ᓀᐢᑲᑕᐣᑲ ᐅᐃᐧᒋᐦᐃᑯᓂᐊᐧ ᐅᒋᐃᐧᒋᐦᐃᐁᐧᓭᓂ

Create: 12/01/2015 - 19:24

ᓀᐢᑲᐣᑕᑲ ᑕᔑᑫᐃᐧᐣ ᐅᑭᒪᑲᐣ ᐱᑕᐣ ᒧᓂᔭᐢ ᐃᑭᑐ ᐅᑕᔑᑫᐃᐧᐣ ᑭᒋᐃᐧᒋᐦᐃᐁᐧᐃᐧᐣ ᑲᑭᓇᑐᑕᒪᐊᐧᐨ ᒪᐊᐧᐨ ᐅᑐᒋᑭᒋᐃᐧᒋᐦᐃᑯᓇᐊᐧ ᐃᑫᐧᓂᐊᐧᐠ ᐅᑕ ᑲᔭ ᐅᐃᐧᒋᐦᐃᐁᐧᐠ ᑲᑭᐱᑭᐃᐧᑌᐊᐧᐨ ᐁᑲᐧ ᒥᓇ ᐅᑐᒋᐃᐧᒋᐦᐃᑯᓇᐊᐧ ᐅᐅᐁᐧ ᑲᐊᓂ ᒪᒋᓇᓇᑕᐁᐧᐣᒋᑲᓂᐊᐧᐠ᙮
“ᒪᐊᐧᐨ ᐱᑯ ᒥᐡᑕᐦᐃ ᐅᒋᓴᑲᑫᐣᑕᑲᐧᐣ ᓂᑕᔑᑫᐃᐧᓇᐣ,” ᒧᓂᔭᐢ ᐃᑭᑐ ᐅᑫᐧᓂᐊᐧᐣ ᐅᑕ ᐅᐃᐧᒋᐦᐃᐁᐧᐣ ᑲᒪᒥᐡᑯᒋᐱᑭᐃᐧᑌᓂᐨ ᐁᐡᑲᑦ ᑲᔭ ᓂᑯᑕᐧᓱ ᐅᑕᓄᑭᐣ ᑲᐱᐃᐧᒋᐦᐃᑯᐊᐧᐨ᙮ “ᓇᐣᑕ ᐱᑯ ᓴᑲᓱ ᐊᐃᐧᔭᐠ ᐃᐧᒋᐦᐃᐁᐧᐊᐧᐠ ᐁᑲᐧ ᒥᓇ ᐁᒪᒥᐡᑯᒋᐡᑲᐊᐧᐨ᙮”
ᒧᓂᔭᐢ ᐃᑭᑐ ᐅᑫᐧᓂᐊᐧᐠ ᐅᐃᐧᒋᐦᐃᐁᐧᐠ ᒪᐊᐧᐨ ᐃᑭᑐᐊᐧᐠ ᐁᐃᐧᒋᐦᐊᔭᐊᐧᐨ ᐅᐅᒪ ᓂᑕᔑᑫᐃᐧᓂᓇᐣ ᑲᑲᐯᔑᐊᐧᐨ ᐊᐃᐧᔭᐠ ᒥᓇ ᐱᑯ ᑲᐊᓄᑲᑕᒥᓂᐨ ᐅᑎᓭᐃᐧᓂᐊᐧ ᐊᐦᐃ ᑲᔭ ᓂᐃᐧᐣ ᑲᑭᐅᑕᐱᓇᒧᐊᐧᐸᐣ ᐅᐱᒪᑎᓱᐃᐧᓂᐊᐧ ᐁᑲᐧ ᒥᓇ ᓂᐦᓯᐣ ᑫᑕᑕᐁᐧᐣ ᑲᑭᐅᒋᐃᐡᑲᐧᐱᒪᑎᓯᐊᐧᐸᐣ ᐁᑲᐧ ᑲᔭ ᓂᔑᑕᓇ ᑲᑭᑲᑫᐧᐅᑕᐱᓇᒧᐊᐧᐨ ᐅᐱᒪᑎᓱᐃᐧᓂᐊᐧ ᐊᒥᐅᐁᐧ ᑲᑭᐅᒋᓇᑐᑕᒪᔭᐠ ᑭᒋᐃᐧᒋᐦᐃᐁᐧᐃᐧᐣ ᐃᐃᐁᐧ ᒣᑲᐧᐨ ᓂᓴᐧᓱᔕᑊ ᓂᑭᐱᓯᑦ ᑲᐃᓇᑭᓯᐨ᙮
“ᐁᑲᐧ ᑲᔭ ᐃᐃᐁᐧ ᒣᑲᐧᐨ ᑭᐊᓂ ᒪᒋᓇᓇᑕᐁᐧᐣᒋᑲᓂᐊᐧᐣ ᐊᐱᐣ ᐅᑕ ᒪᔭᑦ ᓂᐦᑲᐠ ᑲᑭᑕᑲᐧᑯᒋᓂᐊᐧᐨ,” ᒧᓂᔭᐢ ᐃᑭᑐ᙮ “ᐊᐱᐣ ᓂᐦᑲᐠ ᑲᒪᒋᐱᒪᐦᐊᒧᐊᐧᐨ ᐊᒥᐁᐧ ᐊᐱᐣ ᐊᐃᐧᔭᐠ ᑲᐃᔑ ᒪᒋᓇᓇᑕᐁᐧᐣᒋᑫᐊᐧᐨ ᐁᐧᑎ ᐱᑲᐧᒋᐊᐦᐃᐠ᙮ ᑭᔭᐱᐨ ᐊᑎᐟ ᐊᐃᐧᔭᐠ ᐅᑌᑎᐊᐧᐠ ᐁᑲᐧ ᑲᔭ ᒪᐊᐧᐨ ᐅᐅᐁᐧ ᐅᒋᐃᐧᒋᐦᐃᐁᐧᒪᑲᐣ ᐅᐅᒪ ᓂᑕᔑᑫᐃᐧᓂᓇᐠ᙮”
ᒧᓂᔭᐢ ᐃᑭᑐ ᑯᑕᑭᔭᐠ ᐸᑲᐣ ᒥᓇ ᐊᐃᐧᔭᐠ ᓂᑭᐱᑭᐃᐧᑕᒥᑯᒥᐣ ᐅᐅᒪ ᓂᑕᔑᑫᐃᐧᓂᓇᐣ ᐁᐦᐊ ᑲᔭ ᐸᐧᑊ ᓫᐁ ᑲᑭᐅᓇᓴᑲᓄᐃᐧᐨ ᐁᐦᐊᐣ ᒪᑕᐊᐧ ᑕᔑᑫᐃᐧᓇᐣ ᒋᐃᐧᒋᐦᐃᔭᐨ ᑲᐃᐧᐊᐧᐁᐧᓇᒋᑫᓂᐨ ᐃᐃᒪ ᑲᐃᐧᐃᔑᑭᒋᐱᐊᐧᐱᑯᑲᓂᐊᐧᐠ ᐁᑲᐧ ᑲᔭ ᒪᒪᐃᐧᔕᐁᐧᐣᒋᑫᐃᐧᐣ: ᑭᐁᐧᑎᓄᐠ ᔕᐊᐧᓄᐠ ᐃᐧᑕᓄᑭᒥᑐᐃᐧᐣ ᐊᐊᐧᔑᔕᐠ ᑲᐊᓄᑲᐊᐧᑲᓄᐊᐧᐨ ᐁᑲᐧ ᑭᐁᐧᑎᓄᐠ ᐅᑭᒪᑲᓇᐠ ᑭᐱᔕᐊᐧᐠ᙮
“ᐁᑲᐧ ᒥᓇ ᑲᐯᐱᒥᑯᓇᑲ ᓂᑭᒪᐊᐧᒋᐦᐃᑐᒥᐣ ᐃᐃᒪ ᓂᑕᔑᑫᐃᐧᓂᓇᐣ ᐅᐅᐁᐧ ᐅᑕᓇᐠ ᑲᑭᐱᒥᑯᓇᑲᐠ ᒪᐊᐧᐨ ᐁᑭᐦᑭᑐᔭᐠ ᐊᐃᐧᔭᐠ ᒋᐃᐧᒋᑕᐧᐊᐧᐨ ᒥᓇ ᐱᑯ ᑭᒋᐦᐊᔭᐠ ᐁᑲᐧ ᐅᐡᑲᑎᓴᐠ ᒋᐃᐧᑕᐱᒥᑎᐊᐧᐨ,”ᒧᓂᔭᐢ ᐃᑭᑐ᙮ “ᐊᒥᐅᐁᐧ ᒪᐊᐧᐨ ᑲᓇᑕᐁᐧᐣᑕᑲᐧᐠ ᐅᐅᒪ ᑕᔑᑫᐃᐧᓂᐠ ᐅᓴᑦ ᐁᑲ ᐁᐃᐧᑕᓄᑭᒥᑎᓇᓂᐊᐧᐠ ᐁᑲᐧ ᒥᓇ ᑭᒋᐦᐊᔭᐠ ᐁᑲᐧ ᐅᐡᑲᑎᓴᐠ ᐁᑲ ᐅᓴᑦ ᐁᐃᐧᑕᓄᑭᒥᑎᐊᐧᐨ᙮ ᐁᑲᐧ ᐅᐡᑲᑎᓴᐠ ᐅᐅᐁᐧᓂ ᐅᑭᐊᓂᒧᑕᓇᐊᐧ ᐁᐸᑯᓭᓂᒧᐊᐧᐨ ᐅᐡᑲᑎᓴᐠ ᒥᓇ ᑭᒋᐦᐊᔭᐠ ᒋᐃᐧᑕᓄᑭᒥᑎᐊᐧᐨ᙮”
ᒧᓂᔭᐢ ᐃᑭᑐ ᓂᑕᔑᑫᐃᐧᓂᓇᐣ ᐊᐧᐁᐧᓇᒋᑫᐊᐧᐠ ᐱᑲᐧᑕᑲᒥᑲᐠ ᐅᐡᑲᑎᓴᐣ ᑲᐊᓂᒥᓭᓂᐨ ᐁᐧᐃᔓᓇᐊᐧᐨ ᐅᐅᐁᐧ ᑫᓂᐱᐠ᙮ ᐅᐡᑯᑎᓴᐠ ᒪᐊᐧᐨ ᒥᔑᓂᐊᐧᐠ ᐁᑲᐧ ᓇᐣᑕ 75 ᐯᕑᓭᐣᐟ ᒪᒪᐤ ᑕᓯᐊᐧᐠ ᓂᑕᔑᑫᐃᐧᓂᓇᐣ᙮
“ᒥᓇ ᐱᑯ ᒥᔑᐣ ᐅᑕᒣᑎᐊᐧᐠ ᐃᑫᐧᓂᐊᐧᐠ ᐅᑕ ᒪᐊᐧᐨ ᑲᑭᒋᐊᓂᒥᓭᐊᐧᐨ ᐅᐱᒪᑎᓱᐃᐧᓂᐊᐧ,” ᒧᓂᔭᐢ ᐃᑭᑐ᙮ “ᐁᑲᐧ ᐊᑎᐟ ᐃᐧᑫᐧᑐᐣᐠ ᐊᔭᐊᐧᐠ ᒥᓇ ᑯᑕᑭᔭᐣ ᑭᒋᑕᐃᐧᓇᐣ ᓇᐣᑕ ᑲᔭ ᐱᑲᐧᒋᐊᐦᐃᐠ ᐊᐧᔭᐊᐧᐠ᙮”
ᒧᓂᔭᐢ ᐃᑭᑐ ᒪᐊᐧᐨ ᒪᔭᑫᐣᑕᑲᐧᐣ ᐱᑲᐧᒋᐊᐦᐃᐠ ᐅᑫᐧᓂᐊᐧᐠ ᓂᑕᓂᔑᓂᓂᒥᓇᓇᐠ ᑲᐃᔓᓇᑲᓄᐊᐧᐨ ᐁᑲᐧ ᑲᔭ ᓇᓇᑐᐠ ᑫᑯᓇᐣ ᐁᑲ
ᐁᐧᐊᐧᓇᐦᐃᑯᐊᐧᐨ ᑐᑲᐣ ᒪᓯᓇᑌᓯᒋᑲᓇᐣ ᒥᓇ ᒪᒋᑭᑐᐃᐧᓇᐣ ᒥᓇ ᒪᒪᑕᐃᐧᐱᐊᐧᐱᑯᐣ᙮
“ᑲᐧᐡᑫᐧᐱᓀᐊᐧᐠ ᒥᓇ ᐱᑯ ᓇᓇᑕᐁᐧᐣᒋᑫᐊᐧᐠ,” ᒧᓂᔭᐢ ᐃᑭᑐ᙮ “ᐅᒥᓀᐣᑕᓇᐊᐧ ᓄᐱᐦᒥᐠ ᐁᑕᔑᑫᐊᐧᐨ ᒥᓇ ᐱᑯ ᐁᑲᑎᑯᓂᐊᐧᐨ᙮”
ᒧᓂᔭᐢ ᐃᑭᑐ ᓂᑯᑕᐧᔓᓴᑊ ᐊᐦᐃᐠ ᑭᐁᐧᑎᓄᐠ ᔕᐊᐧᓄᐠ ᐃᐧᑕᓄᑭᒥᑐᐃᐧᐣ ᐊᐊᐧᔑᔕᐠ ᑲᐊᓄᑲᐊᐧᑲᓄᐊᐧᐨ ᐁᑲᐧ ᐁᐃᓇᓀᐤ ᑭᐁᐧᑎᓄᐠ ᐅᑭᒪᑲᓇᐠ ᐊᓄᑭᓇᑲᓇᐠ ᑭᐅᑎᓭᐊᐧᐠ ᐅᐅᒪ ᑲᑭᐱᐃᐧᒋᐦᐃᑯᔭᑲᐧ ᓂᑕᔑᑫᐃᐧᓂᓇᐣ᙮
“ᐁᐦᐊᐣ ᒪᐊᐧᐨ ᐅᐡᑲᑎᓴᐣ ᑲᑭᐱᐊᓄᑲᓇᐊᐧᐨ,” ᒧᓂᔭᐢ ᐃᑭᑐ᙮ “ᐁᑲᐧ ᑲᔭ ᐅᐡᑲᑎᓴᐠ ᐅᑭᐸᑭᑎᓇᓇᐊᐧ ᐅᐸᑯᓭᓂᒧᓂᐊᐧ ᐊᐦᐃ ᒪᐊᐧᐨ ᐅᐡᑲᑎᓯᐃᐧ ᐅᓇᔑᐁᐧᐃᐧ ᐊᐱᑕᒪᑫᐃᐧᐣ ᒋᑭᑕᑲᐧᑭᐸᐣ ᒥᐡᑯᐨ ᐅᐅᒪ ᒍᒋᐊᓂᒧᑕᒥᐊᐧᐨ ᓇᓇᑐᐠ ᑫᑯᓇᐣ ᑲᐊᓂᒥᓴᐦᐃᑯᐊᐧᐨ᙮”
ᐁᑲᐧ ᑭᐁᐧᑎᓄᐠ ᔕᐊᐧᓄᐠ ᐃᐧᑕᓄᑭᒥᑐᐃᐧᐣ ᐊᐊᐧᔑᔕᐠ ᑲᐊᓄᑲᐊᐧᑲᓄᐊᐧᐨ ᐊᓄᑭᓇᑲᓇᐠ ᐅᑭᐅᓇᑐᓇᐊᐧ ᓇᓇᑐᐠ ᑲᐃᔑᓇᐦᐃᐊᐧᐨ ᓇᓇᑯᒧᐃᐧᐣ ᐃᐃᐁᐧ ᒣᑲᐧᐨ ᒪᑯᐱᓯᑦ ᐯᔑᑯᔕᑊ ᑲᐃᓇᑭᓯᐨ ᐁᑲᐧ ᐯᔑᑲᐧᒥᑕᓱᒥᑕᓇ ᑭᐃᐧᒋᐦᐃᐁᐧᐊᐧᐠ ᐁᑭ ᒪᓯᓂᐱᐦᐃᑫᐊᐧᐨ ᒥᓇ ᐁᑭᒥᑭᓯᑲᐧᓯᐊᐧᐨ ᒥᓇ ᐁᑭᒐᑲᑌᓯᒋᑫᐊᐧᐨ ᐁᑲᐧ ᐁᑭᓂᑲᒥᐊᐧᐨ᙮
ᑭᕑᐃᐸᐢ ᑫᐧᐦᓯᐢ ᓂᔑᑕᓇ ᓂᔭᓄᔕᑊ ᐁᑕᓴᑭᐃᐧᓀᐨ ᑭᐃᑭᑐ ᒪᐊᐧᐨ ᐅᐅᐁᐧ ᑐᑕᒧᐃᐧᐣ ᑭᒋᓀᐣᑕᑲᐧᐣ ᐅᐡᑲᑎᓴᐠ ᒋᐃᐡᒋᑫᐊᐧᐨ᙮
“ᑭᐡᐱᐣ ᑲᒪᒉᐣᑕᒪᐣ ᓂᑐᔑᐱᐦᐊᐣ ᐯᐸᓄᑲᐠ ᑲᐧᓂᐣ ᐃᑭᑐᐃᐧᓇᐣ ᑲᐃᑕᒪᐣ᙮ ᐸᑲᐣ ᐅᔕ ᑯᑕᑭᔭᐠ ᐅᑐᑕᓇᐊᐧ ᐁᐅᒋᐃᐧᒋᐦᐃᑯᐊᐧᐨ ᐃᐃᒪ ᐅᐱᒪᑎᓱᐃᐧᓂᐊᐧᐠ,” ᐃᑭᑐ ᑫᐧᐦᓯᐢ᙮ “ᒥᓇ ᐱᑯ ᐅᐅᒪ ᐅᒋᓂᓯᑕᐃᐧᓇᑲᐧᐣ ᐊᓂᐣ ᐊᐃᐧᔭᐠ ᐁᐃᓇᒪᒋᐅᐊᐧᐨ᙮ ᑭᔭᑦ ᐱᑯ ᑲᔭ ᓇᐣᑕᐣ ᑲᐅᔑᐱᐦᐃᑫᐊᐧᐨ᙮ ᐊᒥᐁᐧ ᐱᑯ ᐁᐃᔑᐊᐧᐸᑕᒪᐣ ᒪᓯᓂᐱᐦᐃᑫᐃᐧᐣ ᐁᐅᒋᐊᐧᐸᑕᐦᐃᐁᐧᒪᑲᐠ ᐊᓂᐣ ᐊᐧᐃᐧᔭ ᑲᐊᐃᔑᔭᐨ ᐅᐱᒪᑎᓱᐃᐧᓂᐠ᙮”
ᐁᑲᐧ ᐅᑫᐧᓂᐊᐧᐣ ᓇᓇᑐᐠ ᒪᓯᓂᐱᐦᐃᑲᓇᐣ ᐅᐅᒪ ᓇᓇᑯᒧᓂᐠ ᑲᑭᐅᒋᐅᔑᒋᑲᑌᑭᐣ ᐊᐦᐃᐠ ᑐᕑᐊᐧᐣᑐ ᑭᒋᐅᑌᓇᐠ ᑭᐃᔑᓂᔕᐦᐃᑲᑌᐊᐧᓄᐣ ᐁᐃᐧᐊᐧᑕᐸᐦᐃᐊᐧᓂᐊᐧᐠ᙮
“ᒪᐊᐧᐨ ᒥᐡᑕᐦᐃ ᓇᓇᑐᐠ ᑭᑎᔑᓇᐦᐃᒥᐣ ᐅᐅᐁᐧᑎ ᑭᐁᐧᑎᓄᐠ ᑲᐊᔭᔭᐠ ᐊᐦᐃᐠ ᐅᑕ ᑲᔭ ᓇᓇᑲ ᑭᐁᐧᑎᓄ ᑕᔑᑫᐃᐧᓇᐣ ᑲᑕᑲᐧᑭᐣ,” ᑫᐧᐦᓯᐢ ᐃᑭᑐ᙮ “ᔕᐊᐧᓄᐠ ᑲᑲᐯᔑᐊᐧᐨ ᐃᓯᓭᓂ ᒋᑭᑫᐣᑕᒥᐊᐧᐨ ᐊᐃᐧᔭᐣ ᐁᑲᐯᔑᓂᐨ ᐅᐅᐁᐧᑎ ᑭᐃᐧᑎᓄᐠ ᑲᑲᐯᔑᔭᐠ᙮”
ᓀᐢᑲᐣᑕᑲ ᑭᒋᐃᐧᒋᐦᐃᐁᐧᐃᐧᐣ ᐅᑭᓇᑐᑕᓇᐊᐧᐸᐣ ᐊᐱᐣ ᐅᐡᑲᑎᐢ ᓴᑲᓱᔕᑊ ᐁᑕᓴᑭᐃᐧᓀᐨ ᑲᑭᐅᑕᐱᓇᐠ ᐅᐱᒪᑎᓱᐃᐧᐣ ᐃᐃᒪ ᑕᔑᑫᐃᐧᓂᐠ᙮
“ᐊᒥᐁᐧ ᐱᑯ ᐊᔕ ᐁᓂᑫᐧᓇᐃᐧᐃᔑᓭᔭᑭᐸᐣ ᐁᑲᐧ ᓂᑕᔑᑫᐃᐧᓂᓇᐣ ᒪᐊᐧᐨ ᑭᒋᐊᓂᒥᓭᐸᐣ,” ᓀᐢᑲᐣᑕᑲ ᐅᓇᔑᐁᐧᐃᐧᓂᓂ ᕑᐊᐤ ᒧᓂᔭᐢ ᑭᐃᑭᑐᐸᐣ ᒣᑲᐧᐨ ᓂᑭᐱᓯᑦ ᑲᐱᒪᑲᓯᐨ᙮ “ᒪᐊᐧᐨ ᐱᑯ ᓂᑭᑭᒋᒥᑯᐡᑲᑯᒥᐣ ᒥᓇ ᐱᑯ ᓂᑭᒐᑭᒥᐣ ᒪᐊᐧᐨ ᐃᑭᐃᑭᑐᔭᐠ ᐁᑭᑲᑫᐧ ᒪᐡᑲᐃᐧᑲᐸᐃᐧᔭᐠ ᐅᐅᐁᐧ ᓴᓴᑯᓇᐠ ᑲᑭᒪᒪᑎᓭᔭᐠ᙮”
ᓂᑕᔑᑫᐃᐧᓂᓇᐣ ᐅᑭᐸᑭᑎᓇᓇᐣ ᐁᒪᓯᓇᐦᐃᑲᑌᑭᐣ ᑫᑯᓇᐣ ᑲᑭᒪᒥᑎᓀᐣᑕᒥᐦᐃᑯᔭᐠ ᐅᐅᒪ 421 ᐊᐃᐧᔭᐠ ᑲᐃᔑᑲᐯᔑᐊᐧᐨ ᒥᓇ ᐱᑯ ᑲᐊᓂᒥᐦᐃᑯᐊᐧᐨ ᐊᒥᐅᐁᐧ ᑭᒋᐃᐧᒋᐦᐃᐁᐧᐃᐧᐣ ᑲᑭᐅᒋᓇᒋᒋᑲᑌᐠ ᐅᓴᑦ ᑲᔭ ᐊᐱᑕ ᐊᐧᐃᐧᔭᐠ ᐁᒪᐡᑭᑭᑫᐊᐧᐨ ᒥᓇ ᐁᐱᔑᑲᐧᒋᑐᑕᒥᐊᐧᐨ ᒥᓇ ᐁᑲ ᐁᔑᒪᑲᓂᔑᑲᐠ ᒥᓇ ᐱᑯ ᐁᑲ ᐃᐧᒋᐦᐃᐁᐧᐃᐧᑲᒥᑯᐣ ᐁᑕᑲᐧᑭᐣ᙮
ᕑᐊᐤ ᒧᓂᔭᐢ ᐃᑭᑐ ᓂᑕᔑᑫᐃᐧᓂᓇᐣ ᑲᔭ ᒪᐊᐧᐨ ᐅᒋᐊᓄᒋᐊᑲᓄᐃᐧ ᐅᓴᑦ ᐅᑕ ᐅᐅᐁᐧ ᑭᒋᒪᒋᒋᑫᐃᐧ ᑭᒋᐱᐊᐧᐱᑯᑫᐃᐧ ᐊᐧᐁᐧᓇᒋᑫᐃᐧᐣ ᑕᔑᓀ ᑲᐊᓂᒧᒋᑲᑌᐠ ᒥᓇ ᐱᑯ ᐅᐱᐊᐧᐱᑯᑫᐠ ᐁᑲᐧ ᐅᐣᑌᕑᐃᔪ ᐅᑭᒪᐃᐧᐣ ᑲᐊᔭᒥᐊᑲᓄᐊᐧᐨ᙮
“ᑲᐧᓂᐣ ᑫᑯᐣ ᐃᐧᒋᐦᐃᐁᐧᐃᐧᐣ ᐅᐅᒪ ᒋᑕᑲᐧᐠ ᐁᑲᐧ ᐊᔕ ᐊᐱᐣ ᒥᔑᐣ ᐅᐡᑲᑎᓴᐠ ᐅᑐᑕᐱᓇᓇᐊᐧ ᐅᐱᒪᑎᓱᐃᐧᓂᐊᐧ,” ᐃᑭᑐ ᕑᐊᐤ ᒧᓂᔭᐣ ᐃᐃᐁᐧ ᒣᑲᐧᐨ ᓂᑭᐱᓯᑦ ᑲᐱᒪᑭᓯᐨ᙮
“ᐊᒥᐁᐧ ᐱᑯ ᐊᔕ ᐊᐊᐧᔑᒣ ᒋᐊᓄᑲᑌᐠ ᒥᓇ ᐱᑯ ᒋᑲᑫᐧᐊᑎᓂᑲᓂᐊᐧᐠ᙮”
ᐅᑭᒪᑲᐣ ᒧᓂᔭᐢ ᐃᑭᑐ ᒪᐊᐧᐨ ᐁᑭᒋᐊᓂᒥᐦᐃᑯᐊᐧᐨ ᐅᑎᓭᐃᐧᓂᐊᐧ ᐁᐦᐊᐠ ᐊᐃᐧᔭᐠ ᒥᓇ ᐱᑯ ᑫᐃᐧᐣ᙮ “ᒪᐊᐧᐨ ᐱᑯ ᓂᑭᒐᑭ ᐅᓇᑯ ᑲᐱᒪᒐᔭᐣ,” ᐅᑭᒪᑲᐣ ᒧᓂᔭᐢ ᑭᐃᑭᑐ ᐃᐃᐁᐧ ᒣᑲᐧᐨ ᒪᑯᐱᓯᑦ 17 ᑲᐃᓇᑭᓯᐨ ᐃᐃᒪ ᒪᑕᐊᐧ ᐅᑭᒪᑲᓇᐠ ᑲᐃᔑᒪᐊᐧᒋᐦᐃᑎᐊᐧᐨ ᑫᐃᐧᐣ ᑲᑭᐃᔕᐨ᙮