ᐊᓂᔑᓇᐯ ᐊᐢᑭ ᑲᐃᐧᐣ ᒋᐃᐧᐅᑕᐱᓇᐠ ᑭᒋ ᑭᐁᐧᑎᓄᐠ ᐅᓇᑯᓂᑫᐃᐧᐣ

Create: 12/01/2015 - 19:39

ᐊᓂᔑᓇᐯ ᐊᐢᑭ ᐅᒪᒥᑎᓀᐣᑕᒧᐦᐃᑯᓇᐊᐧ ᑭᒋ ᑭᐁᐧᑎᓄᐠ ᐅᓇᑯᓂᑫᐃᐧᐣ ᒋᒪᒋᐱᓂᑯᐊᐧᐨ ᐃᒪ ᑲᐅᐣᑕᒋᐦᐅᐊᐧᐨ ᐊᐦᑭᑲᐠ.
ᐊᒥᐦᐃ ᐁᐃᔑ ᓂᓯᑎᑕᒧᐊᐧᐨ ᐃᐧᓇᐊᐧ ᐁᑎᐯᐣᑕᒧᐊᐧᐨ ᐃᒪ ᒋᐅᐣᒋ ᐊᐸᒋᑐᐊᐧᐨ ᑫᐱᒪᒋᐦᐅᐊᐧᑫᐊᐧᐨ, ᐃᑭᑐ ᑭᒋ ᐅᑭᒪᑲᓀᐢ ᒪᐃᐠ ᒥᑕᐟᑕᐊᐧᐸᐣ ᐁᑭ ᐊᔭᒥᐦᐊᑲᓄᐸᐣ ᐊᐧᑌᐸᑲᐃᐧᐱᓯᑦ 24 ᑲᐃᓇᑭᓯᐨ, ᐯᔑᑯᑭᔑᑲ ᐊᐦᐱ ᑲᑭ ᔕᐳᓂᑲᑌᐠ ᐅᓇᑯᓂᑫᐃᐧᐣ 191 ᓂᐦᓴᐧ ᐊᓂᒧᒋᑫᐃᐧᐣ ᐃᒪ ᐅᐣᑌᕑᐃᔪ ᑭᒋ ᐅᓇᑯᓂᑫᐃᐧᑲᒥᑯᐠ. ᓇᑕᐁᐧᐣᑕᒧᐠ ᐊᓂᔑᓇᐯ ᐃᐢᑯᓂᑲᓇᐣ ᒋᐱᒥᑭᑫᐣᑕᒧᓇᑲᓄᐊᐧᐨ ᑫᐊᓂᔭᐃᓯᓭᓂᐠ. ᐅᐁᐧ ᐅᓇᑯᓂᑫᐃᐧᐣ ᐊᒥᐦᐃ ᐁᐃᔑᓇᑲᐧᐠ ᐊᐸᐣ ᐁᑲ ᐅᐁᐧ ᒋᐃᓯᓭᐠ.
ᒥᑕᐠᑕᐊᐧᐸᐣ ᐃᑭᑐ ᐊᓂᐣᑕ ᐊᓂᔑᓇᐯ ᐃᐢᑯᓂᑲᓇᐣ ᐅᐃᐧᒋᑲᐸᐃᐧᑕᓇᐊᐧ ᐅᓇᑯᓂᑫᐃᐧᐣ 191 ᐁᑲᐧ ᑕᐢ ᐊᐦᑎᐟ ᐅᑭᐸᑯᐢᑲᓇᐊᐧ ᐅᓇᑯᓂᑫᐃᐧᐣ 191.
ᑲᐧᔭᐠ ᐱᓇᒪ ᓇᒪᒥᑎᓀᐣᑕᒥᐣ ᐊᐣᑎ ᓀᑫ ᑫᐃᔑ ᒪᑕᓂᑲᑌᐠ ᐅᐁᐧ, ᒥᑕᐟᑕᐊᐧᐸᐣ ᐃᑭᑐ. ᐊᓂᐣ ᑫᐃᔑ ᑲᓄᑕᒪᐠ ᐅᐁᐧ, ᐊᓂᐣ ᑫᐃᔑ ᒥᑲᑕᒪᐠ, ᐊᓂᐣ ᑫᐃᔑ ᓇᓇᑲᒋᑐᔭᐠ ᐅᐁᐧ?
ᒥᑕᐟᑕᐊᐧᐸᐣ ᑭᐃᑭᑐ ᑭᐢᐱᐣ ᐁᔭᑫᐧᐣ ᒣᑲᐧᐨ ᐊᓂᑭᐊᐧᑫᐧᐣ ᐅᓇᓇᐣᑕᐊᐧᓯᓂᐁᐧᐠ ᑕᑭᐱᑎᓂᑲᑌᐊᐧᐣ.
ᑲᐃᐧᐣ ᓂᑭᑫᐣᑕᓯᐣ ᐊᓂᐣ ᑲᑭ ᐅᐣᒋᓯᓭᐠ ᐅᐁᐧ ᐅᓇᑯᓂᑫᐃᐧᐣ ᒋᓴᐳᓭᐠ ᒣᑲᐧᐨ ᐃᐧᐣ ᑲᔦ ᑭᐁᐧᑎᐣ ᐅᐣᑌᕑᐃᔪ ᐁᐦᐊᓂᑲᑕᒧᐊᐧᐨ ᑯᑕᐠ ᐱᐊᐧᐱᑯᑫᐃᐧ ᐊᓂᑭᐃᐧᐣ ᒣᑲᐧᐨ ᑲᐱᒥᐊᓂᒧᒋᑲᑌᐠ, ᒥᑕᐟᑕᐊᐧᐸᐣ ᑭᐃᑭᑐ. ᓇᐣᑕᐁᐧᐣᑕᑲᐧᐣ ᑲᑭᓇ ᐊᐃᐧᔭ ᒋᑭ ᓂᓯᑎᑕᑭᐸᐣ, ᒥᓇ ᐱᑯ ᑲᔦ ᑲᑭᓇ ᑕᔑᑫᐃᐧᓇᐣ ᑲᔭᑭᐣ.
ᓂᓇᐣᑕᐁᐧᐣᑕᒥᐣ ᓂᑫᓂᓇᐃᐧᐣᐟ ᒋᐅᐣᒋ ᒥᓄᓭᑭᐣ ᓂᒪᒋᑕᐃᐧᓂᓇᐣ ᐅᒪ ᑌᑎᐸᐦᐃ ᐊᓂᑭᐃᐧᓇᐣ ᑲᐃᔑᔭᑭᐣ.
ᑭᒋ ᐊᒥᑭᑯᒪ ᐅᑕᓄᑭᓇᑲᓇᐣ ᑭᐃᑭᑐ ᐃᒪ ᒪᒪᑌᑕᐃᐧᐱᐊᐧᐱᑯᐠ ᐁᑭ ᐅᐣᒋ ᒪᓯᓇᐦᐃᑫᐨ ᐃᐁᐧᓂ ᐅᐣᒋ ᐅᓇᑯᓂᑫᐃᐧᐣ 191 ᑲᑭ ᐃᑭᑐᒪᑲᐠ ᒋᐊᓂ ᐊᔭᑭᐣ ᐅᐢᑭ ᑫᑯᓇᐣ ᑫᐊᓂᒪᒋᓭᑭᐣ ᒥᓇ ᑲᔦ ᐃᒪ ᒋᐅᐣᒋ ᐃᐧᒋᐦᐃᑯᐊᐧᐨ ᐅᐣᑌᕑᐃᔪ ᑭᒋ ᑭᐁᐧᑎᓄᐠ ᑲᔭᐊᐧᐨ.
ᐅᑭᒪᐃᐧᐣ ᐅᑲᐱᒥ ᐃᐧᑕᓄᑭᒪᐣ ᐊᓂᔑᓂᓂᐊᐧᐣ ᒥᓇ ᑭᐁᐧᑎᓄᐠ ᑕᔑᑫᐃᐧᓇᐣ ᒋᐊᓂᑲᑕᒧᐊᐧᐨ ᑕᐱᑕ ᒋᑭ ᐊᔭᑭᐸᐣ ᑫᐅᐣᒋ ᑲᓇᐁᐧᐣᒋᑲᑌᐠ ᑭᑕᐦᑭᒥᓇᐣ ᒥᓇ ᑲᔦ ᒋᐱᒥᐃᐧᒋᑲᑌᐠ ᐊᐣᑎ ᑫᑭ ᐊᓄᐣᒋ ᐱᒪᒋᐦᐅᓇᓂᐊᐧᑭᐸᐣ, ᐃᑭᑐ ᑭᕑᐁᐠ ᒪᐟᓂᔪᓫ, ᑭᒋ ᐊᒥᑯᑭᒪ ᐅᑕᓂᑭᓇᑲᓇᐣ ᑲᐊᔭᒥᑕᒪᑯᐨ. ᐊᓂᔑᓇᐯ ᐅᒪᓂᑐᐃᐧ ᒥᓂᑯᐃᐧᓂᐊᐧ ᓂᓯᑕᐃᐧᓂᑲᑌᐊᐧᐣ ᒥᓇ ᒪᐢᑲᐊᐧᑌᐊᐧᐣ ᐃᒪ ᑭᒋ ᐅᓇᑯᓂᑫᐃᐧᓂᐠ ᐁᑲᐧ ᑕᐢ ᐅᐣᑌᕑᐃᔪ ᐅᑭᒪᐃᐧᐣ ᓇᐣᑕᐁᐧᐣᑕᑯᓯ ᒋᐱᒥᓂᔕᐦᐊᐠ ᐅᐁᐧ ᑲᐃᓇᑌᐠ. ᐅᓇᑯᓂᑫᐃᐧᐣ 191 ᑲᐃᐧᐣ ᐃᔑᓇᑲᐧᓯᓄᐣ ᐅᒪ ᒋᐅᐣᒋ ᐊᐣᒋᓭᐠ ᐅᐁᐧ.
ᒪᐟᓂᔪᓫ ᐃᑭᑐ ᐃᐁᐧ ᑲᐱᒪᓄᑲᑌᐠ ᐸᑭᑕᔑᐁᐧᐃᐧᐣ ᐃᐁᐧ ᐅᐣᒋ ᑭᒋ ᑭᐁᐧᑎᓄᐠ ᐅᓇᑯᓂᑫᐃᐧᐣ ᐯᔭᑌᑕᑲᐧᐣ ᐁᐃᑭᑐᒪᑲᐠ ᐃᑫᐧᓂᐊᐧᐣ ᑕᔑᑫᐃᐧᓇᐣ ᑲᑭ ᐅᓇᑐᐊᐧᐨ ᐅᓇᒋᑫᐃᐧᓇᐣ ᐊᒥᐦᐃ ᐃᑫᐧᓂᐊᐧᐠ ᐃᐧᓇᐊᐧ ᑫᑭ ᔕᐳᓇᒧᐊᐧᐸᐣ.
ᐅᓇᑯᓂᑫᐃᐧᐣ 191 ᐊᒥᐦᐃ ᓂᐢᑕᑦ ᐁᐃᓯᓭᐠ ᐅᒪ ᐅᐣᑌᕑᐃᔪ ᐊᓂᔑᓂᓂᐊᐧᐠ ᐅᐸᑭᑕᔑᐊᐧᒋᑫᐃᐧᓂᐊᐧ ᐃᐁᐧ ᐅᐣᒋ ᑕᔑᑫᐃᐧᓂᐠ ᑲᐅᓇᑐᐊᐧᐨ ᐊᓂᐣ ᑲᐃᐧ ᐃᓇᐸᒋᑐᐊᐧᐨ ᐅᑕᐦᑭᒥᐊᐧᐣ ᐁᓇᐣᑕᐁᐧᐣᑕᑲᐧᓂᐠ ᒋᐸᑭᑎᓇᒧᐊᐧᐨ ᐃᒪ ᐅᓇᑯᓂᑫᐃᐧᓂᐠ, ᒪᐟᓂᔪᕑ ᑭᐃᑭᑐ.
ᔑᐸᐧᑲᒪ ᐅᓂᑲᓂᑕᒪᑫᐠ ᑭᐃᑭᑐᐸᓂᐠ ᐊᐧᑌᐸᑲᐃᐧᐱᓯᑦ 22 ᑲᐃᓇᑭᓯᐨ ᑲᑭ ᐸᑭᑎᓂᑲᑌᑭᐸᐣ ᑎᐸᒋᒧᐃᐧᐣ ᐁᑲ ᐁᑭ ᐅᐣᒋ ᐊᓂᒧᒋᑲᑌᓂᐠ ᑲᐃᔑ ᒪᒥᑎᓀᐣᑕᒧᐊᐧᐨ ᒥᓇ ᑲᔦ ᐃᐁᐧ ᐅᐣᒋ ᐅᓇᑯᓂᑫᐃᐧᐣ 191 ᐁᑲᐧ ᑕᐢ ᑲᔦ ᐁᑲ ᐃᐧᑲ ᐁᑭ ᐅᐣᒋ ᐸᑭᑎᓇᒧᐊᐧᐨ ᐅᓇᑯᒧᐃᐧᓂᐊᐧ ᐅᓇᑯᓂᑫᐃᐧᐣ 191 ᐅᐣᒋ.
ᓂᓇᐃᐧᐣᐟ ᔑᐸᐧᑲᒪ ᐊᓂᔑᓂᓂᐊᐧᐠ ᐊᒥᐱᑯ ᑫᐃᔑ ᐱᒥᐊᐸᒋᑐᔭᐠ ᓂᑕᓂᔑᓂᓂᐃᐧ ᒪᓂᑐᐃᐧ ᒥᓂᑯᐃᐧᓂᓇᐣ ᑲᐃ ᐃᔑᐸᑭᑎᓇᑭᐸᐣ ᒋᑐᑕᒪᐠ ᓂᒪᓂᑐᒥᓇᐣ, ᐃᑭᑐ ᐊᐧᐊᐧᑲᐱᐃᐧᐣ ᐅᑭᒪᑲᐣ ᒐᔓᐊᐧ ᐱᕑᐊᐧᐠ. ᑲᑭᓇ ᐊᐦᑭ̇ᐣ ᒥᓇ ᐃᒪ ᑲᐅᐣᑎᓂᑲᑌᑭᐣ ᐊᐸᒋᑕᐃᐧᓇᐣ ᐅᓇᒋᑫᐃᐧᓇᐣ ᒥᐦᐃᒪ ᑫᐅᐣᒋ ᐊᓂᑲᑕᒪᐠ ᐃᐁᐧ ᓂᐢᑕᑦ ᑲᑭ ᐃᔑ ᒥᓂᑯᔭᑭᐸᐣ ᓂᑕᐦᑭᒥᓇᐣ, ᑲᓇᐊᐧᐸᐣᒋᑫᐃᐧᓂᓇᐣ ᒥᓇ ᓂᐸᐸᒥᓯᐃᐧᓂᓇᐣ.
ᔑᐸᐧᑲᒪ ᑭᐃᑭᑐᐸᐣ ᐃᑫᐧᓂᐊᐧᐣ ᐊᐦᑭᐤ ᐅᓇᒋᑫᐃᐧᓂᓇᐣ ᑲᐧᔭᐠ ᒋᑐᒋᑲᑌᑭᐣ, ᑌᐯᐧᐃᐧᓂᐠ ᒥᓇ ᑕᐱᑕᐁᐧᐣᑕᒧᐃᐧᓂᐠ ᑲᔦ ᒋᐯᑌᐦᑕᑲᐧᐠ ᐃᐁᐧ ᑲᑲᑫᐧ ᐊᓂᑲᑌᐠ ᑲᑭᓇ ᐊᓂᔑᓂᓂᐊᐧᐠ ᐅᒪ ᐯᒪᑎᓯᐊᐧᐨ ᐅᐣᑌᕑᐃᔪ ᒋᑭ ᐅᐣᒋ ᐃᐧᒋᐦᐃᑯᐊᐧᐸᐣ.
ᐊᓂᔑᓇᐯ ᐃᐢᑯᓂᑲᓇᐣ ᐅᑲᔭᐸᒋᑐᓇᐊᐧ ᑎᐱᓇᐁᐧ ᐅᒪᐢᑲᐃᐧᓯᐃᐧᓂᐊᐧ ᐅᐁᐧ ᒋᒥᑲᑕᒧᐊᐧᐨ
ᐊᒥᐱᑯ ᑫᐃᔑ ᐱᒪᐊᓂᑲᑕᒪᐠ ᐃᐁᐧ ᑲᑎᐯᐣᑕᒪᐠ ᓂᑕᐦᑭᒥᓇᐣ ᒥᓇ ᓂᐱᑲᐠ, ᐃᑭᑐ ᐊᐧᓇᒪᐣᓴᑲᐦᐃᑲᓂᐠ ᐅᑭᒪᑲᐣ ᐊᓇᐧᑎᓂᐠ ᐁᐧᓇᐱᑕᑦ. ᑭᐢᐱᐣ ᐅᐱᒪᑲᐧᔓᐁᐧᐠ ᒥᓇ ᑲᓇᓇᐣᑕᐊᐧᓯᓂᐁᐧᐊᐧᐨ ᐱᐣᑎᑫᐊᐧᐨ ᐅᒪ ᓂᑕᐦᑭᒥᓇᐣ ᐃᒪ ᑲᔦ ᓂᐱᑲᐠ ᐁᑲ ᐱᓇᒪ ᑲᑲᑫᐧᑌᐊᐧᐨ ᓂᑲᓴᑭᒋᓂᔕᐦᐧᐊ̇ᒥᐣ ᐃᒪ ᐅᐣᒋ ᓂᑐᓇᑯᓂᑫᐃᐧᓂᓇᐣ ᒋᐊᐸᒋᑐᔭᐠ.
ᐊᓂᔑᓇᐯ ᐊᐢᑭ ᑭᐃᑭᑐ ᑲᐃᐧᐣ ᐊᐦᐸᐣ ᑕᓂᓯᑕᐃᐧᓂᑲᑌᓯᐣ ᓄᑯᑦ ᑲᔭᐠ ᑭᒋ ᐅᓇᑯᓂᑫᐃᐧᐣ, ᐅᓇᑯᓂᑫᐃᐧᐣ ᑲᐃᓇᑭᑌᑭᐸᐣ.
ᐃᐁᐧ ᑲᑭ ᔕᐳᓂᑲᑌᑭᐸᐣ ᑭᒋ ᐅᓇᑯᓂᑫᐃᐧᐣ 191 ᓄᑯᑦ ᑲᑭᔑᑲᐠ ᐊᒥᐦᐃ ᑌᐯᐧ ᐁᐃᔑᓇᑲᐧᐠ ᐃᑫᐧᓂᐊᐧᐠ ᒪᐟᑭᐣᑎ ᐊᑭᒪᐃᐧᐣ ᐁᑲ ᐁᒪᒥᑎᓀᓂᒪᐨ ᐊᓂᔑᓂᓂᐊᐧᐣ ᒥᓇ ᑲᔦ ᑭᐁᐧᑎᓄᐠ ᑕᔑᑫᐃᐧᓇᐣ ᑲᔭᑭᐣ ᐃᒪ ᒣᑲᐧᐨ ᑲᑭ ᐊᐧᐅᓀᐣᑕᒧᐊᐧᐸᐣ ᐅᐁᐧ ᑲᑭ ᐃᔑᒋᑲᓂᐊᐧᐠ, ᒥᑕᐟᑕᐊᐧᐸᐣ ᐃᑭᑐ, ᒪᐊᐧᐨ ᑭᒋ ᒪᒉᐣᑕᑲᐧᐣ ᓄᑯᑦ ᑲᑭᔑᑲᐠ ᓂᓇᐃᐧᐣᐟ ᒥᐢᑕᐦᐃ ᑲᑭ ᐊᓂᑲᑕᒪᑭᐸᐣ ᑲᑭ ᑲᑫᐧ ᑭᐸᑯᐢᑲᒪᑭᐸᐣ ᐅᓇᑯᓂᑫᐃᐧᐣ 191 ᑲᐃᔑᓇᑲᐧᐠ ᐁᑲ ᐁᑭ ᐅᐣᒋ ᐸᐱᐢᑭᑕᑯᔭᐠ ᑲᑭᐃᑭᑎᔭᑭᐸᐣ.
ᑭᒋ ᐊᒥᑯᑭᒪᑫᐧ ᓫᐃᐣᑕ ᒉᑊᐱᕑᐃ ᑭᐃᑭᑐᐸᐣ ᐃᐁᐧ ᑭᒋ ᑭᐁᐧᑎᓄᐠ ᐅᓇᑯᓂᑫᐃᐧᐣ ᒪᐊᐧᐨ ᒪᐢᑲᐁᐧᐣᑕᑲᐧᐣ ᒋᑭ ᐅᐣᒋ ᒥᓄᓭᑲᐧᐸᓂᐣ ᑫᑯᓇᐣ.
ᑭᐱᒥᐱᐣᑎᑲᑕᒥᐣ ᑲᑭᓇ ᑲᐅᐢᑭ ᐊᐣᒋᓭᑭᐣ ᐅᓇᒋᑫᐃᐧᓇᐣ, ᐊᓂᑭᐃᐧᓇᐣ ᒋᐅᐣᒋᐊᔭᑭᐣ ᒥᓇ ᐊᐦᑭ ᒋᐅᐣᒋ ᒪᓇᒋᒋᑲᑌᐠ ᐁᐧᑎ ᑭᒋ ᑭᐁᐧᑎᓄᐠ, ᑭᐃᑭᑐ. ᑭᓇᐃᐧᐣᐟ ᑭᐸᐸᒥᓯᒥᐣ ᐅᒪ ᐱᐣᒋᑭᔑᐠ ᑲᑲᐯᔑᔭᐠ ᑲᐧᔭᐠ ᒋᑲᓇᐊᐧᐸᑕᒪᐠ ᑭᑕᐦᑭᒥᓇᐣ ᐅᒪ ᒪᐊᐧᐨ ᑲᐃᔑ ᒥᐦᔕᐠ ᐅᐣᑌᕑᐃᔪ ᑲᐃᔑ ᑲᐯᔑᔭᐠ ᒥᓇ ᐱᑯ ᐅᒪ ᒥᓯᐁᐧᑲᒥᐠ.
ᐅᑭᒪᐃᐧᐣ ᐃᑭᑐ ᐊᑭᐃᐧ ᐅᓇᒋᑫᐃᐧᓇᐣ ᐊᒥᐦᐃᒪ ᑲᐅᐣᑎᓂᑲᑌᑭᐣ ᐅᓇᒋᑫᐃᐧᓇᐣ ᐁᐧᑎ ᑭᒋ ᑭᐁᐧᑎᓄᐠ, ᑲᔦ ᐃᐁᐧ ᒣᑲᐧᐨ ᑲᐱᒪᓄᑲᑌᐠ ᐯᔑᐠ ᑭᒋᐱᐊᐧᐱᑯᑫᐃᐧ ᐊᓂᑭᐃᐧᐣ, ᐃᒪ ᒪᐊᐧᐨ ᑲᐃᔑ ᒥᐢᑕᐦᐃ ᒥᑲᐊᐧᑲᓄᐨ ᑲᑯᓯᑲᐧᐱᑭᓯᐨ ᐊᐦᓯᐣ, ᑲᐅᐣᒍᔑᒋᑲᑌᐠ ᐱᐊᐧᐱᐠ.
ᐯᔑᐠ ᐅᐣᑌᕑᐃᔪ ᐅᑭᒪᐠ ᑌᒧᑭᕑᐊᑎᐠ ᑲᐃᔑᓂᑲᓂᑎᓯᐊᐧᐨ ᐅᑭ ᑭᐸᑯᐢᑲᓇᐊᐧᐸᐣ ᐅᓇᑯᓂᑫᐃᐧᐣ 191, ᐁᑭ ᐃᑭᑐᒪᑲᐠ ᐃᑫᐧᓂᐊᐧᐠ ᓫᐃᐱᕑᐅᓫᐢ ᑲᐃᓂᐣᑕᐧ ᑲᑭ ᑲᐢᒋᓂᔕᐦᐊᒧᐊᐧᐨ ᐅᐁᐧ ᑭᒋ ᑭᐁᐧᑎᓄᐠ ᐅᓇᑯᓂᑫᐃᐧᐣ ᐃᒪ ᐅᐣᑌᕑᐃᔪ ᑭᒋ ᐅᓇᔓᐁᐧᐃᐧᑲᒥᐠ ᐊᒥᐦᐃ ᐁᐃᔑᓇᑲᐧᐠ ᐊᐦᐸᐣ ᒋᐅᐣᒋ ᐊᔐᐢᑲᐊᐧᐨ ᐃᒪ ᑲᐃᔑ ᐃᐧᑕᓄᑭᒪᐊᐧᐸᐣ ᐊᓂᔑᓂᓂᐊᐧᐣ ᒥᓇ ᐱᑯ ᐅᐣᑌᕑᐃᔪ ᐅᑭᒪᐃᐧᓂᐠ.
ᑭᒍᑭᒪ ᑲᐧᐣᑕ ᐅᑭ ᐅᔦᓇᐣ ᐊᓂᔑᓂᓂᐊᐧᐣ ᐁᑲ ᒋᑐᑭᓇᐠ ᐃᐁᐧ ᑭᒋ ᑭᐁᐧᑎᓄᐠ ᐅᓇᑯᓂᑫᐃᐧᐣ ᑲᑭ ᐃᑭᑐᐸᐣ ᐁᑲ ᐱᓇᒪ ᐁᑭ ᐅᐣᒋ ᑲᑫᐧᒋᒪᒋᐣ ᐊᓂᔑᓂᓂᐊᐧᐣ ᒪᐧᔦ ᑐᑕᐠ ᐅᐁᐧᓂ, ᑭᐃᑭᑐ NDP ᑲᓂᑲᓂᐢᑲᐊᐧᒋᐣ ᐊᐣᑎᕑᐃᔭ ᐦᐅᐊᐧᐟ. ᒥᓴᐊᐧᐨ ᐃᐁᐧ ᑲᑭ ᐅᐢᑭᑐᐸᐣ ᒋᒥᓄᐃᐧᒋᐊᐧᐨ ᐊᓂᔑᓂᓂᐊᐧᐣ, ᐃᑫᐧᓂᐊᐧᐠ ᒪᐠᑭᐣᑎ ᐅᑭᒪᐠ ᐃᐧᓇᐊᐧ ᑲᑭᓇ ᑫᑯᐣ ᐅᑭᑫᐣᑕᓇᐊᐧ ᐅᑎᓀᐣᑕᓇᐊᐧ ᐊᐦᐱᒋᐃᐧᐣ ᐊᓂᔑᓂᓂᐊᐧᐠ ᐅᒪ ᐊᔑ ᑭᒋ ᒥᔑᓄᐊᐦᑭ ᑲᐅᐣᒋ ᑲᐯᔑᐊᐧᐨ. ᐅᐁᐧ ᑲᑭ ᐊᐧᐸᐣᑕᐦᐃᐁᐧᐊᐧᐨ ᑲᐃᔑᓇᑲᐊᐧᐸᒥᐁᐧᐊᐧᐨ ᑲᑭ ᔕᐳᓂᑲᑌᐠ ᐅᓇᑯᓂᑫᐃᐧᐣ 191 ᐅᑕᓇᐣᐠ ᐃᐧᐣ ᐃᐁᐧ ᑲᑭᐃᔑ ᑲᓇᐊᐧᐸᒧᐁᐧᐊᐧᐸᐣ ᐃᐧᐣ ᐃᐁᐧ ᑲᑭᑐᑕᒧᐊᐧᐨ.
ᑎᒥᐣᐢ-ᒉᒥᐢᐯ ᐅᑭᒪ ᑭᕑᐃᐢ ᑎᓯᐣ ᐃᑭᑐ ᒪᐊᐧᐨ ᑭᔭᐸᐨ ᒥᐢᑕᐦᐃ ᐊᔭ ᑫᒪᒋᓭᐦᐃᐁᐧᒪᑲᐠ ᑲᐃᐧᐣ ᐁᐦᑕ ᐊᓂᔑᓇᐯ ᒪᒋᓭᓯᐣ.
ᐅᑭᒪᐠ, ᐅᒧᓇᐦᐊᓯᓂᐁᐧᐠ ᒥᓇ ᐅᓇᓇᐣᑕᐊᐧᓯᓂᐁᐧᐠ, ᑕᐃᐧᓀᓯᐠ ᑲᐅᑭᒪᐃᐧᐊᐧᐨ, …ᑲᔦ ᒪᒋᑕᐃᐧᓀᓴᐣ ᑲᑎᐯᐣᑕᒧᐊᐧᐨ ᑲᑭᓇ ᐅᑕᓇᑭ ᑲᓄᑕᓇᐊᐧᐸᐣ ᐁᑭᐸᑯᐢᑲᒧᐊᐧᐨ ᐃᐁᐧ ᑭᒋ ᑭᐁᐧᑎᓄᐠ ᐅᓇᑯᓂᑫᐃᐧᐣ. ᐊᓂᐣ ᑕᐢ ᑭᐣᐱᐣ ᒥᔑᐣ ᐊᐃᐧᔭᐠ ᑲᓇᐣᑕᐁᐧᐣᑕᒧᐊᐧᐨ ᒋᑭᐸᑯᐢᑭᑲᑌᓂᐠ, ᑫᑯᓀᐣ ᑕᐢ ᐊᐣᒋᑯ ᐁᑭ ᐅᐣᒋ ᔕᐳᓇᒧᐊᐧᐨ? ᐱᓯᐣ ᑭᐃᑭᑐ.
ᒥᑕᐟᑕᐊᐧᐸᐣ ᑭᐃᑭᑐ ᐃᒪ ᐊᐧᑌᐸᑲᐃᐧᐱᓯᑦ 22 ᑲᐃᓇᑭᓯᐨ ᑲᑭ ᐸᑭᑎᓂᑲᑌᑭᐸᐣ ᑎᐸᒋᒧᐃᐧᐣ ᐊᓂᔑᓇᐯ ᐊᐢᑭ ᑕᔑᑫᐃᐧᓇᐣ ᐁᑲᐧ ᒋᑐᑭᓂᑲᑌᓂᐠ ᐅᒪᐢᑲᐃᐧᓯᐃᐧᓂᐊᐧ ᑲᐊᓂᔑᓂᓂᐃᐧᐊᐧᐨ.
ᐅᐁᐧ ᐅᓇᑯᓂᑫᐃᐧᐣ ᑕᑭᐃᓯᓭ ᒋᔕᐳᓂᑲᑌᐠ ᐅᒪ ᐅᐣᑌᕑᐃᔪ ᐅᑭᒪᐃᐧᓂᐠ, ᔕᑯᐨ ᑕᐢ ᑲᐃᐧᐣ ᒋᑫᒋᓇᐦᐅᓇᓂᐊᐧᐠ ᐁᑲ ᒋᐱᒣᐣᒋᑲᑌᐠ ᑭᑕᐦᑭᒥᓇᐣ, ᒥᑕᐟᑕᐊᐧᐸᐣ ᑭᐃᑭᑐ, ᐁᑭ ᐅᐣᒋ ᑭᑭᓇᐊᐧᒋᐃᐧᐣᑕᐠ ᐊᓂᔑᓇᐯ ᐊᐢᑭ ᒋᐃᔑ ᐱᒥᐊᓂᑲᑕᒧᐊᐧᐨ ᐊᔕ ᑲᑭᒪᓯᓇᐦᐊᒧᐊᐧᐸᐣ ᒥᓇ ᐁᑲ ᒋᐅᐣᒋ ᑭᐱᐦᒋᐊᐧᐨ. ᑲᐃᐧᐣ ᐅᐁᐧ ᑲᐃᔑ ᓇᐣᑕᐁᐧᐣᑕᒪᑭᐸᐣ, ᔕᑯᐨ ᑕᐢ ᐊᐁᐧ ᐅᐣᑌᕑᐃᔪ ᐅᑭᒪᐃᐧᐣ ᒥᓇ ᐊᐁᐧ ᑭᒋ ᐅᑭᒪ ᒥᑐᓂ ᑲᑭ ᐊᓇᐁᐧᐣᑕᐠ ᒋᐃᐧᒋᐦᐊᒋᐣ ᐊᓂᔑᓇᐯ ᐊᐢᑭ ᐅᑕᓂᔑᓂᓂᒪᐣ, ᑲᐃᐧᐣ ᐊᐦᐸᐣ ᓇᐣᑕ ᐸᑲᐣ ᓇᑭᑐᑕᓯᒥᐣ ᐱᑯ ᐁᐦᑕ ᒋᑭᐦᒋ ᐊᐊᐧᔑᒣ ᒋᐊᓂᑲᑕᒪᐠ.
ᑭᐢᐱᐣ ᑕᐢ ᐅᐣᒋᔭᐠ ᒪᒉᓂᒥᑐᐃᐧᐣ, ᐅᐣᑌᕑᐃᔪ ᐅᑭᒪᐃᐧᐣ ᑕᓇᐣᑕᐁᐧᐣᑕᑯᓯ ᒋᓇᓇᐣᑕᐃᐧᑭᑫᐣᑕᐠ ᑫᑯᓀᐣ ᑲᐅᐣᒋᓯᓭᐠ. ᐅᐁᐧ ᐅᑭᒪᐃᐧᐣ ᒥᐢᑕᐦᐃ ᑎᐸᐦᐃᑲᐣ ᑭᒥᓇᑲᓄ ᒋᐃᐧᑕᓄᑭᒥᐁᐧᐨ, ᑲᐃᐧᐣ ᑕᐢ ᒋᐅᐣᒋᑐᑕᐠ.
ᐊᓂᔑᓇᐯ ᐊᐢᑭ ᑭᐃᑭᑐ ᐊᓂᔑᓇᐯ ᐃᐢᑯᓂᑲᓇᐣ ᑲᐃᐧᐣ ᑲᐧᔭᐠ ᒋᐅᐣᒋ ᐃᐧᐣᑕᒧᐊᐧᑲᓄᐊᐧᐨ ᐅᓇᑯᓂᑫᐃᐧᐣ 191 ᐅᐣᒋ, ᒥᓴᐊᐧᐨ ᐱᑯ ᐅᐣᑌᕑᐃᔪ ᐅᑭᒪᐃᐧᐣ ᐸᑲᐣ ᐊᓇᔭᐃᑭᑐᐸᓂᐦᐅᐨ.
ᐊᐦᐱ ᓂᐢᑕᑦ ᑲᑭ ᑎᐸᑎᒋᑲᑌᑭᐸᐣ ᐅᓇᑯᓂᑫᐃᐧᐣ 191 ᓴᑭᐸᑲᐃᐧᐱᓯᑦ 2009 ᑲᑭ ᐃᓇᑭᓯᐨ, ᐊᓂᔑᓇᐯ ᐊᐢᑭ ᐊᓂᔑᓂᓂᐊᐧᐠ ᐊᒥᐱᑯ ᑲᑭ ᐃᔑ ᒪᐢᑲᐃᐧᑲᐸᐃᐧᐊᐧᐨ ᐃᐁᐧ ᑲᑭᐃᑐᐊᐧᐨ ᐁᑲ ᐁᑭᔑᔕᐁᐧᐣᒋᑲᑌᓂᐠ ᐊᓂᔑᓇᐯ ᐅᒪᐢᑲᐃᐧᓯᐃᐧᐣ ᒥᓇ ᐅᒪᓂᑐᐃᐧ ᒥᓂᑯᐃᐧᓂᐊᐧ.