view counter

ᒪᐡᑭᑯᐊᐧᐠ ᑭᒋᐅᑭᒪᑲᓂᐸᐣ ᑭᑭᒋ ᐃᐧᒋᑕᐧ ᑲᑭᑎᐸᑐᑌᐠ ᒋᕑᐃᑎ 9 ᒪᓯᓇᐦᐅᑎᓱᐃᐧᓇᐣ

Wednesday September 3, 2014
ᒪᐡᑭᑯᐊᐧᐠ ᑭᒋᐅᑭᒪᑲᓂᐸᐣ ᑭᑭᒋ ᐃᐧᒋᑕᐧ ᑲᑭᑎᐸᑐᑌᐠ ᒋᕑᐃᑎ 9 ᒪᓯᓇᐦᐅᑎᓱᐃᐧᓇᐣ

ᒥᓯᐁᐧ ᑲᑭᑫᑕᑯᓯᐨ ᐊᓂᔑᓂᓂᐃᐧᑫᐧ ᐅᒪᓯᓇᑌᓯᒋᑫ ᐊᓫᐊᓂᐢ ᐅᐸᐧᑦᓴᐧᐃᐧᐣ ᐃᑭᑐ ᒪᐡᑭᑯᐊᐧᐠ ᑭᒋᐅᑭᒪᑲᓂᐸᐣ ᐢᑕᐣ ᓫᐅᑎᐟ ᐃᐧᐣ ᐃᒪ ᒪᔭᑦ ᑕᓇᑯᓯ ᓄᑯᑦ ᑲᑭᐅᔑᑐᐨ ᐅᑎᐸᒋᒧᐃᐧ ᒪᓯᓇᑌᓯᒋᑲᐣ, ᑲᑲᔭᔑᐦᐃᐁᐧᐃᐧᐣ ᓇᐣᑕ ᒋᕑᐃᑎ? ᑲᑭᐃᔑᓂᑲᑕᐠ.

ᐁᑲᐧ ᐅᐁᐧ ᒪᓯᓇᑌᓯᒋᑲᐣ, ᑕᓇᑯᒋᑲᑌ ᑐᕑᐊᐣᑐ ᒪᒪᐃᐧ ᒪᓯᓇᑌᓯᒋᑫᐃᐧ ᐃᔑᒋᑫᐃᐧᓂᐠ ᒣᑲᐧᐨ ᐊᐧᑌᐸᑲᐃᐧᐱᓯᑦ 5 ᐃᓇᑭᓱᐨ, ᑕᐃᓇᒋᒧᒪᑲᐣ ᑲᑭᒪᓯᓇᐦᐅᑎᓱᐊᐧᐸᐣ ᒋᕑᐃᑎ 9 ᐁᑲᐧ ᒥᓇ ᓄᑯᒥᑫ ᑫᑯᓇᐣ ᑲᑭᐱᐊᐃᓯᓭᑭᐣ ᑐᑲᐣ ᑲᐱᒥᑭᑫᑕᑯᑐᐊᐧᐨ ᐊᓂᔑᓂᓂᐃᐧ ᐊᓂᒥᓭᐃᐧᓇᐣ, ᐊᑕᐊᐧᐱᐢᑲᐟ ᐅᑭᒪᑲᐣ ᑐᕑᐃᓴ ᐢᐯᐣᐢ ᐅᐸᐊᐧᓂᐦᐃᑎᓱᐃᐧᐣ ᐁᑲᐧ ᒥᓇ ᓂᔑᔪ ᐃᓂᓂᐊᐧᐠ ᐊᐧᓴ ᑲᑭᐃᓇᐦᐊᑐᐊᐧᐨ.

“ᓫᐅᑎᐟ ᒥᐢᑕᐦᐃ ᐅᑭᐃᐧᒋᑐᐣ ᐅᒪ ᒪᓯᓇᑌᓯᒋᑫᐃᐧᓂᐠ. ᐃᐧᐣ ᐅᑭᔭᓂᒧᑕᐣ ᒋᕑᐃᑎ 9 ᒪᓯᓇᐦᐅᑎᓱᐃᐧᓇᐣ,” ᐅᐸᐧᑦᓴᐧᐃᐧᐣ ᐃᑭᑐ.

ᓫᐅᑎᐟ ᐅᑭᑭᒋᓀᑕᐣ ᐁᑭ ᑭᑭᓄᐦᐊᒪᑫᐨ ᐊᓂᐣ ᒪᔭᑦ ᑲᑭᐃᑭᓄᑯᐸᓀᐣ ᐊᔓᑕᒪᑫᐃᐧ ᒪᓯᓇᐦᐅᑎᓱᐃᐧᓂᐠ, ᒥᓯᐁᐧ ᐃᐧᐣ ᐅᑭᔭᓂᒧᑕᐣ ᐁᑭᐃᔑᓂᑲᑕᐠ “ᒪᔭᑦ ᑲᑭᐃᓇᑌᐠ ᓇᑯᒥᑐᐃᐧᐣ ᑲᑭᒧᒋᐃᑭᑐᓇᓄᐊᐧᐠ ᓇᑯᒥᑐᐃᐧᓂᐠ.” ᐊᓂᒧᒋᑲᑌ ᑕᐡ ᑲᑭᑐᒋᑲᑌᑯᐸᓀᐣ ᒋᕑᐃᑎ 9 ᒪᓯᓇᐦᐅᑎᓱᐃᐧᐣ ᒣᑲᐧᐨ 1905 ᑲᔭᑭᐊᐧᐠ ᐁᑲᐧ ᒥᓇ ᐃᑭᐁᐧᓂᐊᐧᐠ ᐅᓇᔓᐁᐧᐃᐧᑭᒪᐠ ᐃᒪ ᑲᑭᐊᔭᐊᐧᐸᐣ ᑭᒧᒋᐃᐧᐣᑕᒪᑫᐊᐧᑯᐸᐣ ᐅᑕᔓᑕᒪᑫᐃᐧᓂᐊᐧ ᐁᑲ ᐃᒪ ᑲᑭᒪᓯᓇᐦᐃᑲᑌᑭᐣ ᒋᕑᐃᑎ ᒪᓯᓇᐦᐅᑎᓱᐃᐧᓂᐠ.

ᐊᓇᐃᐧᐣ ᓫᐅᑎᐟ ᐁᐡᑲᑦ ᑭᐃᔑᓇᑯᓯ ᐁᑭᓯᐊᐧᓱᐨ ᒥᓇ ᐁᑲᑲᐧᑕᑫᑕᒥᐦᐃᑯᐨ ᑲᐱᒥᔭᓂᒧᑕᐠ, ᐁᑲᐧ ᐅᐸᐧᑦᓴᐧᐃᐧᐣ ᐃᑭᑐ ᐁᑭᐃᔑᓂᓯᑕᐁᐧᓂᒪᐨ ᐁᓄᑲᑎᓯᓂᐨ ᒥᓇ ᐁᐅᔕᐁᐧᒋᑫᐃᐧᓂᐨ.

“ᐁᑲᓇᐊᐧᐸᒪᐠ ᐅᐃᐧᐣᑲᐧᓂᐠ ᓂᑭᐊᐧᐸᒪ ᐁᓄᑲᑎᓯᐨ, ᐁᑲᐧ ᔕᑯᐨ ᑲᔦ ᓂᑭᐃᔑᐊᐧᐸᒪ ᐁᑭᓯᐊᐧᓱᐨ. ᐅᑭᐊᐧᐃᐧᑕᓇᐣ ᐊᓂᐣ ᐁᔑᑌᐯᐧᐃᓂᐊᐧᑭᐣ ᑲᑭᐊᓂᒧᑕᑭᐣ ᑫᑯᓇᐣ. ᔕᑯᐨ ᑲᐯᐦᐃ ᑭᓇᑲᐧᓂ ᐃᒪ ᐅᓄᑕᑯᓯᐃᐧᓂᐠ, ᐅᑎᔑᑭᔐᐧᐃᐧᓂᐠ, ᑲᐃᔑᐊᔭᒥᐨ ᑲᐧᔭᐠ ᐁᐃᓂᓂᐃᐧᐨ, ᑲᐃᐧᐣ ᒪᔭᑦ ᓂᑭᐃᐧᑕᓯᐣ.”

ᓫᐅᑎᐟ ᑲᔦ ᑭᒪᓯᓇᑌᓭᐸᐣ ᓂᔑᐣ ᐅᐸᐧᑦᓴᐧᐃᐧᐣ ᐅᒪᓯᓇᑌᓯᒋᑲᓂᐠ: ᑲᑕᐊᐧᐱᐢᑲᐠ ᓯᐱ ᐃᓂᓂᐊᐧᐠ, ᑲᐃᔑᑎᐸᑐᑌᐠ ᐊᑕᐊᐧᐱᐢᑲᐟ ᑲᑯᐸᒋᓭᐊᐧᐨ ᐅᐊᐧᑲᐦᐃᑲᓂᐊᐧ ᐅᒋ, ᐁᑲᐧ ᒥᓇ ᐦᐊᔾᐦᐅ ᒥᐢᑕᐦᐁ! ᔕᓇᐣ ᐅᐸᐊᐧᒧᐃᐧᐣ.

“ᑲᐯᐦᐃ ᐃᒪ ᑭᐊᔭ ᐊᐣᑎ ᑲᐃᔑᑭᒋᐊᓂᒥᓭᓇᓂᐊᐧᓂᐠ,” ᐅᐸᐧᑦᓴᐧᐃᐧᐣ ᐃᑭᑐ. “ᐣᑭ ᑭᒋᓀᓂᒪ ᒥᓂᑯᐠ ᑲᑭᐊᐱᒋ ᓇᓇᑲᑕᐁᐧᓂᒪᐨ ᐅᑕᓂᔑᓂᓂᒪᐣ.”

ᐅᐸᐧᑦᓴᐧᐃᐧᐣ ᐃᑭᑐ ᒥᑐᓂ ᑭᒥᒋᓇᐁᐧᓯ ᐊᐱ ᑲᓄᑕᐠ ᓫᐅᑎᐟ ᑲᑭᐳᓂᐱᒪᑎᓯᐨ ᑲᓂᐳᓇᑭᓱᐨ ᓴᑭᐸᑲᐃᐧᐱᓯᑦ ᐁᑲᐧ ᐊᐱᐣ ᐁᑲ ᒋᐊᔭᐨ ᑲᐃᐧᔑ ᒪᒪᐃᐧᐡᑲᓄᐊᐧᐠ.

ᐅᐸᐧᑦᓴᐧᐃᐧᐣ ᐃᑭᑐ ᐃᒪ ᒪᒪᑕᐊᐧᐱᑯᐠ ᑭᐅᒋᒪᒪᓯᓇᐦᐊᒪᑐᐊᐧᐠ ᓫᐅᑎᑐᐣ ᑲᓂᒪᐧᔦ ᐃᐡᑲᐧᐱᒪᑎᓯᓂᐨ. ᐅᑭᐱᑲᑫᐧᒋᒥᑯᐣ ᐊᓂᐣ ᐊᔕ ᐁᐱᑕᓄᑲᑕᐠ ᒪᓯᓇᑌᓯᒋᑲᐣ ᑲᐱᒪᓄᑲᑕᐠ, ᐁᑲᐧ ᐅᐸᐧᑦᓴᐧᐃᐧᐣ ᐅᑭᐃᐧᑕᒪᐊᐧᐣ ᐁᐸᑯᓭᑕᐠ ᐁᑲ ᐁᐧᓴ ᒋᐊᔭᑯᓯᐨ ᒣᑲᐧᐨ ᑲᐱᒥᐊᐣᑕᐃᐧᐦᐊᑲᓄᐨ ᒋᐃᔕᐨ ᒪᒪᐃᐧᐡᑲᐃᐧᓂᐠ.
“ᒥᑕᐡ ᑲᐃᔑᐃᐧᑕᒪᐃᐧᔑᐨ, ᓂᑭᐳᓂᑐᐣ ᓂᐱᒥᐊᑕᐃᐧᐦᐃᑯᐃᐧᐣ ᐁᑲᐧ ᓂᒪᐡᑭᑭᐃᐧᓂᓂᑦ ᓂᑭᐃᐠ ᐯᔑᑯᔭᑭ ᐁᑕ ᑭᔭᐱᐨ ᒋᐱᒪᑎᓯᔭᐣ, ᐁᑲᐧ ᒥᓇᐊᐧ ᑭᔭᓂᑭᑐ ᔕᑯᐨ ᑭᔭᐱᐨ ᑭᓀᐧᐡ ᓂᑲᐱᒪᑎᐢ,” ᐅᐸᐧᑦᓴᐧᐃᐧᐣ ᐃᑭᑐ. “ᐁᑲᐧ ᓂᔓᐱᒥᑯᓇᑲ ᓇᑫ ᑲᑭᐃᐡᑲᐧᐃᓂᔑᐸᐣ ᐃᐁᐧᓂ ᐊᒥ ᐊᐱᐣ ᑲᑭᐃᐡᑲᐧᐱᒪᑎᓯᐨ. ᒪᐊᐧᐨ ᐃᑯ ᓂᑭᑯᐡᑫᐧᑕᐣ. ᒪᐊᐧᐨ ᑲᔦ ᓂᑭᐊᓂᒣᑕᐣ.

ᑲᐃᐧᐣ ᑲᔦ ᒪᔑ ᒋᑭᔑᑐᐸᐣ ᐅᒪᓯᓇᑌᓯᒋᑲᐣ ᐁᑲᐧ ᐅᐸᐧᑦᓴᐧᐃᐧᐣ ᐅᐸᑲᑌᑕᐣ ᐁᑲ ᑲᑭᐅᒋᐊᐧᐸᑕᐦᐊᐨ ᐅᒪᓯᓇᑌᓯᒋᑲᐣ.

“ᑲᐃᐧᐣ ᓂᑲᐣ ᐣᑐᒋᑭᑫᑕᐣ ᑫᐃᑭᓄᑫᐧᐣ. ᒪᐊᐧᐨ ᐃᑯ ᓂᑭ ᒥᑯᐡᑲᑌᑕᐣ. ᐁᑭᑫᑕᒪᐣ ᒪᐊᐧᐨ ᒋᑭᒥᓀᑕᑭᐸᐣ, ᑭᐡᐱᐣ ᐊᐧᐸᑕᑭᐸᐣ, ᐊᒥ ᐁᔑᑭᑫᑕᒪᐣ.”
ᐅᐸᐧᑦᓴᐧᐃᐧᐣ ᐃᔑᐸᑯᓭᓂᒪ ᑕᓯᐣ ᐊᐃᐧᔭ ᑫᐊᐧᐸᑕᐠ ᐅᐁᐧ ᒪᓯᓇᑌᓯᒋᑲᐣ ᒥᐢᑕᐦᐃ ᑫᑯᐣ ᒋᑭᑫᑕᐠ.

“ᒥᐦᐅᐁᐧᓂ ᑲᔦ ᐢᑕᐣ ᑲᑭᐃᔑᓇᑕᐁᐧᑕᑭᐸᐣ. ᐅᑭᓇᓇᐱ ᐊᐧᐃᐧᑕᐣ ᐁᐃᐧ ᑭᑭᓄᐦᐊᒪᐊᐧᐨ ᐅᑎᓂᓂᒪᐣ ᓇᐣᑕ ᒥᓇ ᑯᑕᑭᔭᐠ ᑲᐸᐸᑲᓂᓯᐊᐧᐨ, ᔕᑯᐨ ᑲᔦ ᐃᑭᐁᐧᓂᐊᐧᐠ ᑲᓀᑎᔭᐣ ᑲᐃᓂᑕᐧ ᒋᑭᐅᒋ ᓂᓯᑕᐁᐧᑕᒧᐊᐧᐸᐣ ᑫᑯᓀᐣ ᒋᕑᐃᑎ ᒪᔭᑦ ᑲᐃᒋᑲᑌᐠ, ᐊᓂᐣ ᑲᑭᐃᔑᒋᑲᑌᐠ ᒥᓇ ᐊᓂᐣ ᑲᐃᑭᑐᓇᓂᐊᐧᐠ ᐃᐁᐧ ᐅᑎ ᒪᐊᐧᐨ ᒋᕑᐃᑎ 9 ᒪᓯᓇᐦᐅᑎᓱᐃᐧᐣ.”

ᑲᑲᔭᔑᐦᐃᐁᐧᐃᐧᐣ ᓇᐣᑕ ᒋᕑᐃᑎ? ᒪᓯᓇᑌᓯᒋᑲᐣ ᑭᐅᑕᐱᓂᑲᑌ ᒪᐊᐧᐨ ᐁᒥᓇᐧᑌᓭᐠ, ᐁᐊᐧᐸᑕᐦᐃᐁᐧᒪᑲᐠ “ᐁᒥᓇᐧᔑᓂᐠ ᒥᓯᐁᐧᑲᒥᐠ ᑲᑕᓯᓄᐊᐧᐨ ᐅᒪᓯᓇᑌᓯᒋᑫᐠ.”

ᐊᐱ ᑲᑭᐃᐡᑲᐧ ᓇᓇᑲᒋᒋᑲᑌᓂᐸᑭᐣ ᐦᐊᔾᐦᐅ ᒥᐢᑕᐦᐃ ᐅᒪᓯᓇᑌᓯᒋᑫᐃᐧᐣ ᐅᑕᓇᐠ ᑲᔭᑭᐊᐧᓂᐠ, ᐅᐸᐧᑦᓴᐧᐃᐧᐣ ᐃᑭᑐ ᐁᑭᒪᒪᑲᑌᑕᐠ ᐅᒪᓯᓇᑌᓯᒋᑲᐣ ᑲᑭᐅᑕᐱᓂᑲᑌᓂᐠ ᐁᒥᓄᓂᑲᑌᓂᐠ.

“ᓂᒥᓀᐧᑕᐣ ᑲᑭᒥᓂᑯᔭᐣ ᐅᐁᐧ ᒥᓇ ᐃᑭᐁᐧᓂᐊᐧᐠ ᐊᐃᐧᔭᐠ ᐃᒪ ᑲᑭᒪᓯᓇᑌᔑᒪᑲᐧ,” ᐃᑭᑐ. “ᒥᑐᓂ ᑭᒋᓀᑕᑲᐧᐣ ᒥᓇ ᓂᐸᑯᓭᑕᐣ ᑲᐧᔭᐠ ᒋᑭᑭᓇᐊᐧᒋᒋᑫᒪᑲᐠ.”


Email to a Friend
qr code
add to del.icio.us

Stumble It!

Post new comment

Comment policy

All comments submitted to Wawatay News Online must have a correct name, location and email address of the user. Wawatay will not approve comments without the required information.

The approval of comments will also be subjected to relevancy, laws of defamation and good taste.

Once posted, comments become the property of Wawatay News. Wawatay News reserves the right to publish or use this comment in any way in the future for online use, in print, and by any other media at the discretion of Wawatay News.

The content of this field is kept private and will not be shown publicly.