ᐁᕑᐅᓫᐊᐣᐟ ᐊᓂᔑᓂᓂᐊᐧᐠ ᑲᑭ ᑭᑎᑫᐊᐨᐧ ᑭᒥᓄ ᓂᑕᐃᐧᑭᒪᑲᓂᐊᐧᐣ ᑲᑭ ᑭᑎᑲᑕᒧᐊᐧᐨ

ᒪᕑᐠ ᐯᓫ ᐃᔑᓂᑲᓱ ᐁᕑᐅᓫᐊᐣᐟ ᐁᑲᐯᔑᐨ ᑲᐧᔭᐠ ᐃᑯ ᑭᒥᓄ ᓂᑕᐃᐧᑭᐊᐧᐣ ᑲᑭ ᑭᑎᑲᓇᐨ ᓇᓇᑲᐤ ᑭᑎᑲᓂᒥᒋᒪᐣ ᓂᔑᐣ ᑭᑎᑲᓂᐊᐧᑲᐦᐃᑲᓇᐣ ᑲᑭᐅᐣᒋ ᐅᔑᑐᐨ ᑫᑌ ᓇᐸᑭᓴᑲᐧᑎᑯᐣ ᒥᓇ ᑯᑕᑭᔭᐣ ᐊᐧᑲᐦᐃᑫᐃᐧ ᐊᐸᒋᒋᑲᓇᐣ ᑲᑭᐁᐧᐱᓂᑲᑌᓂᑭᐣ.
“ᐊᔕ ᑫᑲᐟ ᐊᓂᐊᑎᓱᐊᐧᐠ ᒥᑕᓱᒥᑕᓇ ᑭᒋᐅᑭᓂᐠ ᑲᑭ ᑭᑎᑲᓇᑲᐧ,” ᐃᑭᑐ ᐁᕑᐅᓫᐊᐣᐟ ᐃᐡᑯᓂᑲᓂᐠ ᔓᓂᔭᐃᐧᑲᓇᐊᐧᐸᒋᑫᐃᐧ ᐊᓄᑭᐃᐧᓂᐠ ᑲᐃᔑᐊᓄᑭᑕᒪᑫᐨ. “ᐣᑭ ᑭᑎᑲᓇᐠ ᒋᓫᐊ ᐯᐳᕑᐢ, ᐦᐊᓫᐃᐱᓄᐢ, ᑊᕑᐊᑯᓫᐃ, ᐅᑲᑕᑲᐧᐠ, ᐅᔕᐊᐧᐡᑯᐊᐣᒋᒥᓇᐠ. ᐱᑯ ᑫᑯᓇᐣ ᐣᑭ ᑭᑎᑲᑕᓇᐣ. ᒪᐊᐧᐨ ᐃᑯ ᑲᐧᔭᐠ ᑭᐃᔑᓇᑲᐧᓄᐣ ᑲᔭᓂ ᐊᑎᑌᑭᐣ.”
ᐯᓫ ᐃᑭᑐ ᑭᐁᐧᐣᑕᓂ ᒋᐅᔑᑐᐊᐧᐨ ᑭᑎᑲᓂ ᐊᐧᑲᐦᐃᑲᓂᑫᐃᐧᓂ ᐅᑕᔑᑫᐃᐧᓂᐠ ᐊᓂᔕ ᐃᐁᐧᓂ ᑭᒋᐅᑕᐸᓂᒥᑲᓇᓂ ᑲᐱᑕᑲᐧᑕᒧᓂᐠ ᐃᐡᑯᓂᑲᓂᐠ ᐁᑲᐧ ᒥᓇ ᐁᑭᐅᐣᒋ ᓇᓇᒋᑕᐱᐊᐧᐨ ᐊᔑᐡᑭᐣ ᒥᓇ ᑯᑕᑭᔭᐣ ᑭᑎᑫᐃᐧ ᐊᐸᒋᒋᑲᓇᐣ ᒥᐦᐅᐁᐧᓂ ᐁᑲ ᓇᐱᐨ ᑲᑭᐅᐣᒋ ᐊᔭᓂᒥᓭᐊᐧᐨ, ᐊᐱᐨ ᐃᐧᐣ ᑲᐃᓯᓭᑭᐣ ᑯᑕᑭᔭᐣ ᐃᐡᑯᓂᑲᓇᐣ ᓄᐱᒪᑲᒥᐠ ᑲᐊᔭᑭᐣ ᐱᒥᓭᐃᐧᓂᐠ ᐁᑕ ᑲᐅᐣᒋ ᐃᔕᓂᐊᐧᐠ.
“ᔕᑯᐨ ᐣᑭᐅᒋ ᐊᐧᐃᐧᒋᐦᐃᑎᒥᐣ ᑲᑭᓇᓇᑐᓇᒪᐠ ᐊᔑᐡᑭ ᓄᐱᒥᐠ ᒥᓇ ᐊᓂᐣ ᐁᑐᒋᑲᑌᐠ ᐁᐅᔑᒋᑲᑌᐠ ᒋᒥᓇᐧᔑᒋᑲᑌᐠ ᐊᔑᐡᑭ ᐱᑯ ᑫᑯᐣ ᐊᐦᑭᑲᐠ ᑲᐅᐣᑎᓇᒪᐠ ᑫᑭᑎᑲᑫᔭᐠ,” ᐯᓫ ᐃᑭᑐ ᐁᑲᐧ ᑫᐃᐧᐣ ᑭᐃᔕ ᐃᒪ ᐊᓂᔑᓇᐯ ᐊᐢᑭ ᐊᔕ ᓂᐦᓴᐧ ᑲᐃᔑᒋᑲᓄᐊᐧᐠ ᑕᓱᓂᐱᐣ ᑲᒪᐊᐧᒋᐦᐃᑎᓇᓂᐊᐧᐠ ᒥᒋᑦ ᒪᐊᐧᒋᐦᐃᐁᐧᐃᐧᓂᐠ, ᒣᑲᐧᐨ ᐊᐱ ᐊᑲᐢᐟ ᐱᓯᑦ 26 ᐊᑯᓇᐠ 28 ᐁᐧᑎ ᑕᐣᑐᕑ ᐯ.
ᐯᓫ ᑭᐃᑭᑐ ᐃᓯᓭᓂᐸᐣ ᐊᓂᔑᓇᐯ ᐊᐢᑭ ᑭᔭᐱᐨ ᐊᐊᐧᔑᒣ ᒋᑭᒪᒋᑕᒪᑫᐸᐣ ᒥᒋᒥ ᒪᒋᑕᐃᐧᑫᑯᓇᐣ ᐁᐧᑎ ᐊᓂᓂᑲᐣ ᐯᑭᐡ ᐃᒪ ᒋᔭᓄᒋ ᑲᐧᔭᐣᒋᓇᓄᐊᐧᐠ ᑲᐃᐧᔭᓂ ᐱᒥᐃᐧᓂᑎᓱᓇᓂᐊᐧᐠ.
“ᐊᒥᐃᑐᐠ ᐃᐁᐧ ᒪᐊᐧᐨ ᑲᑭᒋᓀᐣᑕᑲᐧᐠ ᐊᓂᔑᓂᓂᐃᐧ ᐱᒥᐧᐃᓂᑎᓱᐃᐧ ᐊᓂᒧᒋᑫᐃᐧᓇᐣ ᑲᓇᑭᐡᑲᒧᐊᐧᐨ ᑭᑕᓂᔑᓂᓂᒥᓇᓂᐠ ᐅᐁᐧ ᐊᐱᐣ ᑲᔭᓂᑕᑯᔑᓄᒪᑲᐠ ᒪᓇᑎᑫᐧᐃᐧᐊᓄᑭᐃᐧᓇᐣ ᐁᑲᐧ ᒥᓇ ᐱᐊᐧᐱᑯᑫᐃᐧ ᐊᓄᑭᐃᐧᓇᐣ,” ᐯᓫ ᑭᐃᑭᑐ. “ᑕᔭᓂᒥᔑᓇᑐᐣ ᑫᑯᓇᐣ ᑫᔭᓂᐸᑭᑌᐡᑲᑯᔭᐠ ᒋᔭᓂ ᑲᑫᐧ ᐊᐦᔓᓱᔭᐠ ᒥᑕᐡ ᐅᐁᐧ ᐯᔑᑲᐧᔦᐠ ᐃᓀᑫ ᑫᑭᐅᐣᒋ ᒪᒋᑕᒪᓱᔭᑭᐸᐣ ᑫᑯᓇᐣ ᑲᐱᓇᓇᑭᐡᑲᒪᐠ ᒋᓇᓇᑐᓇᒪᐠ ᐁᑲ ᑫᐅᐣᒋ ᓄᑌᓭᔭᐠ ᒥᒋᑦ ᒥᓇ ᑭᑕᓂᔑᓂᓂᐃᐧ ᐱᒪᑎᓯᐃᐧᓂᓇᐣ ᐁᑲ ᒋᔭᓂᐸᑲᓂᓭᐠ.”
ᐁᑲᐧ ᒥᓇ ᐁᐧᑎ ᑭᒋᓇᒣᑯᓯᐱᐠ ᑲᑭᐃᑭᑐᐊᐧᐸᐣ ᒋᐅᔑᑐᐊᐧᐨ ᐯᔑᑯ ᑲᑲᑫᑎᐸᐦᐊᑲᓀᐢ ᒋᐃᑲᐧᓂᐠ ᑭᑎᑲᓂ ᐊᐧᑲᐦᐃᑲᓂ ᐱᓇᒪ ᐅᑭᐳᓂᑐᓇᐊᐧᐸᐣ.
“ᑲᐃᐧᐣ ᐃᑯ ᒪᔑ ᑲᐧᔭᐠ ᒋᑭᒪᑕᓄᑲᒋᑲᑌᐠ ᔕᑯᐨ ᐃᐧᓂᑯ ᑭᑭᑎᑲᓄᐊᐧᐣ,” ᑭᐃᑭᑐ ᑭᒋᓇᒣᑯᓯᐱ ᐅᓇᔓᐁᐧᐃᐧᓂᓂ ᒍᓴᑊ ᒪᑫ. “ᐣᑭ ᑭᑎᑲᑕᒥᐣ ᐊᐡᑭᐸᐧᐊᐣ ᐁᑲᐧ ᒥᓇ ᐅᑲᑕᑲᐧᐠ.”
ᐁᑲᐧ ᒥᓇ ᐃᒪ ᑭᒋᓇᒣᑯᓯᐱᐠ ᐅᑕᓄᑲᑕᓇᐊᐧ ᐁᐅᔑᑐᐊᐧᐨ 100 ᒥᓇ 500 ᑕᓱᒥᓯᐟ ᒋᔭᐱᒐᓂᐠ ᐅᑭᑎᑲᓂᑫᐃᐧᓂᐊᐧ ᐁᐧᑎ ᑭᐁᐧᑎᓄᐠ ᐃᔑ ᑕᔑᑫᐃᐧᓂᐠ.
“ᒣᑲᐧᐨ ᐃᑯ ᐅᑕᓂᑕᐁᐧᐸᐦᐊᓇᐊᐧ ᑭᒋᐅᑕᐸᓇᐣ ᐁᔭᐸᒋᐦᐊᐊᐧᐨ ᐁᑲᑭᑕᑭᐱᑐᐊᐧᐨ ᑭᐡᑲᑕᐦᐃᑲᓇᐣ,” ᐃᑭᑐ ᒪᑫ.
ᒪᑫ ᑲᔦ ᑭᐃᑭᑐ ᐃᐡᑯᓂᑲᓂᐠ ᑲᑲᐯᔑᐊᐧᐨ ᐅᑕᓂᑭᒋᓀᐣᑕᓇᐊᐧ ᐃᐧᓇᐊᐧ ᐱᑯ ᐁᔭᓂ ᑭᑎᑫᑕᒪᓱᐊᐧᐨ.
“ᐅᓇᑯ ᐯᔑᐠ ᑭᑎᑲᐣ ᐣᑭᐊᐣᑕᐃᐧ ᓇᓇᑲᒋᑐᐣ, ᒪᐊᐧᐨ ᐃᑯ ᑭᔕᑕᐱ ᓂᑕᐃᐧᑭᓄᐣ ᐊᐡᑭᐸᐧᐊᐧᐣ,” ᑭᐃᑭᑐ ᒪᑫ. “ᒥᐱᑯ ᐊᔕ ᑫᑲᐟ ᒋᔭᓂᒪᐃᐧᐣᓴᐧᑕᒪᐠ.”
ᒪᑫ ᐃᑭᑐ ᐅᐃᐧᒋᐊᐧᑲᓇᐣ ᑫᐃᐧᐣ ᑭᑭᑎᑫᐊᐧᐣ, ᔕᑯᐨ ᐅᑲᑕᑲᐧᐠ ᑲᐃᐧᐣ ᒋᐅᒋ ᓂᑕᐃᐧᑭᐊᐧᐨ ᐁᐧᓴ ᑲᑭ ᑭᔑᑌᐠ.
“ᐅᔕᐊᐧᐡᑯᐊᐣᒋᒥᓇᐠ ᐃᐧᓂᑯ ᑌᐯᐧ ᑲᔭᐧᐠ ᑭᓂᑕᐃᐧᑭᐊᐧᐠ,” ᐃᑭᑐ ᒪᑫ. “ᑕᓴᐧ ᐱᑯ ᑲᐧᔭᐠ ᓂᑕᐃᐧᑭᐊᐧᐠ ᑲᑭᑎᑲᓇᔭᑭᑕᐧ.”
ᑭᒋᓇᒣᑯᓯᐱᐠ ᐅᐃᐧᑲᑫᐧ ᐅᔑᑐᓇᐊᐧᐸᐣ ᑭᑎᑲᓂ ᐊᐧᑲᐦᐃᑲᓂ ᒣᑲᐧᐨ 2009 ᒋᐅᒋ ᑭᓯᓯᑲᑫᐊᐧᐨ ᐃᒪ ᐅᐡᑭ ᐱᒥᐸᓂᒋᑫᐃᐧᑲᒥᑯᐠ ᑲᐃᐧᐅᔑᒋᑲᑌᑭᐸᐣ ᒣᑲᐧᐨ 2010-2011 ᑲᔭᑭᐊᐧᓂᐠ.
ᑭᒋᓇᒣᑯᓯᑊ ᐅᑭᒪᑲᐣ ᑕᐧᓂ ᒪᐧᕑᐃᐢ ᑭᐃᑭᑐ ᐅᐃᐧᑲᑫᐧ ᐅᐣᑎᓇᓇᐊᐧ ᐊᐣᑎ ᑫᐃᔑᐁᐧᐣᑕᑭᑌᓂᐠ ᐅᐱᑕᐦᐅᑕᓱᑕᒪᑯᐃᐧᓂᐊᐧ, ᒥᓇ ᐸᐸᑲᐣ ᑲᐅᐣᒋᓭᑭᐣ ᒪᒪᐃᐧ ᐃᐧᒋᐦᐃᑎᐃᐧᓇᐣ, ᒥᓇ ᑫᒋᓇᐨ ᒋᐃᑭᑐᐊᐧᐨ ᒥᒋᒪᐣ ᑲᐊᑕᐊᐧᑕᒧᐊᐧᐨ ᒋᐊᑕᐊᐧᑫᐊᐧᐨ ᐃᒪ ᑭᒋᓇᒣᑯᓯᐱᐠ ᐊᑕᐁᐧᐃᐧᑲᒥᑯᐠ.

See also

12/01/2015 - 19:37
12/01/2015 - 19:37
12/01/2015 - 19:37
12/01/2015 - 19:37