’ᑲᐯᐦᐃ ᑲᓄᑌᓭᐨ ᔓᓂᔭ’ ᓂᔑᓇᐯ ᐊᐢᑭ ᔑᒪᑲᓂᑭᑫᐎᐣ ᑕᐅᒋᒪᒋᓭᐗᐣ ᐃᐡᑯᓂᑲᓇᐣ

ᑲᑭ ᐃᐡᑾᐱᒪᑎᓯᐨ ᓂᔑᑕᓇᓂᓯᐣ ᑲᑕᓱᐊᐦᑭᐎᓀᐨ ᑲᓴᐸᓇᑲ ᐃᑴ ᒣᑾᐨ ᐁᑲᓇᐌᓂᒪᑲᓀᐨ ᔑᒪᑲᓂᔕᐣ ᓄᑯᒼ ᐅᐅᐌ ᑲᐱᓯᒥᐗᐠ ᐊᓂᒧᒋᑲᑌ ᐃᓯᓭᐎᓇᐣ ᒋᑭᐊᑾᒥᒋᑲᓂᐗᐠ ᐊᓂᔑᓂᓂᐗᐠ ᑲᑲᐯᔑᐗᐨ ᐃᐡᑯᓂᑲᓂᐠ ᒥᓇ ᐁᑲ ᔑᒪᑲᓂᔕᐠ ᑾᔭᐠ ᒋᑭᑐᑕᒧᐗᐨ ᐅᑕᓄᑭᐎᓂᐗ ᐃᐡᑯᓂᑲᓂᐠ᙮
ᐁᑲᓄᑕᒧᐗᐨ ᑲᓄᑌᓭᐨ ᔓᓂᔭ ᒋᑭᐱᒥᐎᒋᑲᑌᐠ ᐊᓂᔑᓂᓂᐤ ᔑᒪᑲᓂᔑᑫᐎᐣ, ᐊᓂᑭᓇᐯ ᐊᐢᑭ ᐅᒪᐡᑲᐎᑕᓇᐗ ᐅᐣᑌᕒᐃᔪ ᒥᓇ ᑲᓇᑕ ᐅᑭᒪᐎᓇᐣ ᒋᔑᑲᓇᐗᐸᒥᑯᐗᐨ “ᒋᑎᐸᑯᓂᑫᐗᑭᑌᐠ ᒥᓇ ᒋᒥᑐᓀᒋᑲᑌᐠ ᑲᐃᔑ ᐸᐸᒥᓯᐗᐨ” ᑭᐡᐱᐣ ᓂᑲᐣ ᐅᒋᐡᑾᐱᒪᑎᓯᐗᐨ ᔭᐎᔭᐠ ᒋᐅᒋ ᐊᓇᒣᒋᑲᑌᐠ ᑲᐃᔑ ᓄᑌᓭᐨ ᔓᓂᔭ ᒋᐸᒥᓂᑲᑌᐠ ᔑᒪᑲᓂᔑᑫᐎᐣ᙮
ᑲᑲᐎᒋᑲᑌᐠ ᐅᒪᓯᓇᐦᐃᑲᐣ ᐁᑭᑌᐱᓇᒧᐗᐨ APTN, ᑭᒋᐅᑭᒪᑲᐣ ᐦᐊᕒᐱ ᔦᓯᓄ ᐅᐎᑕᐣ ᐊᓂᔑᓇᐯ ᐊᐢᑭ ᐃᐡᑯᓂᑲᓇᐣ “ᐁᒪᒋᐱᒋᑲᑌᑭᐣ” ᑲᐃᔑ ᑲᐯ ᓄᑌᓭᐨ ᔓᓂᔭ ᑲᐱᒥᐎᒋᑲᑌᐠ ᓂᔑᓇᐯ ᐊᐢᑭ ᔑᒪᑲᓂᔑᑫᐎᐣ ᐱᒥᐎᒋᑫᐎᐣ (NAPS)᙮
“ᐅᐱᒪᑎᓯᐎᓂᐗ ᐊᓂᔑᓂᓂᐗᐠ ᐅᐅᒪ ᑲᑲᐯᔑᐗᐨ ᐃᐡᑯᓂᑲᓂᐠ ᐊᒋᑲᑌᓂᐁᑲ ᒋᑭᒥᓄᓭᐗᐨ ᐊᓂᐡ ᐅᑭᒪᐎᓇᐣ ᑲᐎᐣ ᒋᐎᑐᑕᒧᐗᐨ ᒋᑌᐱᓭᐗᐨ ᐊᓂᔑᓂᓂᐗᐠ ᑭᐌᑎᓄᐠ ᐅᐣᑌᕒᐃᔪ ᒋᑌᐱᓇᒧᐗᐨ ᑲᐃᔑᑲᓇᐗᐸᒋᑲᑌᐠ ᔑᒪᑲᓂᐡ ᐱᒥᐎᒋᑫᐎᓇᐣ ᑐᑲᐣ ᐊᒥᒋᑯᔑᐎ ᑕᐎᓂᐠ ᑲᐃᔑ ᑲᓇᐗᐸᒋᑲᑌᐠ,” ᐃᑭᑐᒪᑲᐣ ᐅᔑᐱᐦᐃᑲᐣ᙮ “ᐁᐌᒋᐎᒋᑲᑌᐠ, ᔓᓂᔭᐎ ᑲᓇᐗᐸᒋᑫᐎᐣ ᐁᓂᑲᓇᑌᐠ ᐊᐱᐨ ᐊᓂᔑᓂᓂᐎ ᐱᒪᑎᓯᐎᓇᐣ᙮”
ᐅᐅᐌ ᐅᔑᐱᐦᐃᑲᐣ, ᐁᑭᒪᓯᓇᐦᐅᑎᓱᐨ ᑫᐎᐣ ᑲᓂᑲᓇᐱᑕᐠ ᓂᔑᓇᐯ ᐊᐢᑭ ᔑᒪᑲᓂᔑᑫᐎᐣ ᐹᕒᐊᐣᐠ ᒪᑫ, ᐁᑭᔑᓂᔕᐦᐊᒪᐗᑲᓀᐨ ᑫᐎᐣ ᐅᐣᑌᕒᐃᔪ ᑲᓂᑲᓂᐡᑲᐠ ᑲᓇᑲᒋᒋᑫᐗᐨ ᐃᐡᑾᐱᒪᑎᓯᐎᓇᐣ ᑕᐣ ᑲᐢ ᒥᓇ ᑫᐎᓇᐗ ᑲᓇᑕ ᒥᓇ ᐅᐣᑌᕒᐃᔪ ᐅᑭᒪᐎ ᐊᓄᑭᓇᑲᓇᐠ ᑲᓂᑲᓂᐡᑲᒧᐗᒋᐣ ᐊᓂᔑᓂᓂᐤ ᐃᓯᓭᐎᓇᐣ ᒥᓇ ᐊᐣᑾᒥᒋᑫᐎᓇᐣ᙮
ᐅᐣᑌᕒᐃᔪ ᑲᓂᑲᓂᐡᑲᐠ ᓇᓇᑲᒋᒋᑫᐎᐣ ᑲᐃᐡᑾᐱᒪᑎᓯᐨ ᔭᐎᔭ ᐅᑲᒪᒋᐊᓄᑭᑕᐣ ᓇᓇᑲᒋᒋᑫᐎᐣ ᑲᑭ ᐃᐡᑾᐱᒪᑎᓯᐨ ᑲᓴᐸᓇᑲ ᓬᐃᓇ ᐊᐣᑕᓴᐣ᙮ ᐊᐣᑕᓴᐣ ᑭᐃᐡᑾᐱᒪᑎᓯ ᐯᐱᐌᕒᐃ 1 ᒣᑾᐨ ᐁᑭᒋᐎᓇᑲᓀᐨ ᐃᐃᒪ ᓂᔑᓇᐯ ᐊᐢᑭ ᔑᒪᑲᓂᐡ ᐱᒋᐅᑕᐸᓂᐠ᙮
ᑲᓴᐸᓇᑲ ᐅᑭᒪᑲᐣ ᑰᕒᑐᐣ ᐊᐣᑕᓴ ᐅᑭᐎᑕᒪᐗᐣ ᐗᐗᑕ ᑎᐸᒋᒧᐎᐣ ᐊᐊᐌ ᔑᒪᑲᓂᐡ ᐅᑕᐸᐣ ᐁᐃᓇᐸᒋᐦᐊᑲᓀᐨ ᒋᔑᑭᒋᐎᓇᑲᓀᐗᐨ ᔭᐎᔭᐠ ᒥᓇ ᐃᐃᒪ ᐃᐡᑯᓂᑲᓂᐠ ᐁᑲ ᐁᔭᔭᐗᐨ ᑫᐃᔑ ᑲᓇᐌᓂᒪᑲᓀᐨ ᔭᐎᔭ ᑲᑭᒋᐎᓇᑲᓀᐨ ᐊᔕ ᒥᓂᑯᐠ ᓂᔓᔭᐦᑭ᙮
ᑲᓴᐸᓇᑲ ᑲᐎᐣ ᒋᐯᔑᑯᐗᐨ ᑲᓇᑕᐌᑕᒧᐗᐨ ᐅᐡᑭ ᒥᓇ ᑾᔭᐠ ᒋᔑᓇᑯᑭᐣ ᔑᒪᑲᓂᔑᐎᑲᒥᑯᐣ, ᓂᔑᓇᐯ ᐊᐢᑭ ᐃᑭᑐᐗᐠ ᐃᓂᐌᓂᐗᐣ ᓂᓵᓯ ᐃᐡᑯᓂᑲᓇᐣ ᒋᑭᑌᐱᓇᒧᐗᐸᐣ ᐅᐡᑭ ᐗᑲᐦᐃᑲᓇᐣ ᔑᒪᑲᓂᔕᐠ ᑫᐊᐸᒋᑐᐗᐨ ᑲᑭᐎᒋᑲᑌᑭᐸᐣ ᐃᐃᒪ ᑫᔐᒋᐗᐣ ᓇᓇᑲᒋᒋᑫᐎᓇᐣ ᒣᑾᐨ 2009, ᐯᔑᐠ ᐃᐡᑯᓂᑲᐣ ᐊᔕ ᐅᑭᑌᐱᓇᓇᐗ ᐁᑭᐅᓇᒋᑲᑌᐠ ᒥᓇ ᐁᔭᐸᒋᑐᐗᐨ ᒣᑾᐨ᙮
ᑫᔐᒋᐗᐣ ᓇᓇᑲᒋᒋᑫᐎᐣ ᐅᑭᔑᒥᑲᓇᐗ 19 ᓂᔑᓇᐯ ᐊᐢᑭ ᔑᒪᑲᓂᔑᑫᐎᐣ ᐱᒥᐎᒋᑫᐎᐣ ᐗᑲᐦᐃᑲᓇᐣ ᑲᐎᐣ ᐅᑐᒋᓇᑭᐡᑲᓇᐗ ᑫᑭᔑᑲᓇᐗᐸᒋᑲᑌᑭᐸᐣ ᐗᑲᐦᐃᑲᐣ ᑲᐅᔑᒋᑲᑌᐠ᙮
ᑲᓇᑕ ᐱᒥᐎᒋᑫᐎᐣ ᑭᔑᐱᓭ
ᐅᐅᐌ ᑲᐃᓯᓭᐗᐨ ᑲᓄᑌᓭᐗᐨ ᔓᓂᔭᓇᐣ ᓂᔑᓇᐯ ᐊᐢᑭ ᔑᒪᑲᓂᔑᑫᐎᐣ ᐱᒥᐎᒋᑫᐎᐣ ᐊᐗᔑᒣ ᑭᐊᓂᒪᓯᓭ ᓄᑯᒼ ᑫᓂᓯᑾᐠ, ᐃᐃᐌ ᔓᓂᔭᐎ ᓇᑯᒥᑎᐎᐣ ᑲᑭᒪᓯᓇᐦᐊᒧᐗᐨ ᑲᓇᑕ ᒥᓇ ᐅᐣᑌᕒᐃᔪ ᒥᓇ ᓂᔑᓇᐯ ᐊᐢᑭ ᒋᑭᔑᐱᓭᐠ ᒫᕒᐨ 31᙮
ᒪᒋᐨ ᔓᓂᔭᐎ ᓇᑯᒥᑎᐎᐣ ᑲᑭᑐᑕᒧᐗᐨ ᓂᔑᓇᐯ ᐊᐢᑭ, ᑲᓇᑕ ᒥᓇ ᐅᐣᑌᕒᐃᔪ ᐁᑭᒪᓯᓇᐦᐊᒧᐗᐸᐣ ᐁᐱᕒᐅᓬ 1, 2009 ᒥᓇ ᐁᑭᑭᔑᐱᓭᐠ ᒣᑾᐨ 2012᙮ ᐃᐃᐌ ᓇᑯᒥᑎᐎᐣ ᑭᓇᑭᒋᑲᑌ ᐯᔑᑯᐊᐦᑭ ᒥᓂᑯᐠ, ᐊᑯᓇᐠ ᒫᕒᐨ 31, 2013, ᔕᑯᐨ ᓂᔑᓇᐯ ᐊᐢᑭ ᐅᐎᑕᓇᐗ ᐁᑲᒪᔑ ᐁᐱᐎᑕᒪᐗᑲᓀᐗᐨ ᐅᑭᒪᐎᓇᐣ ᒋᑭᒪᒋ ᐊᓂᒧᒋᑲᑌᑭᐸᐣ ᐅᐡᑭ ᔓᓂᔭᐎ ᓇᑯᒥᑎᐎᐣ᙮
“ᑲᓂᓱᐅᑭᒪᐗᐠ ᔓᓂᔭᐎᓇᑯᒥᑎᐎᐣ ᑲᐎᐣ ᒋᐃᓇᒋᑲᑌᐠ ᒋᐊᐃᑕᑌᐠ ᑫᐅᒋᑲᒋᓂᔕᐃᑲᑌᐠ,” ᐃᑭᑐᒪᑲᐣ ᐅᔑᐱᐦᐃᑲᐣ᙮ “ᒥᐌᑕᐡ ᐁᐃᓯᓭᐠ, ᑲᐎᐣ ᒋᐅᓇᒋᑲᑌᐠ ᑫᐃᔑᒪᒋ ᐊᓂᒧᒋᑲᑌᐠ, ᓂᔑᓇᐯ ᐊᐢᑭ ᔑᒪᑲᓂᔑᑫᐎᐣ ᐃᓯᓭᐗᐠ ᒋᐅᑕᐱᓇᐗᐨ ᔓᓂᔭᓇᐣ ᑲᒥᓂᑯᐗᐨ ᑲᓇᑕ ᒥᓇ ᐅᐣᑌᕒᐃᔪ ᐅᑭᒪᐎᓇᐣ᙮”
ᑲᐊᓂᒥᓭᐗᐨ ᓂᔑᓇᐯ ᐊᐢᑭ ᔑᒪᑲᓂᔑᑫᐎᐣ, ᑲᓇᑕ ᐅᑭᒪᐎᐣ ᐅᑭᐎᑕᓇᐗ ᐅᑕᓇᐠ ᑲᑭᐱᒥᑯᓇᑲᐠ ᐁᑲ ᒋᐅᐡᑭᑐᐗᐨ ᔑᒪᑲᓂᔕᐠ ᑲᐅᒋᐎᑯᐱᓇᑲᓀᐗᐨ ᔓᓂᔭᓇᐣ, ᒥᓇ ᑯᑕᑭᔭᐣ ᑫᑯᓇᐣ, ᐁᑭᐅᒋᐊᓄᑭᐗᐨ 11 ᓂᔑᓇᐯ ᐊᐢᑭ ᔑᒪᑲᓂᔕᐠ ᑲᔭᓄᑭᐗᐨ ᑭᐌᑎᓄᐠ ᐃᐡᑯᓂᑲᓂᐠ ᑲᑭᐸᑭᑎᓇᑲᓀᐸᐣ $1 ᒥᓬᐃᔭᐣ ᓇᑯᒥᑎᐎᓂᐠ᙮
ᑲᓂᑲᓂᐡᑲᐠ ᐅᐣᑌᕒᐃᔪ ᒪᒪᐎᑲᓇᐗᐸᒋᑫᐎᐣ ᑲᓂᑲᓂᐡᑲᒧᐗᒋᐣ ᔑᒪᑲᓂᔑᑫᐎᓇᐣ, ᐢᑎᐱᐣ ᑕᓄᕒ, ᐁᑭᐎᑕᒪᐗᐨ ᑎᐸᒋᒧᐎᐯᐸᐣ ᑲᑭᑭᐡᑭᓇᑲᓀᓂᐨ ᓂᔑᓇᐯ ᐊᐢᑭ ᔑᒪᑲᓂᔑᑫᐎᐣ ᐱᒥᐎᒋᑫᐎᐣ ᒋᐊᓂᓯᓭᐠ ᒋᑭᒋᐊᓄᑭᐗᐨ ᐅᐣᑌᕒᐃᔪ ᔑᒪᑲᓂᔕᐠ᙮
“ᓂᔑᓇᐯ ᐊᐢᑭ ᔑᒪᑲᓂᔑᑫᐎᐣ ᑫᒋ ᑕᑭᐊᓂᓯᓭ ᐁᑲ ᒋᑭᐊᓄᑭᐗᐨ ᐯᔑᐠ ᑫᒪ ᓂᔑᐣ ᑲᔭᑲᓯᑭᐣ ᐃᐡᑯᓂᑲᓇᐣ,” ᑕᓄᕒ ᐃᑭᑐ᙮ “ᑭᐡᐱᐣ ᐃᐦᐃᐌ ᑐᑕᒧᐗᐨ, ᐅᐣᑌᕒᐃᔪ ᔑᒪᑲᓂᔕᐠ ᑕᐃᓯᓭᓂ ᒋᔕᐗᐨ ᐃᐃᒪ ᐃᐡᑯᓂᑲᓂᐠ᙮”
ᑕᓄᕒ ᐃᑭᑐ ᑲᐅᑕᐱᓇᑲᓀᐨ $1 ᒥᓬᐃᔭᐣ ᔓᓂᔭ ᑲᒥᓇᑲᓀᐗᐨ ᓂᔑᓇᐯ ᐊᐢᑭ ᔑᒪᑲᓂᔑᑫᐎᐣ ᑕᓂᓯᓭ ᒋᒣᑎᓂᑲᓂᐗᐠ ᒥᓂᑯᐠ $2 ᒥᓬᐃᔭᐣ ᑭᐡᐱᐣ ᐅᐣᑌᕒᐃᔪ ᔑᒪᑲᓂᔕᐠ ᐊᓄᑭᑕᒧᐗᐨ ᐃᐡᑯᓂᑲᓇᐣ ᑫᑭᐡᑭᓂᑲᑌᑭᐣ᙮
“ᔓᓂᔭᐎ ᐱᒥᐎᒋᑫᐎᐣ, ᑲᐎᐣ ᓂᓂᓯᑐᑕᓯᐣ,” ᐃᑭᑐ᙮
ᓂᔑᓇᐯ ᐊᐢᑭ ᐃᑭᑐᐗᐠ ᑲᑭᐗᓂᐦᐊᑲᓀᐗᐨ 11 ᓂᔑᓇᐯ ᐊᐢᑭ ᔑᒪᑲᓂᔕᐠ “ᑕᓇᑯᐣ ᑫᐃᔑᒪᒋᓭᒋᑲᑌᐠ ᐊᐣᑾᒥᓯᐎᐣ ᐃᐃᒪ ᓂᔑᓇᐯ ᐊᐢᑭ ᐃᐡᑯᓂᑲᓇᐣ᙮
ᐃᐃᐌ ᐅᔑᐱᐦᐃᑲᐣ ᐃᑭᑐᒪᑲᐣ ᐃᑭᐌᓂᐗᐠ 18% ᐊᓂᔑᓇᐯ ᐊᐢᑭ ᔑᒪᑲᓂᔕᐠ ᑲᐎᐣ ᐊᓄᑭᓯᐗᐠ ᐃᐃᐌ ᐯᔑᑾ ᑲᔭᓄᑭᐗᐨ ᐁᑭᐱᒋᐗᐨ ᑲᔭᓉᔑᓄᐗᐨ, ᑲᐅᓴᒪᓄᑭᐗᐨ ᑲᔦᒪ ᐁᑭᐱᒋᐗᐨ ᐅᑎᓯᓭᐎᓂᐗ ᐅᐣᒋ ᑲᐃᔑᓇᑭᐡᑲᒧᐗᐨ ᔑᒪᑲᓂᐡ ᐊᓄᑭᐎᐣ ᑭᐌᑎᓄᐠ ᒥᓇ ᐁᑲ ᐁᑌᐱᓭᐨ ᔓᓂᔭ ᑾᔭᐠ ᒋᑭᐊᓄᑭᐗᐨ᙮
“ᐊᐣᑾᒥᒋᑫᐎᐣ ᐃᐃᒪ ᓂᔑᓇᐯ ᐊᐢᑭ ᐃᐡᑯᓂᑲᓇᐣ ᒪᒋᐱᒋᑲᑌᐗᐣ ᐅᓴᒼ ᐊᑲ ᑭᓈᑲᐡ,” ᐃᑭᑐᒪᑲᐣ ᐅᔑᐱᐦᐃᑲᐣ᙮ “ᑲᓇᑕ ᒥᓇ ᐅᐣᑌᕒᐃᔪ ᐅᑭᒪᐎᓇᐣ ᐌᐡᑲᐨ ᐅᒋᐎᑕᒪᐗᑲᓀᐗᐠ ᐅᓄᐌᓂᐗᐣ ᐃᓯᓭᐎᓇᐣ ᐁᒪᒋᐱᒋᑫᒪᑲᑭᐣ ᐊᐣᑾᒥᒋᑫᐎᐣ ᐃᐃᒪ ᐊᓂᔑᓇᐯ ᐊᐢᑭ ᐃᐡᑯᓂᑲᓇᐣ᙮ ᐊᓂᐣ ᑕᓯᐣ ᔭᐎᔭᐠ ᑫᐃᐡᑾᐱᒪᑎᓯᐗᐨ ᐊᐱ ᒋᓂᓯᑕᐎᓇᒧᐗᐨ ᑲᐃᔑᓂᔕᑭᐣ ᐅᑭᒪᐎᓇᐣ ᒋᓂᓯᑕᐎᓇᒧᐗᐨ ᓂᔑᓇᐯ ᐊᐢᑭ ᔑᒪᑲᓂᔑᑫᐎᐣ ᐱᒥᐎᒋᑫᐎᐣ ᐁᑲ ᒋᑭᐱᒥᐎᒋᑲᑌᐠ ᓄᑯᒼ ᑲᐃᔑᑲᓇᐗᐸᒋᑲᑌᐠ᙮”
“ᓄᑯᒼ ᑲᐃᔑᑲᐸᐎᒪᑲᐠ ᑫᑯᐣ, ᓂᔑᓇᐯ ᐊᐢᑭ ᔑᒪᑲᓂᔑᑫᐎᐣ ᐱᒥᐎᒋᑫᐎᐣ ᑭᐅᓇᒋᑲᑌ ᐁᑲ ᒋᑲᐡᑭᐦᐅᒪᑲᐠ᙮”