Syllabics

ᒪᑕᐊᐧ ᐅᑭᒪᑲᓇᐠ ᑲᑭᐃᑭᑐᐊᐧᐸᐣ ᐁᓇᑕᐁᐧᐣᑕᒧᐊᐧᐨ ᐁᑲ ᐁᐧᓴ ᒋᑲᑫᐧᑭᔕᑕᐸᓄᑲᑕᒧᐊᐧᐨ ᐅᑐᓇᒋᑫᐃᐧᓂᐊᐧ ᐅᑯᐁᐧᓂᐊᐧᐠ ᐱᐊᐧᐱᑯᑫᐃᐧ ᐱᒧᒋᑫᐃᐧᓇᐣ ᑲᑲᓇᐊᐧᐸᑕᒧᐊᐧᐨ ᐁᑲᐧ ᒥᓇ ᑲᐸᐸᔑᒥᐣᑕᐧ ᒋᔭᓂ ᐅᓀᐣᑕᒧᐊᐧᐨ ᐱᐊᐧᐱᑯᑫᐃᐧᓂ ᐅᐣᒋ ᐊᔕ ᐅᑭᐱᐃᐧᐣᑕᒪᑯᐊᐧᐣ ᒋᐃᐧᒋᑲᐸᐃᐧᑕᑯᐊᐧᐨ ᑯᑕᑭᔭᐠ ᐊᓂᔑᓂᓂᐊᐧᐠ ᐅᒪ ᑌᑎᐸᐦᐃ ᑲᑲᐯᔑᐊᐧᐨ ᐃᐡᑯᓂᑲᓇᐣ ᑭᐁᐧᑎᓄᐠ ᐅᐣᑌᕑᐃᔪ.

ᒥᐦᐅᐁᐧ ᐁᑫᐧᓇᐠ ᐁᓯᓭᐠ ᑲᑭᓇᑯᒥᑎᓇᓂᐊᐧᐠ, ᐅᐱᔑᑯᑲᐠ ᐊᓂᔑᓂᓂᐊᐧᐠ ᐅᑭᐅᑕᐱᓇᓇᐊᐧ ᒥᐢᑕᐦᐃ ᐱᑲᐧᑕᑭᓂ ᐊᐧᑲᐦᐃ ᐃᐡᑯᓂᑲᓂᐠ. ᐅᐱᔑᑯᑲᐠ ᐊᓂᔑᓂᓂᐊᐧᐠ ᐅᐱᒥᓂᔕᐦᐊᓇᐊᐧ ᐃᐧᑕᓄᑭᒥᑐᐃᐧᓂ. ᑫᑯᓀᐣ ᑕᐡ ᐅᐁᐧ ᐁᐅᐣᒋᑐᑕᒧᐊᐧᐨ.

ᐊᔕ ᑭᑭᔕᓄᑲᑌ ᑲᑭᒐᑭᓯᑲᑌᐠ ᒥᐢᑕᐦᐃ ᑲᑭᑕᓇᑌᑭᐣ ᐊᐧᓯᑲᓂᐱᒥᑌᐣ ᐃᒪ ᑫᑌᐱᐊᐧᐱᑯᑲᓂᐠ ᐯᔓᐨ ᐊᒋᑯᓴᑲᐦᐃᑲᓂᐠ, ᔕᑯᐨ ᑭᐃᑭᑐᐊᐧᐠ ᐃᐡᑯᓂᑲᓂᐠ ᑲᐅᒋᐊᐧᐨ ᑭᔭᐱᐨ ᒥᐢᑕᐦᐃ ᐃᔑᓇᑲᐧᐣ ᐊᓄᑭᐃᐧᐣ ᒋᑐᒋᑲᑌᐠ ᒋᑭᐁᐧᐃᔑᓇᑯᒋᑲᑌᐠ ᐱᑲᐧᑕᑲᒥᐠ ᑲᑭᐱᐃᔑᓇᑲᐧᑭᐸᐣ.

ᑭᐸᑭᑎᓂᑲᑌ ᑎᐸᒋᒧᐃᐧᐣ ᒋᒪᑕᓄᑲᑌᐠ ᒋᒪᒪᐊᐧᓄᑲᑌᐠ ᓇᓇᑕᐃᐧᑭᑫᐣᒋᑫᐃᐧᐣ ᐅᑯᐁᐧᓂᐊᐧᐠ ᓂᓴᐧᓱ ᐊᓂᔑᓇᐯ ᐊᐢᑭ ᐅᐡᑲᑎᓴᐠ ᑲᑭᐊᐧᓂᑐᐊᐧᐨ ᐅᐱᒪᑎᓯᐃᐧᓂᐊᐧ ᒣᑲᐧᐨ ᐁᐃᐡᑯᓄᐊᐧᐸᐣ ᐦᐊᔾ ᐢᑯᓫ ᐁᐧᑎ ᑕᐣᑐᕑ ᐯ ᐅᑌᓇᐠ.

ᐊᐱ ᐁᐟᒪᐣᐟ ᒐᐠ ᐁᓂᓱᔕᐳᔭᑭᐃᐧᓀᐸᐣ, ᑭᑕᑭᐧᐸᐣ ᑲᑭᐃᓇᐦᐊᑐᐊᐧᐸᐣ ᑐᕑᐊᐣᑐ ᑭᒋᐅᑌᓇᐠ ᐅᐱᒧᓭᐠ ᐊᓴᐸᐱᐡᑯᓯᐊᐧᑲᐣᐠ ᑕᔑᑫᐃᐧᓂᐠ ᑲᐅᐣᒋᐊᐧᐨ ᑲᑭᐃᔑᐃᐧᑐᐊᐧᐸᐣ ᐅᑎᐸᒋᒧᐃᐧᓂᐊᐧ ᐃᐁᐧᓂ ᐅᒋ ᐅᑭᒋᔭᓂᒥᓭᐃᐧᓂᐊᐧ ᑲᓇᑭᐡᑲᒧᐊᐧᐨ ᐅᑕᔑᑫᐃᐧᓂᐊᐧᐠ.

ᐊᓂᔑᓂᓂᐃᐧ ᓂᑲᓂᑕᒪᑫᐠ ᑭᐃᑭᑐᐊᐧᐠ ᐁᑲ ᒋᐃᐧᒋᑲᐸᐃᐧᑕᑫᐊᐧᐨ ᐃᒪ ᓇᓇᑕᐊᐧᓯᓂᐃᐧ ᐊᓄᑭᐃᐧᓂᐠ, ᐊᐱ ᐊᓂᓯᑫᐃᐧᐣ ᑲᑦᐸᓂ ᐠᓫᐃᑊᐢ ᑲᑭᐃᐡᑲᐧ ᐃᐧᐣᑕᐠ ᐁᑭᐃᔑ ᐅᓀᐣᑕᐠ ᒋᐃᔑᐅᔑᑐᐨ ᑲᑕᔑᐅᔑᐦᐃᑕᐧ ᐊᓯᓂᐠ ᐁᐧᑎ ᓴᐟᐯᕑᐃ ᔕᐊᐧᓄᐠ.

ᑭᐃᑭᑐ ᐊᓂᔑᓂᓂᐃᐧ ᒪᐡᑭᑭᐃᐧᓂᓂ ᑫᑯᓀᐣ ᐊᐣᒋᑯ ᑭᔭᐱᐨ ᒪᐡᑭᑭᐣ ᐁᐅᐣᒋ ᒪᒥᓂᑕᐧ ᐃᑭᐁᐧᓂᐊᐧᐠ ᑲᐊᐧᓂᔭᐸᒋᑐᐊᐧᐨ ᒪᐡᑭᑭᐣ.

ᐊᐧᐃᐧᔦᑲᒪ ᐅᑭᒪᑲᐣ ᐱᔦᕑ ᒪᐧᕑᓱ ᑭᑲᑫᐧᑌᐧᐸᐣ ᑭᐡᐱᐣ ᒥᓇᐧᐊ ᒋᑭᐊᔭᒪᑲᑭᐸᐣ ᐸᑭᑕᐦᐁᐃᐧᐣ ᐃᒪ ᐅᑎᐡᑯᓂᑲᓂᐠ.

ᐁᑲᓄᑫᔭᐣ ᑲᐱᐊᐊᐧᔑᔑᐃᐧᔭᐣ ᐁᐳᓯᔭᐸᐣ ᐸᐟ ᐸᐟ, ᒥᑎᑯ ᒋᒪᐣ ᐁᑭᐃᔑᒋᑲᑌᐠ ᒋᐃᔑᐳᓯᐊᐧᐨ ᐊᐃᐧᔭᐠ, ᐳᓯᑕᓱᓇᐣ, ᐊᐃᐧᔭᔑᔕᐠ ᒥᓇ ᑲᐸᑭᑕᐊᐧᓄᐊᐧᐠ.

ᐱᔓᓴᑲᐃᑲᓂ ᐅᐡᑲᑎᓴᐠ ᒪᐡᑯᐨ ᐃᐧᓇᐊᐧ ᐅᑲᑭᔭᓂ ᑲᐡᑭᑐᓇᐊᐧ ᒋᑭᐃᐧᒋᑐᐊᐧᐨ ᒋᒥᓄᔭᒪᑲᐠ ᒥᓇ ᐁᑲ ᒋᑭᑭᒪᑲᑭᐣ ᑲᐊᐧᓂᔭᐸᒋᒋᑲᑌᑭᐣ ᒪᐡᑭᑭᐣ ᐁᐧᑎ ᐊᓂᓂᑲᐣ ᑫᔭᓂᐱᒪᑎᓯᐊᐧᐨ.

ᐅᑭᐢᑭᒪᓂᓯᐊᐧᐳ ᐅᓇᔓᐁᐧᐃᐧᓂᓂ ᐃᐧᓂᔭᑦ ᒥᑭᓇᐠ ᐁᑲᐧ ᐯᔑᐠ ᐅᐡᑲᑎᐢ ᑊᕑᐊᔭᐣ ᓯᓇᐊᐧᑊ $78,000 ᑭᔓᓂᔭᑫᐊᐧᐠ ᑲᑭᐱᒧᓭᐊᐧᐨ 500 ᑭᓫᐊᒥᑐᕑᐢ ᐊᐧᓂᓇᐊᐧᑲᐠ ᑲᑭᐃᓇᐦᐊᑐᐊᐧᐨ ᐃᐁᐧᓂ ᐅᐣᒋ ᑲᐸᑯᓭᐣᑕᑲᐧᐠ ᒋᐅᔑᒋᑲᑌᓂᐠ ᐃᐧᒋᐦᐃᐁᐧᐃᐧᑲᒥᑯᓂ.

ᒐᐧᕑᑎᐣ ᐅᑕᑕᒪᐣ ᑭᐃᔕᐊᐧᐣ ᐊᓂᔑᓂᓂᐃᐧ ᐊᐊᐧᔑᔕᐠ ᑲᑭᐃᔑᑲᓇᐁᐧᑕᑯᓯᐊᐧᐨ ᐃᐡᑯᓄᑲᒥᑯᐠ ᐁᑲᐧ ᑕᐡ ᒐᐧᕑᑎᐣ ᑲᓄᑫ ᐊᓂᐣ ᑲᑭᐱᔑ ᐸᑭᑌᐡᑲᑯᐨ ᐃᐁᐧᓂ ᐅᒋ, ᐅᒪᒪᒪᐣ ᒥᓇ ᐱᑯ ᐃᐧᐣ ᒣᑲᐧᐨ ᑲᐱᐊᑲᔐᔑᐨ ᐅᑕᑕᒪᐣ ᑲᑭᐱ ᓂᑕᒥᓂᑫᐧᓂᐨ.

ᒣᑲᐧᐨ ᑲᐱᒥᐅᐱᑭᐨ ᐦᐁᐣᕑᐃ, ᐅᓂᑭᐦᐃᑯᐣ ᑲᐃᐧᐣ ᐃᐧᑲ ᒋᑭᐅᒋ ᑭᑭᓄᐦᐊᒪᑯᐨ ᐊᓂᔑᓂᓂᒧᐃᐧᓂ. ᐁᑲᐧ ᐃᒪ ᑲᐧᐣᐯᑐᕑᐁᔑᐣ ᑲᐧᓫᐃᐨ ᐱᒥᐃᐡᑯᓄᐃᐧ ᒪᓯᓇᑌᓯᒋᑲᓂ ᑭᑭᓄᐦᐊᒪᑫᐃᐧᐣ ᐅᑐᑕᐱᓇᐣ ᐅᑭᐊᓂᒧᒪᐣ ᐅᓂᑭᐦᐃᑯᐣ ᑫᑯᓀᐣ ᐁᑲ ᐃᐧᑲ ᑲᑭᐅᒋ ᑭᑭᓄᐦᐊᒪᑯᐨ

ᐅᑕᓇᐠ ᑭᐱᑕᑭᐧᐸᐣ ᐊᓂᔑᓇᐯ ᐊᐢᑭ ᐅᐡᑲᑎᓯᐃᐧ ᒪᒪᐃᐧᓄᐃᐧᓂᐠ, ᑲᐟᕑᐃᐣ ᐅᑭᐱᐊᐧᐸᑕᐣ ᐊᓂᐣ ᐁᐧᐡᑲᐨ ᐃᐡᑯᓄᑲᒥᑯᐣ ᑲᑭᐃᔑᓂᔕᐦᐅᑕᐧ ᐊᓂᔑᓂᓂᐃᐧ ᐊᐊᐧᔑᔕᐠ ᑲᑭᐱᑐᑕᑯᐊᐧᐨ ᐅᐡᑲᑎᓴᐠ ᒥᓯᐁᐧ ᑌᑎᐸᐦᐃ ᐊᓂᔑᓇᐯ ᐊᐢᑭ ᑎᐯᐣᒋᑫᐃᐧᓂᐠ, ᐊᔑᐨ ᑫᐃᐧᐣ. ᓄᑯᑦ ᐃᔑᐊᓄᑭ ᐁᓂᑲᓂ ᐱᒧᑐᐨ PLAY

ᐅᑭᒪᑕᓄᑲᑕᓇᐊᐧ ᓭᐱᐣ ᐅᐡᑲᑎᓯᐃᐧ ᑎᐸᒋᒧᒪᓯᓇᐦᐃᑲᐣ ᑌᐯᐧᐃᐧᐣ ᒥᓇ ᑭᐁᐧᒥᓇᐧᑕᒪᑫᐃᐧᐣ ᐊᓄᑭᐃᐧᐣ ᑲᑭᐃᔑᓂᑲᑕᒧᐊᐧᐨ, ᐁᑲᐧ ᓂᐃᐧᐣ ᐅᐡᑲᑎᓴᐠ ᐅᑭᔭᓂᒧᑕᓇᐊᐧ ᐊᓂᐣ ᐁᔑᐱᒥᐊᔭᓂᑫ ᐊᓂᒥᐦᐃᐁᐧᒪᑲᐠ ᐊᓂᔑᓂᓂᐃᐧ ᐊᐊᐧᔑᔕᐠ ᑲᑭᐅᑕᐱᓂᑕᐧᐸᐣ ᐃᐡᑯᓄᑲᒥᑯᐠ ᑲᑭᑲᓇᐁᐧᑕᑯᓯᐊᐧᐨ.