Click for more information.
view counter

ᐊᓴᐸᐱᑯᐡᑭᓯᐊᐧᑲᐣᐠ ᐊᓂᔑᓂᓂᐊᐧᐠ ᑭᔕᑯᑕᑯᓇᐊᐧᐠ ᑭᒋᐅᓇᑯᓂᑫᐃᐧᑲᒥᑯᐠ

Friday July 25, 2014

ᐊᓴᐸᐱᑯᐡᑭᓯᐊᐧᑲᐣᐠ ᐊᓂᔑᓂᓂᐊᐧᐠ ᑭᔕᑯᑕᑯᓇᐊᐧᐠ ᑲᓇᑕ ᑭᒋᐅᓇᑯᓂᑫᐃᐧᑲᒥᑯᐠ, ᑭᑭᔕᑯᓂᑲᓄᐊᐧᐣ ᐅᐣᑌᕑᐃᔪ ᐅᑭᒪᐃᐧᐣ ᐁᐸᑭᑕᔓᐊᐧᓱᐨ ᒋᐸᑭᑎᓇᑭᐣ ᐊᓄᑭᐃᐧ ᒪᓯᓇᐦᐃᑲᓇᐣ ᐊᓂᔑᓂᓂᐃᐧ ᑎᐯᐣᒋᑫᐃᐧ ᐊᐦᑭᐠ.

ᐁᑲᐧ ᐅᐁᐧ ᑲᑭ ᒪᒪᐃᐧ ᐅᓀᐣᒋᑲᑌᐠ ᑭᒋᐅᓇᑯᓂᑫᐃᐧᑲᒥᑯᐠ, ᑭᐸᑭᑎᓂᑲᑌ ᒍᓫᐊᔾ ᐱᓯᑦ 11 ᑲᐃᓇᑭᓱᐨ, ᑭᐃᓇᔓᐊᐧᓄᐊᐧᐣ ᐅᐣᑌᕑᐃᔪ ᐅᑭᒪᐅᐣ ᑕᐃᐧᓇᒪᐊᐧᑲᓄ ᐃᐧᐣ ᒋᑭᐅᓀᐣᑕᐠ ᒋᐊᐸᒋᑐᐨ ᐊᐦᑭᐣ ᑲᐃᔑᑎᐯᐣᑕᑲᐧᓂᐠ ᒋᕑᐃᑎ 3 ᐁᑲ ᑭᔭᑦ ᑲᓇᑕ ᑭᒋᐅᑭᒪᐃᐧᓂᐠ ᓂᑲᐣ ᒋᐅᒋᐸᑭᑕᔓᐊᐧᑕᒪᐊᐧᑲᓄᐨ.

ᐊᓴᐸᐱᑯᐡᑭᓯᐊᐧᑲᐣᐠ ᐊᓂᔑᓂᓂᐊᐧᐠ ᐅᑎᔑᑲᓇᐊᐧᐸᑕᓇᐊᐧ ᒋᕑᐃᑎ 3 ᐅᓀᐣᒋᑫᐃᐧᓂᐠ ᐁᑕ ᒋᐅᒋᒪᑲᐠ ᑲᓇᑕ ᐅᑭᒪᐅᓂᐠ ᐁᑲᐧ ᐃᐧᐣ ᐅᐣᑌᕑᐃᔪ ᐅᑭᒪᐅᐣ ᐁᑲ ᐃᐧᐣ ᒪᐡᑲᐃᐧᓯᐃᐧᐣ ᐁᑲᓇᐊᐧᐸᒥᑯᐨ ᒋᐸᑭᑕᔓᐊᐧᑕᒪᑫᐨ ᒪᓇᑎᑫᐧᐃᐧ ᐊᓄᑭᐃᐧᓇᐣ ᒥᓇ ᐱᐊᐧᐱᑯᑫᐃᐧ ᐊᓄᑭᐃᐧᓇᐣ ᐊᓂᔑᓂᓂᐃᐧ ᐊᐦᑭᐠ.

“ᐊᓇᐃᐧᐣ ᒋᕑᐃᑎ #3 ᑭᐅᐣᒋ ᐅᓇᒋᑲᑌᐸᐣ ᑲᓇᑕ ᐅᑭᒪᐃᐧᓂᐠ, ᑭᐅᐣᒋᒪᒪᐃᐧ ᓇᑯᒥᑐᐸᓂᐠ ᐅᒋᐯᐧ ᐊᓂᔑᓂᓂᐊᐧᐠ ᒥᓇ ᑭᒋᐅᑭᒪᐃᐧ ᐊᓄᑭᓇᑲᐣ,” ᑭᐃᓇᓯᓇᐦᐃᑫ ᑭᒋᑎᐸᑯᓂᑫᐃᐧᑭᒪ ᐯᐳᕑᓫᐃ ᒥᐠᓫᐊᑭᓫᐃᐣ. “ᑕᐱᐡᑯᐨ ᐃᓂᐁᐧᓂᐊᐧᐣ ᐸᐸᑲᐣ ᐅᑭᒪᐃᐧᓇᐣ ᐸᐸᒥᓯᒪᑲᓄᐣ ᒋᑎᐸᐸᑕᒧᐊᐧᐨ ᒋᕑᐃᑎ ᐊᔓᑕᒪᑫᐃᐧᓇᐣ ᐊᐱ ᑲᔭᓂ ᐅᓀᑕᒧᐊᐧᐨ ᑲᐃᑯᓭᓂᐠ ᐅᒪᐡᑲᐃᐧᓯᐃᐧᓂᐊᐧ ᐃᐃᒪ ᑭᒋᐅᓇᔓᐁᐧᐃᐧ ᐅᓇᑯᓂᑫᐃᐧᓂᐠ.”

ᐁᑲᐧ ᐁᑲ ᒪᔭᑦ ᑲᑲᐧᔭᑫᐧᐣᑕᑲᐧᐠ ᑲᑭᔑᐅᓇᑌᐠ ᒋᕑᐃᑎ 3, ᑲᑭᒪᓯᓇᐦᐅᑎᓯᐊᐧᐸᐣ 1873 ᑲᔭᑭᐊᐧᐠ, ᑭᐃᑭᑐᒪᑲᐣ ᐊᐧᐁᐧ ᐁᑕ “ᑕᒥᓂᔭᐣ ᐊᑊ ᑲᓇᑕ” ᒋᐅᒋ ᑎᐯᐣᑕᐠ ᐊᐦᑭᓂ ᐃᒪ ᒋᕑᐃᑎ ᓇᑯᒥᑐᐃᐧᓂᐠ.

“ᐅᑯᐁᐧᓂᐊᐧᐠ ᐊᓂᔑᓂᓂᐊᐧᐠ, ᐃᐧᓇᐊᐧ ᒪᐡᑲᐃᐧᓯᐃᐧᐣ ᐅᑕᔭᓇᐊᐧ ᐊᐣᑎ ᑲᐃᐧᑕᔑᓇᓇᑕᐁᐧᐣᒋᑫᐊᐧᐨ ᒥᓇ ᐸᑭᑕᐁᐧᐊᐧᐨ ᒥᓯᐁᐧ ᐃᒪ ᑲᐃᐧᐣᒋᑲᑌᐠ ᐊᐦᑭ ᑲᑭᐃᑭᑐᐊᐧᐨ ᒋᐸᑭᑎᓇᒧᐊᐧᐨ … ᒋᒪᓇᒋᒋᑲᑌᐠ ᒥᓇ ᑕᑭᐅᐣᒋᐊᐣᒋᓭ, ᐊᐁᐡᑲᐨ, ᐃᔑᓇᑕᐁᐧᐣᑕᑲᐧᐠ ᓇᐣᑕ ᐃᐧᑕᐃᐧᓂᑲᑌᐠ,
ᐃᐧᑕᔑᐱᐊᐧᐱᑯᑲᓄᐊᐧᐠ, ᒪᑲᑎᑲᐧᑌᐠ ᓇᐣᑕ ᒥᓇ ᑯᑕᑭᔭᐣ ᑫᑯᓇᐣ ᐃᔑᒋᑫᐃᐧᓇᐣ ᑲᑭᐃᑭᑐᐨ ᑭᒋᐅᑭᒪᑫᐧ ᑲᑎᐯᐣᑕᐠ ᑕᒥᓂᔭᐣ ᐊᑊ ᑲᓇᑕ,” ᐃᓇᓯᓇᐦᐃᑲᑌ ᒋᕑᐃᑎ 3.

ᑲᑭᐃᔑ ᑭᔕᑯᓂᑲᓄᐊᐧᐠ ᑭᒋᐅᓇᑯᓂᑫᐃᐧᑲᒥᑯᐠ ᑭᐅᒋᑲᓇᐊᐧᐸᒋᑲᑌ ᑲᓇᑕ ᐅᑭᒪᐃᐧᐣ ᑲᐃᔑᑲᓇᐊᐧᐸᒋᑫᒪᑲᐠ ᒋᕑᐃᑎ 3 ᐁᑲ ᐃᐧᐣ ᐃᐁᐧ ᐁᐃᔑᑲᓇᐊᐧᐸᒥᑯᐃᐧᓯᐨ ᑲᓇᑕ ᐅᑭᒪᐃᐧᐣ, ᔕᑯᐨ ᐊᓂᐣ ᒥᓂᑯᐠ ᐅᑭᒪᐃᐧᐣ ᑫᐃᑯᑲᓇᐊᐧᐸᒋᑫᒪᑲᐠ ᐅᒪᐡᑲᐃᐧᓯᐃᐧᐣ ᐃᒪ ᑭᒋᐅᓇᑯᓂᑫᐃᐧᓂᐠ.

“ᑲᐃᐧᐣ ᐊᐧᐸᒋᑲᑌᓯᐣ ᐃᒪ ᒪᓯᓇᐦᐃᑲᓂᐠ ᓇᐣᑕ ᑲᔭᐡ ᑲᑭᐱᔑᐅᓇᑕᒪᑐᐊᐧᐸᐣ ᒋᕑᐃᑎ #3 ᒋᐃᑭᑐᒪᑲᐠ ᓂᔕᐧᔦᐠ ᐸᐸᑲᐣ ᒋᐃᓇᐧᑌᐠ ᐃᒪ ᑲᓇᑕ ᐅᑭᒪᐃᐧᓂᐠ ᒋᐅᒋ ᓂᑲᓂᓯᒪᑲᐠ ᓇᐣᑕ ᒋᐅᒋ ᔕᐳᓂᑲᑌᐠ,” ᑭᐃᓇᓯᓇᐦᐃᑫ ᒥᐠᓫᐊᑭᓫᐃᐣ. “ᐃᔑᔭᓂᒧᒋᑫᒪᑲᐣ ᐅᐁᐧ ᒋᕑᐃᑎ ᐁᑭᓇᑯᒥᑐᐊᐧᐨ ᑲᓇᑕ ᐅᑭᒪᐃᐧᐣ ᐊᐦᑭᓂ ᐅᐣᒋ ᒣᑲᐧᐨ ᑲᓇᑕ ᐊᐦᑭ ᐁᑕ ᑲᑭᐃᔑᓂᑲᑌᑭᐸᐣ ᑲᐃᐧᐣ ᐅᐣᑌᕑᐃᔪ.”

ᒥᓴᐊᐧᐨ ᐅᐁᐧ ᑲᑭᐃᔑ ᑭᔕᑯᓂᑲᓄᐊᐧᐠ, ᐊᓴᐸᐱᑯᐡᑭᓯᐊᐧᑲᐣᐠ ᐊᓂᔑᓂᓂᐊᐧᐠ ᐃᑭᑐᐊᐧᐠ ᐁᑲ ᒋᐳᓂᒋᑫᐊᐧᐨ, “ᐣᑲᒪᒥᑲᑕᒥᐣ ᒋᑲᓇᐁᐧᐣᑕᒪᐠ ᐣᑕᑭᒥᓇᐣ ᒥᓇ ᐣᑕᓂᔑᓂᓂᒥᓇᓂᐠ” ᒥᓇ “ᑲᐃᐧᐣ ᐣᑲᐳᓂᑐᓯᒥᐣ ᒋᓇᓇᑲᐡᑲᒪᐠ ᑲᐱᓇᐣᑭ ᐸᐡᑲᐧᑕᐦᐃᑲᑌᐠ ᐣᑕᑭᒥᓇᐣ.”

ᐅᑭᒪᑲᐣ ᕑᐊᒍᕑ ᐳᐱᐢᑐᕑ ᐃᑭᑐ ᐅᑕᔑᑫᐃᐧᐣ ᐅᒪᐡᑲᐁᐧᐣᑕᓇᐊᐧ ᒋᕑᐃᑎ 3 ᒋᒪᓇᑌᐣᒋᑲᑌᓂᐠ.

“ᓂᐸᑯᓭᓂᒪᒥᐣ ᐅᐣᑌᕑᐃᔪ ᒥᓇ ᑲᓇᑕ ᐅᑭᒪᐃᐧᓇᐠ ᒋᑲᑫᐧᓂᓯᑕᐁᐧᓂᒥᑯᔭᑭᑕᐧ ᒥᑕᓱᔭᑭ ᐃᔑᐅᑕᓇᐠ ᐁᑲᐧ ᒥᓇ ᒋᐱᐃᐧᑕᐱᒥᑯᔭᑭᑕᐧ ᐊᔕ ᐁᓇᑕᐁᐧᓂᒪᔭᐠ ᒋᑭᐱᐃᐧᑕᐱᒥᑯᔭᑭᑕᐧ ᐊᓂᐣ ᒪᔭᑦ ᐁᔑᓇᓄᑌᓭᐊᐧᐨ ᐣᑕᓂᔑᓂᓂᒪᐠ ᒋᑭᐅᓇᑕᒪᐃᐧᑕᐧ ᐊᓂᓂᑲᐣ ᑫᓄᒋᒥᓄᓭᐊᐧᐸᐣ ᐃᒪ ᐃᓀᑫ ᐊᐦᑭᑲᐠ ᒥᓇ ᔓᓂᔭᓂᐠ,” ᑭᐃᓇᒋᒧ.

ᒉᐱ ᐳᐱᐢᑐᕑ, ᐊᓴᐸᐱᑯᐡᑭᓯᐊᐧᑲᐣᐠ ᐅᓇᓇᑕᐁᐧᐣᒋᑫ ᑫᐃᐧᐣ ᑭᐊᐧᐃᐧᒋᑕᐧ ᒋᒪᒋᒋᑲᑌᐠ ᐅᓇᑯᓂᑫᐃᐧᓂᐠ ᒋᔑᐃᐧᒋᑲᑌᐠ, ᐅᑭᐃᐧᐣᑕᐣ ᐁᒥᐣᒋᓇᐁᐧᓯᐨ ᑲᑭᐃᔑ ᑭᔕᑯᓂᑲᓄᐊᐧᓂᐠ ᐁᑲᐧ ᔕᑯᐨ ᐃᔑᐃᐧᐣᑕᒪᑫ ᐊᓴᐸᐱᑯᐡᑭᓯᐊᐧᑲᐣᐠ “ᑕᒪᒥᑲᓱᑕᒪᓱᐊᐧᐠ ᒋᒪᓇᒋᐦᐃᑎᓱᐊᐧᐨ ᒋᒥᓄᔭᐊᐧᐨ, ᒋᒥᓄᓭᐊᐧᐨ ᒥᓇ ᐅᑕᓂᔑᓂᓂᐃᐧ ᐱᒪᑎᓯᐃᐧᓂᐊᐧ ᐊᓂᔑᓂᓂᐊᐧᐠ ᑲᑲᐯᔑᐊᐧᐨ ᐊᓴᐸᐱᑯᐡᑭᓯᐊᐧᑲᐣᐠ ᒋᐊᐸᒋᑐᐊᐧᐨ ᓇᓇᑲ ᐊᐸᒋᑕᑲᓇᐣ ᑫᐅᐣᑎᓇᒧᐊᐧᐨ.

“ᐣᑌᐯᐧᑕᒥᐣ ᐅᐣᑌᕑᐃᔪ ᐅᑭᒪᐃᐧᐣ ᒥᓇ ᑭᒋᐊᓄᑭᐃᐧ ᐱᒧᒋᑫᐃᐧᓇᐣ ᐁᑲᓇᐊᐧᐸᒥᑯᓯᐊᐧᐨ ᒥᓇ ᐃᒪ ᐃᓀᑫ ᐅᑭᒪᐃᐧᐱᒧᒋᑫᐃᐧᓂᐠ ᐱᓇᒪ ᓂᑲᐣ ᒋᐱᑲᑫᐧᒋᒥᑯᔭᑭᑕᐧ ᒥᓇ ᒋᐱᐦᐃᑯᔭᐠ ᑭᐡᐱᐣ ᒋᐃᓀᐣᑕᒪᐣᐠ ᐁᒪᐧᔦ ᐱᒪᓂᑲᐦᐃᑫᐊᐧᐨ ᑭᑕᑭᒥᓇᓂᐠ,” ᐃᑭᑐ. “ᐣᑕᓂᔑᓂᓂᒪᐠ ᑫᒋᓇᐨ ᐅᑲᓂᐱᒥ ᒪᒥᑲᐊᐧᓱᒪᐊᐧᐣ ᐅᑭᒪᐃᐧᓇᐣ, ᐱᑯ ᐊᐁᐧᓀᓇᐠ, ᑭᒋᐊᓄᑭᐃᐧᓇᐣ, ᒥᓇ ᐅᓇᑯᓂᑫᐃᐧᑲᒥᑯᐣ ᐁᑲ ᐃᐧᑲ ᑫᐃᔑ ᐊᐧᓂᑫᐊᐧᐨ ᐊᓂᐣ ᐁᐱᒋ ᑭᒋᐊᐧᓂᑐᑕᑯᐊᐧᐨ ᐣᑕᓂᔑᓂᓂᒪᐠ ᒪᓇᑎᑫᐧᐃᐧᐊᓄᑭᐃᐧ ᐱᒧᒋᑫᐃᐧᓇᐣ ᑲᐱᐊᓄᑭᐊᐧᐨ.”

ᐊᓴᐸᐱᑯᐡᑭᓯᐊᐧᑲᐣᐠ ᐊᓂᔑᓂᓂᐊᐧᐠ ᐃᑭᑐᐊᐧᐠ ᒋᓇᓇᑕᐃᐧᑭᑫᑕᒧᐊᐧᐨ ᑲᑭᐃᔑ ᑭᔕᑯᓂᑲᓂᐊᐧᓂᐠ ᒥᓇ ᐅᑲᓇᓇᑐᓇᓇᐊᐧ ᐊᓂᐣ ᐊᐊᐧᔑᒣ ᒥᓇᐊᐧ ᑫᑭᑐᑕᒧᐊᐧᐨ ᒋᓇᑭᐧᑕᒧᐊᐧᐨ.

ᐁᑲᐧ ᐃᒪ ᐊᐧᐸᐢᑲᐣᐠ, ᑲᐅᐣᒋᐯᔓᓇᑲᐧᐠ ᐊᓴᐸᐱᑯᐡᑭᓯᐊᐧᑲᐣᐠ ᒥᓇ ᑲᐃᐧᒋᐃᐧᑎᒪᑲᐠ ᐊᑭᐣᑕᒪᑫᐃᐧ ᒪᒥᔑᑫᒧᐃᐧᐣ, ᑭᐃᑭᑐᐊᐧᐠ ᐃᐁᐧ ᑲᑭᐃᔑ ᑭᔕᑯᓂᑲᓄᐊᐧᐠ ᑲᐃᐧᐣ ᒪᔭᑦ ᒋᑭᐅᐣᒋᐸᔭᑌᓇᑯᒋᑲᑌᓂᐠ ᐊᓂᔑᓂᓂᐊᐧᐠ ᑲᐃᔑᓂᓯᑕᐁᐧᐣᑕᒧᐊᐧᐨ ᒋᕑᐃᑎ ᐃᐧᒋᐃᐧᑐᐃᐧᓂ.

“ᑲᓇᑕ ᐅᑭᒪᐃᐧᓂᐠ ᑭᐅᐣᒋᓭ ᒋᕑᐃᑎ ᐊᔓᑕᒪᑯᐃᐧᐣ ᑲᑭᒥᓂᑯᔭᐠ. ᑲᓇᑕ ᐅᑭᒪᐃᐧᐣ ᐃᐧᐣ ᐅᑲᓇᐊᐧᐸᒥᑯᐣ ᒋᑎᐱᓭᑐᐸᐣ ᑲᑭᐃᔑ ᐊᔓᑕᒪᐊᐧᐸᐣ ᒋᕑᐃᑎ 3 ᐊᓂᔑᓂᓂᐊᐧᐣ,” ᐃᑭᑐ ᐊᐧᐸᐢᑲᐣᐠ ᐅᑭᒪᑲᐣ ᒪᕑᑎᐣ ᐯᑎᑲᐧᐣ. “ᑲᐯᐦᐃ ᐣᑭᐱᐃᑭᑐᒥᐣ, ᒥᓇ ᓂᑲᐱᒥᑲᓇᐁᐧᑕᒥᐣ, ᐊᐧᐁᐧ ᑲᓇᑕ
ᐅᑭᒪᐃᐧᐣ ᐁᓯᓭᓂᑭᐸᐣ ᒋᑭᐸᐸᒥᓯᐸᐣ ᒋᑫᒋᓇᐁᐧᑕᑯᐨ ᐣᑕᔓᑕᒪᑯᐃᐧᓂᓇᐣ ᒋᐱᒥᓂᔕᐦᐃᑲᑌᐠ.”

ᐊᐱ ᑲᑭᐁᐧᐸᑯᓂᑲᑌᐠ ᓇᑐᑕᒪᑫᐃᐧᐣ ᒋᑭᐁᐧᓇᓇᑲᒋᒋᑲᑌᐠ, ᐃᒪ ᑭᒋᐅᓇᑯᓂᑫᐃᐧᑲᒥᑯᐠ ᑭᐅᒋᐅᓀᒋᑲᑌ ᑭᒥᓇᑲᓄ ᐃᐧᐣ ᓇᐊᐧᐨ ᒥᐢᑕᐦᐃ ᐅᐣᑌᕑᐃᔪ ᐅᑭᒪᐃᐧᐣ ᑲᓇᐊᐧᐸᒥᑯᓯᐃᐧᐣ ᐊᐱ ᐊᐦᑭᐃᐧ ᐅᓀᑕᒧᐃᐧᐣ ᐃᐧᑐᒋᑲᑌᐠ ᑲᐊᔑᒋᓭᐊᐧᐨ ᐊᓂᔑᓂᓂᐊᐧᐠ ᒋᕑᐃᑎ ᐊᔓᑕᒪᑯᐃᐧᓂ, ᑭᐃᑭᑐ ᐊᐧᐸᐢᑲᐣᐠ ᐅᓇᔓᐁᐧᐃᑫᐧ ᒍᐊᐣ ᐯᑎᑲᐧᐣ ᒧᕑ.

“ᑲᐃᐧᐣ ᑕᐡ ᐣᑲᐸᑭᑎᓂᑎᓱᒥᐣ ᒋᓂᑲᑌᔭᑯᓂᑯᔭᐠ, ᑲᐃᐧᐣ ᐊᐃᐧᔭ ᓂᑲᑭᒪᑲᒥᑯᓯᒥᐣ ᑲᐅᐣᑕᒋᐦᐅᐊᐧᑫᔭᐠ ᒥᓇ ᑲᐃᐧᐣ ᑲᐃᐧᐣ ᐊᐃᐧᔭ ᐅᑲᐱᑲᑫᐧ ᓂᔑᐊᐧᓇᒋᑐᓯᐣ ᓂᓂᒐᓂᓯᓇᓂᐠ ᓂᑲᐣ ᑫᓄᒋᐱᒪᑎᓯᐊᐧᐨ,” ᑭᐃᑭᑐ. “ᑲᐃᐧᐣ ᓂᑲᐳᓂᐊᒪᑭᓯᒥᐣ ᓂᑕᑭᒥᓇᐣ ᐅᒋ.”

“ᓂᐃᐧᑕᒪᐊᐧᒥᐣ ᐅᐣᑌᕑᐃᔪ ᐅᑭᒪᐃᐧᐣ ᒥᓇ ᑭᒋ ᐊᓄᑭᐃᐧᐱᒧᒋᑫᐃᐧᐣ ᐁᑲ ᒋᑭᐱᒥ ᐱᓯᐢᑫᐣᑕᒪᑯᔭᐠ ᑭᑕᔓᑕᒪᑯᐃᐧᓂᓇᐣ,” ᐃᑭᑐ ᐯᑎᑲᐧᐣ.
“ᑲᐃᐧᓂᐣ ᐁᑲᐧ ᑕᑭᑐᑕᓯᐊᐧᐠ ᑲᑭᐱᑐᑕᒧᐊᐧᐸᐣ. ᓂᐃᐧᐃᓇᒥᐣ ᐃᐧᓇᐧᐊ ᐁᑲᓇᐊᐧᐸᒥᑯᐊᐧᐨ ᒋᑲᐧᔭᑯᓂᑫᐊᐧᐨ. ᑭᐡᐱᐣ ᑕᐡ ᐁᑲ ᐱᒥᓂᔕᐦᐊᒧᐊᐧᐨ ᐅᑲᓇᐊᐧᐸᒥᑯᐃᐧᓂᐊᐧ ᐅᓇᑯᓂᑫᐃᐧᑲᒥᑯᐠ ᑲᑭᐅᐣᒋ ᐃᐧᒋᑲᑌᐠ ᑌᐯᐧ ᐃᐁᐧ ᐁᑐᑕᒧᐊᐧᐨ, ᒥᓇᐊᐧ ᐣᑲᐃᔕᒥᐣ ᐅᓇᑯᓂᑫᐃᐧᑲᒥᑯᐠ ᑫᒋᓇᐨ ᐣᑕᑭᒥᓇᐣ ᒋᒪᓇᒋᒋᑲᑌᐠ ᒥᓇ ᐣᑕᔓᑕᒪᑯᐃᐧᓂᓇᐣ ᒋᑎᐸᐸᒋᑲᑌᐠ.”

ᐁᐧᑎ 2005 ᑲᔭᑭᐊᐧᐠ ᑭᐅᐣᒋᒪᒋᑕᐸᓂᐠ ᐁᐃᐧᐃᔑᐃᐧᑐᐊᐧᐨ ᐅᑎᐸᑯᓂᑫᐃᐧ ᒪᒥᔑᑫᒧᐃᐧᓂᐊᐧ ᐊᓴᐸᐱᑯᐡᑭᓯᐊᐧᑲᐣᐠ ᐅᐊᐧᓂᐦᐃᑫᐠ ᐊᐣᑕᓄ ᑭᐁᐧᑎᐣ ᒍᓂᔪᕑ ᐁᑲᐧ ᒥᓇ ᒍᓴᑊ ᐳᐱᐢᑐᕑ, ᐅᑭᒪᐃᐧᓀᐦᐊᓇᐊᐧᐸᐣ ᐊᓄᑭᐃᐧᒪᓯᓇᐦᐃᑲᓀᓯᓂ ᐅᐣᑌᕑᐃᔪ ᐅᑭᒪᐃᐧᐣ ᑲᑭᒥᓇᐸᐣ ᐊᐱᑎᐱ ᐊᓄᑭᐃᐧᐱᒧᒋᑫᐃᐧᐣ ᒋᐸᐡᑲᐧᑕᐦᐃᑫᐨ ᐃᒪ ᐊᓴᐸᐱᑯᐡᑭᓯᐊᐧᑲᐣᐠ ᐊᓂᔑᓂᓂᐃᐧ ᐊᐦᑭᐠ.

ᐳᐱᐢᑐᕑ ᑭᐃᑭᑐᐸᐣ ᐃᐁᐧ ᐊᐱ ᑲᑭᔭᓂ ᐸᐡᑲᐧᑕᐦᐃᑲᓂᐊᐧᓂᐠ ᑭᓂᔑᐊᐧᓇᒋᒋᑲᑌᓂ ᐊᓴᐸᐱᑯᐡᑭᓯᐊᐧᑲᐣᐠ ᐊᓂᔑᓂᓂᐊᐧᐠ ᑲᔭᐡ ᑲᑭᐱᐅᐣᒋ ᐱᒪᒋᐦᐃᑎᓱᐊᐧᐸᐣ.

ᐁᑲᐧ ᒣᑲᐧᐨ 2011 ᑲᔭᑭᐊᐧᐠ, ᐊᓴᐸᐱᑯᐡᑭᓯᐊᐧᑲᐣᐠ ᐊᓂᔑᓂᓂᐊᐧᐠ ᑭᐸᑭᓇᑫᐸᓂᐠ ᐃᒪ ᓴᐱᕑᐃᔭᕑ ᐅᓇᑯᓂᑫᐃᐧᑲᒥᑯᐠ ᐁᑭᐃᑭᑐᐸᐣ ᐅᓇᑯᓂᑫᐃᐧᓂ ᐁᓇᑕᐁᐧᐣᑕᑯᓯᐨ ᑲᓇᑕ ᐅᑭᒪᐃᐧᐣ ᒋᐸᐸᒥᓯᐨ ᐊᐱ ᑲᐃᐧᐅᓀᒋᑲᑌᐠ ᑫᓂᒥᓂᑎᓇᓂᐊᐧᐠ ᐊᓄᑭᐃᐧ ᒪᓯᓇᐦᐃᑲᓀᓴᐣ ᐃᒪ ᒋᕑᐃᑎ 3 ᐊᐦᑭᐠ.

ᐁᑲᐧ ᑕᐡ ᑲᑭᐃᔑ ᑭᔕᑯᓂᑫᐸᐣ ᐅᓇᑯᓂᑫᐃᐧᑭᒪ ᑭᐊᐧᓀᒋᑲᑌ ᐃᒪ ᐅᐣᑌᕑᐃᔪ ᐅᓇᑯᓂᑫᐃᐧᑲᒥᑯᐠ ᑲᐃᔑᔭᓂᒧᒋᑲᑌᑭᐣ ᑭᑕᑦ ᑲᓇᐱᑲᓇᐊᐧᐸᒋᑲᑌᑭᐣ ᑭᔕᑯᓂᑫᐃᐧᓇᐣ ᒣᑲᐧᐨ 2013.

ᑭᐃᓯᓭ ᑕᐡ ᐃᒪ ᑭᒋᐅᓇᑯᓂᑫᐃᐧᑲᒥᑯᐠ ᑭᐃᐧᒋᐃᓀᑕᒧᒪᑲᐣ ᑲᑭᐃᓇᔓᐊᐧᓄᐊᐧᐠ ᐅᐣᑌᕑᐃᔪ ᐅᓇᑯᓂᑫᐃᐧᑲᒥᑯᐠ.

ᐁᑲᐧ ᔕᑯᐨ, ᑭᒋᐅᓇᑯᓂᑫᐃᐧᑲᒥᑯᐠ ᑭᐃᑭᑐᓇᓂᐊᐧᐣ ᐅᐣᑌᕑᐃᔪ ᐅᑭᒪᐃᐧᐣ ᒋᑎᐱᑲᓇᐊᐧᐸᑕᒪᑫᐨ ᐊᓂᔑᓂᓂᐊᐧᐠ ᐅᑕᔓᑕᒪᑯᐃᐧᓂᐊᐧ ᐊᐱ ᑲᐸᑭᑎᓂᑲᑌᑭᐣ ᐊᓄᑭᐃᐧ ᒪᓯᓇᐦᐃᑲᓇᐣ ᐃᒪ ᐊᓂᔑᓂᓂᐃᐧ ᐊᐦᑭᐠ, ᐁᑲᐧ ᒥᓇ ᐁᑲ ᒋᑭᐃᔑ ᐸᑭᑕᔓᐊᐧᑕᒪᑫᐨ ᑫᑭᐅᐣᒋ ᐱᑯᓂᑫᒪᑲᓂᐠ ᒋᕑᐃᑎ ᓇᑯᒥᑐᐃᐧᓇᐣ ᑲᑭᐃᓇᑕᒪᑲᓄᐊᐧᑭᐸᐣ.

“ᐅᐣᑌᕑᐃᔪ ᐅᑭᒪᐃᐧᐣ ᐅᒪᐡᑲᐃᐧᓯᐃᐧᐣ ᒋᐅᒋ ᐅᑕᐱᓇᐠ ᐊᐦᑭᓂ ᐃᒪ ᒋᕑᐃᑎ #3 ᑲᐃᐧᐣ ᐃᐧᐣ ᑲᐃᓀᐣᑕᐠ ᐅᑲᑭᐃᔑ ᐅᓀᑕᓯᐣ,” ᑭᐃᓇᓯᓇᐦᐃᑫ ᒥᐠᓫᐊᑭᓫᐃᐣ. “ᑭᐡᐱᐣ ᒋᕑᐃᑎ #3 ᐊᐦᑭ ᐃᐧᔭᐸᒋᒋᑲᑌᐠ, ᓇᑕᐁᐧᐣᑕᑲᐧᓂ ᒋᐅᒋ ᒪᓇᑌᐣᑕᑲᐧᓂᐠ ᐅᒋᐯᐧ ᐊᓂᔑᓂᓂᐊᐧᐠ ᑲᑭᐃᓇᑕᒪᐃᐧᐣᑕᐧᐸᐣ ᐅᓇᓇᑕᐁᐧᐣᒋᑫᐃᐧ ᒪᐡᑲᐃᐧᓯᐃᐧᓂᐊᐧ ᐃᒪ ᐅᑕᑭᒥᐊᐧᐠ. ᑭᐡᐱᐣ ᑕᐡ ᐊᐱᐣ ᐃᓯᓭᓂᐠ ᐊᓂᔑᓂᓂᐊᐧᐠ ᐁᑲ ᐃᒪ ᒋᑭᑕᔑᓇᓇᑕᐁᐧᐣᒋᑫᐊᐧᐨ, ᐸᑭᑕᐁᐧᐊᐧᐨ ᓇᐣᑕ ᐊᐧᓂᐦᐃᑫᐊᐧᐨ ᐃᒪ ᑲᔭᐡ ᑲᑭᐱᑕᔑ ᓇᓇᑕᐁᐧᐣᒋᑫᐊᐧᐸᐣ, ᐸᑭᑕᐁᐧᐊᐧᐸᐣ ᒥᓇ ᐊᐧᓂᐦᐃᑫᐊᐧᐸᐣ, ᒥᐦᐃᒪ ᐊᐱᐣ ᑫᐃᔑᓇᑲᐧᐠ ᐁᐱᑯᓂᑲᑌᓂᐠ ᒋᕑᐃᑎ ᐅᑕᔓᑕᒪᑯᐃᐧᓂᐊᐧ.”

ᐅᐁᐧᓂ ᑕᐡ ᑲᑭᐱᒥᑲᒧᐊᐧᐨ ᐅᓇᑯᓂᑫᐃᐧᓂᐠ, ᐊᓴᐸᐱᑯᐡᑭᓯᐊᐧᑲᐣᐠ ᐊᓂᔑᓂᓂᐊᐧᐠ ᐊᔕ ᑭᒋᐁᐧᐡᑲᐨ ᐅᑐᐣᒋᐱᒥ ᒪᒥᑲᑕᓇᐊᐧ ᐁᓇᓇᑲᐡᑲᒧᐊᐧᐨ ᒪᓇᑎᑫᐧᐃᐧ ᐊᓄᑭᐃᐧᓂ ᑲᐱᑕᓇᓄᑲᑌᓂᐠ ᐅᑕᑭᒥᐊᐧᐠ. ᒣᑲᐧᐨ 2002 ᑲᔭᑭᐊᐧᓂᐠ, ᐊᓂᔑᓂᓂᐊᐧᐠ ᐅᑭᑭᐸᑯᐡᑲᓇᐊᐧᐸᐣ ᑲᐊᐃᓇᒧᒋᑲᑌᑭᐣ ᒪᓇᑎᑫᐧᐃᐧ ᒥᑲᓇᑫᐃᐧᓇᐣ ᐁᐧᑎ ᑭᐁᐧᑎᓄᐠ ᐃᓀᑫ ᑕᓇᐱᐃᐧᓂᐠ, ᐊᐁᐡᑲᑦ ᐅᑭᐱᒥ ᑲᑭᐸᐊᓇᐊᐧ ᐃᐁᐧᓂ ᒥᑲᓇᓂ ᐊᐊᐧᔑᒣ ᒥᑕᓱᔭᑭ. ᐁᑲᐧ ᒥᓇ ᑭᐃᔑᒋᑫᐊᐧᐠ ᐊᓂᔑᓂᓂᐊᐧᐠ ᒥᓇ ᑲᑭᐃᐧᒋᑲᐸᐃᐧᑕᑯᐊᐧᐨ ᐯᔑᑯᑭᔑᑲ ᐅᑭᑭᐱᐡᑲᓇᐊᐧᐸᐣ ᑭᒋᐅᑕᐸᓂ ᒥᑲᓇᓂ ᒣᑲᐧᐨ 2006 ᐁᓇᑯᑐᐊᐧᐨ ᐅᓇᑲᐡᑭᑫᐃᐧᓂᐊᐧ.

ᒣᑲᐧᐨ 2012 ᐅᐣᑌᕑᐃᔪ ᐅᑭᒪᐃᐧᐣ ᐅᑭᔕᐳᓇᓇᐸᐣ ᒥᑕᓱᔭᑭ ᒋᐱᒪᓄᑲᑌᐠ ᒪᓇᑎᑫᐧᐃᐧᐊᓄᑭᐃᐧ ᐅᓇᒋᑫᐃᐧᐣ ᒋᐅᐣᒋ ᑕᐃᐧᓂᑫᒪᑲᐠ ᒋᐸᐡᑲᐧᑕᐦᐃᑲᑌᐠ ᐊᓂᔑᓂᓂᐊᐧᐠ ᐅᑕᑭᒥᐊᐧᐠ. ᐁᑲᐧ ᐅᐁᐧ ᐅᓇᒋᑲᐣ ᑕᑭᒪᒋᒋᑲᑌᐸᐣ ᓂᑭᐱᓯᑦ 1, 2014.

ᐁᑲᐧ ᐊᐧᐁᐧ ᑌᐱᐟ ᐅᕑᓯᐟ, ᑲᑭᐊᒥᑯᑭᒪᐃᐧᐸᐣ, ᑭᐃᑭᑐ ᐃᒪ ᐅᓇᒋᑲᓂᐠ ᑲᐃᐧᐣ ᒋᑭᐅᐣᒋ ᐊᔑᑕᒋᑲᑌᐠ “ᑲᑲᑫᑎᐸᐦᐊᑭᐃᐧᐣ ᑫᓂᔑ ᒪᒪᓇᑎᑲᐧᑌᐠ” ᐃᒪ ᐱᐣᒋ ᐊᓴᐸᐱᑯᐡᑭᓯᐊᐧᑲᐣᐠ ᐊᓂᔑᓂᓂᐃᐧ ᑎᐯᐣᒋᑫᐃᐧᓂᐠ, ᓀᐅᐨ ᑕᐡ ᐊᓂᔑᓂᓂᐊᐧᐠ ᐅᑭᐊᓀᐧᑕᓇᐊᐧᐸᐣ ᐃᐁᐧᓂ ᐅᓇᒋᑫᐃᐧᓂ.

“ᑲᐧᐣᑕ ᑭᐊᐃᓇᒋᒧ ᑭᒋᐅᑭᒪ, ᒥᓇ ᑲᐃᐧᐣ ᒪᔭᑦ ᒋᐱᒥᓂᔕᐦᐊᐠ ᐅᐣᑌᕑᐃᔪ ᐅᑭᒪᐃᐧᐣ ᐅᑐᓇᒋᑫᐃᐧᓂᐣ ᒥᑕᓱᔭᑭ ᓂᑲᐣ ᑲᑭᐃᔑᐅᓇᒋᑫᐨ ᐅᒪᓇᑎᑫᐧᐃᐧ ᐊᓄᑭᐃᐧᐣ ᐣᑕᑭᒥᓇᓂᐠ ᐁᑲ ᐃᐧᐣ ᓂᓇᐃᐧᐟ ᐁᑭᐅᐣᒋᐃᑭᑐᔭᐣᐠ,” ᑭᐃᑭᑐ ᐊᓴᐸᐱᑯᐡᑭᓯᐊᐧᑲᐣᐠ ᐅᑭᒪᑲᐣ ᓴᔾᒪᐣ ᐳᐱᐢᑐᕑ
ᑲᑭᑎᐸᒋᒧᐸᐣ ᒣᑲᐧᐨ ᑲᐡᑲᑎᓄᐱᓯᑦ 7, 2013.


Email to a Friend
qr code
add to del.icio.us

Stumble It!

Post new comment

Comment policy

All comments submitted to Wawatay News Online must have a correct name, location and email address of the user. Wawatay will not approve comments without the required information.

The approval of comments will also be subjected to relevancy, laws of defamation and good taste.

Once posted, comments become the property of Wawatay News. Wawatay News reserves the right to publish or use this comment in any way in the future for online use, in print, and by any other media at the discretion of Wawatay News.

The content of this field is kept private and will not be shown publicly.