O’Nabigon okanawapantan kichianokiiwin pimata-e-win

Nathan O’Nabigon opimatisiwin ani-a-chishkani. Asha keka okakishitoon niiyo aki ekitepinak machitawin masina-i-kanes noogom kanipininik shikwa ashakeka ishinakwanini kaye chipimata-e-wininiwich.
Kakikishitooch kichikikinwa-a-matiwi pimata-e-win ekiwanitoowaach kanetiyan pakinakewin kichikikinwa-a-matiwikamikoonk Alberta osawakwaak, O’Nabigon inetam asha pakaan chinimachshkaach.
“(Kakiwanitoyaank) kipikiskatentakwan. Niki-i-namachi-i kanapaach pakaan taki-i-shise keka kakipeshiko shapwa-a-maan kaawin itash ki-i-shisesinoon,” ikito O’Nabigon, ka-o-chintipentakosich kinokamink tashikewinink. “Makisha niki-i-netam kwayaak eki-i-shi-o-taminoyaan nanikotink aniish ke-i-shichikeyan?
“Alberta pimata-e-win kiminose, kimamawi-wichi-i-tiwaak, apichi kisanakisiwaak kakinakishkawakintwa kaawin nikinisitawenimasimin ini okanawishkwatamiwan nimitana tasink ki-a-nawe shapwa-awa,” ikito O’Nabigon.
“Kichipakinakewinan tapishko epapaminisha-o-koyan. Nintinetam mi-i-eshi-o-nishishink.” Nisitawinakwan asha Nathan ekiminiich pakinakewiminikwakaninapinichipisonan weti kaki-i-shipimata-ech Kitchener ekipimata-etawaach Ontario pimata-i-winan shikwa kichi kikinwa-a-matiwin minikwakan kakipakinakewaach otanaank kakiakiwank mi-i-ma Kichi kikinwa-a-matiwin New Brunswick (UNB).
Noogom okanawapantan ewi-i-nanokiich chipimata-ech.
Kaawin mashi sakakentakwasinoon.
Okikentan pimata-e-win ka-a-nokiitaminich ekipikakwetwenich mi-i-weni ka-i-shikikentank pimata-e-win. Kikentakwan, New York Islanders kichipimata-e-wikima Ted Nolan okimamakasinawa-i kaki-ishiwapamaach ekinakishkawawaach New York Islanders shikwa Nathan’s kakiwichipimata-a-maach chipwa machisek kichi pimata-e-win NHL.
“Nitatawentan miweti chi-i-shiwichitoyan kichimokomaanakink pimata-e-winik,” ikitoo O’Nabigon.
“Iki (Islanders) okikakanonawan kakikinwa-a-mawiyamich i-ima ka-i-shikikinwa-a-makoyaank ka-i-shkwa otaminoyaank.”
Kaawin oki-o-tapinasiwawan.
Keyapi opitoon.
Nanikotink okanonan ka-a-nokitakoch, nokomewe O’Nabigan ikito kaawin otochikanonasiin apane kamachikikinwa-a-mawinch.
Keyapitashwin pakosetam. Mi-a-nish e-shinakwaak opimata-e epapioch chimatwesenik okikitowin mi-i chipikakwechimich chi-o-taminoch.
Ishinakwan, keyapi tepiseni chikiweshkaach weti UNB chikishitooch ishkwaach nano aki kichikikinwa-a-matiwi pimata-e-win. Ka-i-shkwa kakanonaach kakiwichipimata-e-maach asha winawa ekitepinamowaach pimata-e-win kewiin inetam asha etipisenik chi-o-tapiniich.
Mi-o-koweniwaak kakiwichipimata-e-maach Derek Roy, Steve Emminger, shikwa Philadelphia Flyers kanikanishkawaach Mike Richards.
“Weti nikipi-o-chikiweshka Kitchener,” ikito O’Nabigon. “Nikikakanonak kakiwichipimata-e-makwaa shikwa nikimichipapamiyayamin. Nikiwintamakook aniin eshiyayamakak awiya katepinaak kichi pimata-e-win.
“Kishipin tepinamaan chipimata-e-ayaan taminose, tamikwechiwentakwan. inetakosiwaak echikentamowaach weti. Keyapi apitink ekiwichiwakwa kiminwetakwan, weshkaach kakiwapamaak Richards.”
Noogom okakish-i-toonan okikinwa-a-makowinan chitashinipinishich i-ima Calgary shikwa chitepinank machitawiokimawiwin masina-i-kanes shikwa chikakwechich.
“Nimama nitatawenimik chikishitowaak nikikinwa-a-makowin. weti nitashikewinink ninanakatawenimiko aniin wa-i-shichikeyan pekish nipakosenimikook chiminoseyan.” ikito O’Nabigon.
“Patenowaak kakikenimakwa kapimata-e-waach shikwa keniin nikakakwechi chiwawepiyan.”
Ekikentasik aniin eshisenik opimata-e-win, O’Nabigon okikentaan peshik kekoon. Kakinakekoon oki-a-toon eki-o-taminooch pimata-e-win shoskwata-a-kana-i, pimata-e-watik shikwa pimiwepa-i-kana-i keyapi na-e-tam.
“Kishpin kakinakekoon atooyan shikwa minosesinokin kekonan kaawin nikamichinawesisi,” ikito O’Nabigon. “Kakina kekoon nikipakitinan nitinetam ena-e-tamaan. Nikiminwetan eki-o-taminoyan pimata-e-win, nipiwa-i nipimatisiwinink niki-a-toon o-owe otaminowin.
“Nipiwa-i opimatisik kaawin otepinasinawa kaki-a-koshkayan i-ima pimata-e-winink shikwa kaawin kanapaach wika.