ᓂᐦᓯᐣ ᑭᐅᒋᐃᐡᑲᐧᐱᒪᑎᓯᐊᐧᐠ ᑲᑭᓴᑭᑌᐠ ᐊᐧᑲᐦᐃᑲᐣ ᐃᐃᒪ ᐊᐧᓂᒪᐣ

Create: 12/01/2015 - 19:24

ᑲᐃᐧᒋᐦᐃᐁᐧᐊᐧᐨ ᑲᐊᓂᒥᓭᓂᐠ ᑭᐃᔕᐊᐧᐠ ᐃᐃᒪ ᐊᐧᓂᒪᐣ ᑕᔑᑫᐃᐧᓂᐠ ᐁᑭᑕᐃᐧ ᐃᐧᒋᑕᐧᐊᐧᐨ ᐊᐱᐣ ᑲᓄᒋᑲᑌᐠ ᓂᔑᐣ ᐃᑫᐧᓭᓴᐠ ᒥᓇ ᐅᐡᑭᓂᑭᑫᐧ ᑲᑭᐃᐡᑲᐧᐱᒪᑎᓯᐊᐧᐨ ᐃᐃᒪ ᑲᑭᐃᔑᓴᑭᑌᐠ ᐊᐧᑲᐦᐃᑲᐣ ᐃᐃᐁᐧ ᒣᑲᐧᐨ ᒪᑯᐱᓯᑦ ᐁᐃᓇᓀᐤ ᑲᐃᓇᑭᓯᐨ᙮
“ᓂᔑᑕᓇ ᐯᔑᑯᔕᑊ ᐁᑕᓴᑭᐃᐧᓀᐨ ᐅᐡᑲᑎᓯᐃᐧᑫᐧ ᒥᓇ ᓂᑯᑕᐧᓱ ᐁᑕᓴᐧᑭᐃᐧᓀᐨ ᐃᑫᐧᓭᐢ ᒥᓇ ᑯᑕᐠ ᐁᐯᔑᑯᔭᑭᐃᐧᓀᐨ ᐃᑫᐧᓭᐢ ᐅᑭᐊᐧᓂᑐᓇᐊᐧ ᐅᐱᒪᑎᓱᐃᐧᓂᐊᐧ ᐃᐃᒪ ᑲᑭᐃᔑᓴᑭᑌᐠ ᐊᐧᑲᐦᐃᑲᐣ” ᐃᑭᑐ ᐊᐧᓇᒪᐣ ᐅᑭᒪᑲᐣ ᕑᐊᐟ ᐃᐧᐣᓂᐱᑕᐧᐣᑲ᙮ “ᐅᐅᐁᐧ ᑕᔑᑫᐃᐧᐣ ᒥᓇ ᐱᑯ ᐅᓂᑲᓂᑕᒪᑫᐠ ᒪᐊᐧᐨ ᐅᑭᒋᐱᑫᐧᐣᑕᓇᐊᐧ ᒥᓇ ᐅᑭᑭᒥᐡᑲᑯᓇᐊᐧ ᐅᐅᐁᐧ ᐊᐱᐣ ᑲᑭᐅᒋᐊᐧᓂᔭᐊᐧᐨ ᐅᑐᐡᑲᑎᓯᒥᐊᐧᐣ᙮”
ᐁᑲᐧ ᑲᔭ ᐯᔑᐠ ᐅᓇᔑᐁᐧᐃᐧᓂᓂ ᒪᐊᐧᐨ ᑭᐃᑭᑐ ᐁᑭᑲᑫᐧ ᐃᐧᒋᔭᐨ ᐅᑫᐧᓂᐊᐧᐣ ᓂᔑᐣ ᐃᑫᐧᓭᓴᐣ ᒥᓇ ᐅᐡᑭᓂᑭᑫᐧᐣ ᐃᐃᒪ ᐊᐧᑲᐦᐃᑲᐣ ᑲᑭᐃᔑᓴᑭᑌᐠ ᐁᑲᐧ ᑭᐅᓴᑦ ᑲᐡᑲᓇᒧᑌᓂ ᐁᑲᐧ ᑲᔭ ᑫᑲᐟ ᑭᑯᐸᐧᓇᒧᓯ ᐊᒥᐁᐧ ᐊᐱᐣ ᐊᑯᓯᐃᐧ ᐱᒥᓭᐃᐧᓂᐠ ᑲᑭᐅᒋᒪᒋᐸᐦᐊᑲᓄᐃᐧᐨ ᐊᐦᐃᐠ ᐊᐱᐣ ᐃᐧᑫᐧᑐᐣᐠ ᑭᐃᓇᓴᐅᓇᑲᓄ᙮ “ᐊᔕ ᐊᐱᐣ ᑭᐸᑭᑎᓇᑲᓄ ᐃᐃᒪ ᑭᒋᐊᑯᓯᐃᐧᑲᒥᑯᐠ ᐅᐅᐁᐧ ᑲᑫᑭᔐᐸᔭᐠ” ᐃᐧᐣᓂᐱᑕᐧᐣᑲ ᑭᐃᑭᑐ ᐃᐃᐁᐧ ᒣᑲᐧᐨ ᓴᑲᓱ ᒪᑯᐱᓯᑦ ᑲᐃᓇᑭᓯᐨ᙮ “ᐁᐦᐊᐠ ᑲᔭ ᐅᑕᑕᐁᐧᐦᐃᑫᐠ ᐊᓂᑭᐃᐧᒋᐦᐃᐁᐧᐊᐧᐠ ᐁᑲᐧ ᐊᔕ ᐅᓴᑦ ᒥᐡᑕᐦᐃ ᐊᐧᑲᐦᐃᑲᐣ ᑭᐃᓇᑭᑌ᙮ ᐁᑲᐧ ᑲᐧᓂᐣ ᒋᑭᑫᐣᑕᑲᐧᐠ ᐊᐣᑎ ᑲᑭᐅᒋᒪᒋᔭᑭᑌᐠ ᐁᑲᐧ ᐁᐦᐊ ᒣᑲᐧᐨ ᐅᐣᑌᕑᐃᔪ ᐃᐡᑯᑌᐃᐧᑭᒪ ᐱᒥ ᓇᓇᑲᒋᒋᑫ᙮”
ᓴᑲᓱ ᑲᐃᓯᓭᐠ ᑲᑫᑭᔐᐸᔭᐠ ᓂᐡᑕᑦ ᑲᑭᐊᐧᐸᒋᑲᑌᐠ ᐁᒪᑌ ᐅᒋ ᓴᑲᐸᑌᐠ ᐃᐃᒪ ᐊᐧᑲᐦᐃᑲᓂᐠ᙮
ᑭᒋᐅᒋᒪᑲᐣ ᐦᐊᕑᐱ ᔦᐢᓄ ᐅᐃᐧᑕᐣ ᐁᒪᒥᑎᓀᓂᒪᐨ ᑲᑭᒪᑎᓭᓂᐨ ᒥᓇ ᐱᑯ ᑕᔑᑫᐃᐧᐣ ᐃᐃᐁᐧ ᐊᐧᓂᒪᐣ ᐅᐅᐁᐧ ᑲᐃᔑᓇᑭᐡᑲᒧᐊᐧᐨ ᐅᒋ᙮
“ᓂᑲᒪᒥᑎᓀᓂᒪᒥᓇᐠ ᒥᓇ ᓂᑲᐊᒥᒋᑫᑕᒪᐊᐧᒥᓇᐠ ᐅᑫᐧᓂᐊᐧᐠ ᑲᑭᓇᑲᓂᑯᐊᐧᐨ ᑲᑭᓴᑭᔭᐊᐧᐨ ᐁᑲᐧ ᒥᓇ ᐊᐊᐧᔑᒣ ᓂᑲᒥᑲᐃᐧᐣᑕᒥᐣ ᐅᐅᐁᐧ ᑕᔑᑫᐃᐧᐣ ᒣᑲᐧᐨ ᒥᐡᑕᐦᐃ ᒥᒋᓇᐁᐧᓱᐃᐧᐣ ᐁᑕᑲᐧᐠ,” ᔦᐢᓄ ᐃᑭᑐ᙮ “ᑲᐧᓂᐣ ᒣᑲᐧᐨ ᒋᑭᑫᐣᑕᒪᐦᐠ ᐊᓂᐣ ᐅᐅᐁᐧ ᑲᑭᐅᒋᓴᑭᑌᐠ ᐊᐧᑲᐦᐃᑲᐣ ᔕᑯᐨ ᐊᒥᐅᒪ ᐁᐧᒋᓂᓯᑕᐃᐧᓇᑲᐧᐠ ᐁᑲᐧ ᓇᐱᐨ ᑭᑕᔑᑫᐃᐧᓂᓇᓇᐣ ᐊᐸᒋᒋᑲᐣ ᐁᐊᔭᐊᐧᐨ ᐁᑲᐧ ᒥᓇ ᐅᒋᓂᓯᑕᐃᐧᓇᑲᐧᐣ ᓇᐱᐨ ᐁᐅᒋᓇᓂᒋᐊᔭᒪᑲᐠ ᐃᐃᒪ ᐊᐧᐃᐧᔭᐠ ᒥᓇ ᐊᐊᐧᔑᓴᐠ ᑲᐃᔑᑲᐯᔑᐊᐧᐨ᙮”
“ᐅᐣᑌᕑᐃᔪ ᑭᒋᐅᑭᒪᑲᐣ ᐃᐡᑕᐣ ᐯᔭᑎ ᐅᑭᐃᐧᑕᐣ ᐁᐅᒋᒥᒋᓇᐁᐧᓯᐨ ᐅᑫᐧᓂᐊᐧᐠ ᐊᐧᐃᐧᔭᐠ ᑲᑭᐊᐧᓂᔭᐊᐧᐨ ᒪᐊᐧᐨ ᑲᑭᓴᑭᔭᐊᐧᐨ ᒥᓇ ᐱᑯ ᐅᐅᐁᐧ ᑕᔑᑫᐃᐧᐣ ᐊᐧᓂᒪᐣ ᑭᒥᑲᐃᐧᐣᒋᑲᑌᐠ᙮
“ᑲᐧᓂᐣ ᒪᔭᑦ ᓂᑭᑭᑐᓯᐣ ᑫᓂᐣ ᐁᐊᐱᒋ ᑭᑭᒥᐡᑲᑯᔭᐣ ᒥᓇ ᐁᒥᒋᓇᐁᐧᓯᔭᐣ ᐅᐅᐁᐧ ᑭᒪᑌᓭᐃᐧᓂᐊᐧ ᑲᐃᔑᓇᑭᐡᑲᒣᐠ,” ᐯᔭᑎ ᐃᑭᑐ᙮
“ᓂᑲᐊᒥᒋᑫᑕᒪᐊᐧᒥᓇᐠ ᐅᑫᐧᓂᐊᐧᐠ ᑲᑭᓇᑲᓂᑯᐊᐧᐨ ᑲᑭᓴᑭᔭᐊᐧᐨ ᐁᑲᐧ ᓂᐸᑯᓭᓂᒧᒥᐣ ᑭᑭᔐᒪᐣᑐᒥᓇᐣ ᒪᐡᑲᐃᐧᓯᐃᐧᐣ ᒋᒥᓂᑯᐊᐧᐨ ᐅᐅᐁᐧ ᒥᑲᐧᐨ ᐊᓂᒥᓭᐃᐧᐣ ᑲᓇᑭᐡᑲᑯᐊᐧᐨ᙮”
ᑲᐧᓂᐣ ᒣᑲᐧᐨ ᐃᐧᓱᐃᐧᓇᐣ ᒋᐸᑭᑎᓂᑲᑌᑭᐣ ᐱᓇᒪ ᓂᑲᐣ ᒪᔭᑦ ᐃᐧᓇᐊᐧ ᐊᐧᑯᒪᑲᓇᐠ ᒋᐃᐧᑕᒪᐊᐧᑲᓄᐊᐧᐨ᙮
ᓂᑯᑕᐧᓴᐧ ᒥᑕᓱᒥᑕᓇ ᐊᐧᐃᐧᔭᐠ ᑲᐯᔑᐊᐧᐠ ᐃᐃᒪ ᑕᔑᑫᐃᐧᓂᐠ ᐊᐧᓇᒪᐣ ᐁᑲᐧ ᑭᐁᐧᑎᓄᐠ ᐊᐧᓂᓇᐊᐧᑲᐠ ᐃᔑᑕᑲᐧᐣ᙮