Healing the Legacy

Create: 12/01/2015 - 19:32

ᒐᐧᕑᑎᐣ ᐅᑕᑕᒪᐣ ᑭᐃᔕᐊᐧᐣ ᐊᓂᔑᓂᓂᐃᐧ ᐊᐊᐧᔑᔕᐠ ᑲᑭᐃᔑᑲᓇᐁᐧᑕᑯᓯᐊᐧᐨ ᐃᐡᑯᓄᑲᒥᑯᐠ ᐁᑲᐧ ᑕᐡ ᒐᐧᕑᑎᐣ ᑲᓄᑫ ᐊᓂᐣ ᑲᑭᐱᔑ ᐸᑭᑌᐡᑲᑯᐨ ᐃᐁᐧᓂ ᐅᒋ, ᐅᒪᒪᒪᐣ ᒥᓇ ᐱᑯ ᐃᐧᐣ ᒣᑲᐧᐨ ᑲᐱᐊᑲᔐᔑᐨ ᐅᑕᑕᒪᐣ ᑲᑭᐱ ᓂᑕᒥᓂᑫᐧᓂᐨ.
“ᓂᒪᒪ ᐃᐧᐣ ᑲᐃᐧᐣ ᒋᐅᒋᐃᐡᑯᓄᐃᐧᐨ ᐃᒪ ᐃᐡᑯᓄᑲᒥᑯᐠ, ᐁᑲᐧ ᐃᐧᐣ ᐣᑕᑕ ᑭᐃᔑᓂᔕᐊᐧ ᐁᐧᑎ ᐯᓫᐃᑲᐣ ᐸᐧᓫᐢ ᐃᐡᑯᓄᑲᒥᑯᐠ. “ᓂᐣᑭᓇᒣᐦᐅᑯᐣ ᐊᓂᐡ ᐁᑲ ᐁᑭᐅᐣᒋ ᓂᓯᑕᐁᐧᑕᒪᐣ ᑫᑯᓀᐣ ᑲᑭᐅᒋᐃᔑᔭᐨ ᐣᑕᑕ, ᐁᑲᐧ ᒣᑲᐧᐨ ᓂᔭᓇᐣ ᓇᐣᑕ ᑯᑕᐧᓱ ᐁᑕᓱᔭᑭᐃᐧᓀᔭᐣ, ᒪᐊᐧᐨ ᐃᑯ ᒥᐢᑕᐦᐃ ᑭᒥᓂᑫᐧ. ᑲᐃᐧᐣ ᑲᔦ ᒋᐅᒋ ᓂᓯᑕᐁᐧᑕᒪᐣ ᑫᑯᓀᐣ ᑲᑭᐅᒋᒥᓂᑫᐧᐨ ᐁᑲᐧ ᒥᓇ ᑭᑭᐊᐧᐡᑫᐧ, ᑲᓇ. ᐁᐡᑲᑦ ᐃᑯ ᐃᐁᐧ ᑭᐅᐣᒋᐃᔑᔭ ᓇᐣᑕ ᒥᓇ ᐁᑭᐅᒋ ᑭᐊᐧᐡᑫᐧᓭᐨ, ᓇᐣᑕ ᒥᓇ ᐁᑭᒋᔕᔕᑯᐊᐧᓇᐨ ᐊᐃᐧᔭᐣ.
“ᐊᑎᑲ ᐯᔑᑲᐧ, ᐊᑕᐁᐧᐃᐧᑲᒥᑯᐠ ᐣᑭᐃᔑᐃᐧᓂᐠ ᐁᑲᐧ ᑕᐡ ᐊᐃᐧᔭ ᐁᑭᐱᒋ ᑲᐣᒋᐁᐧᐱᐡᑲᐃᐧᔑᐨ ᐊᐱᐣ ᑲᐃᔑᐸᐣᑭᔑᓇᐣ. ᔐᒪᐠ ᐊᐱᐣ ᐣᑕᑕ ᐣᑭᓇᑕᒪᐃᐧᐠ ᐁᑭᐸᑭᑌᐊᐧᐨ ᐃᓂᐁᐧᓂᐊᐧᐣ ᓇᐯᐊᐧᐣ ᐅᑲᓇᑲᐱᐠ. ᒥᑕᐡ ᐅᐁᐧᓂ ᑐᑲᐣ ᑲᑭᐃᔑᔭᐨ.
“ᑕᓴᐧ ᑲᔦ ᑲᑭᒥᓂᑫᐧᐨ, ᓄᐱᒥᐠ ᐣᑭᐃᐸᑐ ᓂᓀᑕ ᓇᐣᑕ ᐸᑲᐣ ᐣᑭᐃᔕ ᓂᓀᑕ ᐁᑭᐸᐸᒥᐯᔑᑯᔭᐣ, ᐁᑲᑫᐧ ᓂᑲᑌᐡᑲᒪᐣ ᐃᐁᐧ ᑲᔭᓂᒥᓭᐠ ᑲᐃᔑᑕᔭᐣ ᐣᑕᑕ ᑲᑕᔑᒥᓂᑫᐧᐨ. ᐣᑭᑲᑫᐧᒪᒋᔭᑦ ᑕᓴᐧ ᐣᑕᑕ ᑲᒥᓂᑫᐧᐨ, ᐁᐃᐧᐅᒋ ᑲᑫᐧ ᓇᐣᑫᑕᒥᐦᐃᑎᓱᔭᐣ ᑲᑯᓯᑯᐡᑲᑯᔭᐣ ᑲᐊᓂᒥᐦᐃᑯᔭᐣ.
“ᐁᑲᐧ ᑲᔦ ᑭᐡᐱᐣ ᑲᐊᓀᐧᑕᐊᐧᐠ, ᐣᑭᑎᐸᑯᓂᐠ. ᐁᐡᑲᑦ ᐊᑯ ᐸᑭ ᐁᑕ ᐣᑭᐸᓯᑎᔦᑲᓇᒥᐠ ᐁᑲ ᑲᐱᓯᐣᑕᐊᐧᐠ, ᔕᑯᐨ ᒥᓇ ᐁᐡᑲᑦ ᐣᑭ ᑭᒋᐸᐸᑭᑌᐦᐅᐠ ᐁᑲ ᑲᐱᓯᐣᑕᐊᐧᐠ.
“ᑭᔭᐱᐨ ᒥᓇ ᑫᑯᓇᐣ ᐣᑭᐊᐃᑐᑕᓇᐣ ᐃᒪ ᑫᐅᐣᒋ ᐸᐸᑭᑌᐦᐅᑯᔭᐣ, ᐊᑎᑲ ᐯᔑᑲᐧ ᐣᑕᑕ ᐣᑭ ᑲᑫᐧᐱᐣᒋᐁᐧᐱᓂᑯᐸᐣ ᐊᑲᐧᒋᒋᑲᓂᐠ. ᐁᑲᑫᐧ ᐱᒋᐁᐧᐱᓂᔑᐨ ᐃᒪ ᐁᐃᐧᑭᐸᑲᐧᐦᐅᔑᐨ ᒣᑲᐧᐨ ᑭᑭᐊᐧᐡᑫᐧᐱ ᐅᐁᐧ ᑲᑐᑕᐃᐧᔑᐨ. ᐣᓇᓇᑭᐧ ᑲᐃᐧᐣ ᑕᐡ ᒋᑭᐅᒋ ᒪᔑᐦᐃᔑᐨ ᒋᐱᓇᐦᐅᔑᐨ, ᒥᑕᐡ ᑲᐃᔑᔕᐱᐧᔭᐣ.
“ᐁᑲᐧ ᒥᓇ ᐯᔑᑲᐧ ᐣᑭᑲᑫᐧ ᓂᓴᐸᐊᐧᓂᑯᐸᐣ ᑭᓯᓯᐸᓱᓇᑲᓂᐠ. ᐣᑭᓇᑯᓇ ᑕᐡ ᐁᑲᐧ ᐊᐱᐣ ᐣᑭᐳᓂᑲᐠ ᐊᒋᓇ, ᓂᐣᑭᔕᐱᐧ ᐁᑲᐧ ᑲᐃᐧᐣ ᓂᑲᓄᑫᓯᐣ ᐊᓂᐣ ᑲᐃᐣᑎᐊᐧᓀᐣ ᓇᑫ. ᒪᐡᑯᐨ ᑲᔦ ᑲᐊᐧᓂᒥᑲᐃᐧᐊᐧᓀᐣ.
“ᒥᔑᓇᐧ ᐣᑭᐱ ᐊᐧᐊᐧᓂᒥᑲᐤ ᒣᑲᐧᐨ ᑲᐱᐊᐊᐧᔑᔑᐃᐧᔭᐣ. ᑲᐃᐧᐣ ᓇᐱᐨ ᒋᒪᒥᑲᐃᐧᔭᐣ ᐅᐁᐧ ᑲᑭᐱᐃᓯᓭᔭᐣ, ᔕᑯᐨ ᒥᐢᑕᐦᐃ ᐣᑭᐱᐊᒥᓂᐦᐃᑯᐣ.
“ᐃᐁᐧ ᐣᑕᑕ ᑲᑭᐱᑐᑕᐠ, ᓂᒪᒪ ᑫᐃᐧᐣ ᒥᐢᑕᐦᐃ ᐅᑭᐊᓂᒥᐦᐃᑯᓇᑐᐠ. ᓂᒪᒪᒪᐣ ᑲᔦ ᐅᑭᓂᑕ ᒥᑲᓇᐣ ᒣᑲᐧᐨ ᑲᑭᐊᐧᐡᑫᐧᐱᓂᐨ. ᐣᑕᑕ ᒪᐊᐧᐨ ᑭᑭᒋᑎᐯᓂᒥᐁᐧ ᒥᐦᐃᒪ ᑲᔦ ᑲᑭᐅᐣᒋ ᒪᒋᓭᓂᐠ ᑲᐃᔑᑲᓇᐊᐧᐸᒥᑎᐊᐧᐨ. ᒥᐢᑕᐦᐃ ᒥᑲᑐᐃᐧᐣ ᑭᑕᑲᐧᐣ ᒥᓇ ᐱᑯ ᑯᑕᑭᔭᐣ ᑫᑯᓇᐣ. ᐣᑭᐊᐧᐸᒪᐠ ᐊᓂᐣ ᑲᑭᐱᑐᑕᑎᐊᐧᐨ. ᒥᐊᑯ ᐁᓂᔑᐸᐣ ᓂᒪᒪ, ᑲᐃᐧᐣ ᑲᑭᓇ ᒋᑲᓄᑫᔭᐣ.
“ᐅᐃᐧᒋᐃᐧᑎᐃᐧᓂᐊᐧ ᒪᐊᐧᐨ ᐃᑯ ᑭᓴᓯᑌᑕᑲᐧᓂ ᐣᑕᑕ ᐁᑭᒥᑲᓇᐨ ᓂᒪᒪᒪᐣ. ᐊᒥ ᐊᐱᐣ ᑫᑲᐱ ᓂᒪᒪ ᑲᑭᒪᒋᐃᐧᓂᑯᔭᐣᐠ ᐃᒪ ᑲᑭᑕᔑᐅᐱᑭᔭᐣ. ᒥᔑᐣ ᐸᐸᑲᐣ ᓂᑭᐊᐃᔕᒥᐣ ᐃᑫᐧᐊᐧᐠ ᑲᐃᔑᑲᓇᐁᐧᑕᑯᓯᐊᐧᐨ ᒥᓇ ᐸᐸᑲᐣ ᐁᑭᐊᔭᐢᒋᑯᓯᔭᐠ.
“ᓂᒪᒪ ᐅᑭᑲᓄᓇᐸᓂᐣ ᓂᑕᑕᒪᐣ ᒣᑲᐧᐨ ᐁᐧᑎ ᑭᓇᐧᕑᐊ ᐁᐊᔭᓂᐸᐣ, ᐃᐧᒋᐦᐃᐁᐧᐃᐧᑲᒥᑯᐠ ᐊᔭᐸᐣ ᐣᑎᓀᑕᐣ. ᓇᑫ ᐊᐱᐣ ᑭᑭᐁᐧ ᐃᐧᒋᐃᐧᑎᐸᓂᐠ ᑲᓂᓴᐧᓱᔭᑭᐃᐧᓀᔭᐣ. ᒥᑕᐡ ᑲᑭᔭᓂ ᑭᐁᐧᒥᓄᐃᐧᒋᐃᐧᑎᐊᐧᐨ ᒥᓇ ᐣᑕᑕ ᑭᐳᓂᒥᓂᑫᐧ. ᐁᑲᐧ ᑲᐃᐧᐣ ᐃᐧᑲ ᒥᓇᐊᐧ ᒋᐅᒋᐅᑕᐱᓇᐠ ᒥᓂᑫᐧᐃᐧᓂ.
“ᓂᐢᑕᑦ ᑭᔭᓂᒪᐣ. ᔕᑯᐨ ᐱᓂᐡ ᐅᑭᔭᓂ ᐊᓄᑲᑕᓇᐊᐧ ᒥᓇ ᑭᓂᑕ ᑭᒋᑲᑲᓄᓂᑎᐊᐧᐠ. ᐊᔕ ᐃᐧᓂᑯ ᓄᑯᑦ ᒥᓄᓭᐊᐧᐠ ᐊᐱᐨ ᐃᐧᐣ ᐅᑕᓇᐠ ᑲᑭᐱᐃᓯᓭᐊᐧᐸᐣ.
“ᒪᐊᐧᐨ ᐃᑯ ᒥᐢᑕᐦᐃ ᐣᑭᐸᑭᑌᐡᑲᑯᐣ, ᐅᐁᐧ ᐃᐡᑯᓄᐃᐧᐣ, ᐁᑲᐧ ᒥᓇ ᒣᑲᐧᐨ ᓂᐱᒥ ᐊᐧᐸᒪ ᑲᒪᒥᓄᒥᐁᐧᐨ ᒋᐅᒋ ᓇᑲᓂᑯᔭᐣ ᑲᑭᐱᐃᔑᐃᐧᓴᑲᐦᐅᑯᔭᐣ. ᑲᐃᔑᐅᑲᐧᐱᐦᐃᑎᓇᓂᐊᐧᐠ, ᐊᐯᐧᓱᐃᐧᓂᐠ, ᐊᓂᓂᑯ ᐣᑐᑕᐣ ᑫᑭᐅᒋ ᒥᓄᔭᔭᐣ...”

See also

12/01/2015 - 19:37
12/01/2015 - 19:37
12/01/2015 - 19:37
12/01/2015 - 19:37