ᑭᒋ ᐱᐣᒋᐁᐧᐱᓂᑫᐃᐧᐣ ᑕᐅᓀᐣᑕᑲᐧᐣ ᓄᑯᑦ ᑫᓂᐱᐠ

ᑭᔓᓀᐣᑕᒪᐃᐧᐣ ᐃᐁᐧ 2012 ᑭᒋ ᐱᐣᒋᐁᐧᐱᓂᑫᐃᐧᐣ ᐃᐁᐧ ᐊᓂᔑᓇᐯ ᐊᐢᑭ ᑭᒋ ᐅᑭᒪᑲᐣ ᒥᓇ ᑲᔦ ᓂᐦᓯᐣ ᑭᒋ ᐅᑭᒪᑲᓀᓴᐠ ᑲᐃᐧ ᐱᐣᒋᐁᐧᐱᓇᒪᐃᐧᐣᑕᐧ ᐊᒥᐦᐃ ᐁᐃᔑ ᐅᓇᐦᑌᐠ ᐃᒪ ᑭᐁᐧᐃᐧᐣ ᑭᒋ ᒪᐊᐧᒋᐦᐃᑎᐃᐧᓂᐠ ᒋᑕᔑᑐᒋᑲᑌᐠ ᓄᑯᑦ ᑲᐊᐦᑭᐊᐧᐠ.
“ᑕᓴᐧ ᑲᐸᑭᑎᓇᒪᐣᐠ ᐃᐧᐣᑕᒪᑫᐃᐧᐣ (ᐃᐁᐧ ᐱᐣᒋᐁᐧᐱᓂᑫᐃᐧᐣ ᐅᐣᒋ) ᐊᔕ ᐅᓇᑕᐣᐠ ᐣᑯᑕᐧᓯ ᐊᐦᑭ ᒥᓂᑯᐠ, ᐊᒥᐱᑯ ᐁᐃᔑ ᐱᒪᓄᑲᑕᒪᑭᐣ ᐅᐢᑭ ᐅᓇᒋᑫᐃᐧᓇᐣ ᒋᐱᒥ ᓇᓇᑲᒋᑐᔭᐣᐠ ᐅᑲᑫᐧᑌᐃᐧᓂᐊᐧ ᑕᔑᑫᐃᐧᓇᐣ/ᐅᑭᒪᑲᓇᐠ ᑲᐊᔭᐊᐧᐨ,” ᐃᑭᑐ ᑭᒋ ᐅᑭᒪᑲᐣ ᐢᑕᐣ ᐯᔭᑎ. “ᐅᑭᒪᑲᓇᐠ ᑭᐃᑭᑐᐊᐧᐠ ᐃᒪ ᒪᐊᐧᒋᐦᐃᑎᐃᐧᐣ ᑲᐃᐧᐊᔭᐠ ᐃᒪ ᑭᐁᐧᐃᐧᐣ (ᑭᒋ ᒪᐊᐧᒋᐦᐃᑎᐃᐧᐣ) ᐅᑲᐸᑭᑎᓇᓇᐊᐧ ᐅᑭᔓᓀᐣᑕᒧᐃᐧᓂᐊᐧ.”
ᐃᐁᐧ ᑲᑭ ᐅᓇᑌᑭᐸᐣ ᐅᓇᑯᓂᑫᐃᐧᐣ ᑫᐃᔑ ᐱᒥᓂᔕᐦᐃᑲᑌᐠ ᑭᒋ ᐱᐣᒋᐁᐧᐱᓂᑫᐃᐧᐣ ᓂᐢᑕᑦ ᑭᐅᓇᑌᐸᐣ ᒣᑲᐧᐨ 2003 ᑲᑭᓇ ᐊᓂᔑᓇᐯ ᐊᐢᑭ ᑲᐅᐣᒋ ᑎᐯᐣᑕᑯᓯᐊᐧᐨ ᐊᓂᔑᓂᓂᐊᐧᐠ ᒋᑕᑯᓇᑲᓄᐊᐧᐨ ᑲᐃᔑ ᐅᓀᐣᒋᑲᓂᐊᐧᓂᓂᐠ ᒥᓇ ᑲᔦ ᐃᒪ ᐅᑭᒪᐃᐧᓂᐠ ᑲᐃᔑ ᐅᓇᒋᑲᓂᐊᐣᐠ ᑲᓇᐊᐧᐸᐣᒋᑫᐃᐧᓇᐣ.
“ᒪᐊᐧᐨ ᑭᒋᓀᐣᑕᑲᐧᐣ ᐅᐁᐧ,” ᐯᔭᑎ ᐃᑭᑐ. “ᐁᑲᐧ ᑕᔥ ᐅᐁᐧ ᒪᐊᐧᐨ ᑲᑭᒋ̇ᓀᐣᑕᑲᐧᓂᐠ ᐁᓂᓯᑕᐃᐧᓇᒧᐊᐧᐨ ᐅᑭᒪᑲᓇᐠ ᐅᑕᓂᔑᓂᓂᒧᐊᐧᐣ ᑫᐃᐧᓇᐊᐧ ᒋᐃᐧᒋᑕᐧᓂᐣᐨ ᐅᐁᐧ ᓄᑯᑦ ᑲᐊᓂᓯᓭᑭᐣ ᑫᑯᓇᐣ ᑭᓇᐃᐧᐣᐟ ᐅᒪ ᐊᓂᔑᓇᐯ ᐊᐢᑭ ᑲᐅᐣᒋ ᑎᐯᐣᑕᑯᓯᔭᐠ.”
ᐃᐁᐧ ᑭᒋ ᐱᐣᒋᐁᐧᐱᓂᑫᐃᐧᐣ ᑲᑭᓇ ᐊᓂᔑᓇᐯ ᐊᐢᑭ ᑲᐅᐤᒋ ᑎᐯᐣᑕᑯᓯᐊᐧᐨ 18 ᑲᑕᓱᐱᐳᓀᐊᐧᐨ ᒥᓇ ᐃᐢᐱᒥᐣᐠ ᐅᑲᑭ ᐱᐣᒋᐁᐧᐱᓇᒪᐊᐧᐊᐧᐣ ᑭᒋ ᐅᑭᒪᑲᐣ ᒥᓇ ᑭᒋ ᐅᑭᒪᑲᓇᓀᓴᐣ. ᐁᑲᐧ ᑕᔥ ᐃᒪ ᑫᐃᔑ ᓂᐱᑌᐱᐦᐃᑲᓱᐊᐧᐨ ᑫᑭ ᐱᐣᒋᐁᐧᐱᓂᑫᐊᐧᐨ ᐃᒪ ᑕᐃᔑ ᒪᓯᓇᐦᐃᑲᓱᐊᐧᐠ ᑲᑭ ᐃᔑ ᐅᓇᑐᐊᐧᐸᐣ ᐊᓂᔑᓇᐯ ᐊᐢᑭ ᐅᑭᒪᑲᓇᐠ ᐃᒪ ᓂᐢᑕᑦ ᐊᐦᑭᐃᐧᓂᓂᐊᐧᐠ ᑲᐃᔑᓂᑲᑌᐠ, ᑲᑭ ᐅᐣᒋ ᒪᒋᓭᑭᐸᐣ ᐅᐁᐧ ᐊᓂᔑᓇᐯ ᐊᐢᑭ ᒪᓯᓇᐦᐃᑲᐣ. ᑲᑭᓇ ᐃᐢᑯᓂᑲᓇᐣ ᑕᓇᐣᑕᐁᐧᐣᑕᑯᓯᐊᐧᐠ ᒋᐸᑭᑎᓇᒧᐊᐧᐨ ᒋᓂᐱᑌᐱᐦᐃᑲᓱᐊᐧᐨ ᑲᐃᐧ ᐱᐣᒋᐁᐧᐱᓂᑫᐊᐧᐨ, ᑲᑭ ᐃᔑ ᐅᓇᑐᐊᐧᐸᐣ ᐊᓂᔑᓇᐯ ᐊᐢᑭ ᐅᑭᒪᑲᓇᐠ.
ᐯᔭᑎ ᐃᑭᑐ ᐯᔑᐠ ᑫᑯᐣ ᑲᒪᒥᑎᓀᐣᑕᑲᐧᐠ ᐃᐁᐧ ᒣᑎᓂᑫᐃᐧᐣ ᑲᐃᐧ ᑭᒋᔑᑲᑌᐠ ᑭᒋ ᐱᐣᒋᐁᐧᐱᓂᑲᓂᐊᐧᐠ.
“ᐃᐁᐧ ᐣᑎᔑ ᑲᓇᐊᐧᐸᐣᑕᒥᐣ ᐅᐢᑭ ᐊᐸᒋᑕᑲᓇᐣ, ᐊᓂᐣ ᓇᐊᐧᐨ ᐸᐣᑭ ᑫᑭ ᐃᔑ ᒣᑎᓂᑲᓂᐊᐧᑭᐸᐣ ᐊᓂᐣ ᑕᔥ ᑫᑭᑐᒋᑲᑌᑭᐸᐣ,” ᐯᔭᑎ ᐃᑭᑐ. “ᐃᑫᐧᓂᐊᐧᐠ (ᐅᑭᒪᑲᓇᐠ) ᐅᐃᐧ ᐅᓇᑐᓇᐊᐧ ᑫᑭ ᐊᐸᒋᒋᑲᑌᑭᐸᐣ ᑲᐯᐦᐃ ᑫᑭ ᐊᐸᑕᑭᐸᐣ ᐊᐱ ᑭᑭᔓᓀᐣᑕᒧᐊᐧᐨ. ᐱᒋᓇᐠ ᑕᔥ ᐅᐁᐧ ᑕᓂᐃᓯᓭ.
ᐅᑕᓂᔑᓂᓂᒥᐊᐧᐣ ᐅᓇᐣᑕᐁᐧᓂᒪᐊᐧᐣ ᒋᐃᐧᑐᑲᑯᐊᐧᐨ ᐅᒪ ᐊᓂᔑᓇᐯ ᐊᐢᑭ ᑲᐅᐣᒋ ᑎᐯᐣᑕᑯᓯᐊᐧᐨ.”
ᑯᑕᐠ ᑫᑯᐣ ᑲᒪᒥᑎᓀᐣᑕᒥᐦᐃᐁᐧᒪᑲᐠ ᐊᐦᐃ ᑲᐊᑲᓯᐣᑭᐣ ᐃᐢᑯᓂᑲᓇᐣ ᐯᔑᐠ ᐁᐦᑕ ᐃᒪ ᑲᐸᑭᑎᓇᑲᓄᐨ ᒋᐅᐣᒋ ᐱᐣᒋᐁᐧᐱᓂᑫᐨ ᐊᓂᔑᓇᐯ ᐊᐢᑭ ᑲᐅᐣᒋ ᑎᐯᐣᑕᑯᓯᐨ ᑲᑭ ᐅᓇᑌᑭᐸᐣ. ᐁᑲᐧ ᐃᐧᓂᑯ ᒣᑲᐧᐨ ᐱᐣᒋᐁᐧᐱᓂᑫᐃᐧᐣ ᑲᐃᓇᑌᐠ ᑲᑭᓇ ᑲᑕᓱ ᐸᐯᔑᑲᐧᑭᐣ ᑕᔑᑫᐃᐧᓇᐣ ᐃᔑᑲᓇᐊᐧᐸᐣᒋᑲᑌᐊᐧᐣ ᒥᓴᐊᐧᐨ ᑭᒋᒥᑕᓱᒥᑕᓇ ᐊᓂᔑᓂᓂᐊᐧᐠ ᐃᒪ ᑲᐅᐣᒋᑎᐯᐣᑕᑯᓯᐊᐧᐨ ᐁᑕᔑᐊᐧᐨ ᒥᓇ ᑲᔦ ᑯᑕᑭᔭᐠ ᓄᐣᑕ ᒥᑕᓱᒥᑕᓇ ᐁᐦᑕᔑᐊᐧᐨ.
“ᒥᐃᐧᓂᑯ ᑫᑲᐟ ᓇᔑᓀ ᐁᐃᓯᓭᐠ ᐃᐁᐧᓂᐊᐧᐣ ᑲᐊᑲᓯᑭᐣ ᑕᔑᑫᐃᐧᓇᐣ ᓇᐊᐧᐨ ᒥᐢᑕᐦᐃ ᐃᐧᒋᐦᐃᐁᐧᐃᐧᐣ ᐁᓇᐣᑕᐁᐧᐣᑕᒧᐊᐧᐨ,” ᐯᔭᑎ ᐃᑭᑐ. “ᑭᐢᐱᐣ ᐁᑲ ᑫᑯᐣ ᐃᔑᓂᑲᑕᒧᐊᐧᐨ ᐅᐁᐧ ᑲᐃᐧ ᐅᐢᑭ ᐅᓇᒋᑲᑌᓂᐠ, ᒥᔕᐱᑯ ᐁᐃᔑᓇᑲᐧᐠ ᑭᓇᐃᐧᐣᐟ ᒋᐅᓇᑐᔭᐠ ᐊᓂᐣ ᑫᑭᐃᔑ ᐃᐧᒋᑐᔭᑭᐸᓂᐣ ᐃᑫᐧᓂᐊᐧᐣ ᐃᐢᑯᓂᑲᓀᓴᐣ ᑫᐃᐧᓇᐊᐧ ᒋᓄᐣᒋᑲᑌᓂᐠ ᐅᓇᐣᑕᐁᐧᐣᑕᒧᐃᐧᓂᐊᐧ ᑕᐱᓇᑲ ᑲᑭᓇ ᒪᒪᐤ ᑭᑐᐣᒋ ᑎᐯᐣᑕᑯᓯᒥᐣ. ᑲᑭᓇ ᑕᐱᑕ ᒪᐢᑲᐃᐧᓯᐃᐧᓇᐣ ᑭᑕᔭᒥᓇᐣ ᐃᒪ ᑲᓇᑕ ᑭᒋ ᐅᓇᑯᓂᑫᐃᐧᓂᐠ. ᑭᑕᔭᒥᐣ ᐊᓂᔑᓇᐯᐃᐧ ᒪᐢᑲᐃᐧᓯᐃᐧᓇᐣ ᐁᑲᐧ ᑕᔥ ᐃᐁᐧ ᒪᐢᑲᐃᐧᓯᐃᐧᐣ ᑲᑭᒋᐃᐧᓇᒪᐣᐠ ᒥᔕᐦᐃᐁᐧ ᑲᐅᐣᒋ ᑭᑭᓇᐊᐧᒋᐦᐅᐊᐧᑫᔭᐣᐠ ᑲᐊᓂᔑᓇᐯᐃᐧᔭᐣᐠ. ᒥᑕᔥ ᐁᐃᔑᓇᑲᐧᐠ ᒋᓇᓇᐣᑐᓇᒪᐠ ᑫᓇᐦᐃᓇᑲᐧᐠ, ᐊᓂᓂᑯ ᑫᐊᑯᓭᑭᐣ ᑫᑯᓇᐣ, ᑕᐱᑕ ᒥᓇ ᒥᓄᑲᓇᐊᐧᐸᒥᑎᐃᐧᓂᐠ.”
ᑲᐧᐣᐢᑕᐣᐢ ᕑᐁᐠ ᐅᑭᒪᑲᐣ ᐊᕑᑎᕑ ᒧᕑ ᐅᒪᒥᑎᓀᐣᑕᒧᐦᐃᑯᓇᐣ ᐃᑫᐧᓂᐊᐧᐣ ᑲᐃᐧ ᐊᓂ ᐊᐣᑕᒋᑲᑌᑭᐣ ᑭᒋ ᐱᐣᒋᐁᐧᐱᓂᑫᐃᐧᐣ ᐅᐣᒋ.
“ᑲᐃᐧᐣ ᑕᐱᑕ ᒋᐃᔑ ᑲᓇᐊᐧᐸᒪᑲᓄᐨ ᐊᐃᔭᐧ ᑲᐅᓂᓇᑲᓄᐨ ᐊᐃᐧᔭ ᓂᑎᓀᐣᑕᐣ,” ᒧᕑ ᐃᑭᑐ, “ᐃᐁᐧ ᐃᐧᓂᑯ ᐁᐃᔑ ᑲᓇᐊᐧᐸᐣᒋᑲᑌᐠ ᑲᐊᔭᐱᑕᔑᓇᓂᐊᐧᐠ ᑕᔑᑫᐃᐧᓇᐣ ᐅᒪ ᐊᓂᔑᓇᐯ ᐊᐢᑭ ᑎᐯᐣᒋᑫᐃᐧᓂᐠ. ᐊᑎᐟ ᑕᔑᑫᐃᐧᓇᐣ ᒪᐊᐧᐨ ᒥᔑᓂᐊᐧᐠ ᐊᒥᑕᔥ ᐁᐃᔑᓇᑲᐧᐠ ᒋᐅᐣᒋ ᒪᒋᓭᐠ ᐅᓀᓀᑫᐃᐧᐣ, ᐁᑲᐧ ᑕᔥ ᓂᒪᒥᑎᓀᐣᑕᒥᐦᐃᑯᐣ ᐁᑲ ᑲᐧᔭᐠ ᒋᑭ ᐅᓀᓀᑲᓂᐊᐧᐠ.”
ᐯᔭᑎ ᑭᐃᑭᑐᐸᐣ ᒥᓇᐊᐧ ᑲᑭ ᐊᐦᑭᐊᐧᑭᐸᐣ ᐃᒪ ᑭᐁᐧᐃᐧᐣ ᑭᒋ ᒪᐊᐧᒋᐦᐃᑎᐃᐧᓂᐠ ᐃᑫᐧᓂᐊᐧᐠ ᐅᐢᑲᑎᓴᐠ ᐁᓇᓇᐱ ᑲᑫᐧᒋᒥᑯᐨ ᐊᓇᐦᐱ, ᐃᐧᓇᐊᐧ ᑲᐅᐢᑲᑎᓯᐊᐧᐨ, ᑫᑭ ᐃᐧᒋᑕᐧᐊᐧᐸᐣ ᑲᐃᔑ ᐅᓂᓂᑲᓂᐊᐧᓂᐠ ᐃᒪ ᐊᓂᔑᓇᐯ ᐊᐢᑭ ᓂᑲᓂᑕᒪᑫᐃᐧᓂᐣᐠ.
“ᐃᐁᐧ ᑕᔥ ᑲᐅᐣᒋ ᑐᑕᒪᐣᐠ, ᑲᐱᑲᑭᐁᐧ ᓇᓇᓯᑲᑯᔦᐠ ᐁᓇᓇᐣᑕᐁᐧᐣᑕᒪᐣᐠ ᐊᓂᐣ ᑫᑭ ᐃᔑ ᒪᑕᓄᑲᑌᑭᐸᐣ ᒋᑭ ᑕᑯᓇᑲᓄᐊᐧᐸᐣ ᑲᑭᓇ ᑭᑕᓂᔑᓂᓂᒥᓇᐣ ᐃᒪ ᓂᑲᓂᑕᒪᑫᐃᐧᐣ ᑲᐅᓀᓂᒪᑲᓄᐨ ᒥᓇ ᑲᔦ ᒋᐊᔭᔭᐠ ᐅᓀᐣᑕᒪᐃᐧᐣ ᑫᑯ ᐅᑭᒪᐃᐧᐣ ᑫᑭ ᐅᔑᑕᒪᓯᔭᑭᐸᐣ ᐃᔑᓂ̇ᑲᐣ,” ᐯᔭᑎ ᑭᐃᑭᑐ ᒥᓇᐊᐧ ᑲᑭᐊᐦᑭᐊᐧᐠ ᓴᑭᐸᑲᐃᐧᐱᓯᑦ ᒣᑲᐧᐨ 29th ᑲᐃᓇᑭᓯᐨ ᐁᐧᑎ ᑭᐁᐧᐃᐧᐣ ᑭᒋ ᒪᐊᐧᒋᐦᐃᑎᐃᐧᐣ.
ᐅᐁᐧ ᑫᑐᒋᑲᑌᐠ ᓇᐣᑕᐁᐧᐣᑕᑲᐧᐣ ᑲᐧᔭᐠ ᒋᐃᔑ ᑲᓇᐊᐧᐸᐣᒋᑲᑌᐠ
ᑲᓴᒋᐊᐧᐣ ᐅᑭᒪᑲᐣ ᒐᐧᓇᑕᐣ ᓴᐧᓫᐊᒪᐣ ᑭᐃᑭᑐ ᐃᑫᐧᓂᐊᐧᐠ ᐅᑭᒪᑲᐠ ᑲᐸᐱᑭᔑᓄᐊᐧᐨ ᐃᒪ ᑲᐅᐣᒋᐨ ᐅᓇᓇᐣᑎᓇᐊᐧᐊᐧᐣ ᐅᐢᑲᑎᓯᐃᐧ ᑭᒋ ᐅᑭᒪᑲᓀᐢ ᒋᐅᐣᒋ ᐃᐧᑕᓄᑭᒪᒋᐣ ᐅᐢᑲᑎᓯᐃᐧ ᐅᓇᔓᐁᐧᐃᐧᓂᐊᐧᐣ ᐅᒪ ᑲᑭᓇ ᑕᔑᑫᐃᐧᓇᐣ ᑲᔭᑭᐣ.
“ᑫᐃᐧᓇᐊᐧ ᔕ ᐅᑕᔭᓇᐊᐧ ᑫᑭ ᐃᑭᑐᐊᐧᐸᐣ ᐁᑲᐧ ᑕᔥ ᑲᔦ ᓇᐊᐧᐨ ᐅᑭᑫᐣᑕᓇᐊᐧ ᐊᓂᐣ ᑫᐃᔑᓂᑲᑕᒧᐊᐧᐸᐣ ᐅᐢᑲᑎᓯᐃᐧ ᐃᓯᓭᐃᐧᓇᐣ ᐃᒪ ᐅᑭᒪᑲᓇᐠ ᑲᐃᔑ ᒪᐊᐧᒋᐦᐃᑎᐊᐧᐨ,” ᓴᐧᓫᐊᒪᐣ ᐃᑭᑐ. “ᐅᒪ ᑭᑕᑭᓇᐣ, ᐊᓂᔑᓇᐯ ᐊᐢᑭ ᑲᐃᔑᒥᓯᐁᐧᔭᐠ, ᐊᔕ ᐃᔑᓇᑲᐧᓂ ᒋᑭ ᒪᒥᑎᓀᐣᑕᒧᐊᐧᐸᐣ ᐃᐁᐧᓂ ᑐᑲᐣ ᑕᐱᓇᑲ ᑭᑕᔭᐊᐧᒥᐣ ᑭᒋ ᐊᓂᔑᓂᓂᒥᓇᐣ ᐁᐧᑎ ᐸᐣᑭᔑᒧᓂᐠ ᒉᒥᐢ ᐯ ᓀᑫ, ᐊᐧᐸᓄᐣᐠ ᓀᑫ ᑲᔭᐊᐧᐨ ᐅᒪᐢᑭᑯᐠ, ᐊᔕ ᑲᐊᔭᐊᐧᐊᐧᐨ ᐅᐢᑲᑎᓯᐃᐧ ᑭᒋ ᐅᑭᒪᑲᓇᐣ. ᐊᒥ ᑐᑲᐣ ᐁᐃᓇᐣᒋᓱᐊᐧᐨ ᑲᐊᔭᒥᑕᒪᐊᐧᐊᐧᐨ ᐅᐢᑲᑎᓴᐣ.”
ᓴᐧᓫᐊᒪᐣ ᒣᑲᐧᐨ ᐅᓇᓇᐣᑎᓇᐣ ᑭᔑᒋᑫᐃᐧᐣ ᐅᐁᐧ ᑲᐊᑭᐊᐧᐠ ᐊᓂᐣ ᑫᐃᔑ ᒥᓄᓭᐠ ᐱᐣᒋᐁᐧᐱᓂᑫᐃᐧᐣ ᐃᐁᐧ ᐯᔑᐠ ᐊᓂᔑᓂᓂ ᐃᒪ ᐊᓂᔑᓇᐯ ᐊᐢᑭ ᑲᐅᐣᒋ ᑎᐯᐣᑕᑯᓯᐨ ᒋᐱᐣᒋᐁᐧᐱᓂᑫᐨ ᑲᐃᑭᑎᓇᓂᐊᐧᐠ ᑫᐃᓯᓭᑫᐧᐣ, ᐁᑭ ᐃᐧᐣᑕᐠ ᐁᑭ ᐊᓂᒧᑕᑭᐸᐣ ᐅᐁᐧ ᐅᐣᒋ ᐃᒪ 2010 ᐅᑭᒪᑲᓇᐠ ᐱᐳᓂ ᒪᐊᐧᒋᐦᐃᑎᐃᐧᐣ.
“ᑲᐃᐧᐣ ᒪᑌ ᐃᐧᑲ ᒋᐊᐧᐸᐣᑕᒪᐣ ᐊᓂᐣ ᐁᐃᔑ ᐊᓂᑲᑌᑫᐧᐣ ᐅᐁᐧ ᑲᐃᐧᑐᒋᑲᑌᐠ,” ᓴᐧᓫᐊᒪᐣ ᐃᑭᑐ. “ᒪᐊᐧᐨ ᓂᐃᐧᑭᑫᐣᑕᐣ ᐊᓂᐣ ᑫᐃᔑᓂᑲᑕᒧᐊᐧᑫᐧᐣ ᐃᒪ ᐅᐱᐳᓂ ᒪᐊᐧᒋᐦᐃᑎᐃᐧᓂᐊᐧ ᐃᒪ ᑎᒥᐣᐢ (ᐅᑭᒪᑲᓇᐠ).”
ᓴᐧᓫᐊᒪᐣ ᐃᑭᑐ ᐅᑭᒪᑲᓇᐠ ᐅᓇᐣᑕᐁᐧᐣᑕᓇᐊᐧ ᒋᐃᐧᐣᑕᒪᐊᐧᑲᓄᐊᐧᐨ ᒋᐅᐣᒋ ᑭᑫᐣᑕᒧᐊᐧᐨ ᐊᓂᐣ ᑭᐃᔑᓂᑲᑕᒧᐊᐧᐨ ᐊᐱ ᐃᒪ ᑭᒋ ᒪᐊᐧᒋᐦᐃᑎᓇᓂᐊᐧᐠ ᑭᐁᐧᐃᐧᐣ.
“ᐊᓂᐯᔑᓇᑲᐧᐠ 2011, ᐊᔕ ᑭᓇᐣᑕᐁᐧᐣᑕᑯᓯᒥᐣ ᒋᑭᑭᔓᓀᐣᑕᒪᑭᐸᐣ ᑭᓇᐃᐧᐣᐟ ᐅᓂᑭᓂᑕᒪᑫᐠ ᑲᐃᓇᐣᑭᓯᔭᐠ ᐊᓂᐣ ᑲᐃᐧ ᐃᔑ ᒪᑕᓄᑲᑕᒪᐠ ᐃᐁᐧ,” ᓴᐧᓫᐊᒪᐣ ᐃᑭᑐ. “ᐯᔑᐠ ᐅᓇᒋᑫᐃᐧᐣ ᑲᑭ ᐅᓇᒋᑲᑌᑭᐸᐣ ᐃᐁᐧ ᒋᑭ ᓇᓇᐣᑕᐊᐧᐸᐣᒋᑲᑌᑭᐸᐣ ᐊᓂᐣ ᑫᑭ ᐃᔑ ᐃᐧᒋᐦᐃᑯᐊᐧᐸᐣ ᑲᑭᓇ ᐊᐃᐧᔭᐠ, ᐁᑲ ᐃᐧᓂᑯ ᐃᒪ... ᒋᐅᐣᒋ ᑭᒋ ᑲᑲᓄᓂᑎᓇᓂᐊᐧᐣᐠ ᑲᐊᐱᑕᔑᓇᓂᐊᐧᐣᐠ ᐅᐣᒋ ᒥᓇ ᑯᑕᑭᔭᐣ ᑫᑯᓇᐣ. ᐊᑎ ᑲᑲᑫᐧ ᑲᐧᔭᐣᒋᒥᐣ ᐊᓂᐣ ᑫᑭ ᐃᔑ ᐃᐧᒋᐦᐃᑯᐊᐧᐸᐣ ᑲᑭᓇ ᐊᐃᐧᔭ ᑲᑭᓇ ᒋᑭ ᐅᐣᒋ ᒥᓄᓂᐸᔭᑭᐸᐣ ᒋᑭᑫᐣᑕᒪᐣ ᐁᑭ ᒪᒪᐃᐧ ᐊᓂᑲᑕᒪᐣᐠ ᑭᓇᐃᐧᐣᐟ ᐊᓂᔑᓇᐯ ᐊᐢᑭ ᑲᐅᐣᒋ ᑎᐯᐣᑕᑯᓯᔭᐠ ᐊᓂᐣ ᑫᐃᔑ ᒪᒋᑕᔭᐠ.”
ᐃᒪ ᐅᐣᒋ ᑭᒋ ᐱᐣᒋᐁᐧᐱᓂᑫᐃᐧᐣ ᑲᐃᔑ ᑲᓇᐊᐧᐸᐣᒋᑲᑌᐠ, ᐯᔭᑎ ᐃᑭᑐ ᐅᑭᒪᑲᓇᐠ ᑲᐃᔑᓇᑲᓇᐊᐧᐸᒥᑯᐊᐧᐨ “ᒪᐊᐧᐨ ᑕᑭᒋ̇ᓀᐣᑕᑲᐧᓂ” ᐃᒪ ᒋᐅᐣᒋ ᑭᑭᓇᐊᐧᑐᐢᑲᐊᐧᐊᐧᐨ ᑭᒋ ᐅᑭᒪᑲᓇᐣ ᒥᓇ ᑭᒋ ᐅᑭᒪᑲᓀᓴᐣ.
“ᐯᔑᐠ ᐃᑫᐧᓂᐊᐧᐣ ᑲᑫᐧᑌᐃᐧᐣ ᑲᓇᓇᐣᑎᓇᒧᐊᐧᐨ ᐃᐁᐧ ᑲᐃᓇᑌᐠ ᐅᑭᒪᐃᐧᐣ ᒥᓇ ᐊᐊᐧᓀᐣ ᑫᐅᓇᑐᐨ ᐅᓇᔓᐁᐧᐃᐧᓂ,” ᐯᔭᑎ ᐃᑭᑐ. “ᒥᐃᐧᓂᑯ ᐁᐃᓀᐣᑕᑲᐧᐠ, ᐃᒪ ᑲᑎᐯᓂᒥᑎᓱᒪᑲᐠ ᐅᑭᒪᐃᐧᓂᐠ ᑲᐃᔑᔭᓂᐊᐧᐠ, ᐃᑫᐧᓂᐊᐧᐠ ᓂᐦᑕᑦ ᐊᓂᔑᓂᓂᐊᐧᐠ ᑲᑭᐱᔭᐊᐧᐨ ᐃᐧᓇᐊᐧ ᐅᑕᓂ ᐱᒥ ᑭᑭᓄᐢᑲᐊᐧᐊᐧᐣ ᐅᓂᑲᓂᑕᒪᑫᐃᐧᓂᓂᒥᐊᐧᐣ ᐃᑫᐧᓂᐊᐧᐣ ᑲᑭᒋᓀᐣᑕᑲᐧᓂᑭᐣ ᑫᑯᓇᐣ.
ᑕᑭᐃᔑᓇᑲᐧᐣ ᔕ ᒋᑭ ᐱᓇᑲᓄᐊᐧᐸᐣ 50,000 ᐊᓂᔑᓇᐯ ᐊᐢᑭ ᑲᐅᐣᒋ ᑎᐯᐣᑕᑯᓯᐊᐧᐨ ᐊᓂᔑᓂᓂᐊᐧᐠ ᐯᔑᑲᐧᔦᐠ ᒋᐅᐣᒋ ᑭᑭᓄᐢᑲᐊᐧᑲᓄᐊᐧᐨ. ᐃᒪ ᑕᔥ ᐁᐅᐣᒋ ᐅᓀᐣᑕᑲᐧᑭᐣ ᑲᐊᐱᑌᐣᑕᑲᐧᑭᐣ ᑫᑯᓇᐣ ᒥᓇ ᑲᐊᓂ ᐊᔭᐱᒋᐢᑲᒪᑲᑭᐣ, ᐅᑭᒪᑲᓇᐠ ᐃᐧᓇᐊᐧ ᐅᑲᓂ ᑭᔑᓂᑲᑕᓇᐊᐧ ᑫᑯᓀᓂ ᒪᔭᑦ ᑫᐅᑕᐱᓂᑲᑌᓂᐠ ᐅᓇᒋᑫᐃᐧᓂ.”