Chi-anchisek ke-i-shikikenimiintwaa kaawaani-i-twaa ikwewaak

Kakitashinchinchikatek ewaani-i-twaa shikwaa kakinisintwaa ikii anishinaabekweg o-oma miinsiwe akiink awaashiime kianikikentaakwaan api kaatipakonichi B.C. ka-oonchiich robert picton, mi-i-peshikwan esisek o-oma kiiwetinooknake Ontario.
“Kaishisek weti British Columbia, ontariokaank kikentakwaan nipiwaa-i waaniawaak anishinaabekwek,” ikitoo Betty Kennedy, kaa-okimaawich Ontario Native Women’s Association. “Nipaakoosentamiin weti nikaanaya-ink chiiwiitaapimaakiitwaa kichi tiipaakooniikewi-anookiwin shikwaa shiimaakanishiwi-anookiwin weweni chikakwekikentakwaak aniin ke-ishi na-isek o-owe maashisewin.”
Pickton kikipaa-owa nepich December 2007, kaawin paakiitinamawasi chiikaakwetwaach chipaakiiniich 25 taaso-akiwinaakaniik, niishwaa ki-inaankiteni onitaakewin okiinisa-i Sereena Abotsway, Mona Wilson, Andrea Joesbury, Brenda Wolfe, Georgina Papin Shikwaa Marnie Frey mi-ima okokoshiwikamiikoonk Port Coquitlam, B.C.
Kennedy otantawenimaai miniik kaa-ishitaaniich o-oma thunder bay miisiwekaaya chiipiwiichikapawitawekwaa i-ki kaawaani-itwaa shikwaa kakinitakaniwiich anishinaapewi-ikwewaak chiiwiichitooyek kawiipimoosewaach Sept. 23 i-ima Simpson St shikwaa Pacific Ave mi-oma Thunder Bay.
“Okooweniwaak kaawaani-intwaa shikwaa kakinitakaniwiich anishinaapekwek kichi-ishisewiin o-owe,” Kennedy ikito. “Niintepaakentamin shikwaa nipaakoosentamin okimaawiwin chiwiitapimiikooyaang chi-aniikoochikaatek shikwaa kaki-ishimashisewaach oniiki-ikoomaak shikwaa taashikewiinaan miisiwe o-oma Ontario.
Sharon Johnson kewiin waawiichitwaa i-iwe pimoosewin full moon memory walk ishinikaate chimiikwenimiitwaa.
Omiisensan kiimiikawimawaan eki-ishkwaa pimaatisiniich i-ima Neebing-Mcintyre Floodway 1992.
Wiisakentaam ekana wapataank tipaachimowin memiintake etashinchikaateniik katiipaakoonimiinch Pickton.
“Niinatapiikinaan maasinatesichiikaan,” Johnson ikto. “Wiinke niimaashitotakomin enootamaank taaso kishiik shikwaa ewaapaantamaank i-ima tipaachimowinik mi-iwenchi kipitinaamaan, niin wiin, kaawin nikanawaapantasin kema awaashime chiwikakwekentamaan. Nikikentaan ekakwaansakentamaan.”
Johnson ikito kakina kekoon kianmaashise i-ima nipimaatisiwiniink api kawaniak nimiise, kianimiinoose nipimaatisiwin nitaam kaamaachisek o-owe pimosewin mi-ima 2005.
“Nipiwaai nikiwiichikaapawitakook miinik kakikenimaakwaa, nikikikiwnaa-amaako. Awiiya nikiiwiinta maak mi-oweni pimoosewin,” Johnson ikto. “Mi-iapi ka-onch waawiichitooyan piniish nookoom. Mi-i-ata eshikanawaapaatamaan chi-i-shi anookitaamaan.”
Tamaachipimoosenaniwaan 6pm mi-i-ma ka-ishisakaamook Simpson St. shikwaa Victoria Ave. Tapimaa-i-kate simpson.
Piiniish weti Pacific Avenue ashokan miweti chinitaakooshinaak Neebing-McIntyre Floodway.
“Kakinawiiya chipiwiichitwaach chipiwiichi-pimoosewaach nookoom kawii-i-shisek,” Johnson ikto.
“Kiishipin kashkitoosiwaan chipimoosesiwaan, piwiichikapawiitaamawishinaam. Chiimamitonenimaatwaa iki kawaani-i-twaa.”
Assembly of First Nations nookoomewe ki-i-kitowaak ewiianookitaamoowaach mi-o-we kaamashiseyaank misiwe chiinootakaniwaank kaawanii-i-twaa shikwaa kanisiintwaa anishinaapekwek.
“Ayaamaakanoon ekikentakwaak 520 maashi e-i-shamaakaasinook tipaakoonikewiikamiikoonk mi-onchi kaawani-i-twaa kaye kakinisintwaa anishinaapekwek miisiwe o-oma canada shikwa kikanakwaan chi-o-shisichikaate aniin ke-i-shi-o-shisichikaate anookiwin mi-o-we kaawaani-i-twaa shikwaa kakinisiintwaa anishinaapekwek,” National Chief Shawn A-In-chut Atleo ikto.
“Kikikakwechimaanaan Canada chiwiichi anookiminaak mi-o-weni ka-i-shimaashiseyaank. Anishinaapek otayanawaa aniin ke-i-shimiinoseniik onashowewin chinishwaa anookitamoowaach. Anishinaapekwek maaskawiikapawiimaakaanini e-i-shiwiichitwaa i-i-ma okimawiwiiniink. Paakitinitisoon chikaanawenimitwaa shikwaa chiwiichikaapawiitaawekwaa anishinaapekwek.”