ᑭᒋᓇᒣᑯᓯᑊ ᐅᑭᐸᑯᐢᑲᐊᐧᐊᐧᐣ ᑎᐱᕑᐢ

ᑭᒋᓇᒣᑯᓯᑊ ᐃᓂᓂᐊᐧᐠ ᐅᑭ ᐅᓀᐣᑕᓇᐊᐧ ᒋᑭᐸᑯᐢᑲᐊᐧᐊᐧᐨ ᑎᐱᕑᐢ ᐁᑲ ᒋᓇᓇᐣᑕᐊᐧᓯᓂᐁᐧᓂᐨ ᐃᒪ ᐅᑕᑭᒥᐊᐧ.
ᑭᒋᓇᒣᑯᓯᑊ ᐅᑭᒪᑲᐣ ᑕᐧᓂ ᒪᐧᕑᐃᐢ ᒥᓇ ᐅᓇᔓᐁᐧᐃᐧᓂᐊᐧᐠ ᑭᐃᑭᑐᐊᐧᐠ ᒪᑯᔐᑭᔑᑲᐃᐧᐱᓯᑦ 6 ᑲᐃᓇᑭᐣᓯᐨ ᒪᓯᓇᐦᐃᑲᓂᐠ ᐁᑭ ᐃᔑᐱᐦᐃᑫᐊᐧᐨ “ᒋᑲᑫᐧ ᓂᓯᑎᑕᑲᐧᒥᑐᔭᐣᐠ ᐁᑲ ᐁᓇᐣᑕᐁᐧᐣᑕᒪᐣᐠ ᒥᓇ ᐁᑲ ᒋᐸᑭᑎᓇᔭᐣᐠ ᒋᓇᓇᐣᑕᐊᐧᓯᓂᐊᐧᓂᐊᐧᓂᐠ ᐃᒪ ᑲᐃᔑ ᑎᐯᐣᑕᒪᐣᐠ ᓂᑕᑭᒥᓇᐣ ᒣᑲᐧᐨ ᐅᐁᐧ ᑲᐊᓂᓯᓭᐠ.”
ᐃᐁᐧ ᒪᓯᓇᐦᐃᑲᐣ ᑭᔕᐯᐧᑲᓯᓇᐦᐃᑲᑌ ᐁᑭ ᐃᔑᓂᔕᐦᐊᒧᐊᐧᑲᓄᐨ ᐅᐣᑌᕑᐃᔪ ᐅᑭᒪ ᑕᓫᑕᐣ ᒪᑭᐣᑎ, ᑭᒋ ᐅᑭᒪ ᐢᑎᐱᐣ ᐦᐊᕑᐱᕑ ᐁᑲᐧ ᒥᓇ ᑲᔦ ᑲᐃᐧᑕᓄᑭᒥᑎᐊᐧᐨ ᒥᓯᐁᐧᑲᒥᐠ.
ᑎᐱᕑᐢ, ᐁᐧᑎ ᒣᑲᐧᐨ ᑲᒧᓇᐦᐊᓯᓂᐁᐧᐊᐧᐨ ᐊᑎᐊᐧᐱᐢᑲᐠ, ᐅᑭ ᒪᓯᓇᐦᐊᒧᐊᐧᐸᓂᐣ ᑭᒋᓇᒣᑯᓯᑊ ᐃᐧᓂᓂᐊᐧᐠ ᐅᑕᓇᐣᐠ ᐊᐧᑌᐸᑲᐃᐧᐱᓯᑦ ᐁᑭ ᑲᑫᐧᑌᐊᐧᐨ ᐁᐃᐧ ᓇᓇᐣᑕᐊᐧᓯᓂᐁᐧᐊᐧᐨ ᐃᒪ ᑭᐁᐧᑎᓄᐣᐠ ᓀᑫ ᐃᐢᑯᓂᑲᐣ ᑲᐃᔑᔭᐠ. ᐃᒪ ᒪᔭᑦ ᑲᐃᐧ ᐃᔑ ᓇᓇᐣᑕᐊᐧᓯᓂᐁᐧᐊᐧᐨ ᐃᒪ ᐯᔓᐣᐨ ᑭᒋᓇᒣᑯᓯᑊ ᐃᐢᑯᓂᑲᐣ ᑲᐃᔑᔭᐠ ᒥᓇ ᐱᑯ ᐃᒪ ᑫᑲᐟ ᒥᓯᐁᐧ ᑭᒋᓇᒣᑯᓯᑊ ᑲᐃᓂᑯᑯ ᑎᐯᐣᑕᒧᐊᐧᐨ ᑭᒋᓇᒣᑯᓯᑊ ᐃᓂᓂᐊᐧᐠ ᐅᑕᑭᒥᐊᐧ.
“ᑲᐃᐧᐣ ᐃᐧᑲ ᓂᑭ ᒐᑭᐃᐧᐣᑕᓯᐣ ᐊᓂᐣ ᐁᔭᐱᒋ ᐊᓂᒣᐣᑕᑲᐧᐠ ᑲᐊᐧᐸᑕᐣᒧᐊᐧᐨ ᓂᑕᓂᔑᓂᓂᒪᐠ ᐃᒪ ᐁᐃᐧ ᑲᑫᐧ ᒧᓇᐦᐊᓯᓂᐊᐧᓂᐊᓂᐠ ᐅᑕᑭᒪᐊᐧᐣᐠ,” ᒪᐧᕑᐃᐢ ᐃᑭᑐ. “ᑭᒋᓇᒣᑯᓯᑊ ᐃᓂᓂᐊᐧᐠ ᐅᑭ ᑭᐱᑎᓇᐊᐧᐸᓂᐣ ᐱᓫᐊᑎᓂᐠᐢ ᑲᐃᐧ ᒧᓇᐦᐊᓯᓂᐁᐧᐊᐧᐸᐣ ᐅᒪ ᓂᑕᑭᒥᓇᐣ ᐅᓴᑦ ᐅᑕᑭ ᓂᔕᐧᓇᒋᑐᓇᐊᐧᐸᐣ ᓂᓂᐱᒥᓇᐣ ᑲᐅᐣᑕᒋᐦᐅᔭᐣᐠ.”
ᑕᐧᑦ ᐅᕑᑦᐢᐱ, ᑎᐱᕑᐢ ᑲᓂᑲᓂ ᑲᓇᐊᐧᐸᑕᐠ ᑲᑭᓇ ᑫᑯᓇᐣ, ᑭᐃᑭᑐ ᑎᐱᕑᐢ ᐁᑭ ᐱᒥᓇᓇᐣᑎᓇᒧᐊᐧᐨ ᒋᑭ ᐊᓂ ᒪᒋ ᐊᓂᒧᑕᒧᐊᐧᐊᐧᐸᐣ ᑭᒋᓇᒣᑯᓯᑊ ᐃᓂᓂᐊᐧᐠ ᐃᐁᐧ ᐅᐣᒋ ᒋᑭ ᓇᓇᐣᑕᐊᐧᓯᓂᐁᐧᔭᐱᐊᐧᐸᐣ ᐃᒪ ᑌᑎᐸᐦᐃ ᐅᑕᐦᑭᒥᐊᐧ ᑲᐃᔑᔭᓂᐠ.
“ᑌᐯᐧ ᔕ ᓂᓯᑕᐃᐧᓇᑲᐧᐣ, ᓂᒪᒉᐣᑕᒥᐣ ᐁᑲ ᑲᑭᐃᓯᓭᐠ ᒋᑭᐅᓇᑐᔭᐣᐠ ᐊᓂᑭᐃᐧᐣ ᓄᑯᑦ ᑲᐃᓯᓭᐠ, ᔕᑯᐨ ᐊᒥᐱᑯ ᐁᐃᑭᑐᔭᐣᐠ ᐁᑭᑌᐣᑕᒪᐣᐠ ᐃᐁᐧ ᑲᑭ ᐃᔑ ᐅᓀᐣᑕᒧᐊᐧᐨ ᐃᒪ ᐅᑕᔑᑫᐃᐧᓂᐊᐧ,” ᐅᕑᑦᐢᐱ ᑭᐃᑐ. “ᓂᓯᑎᑕᐃᐧᓇᒥᐣ ᐁᒥᔑᓇᑎᑭᐣ ᑫᑯᓇᐣ ᑫᐱᒥᓂᔕᐦᐃᑲᑌᑭᐣ ᒥᓇ ᐅᓇᑯᓂᑫᐃᐧᓀᓴᐣ ᑫᑲᓇᐊᐧᐸᐣᒋᑲᑌᑭᐣ ᐊᓂᐣ ᑫᐃᓇᐸᒋᒋᑲᑌᐠ ᐅᑕᑭᒥᐊᐧ ᐁᑲᐧ ᑕᐢ ᐊᒥᐱᑯ ᑫᐃᔑ ᑭᒋ̇ᓀᐣᑕᒪᐊᐧᔭᐣᐠ ᑲᐃᔑ ᐅᓀᐣᑕᒧᐊᐧᐨ.”
ᐅᕑᑦᐢᐱ ᐃᑭᑐ ᑎᐱᕑᐢ ᐅᓇᐣᑕᐁᐧᐣᑕᓇᐊᐧ ᒋᐱᒥᑲᓇᐁᐧᐣᑕᑲᐧᐠ ᐃᐁᐧ ᐊᔭᒥᐦᐃᑎᐃᐧᐣ ᓂᑲᐣ ᐊᐦᐱ ᒋᑭᐊᓂᔭᑭᐸᑌ.
“ᐊᔕ ᓄᒪᑫ ᐃᓯᓭ ᐁᐱᒥ ᐊᓂᒧᑕᒪᑎᔭᐣᐠ ᑭᒋᓇᒣᑯᓯᑊ ᐃᓂᓂᐊᐧᐠ ᑲᑭᓇ ᑫᑯᓇᐣ, ᐁᑲᐧ ᑕᔥ ᐊᒥ ᐁᐃᓀᐣᑕᒪᐣᐠ ᒋᐱᒥ ᑕᐃᐧᓂᑲᑌᐠ ᐅᐁᐧ ᑲᐱᒥ ᐊᔭᒥᐦᐃᑎᔭᐣᐠ,” ᐅᕑᑦᐢᐱ ᐃᑭᑐ. “ᐊᒥ ᐁᐃᔑ ᑲᓇᐊᐧᐸᐣᑕᒪᐣᐠ ᒋᒥᓂᓭᐠ ᐅᐁᐧ ᑲᑐᑕᒪᐣᐠ ᐊᔭᒥᐦᐃᑎᐃᐧᐣ ᐃᒪ ᒋᑭ ᐅᐣᒋ ᐱᒪᓄᑲᑕᒪᐣᐠ ᓂᑐᓇᒋᑫᐃᐧᓂᓇᐣ ᒥᓯᐁᐧ ᑲᓇᑕ ᐁᐧᑎ ᐊᓂ ᓂᑲᐣ.”
ᑭᒋᓇᒣᑯᓯᑊ ᐃᓂᓂᐊᐧᐠ ᐅᑭ ᓂᐱᑌᐱᐦᐊᓇᐊᐧᐸᐣ ᐅᓇᐣᑕᐁᐧᐣᑕᒧᐃᐧᓂᐊᐧ, ᐁᑭ ᐃᓇᓯᓇᐦᐃᑲᑌᐠ ᐱᓇᒪ ᒋᑲᑫᐧ ᓂᓯᑕᐃᐧᓂᑲᑌᐠ ᒪᐧᔦ ᒧᓇᐦᐊᓯᓂᐁᐧᐃᐧ ᐊᓂᑭᐃᐧᓇᐣ ᒪᒥᑎᓀᐣᑕᑲᐧᑭᐣ. ᐅᑕᓇᐣᐠ ᓂᒥᓂᑯᐃᐧᓂᓇᐣ, ᒪᓂᑐᐃᐧ ᒥᓂᐁᐧᐃᐧᓇᐣ ᓇᐣᑕᐁᐧᐣᑕᑲᐧᓄᐣ ᒋᑭᐢᑌᐣᑕᑲᐧᑭᐣ ᐁᑲᐧ ᒥᓇ ᑲᔦ ᑭᒋᓇᒣᑯᓯᑊ ᐃᓂᓂᐊᐧᐠ ᐊᓂᔑᓂᓂᐃᐧ ᐅᓇᑯᓂᑫᐃᐧᓇᐣ ᒋᐱᒥᓂᔕᐦᐃᑲᑌᑭᐣ; ᑭᒋᓇᒣᑯᓯᑊ ᐃᓂᓂᐊᐧᐠ ᓇᓇᑲᒋᒋᑫᐃᐧᐣ ᔭᐦᐃᓂ ᑲᔦ ᐅᑭ ᑕᑯᓇᓇᐊᐧ ᐃᐧᓂᐊᐧ ᑕᔑᑫᐃᐧᓂᐠ ᑲᔭᐊᐧᐨ ᒋᐅᓇᔓᐊᐧᑕᒧᐊᐧᐨ ᒥᓇ ᒋᐅᓀᐣᑕᒧᐊᐧᐨ ᐊᓂᐣ ᑫᑯᑐᒋᑲᑌᓂᐠ ᐅᑕᑭᒥᐊᐧ ᒥᓇ ᐃᐧᓇᐊᐧ ᒋᑭᒋ ᐅᓀᐣᑕᒧᐊᐧᐨ ᐅᓇᒋᑫᐃᐧᓇᐣ ᐃᒪ ᒪᐢᑲᐃᐧᓯᐃᐧᓂᐠ; ᐁᑲᐧ ᒋᓇᑯᒋᑲᑌᐠ ᒥᓯᐁᐧ ᒋᑲᓇᐁᐧᐣᑕᑲᐧᐠ ᐃᒪ ᑭᒋᓇᒣᑯᓯᑊ ᓴᑲᐦᐃᑲᐣ ᐱᓇᒪ ᒋᐅᓇᒋᑲᑌᐠ ᐅᐁᐧ ᒥᓇ ᒋᐱᒥᓂᔕᐦᐃᑲᑌᐠ.
ᑯᑕᑭᔭᐣ ᐃᓯᓭᐃᐧᓇᐣ ᐃᒪ ᑕᔑᑫᐃᐧᐣ ᑲᐃᐧ ᐊᓂᒧᑕᒧᐊᐧᐨ ᐃᐁᐧ ᐱᐦᒋᐳᐃᐧ ᓇᓇᑲᒋᒋᑫᐃᐧᐣ, PCB ᓇᓇᑲᒋᒋᑫᐃᐧᐣ ᐊᐣᑎ ᑲᐅᐣᒋᓭᐠ, ᑭᓯᓂᑫᐃᐧᐣ ᒥᓇ ᑫᐊᓄᐣᒋ ᑭᐁᐧᒥᓄᔭᒪᑲᐠ ᐊᐦᑭ ᒥᓇ ᐱᒪᑎᓯᐃᐧᐣ; ᐱᓇᒪ ᒋᑲᑫᐧᒋᒪᑲᓄᐊᐧᐨ, ᒪᐊᐧᒋᐦᑎᐃᐧᓇᐣ ᑫᐊᓂᔭᑭᐣ ᐊᐦᑭᐃᐧ ᑫᑯᓇᐣ ᒥᓇ ᑲᔦ ᒥᓯᐁᐧ ᐊᑭᐣᐠ ᐊᓂᔑᓂᓂᐊᐧᐠ ᐅᒪᐢᑲᐃᐧᓯᐃᐧᓂᐊᐧ ᒋᑭᑌᐣᒋᑲᑌᓂᐠ.
“ᐅᒪ ᓂᑕᓂᑭᐃᐧᓂᓇᐣ ᐊᒥᐱᑯ ᑫᐃᔑ ᐱᒥᓭᑭᐣ ᒋᐊᓂᑲᑕᒪᐣᐠ ᑲᒪᓇᒋᒋᑲᑌᐠ ᒥᓯᐁᐧ ᑭᒋᓇᒣᑯᓯᑊ ᐃᓂᓂᐊᐧᐠ ᐅᑕᑭᒥᐊᐧ,” ᑭᐃᑭᑐ ᒉᑲᑊ ᐊᐢᑕᒪᐣ, ᑭᒋᓇᒣᑯᓯᑊ ᐃᓂᓂᐊᐧᐠ ᑲᓂᑲᓂᐢᑲᐠ ᐊᐦᑭᐃᐧ ᓇᓇᑲᒋᒋᑫᐃᐧᓇᐣ. “ᐃᑫᐧᓂᐊᐧᐠ ᑕᔥ ᑲᒪᐃᐧᓀᐢᑲᑯᔭᐠ ᓂᓇᐣᑕᐁᐧᓂᒪᒥᐣ ᒋᑭᐢᑌᐣᑕᒧᐊᐧᐨ ᑲᐃᔑ ᒪᓇᒋᑕᒪᓯᔭᐣᐠ ᓂᑕᑭᒥᓇᐣ ᐁᑲᐧ ᑕᔥ ᑲᔦ ᐃᐁᐧ ᑲᐃᔑ ᓂᐦᔕᐧᓇᒋᒋᑫᐊᐧᐨ ᒋᑭ ᑭᐱᑎᓇᑲᓄᐊᐧᐸᐣ.”
ᑭᒋᓇᒣᑯᓯᑊ ᐃᓂᓂᐊᐧᐠ ᐅᑭ ᑭᐱᑎᓇᓇᐊᐧᐸᓂᐣ ᐅᒧᓇᐦᐊᓯᓂᐁᐧᐣ ᐱᓫᐊᑎᓂᐠᐢ ᐃᒪ ᑲᐃᐧ ᑕᔑᐃᐧᑐᐊᐧᐸᐣ ᐅᑕᑭᒥᐊᐧᐣᐠ ᒣᑲᐧᐨ 2007 ᑲᐊᐦᑭᐊᐧᐠ. ᐁᑲᐧ ᑕᔥ ᐊᒥ ᑲᑭᐃᓯᓭᐠ $100 ᐱᓫᐃᔭᐣ ᐁᑭ ᐃᓇᐣᑭᑕᒧᐊᐧᐨ ᐱᓫᐊᑎᓂᐠᐢ ᑭᒋᓇᒣᑯᓯᑊ ᐃᓂᓂᐊᐧᐠ ᒥᓇ ᒥᑭᓯᐃᐧᐱᓯᑦ 2008 ᑲᐊᐦᑭᐊᐧᐠ ᑲᑭ ᑭᐸᑲᐧᐦᐊᑲᓄᐊᐧᐸᐣ ᒪᐧᕑᐃᐢ, ᐅᑭᒪᑲᓀᐢ ᒐᐠ ᒪᑫ, ᑭᒋᐅᓇᔓᐁᐧᐃᐧᑫᐧ ᓯᓯᓫᐃᔭ ᐯᐠ, ᐅᓇᔓᐁᐧᐃᐧᓂᐊᐧᐠ ᓴᑦ ᒪᑫ ᒥᓇ ᑌᕑᐅ ᓯᓇᐊᐧᑊ ᒥᓇ ᐊᓂᑭᓇᑲᐣ ᐱᕑᐅᐢ ᓴᑲᑭᑊ. ᐅᑫᐧᓂᐊᐧᐠ ᑭᐃᓇᑯᓂᑲᓄᐊᐧᐠ ᐁᑲ ᐁᑭ ᐅᐣᒋ ᐱᒥᓂᔕᐦᐊᒧᐊᐧᐨ ᐅᓇᑯᓂᑫᐃᐧᐣ ᒣᑲᐧᐨ ᐅᐱᒪᐊᒧᐃᐧᐱᓯᑦ 2007 ᑲᑭ ᐃᓇᑯᓂᑲᓂᐊᐧᑭᐸᐣ ᑫᑭᐃᔑ ᐸᑭᑎᓇᑲᓄᐊᐧᐸᐣ ᐱᓫᐊᑎᓂᐠᐢ ᒋᒧᓇᐦᐊᓯᓂᐁᐧᐊᐧᐨ ᐃᒪ ᐯᔓᐣᐨ ᑕᐃᐧᓂᐣᐠ.
ᐃᑫᐧᓂᐊᐧᐠ ᑭᒋᓇᒣᑯᓯᑊ ᐃᓂᓂᐊᐧᐠ 6, ᑭᐸᐧᐦᐊᑲᓇᐠ ᑭᒋᓇᒣᑯᓯᑊ ᐃᓂᓂᐊᐧᐠ ᐅᓂᑲᓀᑕᒪᑫᐠ ᑲᑭᐅᓂᑭ ᑭᑫᐣᑕᑯᓯᐊᐧᐨ, ᑭᐊᓂ ᐸᑭᑎᓇᑲᓄᐊᐧᐠ ᒪᑯᐱᓯᑦ May 2008 ᑲᐃᓇᐣᑭᓯᐨ ᓂᔓᐱᓯᑦ ᑲᑭ ᑭᐸᑲᐧᐦᐊᑲᓄᐊᐧᐸᐣ ᓂᑯᑕᐧᓯᐱᓯᑦ ᑲᑭ ᐃᓇᑕᒧᐊᐧᑲᓄᐊᐧᐸᐣ ᒋᑭᐸᑲᐧᐦᐅᐣᑕᐧ.
ᐅᐣᑌᕑᐃᔪ ᐅᑭᒪᐃᐧᐣ ᐃᐧᓇᐊᐧ ᐅᑭ ᑲᓇᐊᐧᐸᐣᑕᓇᐊᐧ ᐱᓫᐊᑎᓂᐠᐢ ᐅᓇᐣᑐᑕᒪᐃᐧᓂᐊᐧ 2009 ᑲᑭ ᐊᐦᑭᐊᐧᑭᐸᐣ.