ᐊᐧᔕᐦᐅᐠ ᐃᐡᑯᓂᑲᓂᐠ ᑭᒋᒋᒪᓂᐠ ᑕᐅᒋ ᒪᐦᒋ ᐱᒪᐦᐅᑕᓱᑕᒪᐊᐧᐊᐧᐠ

ᐊᐧᔕᐦᐅᐠ ᑲᑕᔑᑫᐊᐧᐨ ᐅᒪᐡᑭᑯᐠ ᐊᔕ ᐅᑕᔭᓇᐊᐧ ᐅᐡᑭ ᐸᑯᓭᓂᒧᐃᐧᐣ ᒋᑌᐱᓇᒧᐊᐧᐨ ᑲᐧᔭᐠ ᒋᐃᔑᓇᑲᐧᓂᐠ ᒥᒋᒪᐣ, ᑫᒥᓄᐡᑲᑯᐊᐧᐨ ᒥᒋᒪᐣ ᐁᑲᐧ ᒥᓇ ᐅᑕᔑᑫᐃᐧᓂᐊᐧᐠ ᑫᐅᒋ ᒪᑕᓄᑲᑕᒧᐊᐧᐨ ᐅᔓᓂᔭᑫᑕᒪᓱᐃᐧᓂᐊᐧ ᐊᑯᓇᐠ ᐊᐱᐣ ᑲᑭᑕᑯᔑᓄᒪᑲᑲᐧᐸᐣ ᓂᔑᐣ ᐊᓂᔑᓂᓂᐃᐧ ᐱᒧᒋᑫᐃᐧᓂᐠ ᑲᐅᒋᔭᓄᑲᑌᑭᐣ ᒧᓱᓂ ᐱᒪᐦᐅᑕᓱ ᐦᐊᐟᓴᐣ ᐯ ᑭᒋ ᒋᒪᓇᐣ ᐊᐱ ᑲᔭᓂ ᐳᓇᑭᓱᐨ ᐊᐧᑌᐸᑲᐃᐧᐱᓯᑦ.
ᐁᑲᐧ 400 ᑕᓯᓄᐊᐧᐠ ᐅᒪᐡᑭᑯᐠ ᐊᐧᔕᐦᐅᐠ ᑲᑕᔑᑫᐊᐧᐨ ᐊᒥ ᐁᑲᐧ ᑫᐃᐧᒋᐦᐃᑯᐊᐧᐨ ᒋᑭᐁᐧ ᓇᓇᓯᑲᒪᓱᐊᐧᐨ ᐊᐦᑭᐃᐧ ᐅᐣᑕᒋᐦᐅᐃᐧᓇᐣ ᒥᓇ ᐱᑯ ᐊᐊᐧᔑᒣ ᒋᐅᒋ ᒥᓄᓭᐊᐧᐨ ᐅᐱᒪᑎᓯᐃᐧᓂᐊᐧᐠ ᐃᒪ ᐃᓀᑫ ᒋᐅᒋ ᐁᐧᐣᑕᑭᑌᓂᐠ ᐱᒥᑌᓂ, ᒥᒋᒪᐣ ᒥᓇ ᐊᐸᒋᒋᑲᓇᐣ ᑲᐅᒋ ᑕᑲᐧᐦᐅᑕᓱᑕᒪᐃᐧᑕᐧ ᑭᒋ ᒋᒪᓂᐠ. ᐁᑲᐧ ᒪᐊᐧᐨ ᐊᐱᐣ ᓂᐢᑕᑦ ᑲᑭ ᑕᑲᐧᐦᐅᑕᓱᑕᒪᐃᐧᑕᐧᐸᐣ ᑲᔭᓄᓇᑯᔑᓂᐠ ᒣᑲᐧᐨ ᐊᐧᑌᐸᑲᐃᐧᐱᓯᒧᐣ 29 ᐁᑲᐧ ᒥᓇ ᑯᑕᐠ ᑭᐱᔕᑲᒣᐡᑲᒪᑲᐣ ᐊᐱ ᓂᐢᑕᑦ ᑲᑭᐃᐡᑲᐧ ᐊᑲᐧᓇᓱᓇᓄᐊᐧᐠ ᐅᐱᒪᐊᒧᐃᐧᐱᓯᑦ ᑲᐅᐡᑲᑭᓱᐨ.
ᐅᑕᓇᐠ ᐊᑯ ᑭᒋ ᒋᒪᓇᐣ ᑭᑲᐡᑭᐦᐅᒪᑲᓄᐸᓂᐣ ᒋᐅᒋ ᐱᒥᔭᒪᑲᑭᐣ ᑲᐃᔑᓂᑯᑕᐧᓱᑎᐸᐦᐊᑲᓀᔭᐠ ᓯᐱᐠ ᑕᔑᑫᐃᐧᓂᐠ ᐁᐧᑎ ᐊᐱᐣ ᓴᑭᑕᐊᐧᐣᐠ, ᐁᐧᑲ ᔕᑯᐨ ᑲᔭᓂᑫᑌᔭᐠ ᐊᐧᔕᐦᐅ ᓯᐱᐠ ᐊᓂᐱᒥᐃᐢᑲᑌ ᐁᑲᐧ ᒥᓇ ᓄᑯᑦ ᐃᔑᓇᑕᐁᐧᐣᑕᑲᐧᓄᐣ ᑭᒋ ᒋᒪᓇᐣ ᒋᑭᐱᒋᒪᑲᑭᐣ ᓇᓀᐤ ᐦᐊᐟᓴᐣ ᐯ ᓇᐣᑕ ᓂᐅᑎᐸᐦᐊᑲᐣ ᓂᑲᑌ ᐊᐧᔕᐦᐅᐠ ᑕᔑᑫᐃᐧᓂᐠ.
ᐁᑲᐧ ᐅᓄᐁᐧᓂᐊᐧᐣ ᓂᔑᐣ ᑭᒋ ᒋᒪᓇᐣ ᐊᒥ ᐸᐢᑲᐣ ᐁᑭᐱᑕᑯᔑᓄᒪᑲᑭᐣ ᐊᑯᓇᐠ 2008 ᑲᔭᑭᐊᐧᐠ. ᒥᑕᐡ ᐊᐱᐣ ᑲᑭᔭᓂ ᒪᒋ ᐊᑲᐧᑭᐣᑌᑭᐣ ᐊᐸᒋᒋᑲᓇᐣ ᑐᑲᐣ ᒪᐊᐧᐨ ᑲᑭᒋᐊᐸᑕᐠ ᑲᓴᓕᐣ. ᐊᑎᑲ ᐊᑯ ᑲᐱᑕᒪᐃᐧᑕ ᐊᐸᒋᒋᑲᓇᐣ ᑐᑲᐣ ᑲᓴᓕᐣ ᐃᒪ ᑭᒋ ᒋᒪᓂᐠ ᓇᐣᑕ ᐃᒪ ᐱᐳᓂ ᒥᑲᓇᐠ, ᐁᑲᐧ ᐊᐱᐣ ᑲᓄᑌᒐᑭᓭᐊᐧᐨ, ᐱᒥᓭᐃᐧᓂᐠ ᐅᒋᑕᑯᐃᐧᑕᒪᐊᐧᐊᐧᐠ. ᒥᑕᐡ ᒥᓂᑯᐠ ᑲᑭᐃᓇᑭᑕᒪᐃᐧᑕ ᒣᑲᐧᐨ 2009 ᒥᓇ 2010 ᐃᐁᐧ ᑲᓴᓕᐣ $3.75 ᐯᔑᑯᒥᓂᑲᐧᑲᐣ.
ᐁᑲᐧ ᒥᓇ ᓇᐱᐨ ᐊᒋᓇ ᑲᑭᐱᐳᐠ ᒣᑲᐧᐨ 2009 ᒥᐦᐃᒪ ᑲᑭᐅᒋ ᐊᓂᒥᐦᐃᑯᐊᐧᐨ ᔓᓂᔭᓂᐠ ᐃᓀᑫ ᐃᑭᐁᐧᓂᐊᐧᐠ ᐅᒪᐡᑭᑯ ᐃᐡᑯᓂᑲᓂᐠ ᒥᓇ ᐱᑯ ᐃᒪ ᑲᐅᒋᑎᐯᐣᑕᑯᓯᐊᐧᐨ, ᒥᓇ ᐱᑯ ᐊᑲᐧᒋᐠ ᑲᐅᒋᒪᑲᑭᐣ ᐊᓄᑭᑕᒪᑫᐃᐧᓇᐣ ᑲᐱᒧᑐᐊᐧᐨ ᑲᐅᓇᑐᐊᐧᐨ ᑭᒋᐊᓄᑭᐃᐧᑫᑯᓇᐣ ᒥᓇ ᐱᑯ ᑲᐱᐅᓇᑐᐊᐧᐨ ᐃᐧᒋᐦᐃᐁᐧᐃᓇᐣ ᐃᒪ ᐊᐧᔕᐦᐅᐠ.
ᒥᑐᓂ ᐱᑯ ᐅᑭᐱᔭᓂᒥᐦᐃᑯᓇᐊᐧ ᐣᑕᓂᔑᓂᓂᒪᐠ, ᐃᑭᑐ ᐊᐧᔕᐦᐅ ᐅᑭᒪᑲᐣ ᒪᑎᔪ ᑲᑭᑫᔭᐢᐱᐣ. ᑲᐃᐧᐣ ᐅᑭᐅᒋ ᑲᐡᑭᑐᓇᐊᐧ ᓇᐣᑕ ᒋᑭᐊᐃᔑᐃᐧᓂᑎᓱᐊᐧᐨ, ᐁᐧᑎ ᐱᑲᐧᑕᑭᐠ ᒋᓇᓇᑕᐁᐧᒋᑫᐊᐧᐨ, ᓇᐣᑕ ᒋᓇᓇᑕᐃᐧᓂᓭᑕᒪᓱᐊᐧᐨ ᒥᓇ ᐱᑯ ᒋᐊᐃᑐᑕᒧᐊᐧᐨ ᐊᓂᔑᓂᓂᐃᐧ ᑐᑕᒧᐃᐧᓇᐣ.
ᐅᐣᒋᑕ ᐱᑯ ᐃᓯᓭᓂ ᒋᑲᑫᐧ ᐅᐣᑎᓂᑫᑕᒪᓱᐊᐧᐨ ᐱᑲᐧᑕᑭᐃᐧᒥᒋᒪᐣ ᑫᑭᐅᒋ ᑭᔑᔕᐃᐧᐱᒪᑎᓯᐊᐧᐨ ᐊᓂᐡ ᐁᑲ ᓇᐱᐨ ᐁᑭᔓᓂᔭᑫᐊᐧᐨ ᐅᑕᔑᑫᐃᐧᓂᐊᐧᐠ. ᑫᑲᐟ ᐃᑯ ᑲᐃᐧᐣ ᒋᑭᑌᐱᓭᐊᐧᐨ ᑎᐯᐣᒋᑫᐃᐧᓇᐣ ᒥᓂᑯᐠ ᐃᐁᐧ ᑲᐃᓇᑭᐣᑌᑭᐣ ᒥᒋᒪᐣ ᐃᒪ ᑲᑦᐸᓂᐃᐧ ᐊᑕᐁᐧᐃᐧᑲᒥᑯᐠ ᒥᑐᓂ ᐱᑯ ᐁᑭᒋᐊᑭᐣᑌᑭᐣ ᐱᑯ ᐊᐣᑎ ᑲᐃᔑ ᐊᔭᑭᐣ ᐱᑲᐧᑕᐃᐧ ᑕᔑᑫᐃᐧᓇᐣ. ᐁᑲᐧ ᑕᐡ ᓇᐊᐧᐨ ᐊᑯ ᐅᑐᒋᐃᐧᒋᐦᐃᑯᓇᐊᐧ ᑎᐯᐣᒋᑫᐃᐧᓇᐣ ᐱᑲᐧᑕᑭᐠ ᑲᐅᑎᓇᒪᓱᐊᐧᐨ ᑫᑯᓇᐣ ᑐᑲᐣ ᐊᐃᐧᔭᔑᔑᒥᒋᒪᐣ. ᐁᑲᐧ ᒥᓇ ᔕᑯᐨ ᑭᐡᐱᐣ ᑲᐊᑲᐧᑭᐣᑌᐠ ᑲᓴᓕᐣ ᐁᑲ ᐅᐁᐧᓂ ᐁᑭᑐᑕᒧᐊᐧᐨ. ᒥᐢᑕᐦᐃ ᑫᑯᓇᐣ ᑲᑭᐃᓇᑭᐣᑌᑭᐣ ᒣᑲᐧᐨ 2009 ᑲᔭᑭᐊᐧᐠ ᐸᐣᐟ ᐅᓂᑲᓂᑕᒪᑫᐠ ᐅᑭᑐᑕᓇᐊᐧᐸᐣ ᒋᒧᒋ ᑎᐸᐦᐃᑫᑕᒪᐃᐧᑕᐧ ᐅᒥᓯᒥᐊᐧ ᑭᒋᐦᐊ. ᐁᑲᐧ ᒥᓇ ᐅᑭᑐᑕᓇᐊᐧᐸᐣ ᐊᑎᐟ ᐁᑭᓂᓴᑭᐣᑕᒪᑫᐊᐧᐨ ᑲᐱᑕᐦᐅᑕᓱᑲᑭᐣ ᐊᑎᐟ ᑫᑯᓇᐣ ᐁᑲ ᐁᐧᐨ ᒥᐢᑕᐃ ᒋᐃᓇᑭᐣᑌᑭᐣ. ᑲᑭᑫᔭᐢᐱᐣ ᒥᓇ ᐅᑐᓇᔓᐁᐧᐃᓂᓂᒪᐣ ᐅᑭᐅᓀᑕᓇᐊᐧᐸᐣ ᒋᐅᓇᑐᐊᐧᐨ ᓂᓴᑭᐣᒋᑫᐃᐧᓇᐣ ᐊᑎᐟ ᐊᐸᒋᒋᑲᓇᐣ ᑫᑭᐅᒋ ᓂᓴᑭᐣᑕᒪᐃᐧᑕᐧ ᐊᐧᔕᐦᐅᐃᐧᓂᓂᐊᐧᐠ.
ᓂᔓᐊᐦᑭ ᑭᑕᔑᐱᐦᐅᐊᐧᐠ ᒋᒪᒋᔭᐸᑕᓂᐠ ᑭᒋᒋᒪᓂᐠ ᒋᐅᒋ ᐱᒪᐦᐅᑕᓱᑕᒪᐃᐧᑕᐧ ᐅᑕᔑᑫᐃᐧᓂᐊᐧᐠ
ᐊᑎᑲ ᐃᐁᐧ ᐯᔑᑲᐧᔦᐠ ᒋᓂᓴᑭᐣᒋᑲᑌᐠ ᑲᐱᑕᒪᐊᐧᑲᓄᐨ ᑲᑦᐸᓂ ᑲᐃᓇᑭᐣᑕᒪᐊᐧᑲᓄᐨ ᐱᒥᑌᓂ.
ᒥᑕᐡ ᐅᐁᐧᓂ ᑲᑭᐃᔑ ᓇᑯᒧᐨ ᑲᑦᐸᓂᐅᑭᒪ, ᑭᐃᑭᑐ ᒋᓂᓴᑭᐣᑕᒪᐊᐧᐨ ᐊᐧᔕᐦᐅᐠ ᑲᑕᔑᑫᐊᐧᐨ.
ᐁᑲᐧ ᑕᐡ ᓄᑯᑦ ᑭᒋ ᒋᒪᓂᐠ ᑲᐅᒋ ᑕᑯᐃᐧᒋᑲᑌᐠ ᑲᓴᓕᐣ ᑕᐃᓇᑭᑕᒪᐊᐧᐊᐧᐠ $2 ᐯᔑᑯᒥᓂᑲᐧᑲᐣ, ᐊᐱᐨ ᐃᐧᐣ $2.50 ᑭᐡᐱᐣ ᐁᑲ ᑭᒋ ᒋᒪᓂᐠ ᐅᒋᑕᑯᐃᐧᒋᑲᑌᓂᑭᐸᐣ.
ᐃᐧᓇᐊᐧ ᑕᐡ ᐸᐣᐟ ᐅᓂᑲᓂᑕᒪᑫᐠ ᐅᑭᐊᓄᑲᑕᓇᐊᐧ ᒋᒪᑕᓄᑲᑌᐠ ᑭᒋ ᒋᒪᓂᐠ ᒋᑭᐁᐧ ᐊᐸᒋᒋᑲᑌᐠ ᒥᓇ ᒋᐅᒋ ᐁᐧᐣᑕᑭᐣᑌᑭᐣ ᑫᑯᓇᐣ ᑲᐅᒋᑕᑯᐃᐧᒋᑲᑌᑭᐣ ᐁᑲᐧ ᒪᒪᐤ $153,000 ᐯᔑᑯᓇᐠ ᐃᓇᑭᑌ.
ᒥᑕᐡ ᐅᐁᐧ ᐁᔑᐸᐸᒥᓯᒪᑲᑭᐣ ᐃᓇᓄᑭᐃᐧᓇᐣ: ᐅᓇᒋᑲᑌ ᐊᓂᐣ ᐊᐱ ᑫᐊᓂᔑᒪᒐᒪᑲᐠ ᑭᒋ ᒋᒪᐣ, ᓂᑲᐣ ᑎᐸᐦᐃᑲᑌ ᑲᐱᓇᑐᒋᑲᑌᐠ ᒋᒪᐣ, ᓂᑲᐣ ᓇᑐᒋᑲᑌᐊᐧᐣ ᑫᑯᓇᐣ, ᑎᐸᐦᐃᑲᑌᐊᐧᐣ ᒥᓇ ᐃᔑᓂᔕᐦᐃᑲᑌᐊᐧᐣ ᒧᓱᓂᐠ ᐸᐣᐟ ᑲᐅᒋ ᓇᑐᒋᑲᑌᑭᐣ ᑫᑯᓇᐣ, ᐁᑲᐧ ᒥᓇ ᐊᓄᑲᑌᐊᐧᐣ ᒥᓇ ᒪᓯᓇᐦᐃᑫᐦᐊᐊᐧᐠ $0.50 ᐯᔑᑯᑎᐸᐱᐡᑯᒋᑲᐣ ᐃᓇᑭᐣᑕᒪᐊᐧᐊᐧᐠ ᑯᑕᑭᔭᐠ ᑕᔑᑫᐃᐧᓂᐠ ᑲᐅᒋᐊᐧᐨ ᒥᓇ ᐊᑲᐧᒋᐠ ᑲᐅᒋᐊᓄᑲᑕᒧᐊᐧᐨ ᐊᓄᑭᑕᒪᑫᐃᐧᓇᐣ ᑲᓇᓇᑐᓇᒧᐊᐧᐨ ᐁᑲ ᒥᐢᑕᐦᐃ ᑫᐃᔑᒣᑎᓂᑫᐊᐧᐨ ᑫᑯᓇᐣ ᑲᐃᔑᓂᔕᐦᐊᒧᐊᐧᐨ ᐊᐧᔕᐦᐅᐠ.
ᐯᔑᑯᔭᑭ ᐱᒥᑌᐱᓭᐊᐧᐠ ᐯᔑᑯᓇᐠ ᑲᓴᓕᐣ ᑲᐱᑕᐦᐅᑕᓱᒪᑲᐠ ᑭᒋ ᒋᒪᐣ, ᐁᑲᐧ ᐊᔑᐨ ᒥᒋᒪᐣ ᑲᐸᐣᑲᐧᑭᐣ, ᐊᐧᑲᐦᐃᑲᓂ ᐊᐸᒋᒋᑲᓇᐣ ᒥᓇ ᐱᑯ ᐅᐡᑭ ᐅᑕᐸᓀᓴᐣ ᑭᐡᐱᐣ ᐸᐣᐟ, ᑕᔑᑫᐃᐧᓂᐠ ᑲᐅᒋᑎᐯᐣᑕᑯᓯᐊᐧᐨ ᓇᐣᑕ ᐊᑲᐧᒋᐠ ᑲᐅᒋᐊᓄᑭᑕᒪᑫᐊᐧᐨ ᑭᐡᐱᐣ ᑲᓇᑕᐁᐧᑕᓂᒪᐊᐧᐨ.
ᐁᑲᐧ ᓄᑯᑦ 2010 ᑲᔭᑭᐊᐧᐠ ᑭᓇᑕᐁᐧᑕᑲᐧᐣ ᓂᔕᐧ ᒋᐱᑕᐦᐅᑕᓱᒪᑲᐠ ᒥᑐᓂ ᐱᑯ ᑭᑭᐡᐳᓀᐦᐅᑕᓱᒪᑲᓄᐣ ᒥᓂᑯᐠ ᐃᒪ ᑕᔑᑫᐃᐧᓂᐠ ᑲᑭᐃᔑᓄᑌᓭᑭᐣ ᑫᑯᓇᐣ.
ᐁᑲᐧ ᒥᐅᓄ ᐊᑎᐟ ᐁᑲ ᓇᐱᐨ ᑲᐱᒥᐃᐧᒋᑲᑌᑭᐣ ᐅᒪ 850 ᑭᓫᐅᒥᑐᕑᐢ ᑲᐊᐱᓯᓇᑲᐧᐠ ᑭᒋᑲᒥᐠ ᑲᐅᒋᐱᒥᔭᒪᑲᐠ ᑭᒋᒋᒪᐣ ᒧᓱᓂᐠ ᑲᑭᐅᒋᒪᒐᒪᑲᐠ ᐁᐧᑎ ᐊᐱᐣ ᐊᐧᔕᐦᐅᐠ: ᐊᐧᑲᐦᐃᑲᓂ ᐊᐸᒋᒋᑲᓇᐣ ᑲᐃᐧᐅᐡᑭ ᐅᔑᒋᑲᑌᐠ $3.2 ᒥᓫᐃᔭᐣ ᐊᓂᔑᓇᐯ ᐊᐢᑭ ᔑᒪᑲᓂᔑᐃᐧ ᐊᓄᑭᐃᐧᑲᒥᐠ, ᐃᐡᑲᐧᑌᒪᐣ, ᐸᐸᐳᐃᐧᓇᐣ, ᓇᐸᑭᓴᑯᐠ, ᓴᓴᐸᐧᐦᐃᑲᓇᐣ, ᐅᐡᑭ ᑲᐸᐸᑲᑕᒧᐡᑭᑫᐨ ᐅᑕᐸᐣ ᒋᐃᔑᐊᐸᑎᓯᐨ ᔑᒪᑕᐊᐧ ᒥᓇ ᐱᐊᐧᓇᐠ ᐁᑲᐧ ᒥᓇ ᐅᐡᑭ ᒧᐊᐧᐳ ᐅᑕᐸᐣ ᑕᔑᑫᐃᐧᓂᐠ ᒋᐃᔑᐊᐸᑎᓯᐨ.
ᒥᑕᐡ ᐅᓄᐁᐧᓂᐊᐧᐣ ᑫᑯᓇᐣ ᑲᑭᐊᔑᒋ ᐳᓯᒋᑲᑌᑭᐣ ᑲᐸᐣᑲᐧᑭᐣ ᒥᒋᒪᐣ ᒥᓇ ᐱᑯ ᑲᓴᓕᐣ ᒋᑌᐱᓭᐊᐧᐨ ᐃᒪ ᑕᔑᑫᐃᐧᓂᐠ ᐸᓂᒪ ᒥᓇᐊᐧ ᐃᔕᒪᑲᐠ ᑭᒋᒋᒪᐣ 2011 ᐊᐦᑭᐊᐧᐠ.