ᒥᓯᐁᐧ ᑲᐅᐣᒋ ᑲᑫᐧ ᐃᐧᒋᐦᐊᑲᓄᐨ ᐃᒪ ᑲᐃᔑ ᑎᐯᓂᒥᑯᐨ ᒪᒋᒪᐢᑭᑭᑫᐃᐧᐣ

“ᐃᒪ ᐅᐣᒋ ᒪᒋ ᑲᐊᐊᐧᔐᒐᐱᐢᑲᑯᐨ, ᐁᑲᐧ ᑲᔦ ᐁᑲ ᑲᐸᒥᐦᐃᑎᓯᐨ ᒥᓇ ᑲᔦ ᑲᑭᒋ ᓂᔑ̇ᐃᐧᑐᐃᐧᓇᑯᓯᐨ, ᒥᔑᓇᑎᓄᐣ ᑫᑯᓇᐣ ᑫᐅᐣᒋ ᓂᓯᑕᐃᐧᓇᐊᐧᑲᓄᐸᐣ ᐊᐃᐧᔭ ᑲᑎᐯᓂᒥᑯᐨ ᒪᒋ ᒪᐢᑭᑭᑫᐃᐧᐣ ᒥᓇ ᐱᑯ ᑯᑕᑭᔭᐣ ᑫᑯᓇᐣ.
“ᐊᐧᐸᐣᑕᐦᐃᐁᐧᒪᑲᓄᐣ ᑲᔦ ᒪᒥᑎᓀᐣᒋᑲᓂᐠ ᒥᓇ ᐊᒐᑯᐣᐠ ᑫᑯᐣ ᐁᐃᔑᔭᐨ, ᐃᑭᑐ ᐃᐸ ᑲᑭᐱᑕᑦ, ᐊᐊᐧᔑᒣ 31 ᐊᐦᑭᐃᐧᐣ ᐁᐊᓂᑭᑕᒪᑫᐨ ᑲᐃᔑ ᒪᒥᓄᒪᑲᓄᐊᐧᐨ ᑲᑎᐯᓂᒥᑯᐊᐧᐨ ᑫᑯᓇᐣ ᐃᒪ ᐊᐧᓂᓇᐊᐧᑲᐠ.
“ᒥᐊᔕ ᐁᐃᓯᓭᐠ ᒥᓯᐁᐧ ᒋᓇᓇᐣᑐᓇᒪᐠ ᐊᓂᐣ ᑫᑭᐃᔑ ᐃᐧᒋᐦᐃᑲᓄᐊᐧᐸᐣ ᐅᐱᒪᑎᓯᐃᐧᓂᐊᐧ,” ᑲᑭᐱᑕᑦ ᐃᑭᑐ. “ᓂᐣ ᐁᐊᓂᑭᐦᐃᑯᒪᐃᐧᔭᐣ, ᑭᐢᐱᐣ ᐃᓀᓂᒪᐨ ᑭᓂᒐᓂᐢ ᐅᐁᐧ ᐁᐃᓯᓭᐨ, ᒥᓯᐁᐧ ᐃᔑᓇᓇᐣᑕᐃᐧᑭᑫᓂᑦ.
“ᐊᐃᐧᔭ ᑲᓇᓇᐣᑕᐃᐧᑭᑫᓂᒪᐨ ᓂᐢᑕᑦ ᐁᐊᓂ ᑎᐯᓂᒥᑯᐨ ᒥᓂᑫᐧᐃᐧᐣ ᒥᓇ ᒪᒋᒪᐢᑭᑭᑫᐃᐧᐣ, ᐊᔭᐊᐧᐣ ᑫᐃᔑᔭᐨ ᐃᐁᐧ ᐃᐧᔭᐃᐧᐣᐠ. ᓇᓇᑲᒋᐦᐃᐠ ᑭᓂᒐᓂᔕᐠ ᑲᑐᑕᒧᐊᐧᐨ.”
ᑕᑭᒋ ᑭᑎᒧᐊᐧᐠ, ᑕᒪᔭᑭᒐᐱᐊᐧᐠ ᒥᓇ ᑲᔦ ᑕᑭᒋᓇ̇ᓂᐸᐊᐧᐠ ᓇᐣᑕ ᑲᔦ ᐁᑲ ᒋᓂᐸᐊᐧᐨ.
“ᐃᐁᐧ ᑕᐢ ᑲᐊᓂ ᐱᒪᓄᑭᒪᑲᐠ, ᑲᐊᐧᐸᒥᒪᐣ ᑭᓂᒐᓂᔥ ᐁᐊᓂᒪᒐᐱᑌᐠ,” ᑲᑭᐱᑕᑦ ᐃᑭᑐ.
“ᐊᒥ ᐁᐃᑭᑎᐨ ᒪᒋ ᒪᐢᑭᑭᐣ ᑲᐊᐸᑕᑭᐣ ᐁᐢᑲᑦ ᐊᐃᐧᔭ ᐃᔑᔭ ᐁᐦᐊᓄᒥᑭᐨ ᐃᐧᔭᐃᐧᐣᐠ. ᐊᓂ ᑭᓇᑭᓯ ᒥᓇ ᐊᓂ ᑲᑲᐢᑭᐱᓂᑎᓱ ᑲᔦ.
“ᐊᐃᐧᔭ ᑲᐅᓂᑭᐦᐃᑯᒪᐃᐧᐨ, ᒥᐁᐃᔑᓇᑲᐧᐠ ᒋᓇᓇᐣᑕᐃᐧ ᑭᑫᐣᑕᒪᓂᐣ ᑫᑯᓇᐣ... ᒥᓇ ᑲᔦ ᒋᓇᓇᑲᒋᑐᔭᓂᐣ ᑲᐊᓂᐃᔑᔭᐨ ᓇᓇᐣᑐᐠ ᑫᑯᓇᐣ,” ᑲᑭᐱᑕᑦ ᐃᑭᑐ.
“ᐁᑲᐧ ᑕᐢ ᐃᐧᐣ ᐃᒪ ᐅᒪᒥᑎᓀᐣᒋᑲᓂᐠ, ᒥᔑᓇᑎᓄᐣ ᑫᑯᓇᐣ ᑲᐃᔑᔭᐊᐧᐨ, ᐃᑭᑐ.
ᒪᐊᐧᐨ ᑲᔦ ᐁᑭᒋ ᑭᔓᐊᐧᓯᐨ ᒥᓇ ᐁᓇᑯᑐᐨ ᐅᑭᔓᐊᐧᓯᐃᐧᐣ, ᐁᑭᒋ ᓂᔥᑫᐣᑕᑯᓯᐨ, ᐁᐦᐊᔭᐊᐧᒋᐣ ᑯᑕᑭᔭᐣ ᑲᐅᐢᑭ ᐅᑐᑌᒥᐨ ᒥᓇ ᐁᑲ ᐁᐊᓂ ᐃᐧᒋᐊᐧᒋᐣ ᐅᑐᑌᒪᐣ ᒥᓇ ᐅᑎᐯᐣᒋᑫᐃᐧᓇᐣ ᑲᑐᑕᒧᓂᐨ ᐁᑲ ᐁᐸᐱᐢᑫᐣᑕᒪᑫᐨ.
“ᐁᐢᑲᑦ ᐅᐣᒋ ᑭᒋ ᐅᑐᑌᒥ ᐁᑲᐧ ᑕᐢ ᐊᐱᐣ ᐅᐣᒋ ᑭᒋᒪᒋᔭ ᒥᓇ ᑭᔓᐊᐧᓯ,” ᑲᑭᐱᑕᑦ ᐃᑭᑐ.
“ᑯᑕᐠ ᑫᑯᐣ ᐃᐁᐧ ᐊᐃᐧᔭ ᐅᒥᑎᓀᐣᒋᑲᓂᐠ, ᐁᑲ ᑫᑯᐣ ᑲᐧᔭᐠ ᐁᑭ ᒪᒥᑎᓀᐣᑕᐣᐠ, ᐁᑲ ᑫᑯᓂ ᐁᑭᒋᐁᐧᐣᑕᐣᐠ, ᐸᑲᐣ ᑫᑯᓇᐣ ᐁᓄᒋᐦᑐᒋᐣ ᒥᓇ ᑲᔦ ᐅᑕᓇᐣᐠ ᑲᑭᐱᐊᔦᐣᑐᑕᑲᐧᐸᐣ ᒥᓇ ᓇᐦᔑᓀ ᒋᑭᐸᑲᐧᐦᐅᑎᓯᐨ.
“ᐃᑫᐧᓂᐊᐧᐣ ᑲᔦ ᐁᑲ ᐊᐱᓂᑯ ᑲᓂᓴᐯᐣᑕᑭᐣ ᐅᑎᐢᑯᓄᐃᐧᓇᐣ ᒥᓇ ᒋᐃᐧᐣᑕᒧᓂᐨ ᑲᑭᑭᓄᐦᐊᒪᑯᐨ ᐁᐊᓂ ᒪᔭᑭᔭᐨ ᐊᐁᐧ ᐅᐢᑲᑎᐢ.
ᐊᒐᑯᐱᒪᑎᓯᐃᐧᐣ ᑲᐃᒋᑲᑌᐠ ᒥᐦᐃᒪ ᐊᐃᐧᔭ ᑲᐅᐣᒋ ᐱᒪᑎᓯᐨ, ᑲᑭᐱᑕᑦ ᐃᑭᑐ.
“ᐁᑲᐧ ᑕᐢ ᐊᐃᐧᔭ ᑲᑎᐯᓂᒥᑯᐨ ᒪᒋᒪᐢᑭᑭᑫᐃᐧᐣ ᒥᓇ ᒥᓂᑫᐃᐧᐣ, ᐅᑕᒐᑯᐱᒪᑎᓯᐃᐧᐣ ᑲᐃᐧᐣ ᐊᐸᐣ ᒋᓇᑲᐧᓂᐠ,” ᑭᐃᑭᑐ. “ᐃᑫᐧᓂᐊᐧᐠ ᑲᑎᐯᓂᒥᑯᐊᐧᐨ ᑫᑯᓇᐣ ᐊᒥ ᐁᐃᓀᓂᒥᑎᓱᐊᐧᐨ ᒪᐊᐧᐨ ᐁᑲ ᑫᑯᐣ ᑲᑲᐢᑭᑐᐨ ᒋᑐᑕᐣᐠ. ᒪᐊᐧᐨ ᑲᔦ ᒪᒉᓂᒥᑎᓯᐊᐧᐠ ᐃᐁᐧ ᑲᑐᑕᒧᐊᐧᐨ. ᐅᐣᒋ ᑲᐢᑭᑎᐱᑫᓂᒧᐊᐧᐠ ᐃᒪ ᐅᑕᒐᑯᐱᒪᑎᓯᐃᐧᓂᐊᐧ. ᒥᓇ ᑲᔦ ᐁᑲ ᐁᓂᓯᐁᑕᐁᐧᐣᑕᒧᐊᐧᐨ ᐁᓴᑭᐦᐃᑯᐃᐧᓯᐊᐧᐨ ᒥᓇ ᑲᔦ ᒪᐊᐧᐨ ᐁᑭᒋ̇ᓀᐣᑕᑯᓯᐊᐧᐨ.”