ᐊᔕ ᒥᓇᐊᐧ ᐅᓇᑭᐡᑲᓇᐊᐧ ᐅᑕᓇᐠ ᑲᑭᐱᐃᓯᓭᐊᐧᐨ

ᐊᔕ ᒥᓇᐊᐧ ᐅᐱᑲᑫᐧ ᒪᐃᐧᓀᐡᑲᑯᐊᐧᐣ ᑯᑕᑭᔭᐣ ᐸᑲᐣ ᐅᓇᓇᑕᐊᐧᓯᓂᐁᐧᐣ ᐃᒪ ᑭᒋᓇᒣᑯᓯᐱᐠ ᐊᐦᑭᐠ. ᐅᑯᐁᐧᓂᐊᐧᐠ ᒪᐣᑐ ᓴᑲᐦᐃᑲᐣ ᐅᓇᓇᑕᐊᐧᓯᓂᐁᐧᐠ ᑲᐃᓂᑕᐧ ᑭᐃᑭᑐᐊᐧᐠ ᐁᑲ ᒋᐅᒋᓇᑲᐡᑲᑯᐊᐧᐨ ᑲᑭᐱᒪᓯᓇᐦᐊᒪᑯᐊᐧᐨ ᑭᒋᓇᒣᑯᓯᐱᐃᐧᓂᓂᐊᐧᐠ ᔐᒪᐠ ᒋᓂᑲᑌᐡᑲᐊᐧᐨ ᐃᒪ ᑲᑭᐱᔑᑕᑯᔑᓄᐊᐧᐨ, ᐁᑲᐧ ᑫᐃᐧᓇᐊᐧ ᑭᒋᓇᒣᑯᓯᐱᐃᐧ ᓂᑲᓂᑕᒪᑫᐠ ᑭᐃᑭᑐᐊᐧᐠ ᐁᑲ ᒋᐅᐣᒋᐳᓂᒋᑫᐊᐧᐨ.
ᐅᑯᐁᐧᓂᐊᐧᐠ ᐅᓇᓇᑕᐊᐧᓯᓂᐁᐧᐠ ᑭᐃᐧᐣᑕᒪᐊᐧᑲᓄᐊᐧᐠ ᒥᓇ ᑭᒥᓇᑲᓄᐊᐧᐠ ᐅᑐᔑᐱᐦᐊᒪᑯᐃᐧᓂᐊᐧ ᒋᓂᑲᑌᐡᑲᐊᐧᐨ ᒣᑲᐧᐨ ᐊᐧᑌᑲᐸᐃᐧᐱᓯᑦ 29 ᐊᐱ ᑭᒋᓇᒣᑯᓯᐱᐃᐧᓂᓂᐊᐧᐠ ᐁᓇᓇᑕᐁᐧᐣᒋᑫᐊᐧᐸᐣ ᐁᑭᐅᐣᒋᒥᑯᐡᑲᐊᐧᐊᐧᐨ ᐁᑭᑲᐯᔑᐃᐧᓂᑫᐊᐧᐨ ᑭᐁᐧᑎᓄᐠ ᐃᓀᑫ ᔑᕑᒪᐣ ᓴᑲᐦᐃᑲᓂᐠ.
ᒥᑕᐡ ᑲᑭᐃᔑ ᓇᑫᐧᐁᐧᔑᑐᐊᐧᐨ ᐅᒪᓯᓇᐦᐊᒪᑯᐃᐧᓂᐊᐧ ᐅᓇᓇᑕᐊᐧᓯᓂᐁᐧᐠ ᑭᒋᓇᒣᑯᓯᑊ ᐁᔭᐸᒋᑐᐨ ᐊᔭᒥᐦᐊᐃᐧᓂ, ᒪᐡᑲᐃᐧᑕᑯᓯᐃᐧᐣ ᒥᓇ ᐅᑭᒪᐃᐧ ᐱᒧᒋᑫᐃᐧᓂ ᐁᐃᐧᐅᐣᒋ ᑲᑫᐧᐊᓂᒥᐦᐊᐨ ᑲᐱᓇᓇᑕᐊᐧᓯᓂᐁᐧᐊᐧᐨ. ᐊᐧᐁᐧ ᑕᐡ ᒪᐣᑐ ᓴᑲᐦᐃᑲᐣ ᐅᓇᓇᑕᐊᐧᓯᓂᐁᐧᐠ ᑲᐅᑭᒪᐅᐨ ᐁᐟᐊᐧᕑᐟ ᓫᐊᐟᐃᐧᐠ ᑭᐃᑭᑐ ᐁᑲ ᒋᐅᑕᐱᓇᒧᐊᐧᐨ ᑲᑭᐃᑯᐊᐧᐨ ᑭᒋᓇᒣᑯᓯᐱᐃᐧᓂᓂᐊᐧᐣ ᒥᓇ ᒥᐱᑯ ᑫᐃᔑᒪᑕᓄᑲᑕᒧᐊᐧᐨ ᐅᓇᓇᑕᐊᐧᓯᓂᐁᐧᐃᐧᓂᐊᐧ ᐊᓂᐱᐳᓂᐠ.
ᐁᑲᐧ ᐅᑯ ᑭᒋᓇᒣᑯᓯᐱᐃᐧᓂᓂᐊᐧᐠ ᒥᐱᑯ ᐊᐱᐣ ᒥᓇᐊᐧ ᐁᑭᐁᐧᓇᑭᐡᑲᒧᐊᐧᐨ, ᒪᐡᑯᐨ ᒥᓇᐊᐧ ᒋᑭᐁᐧᓭᐊᐧᐨ ᑲᑭ ᑭᐸᐦᐅᐣᑕᐧᐸᐣ ᐅᑭᒪᑲᐣ ᑕᐧᓂ ᒪᐧᕑᐃᐢ ᐁᑲᐧ ᐊᔑᐨ ᓂᔭᓇᐣ ᐅᑐᓇᔓᐁᐧᐃᐧᓂᓂᒪᐣ ᒣᑲᐧᐨ 2008 ᑲᔭᑭᐊᐧᐠ. ᐅᑯᐁᐧᓂᐊᐧᐠ ᑲᑭ ᑭᐸᐦᐅᐣᑕᐧᐸᐣ ᑭᐃᔑᓂᑲᓇᐊᐧᐠ ᑫᐊᔾ 6, ᑲᐃᐧᐣ ᐅᑐᐣᒋ ᐱᒥᓂᔕᐦᐊᓇᐊᐧᐸᐣ ᐅᑐᓇᔓᐊᐧᓂᑯᐃᐧᓂᐊᐧᐠ ᒋᐸᑭᑎᓇᐊᐧᐨ ᐅᓇᓇᑕᐊᐧᓯᓂᐁᐧᐣ ᒋᐱᐸᑯᓀᐦᐃᑫᐊᐧᐨ ᐅᑕᑭᒥᐊᐧᐠ.
“ᒥᐱᑯ ᒥᓇᐊᐧ ᐁᑭᐁᐧᓭᔭᐠ ᑲᑭᐱᐃᔑ ᓇᑭᐡᑲᒪᑭᐸᐣ ᑯᑕᑭᔭᐠ ᐅᓄᑕᓯᓂᐁᐧᐠ ᑲᑭᑲᑫᐧ ᓇᑲᐡᑲᐊᐧᑭᑕᐧ,” ᑭᐃᑭᑐ ᑭᒋᓇᒣᑯᓯᑊ ᑲᐅᒋᓂᑲᓂᐊᔭᒥᑕᒪᑫᐨ ᒐᐧᐣ ᑲᐟᐱᐟ.
ᐃᒪ ᐅᒋ ᐸᑭᑭᓂᑲᓂᐠ 1
ᐊᐱ ᒪᐧᕑᐃᐢ ᒥᓇ ᑯᑕᑭᔭᐠ ᑲᐃᐡᑲᐧ ᓴᑭᒋᐦᐃᐣᑕᐧ ᐅᑭᐸᐦᐅᑯᐃᐧᓂᐊᐧ ᒣᑲᐧᐨ ᒪᑯᐱᓯᑦ 2008 ᑲᑭᐃᐡᑲᐧ ᑲᑫᐧᑌᐧᓇᓄᐊᐧᑭᐸᐣ ᒋᐸᑭᑎᓂᑕᐧ, ᐁᑲᐧ ᑲᐟᐱᐟ ᑭᐃᑭᑐ ᐊᒥ ᑲᑭᐃᑭᑐᐸᐣ ᐅᓇᔓᐁᐧᐃᐧᑭᒪ ᐅᑭᐸᔭᑌᐃᐧᐣᑕᐣ ᑲᐃᓇᑌᓂᐠ ᐊᐧᐁᐧ ᑭᒋ ᐅᑭᒪᐃᐧ ᐊᓄᑭᓇᑲᐣ ᒋᐱᒥᓂᔕᐦᐊᐠ ᑫᐃᔑᑲᐧᔭᑯᓭᓂᐠ ᒋᐃᔑᑲᓇᐊᐧᐸᒥᑕᐧ ᐊᓂᔑᓂᓂᐊᐧᐠ.
“ᐊᔕ ᑕᐡ ᐁᔭᓇᑭ ᐸᔭᑌ ᐃᐧᐣᒋᑲᑌᐠ ᐊᓂᐣ ᐁᔑᓇᑕᐁᐧᐣᑕᑲᐧᐠ ᐅᓇᑯᓂᑫᐃᐧᓂᐠ ᐅᒪ ᐃᓀᑫ, ᐁᑲᐧ ᑭᔭᐱᐨ ᐅᑯᐧᐁᐧᓂᐊᐧᐠ ᒪᐣᑐ ᓴᑲᐦᐃᑲᐣ ᐅᓇᓇᑕᐊᐧᓯᓂᐁᐧᐠ ᐊᐣᒋᑯ ᐁᑲᑫᐧ ᐱᒥᓂᔕᐦᐊᒧᐊᐧᐨ ᐃᐧᓇᐊᐧ ᐱᑯ ᑲᐃᓀᐣᑕᒧᐊᐧᐨ ᐯᑭᐡ ᐁᔭᐸᒋᑐᐊᐧᐨ ᐊᓄᑭᐃᐧ ᒪᓯᓇᐦᐃᑲᓀᓯᓂ (ᐅᐣᑌᕑᐃᔪ ᐅᑭᒪᐅᓂᐠ ᑲᑭᐅᐣᒋᒥᓂᑕᐧ) ᐊᐱ ᑲᑭᐃᐡᑲᐧ ᑭᔕᑯᓂᑲᓄᐊᐧᑭᐸᐣ 2008,” ᑭᐃᑭᑐ.
ᑕᐱᐡᑯᐨ ᑭᒋᓇᒣᑯᓯᐱᐃᐧᓂᓂᐊᐧᐠ ᒥᓇ ᒪᐣᑐ ᓴᑲᐦᐃᑲᐣ ᐅᓇᓇᑕᐊᐧᓯᓂᐁᐧᐠ ᐅᑕᓇᒣᓂᒪᐊᐧᐣ ᐅᐣᑌᕑᐃᔪ ᐅᑭᒪᐅᓇᐣ ᐁᑲ ᑲᐧᔭᐠ ᑲᑐᑕᒥᓂᐨ ᒋᑭᐅᓇᑐᓂᐸᐣ ᑫᐃᔑᐸᔭᑌᑕᑲᐧᑭᐣ ᑫᐱᒥᓂᔕᐦᐃᑲᑌᑭᐣ ᒋᐅᒋᑭᑭᓄᔑᓄᐊᐧᑲᓄᐊᐧᐠ ᐊᐱ ᐃᐧᔭᓂ ᒪᒋᐊᔭᒥᐦᐃᑎᓇᓄᐊᐧᐠ ᐃᐁᐧ ᐅᐣᒋ ᓇᓇᑕᐊᐧᓯᓂᐁᐧᐃᐧᐣ ᐃᒪ ᐊᓂᔑᓂᓂ ᑲᐃᔑ ᑎᐯᐣᑕᐠ ᐊᐦᑭᓂ.
ᑲᒪᐧᔦ ᐱᒋᐁᐧᐱᓂᑲᓄᐊᐧᐠ ᐅᐣᑌᕑᐃᔪ ᐅᑭᒪᐅᓂᑫᐃᐧᐣ ᐅᐱᒪᐊᒧᐃᐧᐱᓯᑦ 6 ᑲᐃᓇᑭᓱᐨ ᑭᒋᓇᒣᑯᓯᐱᐃᐧᓂᓂᐊᐧᐠ ᐅᑭᐅᔑᑐᓇᐊᐧ ᐅᑐᔑᐱᐦᐃᑲᓂᐊᐧ ᐁᑭᐃᑭᑐᐊᐧᐨ ᐃᓂᐁᐧᓂᐊᐧᐣ ᐅᐣᑌᕑᐃᔪ ᐅᑭᒪᐣ ᑕᐧᓫᑎᐣ ᒥᑭᐣᑎ ᑎᐱᓇᐁᐧ ᐱᑯ ᐃᐧᐣ ᒋᑲᓇᐊᐧᐸᒥᑯᐨ ᐃᐁᐧᓂ ᑲᐸᔑᒋᑲᐡᑲᐠ ᐊᓂᔑᓂᓂ ᐅᑕᑭᑦ ᑭᐡᐱᐣ ᐅᑭᒪᐅᐣ ᐁᑲ ᓇᐣᑕ ᐃᐧᑐᑕᐠ ᒋᑭᐱᑎᓇᐨ ᐅᓄᑕᓯᓂᐁᐧᐣ ᑲᓇᓇᑕᐊᐧᓯᓂᐁᐧᓂᐨ.
ᒪᐣᑐ ᓴᑲᐦᐃᑲᐣ ᐅᓇᓇᑕᐊᐧᓯᓂᐁᐧᐠ ᑲᐅᑭᒪᐅᐨ, ᐊᒥ ᑫᐃᐧᐣ ᑲᑭᐃᑭᑐᐨ ᐅᒪ ᑲᓂᔐᐧᐊᐧᓀᓯᐊᐧᐨ ᐅᓇᑕᐁᐧᑕᓇᐊᐧ ᒋᑭᑭᓄᐡᑲᒪᐃᐧᑕᐧ ᐊᓂᐣ ᑫᑭᑐᑕᒧᐊᐧᐸᐣ ᑭᐡᐱᐣ ᐁᑲ ᐊᐱᐣ ᑲᒥᓄᓭᐠ ᓂᐢᑕᑦ ᑲᓇᑭᐡᑲᑎᓇᓄᐊᐧᐠ.
“ᐣᑭᑫᑕᒥᐣ ᑭᒋᓇᒣᑯᓯᐱᐃᐧᓂᓂᐊᐧᐠ ᒥᓇ ᒪᐣᑐ ᓴᑲᐦᐃᑲᐣ ᐅᓇᓇᑕᐊᐧᓯᓂᐁᐧᐠ ᒪᐡᑯᐨ ᐯᔑᐠ ᑫᑯᐣ ᐃᔑ ᐃᐧᒋᐃᓀᑕᒧᒥᑐᑎᑫᐧᓇᐠ,” ᓫᐊᐟᐃᐧᐠ ᑭᐃᑭᑐ. “ᐅᐣᑌᕑᐃᔪ ᐊᓂᔑᓂᓂᐊᐧᐠ ᒥᓇ ᑲᑭᓇ ᑲᑭᒥᓂᑕᐧ ᑫᑕᔑ ᓇᓇᑕᐊᐧᓯᓂᐁᐧᐊᐧᐨ ᐅᒪ ᐅᐣᑌᕑᐃᔪ ᐊᐦᑭᐠ ᐃᓯᓭᓂᐸᐣ ᒋᑭ ᑭᑭᓄᐡᑲᒪᐃᐧᑕᐧᐸᐣ ᑫᑭᐅᐣᒋ ᐃᐧᒋᐦᐃᑯᔭᐠ ᑲᐧᔭᐠ ᒋᐃᓯᓭᐠ ᑲᓇᑭᐡᑲᐊᐧᑭᑕᐧ, ᑭᐡᐱᐣ ᐊᐱᐣ ᐁᑲ ᑲᓇᐦᐃᓭᐠ ᓂᐢᑕᑦ ᑲᑲᑫᐧᒋᒥᑎᓇᓄᐊᐧᐠ.”
ᑭᐃᑭᑐ ᒥᓇ ᐅᓇᓇᑕᐊᐧᓯᓂᐁᐧ ᐃᐁᐧ ᑲᐃᓇᑌᐠ ᐅᐣᑌᕑᐃᔪ ᐱᐊᐧᐱᑯᑫᐃᐧ ᐅᓇᑯᓂᑫᐃᐧᐣ, ᐊᐧᐁᐧ ᐅᓇᓇᑕᐊᐧᓯᓂᐁᐧ ᓂᔕᔭᑭ ᐁᑕ ᒥᓇᑲᓂᐃᐧ ᒋᐱᒪᓄᑲᑕᐠ ᑲᐃᐧᑐᑕᐠ ᐁᑲᐧ ᐊᐱᐣ ᒋᑭᐁᐧᐃᐧᑐᐨ ᐅᑎᐸᒋᒧᐃᐧᐣ ᑲᑭᑕᓇᓄᑭᐨ. ᑭᐡᐱᐣ ᐁᑲ ᓇᐣᑕ ᑐᑕᐠ, ᒥᐱᑯ ᐁᑭᐡᑭᓭᐠ ᐃᐁᐧ ᐊᓄᑭᐃᐧᐣ.
“ᓄᑯᑦ ᑲᐃᓇᑌᐠ ᐅᐡᑭ ᐱᐊᐧᐱᑯᑫᐃᐧ ᐅᓇᑯᓂᑫᐃᐧᐣ, ᐁᑲᐧ ᑲᑭᒥᓂᑕᐧ ᐊᓄᑭᐃᐧ ᒪᓯᓇᐦᐃᑲᓂ ᐅᒪ ᐅᐣᑌᕑᐃᔪ ᐊᐦᑭᐠ ᑲᐃᐧᐣ ᑭᔭᑦ ᐅᑕ ᑲᑫᐧᒋᒪᓯᐊᐧᐣ ᐊᓂᔑᓂᓂᐊᐧᐣ – ᒥᐡᑲᐧᐨ ᑕᐡ ᒋᑐᑕᒧᐊᐧᐨ, ᓇᑕᐁᐧᐣᑕᑯᓯᐊᐧᐠ ᓂᑲᐣ ᒋᐊᐣᑕᐃᐧ ᓇᑭᐡᑲᐊᐧᐊᐧᐨ,” ᑭᐃᑭᑐᒪᑲᐣ ᐅᑐᔑᐱᐦᐃᑲᐣ ᐅᓇᓇᑕᐊᐧᓯᓂᐁᐧ. “ᒥᑕᐡ ᒣᑲᐧᐨ ᐁᔑᓭᔭᐠ, ᑭᒋᓇᒣᑯᓯᐱᐃᐧᓂᓂᐊᐧᐠ ᑲᐃᐧᐣ ᐃᑯ ᒋᐃᐧᐊᔭᒥᐦᐃᑯᔭᑭᑕᐧ, ᒥᓇ ᐁᑲ ᐁᐧᐃᓇᑫᐧᐁᐧᔑᐦᐃᑯᔭᐠ ᑲᑭᑲᑫᐧᒋᒪᔭᐠ ᐊᐣᑎ ᐁᔑᔭᑌᑭᐣ ᓂᐣᑲᐧᐦᐊᑲᓇᐣ, ᒥᓇ ᑲᐃᐧᐣ ᐃᑯ ᑭᑭᓇᐊᐧᐨ ᓇᐣᑕ ᒋᐃᐧᐃᔑ ᐊᔭᒥᐦᐃᑯᔭᐠ.”
ᐃᒪ ᐊᐧᑭᒋᔭᐦᐃᐠ, ᒥᐦᐅᐁᐧᓂ ᑲᐱᒥᑲᑲᓄᑕᒧᐊᐧᐨ ᑲᑭᐃᑭᑐᐊᐧᐨ ᑭᒋᓇᒣᑯᓯᐱᐃᐧᓂᓂᐊᐧᐠ ᒪᐡᑯᐨ ᐊᔭᑐᑫᐧᓇᐣ ᓂᐣᑲᐧᐦᐊᑲᓇᐣ ᐃᒪ ᐯᔓᐨ ᐅᓇᓇᑕᐊᐧᓯᓂᐁᐧᐠ ᑲᑭᐃᔑ ᑲᐯᔑᐃᐧᓂᑫᐊᐧᐨ.
ᐃᒪ ᑭᐅᐣᒋᒪᒋᓭ ᓇᓀᓯᑕᒥᑲᓇᐊᐧᐸᒥᑐᐃᐧᐣ ᐊᐱ ᒪᐧᕑᐃᐢ ᑲᑭᒪᒥᔑᒪᐨ ᒪᐣᑐ ᓴᑲᐦᐃᑲᐣ ᐅᓇᓇᑕᐊᐧᓯᓂᐁᐧᐠ ᒪᒪᔑᐡ ᐃᑯ ᐁᑭᐃᔑ ᓇᓇᑕᐊᐧᓯᓂᐁᐧᐸᑐᐨ ᐁᑲᐧ ᐊᐱᐣ ᐁᑭᐅᐣᒋ ᓂᓂᒋᓇᑯᑐᐨ ᓂᐣᑲᐦᐊᑲᓇᐣ ᒋᐊᐧᓂᐡᑫᐧᐱᑐᐊᐧᐨ.
“ᒪᐣᑐ ᓴᑲᐦᐃᑲᐣ ᐅᓇᓇᑕᐊᐧᓯᓂᐁᐧᐠ ᒪᒪᔑᐡ ᐅᑭᑐᑕᓇᐊᐧ ᒥᓇ ᐅᐣᒋᑕ ᐱᑯ ᐅᑭᐊᓀᐧᑕᓇᐊᐧ ᑲᑭᐃᔑ ᐊᐧᐃᐧᑕᒪᐊᐧᑭᑕᐧ ᒥᓇ ᐊᐣᒋᑯ ᐁᑭᐱ ᑲᑫᐧᐱᐣᑎᑲᑕᒧᐊᐧᐨ ᐣᑕᑭᒥᓇᐣ,” ᒥᐧᕑᐃᐢ ᑭᐃᑭᑐ.
“ᐁᑲᐧ ᐅᐁᐧᓂ ᒪᒪᔑᐡ ᑲᑭᑐᑕᒧᐊᐧᐨ ᐅᑭᐅᐣᒋᐊᐧᓂᐡᑫᐧᑐᓇᐊᐧ ᑭᑭᒋᐦᐊᒥᓇᓂᐠ ᑲᑭᐃᔑᓇᐦᐃᓂᑕᐧ ᒥᓇ ᑯᑕᑭᔭᐣ ᑲᑭᒋᓀᐣᑕᑲᐧᑭᐣ ᑭᑕᓂᔑᓂᓂᒥᓇᓂᐠ ᑭᔭᐱᐨ ᑲᐱᒥᔭᐸᒋᑐᐊᐧᐨ ᐊᐦᑭᑲᐠ ᑫᑯᓇᐣ ᑲᐅᐣᑎᓂᑲᑌᑭᐣ.”
ᒥᑕᐡ ᑲᐃᔑᓇᑫᐧᐁᐧᔑᑐᐨ ᐊᐧᐁᐧ ᐅᓄᑕᓯᓂᐁᐧ ᐃᐁᐧᓂ ᑲᑭᐃᑭᑐᓂᐨ ᑭᒋᓇᒣᑯᓯᐱᐃᐧᓂᓂᐊᐧᐣ ᑲᐧᐣᑕ ᐱᑯ ᐁᐅᐣᒋ ᐊᓂᒥᐦᐃᐁᐧᐨ ᑲᐃᔑᓇᑕᐁᐧᐣᑕᒧᐊᐧᐨ ᐊᑯᓇᐠ ᐃᒪ ᐊᔕ ᐊᐊᐧᔑᒣ ᓂᓴᐧᓱᒥᑕᓇ ᑕᓱᔭᑭ ᑲᐅᐣᒋ ᓇᓇᑕᐊᐧᓯᓂᐊᐧᑌᐠ ᐁᑲᐧ ᐁᑲ ᐃᐧᑲ ᐁᑭᐱᐅᐣᒋ ᒥᑫᐧᐸᐦᐃᑲᑌᑭᐣ ᓂᐣᑲᐧᐦᐊᑲᓇᐣ ᒥᓇ ᑲᐃᐧᐣ ᐃᐧᑲ ᒋᑭᐱᐅᒋ ᑭᑭᓇᐊᐧᒋᑐᐊᐧᐨ ᑭᒋᓇᒣᑯᓯᐱᐃᐧᓂᓂᐊᐧᐠ ᐊᐣᑎ ᐁᔑᔭᑌᑭᐣ.
ᔕᑯᐨ ᑲᐟᐱᐟ ᑭᐃᑭᑐ ᐊᓂᔑᓂᓂᐊᐧᐠ ᐁᐧᑎ ᑭᐁᐧᑎᓄᐠ ᐅᐣᑌᕑᐃᔪ ᑲᑲᐯᔑᐊᐧᐨ ᑲᐃᐧᐣ ᐃᐧᑲ ᒋᑭᐱᐅᐣᒋ ᐱᓯᐢᑫᓂᒥᑯᐊᐧᐨ ᐅᓄᑕᓯᓂᐁᐧᐣ ᒥᓇ ᐅᑭᒪᐅᓇᐣ ᐊᐊᐧᔑᒣ ᐊᔕ ᓂᓴᐧᓱᒥᑕᓇ ᑕᓱᔭᑭ. ᐅᑕᓂᔑᓂᓂᒪᐣ ᑲᔦ ᑭᐱᐅᐣᒋ ᓇᓂᑲᑌᔭᒧᑲᓂᒪᐊᐧᐣ ᐊᐱᐣ ᐁᐱᓄᒋᒋᑫᐊᐧᐨ ᐅᑕᑭᒥᐊᐧᐠ,” ᑲᐟᐱᐟ ᑭᐃᑭᑐ.
“ᓄᑯᑦ ᑕᐡ ᐃᑯ ᐸᐢᑲᐣ ᑲᐃᓯᓭᐠ ᓇᐣᑕ ᑲᑲᑫᐧᐃᔑᓂᑲᑕᒪᐠ ᒥᓇ ᑲᑲᑫᐧ ᓂᐸᐃᐧᑕᒪᓱᔭᐠ ᒋᔭᐸᒋᑐᔭᐠ ᒥᓇ ᒋᑕᔑ ᓇᓇᑕᐁᐧᒋᑫᔭᐠ ᐣᑕᑭᒥᓇᓂᐠ,” ᑭᐃᑭᑐ.