view counter

ᓂᐱᓇᒥᐠ ᐅᐡᑲᑎᓴᐠ ᐱᑲᐧᑕᑭᐃᐧ ᑭᑭᓄᐦᐊᒪᑫᐃᐧᐣ ᑭᑐᒋᑲᑌ ᐊᐦᑭᐃᐧ ᓇᓇᑲᒋᒋᑫᐃᐧᐣ

Friday August 8, 2014
ᓂᐱᓇᒥᐠ ᐅᐡᑲᑎᓴᐠ ᐱᑲᐧᑕᑭᐃᐧ ᑭᑭᓄᐦᐊᒪᑫᐃᐧᐣ ᑭᑐᒋᑲᑌ ᐊᐦᑭᐃᐧ ᓇᓇᑲᒋᒋᑫᐃᐧᐣ

ᑭᐸᑭᑎᓂᑲᑌ ᐱᑲᐧᑕᑭᐠ ᑲᐊᔭᒪᑲᑭᐣ ᒥᓇ ᑲᓂᐸᑲᓂᐡᑲᒪᑲᐠ ᑲᐊᐃᔑᐁᐧᐸᐠ ᑭᑭᓄᐦᐊᒪᑫᐃᐧᐣ ᐃᐧᓇᐊᐧ ᐃᑭᐁᐧᓂᐊᐧᐠ ᑲᑭᐱᐃᐧᒋᑕᐧᐊᐧᐨ ᑭᑭᓄᐦᐊᒪᑫᐃᐧᓂ ᐊᐦᑭᐃᐧ ᓇᓇᑕᐃᐧᑭᑫᒋᐃᐧ ᐊᓄᑭᐃᐧᓂ ᑲᑭ ᑭᑭᓄᐦᐊᒪᐃᐧᑕᐧ ᐅᐡᑲᑎᓴᐠ ᐊᔕ ᓂᑯᑕᓱᔕᐳ ᓂᐱᐣ ᐅᐁᐧ ᑲᑐᒋᑲᑌᐠ ᓂᐱᓇᒥᐠ ᐅᐡᑲᑎᓯᐃᐧ ᐱᑲᐧᑕᑭᐃᐧ ᑭᑭᓄᐦᐊᒪᑫᐃᐧᐣ.

“ᓂᑭᐅᐣᒋ ᓇᓇᑲᒋᑐᒥᐣ ᑲᔦ ᐊᓂᐣ ᐁᓇᑲᒥᐠ ᓂᐱ,” ᐃᑭᑐ ᐦᐊᕑᐃ ᐸᐣᑎᐣᐠ, ᐱᐊᐧᐱᑯᑲᓂ ᐊᓄᑭᐃᐧᐣ ᐊᓂᔑᓂᓂᐃᐧ ᑭᑭᓄᐦᐊᒪᑫᐃᐧᐣ ᑲᐅᒋ ᒪᒪᐃᐧ ᐱᒧᒋᑲᑌᐠ ᐊᐦᑭᐃᐧ ᓇᓇᑲᒋᒋᑫᐃᐧᐣ ᑲᐱᒥ ᑭᑭᓄᐦᐊᒪᑯᓯᐨ ᐁᐧᑎ ᑲᐧᐣᐢᑎᐣᐢ ᓴᑲᐃᑲᓂᐠ ᐁᐅᐣᒋᐨ. “ᐁᑲᐧ ᒥᓇ ᐸᑭ ᓂᑭᑐᑕᒥᐣ ᐁᑭᓇᓇᑲᒋᑐᔭᐠ ᐱᑲᐧᑕᑭᐠ ᑲᐊᔭᒪᑲᑭᐣ, ᐁᑭ ᑭᑭᓄᐦᐊᒪᐧᐊᑭᑕᐧ ᐅᐡᑲᑎᓴᐠ ᑫᑯ ᑐᑲᐣ ᒪᓂᒍᔕᐠ ᑲᐊᔭᐊᐧᐨ, ᐊᓂᐣ ᐁᔑᓂᑲᓱᐊᐧᐨ.”

ᐸᐣᑎᐣᐠ ᐃᑭᑐ ᒪᐊᐧᐨ ᐁᑭᒪᒥᓀᐧᑕᐠ ᑲᑭᐸᑭᑎᓇᐠ ᐅᑭᑭᓄᐦᐊᒪᑫᐃᐧᐣ ᐱᑲᐧᑕᑭᐃᐧ ᐅᐡᑲᑎᓯᐃᐧ ᑭᑭᓄᐦᐊᒪᑫᐃᐧᓂᐠ, ᐁᑲᐧ ᓇᐣᑕ ᐱᑯ 90 ᐅᐡᑲᑎᓴᐠ ᐃᒪ ᑭᐱᒋᐃᐧᓇᑲᓄᐊᐧᐠ ᐅᐡᑲᑎᓴᐠ ᓂᐱᓇᒥᐠ ᑲᐅᒋᐊᐧᐨ ᒥᓇ ᑯᑕᑭᔭᐣ ᑕᓇᐱᐃᐧᓇᐣ ᐯᔑᑯᐊᐧᑲᓭ ᐱᒥᔭᓂᐊᐧᐣ ᒋᒪᓂᐠ ᑲᐃᔕᓂᐊᐧᐠ ᐱᑲᐧᒋᔭᐦᐃᐠ ᑲᐅᒋᒪᒋᓂᐊᐧᐠ ᐃᒪ ᒪᑕᐊᐧ ᑕᓇᐱᐃᐧᓂᐠ.

“ᑲᐧᔭᐠ ᑭᐊᐃᓯᓭ ᒥᓇ ᒪᐊᐧᐨ ᓂᑭᒪᒥᓀᐧᑕᐣ ᒣᑲᐧᐨ ᐁᐧᑎ ᑲᑭᐊᐣᑕᐃᐧᐊᔭᔭᐣ,” ᐃᑭᑐ ᐸᐣᑎᐣᐠ. “ᓂᑭᒥᓀᐧᑕᐣ ᑲᑭ ᑭᑭᓄᐦᐊᒪᐃᐧᔑᐊᐧᐨ ᑭᒋᔭᐦᐊᐠ, ᒥᓇ ᐅᐡᑲᑎᓴᐠ ᒥᓇ ᐱᑯ ᒥᓯᐁᐧ ᑕᔑᑫᐃᐧᓂᐠ.”

ᐸᐣᑎᐣᐠ ᒥᓇ ᑯᑕᑭᔭᐠ ᐊᐦᑭᐃᐧ ᓇᓇᑲᒋᒋᑫᐃᐧᐣ ᑲᐱᒥ ᑭᑭᓄᐦᐊᒪᑯᓯᐊᐧᐨ ᑭᐃᔕᐊᐧᐠ ᐅᐡᑲᑎᓯᐃᐧ ᐱᑲᐧᑕᑭᐃᐧ ᑭᑭᓄᐦᐊᒪᑫᐃᐧᓂᐠ ᐁᑲᐧ ᑕᑯ ᓂᐃᐧᐣ ᒪᑕᐊᐧ ᐊᐦᑭᐃᐧ ᓇᓇᑲᒋᒋᑫᐃᐧ ᐊᓄᑭᐃᐧᐣ ᑲᐊᓄᑲᑕᒧᐊᐧᐨ.

“ᐣᑐᓇᑐᒥᐣ ᑭᑭᓄᐦᐊᒪᑫᐃᐧᓀᓴᐣ ᒋᐅᒋ ᐊᐧᐸᑕᐦᐃᑕᐧ ᐊᐊᐧᔑᔕᐠ ᑫᐃᐧᓇᐊᐧ ᒋᑭᐅᒋ ᑭᑫᐣᑕᒧᐊᐧᐸᐣ ᑭᐡᐱᐣ ᐃᐧᔭᓂᓇᓄᑭᐊᐧᐨ ᐊᐦᑭᐃᐧ ᓇᓇᑲᒋᒋᑫᐃᐧ ᐊᓄᑭᐃᐧᓂᐠ,” ᐃᑭᑐ ᓭᕑᐊ ᑲᐧᑯᕑᑕᐣ, ᑲᐅᑭᒪᐃᐧᐨ ᐊᐦᑭᐃᐧ ᓇᓇᑲᒋᒋᑫᐃᐧ ᐊᓄᑭᐃᐧᓂᐠ. “ᐅᒪᒧᔕᑭᓇᐊᐧᐣ ᓂᐱᐃᐧᒪᓂᒍᔕᐣ ᒥᓇ ᑫᑯᓂ ᐅᑕᑐᓇᐊᐧ ᓂᐱᑲᐠ ᐁᑲᐧ ᒥᓇ ᑲᑕᔑ ᓇᓇᑲᒋᒋᑲᑌᑭᐣ ᑕᓇᓄᑭᐊᐧᐠ ᒥᓇ ᐅᓇᓇᑕᐃᐧᑭᑫᓂᒪᐊᐧᐣ ᑫᑯ ᑐᑲᐣ ᔑᑯᐱᐠ ᐁᔭᐸᒋᑐᐊᐧᐨ ᑲᐸᔭᑌᔭᐸᒋᑫᒪᑲᐠ.”

ᐁᑲᐧ ᒥᓇ ᐅᑭᑐᑕᓇᐊᐧ ᐁᑭᐸᑭᑎᓇᒧᐊᐧᐨ ᑭᑭᓄᔑᓄᐃᐧ ᑭᑭᓄᐦᐊᒪᑫᐃᐧᓂ ᐁᑭ ᑭᑭᓄᐦᐊᒪᐃᐧᑕᐧ ᐅᐡᑲᑎᓴᐠ ᒣᑲᐧᐨ ᐁᐧᑎ ᐱᑲᐧᑕᑭᐃᐧ ᑭᑭᓄᐦᐊᒪᑫᐃᐧᐣ ᑲᑭᑐᒋᑲᑌᐠ.

“ᒪᐊᐧᐨ ᐊᑯ ᓂᒪᒥᓀᐧᑕᒥᐣ ᐅᐁᐧ ᑲᐃᔑᒋᑫᓇᓂᐊᐧᐠ,” ᐃᑭᑐ ᑲᐧᑯᕑᑕᐣ. “ᑫᒋᐊᐧᐠ ᐃᑯ ᓂᓇᐃᐧᐟ ᓂᐸᑭᑎᓇᒥᐣ ᑫᑯᓇᐣ ᑲᐃᔑ ᑲᑭᑭᓄᐦᐊᒪᑫᔭᐠ, ᒥᑕᐡ ᑲᐅᐣᒋ ᒪᒥᓀᐧᑕᑲᐧᐠ. ᑭᐸᐸᑯᐱᐊᐧᐠ ᑲᔦ ᐁᑲᑫᐧ ᑲᒋᑎᓇᐊᐧᐨ ᒪᐣᒍᔕᐣ ᑲᐸᐸᒪᑕᑫᐧᓂᐨ ᐁᑭᑲᓇᐊᐧᐸᒪᐊᐧᐨ ᐃᒪ ᑲᐸᔭᑌᔭᐸᒋᑫᒪᑲᐠ.” ᑲᐧᑯᕑᑕᐣ ᐃᑭᑐ ᐅᑐᑕᓇᐊᐧ ᑲᔦ ᐁᐅᒋᑲᑫᐧ ᔕᔑᑭᐡᑲᐊᐧᐊᐧᐨ ᑲᐅᐡᑲᑎᓯᐊᐧᐨ ᒋᑲᑫᐧ ᑭᒋᓀᑕᒧᐊᐧᐨ ᐊᐦᑭᐃᐧ ᓇᓇᑕᐃᐧᑭᑫᒋᑫᐃᐧ ᐊᓄᑭᐃᐧᓂ ᒋᑭᔭᓂ ᐅᑕᐱᓇᒧᐊᐧᐸᐣ ᐃᐡᐱ ᑭᑭᓄᐦᐊᒪᑫᐃᐧᓂ ᐁᐧᑎ ᐊᓂᓂᑲᐣ.

“ᐃᐁᐧ ᑕᐡ ᒪᐊᐧᐨ ᑲᑭᐃᔑᒥᓄᓭᐠ ᓄᑯᑦ ᑲᓂᐱᐠ ᐅᑯᐁᐧᓂᐊᐧᐠ (ᐊᐦᑭᐃᐧ ᓇᓇᑲᒋᒋᑫᐃᐧ ᑭᑭᓄᐦᐊᒪᐊᐧᑲᓇᐠ) ᐃᐧᓇᐊᐧ ᐱᑯ ᑫᒋᐊᐧᐠ ᐁᐸᑭᑎᓇᒧᐊᐧᐨ ᑭᑭᓄᐦᐊᒪᑫᐃᐧᓂ,” ᑲᐧᑯᕑᑕᐣ ᐃᑭᑐ. “ᒥᑕᐡ ᐁᔑᐸᑯᓭᑕᒪᐠ ᐅᐡᑲᑎᓴᐠ ᒋᔑᐊᐧᐸᑕᒧᐊᐧᐨ ᐁᑲ ᐃᐧᐣ ᓂᓇᐃᐧᐟ ᐃᒪ ᐁᐅᒋᒪᑲᐠ ᑲᐃᔑ ᑭᑭᓄᐦᐊᒪᑫᔭᐠ ᐊᓂᐡ ᒥᐦᐃᒪ ᑫᑭᔭᓄᒋᒪᑲᓂᐠ ᐊᓄᑭᐃᐧᓇᐣ. ᐅᑕᑭᐅᐣᑎᓇᓇᐊᐧ ᐊᓄᑭᐃᐧᓇᐣ ᐊᐱ ᑭᔭᓂᑭᔑᑐᐊᐧᐨ ᐅᑭᑭᓄᐦᐊᒪᑯᐃᐧᓂᐊᐧ.”

ᑲᐧᑯᕑᑕᐣ ᑭᐃᑭᑐ ᐊᐦᑭᐃᐧ ᓇᓇᑲᒋᒋᑫᐃᐧ ᑭᑭᓄᐦᐊᒪᐊᐧᑲᓇᐠ ᐅᑭᐅᓇᑐᓇᐊᐧ, ᑲᐧᔭᒋᑐᓇᐊᐧ ᒥᓇ ᐅᑭᑐᑕᓇᐊᐧ ᐅᑭᑭᓄᐦᐊᒪᑫᐃᐧᓂᐊᐧ ᐁᐧᑎ ᐅᐡᑲᑎᓯᐃᐧ ᐱᑲᐧᑕᑭᐃᐧ ᑭᑭᓄᐦᐊᒪᑫᐃᐧᓂᐠ.

“ᒥᐦᐅᐁᐧᓂ ᐯᑭᐡ ᐊᔑᐨ ᑲᑭᐃᔑ ᑭᑭᓄᐦᐊᒪᐃᐧᑕᐧ ᒋᒪᒪᒐᐊᐧᐨ ᒥᓇ ᒋᐱᑭᐁᐧᐃᐧᑐᐊᐧᐨ ᐊᓂᐣ ᑲᑭᐃᔑ ᑲᑭᑫᑕᒧᐊᐧᐨ ᓂᐦᓱᐱᓯᑦ ᐃᔑᐅᑕᓇᐠ,” ᑲᐧᑯᕑᑕᐣ.

ᐁᑲᐧ ᒥᓇ ᑲᑭᐊᐧᐃᐧᐣᑕᒧᐊᐧᐨ ᑲᑭᐊᐃᑐᑕᒧᐊᐧᐨ ᑲᑭᑭᓄᐦᐊᒪᐊᐧᐊᐧᐨ ᐅᐡᑲᑎᓴᐣ, ᐅᑯᐁᐧᓂᐊᐧᐠ ᐊᐦᑭᐃᐧ ᓇᓇᑲᒋᒋᑫᐃᐧ ᑭᑭᓄᐦᐊᒪᐊᐧᑲᓇᐠ ᐅᑭᑐᑕᓇᐊᐧ ᐁᑭᓇᓇᑲᒋᐦᐊᐊᐧᐨ ᑲᑕᓭᐧᑭᓇᑯᓯᐊᐧᐨ ᑭᓄᔐᐠ ᐃᒪ ᐊᐧᑲᐦᐃ ᑕᔑᑫᐃᐧᓂᐠ.

“ᐣᑭᒥᑲᐊᐧᒥᐣ ᓇᒣᐱᓇᐠ, ᐊᑎᑲᒣᑲᐧᐠ, ᐅᑲᓴᐠ, ᓇᒣᐊᐧᐠ,” ᐃᑭᑐ ᐸᐣᑎᐣᐠ. “ᒪᐊᐧᐨ ᐃᑯ ᑭᔐᔕᐃᐧᓯᐊᐧᐨ ᒥᓇ ᑭᒥᓄᔑᔑᐊᐧᐠ. ᑲᐃᐧᐣ ᑫᑯᐣ ᒋᑭᐅᐣᒋ ᐊᔭᒪᑲᓂᐠ ᑫᐅᐣᒋ ᒪᒋᑐᑕᑯᐊᐧᐨ ᒪᔑ.”

ᐸᐣᑎᐣᐠ ᑭᐃᑭᑐ ᑭᓄᔐᐠ ᒪᐡᑯᐨ ᐱᓂᐡ ᐅᑲᓂᒪᒋᑐᑕᑯᓇᐊᐧ ᐃᒪ ᑲᐃᐧᔭᓂᔑ ᑭᒋᐱᐊᐧᐱᑯᑲᓂᑲᓄᐊᐧᐠ ᐁᐧᑎ ᒣᑲᐧᐨ ᑲᐱᒥᔭᓂᒧᒋᑲᑌᐠ ᓄᑯᑦ ᑲᑭᔑᑲᐠ.

“ᓂᒥᓀᐧᑕᐣ ᐁᐧᑎ ᑲᑭᐃᔕᔭᐠ ᐅᑕᓇᐠ ᑲᑭᐱᒥᑯᓇᐠ ᐁᑭᐅᐣᒋ ᓇᓇᑲᒋᑐᔭᐠ ᐊᓂᐣ ᐁᓇᑲᒥᐠ ᓂᐱ,” ᐃᑭᑐ ᐸᐣᑎᐣᐠ. “ᒣᑲᐧᐨ ᑲᐃᐧᐣ ᓇᐣᑕ ᒋᑭᒪᒐᑲᒥᐠ.”


Email to a Friend
qr code
add to del.icio.us

Stumble It!

Post new comment

Comment policy

All comments submitted to Wawatay News Online must have a correct name, location and email address of the user. Wawatay will not approve comments without the required information.

The approval of comments will also be subjected to relevancy, laws of defamation and good taste.

Once posted, comments become the property of Wawatay News. Wawatay News reserves the right to publish or use this comment in any way in the future for online use, in print, and by any other media at the discretion of Wawatay News.

The content of this field is kept private and will not be shown publicly.