Syllabics

ᐊᓂᔑᓇᐯ ᐊᐢᑭ ᐅᑭᒪᑲᓇᐠ ᐅᑭᐸᑯᐢᑲᓇᐊᐧ ᐅᓇᑯᓂᑫᐃᐧᐣ 191, ᑭᒋ ᑭᐁᐧᑎᓄᐠ ᐅᓇᑯᓂᑫᐃᐧᐣ, ᐁᑲᐧ ᑕᐢ ᐊᓂᔑᓇᐯ ᐊᐢᑭ ᑭᒋ ᐅᑭᒪᑲᐣ ᐢᑕᐣ ᐯᔭᑎ ᐃᑭᑐ ᒪᐊᐧᐨ ᑕᓂ ᐊᓂᒥᓭ ᑭᐢᐱᐣ ᐅᓇᑯᓂᑫᐃᐧᐣ 191 ᐊᓂᒪᑕᓄᑭᒪᑲᐠ.

ᑲᓇᑕ ᑭᒋᐅᑭᒪᑲᐣ ᔕᐧᐣ ᐊᐟᓫᐃᔪ ᒥᓯᐁᐧ ᑭᐃᐧᒋᑲᑌᓂ ᑎᐸᒋᒧᐃᐧᓂᐠ ᑲᑭᐃᑭᑐᐨ ᐊᔕ ᐅᒋᒋᓭ ᑭᒋᐁᐧᐱᓂᑲᑌᓂᑭᐸᐣ ᐅᑭᒪᐅᐣ ᐅᓇᑯᓂᑫᐃᐧᐣ ᑲᐃᔑᑲᓇᐊᐧᐸᒪᐨ ᐊᓂᔑᓂᓂᐊᐧᐣ.

ᓂᐱᓇᒥᐠ ᑭᒋᔭᐦᐊ ᒪᐃᐠ ᐊᐧᐸᐢ ᐅᑭ ᐅᔑᑐᓇᐸᐣ ᐊᐧᑲᐦᐃᑲᓂ ᐃᒪ ᐅᐸᑭᑕᓇᒧᐃᐧᓂᐠ, ᓂᔭᓄᑎᐸᐦᐊᑲᐣ ᓂᑲᑌ ᐃᐢᑯᓂᑲᓂᐠ ᒋ̇ᒪᓂᐠ ᐁᐦᑕ ᐁᐅᐣᒋ ᐊᔕᐃᐧᐢᑲᓂᐊᐧᐠ, ᒣᑲᐧᐨ 1990 ᑲᑭ ᐱᒥ ᐊᐦᑭᐊᐧᐠ.

ᑎᐯᐣᒋᑫᐃᐧᓇᐣ ᑲᐊᐧᐅᐣᑕᑲᓀᓯᐊᐧᐨ ᐊᔕ ᐅᑕᓂ ᒪᒥᑲᓇᐊᐧ ᓀᐣᑲᐃᐧᓴᑲᐦᐃᑲᓂᐃᐧᓂᐊᐧᐠ. ᐁᐧᐢᑲᐨ ᓂᑐᐣᒋ ᓇᓇᐣᑕᐃᐧᑭᑫᐣᑕᒥᐣ ᐅᐁᐧ ᑲᑐᑕᒪᐠ ᑲᓇᓇᐣᑕᐃᐧᑭᑫᐣᑕᒪᐠ ᐁᐧᐢᑲᐨ ᑲᑭ ᐱᒪᑎᓯᐊᐧᐨ ᐊᓂᔑᓂᓂᐊᐧᐨ, ᐃᑭᑐ ᑲᔭᐢ ᐅᑭᒪᑲᐣ ᐁᓂᐢ ᐱᐟᓫᐃᕑ ᒣᑲᐧᐨ ᐊᓂᔑᓇᐯ ᐊᐢᑭ ᑭᐁᐧᐃᐧᐣ ᑭᒋᒪᐊᐧᒋᐦᐃᑎᐃᐧᐣ ᑲᑭᔭᑭᐸᐣ.

ᑭᒋᐅᑭᒪᑲᐣ ᐢᑕᐣ ᐯᕑᑎ ᐅᑭᔕᔑᑭᒪᐣ ᐊᓂᔑᓇᐯ ᐊᐢᑭ ᐅᑭᒪᑲᓇᐠ ᐊᔕ ᒋᑭᑲᑫᐧᑭᔑ ᐅᓀᑕᒧᐊᐧᐸᐣ ᒋᐸᑭᑎᓂᑕᐧ ᑲᑭᓇ ᐊᐃᐧᔭᐠ ᒋᑭᐱᐣᒋᐁᐧᐱᓂᑫᐊᐧᐸᐣ ᐊᐱ ᒥᓇᐊᐧ ᐅᑭᒪᑲᓇᐠ ᒪᐊᐧᒋᐦᐃᑐᐊᐧᐨ ᓇᐣᑕ ᒥᓇᐧᐊ ᑭᐁᐧᐃᐧᐣ ᒪᐊᐧᒋᐦᐃᑐᐃᐧᐣ ᐃᔑᒋᑲᓄᐊᐧᐠ.

ᒥᐢᓯᓇᐱ ᑲᐅᒋᐨ ᔑᕑᓫᐃ ᐦᐊᕑᐣ ᑭᒥᓇᑲᓂᐃᐧ ᐁᒥᐣ ᓇᑯᒋ ᓂᑲᓂᑕᒪᑫᐃᐧᓂᐠ ᐃᓀᑫ ᑲᐃᔑᑲᐡᑭᐦᐅᐨ ᐁᐅᒋ ᓇᓇᑯᒪᑲᓄᐨ ᒣᑲᐧᐨ ᓂᔑᑕᓇᓴᑲᓱᔕᐸᐧ ᑕᓱᔭᑭ ᑭᐁᐧᐃᐧᐣ ᑲᐸᑭᑎᓂᑲᑌᑭᐣ ᑲᐊᐧᐸᑕᐦᐃᐊᐧᓄᐊᐧᐠ ᑲᐅᒋᓇᓇᑯᒥᑕᐧ ᐊᐃᐧᔭᐠ ᐅᑕᓄᑭᐃᐧᑲᐡᑭᑕᒪᓱᐃᐧᓂᐊᐧ.

ᐊᑯᓯᐃᐧᑲᒥᐠ ᐁᐧᑎ ᐊᑎᑯᓴᑲᐦᐃᑲᓂᐠ ᐃᐢᑯᓂᑲᐣ ᐅᑲ ᒪᒪᐃᐧᓇᓇᐊᐧ ᐊᑯᓯᐃᐧ ᐱᒥᐃᐧᒋᑫᐃᐧᓇᐣ ᐃᒪ ᑲᔭᑭᐣ ᑕᔑᑫᐃᐧᓂᐠ ᐯᔑᑲᐧᔦᐠ ᒋᐃᔑ ᐅᑭᔭᑭᐣ ᐃᐧᒋᐦᐃᐁᐧᐃᐧᑲᒥᑯᐣ.

ᐊᐧᓭᔭᐱᒥᓭᐃᐧᐣ, ᐱᕑᐃᒥᑎᕑ ᐱᒥᓭᐃᐧ ᐊᐸᒋᑕᐃᐧᓇᐣ ᐱᒥᐃᐧᒋᑫᐃᐧᐣ ᒥᓇ ᑭᕑᐁᐦᐊᐤᐣᐟ ᐸᐢ ᑲᐱᒥᐱᓱᐨ ᐅᐸᑭᑎᓇᓇᐊᐧ ᒋᒧᐦᒋ ᐳᓯᓇᓂᐊᐧᓂᐠ ᐅᐱᒥᐃᐧᒋᑫᐃᐧᓇᐊᐧ ᓇᐳ ᐊᐃᐧᔭ ᒋᒥᓇᑲᓂᐃᐧᐨ ᑫᐅᐣᒋ ᐱᒥᔭᐨ ᒣᑲᐧᐨ ᑭᐦᒋ ᒪᐊᐧᒋᐦᐃᑎᐃᐧᐣ ᐃᐧᓂᐯᐠ ᐊᔭᐠ ᑲᐱᒥ ᑲᑫᐧ ᒪᒥᓂᐦᑕᒪᐃᐧᐣᑕᐧ ᐁᐧᐢᑲᐨ ᐅᑎᐢᑯᓂᐠ ᓴᑭᐸᑲᐃᐧᐱᓯᑦ 16-19 ᐃᓇᐣᑭᓯᐨ.

ᑌᐯᐧ ᐅᑭᐃᓯᓭᑐᓇᐊᐧ ᑲᑭᐃᑭᑐᐊᐧᐸᐣ ᑯᒋᒋᐣᐠ ᐃᐡᑯᓂᑲᐣ ᐊᓂᔑᓂᓂᐊᐧᐠ ᒋᑭᐸᑯᐡᑲᒧᐊᐧᐨ ᑲᐅᒋ ᐱᐣᑎᑫᑕᒧᐠ ᑕᔑᑫᐃᐧᐣ ᑭᒋᐅᑕᐸᓂᒥᑲᓇ 11 ᑲᐃᔑᐱᒪᒧᐠ ᒣᑲᐧᐨ 21 ᑲᐃᓇᑭᓱᐨ.

ᐊᐦᐱ ᑲᒪᒋᐢᑯᓂᐃᐧᐨ ᐦᐊ̇ᐢᑯᓫ, ᐁᑎᔦᐣ ᐁᐢᑫᐧᑲ ᐊᔕ ᐅᑭ ᑭᑫᐣᑕᓇᐸᐣ ᑎᐸᑯᓂᑫᐃᐧ ᐅᑕᔭᒥᑕᒪᑫ ᒋᐃᓇᓄᑭᐨ.