ᑲᓴᐸᓇᑲᐠ ᐊᓂᑕ ᑭᒪᒪᒋᐃᐧᓇᐊᐧᐠ ᐁᓂᒧᐡᑭᐱᓂᐠ ᐅᑲᐯᔑᐃᐧᓂᐊᐧ

Create: 12/01/2015 - 19:24

ᑲᓴᐸᓇᑲᐠ ᑭᐅᐣᒋ ᒪᒪᒋᐃᐧᓇᐊᐧᐠ ᓇᐣᑕ ᐱᑯ 150 ᐊᓂᔑᓂᓂᐊᐧᐠ ᐁᐧᓴ ᐊᐱᐣ ᑲᐊᓂ ᒧᐡᑭᐱᓂᐠ ᐅᑕᔑᑫᐃᐧᓂᐊᐧ ᐁᑲᐧ ᒥᓇ ᑭᓂᑭᐱᓂ ᑲᐅᐣᒋ ᐊᔓᒧᓂᐠ ᒥᓇ ᐊᓂ ᓇᓂᓴᓂᓇᑲᐧᓂ ᒋᐊᓂᑲᐃᐧᓭᐊᐧᐨ ᐃᐡᑯᑌᐃᐧᔭᐱᐃᐧ ᒥᑎᑯᑲᓇᐠ ᒥᓇ ᐊᔓᑲᐣ ᑲᐅᐣᒋᐊᔓᐊᐧᐣᑕᐁᐧᒧᐠ ᑕᔑᑫᐃᐧᓂᐠ.
ᐁᑲᐧ ᐅᑭᐸᑭᑎᓇᓇᐊᐧ ᐅᑎᐸᒋᒧᐃᐧᓂᐊᐧ ᐃᒪ ᐃᐡᑯᓂᑲᓂᐠ ᐁᓇᑕᐁᐧᐣᑕᒧᐊᐧᐨ ᒋᐃᐧᐣᒋᐦᐃᑕᐧ ᒣᑲᐧᐨ ᒪᑯᐱᓯᑦ 23 ᒥᑕᐡ ᑲᑭᐊᓂ ᒪᒪᒋᐃᐧᓂᑕᐧ ᑲᐊᑯᓯᐊᐧᑎᓯᐊᐧᐨ ᒣᑲᐧᐨ ᑲᒥᔕᑲᒣᑯᓇᑲᓂᐠ, 112 ᑭᐃᔑᐃᐧᓇᐊᐧᐠ ᐦᐃᕑᐢᐟ ᑕᐃᐧᓂᐠ ᐁᑲᐧ ᒥᓇ ᑯᑕᑭᔭᐠ 34 ᑭᐃᔑᐃᐧᓇᐊᐧᐠ ᒉᕑᐅᑎᐣ.
ᒣᑲᐧᐨ ᒪᑯᐱᓯᑦ 27 ᑲᐃᓇᑭᓱᐨ ᑭᐊᓂ ᑭᐱᒋᒪᑲᐣ ᑲᐱᒥᒧᐡᑭᐱᑭᐸᐣ ᐁᑲᐧ ᑲᐃᐧᐣ ᐊᐊᐧᔑᒣ ᐊᐃᐧᔭᐠ ᑕᒪᒋᐃᐧᓇᑲᓄᓯᐊᐧᐠ.
ᒥᑕᐡ ᐃᑯ ᐃᐁᐧ ᐊᐱ ᑲᑭᔐᐸᔭᐠ, ᑲᓴᐸᓇᑲᐠ ᐅᑭᐊᐧᓂᐦᐊᐊᐧᐣ ᐅᑐᐡᑲᑎᓯᒥᐊᐧᐣ ᐁᑭᐅᑕᐱᓇᐠ ᐅᐱᒪᑎᓯᐃᐧᐣ, ᐊᐊᐧᔑᒣ ᐊᐱᐣ ᐁᐅᐣᒋᐊᓂᒣᐣᑕᒧᐊᐧᐨ ᐅᐁᐧ ᐊᔕ ᒥᓂᑯᐠ ᑫᑯᐣ ᑲᐃᔑᓇᑭᐡᑲᒧᐊᐧᐨ ᐅᑎᓯᓭᐃᐧᓂᐊᐧ.
ᒥᒍ ᑎᐊᐳ, ᑲᓴᐸᓇᑲ ᐊᓄᑭᐃᐧ ᓇᓇᑲᒋᒋᑫᐃᐧᓇᐣ ᑲᐃᔑᐅᑭᒪᐃᐧᐨ, ᑭᐃᑭᑐ ᑯᑕᑭᓂ ᒥᓇᐊᐧ ᐅᐣᒋᓭᓂ ᐁᐅᐣᒋ ᐊᓂᒣᐣᑕᒧᐊᐧᐨ ᑲᑭᐊᐧᓂᐦᐊᐊᐧᐨ ᐅᑐᐡᑲᑎᓯᒥᐊᐧᐣ.
“ᐊᔕ ᓇᐊᐧᐨ ᐊᓂᓴᓯᑕᐊᐧᑌᐣᑕᑲᐧᓄᐸᐣ ᒥᑕᐡ ᐊᐱᐣ ᒥᓇᐊᐧ ᐅᐁᐧ ᑲᐃᓯᓭᐠ,” ᑭᐃᑭᑐ. “ᐊᔕ ᒥᓇᐊᐧ ᓂᓇᑭᐡᑲᒥᐣ ᑭᒋᐊᓂᒥᓭᐃᐧᐣ.”
ᒥᐦᐅᐁᐧ ᒥᓇ ᐸᐢᑲᐣ ᐁᑭᒪᒪᒋᐃᐧᓂᑕᐧ ᐊᐃᐧᔭᐠ ᐃᒪ ᑲᓴᐸᓇᑲᐠ ᑲᑭᐊᓂᒧᐡᑭᐱᓂᐠ ᐅᑕᔑᑫᐃᐧᓂᐊᐧ. ᔕᑯᐨ ᐅᑕᓇᐠ ᑭᐱᓂᑕ ᒪᒪᒋᐃᐧᓇᑲᓄᐸᓂᐠ ᑲᓂᐱᓂᐠ ᑲᓴᓴᑭᑌᓂᐠ ᐯᔓᐨ ᑕᔑᑫᐃᐧᓂᐠ.
ᐊᓇᐃᐧᐣ ᐊᔕ ᓂᔓᑯᐣ ᐅᐣᒋᐱᒥ ᓂᔑᑫ ᐱᒥᐃᐢᑭᐱᑕᒪᑲᐣ, ᔕᑯᐨ ᐃᑯ ᑲᓴᐸᓇᑲ ᐅᓂᑲᓂᑕᒪᑫᐠ ᐅᑕᓀᐣᑕᒥᐦᐃᑯᓇᐊᐧ ᐃᓂᐁᐧᓂᐊᐧᐣ ᐊᔓᑲᓇᐣ ᑲᐅᐣᒋᐊᔓᑕᒧᐠ ᑕᔑᑫᐃᐧᓂᐠ ᐁᑲᐧ ᒥᓇ ᐃᐡᑯᑌᐃᐧᔭᐱᐃᐧ ᒥᑎᑯᑲᓇᐠ ᑲᓂᐱᑌᑭᓱᐊᐧᐨ ᒪᔭᑦ ᑲᐃᔑᐱᒪᒧᓂᐠ.
“ᐃᒪ ᑕᐡ ᒪᔭᑦ ᑲᐅᐣᒋ ᐊᓱᑲᐸᐃᐧᒪᑲᐠ ᐊᔓᑲᓂᑲᐣ ᑭᐊᓄᒋᐸᑫᐧᔭᐳᑌ,” ᐃᑭᑐ ᒥᒍ ᑎᐊᐳ. “ᐁᑲᐧ ᒥᓇ ᑲᐊᔕᐧᐱᑫᒧᑭᐣ ᐃᐡᑯᑌᐃᐧ ᐱᐊᐧᐱᑯᔭᐱᐣ ᐊᓂᑕᐸᓴᐱᑫᑯᑌᐊᐧᐣ ᐊᑲᒥᐠ ᐃᓀᑫ ᐊᔓᑲᓂᐠ.”
ᑎᐊᐳ ᐃᑭᑐ ᐅᑭᑭᐸᐦᐊᓇᐊᐧ ᐁᑲ ᒋᐊᔭᔓᐱᓱᓇᓂᐊᐧᐠ ᒣᑲᐧᐨ ᑲᒥᔕᑲᒣᑯᓇᑲᓂᐠ ᔕᑯᐨ ᒣᑲᐧᐨ ᒪᑯᐱᓯᑦ 27 ᐅᑭᑭᐁᐧ ᑕᐃᐧᓇᓇᐊᐧ ᒋᑭᐁᐧᐊᐸᒋᑐᐊᐧᐨ ᑲᐅᑐᑕᐸᓂᐊᐧᐨ ᐁᑲ ᐃᐧᓂᑯ ᑭᒋᐅᑕᐸᓇᐣ ᑲᐊᐸᒋᐦᐊᐊᐧᐨ.
ᑭᐃᔑᑭᑐᐊᐧᐠ ᐃᒪ ᐅᑭᒪᐃᐧᐣ ᑲᐅᒋ ᑲᓇᐊᐧᐸᑕᐠ ᐱᒥᔭᐃᐧ ᓇᓇᑲᒋᒋᑫᐃᐧᓇᐣ ᒋᐱᓇᓇᑲᒋᐦᐊᐊᐧᐨ ᐊᔓᑲᓇᐣ ᐁᑲᐧ ᒥᓇ ᑲᔦ ᐅᑭᑲᓄᓇᐊᐧᐣ ᐦᐊᔾᐟᕑᐅ ᐃᐡᑯᑌᐃᐧᔭᐱᐃᐧᑭᒪᐠ ᒋᐱᓇᓇᑲᒋᐦᐊᐊᐧᐨ ᐅᒥᑎᑯᑲᓂᐊᐧ ᑲᐃᐧᐣ ᔕᑯᐨ ᒪᔑ ᒋᑭᐱᐅᐣᒋ ᓇᑫᐧᐁᐧᔑᒥᐣᑕᐧ ᒣᑲᐧᐨ ᒪᑯᐱᓯᑦ 27 ᑲᐃᓇᑭᓱᓂᐨ.
“ᑭᐡᐱᐣ ᒥᑎᑯᑲᓇᐠ ᑲᐊᐧᑯᓭᐊᐧᐨ, ᓴᑲᐦᐃᑲᓂᐠ ᑕᐃᔑᑲᐃᐧᓭᐊᐧᐠ - ᒋᑭᑭᐃᐡᑯᑌᐃᐧᐊᐧᐨ,” ᑎᐊᐳ ᐃᑭᑐ.
ᐸᐯᑲᐧᐨ ᑲᔦ ᑲᐅᐣᒋᐱᐣᑎᑫᑕᒧᐠ ᑭᐱᑲᐧᐸᐁᐧ ᐁᑲᐧ ᑕᐡ ᐅᑕᐸᓇᐠ ᑲᐃᔑᐱᒥᐱᓱᐊᐧᐨ ᐃᒪ ᓇᐣᑕ ᐱᑯ ᐯᔓᑯᒥᓯᐟ ᐊᐱᒋᐱᔭᓂ ᑲᐊᓂᐱᓱᐊᐧᐨ ᐊᔓᑲᓂᐠ.
ᐁᑲᐧ ᒥᓇ ᐯᑭᐡ ᑲᑭᐊᓂ ᒧᐡᑭᐱᓂᐠ, ᑯᑕᑭᓂ ᒥᓇ ᑫᑯᓂ ᐅᑭᐊᓂᐊᐧᐸᑕᓇᐊᐧ ᑫᐅᐣᒋ ᐊᓂᒥᓭᐊᐧᐨ, ᒋᐊᓂ ᒧᐡᑭᐳᑌᓂᐠ ᒧᐊᐧᐳ ᐃᐧᑲᐧᐦᐅᐸᐣ ᑲᐃᔑᐊᑌᐠ. ᑫᒋᐊᐧᐠ ᒧᐊᐧᐳ ᑭᐃᐧᑲᐧᐦᐅᐸᑌ ᐃᒪ ᐊᑐᐸᓂᐠ ᐁᑭᐃᔑᐁᐧᐱᓂᑲᑌᐠ ᓴᑲᐦᐃᑲᓂᐠ.
ᔕᑯᐨ ᑲᑭᐃᐡᑲᐧ ᐃᐧᐣᑕᒧᐊᐧᐸᐣ ᒋᐱᐃᐧᒋᐦᐃᐣᑕᐧ, ᐅᑕᓄᑭᐠ ᑭᐱᑕᑯᔑᓄᐠ ᐁᑭᑭᐸᐦᐊᒧᐊᐧᐨ ᐁᑲ ᐊᐊᐧᔑᒣ ᒋᓂᑭᐳᑌᓂᐠ.
ᑎᐊᐳ ᐃᑭᑐ ᒪᐊᐧᐨ ᐃᑯ ᑭᐊᐧᐊᐧᓀᐣᑕᑲᐧᐣ ᐊᐱ ᑲᐊᓂ ᐃᐧᐣᒋᑲᑌᐠ ᐁᓇᑕᐁᐧᐣᑕᑲᐧᐠ ᐃᐧᒋᐦᐃᐁᐧᐃᐧᐣ ᐃᒪ ᑕᔑᑫᐃᐧᓂᐠ. ᐅᑭᑎᐸᑐᑕᐣ ᒥᑐᓂ ᐱᑯ ᑲᑭᓇ ᑫᑯᐣ ᒋᐱᒥᓂᔕᐦᐃᑲᑌᐠ, ᑲᐃᔑᑲᓇᐊᐧᐸᒋᑫᐊᐧᐨ ᑭᒋᐅᑭᒪᐠ ᒥᓇ ᑲᐃᓇᑯᓂᑫᐊᐧᐨ ᑲᓇᑕ ᒥᓇ ᐅᐣᑌᕑᐃᔪ ᐅᑭᒪᐠ ᑲᐅᒋᑲᓇᐊᐧᐸᒋᑲᑌᐠ ᐃᐧᒋᐦᐃᐁᐧᐃᓇᐣ, ᐊᔑᐨ ᒥᓇ ᐸᐸᓯᓭᐃᐧᐣ ᑲᑲᓇᐊᐧᐸᑕᐠ ᐅᐣᑌᕑᐃᔪ ᐅᑭᒪ (EMO), ᔓᓂᔭᐃᐧᑭᒪ ᐊᓂᔑᓂᓂᐃᐧ ᑲᓇᐊᐧᐸᒋᑫᐃᐧᐣ ᑲᐅᒋᐊᓄᑲᑌᐠ, ᑭᒋᒪᐡᑭᑭᐃᐧᑭᒪ, ᐁᑲᐧ ᒥᓇ ᑭᒋᐊᒥᑯᑭᒪ, ᐁᑲᐧ ᒥᓇ ᒥᔑᐣ ᑯᑕᑭᔭᐠ ᐅᑭᒪᐠ.
ᐁᑲᐧ ᐊᐱ ᑲᑭᐸᑭᑎᓂᑲᑌᐠ ᑎᐸᒋᒧᐃᐧᐣ ᐃᐧᒋᐦᐃᐁᐧᐃᐧᐣ ᐁᓇᑕᐁᐧᐣᑕᑲᐧᐠ, ᐅᑯᐁᐧᓂᐊᐧᐠ ᑫᔭᓂ ᒪᒋᐃᐧᓂᑕᐧ ᑭᐱᐦᐅᐊᐧᐠ ᐊᐊᐧᔑᒣ 24 ᑕᓱᐊᐧᑲᓭ - ᐊᔕ ᐁᑭᐸᐱᓇᐦᐃᑫᐊᐧᐨ ᐅᒪᒋᐃᐧᒋᑲᓂᐊᐧ - ᒣᑲᐧᐨ ᐁᒪᒪᒋᑭᑐᓇᓂᐊᐧᐠ ᐊᐣᑎ ᑫᐃᔑᓂᔕᐦᐅᐣᑕᐧ.
“ᐊᒥ ᐊᑯ ᐁᐡᑲᑦ ᐁᐃᓀᐣᑕᒪᐣ ᐁᐅᐣᒋ ᐧᐊᐧᐊᓂᓭᐠ ᑕᔑᑫᐃᐧᐣ ᑲᐃᔑᐱᒥ ᑲᓇᐊᐧᐸᒋᑲᑌᑭᐣ ᐱᒥᓂᔕᐦᐃᑫᐃᐧᓇᐣ, ᑐᑲᐣ ᐁᐅᐣᑕᒥ ᒥᑲᑎᐊᐧᐨ ᐊᐣᑎ ᑫᑭᐅᐣᒋᐅᓀᒋᑲᑌᑭᐸᐣ ᑫᐃᔑᓂᔕᐦᐅᐣᑕᐧ ᑲᒪᒪᒋᐃᐧᓂᑕᐧ,” ᑭᐃᑭᑐ. “ᒥᐦᐅᐁᐧ ᒪᐊᐧᐨ ᐁᑲ ᑲᓇᐦᐁᐣᑕᒥᐦᐃᑯᔭᐣ.”
ᐊᔕ ᑕᐡ ᒥᓇᐊᐧ ᑫᑲᐟ ᐁᔭᓂᑭᐁᐧ ᒪᒥᓄᓭᐊᐧᐨ ᐃᒪ ᐅᑕᔑᑫᐃᐧᓂᐊᐧᐠ ᑫᑲᐟ ᑲᑭᒧᐡᑭᐱᐊᐧᐨ, ᑎᐊᐳ ᑲᐃᐧᐣ ᐅᑭᑫᐣᑕᓯᐣ ᐊᓂᐣ ᐊᐱᐣ ᑲᑭᒪᒪᒋᐃᐧᓂᑕᐧ ᑫᐃᐸᓂᐦᐃᑯᐊᐧᑫᐧᐣ ᑲᑭᐊᐧᓂᐦᐊᐊᐧᐨ ᐅᑐᐡᑲᑎᓯᒥᐊᐧ.
“ᓇᑫᐱᑯ ᑫᐃᐧᐱᑭᐁᐧᐊᐧᑫᐧᐣ” ᑭᐃᑭᑐ.