸᓄᑯᐸᓀᐣ ᐃᐁᐧ ᑲᑎᐱᑲᐠ,” ᑭᐃᑭᑐ ᐊᐧᓭᑭᓯᐠ. “ᓀᐅᐨ ᐣᑭᑲᑫᐧᑌᐧᒥᐣ ᒥᓇᐊᐧ ᒋᓇᓇᑲᒋᒋᑲᑌᐠ ᐁᑲ ᐁᑌᐯᐧᑕᒪᐣᐠ ᐃᒪ ᑲᑭᐃᓇᒋᒧᐊᐧᐨ ᔑᒪᑲᓂᔕᐠ.”
ᐊᐧᓭᑭᓯᐠ ᑭᐃᑭᑐ ᐃᐁᐧᓂ ᔑᒪᑲᓂᔕᐠ ᐅᑎᐸᒋᒧᐃᐧᓂᐊᐧ ᐸᐸᑭ ᐁᑕ ᐅᑭᐃᐧᐣᑕᓇᐊᐧ ᐊᓂᐣ ᑲᑭᐃᔑᐁᐧᐱᓯᓂᐨ ᐅᒪᒪᒪᐣ , ᐁᑲᐧ ᔕᑯᐨ ᑲᐃᐧᐣ ᒋᑭᐅᐣᒋ ᐃᐧᐣᑕᒧᐊᐧᐨ ᒥᐢᑭᐧᓂ ᒋᑭᐊᐧᐸᐣᑕᒧᐊᐧᑫᐧᐣ ᐃᒪ ᑲᑭᑕᔑ ᐃᐡᑲᐧᐱᒪᑎᓯᓂᐨ.
“ᐯᔑᐠ ᑲᑭᑎᐸᒋᒧᐨ ᓂᔑᒣᐡ ᐁᕑᓂ ᐃᑭᑐ ᑭᑲᓄᑫ ᒪᐊᐧᐨ ᒥᐢᑕᐦᐃ ᒥᐢᑭᐧᓂ ᐁᑭᐊᐧᐸᐣᑕᒧᑯᐸᓀᐣ ᐃᐁᐧ ᐊᐱ ᑲᑎᐱᑲᓂᐠ,” ᑭᐃᑭᑐ ᐊᐧᓭᑭᓯᐠ.
ᐊᐧᓭᑭᓯᐠ ᑭᐃᑭᑐ ᐃᒪ ᔑᒪᑲᓂᔕᐠ ᐅᑎᐸᒋᒧᐃᐧᓂᐊᐧ ᑭᐃᑭᑐᒪᑲᓂ ᑲᐃᐧᐣ ᒋᑭᐅᐣᒋ ᒪᒋᓂᔕᐦᐊᒧᐧᐊᐨ ᒥᔭᐃᐧᓂ ᒋᓇᓇᑲᒋᒋᑲᑌᓂᐠ, ᔐᒪᐠ ᐅᑭᐃᔑ ᐸᑭᑎᓇᓇᐊᐧ ᐃᐡᑯᓂᑲᓂᐠ ᐃᐧᓇᐊᐧ ᒋᓇᐦᐃᓇᒧᐊᐧᐨ.
“ᐃᒪ ᐅᑕᓇᐠ ᐅᑕᐸᓂᐠ ᐅᑭᐃᔑᐳᓯᐁᐧᐱᓇᓇᐊᐧ ᐃᐡᑯᓂᑲᓂᐠ ᐁᑭᐃᔑᑕᐸᑕᒧᐊᐧᐨ ᐁᑲᐧ ᓂᔓᑯᐣ ᑲᐃᓯᓭᓂᐠ ᐊᒥ ᐊᐱ ᑲᑭᓇᐦᐃᓂᑫᐊᐧᐨ,” ᑭᐃᑭᑐ ᐊᐧᓭᑭᓯᐠ. “ᓂᔓᑯᐣ ᑲᐃᐡᑲᐧ ᐱᒪᑎᓯᐨ. ᐅᒪᒥᑐᓀᑕᓇᐊᐧ ᐊᐃᐧᔭᐠ ᐅᒪ ᐃᐡᑯᓂᑲᓂᐠ ᑫᑯᓀᐣ ᓇᐱᐨ ᑲᑭᐅᐣᒋ ᐸᐸᔑ ᓇᐦᐃᑲᐊᐧᑲᓄᐨ.”
ᐃᓇᐱᐣ
ᐊᒥᐦᐃ ᒧᔕᐠ ᑲᑭᐃᓇᒋᒧᑕᐊᐧᑲᓄᐨ ᐊᐧᓭᑭᓯᐠ ᐅᒪᒪᒪᐣ ᑭᐅᐣᑕᐱᓀᐊᐧᐣ ᐁᑭ ᑭᐳᓇᒧᓭᓂᐨ ᒥᓂᑫᐧᐃᐧᓂᐠ ᐅᐣᒋ, ᔕᑯᐨ ᐃᑯ ᐅᑭᑕᓀᐣᑕᐣ ᐁᑲ ᒥᓯᐁᐧ ᐁᑭᐅᐣᒋ ᑎᐸᑐᑌᓂᐠ ᐊᓂᐣ ᒪᔭᑦ ᑲᑭᐃᐣᑎᑫᐧᐣ, ᐅᑕᓀᐣᑕᐣ ᐃᑯ ᐁᑭᓂᓴᑲᓄᑫᐧᐣ.
ᐁᑲᐧ ᒥᓇ ᑭᐃᑭᑐ ᐁᑭᐃᐧᐣᑕᒪᑯᐨ ᐸᐸᑲᐣ ᐊᐃᐧᔭᐣ ᐁᑭᓄᑕᒧᐊᐧᐨ “ᒥᔑᓇᐧ ᐁᑭᒪᒪᑌᐁᐧᓂᐠ” ᒣᑲᐧᐨ ᐃᐁᐧ ᐊᐱ ᑲᑭ ᐃᐡᑲᐧᐱᒪᑎᓯᐨ.
ᐊᐧᓭᑭᓯᐠ ᑭᐃᑭᑐ ᓂᔭᓇᐣ ᐃᑫᐧᐊᐧᐠ ᑭᐊᓄᓇᑲᓄᐊᐧᐠ ᒋᑭᓯᐱᑭᓇᒧᐊᐧᐨ ᐁᒥᐢᑭᐁᐧᑲᓂᑭᐣ ᓂᐸᑲᓇᐣ ᐃᒪ ᐅᒪᒪᒪᐣ ᐅᐊᐧᑲᐦᐃᑲᓂᐠ ᐊᐱ ᑲᐃᐡᑲᐧᐱᒪᑎᓯᓂᐨ.
“ᑫᑯᓀᐣ ᑕᐡ ᐁᑲ ᐁᑭᐅᐣᒋ ᐃᐧᐣᒋᑲᑌᐠ ᐅᐁᐧ ᐃᒪ ᔑᒪᑲᓂᔕᐠ ᐅᑎᐸᒋᒧᐃᐧᓂᐊᐧ.” ᑭᐃᑭᑐ ᐊᐧᓭᑭᓯᐠ. “ᐁᑲᐧ ᐊᐧᐁᐧ ᓂᔑᒣᐡ ᑭᐊᐧᑭᒋᑲᐧᐡᑯᓂ ᐅᑕᐸᓂᐠ ᐁᑭᐸᑭᑭᐱᑐᐨ ᑲᑭᐊᑲᐧᓇᐦᐅᒥᐨ ᐊᒥ ᑲᑭᐊᐧᐸᒪᐨ ᓂᒪᒪᒥᓇᐣ ᐁᓴᐃᐧᐢᑲᐧᑭᓯᓂᐨ, ᒥᑕᐡ ᐊᐱᐣ ᐃᒪ ᑲᑭᐅᐣᒋᐧ ᓴᑭᓂᑯᐨ ᑲᑭᔭᓂ ᒪᔭᑭᔭᐨ ᑲᑭᑯᐡᑫᐧᐣᑕᐠ ᐃᐁᐧ ᑲᔭᓄᓇᑯᔑᓂᐠ. ᒥᐱᑯ ᐅᐁᐧᓂ ᑭᔭᐱᐨ ᑲᐱᒥᐃᐧᒋᐃᐧᑯᐨ.”
ᐊᐧᓭᑭᓯᐠ ᐃᑭᑐ ᓄᑯᒥᑫ ᐸᔦᐡ ᑲᑭᑲᐡᑭᐦᐊᐨ ᐅᔑᒣᔕᐣ ᒋᑭᑎᐸᒋᒧᑕᑯᐨ ᐊᓂᐣ ᒪᔭᑦ ᑲᑭᐃᓇᐱᔑᓄᑯᐸᓀᐣ ᐃᐁᐧ ᐊᐱ.
“ᐊᐊᐧᔑᒣ ᓂᐦᓱᒥᑕᓇ ᑕᓱᔭᑭ ᐅᑭᐱᒥ ᑲᓇᐁᐧᐣᑕᐣ ᐅᐁᐧᓂ” ᐃᑭᑐ ᐊᐧᓭᑭᓯᐠ. “ᐁᑲᐧ ᑕᐡ ᐊᔕ ᐁᑭᔭᓂ ᒪᑕᓄᑲᑕᒪᐣ, ᒥᓇ ᐁᑭᐸᑭᓇᒪᐣ ᒥᓇ ᐁᔭᓂ ᓂᓯᑕᐃᐧᓇᒧᐊᐧᐨ ᐊᐃᐧᔭᐠ, ᒥᐦᐃᒪ ᐁᔭᓄᒋ ᐃᐧᒋᐦᐃᑯᐨ ᓂᔑᒣᐡ. ᐁᑲᐧ ᒥᓇ ᑫᐃᐧᓇᐊᐧ ᑯᑕᑭᔭᐠ ᓂᐊᐧᑯᒪᑲᓇᐠ ᐊᓄᒋᒥᓄᔭᐊᐧᐠ, ᑲᐃᐧᓂᓂᑯ ᑌᐯᐧ ᒪᔑ ᒥᑐᓂ, ᔕᑯᐨ ᐊᔕ ᐣᑕᓂᑲᐡᑭᑐᒥᐣ ᐁᔭᓂ ᐊᓂᒧᑕᒪᑎᔭᐣᐠ.”
ᐊᐧᓭᑭᓯᐠ ᐅᑐᒋ ᐃᐧᐣᑕᒪᐊᐧᐣ ᑯᑕᑭᔭᐣ ᑎᐯᐣᒋᑫᐃᐧᓇᐣ ᒥᑐᓂ ᐱᑯ ᑲᐧᔭᐠ ᒋᑲᑫᐧ ᓇᓇᑕᐃᐧᑭᑫᑕᒧᐊᐧᐨ ᑲᓀᐱᒋᐊᐧᓂᐦᐊᐊᐧᐨ ᓇᐣᑕ ᑲᑭᓂᓯᒪᑲᓄᓂᐨ ᐅᐊᐧᑯᒪᑲᓂᐊᐧ.
“ᑲᐃᐧᐣ ᒧᔕᐠ ᑲᑭᑲᑐᓯᒥᐣ ᐅᓄᐁᐧᓂᐊᐧᐣ ᑭᑎᓯᓭᐃᐧᓂᓇᐣ,” ᑭᐃᑭᑐ ᐊᐧᓭᑭᓯᐠ. “ᑲᐃᐧᐣ ᑲᔦ ᑲᑭᐃᔑ ᑲᑫᐧ ᐊᐧᓂᑫᐣᑕᓯᒥᐣ ᐁᑲᐧ ᒋᐃᔑᑲᑫᐧ ᒥᓄᐱᒪᑎᓯᔭᐠ ᐊᓂᐡ ᑲᐯᐦᐃ ᐱᑯ ᑲᓄᒋᐦᐃᑯᐣ ᐱᐣᒋ ᑭᐱᒪᑎᓯᐃᐧᓂᐠ.”
ᑲᓇᑕ ᑭᒋᐅᑭᒪᑲᐣ ᔕᐧᐣ ᐁᐃᐣᔓᐟ ᐊᐟᓫᐃᐅ ᓄᑯᒥᑫ ᑭᐃᑭᑐᐸᐣ ᐁᓇᑐᑕᒪᑫᐨ ᒥᓯᐁᐧᑲᒥᐠ ᐅᒪ ᑲᓇᑕ ᒋᑭᐅᒋ ᐅᓇᓴᑲᓄᐊᐧᐸᐣ ᑫᐱᒥ ᑲᓇᐊᐧᐸᑕᒧᐊᐧᐨ ᓇᓇᑕᐃᐧᑭᑫᒋᑫᐃᐧᓇᐣ ᑲᑭᓂᓯᐣᑕᐧ ᒥᓇ ᑲᓀᐱᒋᐊᐧᓂᐦᐃᑕᐧ ᐊᓂᔑᓂᓂᐃᐧᑫᐧᐠ ᐅᒪ ᑲᓇᑕ.
“ᓄᑯᑦ ᐊᓄᑭᐃᐧᐣ ᓇᑕᐁᐧᐣᑕᑲᐧᐣ - ᒋᑭᑭᒪᑲᐠ ᑲᐧᔭᐠ ᐅᓇᔓᐁᐧᐃᐧᐣ ᒥᓇ ᑭᑕᓂᔑᓂᓂᒥᓇᓂᐠ ᐁᑲ ᑫᑭᐅᐣᒋ ᓇᓂᓴᓂᓯᐊᐧᐨ,” ᑭᐃᑭᑐ ᐊᐟᓫᐃᐅ ᒣᑲᐧᐨ ᐅᐱᒪᐊᒧᐃᐧᐱᓯᑦ 4. “ᐣᔕᔑᑭᐡᑲᒪᐊᐧᐠ ᑲᑭᓇ ᐃᒪ ᑕᔑᑫᐃᐧᓇᐣ ᑲᑲᐯᔑᐊᐧᐨ ᒋᑎᐸᒋᒧᐊᐧᐨ ᒥᓇ ᒋᓇᓇᑐᓇᒧᐊᐧᐨ ᐊᐣᑎ ᑫᐅᒋ ᐃᐧᒋᐦᐃᐣᑕᐧ, ᐁᑲᐧ ᓄᑯᑦ ᑲᑭᔑᑲᐠ ᓂᑲᓄᓇᐠ ᑲᑭᓇ ᑲᓀᑎᔭᐣ ᑲᐃᓇᑭᒥᑎᓱᐊᐧᐨ ᒋᐃᐧᒋᑲᐸᐃᐧᑕᑫᐊᐧᐨ, ᒋᒪᓯᓇᐦᐅᑎᓱᐊᐧᐨ ᐯᐸᓄᐠ, ᒋᑎᐸᒋᒧᔦᐠ.”
ᐊᓂᔑᓂᓂᐃᐧ ᓂᑲᓂᑕᒪᑫᐠ ᑭᐃᑭᑐᐊᐧᐠ ᒣᑲᐧᐨ ᐅᐱᒪᐊᒧᐃᐧᐱᓯᑦ 4 ᒋᑭᑭᓇᐊᐧᒋ ᑭᔑᑲᓂᒋᑲᑌᐠ ᒋᑲᓄᑫᐣᑕᐃᐧᑕᐧ ᑲᑭᓂᓯᐣᑕᐧ ᒥᓇ ᑲᓀᐱᒋᐊᐧᓂᐦᐃᑕᐧ ᐊᓂᔑᓂᓂᐃᐧᑫᐧᐠ ᐅᒪ ᑲᓇᑕ.
“ᒋᓂᑲᓀᐣᑕᑯᒋᑲᑌᐠ ᑕᓱᑭᔑᑲ ᒋᐳᓂᒋᑲᑌᐠ ᐅᑕᑲᐧᑎᓯᑕᑯᐃᐧᓂᐊᐧ ᐊᓂᔑᓂᓂᐊᐧᐠ ᒥᓇ ᐅᑕᑲᐧᑎᓯᑕᑎᐃᐧᓂᐊᐧ ᐊᓂᔑᓂᓂᐊᐧᐠ” ᑭᐃᑭᑐ ᐊᐟᓫᐃᐅ. “ᓄᑯᑦ ᑲᑭᔑᑲᐠ ᑭᓂᐸᐃᐧᑕᒪᐊᐧᒥᓇᐠ ᐁᐧᓴ ᐊᔕ ᒥᔑᐣ ᐃᑫᐧᐊᐧᐠ ᐅᑕᑲᐧᑎᓯᑕᑯᐃᐧᓂᐊᐧᐠ ᑲᐅᐣᒋ ᐊᐧᓂᑐᐊᐧᐨ ᐅᐱᒪᑎᓯᐃᐧᓂᐊᐧ ᐁᑲᐧ ᒥᓇ ᑲᐊᐧᓂᐦᐃᐣᑕᐧ.”

See also

12/01/2015 - 19:37
12/01/2015 - 19:37
12/01/2015 - 19:37
12/01/2015 - 19:37