ᐊᐧᓂᓇᐊᐧᑲᐠ ᒥᓇ ᐊᓂᔑᓂᓂᐊᐧᐠ ᑭᒪᒪᐃᐧ ᒧᒋᑫᐣᑕᒧᐠ ᑲᑭ ᑭᔑᒋᑲᑌᐠ ᐅᐡᑭ ᐊᑯᓯᐃᐧᑲᒥᐠ

ᐊᐱ ᑊᕑᐊᐣᐠ ᐯᕑᑎ ᒪᐊᐧᐨ ᓂᐢᑕᑦ ᐁᐱᐣᑎᑫᐨ ᐃᒪ ᐅᐡᑭ ᒥᓄᔭᐃᐧᐣ ᐊᑯᓯᐃᐧᑲᒥᑯᐠ ᒣᑲᐧᐨ ᑲᑭᐸᐦᑭᓂᑲᑌᐠ ᐅᐱᒪᐦᐊᒧᐃᐧᐱᓯᑦ 15 ᑲᐃᓇᑭᓱᐨ, ᒥᐱᑯ ᐁᑭᒧᒋᑭᐯᐣᑕᐠ.
ᓇᓇᑲᐤ ᐃᓇᓄᑭᐃᐧᓇᐣ ᑭᐱᐃᔑᐊᐧᐃᐧᒋᑕᐧ ᐊᐧᐁᐧ ᐯᕑᑎ ᒥᔑᓄᔭᑭ ᑲᑭᐱᔑᐱᒪᓄᑲᑌᐠ, ᐁᑭᐸᐱᐦᐅᐨ ᐅᐁᐧᓂ ᐊᐱᐣ ᒋᐃᔑᐊᐧᐸᐣᑕᐠ ᒥᑕᐡ ᐊᐱᐣ ᑫᑲᐱ ᐁᑭᐃᓯᓭᓂᐠ ᒋᐅᑎᓴᐸᐣᑕᐠ ᐁᑭᔭᓂ ᐸᐸᒥᐊᐃᓇᐱᐠ 140,000 ᑕᓱᑲᑲᑫᒥᓯᐟ ᑲᔭᐱᒐᐠ ᐅᐡᑭ ᐊᑯᓯᐃᐧᑲᒥᐠ.
ᐁᑲᐧ ᐁᐸᐸᒥᐊᐃᓇᐱᐨ ᐃᒪ ᐱᐣᑎᑲᒥᐠ, ᒥᔑᐣ ᐊᐃᐧᔭᐣ ᐅᑭᐱᓇᓇᓯᑲᑯᐣ, ᒥᓇ ᑕᓴᐧ ᐱᑯ ᑫᑲᐟ ᐁᐊᐧᒋᔦᒪᑲᓄᐨ ᐅᐁᐧᓂ ᑲᐃᔑᒋᑲᓂᐊᐧᓂᐠ. ᒥᐱᑯ ᐁᑕ ᐁᑭᒧᒋᓇᓇᒥᑫᓂᐨ.
ᐁᑲᐧ ᓄᑯᑦ ᐊᓂᑫᐊᐱᑕᒪᑫ ᐃᒪ ᒥᓄᔭᐃᐧᐣ ᐊᐱᑕᒪᑫᐃᐧᓂᐠ, ᑫᐃᐧᐣ ᑭᐃᐧᒋᑕᐧ ᐊᐱᐣ ᑫᑲᐟ ᑲᔭᓂ ᑭᔑᒋᑲᑌᓂᐠ ᐅᐡᑭ ᐊᑯᓯᐃᐧᑲᒥᑯᓂ. ᒥᑕᐡ ᐊᔕ ᐁᑭ ᑭᔕᓄᑲᑌᐠ ᐊᐧᑲᐦᐃᑫᐃᐧᐣ, ᐁᑲᐧ ᑕᐡ ᐃᑯ ᒋᐊᐣᒋᑯᓯᒋᑲᑌᑭᐣ ᐃᓂᐁᐧᓂᐊᐧᐣ ᓂᔑᐣ ᑫᑌ ᐊᑯᓯᐃᐧᑲᒥᑯᐣ. ᒣᑲᐧᐨ ᑲᐡᑲᑎᓄᐱᓯᑦ 7 ᐃᓇᑭᓱᐨ ᐊᒥ ᐊᔕ ᒋᐸᑭᓯᐠ ᐃᐁᐧ ᐅᐡᑭ ᐊᑯᓯᐃᐧᑲᒥᐠ ᐃᓀᐣᒋᑲᑌ.
ᐯᔑᐠ ᑫᑯᐣ ᒪᐊᐧᐨ ᑭᐃᔑᐸᔭᑌᓇᑲᐧᐣ ᐃᒪ ᐃᓀᑫ ᐅᑕᑯᓯᐠ ᑫᐃᔑᐱᒥᔑᒥᐣᑕᐧ, ᒥᑐᓂ ᐱᑯ ᐁᐸᔭᑌᓇᑲᐧᐠ ᐊᑲᐧᒋᐠ.
ᐅᐣᒋᑕ ᑕᐡ ᐃᑯ ᐃᐁᐧ ᑭᐃᔑᓇᑯᒋᑲᑌ. ᐅᑯᐁᐧᓂᐊᐧᐠ ᑲᑭᐃᔑᒪᒋᐊᐧᐨ ᐅᑭᐃᔑᓇᑕᐁᐧᐣᑕᓇᐊᐧ ᒋᐃᔑᓇᑯᑐᐊᐧᐨ ᑕᐱᐡᑯᐨ ᐃᑯ ᑕᔑᑫᐃᐧᓀᓯᐠ ᑲᐊᔭᔭᐣ ᒋᐃᓀᐣᑕᑲᐧᐠ. ᑭᐃᔑᓇᑯᒋᑲᑌ ᑕᐱᐡᑯᐨ ᐃᑯ ᑲᐃᔑᑕᓇᓂᐊᐧᐠ ᒋᐃᓀᐣᒋᑲᑌᐠ, ᐯᑭᐡ ᑲᔦ ᒋᐅᒋ ᐃᐧᒋᐦᐃᐁᐧᒪᑲᐠ ᐃᒪ ᑲᐱᒥ ᑲᓇᐁᐧᐣᑕᑯᓯᐊᐧᐨ ᒋᔭᓂᒥᓄᔭᐊᐧᐨ ᐅᐱᒪᑎᓯᐃᐧᓂᐊᐧᐠ.
ᒪᐊᐧᐨ ᑭᒋᒥᓇᐧᔑᐣ ᐅᐁᐧ ᐅᐡᑭ ᐊᑯᓯᐃᐧᑲᒥᐠ ᑲᑭᐃᔑᓇᑯᒋᑲᑌᐠ, ᐁᑲᐧ $106 ᒥᓫᐃᔭᐣ ᑭᐃᓇᑭᐣᑌ, ᑭᐃᔑᓇᑯᒋᑲᑌ ᐁᑫᑌᓇᑯᒋᑲᑌᐠ ᒥᓇ ᐁᐅᐡᑭᓇᑯᒋᑲᑌᐠ, ᐁᑭᐃᔑᒪᒪᐃᐧᓇᑯᒋᑲᑌᑭᐣ ᓄᑯᑦ ᐅᐡᑭᔭᐸᒋᒋᑲᓇᐣ ᐊᔑᐨ ᑲᔭᐡ ᐊᓂᔑᓂᓂᐃᐧᑐᑕᒧᐃᐧᓇᐣ. ᒥᐦᐅᐁᐧ ᑐᑲᐣ ᐃᑭᑐ ᐯᕑᑎ ᑲᑭᐃᔑᓇᑕᐁᐧᐣᒋᑲᑌᑭᐸᐣ ᒋᐃᔑᓇᑯᑕᒪᐃᐧᐣᑕᐧ ᐅᑕᑯᓯᐠ ᒋᐃᔑᓇᐦᐃᐡᑲᑯᐊᐧᐨ ᐊᐱ ᑲᐱᓇᒋᒪᐡᑭᑭᐃᐧᓂᓂᐁᐧᐊᐧᐨ. ᐊᓂᐡ 80 ᐱᕑᓭᐣᐟ ᐅᑕᑯᓯᐠ ᐅᒪ ᑲᐅᒋᐊᓄᑲᓂᑕᐧ ᒥᓄᔭᐃᐧᐣ ᐃᐧᒋᐦᐃᑯᐃᐧᓂᐠ ᐊᓂᔑᓂᓂᐃᐧᐊᐧᐠ, ᒥᑕᐡ ᑲᑭᐅᒋ ᑭᒋᓀᐣᑕᑲᐧᐠ ᒋᑭᑭᓂᑲᑌᓂᑭᐣ ᐊᓂᔑᓂᓂ ᑫᐃᐧᐣ ᑲᑭᐱᐃᔑ ᓂᓯᑕᐃᐧᓇᐠ ᒥᓄᔭᐃᐧᐣ, ᓇᑕᐃᐧᐦᐃᐁᐧᐃᐧᐣ ᒥᓇ ᒥᓄᐱᒪᑎᓯᐃᐧᐣ ᐃᒪ ᐊᑯᓯᐃᐧ ᐃᐧᒋᐦᐃᐁᐧᐃᐧᓂᐠ ᑲᐃᔑᐱᒪᑎᓯᐊᐧᐨ ᒋᐃᔑᑎᐸᐸᒥᑕᐧ ᑲᐱᒥᐊᑯᓯᐃᐧ ᐃᐧᒋᐦᐃᑕᐧ.
ᒥᓯᐁᐧ ᑲᐃᔑᑲᓇᐊᐧᐸᐣᑕᒪᐠ ᐃᒪ ᐃᓀᑫ ᑲᐅᒋᒥᓄᔭᔭᐠ ᐃᓯᓭᐸᐣ ᐃᑯ ᒋᑭᐃᔑ ᑭᑭᓂᑲᑌᑭᐸᐣ ᓇᑕᐃᐧᐦᐃᐁᐧᐃᐧᓂᐠ, ᐃᑭᑐ ᐯᕑᑎ.
ᒥᔑᐣ ᑕᐡ ᐃᓀᐧᓂᐊᐧᐣ ᐊᓂᔑᓂᓂᐃᐧ ᐃᓀᐣᑕᒧᐃᐧᓇᐣ ᐃᒪ ᑲᑭᐊᔑᑎᓂᑲᑌᑭᐣ ᒋᑭᑭᒪᑲᑭᐣ ᐊᑯᓯᐃᐧᑲᒥᑯᐠ ᐃᐧᓇᐊᐧ ᑲᑭᐅᒋ ᑭᑭᓄᐡᑲᒪᑫᐊᐧᐸᐣ ᐅᒪ ᑌᑎᐸᐦᐃ ᑲᐊᔭᐊᐧᐨ ᑭᒋᐦᐊᐠ. ᐯᕑᑎ ᐃᑭᑐ ᒥᐦᐃᐁᐧ ᑲᑭᐃᔑᓇᑕᐁᐧᐣᑕᒧᐊᐧᐸᐣ ᑭᒋᐦᐊ ᒥᓯᐁᐧ ᐱᑯ ᑲᐃᔑᓇᑲᐧᐠ ᐱᒪᑎᓯᐃᐧᐣ ᒋᐃᔑᐊᓄᑲᑌᐠ ᓇᑕᐃᐧᐦᐃᐁᐧᐃᐧᐣ ᐅᒪ ᐅᐡᑭ ᐊᑯᓯᐃᐧᑲᒥᑯᐠ.
ᐊᑎᑲ ᑭᓇᐃᐧᐟ ᑲᐊᓂᔑᓂᓂᐃᐧᔭᐠ ᐊᔕ ᒥᔑᓄᔭᑭ ᑲᐅᒋᐊᔭᓂᑫ ᐱᒪᑎᓯᔭᐠ ᑭᑭᐱᐅᒋ ᐊᐧᓂᑐᒥᐣ ᐅᐁᐧ ᑐᑲᐣ ᑲᑭᐱᐃᔑᑲᓇᐊᐧᐸᑕᐠ ᐊᓂᔑᓂᓂ ᐁᑲᐧ ᑕᐡ ᓄᑯᑦ ᑭᒋᐦᐊᐠ ᐃᑭᑐᐊᐧᐠ ᐊᔕ ᐃᓯᓭᐸᐣ ᒋᑭᑭᐁᐧᓇᓯᑲᒪᑭᐸᐣ ᐅᓄᐁᐧᓂᐊᐧᐣ ᑐᑲᐣ ᑲᑭᐱᐃᔑᓇᑲᐧᑭᐸᐣ ᓇᑕᐃᐧᐦᐃᐁᐧᐃᐧᐣ, ᐃᑭᑐ ᐯᕑᑎ.
ᑲᐊᓂᔑᓂᓂᐃᐧᐊᐧᐨ ᐅᑕᑯᓯᐠ ᒥᐱᑯ ᑭᔭᐱᐨ ᑫᐃᔑᐱᒥᐃᐧᒋᐦᐃᑕᐧ ᒋᐱᒥᐃᓀᐧᑕᒪᐃᐧᑕᐧ ᒣᑲᐧᐨ ᓄᑯᑦ ᑲᐃᔑᐱᒥᐃᐧᒋᐦᐃᑕᐧ ᑫᑌᐊᑯᓯᐃᐧᑲᒥᑯᐣ ᑲᑕᓇᓄᑲᑌᑭᐣ, ᐁᑲᐧ ᔕᑯᐨ ᑲᔦ ᐃᒪ ᐅᐡᑭ ᐊᑯᓯᐃᐧᑲᒥᑯᐠ ᑕᐅᐡᑭᓭ ᒥᒋᑦ ᑫᐸᑭᑎᓂᑲᑌᐠ. ᐊᓂᔑᓂᓂᐊᐧᐠ ᓄᒪᑫ ᑫᑲᓇᐁᐧᐣᑕᑯᓯᐊᐧᐨ ᐊᑯᓯᐃᐧᑲᒥᑯᐠ ᑕᐸᑭᑎᓇᐊᐧᐠ ᒋᐊᐸᒋᑐᐊᐧᐨ ᐊᓂᔑᓂᓂᐃᐧ ᒥᒋᒪᐣ ᑐᑲᐣ ᒧᓱᐣ. ᑭᐅᓇᒋᑲᑌ ᐅᓇᑯᓂᑫᐃᐧᐣ ᒋᐸᑭᑎᓂᑲᑌᐠ ᒋᑭᓯᓯᑲᑌᑭᐣ ᐊᓂᔑᓂᓂᐃᐧᒥᒋᒪᐣ ᐱᐣᒋ ᐊᑯᓯᐃᐧᑲᒥᑯᐠ. ᑭᐱᑭᓯᒋᑲᑌ ᑕᐡ ᒋᐸᑫᐧᐃᐧᑲᒥᐠ ᑫᑕᔑᑲᓯᑲᑌᑭᐣ. ᒥᐦᐅᐁᐧᓂ ᑲᔦ ᐊᓂᔑᓂᓂ ᑲᐃᔑᑲᓇᐊᐧᐸᑕᐠ ᑫᐅᒋᒥᓄᔭᐨ ᐊᐃᐧᔭ ᑲᐱᒥᓇᑕᐃᐧᐦᐃᐨ.
ᐣᑭᒋᐦᐊᒥᓇᓂᐠ ᒧᔕᐠ ᐣᑭᐱᐃᐧᑕᒪᑯᒥᐣ ᒥᐦᐅᒪ ᑲᔦ ᑫᐅᐣᒋᒥᓄᔭᔭᐠ, ᑲᒥᒋᑲᑌᐠ ᐊᓂᔑᓂᓂᐃᐧᒥᒋᒪᐣ, ᐃᑭᑐ ᐯᕑᑎ.
ᑭᐅᔑᒋᑲᑌ ᑲᔦ ᑫᑕᔑ ᓇᑕᐃᐧᐦᐃᐁᐧ ᐃᔑᒋᑲᓄᐊᐧᐠ ᑐᑲᐣ ᒥᑎᑯᒪᐡᑭᑭᑫᐃᐧ ᓇᑕᐃᐧᐦᐃᐁᐧᐃᐧᐣ.
ᒥᑐᓂ ᑭᐊᔭᑲᐧᒥᓯᓇᓂᐊᐧᐣ ᑫᐃᔑᓇᑯᑕᒪᐃᐧᐣᑕᐧ ᐊᓂᔑᓂᓂᐊᐧᐠ ᐅᒪ ᑲᐅᒋᐊᓄᑭᑕᒪᐃᐧᐣᑕᐧ, ᒪᒪᐤ 28 ᐃᐡᑯᓂᑲᓇᐣ ᐅᐣᒋᐊᐧᐠ ᑫᐱᒋᐅᒋᐊᐸᒋᑐᐊᐧᐨ ᐅᐁᐧᓂ ᐊᑯᓯᐃᐧᑲᒥᑯᓂ ᐁᑲᐧ ᒥᓇ ᑲᐃᐧᓂᐣ ᐃᑯ ᐁᑕ ᐊᓂᔑᓂᓂᐊᐧᐠ ᐅᒪ ᑕᐅᒋ ᐃᐧᒋᐦᐊᑲᓄᓯᐊᐧᐠ. ᑭᐊᐸᑕᐣ ᑕᐡ ᐃᐁᐧ ᑲᑭᓂᑲᐧᓂᔭᐠ ᑫᐅᒋ ᑭᑭᓄᐡᑭᑫᒪᑲᐠ, ᓂᐊᐧᔦᐠ ᑲᐅᐣᑕᑫᔭᓂᒪᐠ ᑲᐃᔑᑭᑭᓇᐊᐧᒋᒋᑫᒪᑲᐠ ᐁᐃᔑᐊᐧᐸᐣᑎᓂᐁᐧᒪᑲᐠ ᑲᑭᓇ ᑲᑕᓱ ᐅᐣᑕᑲᓀᓯᐊᐧᐨ ᒥᓇ ᐱᑯ ᐊᐁᐧᓀᓇᐠ ᐅᒪ ᒋᐱᐣᑎᑲᓂᑕᐧ. ᑭᐃᔑᒋᑲᑌ ᑕᐡ ᒋᐃᔑᓇᑯᒋᑲᑌᐠ ᐅᐁᐧ ᐊᑯᓯᐃᐧᑲᒥᐠ ᒋᐅᒋ ᐃᐧᒋᐦᐃᑯᐊᐧᐨ ᑲᐊᓂᔑᓂᓂᐃᐧᐊᐧᐨ ᒥᓇ ᐱᑯ ᐸᑲᐣ ᑲᐅᐣᑕᑲᓀᓯᐊᐧᐨ.
ᑲᐃᐧᐣ ᒪᔑ ᒋᑭᔕᓄᑲᑌᐠ ᐊᔕ ᐁᔭᓇᑭ ᑭᔑᒋᑲᑌᐠ ᐊᐧᑲᐦᐃᑫᐃᐧᐣ
ᒥᑕᐡ ᐅᓄᐁᐧᓂᐊᐧᐣ ᐸᐸᑲᐣ ᓂᓴᐧᓱ ᒪᐡᑭᑭᐃᐧ ᐊᓄᑭᑕᒪᑫᐃᐧᓇᐣ ᑲᑕᓇᓄᑲᑌᑭᐣ ᐊᐧᓂᓇᐊᐧᑲᐠ ᐊᒥ ᐁᑲᐧ ᒋᒪᒪᐃᐧᓂᑲᑌᑭᐣ ᐃᒪ ᐯᔑᐠ ᐊᐧᑲᐦᐃᑲᓂᐠ, ᑕᔑᑫᐃᐧᓂᐠ ᒪᒥᓄᒥᐁᐧᐃᐧ ᐊᓄᑭᑕᒪᑫᐃᐧᐣ, ᒪᒥᑐᓀᒋᑲᓂ ᒥᓄᔭᐃᐧᐣ ᒥᓇ ᑲᐧᑲᒋᐦᐃᑯᐊᐧᐨ ᑫᑯᓇᐣ ᑲᐅᒋᐃᐧᒋᐦᐃᑕᐧ, ᐃᐧᐸᐨ ᑲᐅᒋᓇᒋᐸᐦᐃᑕᐧ ᐅᑕᑯᓯᐠ, ᑭᓀᐧᐡ ᑲᐅᒋᐱᒥᐃᐧᒋᐦᐃᑕᐧ ᐅᑕᑯᓯᐠ, ᒪᐡᑭᑭᐃᐧᐊᑕᐁᐧᐃᐧᑲᒥᐠ ᐁᑲᐧ ᒥᓇ ᑯᑕᑭᔭᐣ. ᐃᐁᐧ ᑲᔦ ᔕᐧᐸᑌᓯᒋᑲᐣ ᓯᑎ ᑲᐃᒋᑲᑌ ᒥᓇ ᒍᒍᔑᒥ ᔕᐸᐧᑌᓯᒋᑫᐃᐧᐣ ᐁᐧᑎ ᐃᐧᐸᐨ ᐊᓂᓂᑲᐣ ᑕᐊᓂᐊᔭᐊᐧᐣ.
ᐅᐁᐧ ᐊᔕ ᑲᑭ ᑭᔕᓄᑲᑌᐠ ᐊᒥ ᐅᑯ ᑲᐃᔑᓂᐊᐧᓀᓯᐊᐧᐨ ᑲᐅᒋᐱᑭᓯ ᐅᑭᒪᐃᐧᐱᒥᐃᐧᓂᑎᓱᐊᐧᐨ ᐁᑭᐱᒥ ᐊᐧᐃᐧᒋᐦᐃᑎᐊᐧᐨ ᑫᒋᓇᐨ ᑌᐯᐧ ᒋᐊᓂᑌᐱᓂᑲᑌᐠ, ᐃᑭᑐ ᐯᕑᑎ. ᓇᐱᐨ ᑭᓀᐧᐡ ᑭᐱᒪᓄᑲᑌ ᐁᑲᐧ ᒥᓇ ᓂᐢᑕᑦ ᐅᑭᐊᓀᐧᐣᑕᒧᐊᐧᐸᐣ ᐊᓂᔑᓂᓂᐊᐧᐠ.
ᒣᑲᐧᐨ 1980 ᐱᓂᐡ 1990 ᑲᐱᒥᔭᑭᐊᐧᐠ, ᒥᐦᐃᐁᐧ ᐊᐱ ᑲᑭᐃᓀᐣᒋᑲᑌᑭᐸᐣ ᒋᒪᒪᐃᐧᓂᑲᑌᑭᐣ ᑲᓇᑕ ᐅᑭᒪᐅᓂᐠ ᑲᐅᒋᐱᒧᒋᑲᑌᐠ ᐊᐣ ᐊᑯᓯᐃᐧᑲᒥᐠ ᑲᑭᔭᓂ ᒪᐦᒋᐊᓂᒧᒋᑲᑌᑭᐸᐣ, ᐁᑲᐧ ᐊᓂᔑᓂᓂᐊᐧᐠ ᑲᐧᐃᐣ ᒋᑭᐅᒋ ᓇᑌᐦᐁᐣᑕᒧᐊᐧᐸᐣ ᐅᐁᐧᓂ, ᐯᕑᑎ ᐃᑭᑐ ᐊᓂᔑᓂᓂᐊᐧᐠ ᐅᑭᐸᑯᓭᓂᒪᐊᐧᐸᓂᐣ ᑲᓇᑕ ᐅᑭᒪᐅᓇᐣ ᒋᐱᒥᐃᐧᒋᐦᐃᑯᐊᐧᐨ. ᐁᑲᐧ ᑕᐡ ᐊᓂᔑᓂᓂᐊᐧᐠ ᑲᐃᔑᑲᓇᐊᐧᐸᒥᑕᐧ ᐃᒪ ᑲᓇᑕ ᐅᑭᒪᐅᓂᐠ ᐅᐣᒋᒪᑲᓂ ᐅᐃᐧᒋᐦᐃᑯᐃᐧᓂᐊᐧ ᑐᑲᐣ ᐊᐧᑲᐦᐃᑲᓇᐣ, ᑭᑭᓄᐦᐊᒪᑫᐃᐧᐣ ᒥᓇ ᐊᑯᓯᐃᐧ ᐸᒥᐦᐃᑯᐃᐧᐣ. ᑭᐃᑭᑐ ᐅᑭᐃᓀᐣᑕᓇᐊᐧ ᐊᓂᔑᓂᓂᐊᐧᐠ ᑭᐡᐱᐣ ᐃᔑᓇᑯᒧᐊᐧᐨ ᐅᐣᑌᕑᐃᔪ ᐅᑭᒪᐅᓂᐠ ᒋᐅᒋ ᐃᐧᒋᑲᐸᐃᐧᑕᐊᐧᐊᐧᐨ ᒥᐦᐃᒪ ᐊᐱᐣ ᒋᐅᒋ ᐊᒋᐃᐧᓭᓂᐠ ᑲᓇᑕ ᐅᑭᒪᐅᓂᐠ ᑲᐅᒋᐃᐧᒋᐦᐃᑕᐧᐸᐣ.
ᑲᓇᑕ ᐅᑭᒪᐅᐣ ᒪᐊᐧᐨ ᓂᐢᑕᑦ ᑲᑭᐅᔑᑐᐸᐣ ᐊᑯᓯᐃᐧᑲᒥᑯᓂ ᒣᑲᐧᐨ 1950 ᑲᐱᒥᔭᑭᐊᐧᓂᐠ, ᐁᑲᐧ ᐅᐁᐧ ᓱᐣ ᐊᑯᓯᐃᐧᑲᒥᐠ ᑭᐃᔑᓂᑲᑌᐸᐣ ᐊᐧᓂᓇᐊᐧᑲᐠ ᐊᓂᔑᓇᐯ ᐊᑯᓯᐃᐧᑲᒥᐠ ᒥᓇ ᑭᐃᓇᐧᑌᐸᐣ ᐁᑭᑕᔑᑲᓇᐁᐧᐣᑕᑯᓯᐊᐧᐨ ᑲᑭᑎᐱᐊᐧᐱᓀᐊᐧᐨ ᐊᓂᔑᓂᓂᐊᐧᐠ ᐁᐧᑎ ᓄᐱᒪᑲᒥᐠ ᑭᐁᐧᑎᓄᐠ. ᐁᑲᐧ ᐱᓂᐡ 1970 ᑲᔭᓂᐱᒥᓭᐠ, ᑭᑭᐁᐧ ᐊᐣᒋᓂᑲᒋᑲᑌᐸᐣ ᓱᐣ ᐁᑲᐧ ᑕᐡ ᐊᓂᔑᓂᓂᐊᐧᐠ ᒥᓇ ᐁᐧᒥᑎᑯᔑᐊᐧᐠ ᑭᐱᐣᑎᑲᓇᐊᐧᐠ ᐃᒪ ᐊᑯᓯᐃᐧᑲᒥᑯᐠ ᒋᑕᔑᓇᑕᐃᐧᐦᐃᑕᐧ.
ᔕᑯᐨ ᐱᓂᐡ 1980 ᑲᔭᓂᔭᑭᐊᐧᐠ, ᑭᔭᓂᒥᔑᓇᑐᐣ ᐁᑲᔭᓂ ᑕᓀᐣᑕᒥᐦᐃᑯᐊᐧᐨ ᐊᓂᔑᓂᓂᐊᐧᐠ ᐅᑕᑯᓯᐃᐧ ᐃᐧᒋᐦᐃᑯᐃᐧᓂᐊᐧ. ᒍᓴᔭᐢ ᐱᐟᓫᐊᕑ, ᑲᐊᐱᑕᒪᑫᐨ ᐅᒪ ᒥᓄᔭᐃᐧᐣ, ᐅᑭᒪᑲᓂᐃᐧᐸᐣ ᐁᐧᑎ ᓀᑲᐃᐧᓴᑲᐃᑲᓂᐠ ᐃᐁᐧ ᐊᐱ ᒣᑲᐧᐨ ᑲᐊᓂᐅᐡᑭᓭᐠ 1980. ᒥᔑᐣ ᑫᑯᓇᐣ ᑲᐃᐧᐣ ᒋᑭᐅᒋ ᓇᓂᓯᑕᐁᐧᐣᑕᑭᐸᐣ ᐊᓂᐣ ᐁᔑᐱᒧᒋᑲᑌᓂᐠ ᐊᑯᓯᐃᐧᐱᒧᒋᑫᐃᐧᓂ, ᑲᐃᐧᓂᐣ ᐃᑯ ᐁᑕ ᐅᑎᐡᑯᓂᑲᓂᐠ, ᑌᑎᐸᐦᐃ ᐱᑯ ᑲᔦ ᑲᐊᔭᓂᑭᐣ ᐃᐡᑯᓂᑲᓇᐣ.
ᑭᐃᑭᑐ ᒥᔑᐣ ᑫᑯᓇᐣ ᑲᐃᐧᐣ ᒋᐅᒋᓇᐦᐃᓇᑲᐧᑭᐣ ᑐᑲᐣ ᐁᑲ ᐁᐅᒋᑕᑲᐧᑭᐣ ᐃᓀᐧᓀᑕᒪᑫᐃᐧ ᐃᐧᒋᐦᐃᑯᐃᐧᓇᐣ, ᒥᓇ ᐱᒥᓭᐃᐧᓇᐣ ᐁᑲ ᐃᐧᐸᐨ ᐁᑕᑯᔑᓄᒪᑲᑭᐣ ᑭᐡᐱᐣ ᐅᑕᑯᓯ ᑲᐸᐸᔑ ᒪᒋᓂᔕᐊᐧᑲᓄᐨ, ᐁᑲ ᒥᓇ ᐁᐅᒋ ᑫᒋᓇᐁᐧᐣᑕᑯᓯᐊᐧᐨ ᒪᐡᑭᑭᐃᐧᑫᐧᐠ ᒥᓂᑯᐠ ᑫᐱᔭᓄᑭᐊᐧᐨ ᑕᔑᑫᐃᐧᓂᐠ ᒥᓇ ᐊᓂᐣ ᐁᔑᑲᓇᐊᐧᐸᒥᑕᐧ ᐊᓂᔑᓂᓂᐊᐧᐠ ᐊᐧᓂᓇᐊᐧᑲᐠ ᑲᓇᑕᐃᐧ ᓇᒋᒪᐡᑭᑭᐃᐧᓂᓂᐁᐧᐊᐧᐨ.
ᒥᔑᐣ ᐊᐧᐊᐧᓀᐣᑕᒧᐃᐧᓇᐣ ᐣᑭᓇᑭᐡᑲᒥᐣ, ᑭᐃᑭᑐ.
ᒣᑲᐧᐨ 1988 ᑲᔭᑭᐊᐧᓂᐠ, ᐊᐧᐁᐧ ᐱᐟᓫᐊᕑ ᒥᓇ ᑯᑕᑭᔭᐠ ᓂᐃᐧᐣ ᓀᑲᐃᐧᓴᑲᐃᑲᓂᐃᐧᓂᓂᐊᐧᐠ ᐊᒥ ᐁᑲᐧ ᑲᑭᐸᐊᐧᓂᐦᐃᑎᓱᐊᐧᐨ. ᐃᐁᐧ ᑕᐡ ᑲᑭᐅᐣᒋ ᑐᑕᒧᐊᐧᐨ ᐁᐃᐧ ᑭᑫᐣᑕᑯᑐᐊᐧᐨ ᐁᑲ ᑲᐧᔭᐠ ᑲᐃᔑᓇᑲᐧᓂᐠ ᓱᐣ ᐊᑯᓯᐃᐧᑲᒥᐠ ᒥᓇ ᐱᑯ ᑲᐃᔑᑭᑎᒪᑭᓇᑲᐧᓂᐠ ᐅᑕᑯᓯᐃᐧ ᐸᒥᐦᐃᑯᐃᐧᓂᐊᐧ ᐊᓂᔑᓂᓂᐊᐧᐠ ᑭᐁᐧᑎᓄᐠ.
ᒥᑕᐡ ᐊᐱᐣ ᑲᑭᒪᑕᓄᑲᑌᐠ ᒋᑭᐁᐧ ᑲᓇᐊᐧᐸᒋᑲᑌᐠ ᐊᑯᓯᐃᐧ ᐸᒥᐦᐃᐁᐧᐃᐧᐣ ᑲᑕᓇᓄᑲᑌᐠ ᐊᐧᓂᓇᐊᐧᑲᐠ. ᐯᔑᑲᐧᔦᐠ ᑕᐡ ᐃᐁᐧ ᑲᑭᐃᔑᒥᑭᑲᑌᐠ ᑭᐃᑭᑐᓇᓂᐊᐧᐣ ᒋᑭᐅᔑᒋᑲᑌᑭᐸᐣ ᐅᐡᑭᐊᑯᓯᐃᐧᑲᒥᐠ.
ᓇᓄᒪᑫ ᑕᐡ ᐃᑯ ᑭᐱᒥᓭ ᐊᓂᔑᓂᓂᐊᐧᐠ ᒋᑭᐊᔑᑎᓂᑕᐧ ᐃᒪ ᐊᐱᑕᒪᑫᐃᐧᓂᐠ, ᐊᓂᐡ ᐁᑲ ᐁᑭᐅᒋ ᓇᑕᐁᐧᓂᒪᐊᐧᐨ ᑲᓇᑕ ᐅᑭᒪᐅᓇᐣ ᒋᐸᑭᑎᓇᒥᓂᐨ ᑲᐃᓇᔓᐊᐧᓯᓂᐨ ᒋᐅᒋ ᑲᓇᐁᐧᓂᒪᐨ ᐊᓂᔑᓂᓂᐊᐧᐣ ᐅᑕᑯᓯᐃᐧᐸᒥᐦᐃᑯᐃᐧᓇᐣ. ᐁᑲᐧ ᐸᓂᒪ ᐊᐱ ᑲᐃᐡᑲᐧ ᑭᒋᐱᒥ ᐊᓂᒧᑕᒪᑎᓇᓄᐊᐧᐠ, ᐊᒥ ᑫᑲᐱ ᐊᓂᔑᓂᓂᐊᐧᐠ ᑲᑭᐃᓀᐣᑕᒧᐊᐧᐨ ᒋᐯᔑᑯᒋᑲᑌᐠ ᒥᓇ ᒋᐅᔑᒋᑲᑌᐠ ᐅᐡᑭ ᐊᑯᓯᐃᐧᑲᒥᐠ. ᒣᑲᐧᐨ 1997, ᐊᓂᔑᓇᐯ ᐊᐢᑭ ᐅᑭᒪᐃᐧᐣ, ᐊᐧᓂᓇᐊᐧᑲᐠ, ᐅᐣᑌᕑᐃᔪ ᒥᓇ ᑲᓇᑕ ᐅᑭᒪᐅᓇᐣ ᑭᒪᒪᐃᐧ ᒪᓯᓇᐦᐅᑎᓱᐊᐧᐠ ᓂᐊᐧᔦᐠ ᑲᐅᒋᐱᑭᓯ ᐊᓄᑭᐊᐧᐨ ᓇᑯᒥᑐᐃᐧᓂ.
ᐱᐟᓫᐊᕑ ᐃᑭᑐ ᒥᔑᐣ ᐊᐃᐧᔭᐠ ᐅᑭᐃᐧᒋᑲᐸᐃᐧᑕᓇᐊᐧ ᐅᐁᐧᓂ ᐯᔑᑲᐧᐣ ᑲᑭᐃᔑ ᒪᒪᐃᐧ ᓂᓯᑕᐁᐧᐣᑕᒧᐊᐧᐨ ᒥᓇ ᒥᑐᓂ ᐱᑯ ᐅᑭ ᑭᒋᐊᓄᑲᑕᓇᐊᐧ ᒋᔭᓂ ᑲᑫᐧᑌᐱᓂᑲᑌᐠ. ᐅᐁᐧ ᓂᐊᐧᔦᐠ ᓇᑯᒥᑐᐃᐧᐣ ᑭᐅᒋᒪᒋᑕᒪᑲᐣ ᒋᐅᒋ ᒪᒪᐃᐧᓂᑲᑌᑭᐣ ᐊᑯᓯᐃᐧᑲᒥᑯᐣ ᒣᑲᐧᐨ 2002 ᑲᔭᑭᐊᐧᐠ ᒥᓇ ᑭᐅᐣᑎᓇᑲᓄ ᔓᓂᔭ ᒋᔭᓂ ᐅᔑᒋᑲᑌᐠ ᐅᐡᑭ ᐊᑯᓯᐃᐧᑲᒥᐠ. ᑕᐱᐡᑯᐨ ᑲᓇᑕ ᒥᓇ ᐅᐣᑌᕑᐃᔪ ᐅᑭᒪᐅᓇᐣ ᑭᐸᑭᑎᓂᑎᓱᒪᑲᓄᐣ ᒋᐅᐣᑎᓂᑫᑕᒪᑫᐊᐧᐨ ᔓᓂᔭᐣ ᑫᐃᔑᐊᐸᑎᓯᐨ ᐅᔑᒋᑲᑌᐠ ᐊᑯᓯᐃᐧᑲᒥᐠ.
ᐱᐟᓫᐊᕑ ᐅᑌᐯᐧᑕᐣ ᓂᑲᐣ ᑲᑭᐃᔑᐊᐧᐸᐣᑕᒧᐊᐧᐨ ᑭᒋᐦᐊᐠ ᒥᓇ ᐅᓂᑲᓂᑕᒪᑫᐠ ᐊᔕ ᑭᑲᒋᑎᓂᑲᑌ ᐅᐁᐧ ᑲᑭ ᑭᔑᒋᑲᑌᐠ ᐅᐡᑭ ᐊᑯᓯᐃᐧᑲᒥᐠ. ᑲᑭᐃᔑᐸᑯᓭᓂᒪᓇᓂᐊᐧᑭᐸᐣ ᑲᐧᔭᐠ ᒋᐃᔑᓇᑲᐧᓂᐠ ᐊᓂᔑᓂᓂᐊᐧᐠ ᐅᑕᑯᓯᐃᐧ ᐸᒥᐦᐃᑯᐃᐧᓂᐊᐧ ᐃᐡᑯᓂᑲᓂᐠ ᑲᐅᒋᐊᐧᐨ ᐅᒪ ᐊᐧᓂᓇᐊᐧᑲᐠ ᐃᓀᑫ.
ᑲᐃᐧᐣ ᑕᐡ ᐃᐧ ᐅᒪ ᑕᐃᔑᐳᓂᓭᓯᐣ ᐊᓄᑭᐃᐧᐣ, ᑭᐃᑭᑐ, ᓇᑕᐁᐧᐣᑕᑲᐧᐣ ᒋᐃᔑᐱᒥᓭᐠ ᐃᐧᑕᓄᑭᒥᑐᐃᐧᐣ ᐃᒪ ᐊᑯᓯᐃᐧᑲᒥᑯᐠ, ᐅᑌᓇᐠ, ᑌᐱᐸᐦᐃ ᑲᐊᔭᑭᐣ ᐊᓂᔑᓂᓂᐃᐧ ᑕᔑᑫᐃᐧᓇᐣ ᒥᓇ ᐅᑭᒪᐅᓇᐣ ᒋᐅᒋ ᒥᓄᐡᑲᒪᑲᐠ ᐊᑯᓯᐃᐧᑲᒥᐠ ᒋᑕᔑᐊᔭᓂᐊᐧᐠ.