ᑭᐡᑭᒪᓂᓯᐊᐧᐳ ᑕᔑᑫᐃᐧᐣ ᐅᑕᐸᒋᑐᓇᐊᐧ ᐱᓯᒧᑲᐠ ᑲᐅᒋᒐᑲᑌᐊᐱᑭᑌᐠ ᑭᒋᐸᐸᐳᓇᐱᐠ

Create: 12/01/2015 - 19:24

ᒪᐊᐧᐨ ᐅᒋᐃᐧᒋᐦᐃᐁᐧᓭ ᐁᑲ ᒥᐡᑕᐦᐃ ᒋᔭᐸᑕᐠ ᐃᐡᑯᑌ ᐁᑲᐧ ᒥᓇ ᐅᒋᐃᐧᒋᐦᐃᐁᐧᓭ ᐅᐡᑭᐊᐧᑲᐦᐃᑲᓇᐣ ᐁᓇᐸᐱᑫᓂᑲᑌᑭᐣ ᐊᐱ ᐅᑕ ᑭᐡᑭᒪᓂᓯᐊᐧᐳᑲᐠ ᑕᔑᑫᐃᐧᓂᐠ ᑲᑭᐃᐡᑲᐧᐊᑐᐊᐧᐨ ᐱᓯᒧᑲᐟ ᑲᐅᒋᒐᑲᑌᐊᐱᑭᑌᐠ ᒥᓇ ᐃᐡᑯᑌ ᑲᐅᒋᐅᐡᒋᑫᓭᐠ ᑭᒋᐸᐸᐳᓇᐱᑯᑲᐠ ᐃᐃᒪ ᐊᐧᑭᒋᐊᐧᑲᐦᐃᑲᓂᐠ ᓂᐱᐃᐧᑲᒥᑯᐠ ᑲᑭᐃᔑᐊᐧᑭᑕᑐᐊᐧᐨ᙮
ᐅᐅᐁᐧ ᑲᐊᑲᓯᐠ ᐱᓯᒧᑲᐠ ᑲᐅᒋᒐᑲᑌᐊᐱᑭᑌᐠ ᑭᒋᐸᐸᐳᓇᐱᑯᐠ ᐃᐡᑲᑌ ᑲᐅᒋᐅᐡᒋᑫᓭᐠ 10 ᑫᕑᐅᐊᐧᐟᐢ ᐃᐡᑯᑌ ᑕᐊᐱᒋᒪᑲᐣ ᐁᑲᐧ ᐃᐃᒪ ᑕᔑᑫᐃᐧᓂᐠ ᐃᐡᑯᑌᐃᐧᔭᐱᑲᐟ ᑕᐅᒋᓴᑲᐱᑫᓯᐣ ᐁᑲᐧ ᐸᑭ ᒣᑎᓂᑫᐃᐧᐣ ᑕᐊᔭᒪᑲᐣ ᐃᐃᒪ ᐅᑕ ᐅᓴᑦ ᓂᐱᐃᐧᑲᒥᑯᐠ ᒥᐡᑕᐦᐃ ᐃᐡᑯᑌ ᑲᐅᒋᐃᐧᑯᐱᒋᑫᒪᑲᐠ᙮
“ᒪᐊᐧᐨ ᓂᑎᑭᑎᒥᐣ ᐁᓇᓇᑕᐊᐧᐸᑕᒪᐠ ᐊᐣᑎ ᐁᑲ ᒥᐡᑕᐦᐃ ᑫᑭᐅᒋᒣᑎᓂᑫᔭᑭᐸᐣ ᐅᓴᑦ ᑲᐊᑲᐧᑭᑌᐠ ᐃᐡᑯᑌ ᑲᐊᐸᒋᑐᔭᐠ” ᐃᑭᑐ ᑭᐡᑭᒪᓂᓯᐊᐧᐳ ᐅᑭᒪᑲᐣ ᒉᒥᐢ ᒣᒣᑫᐧ᙮ “ᐅᐅᐁᐧ ᒪᒋᒋᑫᐃᐧᐣ ᐸᑭ ᑕᐅᒋᐃᐧᒋᐦᐃᐁᐧᒪᑲᐣ᙮”
ᐅᐅᐁᐧ ᐱᓯᒧᑲᐠ ᑲᐅᒋᒐᑲᑌᐊᐱᑭᑌᐠ ᑭᒋᐸᐸᐳᓇᐱᑯᐠ ᐃᐡᑲᑌ ᑲᐅᒋᐅᐡᒋᑫᓭᐠ ᐅᑲᐃᐧᒋᐦᐃᑯᓇᐊᐧ ᐃᐃᒪ ᐊᓂᔑᓂᐃᐧ ᑕᔑᑫᐃᐧᓂᐠ ᓂᐣᑕ ᐱᑯ ᒥᓂᑯᐠ $7,500 ᐯᔑᑯᔭᑭ ᑕᒣᑎᓂᑫᐊᐧᐠ ᐃᑫᐧᓂᐊᐧᐠ ᐃᐡᑯᑌᓂ ᑲᐊᐸᒋᑐᐊᐧᐨ ᒥᑲᐧᐨ ᑲᔭ ᐱᒥᐊᐸᑕᐠ ᐳᑕᐊᐧᓂᐱᒥᑌ ᐃᐃᒪ ᐃᐡᑯᑌᐃᐧᑲᒥᑯᐠ ᒥᓇ ᐱᑯ ᒥᐡᑕᐦᐃ ᐱᒋᐳᐊᐧᐸᓱᐣ ᒍᒋᐊᒍᓭᐠ᙮
ᒣᒣᑫᐧ ᐃᑭᑐ ᐅᐅᐁᐧ ᐱᓯᒧᑲᐠ ᑲᐅᒋᒐᑲᑌᐊᐱᑭᑌᐠ ᑭᒋᐸᐸᐳᓇᐱᑯᐣ ᐃᐡᑲᑌ ᑲᐅᒋᐅᐡᒋᑫᓭᐠ ᐊᒥᐅᐁᐧ ᓂᐡᑕᑦ ᐁᒪᑕᓄᑲᑌᐠ ᒋᐊᒍᔭᐸᑕᐠ ᐃᐡᑯᑌ ᒥᐡᑯᐨ ᑭᔭᐱᐨ ᐅᐡᑭᐊᐧᑲᐦᐃᑲᓇᐣ ᒋᐅᔑᒋᑲᑌᑭᐣ᙮ ᐅᐅᐁᐧ ᒣᑲᐧᐨ ᑭᐡᑭᒪᓂᓯᐊᐧᐳᑲᐠ ᑲᐧᓂᐣ ᒋᑭᓇᐸᐱᑫᓂᑲᑌᑭᐣ ᐅᐡᑭᐊᐧᑲᐦᐃᑲᓇᐣ ᐅᓴᑦ ᐊᔕ ᐁᓄᑭᒪᑲᑭᐣ ᐱᒥᐸᓂᒋᑲᓇᐣ ᐁᑲᐧ ᑲᔭ ᑲᓇᑕ ᐅᑭᒪᐃᐧᐣ ᐁᑲ ᐁᐃᐧᐅᐡᑭᑐᒋᐣ᙮ ᐁᑲᐧ ᒣᒣᑫᐧ ᑲᑭᐃᑭᑐᐨ ᐅᑕᔑᑫᐃᐧᓂᐊᐧ ᐁᓂᒥᔕᓂᐠ ᐁᑲᐧ ᒪᐊᐧᐨ ᐅᐡᑭᐊᐧᑲᐦᐃᑲᓇᐣ ᐁᓇᑕᐁᐧᐣᑕᑲᐧᑭᐣ᙮
ᒥᓇ ᐃᑭᑐ ᐅᑕᔑᑭᐃᐧᓂᐊᐧᐠ ᑭᔭᐱᐨ ᓇᐣᑕ ᐁᐃᐧᐅᓇᑐᐊᐧᐨ ᐱᓯᒧᑲᐠ ᑲᐅᒋᒐᑲᑌᐊᐱᑭᑌᐠ ᑭᒋᐸᐸᐳᓇᐱᑯᐣ ᐃᐡᑲᑌ ᑲᐅᒋᐅᐡᒋᑫᓭᐠ ᐃᐃᒪ ᐸᐣᐟ ᑲᑎᐯᐣᑕᑭᐣ ᐊᐧᑲᐦᐃᑲᓇᐣ ᑐᑲᐣ ᒪᓯᓇᐦᐃᑫᐃᐧᑲᒥᑯᐠ ᒥᓇ ᐊᑕᐃᐧᑲᒥᑯᐠ ᐁᑲᐧ ᑐᑲᑭᔭᐣ ᑭᒋᐊᐧᑲᐦᐃᑲᓇᐣ ᒥᐡᑕᐦᐃ ᑲᐊᐸᒋᑐᐊᐧᐨ ᐃᐡᑯᑌᓀ ᒥᐡᑯᐨ ᐅᐡᑭᐊᐧᑲᐦᐃᑲᓇᐣ ᒋᓇᐸᐱᑫᓂᑲᑌᑭᐣ᙮
ᐅᐅᐁᐧ ᒪᒋᒋᑫᐃᐧᐣ ᐃᐃᒪ ᓂᐱᐃᐧᑲᒥᑯᐠ ᒪᒪᐤ $75,000 ᑭᒣᑎᓂᑲᓂᐊᐧᐣ ᑲᑭᐅᓇᒋᑲᑌᐠ ᐁᑲᐧ ᐃᐃᒪ ᐊᓂᔑᓂᓂᐃᐧ ᑲᓇᑕ ᔑᓂᔭᐃᐧ ᐱᒧᒋᑫᐃᐧᑲᒥᑯᐠ ᑭᐅᒋᐸᑭᑎᓇᑲᓄ ᔓᓂᔭᐣ ᑲᑭᑎᐸᐦᐃᑲᑲᓂᐊᐧᐠ᙮
ᔑᐳᑲᒪ ᐱᒧᒋᑫᐃᐧᑲᒥᐠ ᐊᓄᑭᓂᑲᐣ ᓫᐊᕑᐊ ᓭᐅᕑᐢ ᐃᑭᑐ ᐅᐅᒪ ᓂᐡᑕᑦ ᑲᑭᒪᒋᐊᐸᑕᐠ ᒣᑲᐧᐨ ᑲᑭᐱᐳᐠ ᐊᔕ 500 ᑫᓫᐅᐊᐧᐟ ᑕᓴᐊᐧᑲᓭ ᐃᐡᑯᑌ ᐊᐸᑕᐣ ᐁᑲᐧ ᐊᐊᐧᔑᒣ 600 ᑕᓱᓂᑲᐧᐣ ᐊᔕ ᑲᐅᒋᐱᒋᐳᐊᐧᐸᑌᐠ ᐊᒍᓭ᙮
ᓭᐅᕑᐢ ᐃᑭᑐ ᑭᐡᑭᒪᓂᓭᐊᐧᐳ ᑕᔑᑫᐃᐧᐣ ᒪᐊᐧᐨ ᑲᐧᔭᐠ ᐅᒋᑭᑭᓄᒋᑫᒪᑲᐣ ᑕᐱᐡᑯᐨ ᑯᑕᑭᔭᐣ ᑕᔑᑫᐃᐧᓇᐣ ᑫᐃᐧᓇᐊᐧ ᒋᓇᓇᑕᐊᐧᐸᑕᒧᐊᐧᐨ ᑲᐃᔑᓇᓄᑕᓭᐊᐧᐨ ᑲᐊᐸᒋᑐᐊᐧᐨ ᐃᐡᑯᑌ ᐅᒋ᙮
“ᐅᐅᐁᐧ ᑐᑲᐣ ᒪᒋᒋᑫᐃᐧᐣ ᐊᔕ ᐸᓂᐢᑫᐧ ᑕᓂᑭᒋᐊᐸᑕᐣ,” ᐃᑭᑐ ᓭᐅᕑᐢ᙮ “ᑕᐅᒋᐃᐧᒋᐦᐃᐁᐧᒪᑲᐣ᙮”
ᒣᒣᑫᐧ ᐃᑭᑐ ᑯᑕᐠ ᒥᓇ ᐸᑲᐣ ᑲᐅᒋᓭᒪᑲᐠ ᐅᐅᐁᐧ ᐃᐧᒋᐦᐃᐁᐧᐃᐧᐣ ᒪᐊᐧᐨ ᒥᐡᑕᐦᐃ ᓂᑐᒋᐃᐧᒋᐦᐃᑯᒥᐣ ᐃᐃᒪ ᓂᑕᔑᑫᐃᐧᓂᓇᐣ ᒥᓇ ᐁᑲ ᐁᑭᒋᒣᑎᓂᑫᔭᐠ ᑲᐊᐸᒋᑐᔭᐠ ᐃᐡᑯᑌ ᐅᒋ᙮ ᐃᐃᒪ ᐸᑲᐣ ᑲᐅᒋᓭᐠ ᓂᐃᐧᒋᐦᐃᑯᓂᓇᐣ ᐊᐦᐃ ᑲᔭ ᐊᐧᐡᑌᓂᑲᐣ ᐅᐱᑲᐧᒋᐣ ᓂᑭᒥᐡᑯᑎᓇᒥᓇᐣ ᐊᐦᐃ ᐅᑕ ᐁᑲ ᒥᐡᑕᐦᐃ ᑲᐃᐧᑯᐱᒋᑫᒪᑲᑭᐣ᙮
“ᓂᐊᐧᐸᑕᒥᐣ ᐅᐅᐁᐧ ᒥᐡᑕᐦᐃ ᐁᐅᒋᒪᓇᒋᒋᑫᒪᑲᐠ” ᐃᑭᑐ ᒣᒣᑫᐧ᙮