ᑲᐃᔑᐢᑲᒪᑲᐠ ᒥᑌᐦᐃ ᐃᒪ ᔓᓂᑲᐊᐧᐱᓀᐃᐧ ᑭᑭᓄᐦᐊᒪᑫᐃᐧᓂᐠ: ᒪᓄᐊᐧᑭᔑᐠ

ᑲᐃᐧᐣ ᒋᑭᐱᒋᒪᑲᐠ ᔓᓂᑲᐊᐧᐱᓀᐃᐧᐣ, ᐊᒥ ᐯᔑᑲᐧᐣ ᐁᐣᑐᑕᐠ ᑫᕑᐃ ᒪᓄᐊᐧᑭᔑᐠ.
“ᒧᔕᐠ ᓂᒥ̇ᑲᑕᒥᐣ ᐅᐁᐧ ᐃᓇᐱᓀᐃᐧᐣ ᐅᒪ ᓂᑕᔑᑫᐃᐧᓂᓇᐣ,” ᒪᓄᐊᐧᑭᔑᐠ ᐃᑭᑐ, ᑲᓂᑲᓂᐢᑲᐠ ᔓᑲᐊᐧᐱᓀᐃᐧ ᑭᑭᓄᐦᐊᒪᑫᐃᐧᐣ ᐃᒪ ᓀᐣᑲᐃᐧᓴᑲᐦᐃᑲᓂᐠ. “ᐊᒥᐦᐃ ᑲᐅᐣᒋ ᑲᑫᐧᑐᑕᒪᐣ ᒋᑭᑭᓄᐦᐊᒪᑫᔭᐣ ᒋᐊᐧᑲᐃᐧᐨ ᐊᐃᐧᔭ ᒥᓇ ᑲᐧᔭᐠ ᒋᐃᓇᐣᒋᑫᐨ. ᐅᐁᐧ ᐃᓇᐱᓀᐃᐧᐣ ᒧᔕᐠ ᐅᒪ ᐊᔭᒪᑲᐣ 24/7. ᔓᓂᑲᐊᐧᐱᓀᐃᐧᐣ ᑲᐯᓭ ᐊᒥ ᑕᐢ ᐁᑲᑫᐧᑐᑕᒪᐣ ᐅᐢᑲᑎᓴᐠ ᒧᔕᐠ ᒋᐊᐧᐊᐧᑲᐃᐧᐊᐧᐨ.”
ᒪᓄᐊᐧᑭᔑᐠ ᒥᐢᑕᐦᐃ ᐅᐊᐧᐸᐣᑕᐣ ᐁᐸᑲᓂᓭᑭᐣ ᐅᒪ ᓀᐣᑲᐃᐧᓴᑲᐦᐃᑲᓂᐠ ᐊᐦᐱ ᑲᑭ ᐱᑭᐁᐧᑯᓯᐊᐧᐸᐣ ᐅᑎᐯᐣᒋᑫᐃᐧᐣ ᐁᐧᑎ ᐃᐧᓂᐯᐠ ᑲᑭᑲᐯᔑᐸᐣ ᑫᑲᐟ ᓂᓴᐧᓯᐊᐦᑭ ᐅᑕᓇᐣᐠ.
“ᒪᐊᐧᐨ ᓂᑭ ᐊᓂᒥᐦᐃᑯᒥᐣ ᐃᐁᐧ ᓂᔕᐧ ᑲᐊᐱᒋᐢᑲᒪᑲᐠ ᔓᑲᐊᐧᐱᓀᐃᐧᐣ,” ᒪᓄᐊᐧᑭᔑᐠ ᐃᑭᑐ, ᒣᑲᐧᐨ ᐁᑭᐱᒋᐊᐧᐨ ᐃᒪ ᔓᑲᐃᐧᑭᑭᓄᐦᐊᒪᑫᐃᐧᐣ ᑲᑭ ᒪᐊᐧᒋᐦᐃᑎᓇᓂᐊᐧᐠ ᑕᐣᑐᕑ ᐯ ᑲᐢᑲᑎᓄᐃᐧᐱᓯᑦ 17. “ᑲᐃᐧᐣ ᑫᑯᓇᐣ ᐃᔑᒋᑫᐃᐧᓇᐣ ᒋᐅᐣᒋᔭᑭᐣ ᐊᐊᐧᔑᔕᐠ ᑫᐃᔑ ᐅᐣᑕᒥᐦᐊᑲᓄᐊᐧᐸᐣ ᐊᐱ ᑲᐱᑭᐁᐧᔭᐸᐣ. ᐃᑫᐧᓂᐊᐧᐣ ᐸᐣᑭ ᑫᑯᓇᐣ ᑲᑐᒋᑲᑌᑭᐸᓂᐣ ᑲᒧᑕᓂᑭᑕᒪᑫᐊᐧᐨ ᐃᐧᓇᐊᐧ ᐅᑭ ᐱᒧᑐᓇᐊᐧ.”
ᑲᐃᐧᐣ ᑭᓇᐧᑲᐢ ᒋᐅᐣᒋᓯᓭᓂᐠ ᒪᓄᐊᐧᑭᔑᐠ ᒋᐊᓂᐃᐧᒋᑕᐧᐨ ᐃᔑᒋᑫᐃᐧᓇᐣ ᐁᑲᐧ ᑕᐢ ᐃᐧᐸᐨ ᑭᐊᓂᓯᓭᓂ ᒋᐊᓂ ᐃᐧᒋᑕᐧᐨ ᔓᑲᐃᐧ ᑭᑭᓄᐦᐊᒪᑫᐃᐧᐣ ᐃᒪ ᐅᑕᔑᑫᐃᐧᓂᐠ.
“ᐃᐁᐧ ᒪᐊᐧᐨ ᑲᐃᐧᑐᑕᒪᐸᐣ ᐅᐢᑲᑎᓴᐠ ᒋᑭ ᑭᒋᐊᐊᐧᑲᐃᐧᐊᐧᐸᐣ ᒥᓇ ᐸᑲᐣ ᑫᑯᓇᐣ ᒋᑭ ᐊᓂᑲᑫᐧ ᑐᒋᑲᑌᑲᐧᐸᐣ,” ᒪᓄᐊᐧᑭᔑᐠ ᑭᐃᑭᑐ, ᐁᑭ ᐃᐧᐣᑕᐠ ᐃᑫᐧᓂᐊᐧᐣ ᐅᐢᑲᑎᓯᓴᐠ ᐁᐃᓇᓀᐤ ᐊᑯᓇᐠ ᓂᔓᔕᑊ ᑲᑕᓱᐱᐳᓀᐊᐧᐨ ᐁᑭ ᒪᒥᑎᓀᓂᒪᐨ.
ᒪᐊᐧᐨ ᒥᓄᑲᓄᑫ ᓂᐢᑕᑦ ᑲᐊᓂᒪᒋᓭᑭᐸᐣ ᐅᐁᐧ ᑭᑭᓄᐦᐊᒪᑫᐃᐧᐣ.
“ᓂᐢᑕᑦ ᑲᑭ ᑭᑫᐣᑕᒪᐣ ᐊᓂᐣ ᑫᑭᑐᑕᐊᐧᑲᓄᐊᐧᐨ ᐅᓂᑭᐦᐃᑯᒪᐠ ᒋᑌᐸᑫᓂᒥᑯᔭᐣᐠ ᐅᐁᐧ ᑲᑲᑫᐧᑐᑕᒪᐣᐠ,” ᐃᑭᑐ. “ᒣᑕᐁᐧᒋᑫᐃᐧᓇᐣ ᑭᐊᓂ ᑲᐦᑭᐱᑎᓂᑲᑌᐊᐧᐣ (ᐁᑲ ᑲᑭ ᐅᐣᒋ ᐊᔭᐊᐧᐨ ᑫᐃᐧᒋᑕᐧᐊᐧᐨ ᑲᒧᑕᓄᑭᑕᒪᑫᐊᐧᐨ) ᐁᑲᐧ ᑕᐢ ᒪᐊᐧᐨ ᑭᐅᐣᒋ ᒪᒉᐣᑕᒧᐊᐧᐠ ᐅᐢᑲᑎᓴᐠ.”
ᐁᑲᐧ ᐊᐦᐱ ᑲᑭ ᐅᐣᒋ ᐱᑕᑕᑯᔑᓂᐊᐧᐨ ᐅᐢᑲᑎᓴᐠ ᐃᒪ ᑲᐃᔑ ᐸᐢᑲᐧᓂᐠ ᑭᐃᑐ, ᑲᐃᐧᐣ ᐊᐃᐧᔭᐣ ᐃᒪ ᑲᒣᑕᐁᐧᐦᐃᑯᐊᐧᐸᐣ ᒋᐅᐣᒋᐊᔭᓂᐨ.
“ᒥᐦᐃᐁᐧ ᓂᑲᐣ ᑲᑭ ᐊᓂᑲᑕᒪᐣ ᒋᑭ ᑌᐸᑫᓂᒥᑫᐊᐧᐨ ᒥᓇᐊᐧ ᐅᓂᑭᐦᐃᑯᒪᐠ ᒋᐸᑭᑎᓇᐊᐧᐨ ᐅᓂᒐᓂᔑᐊᐧᐣ ᒋᐱᐊᐧᐣᑐᐃᐧ ᒣᑕᐁᐧᓂᐨ. ᒋᑭᑫᐣᑕᒧᐊᐧᐨ ᑭᐢᐱᐣ ᑫᑯᐣ ᑲᐃᐧᔑᒋᑲᓂᐊᐧᐣᐠ, ᐊᒥᐱᑯ ᑌᐯᐧ ᒋᑐᒋᑲᑌᓂᐠ.”
ᑲᑲᐯᓭᐠ ᐃᔑᒋᑫᐃᐧᓇᐣ ᑲᐅᐣᒋ ᐅᐣᑕᒥᐦᐊᑲᓄᐊᐧᐨ ᐅᐢᑲᑎᓴᐠ
ᐱᓂᐢ ᑭᐊᓂᓯᓭ ᒋᐊᓂ ᐸᑭᑌᐣᑕᒧᐊᐧᐨ ᐅᑕᐯᑫᓂᒧᐃᐧᓂᐊᐧ ᒪᓄᐊᑭᔑᐠ ᑲᐊᓂ ᒪᒋᑐᒋᐣ ᒣᑕᐁᐧᒋᑫᐃᐧᓇᐣ ᔕᑯᐨ ᑕᐢ ᑯᑕᐠ ᑫᑯᐣ ᑭᐅᐣᒋ ᒧᐦᑭᓭ, ᐃᑭᑐ, ᐁᐸᐱᓭᐨ.
“ᓂᐢᑕᑦ ᐃᐁᐧ ᑲᑭ ᒪᒋᑐᔭᐣᑭᐸᐣ ᐸᑲᐦᐊᑐᐁᐧᐃᐧᐣ ᑫᑲᐟ ᑭᑭᒋᒪᒋᓭᐸᐣ,” ᒪᓄᐊᑭᔑᐠ ᑭᐃᑭᑐ. “ᐊᒥ ᑲᑭᑐᑕᒧᐊᐧᐨ ᐃᒪ ᐁᑕ ᐁᐃᐧᐃᔑᒣᑕᐁᐧᐊᐧᐨ ᐃᒪ ᑲᐸᑭᓇᑫᓂᐨ ᑲᐃᔑ ᒣᑕᐁᐧᓂᐨ.
ᐁᑲᐧ ᑕᐢ ᓄᑯᑦ ᐅᑐᑕᐣ ᑲᑭᓇ ᐁᐃᐧᐣᑕᒪᐊᐧᒋᐣ ᐁᑲ ᐃᐧᓂᑯ ᐊᐃᐧᔭ ᒋᐸᑭᓇᑫᐨ ᒥᓇ ᐁᑲ ᒋᐸᑭᓇᐊᐧᑲᓄᐨ.
“ᑲᑭᓇ ᐊᐃᐧᔭ ᐁᐸᑭᓇᑫᐨ ᑕᐱᓇᑲ ᑲᑭᓇ ᐊᐃᐧᔭ ᒪᒪᐤ ᐃᓂᑯᐠ ᐁᑭᐃᔑ ᐊᐧᑲᐃᐧᐨ. ᐊᒥᐦᐃᐁᐧ ᑲᐅᐣᒋ ᑐᒋᑲᑌᐠ ᒋᐊᐧᐊᐧᑲᐃᐧᓇᓂᐊᐧᐠ.”
ᓂᐢᑕᑦ ᑲᐊᓂᒪᒋᑐᔭᐣᑭᐸᐣ, ᐅᐁᐧ ᑭᑭᓄᐦᐊᒪᑫᐃᐧᐣ ᑭᐊᓂ ᒪᐣᑫᑕᑲᐧᐣ ᒪᓄᐊᑭᔑᐠ ᐁᐃᓀᐣᑕᐠ ᑫᑲᐟ ᑫᒋᐣ ᑲᑭᓇ ᐅᐢᑲᑎᓴᐠ ᐁᑭ ᐃᐧᒋᑕᐧᐊᐧᐨ ᐅᑫᐧᓂᐊᐧᐣ ᑲᑭᒪᒋᑐᒋᐣ ᒣᑕᐁᐧᒋᑫᐃᐧᓇᐣ.
ᐅᐢᑲᑎᓴᐠ ᓂᐢᑕᑦ ᑲᑭᐃᐧᒋᑕᐧᐊᐧᐨ ᐊᔕ ᐊᓂᑭᒋᔭᐦᐊᐃᐧᐊᐧᐠ ᐁᑲᐧ ᑕᐢ ᐊᑎᐟ ᐊᔕ ᐅᑕᔭᓇᐊᐧ ᑎᐱᓇᐁᐧ ᐅᑎᐯᐣᒋᑫᐃᐧᓂᐊᐧ. ᒪᓄᐊᑭᔑᐠ ᒪᐊᐧᐨ ᐅᐣᒋ ᒥᓄᑌᐦᐁ ᐁᐊᐧᐸᒪᒋᐣ ᐅᐢᑲᑎᓴᐣ ᑲᐧᔭᐠ ᐁᐃᔑᒪᒥᑎᓀᐣᑕᒧᓂᐨ ᐃᒪ ᐅᑎᐯᐣᒋᑫᐃᐧᓂᐊᐧ ᐅᐱᒪᑎᓯᐃᐧᐣᓂᐣ.
“ᐊᒥ ᐁᐃᓀᐣᑕᒪᐣᐠ ᐸᐣᑭ ᐁᑭ ᐅᐣᒋ ᐃᐧᒋᐦᐊᑲᐧ ᒋᐅᐣᒋ ᑭᑫᐣᑕᒧᐊᐧᐨ ᒥᓄᔭᐃᐧᐣ ᒥᓇ ᔓᑲᐊᐧᐱᓀᐃᐧᐣ,” ᑭᐃᑐ. “ᐊᒥ ᐁᐃᓀᐣᑕᒪᐣ ᐁᐦᐊᓂ ᐊᐣᒋᓭᐠ ᐅᐁᐧ ᑲᐃᔑᐱᒪᑎᓯᔭᐠ ᐁᐧᑎ ᓂᑲᐣ ᑫᐊᓂᐱᒪᑎᓯᐊᐧᐨ ᑫᐊᓂᓯᓭᐊᐧᐨ.”
ᒪᓄᐊᑭᔑᐠ ᐃᑭᑐ ᐅᐁᐧ ᑭᑭᓄᐦᐊᒪᑫᐃᐧᐣ ᑲᐃᐧᐣ ᑕᑭ ᐅᐣᒋ ᑲᐢᑭᒋᑲᑌᐸᓯᐣ ᑭᐢᐱᐣ ᐁᑲ ᑭᐅᐣᒋ ᐃᐧᒋᐦᐃᑯᔭᑭᐸᐣ ᐃᐢᑯᓄᐃᐧᑲᒥᑯᐣ, ᐊᑯᓯᐃᐧ ᐅᑕᓄᑭᐠ, ᐅᑭᒪᑲᐣ ᒥᓇ ᐅᓇᔓᐁᐧᐃᐧᓂᐊᐧᐠ ᒥᓇ ᑯᑕᑭᔭᐣ ᒪᒋᑕᐃᐧᓇᐣ ᑲᑭᐃᐧᒋᑕᐧᐊᐧᐨ ᑲᑲᑫᐧ ᔓᓂᔭᑲᑌᑭᐣ ᓂᒣᑕᐁᐧᒋᑫᐃᐧᓇᐣ.
ᐃᐢᑯᓄᐃᐧᑲᒥᐠ ᐅᑭ ᒪᒋᑐᓇᐊᐧ ᑭᔐᐸᓀᑫᐧᐃᐧᐣ ᒥᓇ ᓇᑲᐁᐧᐢ ᑲᐅᐣᒋ ᔕᑲᒧᓇᓂᐊᐧᐠ ᑲᐊᔕᑫᐊᐧᐨ, ᔓᑲᐃᐧ ᑭᑭᓄᐦᐊᒪᑫᐃᐧᐣ ᓂᓯᐣ ᐊᑯᓇᐠ ᓂᐃᐧᐣ ᑲᐊᑯᐢᑲᐊᐧᐨ ᑭᑭᓄᐦᐊᒪᐊᐧᑲᓇᐠ, ᒥᓇ ᑲᔦ ᑲᑯᒋᐸᐦᐃᑎᐊᐧᐨ ᐅᑕᔭᓇᐊᐧ ᑲᑐᑕᒧᐊᐧᐨ ᐃᒪ ᐃᐢᑯᓄᐊᐧᑲᒥᐠ.
ᐃᒪ ᑕᔑᑫᐃᐧᓂᐠ ᑲᐊᔭᐊᐧᐨ ᔓᓂᑲᐊᐧᐱᓀᐃᐧ ᑲᑭᑭᓄᐦᐊᒪᐊᐧᑲᓄᐊᐧᐨ ᒪᐊᐧᐨ ᒥᓄᓭᐊᐧᐣ.
ᐅᑫᐧᓂᐊᐧᐣ ᑭᑭᓄᐦᐊᒪᑫᐃᐧᓇᐣ, ᐊᑲᐢᐟ ᐱᓯᑦ ᐃᔑᑐᒋᑲᑌᐊᐧᐣ, ᐊᒥ ᐁᑐᑕᒪᐣᐠ ᐁᑲᑫᐧᑕᐦᐊᑐᐊᐧᐨ, ᐊᓂᔑᓇᐯ ᒪᐢᑭᑭᐣ, ᐊᐧᑕᐱᔭᐱᐣ, ᐅᑕᑯᑯᒥᐃᐧ ᒪᐢᑭᑭᐣ, ᑲᐸᔑᒧᐃᐧᐣ, ᑲᓇᓇᑲᒋᐦᐊᑲᓄᐨ ᐊᓂᐣ ᑲᐊᐱᒋᐢᑲᐨ ᔓᑲ ᒥᓇ ᐃᓇᒋᑫᐃᐧᐣ.
“ᒪᐊᐧᐨ ᐊᐊᐧᔑᔕᐠ ᐅᑭ ᒥᓀᐣᑕᓇᐊᐧ,” ᐃᑭᑐ. “ᒥᓇᐊᐧ ᐃᐧᐱᑭᐁᐧᐱᔕᐊᐧᐠ. ᒪᐊᐧᐨ ᐅᐱᑐᓇᐊᐧ ᒥᓇᐊᐧ ᒋᑐᒋᑲᑌᓂᐠ.”
ᐊᒥᐱᑯ ᐁᔑᑲᐯᓭᑭᐣ ᒣᑕᐁᐧᒋᑫᐃᐧᓇᐣ. ᒣᑲᐧᐨ ᑲᓂᐱᐠ, ᑯᒋᐸᐦᐃᑎᓇᓂᐊᐧᐣ ᒥᓇ ᐸᑲᐦᐊᑐᓇᓂᐊᐧᐣ. ᑲᓯᑲᐧᐠ ᑕᐢ ᑐᐦᐊᓂᐊᐧᐣ ᑲᒪᐃᐧᓀᐦᐅᑎᓇᓂᐊᐧᐠ ᒥᓇ ᑭᑎᑫᐃᐧᐣ ᑲᒪᐃᐧᓀᐦᐅᑎᓇᓂᐊᐧᐠ.
ᓄᑯᑦ ᑲᐊᑭᐊᐧᐠ, ᐸᑦᑭᐣ ᑲᓂᑕᐃᐧᑭᐦᐊᑲᓄᐨ ᑲᒪᐃᐧᓀᐦᐅᑎᓇᓂᐊᐧᐠ ᑭᑐᒋᑲᑌ.
“ᐯᔑᐠ ᐁᐦᑕ ᒪᐊᐧᐨ ᐁᑭᒋ ᐊᑲᒉᐣᒋᐨ ᐸᑦᑭᐣ ᑭᓂᑕᐃᐧ ᐊᒥᑕᐢ ᐊᐁᐧ ᑲᑭᐸᑭᓇᑫᐨ.”
ᒥᓇᐊᐧ ᐊᐦᑭᐊᐧᐠ, ᒪᓄᐊᑭᔑᐠ ᐅᐃᐧᑐᑕᐣ ᐊᐢᑭᐸᐤ ᑲᑭᑎᑲᑌᑭᐣ ᒋᒪᐃᐧᓀᐦᐅᑎᐊᐧᐨ ᐃᐧᑐᑕᒧᐃᐧᓂᑫ. ᑲᐃᐧᐣ ᐅᑲ ᑭᑫᐣᑕᓯᓇᐊᐧ ᐁᐅᔑᑐᐊᐧᐨ ᐁ ᐊᐢᑭᐸᐤᐃᐧ ᑭᑎᑫᐊᐧᐨ.
“ᐯᔑᑲᐧ ᑭᔑᑲᓂᐠ, ᑲᑭᓇ ᐅᒪ ᑲᑲᐯᔑᐊᐧᐨ ᑕᐃᐧᓂᐠ ᐅᑲᔭᓇᐊᐧ ᑭᑎᑲᓂ ᐃᒪ ᑕᐢ ᑲᑭ ᐅᐣᒋ ᒪᒋᓭᐠ ᐸᑦᑭᐣ ᑭᑎᑫᐃᐧ ᒪᐃᐧᓀᐦᐃᑫᐃᐧᓂᐠ.”
ᐁᑲᐧ ᑕᐢ ᔑᐣ ᑲᐱᐳᐣᐠ, ᔓᐢᑲᐧᑕᐦᐊᓂᐊᐧᐣ, ᐱᒪᑕᐦᐊᓂᐊᐧᐣ, ᐱᒪᑯᐁᐧᐸᐦᐃᑲᓂᐊᐧᐣ ᒥᓇ ᐁᐧᐸᐦᐃᑲᓂᐊᐧᐣ. ᐅᑭᑫᐣᑕᓇᐊᐧ ᑕᐢ ᓄᑯᑦ ᑫᑯᓀᓂ ᑫᐱᑐᐊᐧᐨ ᐅᐢᑲᑎᓴᐠ ᑲᐊᓂᔑᐊᔭᐣᒋᐁᐧᐸᐠ, ᒪᓄᐊᑭᔑᐠ ᐃᑭᑐ.
ᐁᑲᐧ ᑕᐢ ᑲᐊᓂᐱᐳᐣᐠ, ᐊᒥ ᐁᑐᑕᐣᐠ ᐁᐅᔑᑐᒋᐣ ᑫᑕᓇᑕᐦᐁᓂᐨ ᐊᐊᐧᔑᔕᐣᐨ ᐊᒥᐱᑯ ᐁᐦᐊᓂᔑ ᐱᐦᑐᐊᐧᐨ ᒋᐊᓂᑐᑕᒪᐃᐧᐣᑕᐧ.
“ᑭᐢᐱᐣ ᐅᔑᑐᔭᐣ, ᐅᐢᑲᑎᓴᐠ ᑕᐱᔕᐊᐧᐠ, ᒪᓄᐊᑭᔑᐠ ᐃᑭᑐ, ᐃᒪ ᐁᑭ ᐅᐣᒋ ᓇᐱᐦ ᐃᑭᑐᐨ ᒪᓯᓇᑌᓯᒋᑲᓂᐠ ᐃᑭᑐᐃᐧᐣ ᐁᑭᐅᐣᒍᑕᐱᓇᐣᐠ. “ᐊᐦᐱ ᑭᑭᔑᑲᐧᔭᐣᒋᔭᐣ, ᐅᐢᑲᑎᓴᐠ ᑕᒪᑕᑕᐦᐁᐊᐧᐠ. ᐊᐱ ᐦᐃᐁᐧ ᒪᒋᓭᐠ, ᒧᔕᐦᐃ ᐊᔕ ᐁᑭ ᑭᔑᑐᔭᐣ ᓂᑕᓄᑭᐃᐧᐣ.”
ᒪᓄᐊᑭᔑᐠ ᑲᑭᓇ ᐊᐃᐧᔭᐣ ᐅᑲᑫᐧᑕᑯᓇᐣ ᑲᒥᓴᐁᐧᐣᑕᒧᓂᐨ ᐁᐃᐧ ᐃᐧᒋᑕᐧᓂᐨ ᒣᑕᐁᐧᒋᑫᐃᐧᓇᐣ. ᑭᐢᐱᐣ ᐁᑲ ᐁᐅᑕᐸᒋᒋᑲᓂᓂᐨ ᐅᐢᑲᑎᓴᐣ, ᐅᓇᓇᐣᑕᐊᐧᐸᑕᓇᐣ ᐸᑭᑎᓂᑫᐃᐧᓇᐣ.
ᓀᐣᑲᐃᐧᓴᑲᐦᐃᑲᓂᐠ ᐊᐊᐧᔑᔕᐠ ᑲᐧᔭᐠ ᐅᐱᓯᐣᑕᐊᐧᐊᐧᐣ ᐃᑫᐧᓂᐊᐧᐣ ᒣᑕᐊᐧᓂᑲᓇᐣ ᑲᐊᓂᒧᑕᒧᓂᐨ ᒥᓄᔭᐃᐧᓂ.
“ᓂᓂᐦᑕ ᐱᑕᐱᓯᓇᐸᐣ ᐊᐦᑯ ᐁᑲᐧ ᑕᐢ ᓂᑭ ᐊᓂ ᑭᑫᓂᒥᑯᐸᓂᐠ ᐊᐊᐧᔑᔕᐠ ᑲᐃᓂᑕᑯᓯᐊᐧᐠ ᐊᒥᑕᐢ ᑲᑭ ᐊᓂ ᐊᐣᒋᑐᔭᐣᑭᐸᐣ ᐅᐁᐧ,” ᐃᑭᑐ. “ᒪᐊᐧᐨ ᐅᒋ̇ᑫᐣᑕᓇᐊᐧ ᐊᐊᐧᔑᔕᐠ ᑲᐊᐧᐸᒪᐊᐧᐨ ᑲᐱᔕᓂᐨ ᐅᑫᐧᓂᐊᐧᐣ. ᒪᐊᐧᐨ ᑲᐧᔭᐠ ᐅᐱᓯᐣᑕᓇᐊᐧ.”
ᒪᓄᐊᑭᔑᐠ ᐊᐣᑎᑕᒧᐃᐧᑲᒥᐠ ᑲᑭᑐ ᐃᒪ ᐅᑕᔑᑫᐃᐧᓂᐠ ᑕᓴᐧ ᑲᐊᐱᑕᐊᐧᐠ ᑲᐃᐢᑲᐧᓇᐊᐧᑫᐠ.
“ᓂᑲᑫᐧ ᐊᓂᒧᑕᓇᐣ ᐊᓂᐣ ᑫᑭᔑ ᒥᓄᔭᐸᐣ ᐊᐃᐧᔭ ᐅᐱᒪᑎᓯᐃᐧᓂᐠ. ᑕᓴᐧ ᑲᐊᐱᑕᐁᐧᓭᐠ ᑲᑭᔐᐸᔭᐠ, ᐱᓇᒪ ᐊᑯ ᓂᓴᑲᒪᑕᑊ ᐁᒪᒥᑎᓀᐣᑕᒪᐣ ᐃᐁᐧ ᔓᓂᑲᐊᐧᐱᓀᐃᐧᐣ.”
ᒥᐱᑯ ᑫᒋᐣ ᐁᑕ ᐃᒪ ᑫᐃᓯᓭᓂᐠ ᒋᓴᑲᒪᑕᐱᐨ ᑲᐯᐱᒧᑯᓇᑲ.
“ᑲᐃᐧᐣ ᓂᒥᓀᐧᐣᑕᓯᐣ ᒋᒧᒋ ᐊᐱᔭᐣ ᐃᒪ ᑲᑕᓇᓄᑭᔭᐣ,” ᐃᑭᑐ. “ᐊᒥᐱᑯ ᐁᐃᔑ ᓇᐣᑕᐁᐧᐣᑕᒪᐣ ᐁᐧᑎ ᓂᑕᔑᑫᐃᐧᓂᐠ ᑫᑯᓇᐣ ᒣᑕᐁᐧᒋᑫᐃᐧᓇᐣ ᒋᑐᒋᑫᑕᒪᐃᐧᑲᐧ ᐊᐊᐧᔑᔕᐠ. ᑲᐃᐧᐣ ᓂᐱᐦᐊᓯᐣ ᐊᐃᐧᔭ ᒋᑐᑕᐠ ᑫᑯᓂ ᓂᐣ ᐱᑯ ᓂᑕᓂᑐᑕᓇᐣ.”
ᑭᐢᐱᐣ ᒪᐊᐧᐨ ᑭᒋᐊᓂᑭ ᒪᓄᐊᑭᔑᐠ ᐃᓂᑕᑲᐧᐠ ᐅᐁᐧ ᑎᐸᒋᒧᐃᐧᐣ, ᐊᒥᐱᑯ ᑌᐯᐧ ᐁᐃᓯᓭᓂᐠ.
“ᓂᑭ ᓇᓇᒪᔦᐣᑕᓇᐸᐣ ᓂᑯᑕᐧᓯᑎᐸᐦᐃᑲᐣ ᐁᐊᐧᑲᐦᐃᑫᔭᐸᐣ ᐊᐦᑯ,” ᐃᑭᑐ. “ᐊᒥᐱᑯ ᐃᒪ ᐁᑐᑕᒪᐣ ᑲᐃᔑᐊᓄᑭᔭᐣ ᓄᑯᑦ. ᒪᐊᐧᐨ ᓂᑭᒋᓀᐣᑕᐣ ᒥᓇ ᑲᔦ ᐅᐁᐧ ᓂᑕᔑᑫᐃᐧᐣ, ᒥᓂᑯᐠ ᑲᐊᑯᓭᔭᐣ ᓂᐊᐧᑲᐃᐧᐃᐧᐣ ᐊᒥᐱᑯ ᑫᑐᑕᒪᐣ, ᑲᐃᐧᐣ ᓂᑭ ᑐᑕᓯᐣ ᐁᑲ ᓇᐣᑕ ᑫᑯᐣ ᒋᑭᐃᔑ ᑲᑫᐧᐃᐧᒋᑕᐧᔭᐣ ᐅᐁᐧ ᔓᓂᑲᐊᐧᐱᓀᐃᐧᐣ ᑲᒥᒋᑲᑌᐠ. ᐅᐢᑲᑎᓴᐠ ᑲᐅᐣᒋᑐᑕᒪᐣ. ᑲᐃᐧᐣ ᐊᓂᑭᐃᐧᐣ ᐅᐁᐧ ᓂᑎᔑᑲᓇᐊᐧᐸᑕᓯᐣ. ᒥᔕ ᑫᑭ ᐃᔑᓇᑯᑐᔭᐣᑭᐸᐣ ᑭᐱᒪᑎᓯᐃᐧᓂᓇᐣ.”