view counter

ᑲᑭᑲᓇᐁᐧᑕᑯᓯᐊᐧᐸᐣ ᑭᑭᓄᐦᐊᒪᑎᐃᐧᑲᒥᑯᐠ ᐊᓂᔑᓂᓂᐃᐧ ᐊᐊᐧᔑᔕᐠ ᑲᔕᐳᐡᑲᒧᐊᐧᐨ ᑭᐁᐧᒪᓀᓂᒪᐊᐧᐠ

Thursday June 26, 2014

ᐊᓂᔑᓇᐯ ᐊᐢᑭ ᐱᒧᒋᑫᐃᐧᐣ ᒥᓇ ᐅᑭᒪᑲᓇᐠ ᒋᕑᐃᑎ #3 ᐅᓂᑲᓂᑕᒪᑫᐠ ᐅᑭᐃᐧᐣᑕᓇᐊᐧ ᐁᑕᓀᑕᒥᐦᐃᑯᐊᐧᐨ ᐅᑯᐁᐧᓂᐊᐧᐠ ᐁᐧᐡᑲᐨ ᐊᓂᔑᓂᓂᐃᐧ ᐊᐊᐧᔑᔕᐠ ᑲᑭᑲᓇᐁᐧᐣᑕᑯᓯᐊᐧᐸᐣ ᐃᐡᑯᓄᑲᒥᑯᐠ ᑲᑭᐱᔕᐳᐡᑲᒧᐊᐧᐨ ᑕᐱᐡᑯᐨ ᐁᔑᓇᑲᐧᐠ ᒥᓇᐊᐧ ᐁᑭᐁᐧᒪᒋᑐᑕᐃᐧᑕᐧ ᐃᒪ ᐃᓀᑫ ᐅᑎᐸᐦᐊᒪᑯᐃᐧᓂᐊᐧᐠ.

“ᑲᑭᐱᔕᐳᐡᑲᒧᐊᐧᐨ ᐃᐡᑯᓄᑲᒥᑯᐠ ᑲᑭᐱᑲᓇᐁᐧᓂᒥᑕᐧᐸᐣ ᐃᐡᑯᓄᑲᒥᑯᐠ ᒥᓄᐃᐧᒋᐃᐧᑐᐃᐧᓂᐠ ᑭᐃᔑᓇᑯᒧᐸᓂᐠ ᒋᔑᐃᐧᒋᑕᐧᐊᐨ ᑲᑭᐃᓂᑕᐧᐸᐣ ᒋᐅᓇᑕᒪᐃᐧᑕᐧ ᑫᐃᔑᒪᒥᓇᐧᑕᒪᐃᐧᐣᑕᐧ ᑲᑭᐱᔑ ᐊᐧᓂᑐᑕᐃᐧᑕ ᒣᑲᐧᐨ ᑲᑭᐱᑲᓇᐁᐧᑕᑯᓯᐊᐧᐸᐣ ᐃᐡᑯᓄᑲᒥᑯᐠ, ᐁᑲᐧ ᑕᐡ ᐅᐁᐧ ᓇᐱᐨ ᒪᒣᓂᔐᐣᑕᑲᐧᐣ ᒥᓇᐊᐧ ᐊᐱᐣ ᐁᑭᐁᐧᓭᓂᐠ ᐅᐊᐧᓂᑐᑕᑯᐃᐧᓂᐊᐧ,” ᐃᑭᑐ ᑭᒋᐅᑭᒪᑲᓀᐢ ᐊᓫᐱᐣ ᐱᐟᓫᐊᕑ, ᐃᐧᐣ ᑲᐱᒥᑲᓇᐊᐧᐸᑕᐠ ᑎᐸᑯᓂᑫᐃᐧ ᐊᓄᑭᐃᐧ ᐱᒧᒋᑫᑕᒪᐃᐧ ᑲᓇᐊᐧᐸᒋᑫᐃᐧᓂ ᐅᒪ ᐊᓂᔑᓇᐯ ᐊᐢᑭ ᐱᒧᒋᑫᐃᐧᓂᐠ. “ᓂᑭᐃᔑᒪᐡᑲᐃᐧ ᓇᑯᒧᒥᐣ ᐁᑲ ᐁᒥᓇᐧᔑᓂᐠ ᐅᑯᐁᐧᓂᐊᐧᐠ ᑲᑎᐸᑯᓂᑫᐃᐧ ᑲᓄᒋᑫᑕᒪᑫᐊᐧᐨ ᑲᐅᐣᒋ ᐊᐧᐊᐧᓂᑐᑕᐊᐧᐊᐧᐨ ᑫᑎ ᐅᑎᐡᑯᓂᐠ ᒥᔑᓄᐊᐦᑭ ᐅᑕᓇᐠ ᑲᑭᐱᑲᑲᐧᑕᑭᑐᐊᐧᐨ. ᒥᔑᓄᐊᐦᑭ ᑲᔦ ᐅᑭᐱᒪᒥᑲᑕᓇᐊᐧ ᑎᐸᑯᓂᑫᐃᐧ ᓇᑕᒪᑫᐃᐧᓂᐠ ᒋᐅᒋ ᓇᑕᒪᐃᐧᑕᐧ ᒥᓂᑯᐠ ᐃᐁᐧ ᑲᑭᐱᔑ ᒪᒋᑐᑕᐃᐧᑕᐧ ᑲᐱᐊᐊᐧᔑᔑᐃᐧᐊᐧᐨ, ᐁᑲᐧ ᑕᐡ ᑲᐃᐧᐣ ᐃᓯᓭᓂᐸᐣ ᒋᑭᐊᐧᓂᒋᐦᐃᑫᑕᐧᐸᐣ ᑫᓄᒋᒥᓄᓭᐊᐧᐸᐣ ᐊᓂᓂᑲᐣ.”

ᑎᐸᑯᓂᑫᐃᐧᓂ ᐯᕑᐃ ᔓᓫᒪᐣ ᐁᐧᑎ ᒪᓂᑐᐸ ᑎᐸᑯᓂᑫᐃᐧᓂᐠ ᑲᐃᔑᑎᐸᑯᓂᑫᐃᐧᑭᒪᐃᐧᐨ ᑭᐃᑭᑐᐸᐣ ᒣᑲᐧᐨ ᓴᑭᑲᐸᐃᐧᐱᓯᑦ 4 ᑲᑭ ᑭᔑ ᐅᓇᒋᑲᓂᐊᐧᐠ ᐸᐧᐣᑌᐣ ᐁᑲᐧ ᑲᓇᑕ (ᑭᒋᐅᑕᔭᒥᑕᒪᑫ) ᐃᓂᐁᐧᓂᐊᐧᐣ ᐱᑯ ᑫᑯᓇᐣ ᓇᑯᒥᑐᐃᐧᓇᐣ ᑲᓇᑕᐁᐧᑕᑯᓯᐊᐧᐨ ᑲᐃᐧᒧᐡᑭᓀᐱᐦᐃᑫᐊᐧᐨ ᑲᑭᐱᐃᐡᑯᓄᐊᐧᐸᐣ ᒋᐅᒋ ᑎᐸᐦᐊᒧᐊᐧᐨ ᐅᒧᐡᑭᓀᐱᐦᐃᑫᑕᒪᑯᐃᐧᓂᐊᐧ ᒥᐡᑲᐧᐨ ᑎᐸᑯᓂᑫᐃᐧ ᐃᐧᒋᐦᐃᑯᐃᐧᓂᐠ ᒋᐃᐧᒋᐦᐃᑕᐧ ᐁᑲᐧ ᑭᐃᐧᐣᒋᑲᑌ ᐁᑲ ᐃᐁᐧ ᒋᑭᑐᒋᑲᑌᐠ ᒥᓇ ᑲᐃᐧᐣ ᒋᐸᑭᑎᓂᑲᑌᐠ.

“ᐃᒪ ᒪᔭᑦ ᑲᐃᔑᐊᐧᐃᐧᐣᒋᑫᒪᑲᐠ ᒪᒥᓇᐧᑕᒪᑫᐃᐧ ᓇᑯᒥᑐᐃᐧᐣ ᒥᓇ ᑯᑕᑭᔭᐣ ᐅᓇᑯᓂᑫᐃᐧᓂᐠ ᑲᐅᐣᒋ ᑭᑭᓯᑭᐣ, ᐁᑲᐧ ᒥᓇ ᑲᐃᔑᐃᐧᒋᑲᑌᑭᐣ ᒥᑭᑫᐃᐧᓇᐣ ᐅᒪ ᑎᐸᑯᓂᑫᐃᐧᓂᐠ, ᐊᒥ ᐁᔑᐊᐧᐸᑕᒪᐣ ᐱᑯ ᑫᑯᓇᐣ ᑲᑭᐱᔑ ᓇᑯᒥᑎᓇᓂᐊᐧᐸᑭᐣ ᑲᓇᑕᐁᐧᑕᑯᓯᐊᐧᐨ ᐅᒧᐡᑭᓀᐱᐦᐃᑫᐠ ᒋᑎᐸᐦᐃᑫᐦᐃᑕᐧ ᒥᐡᑲᐧᐨ ᒋᑭᐅᐣᒋ ᐃᐧᒋᐦᐃᑕᐧ ᑎᐸᑯᓂᑫᐃᐧᓂᐠ ᒥᓇ ᒋᐱᒥᐊᓄᑲᑕᒪᐃᐧᑕᐧ ᐅᐣᒋᐱᑯᓂᑫᒪᑲᐣ ᐅᓇᑯᓂᑫᐃᐧᐣ ᒥᓇ ᑲᐃᐧᐣ ᒋᐸᑭᑎᓂᑲᑌᐠ ᐅᓇᑯᓂᑫᐃᐧᓂᐠ,” ᑭᐃᑭᑐ ᔓᓫᒪᐣ ᐊᐱ ᑲᑭᔭᓂ ᑭᔑᐅᓀᑕᐠ. “ᐁᑲᐧ ᒥᓇ ᐃᓂᐁᐧᓂᐊᐧᐣ ᑲᓇᑯᒥᑐᓇᓂᐊᐧᐠ ᑫᑭᐅᐣᒋ ᐊᓄᑭᐊᐧᑲᓄᐊᐧᐠ ᒥᓇ ᒋᐅᒋ ᑎᐸᐦᐃᑫᐦᐃᐊᐧᓄᐊᐧᐠ ᒥᐅᓄ ᑲᔦ ᐁᐅᒋᐱᑯᓂᑲᑌᐠ ᐅᓇᔓᐁᐧᐃᐧᐣ ᒥᓇ ᑲᐃᐧᐣ ᑕᑭᐊᐸᑕᓯᓄᐊᐧᐣ. ᐊᒥ ᑲᔦ ᑲᑭᐃᔑᒥᑲᒪᐣ ᑲᑭᐃᔑ ᐱᑯᓂᑲᑌᐠ ᐅᓇᔓᐁᐧᐃᐧᐣ, ᐅᓄᐁᐧᓂᐊᐧᐣ ᑯᑕᑭᔭᐣ ᓇᑯᒥᑐᐃᐧᓇᐣ ᒋᑎᐸᐦᐃᑫᐦᐃᑕᐧ ᐅᒧᐡᑭᓀᐱᐦᐃᑫᐠ ᑲᐃᐧᒋᐦᐃᑯᐊᐧᐨ ᐅᑕᔭᒥᑕᒪᑫᐣ ᑲᐧᐣᑕ ᑲᐅᐣᒋ ᐊᐃᑐᑕᑯᐊᐧᐨ ᒥᓇ ᑯᑕᑭᔭᐣ ᑫᑯᓇᐣ ᑲᐅᒋᐃᓇᑕᒪᑯᐊᐧᐨ, ᒥᐅᓄ ᑐᑲᐣ ᓂᔑᐣ ᑫᑯᓇᐣ ᑲᑭᐃᐧᐣᒋᑲᑌᑭᐣ ᐅᒪ ᑎᐸᑯᓂᑫᐃᐧᑲᒥᑯᐠ, ᑭᐃᔑᒥᑭᑫᓭ ᐁᑲ ᒋᑭᐃᓯᓭᑭᐸᐣ ᐅᐁᐧ ᒋᑐᒋᑲᑌᐠ ᒥᓇ ᑲᐃᐧᐣ ᐸᑭᑎᓂᑲᑌᐸᐣ ᐅᐁᐧᓂ ᒋᑭᑐᑕᒧᐊᐧᐸᐣ ᑲᑭᐃᓇᐊᐧᐸᐣ ᐅᒧᐡᑭᓀᐱᐦᐃᑫᐣ ᒋᑐᑕᒥᓂᐨ.”

ᐸᐣᑌᐣ ᐁᑲᐧ ᒥᓇ ᑲᓇᑕ (ᑭᒋᐅᑕᔭᒥᑕᒪᑫ) ᑎᐸᑯᓂᑫᐃᐧᐣ ᐅᑭᐱᐣᑎᑲᑐᐣ ᑲᓂᑲᓂᑲᓇᐊᐧᐸᑕᐠ ᑫᔭᓂᓇᔓᐊᐧᐊᐧᑌᓂᐠ ᐅᒧᐡᑭᓀᐱᐦᐃᑫᐠ ᑲᐃᐧᒋᐦᐃᑯᐊᐧᐸᐣ ᐅᑕᔭᒥᑕᒪᑫᐣ ᐃᐧᓂᐯᐠ ᑲᑕᓇᓄᑭᐨ ᐅᑕᔭᒥᑕᒪᑫ ᑫᐣ ᑫᕑᐅ ᐁᑲᐧ ᐃᒪ ᐊᓄᑭᐃᐧᓂᐠ ᑲᐅᐣᒋᒧᐡᑭᓀᐱᐦᐃᑫᑕᒪᐃᐧᑕᐧ ᐅᑎᐡᑯᓂᐠ ᑫᐃᐧᐣ ᐃᒪ ᑫᕑᐅ ᑲᑭᐅᐣᒋ ᐊᔑᒋᑎᐱᓇᐁᐧᐃᐧᓯᐸᐣ.

“ᐁᑲᐧ ᐃᒪ ᒋᕑᐃᑎ 3 ᒥᓯᐁᐧ ᑲᐃᑯᑎᐯᐣᒋᑫᐃᐧᓂᐊᐧᐠ ᓂᓇᐃᐧᐟ ᒪᐊᐧᐨ ᓂᐣᑭᐅᐣᒋ ᒥᔑᓄᒥᐣ ᑲᑭᐅᑕᐱᓂᑕᐧᐸᐣ ᐊᓂᔑᓂᓂᐃᐧ ᐊᐊᐧᔑᔕᐠ ᐃᐡᑯᓄᑲᒥᑯᐠ ᑲᑭᔑᐸᐸᑭᑎᓂᑕᐧ ᐊᐱᐨ ᐃᐧᐣ ᑯᑕᑭᔭᐣ ᐅᒪ ᒥᓯᐁᐧ ᑲᓇᑕ ᐊᐦᑭᐠ ᐁᑲᐧ ᒥᓇ ᑲᐱᔑ ᐊᔭᓂᑫ ᐱᒪᑎᓯᐊᐧᐨ ᓂᑕᔑᑫᐃᐧᓂᓇᓂᐠ, ᑎᐯᐣᒋᑫᐃᐧᓇᐣ ᒥᓇ ᑲᐃᔑᐸᐯᔑᑯᐊᐧᐨ ᒪᐊᐧᐨ ᐃᑯ ᐅᑭᐱᑭᒋ ᐸᑭᑌᐡᑲᑯᓇᐊᐧ ᒥᓂᑯᐠ ᐃᐁᐧ ᑲᑭᐱᔑ ᑲᑲᐧᑕᑭᐦᐃᑕᐧ ᒥᓇ ᐊᐧᓂᑐᑕᐃᐧᑕᐧ, ᐊᔑᐨ ᑲᔦ ᑲᑭᐱᓇᐸᒋᐦᐃᑕᐧ ᐃᒪ ᐃᓀᑫ ᓇᓇᑕᐃᐧᑭᑫᒋᑫᐃᐧᓂ ᐸᐊᐧᓂᐦᐃᐁᐧᐃᐧᓂᐠ ᓂᐊᐧᑯᒪᑲᓂᓇᓇᐠ ᑲᑭᐱᑲᓇᐁᐧᐣᑕᑯᓯᐊᐧᐨ ᐃᒪ ᐃᐡᑯᓄᑲᒥᑯᐣ,” ᑭᐃᑭᑐ ᒋᕑᐃᑎ #3 ᑭᒋᐅᑭᒪᑲᐣ ᐊᐧᕑᐊᐣ ᐊᐧᔾᐟ. “ᐊᓇᓴ ᐅᓄᐁᐧᓂᐊᐧᐣ ᑐᑲᐣ ᐅᒪᒥᓇᐧᑕᒪᑯᐃᐧ ᑎᐸᐦᐊᒪᑯᐃᐧ ᐊᔓᑕᒪᑯᐃᐧᓂᐊᐧ ᑭᐃᔑᓇᑲᐧᓄᐸᐣ ᐁᐃᐧᐅᐣᒋ ᓇᑯᑕᒪᐃᐧᑕᐧ ᐁᓂᓯᑕᐃᐧᓇᒪᐃᐧᑕᐧ ᒥᓇ ᐃᒪ ᐃᓀᑫ ᒥᓇᐧᑕᒪᑫᐃᐧᓂᐠ ᐁᐃᐧᐃᔑ ᐸᑭᑎᓂᑕᐧ ᑲᑭᐱᐊᐧᓂᑐᑕᐃᐧᑕᐧᐸᐣ ᐅᑯᐁᐧᓂᐊᐧᐠ ᑲᑭᐱᔕᐳᐡᑲᒧᐊᐧᐨ, ᐁᑲᐧ ᔕᑯᐨ ᓇᐱᐨ ᐃᐧᓴᑫᐣᑕᑲᐧᐣ ᑲᑐᑕᑫᐊᐧᐨ ᐁᑲ ᑲᒪᓇᒋᐦᐃᐁᐧᐊᐧᐨ ᐅᑕᔭᒥᑕᒪᑫᐠ ᒥᓇᐊᐧ ᐊᐱᐣ ᐁᐅᐣᒋ ᓇᐱᒪᒋᑐᑕᐃᐧᑕᐧ ᐊᔕ ᐅᑕᓇᐠ ᑲᑭᐱᔑ ᐃᐧᓴᑫᑕᒥᐦᐃᑕᐧᐸᐣ ᒥᓇ ᑲᑲᐧᑕᑭᐦᐃᑕᐧᐸᐣ. ᓂᑐᒋᔕᔑᑭᒪᐠ ᑲᑭᓇ ᐅᑯᐁᐧᓂᐊᐧᐠ ᑲᑭᐱᒧᐡᑭᓀᐱᐦᐃᑫᐊᐧᐸᐣ ᑭᐡᐱᐣ ᑫᑯᐣ ᑲᑫᐧᑌᐃᐧᓇᐣ ᓇᐣᑕ ᑫᑯᐣ ᑕᓀᑕᒥᐦᐃᑯᐊᐧᑫᐧᐣ ᐃᒪ ᐃᓀᑫ ᐅᐱᒪᑎᓯᐃᐧᓂᐊᐧᐠ, ᐅᒧᐡᑭᐱᐦᐃᑫᐃᐧᓂᐊᐧ ᐁᑲ ᑲᑭᐱᔑᓇᐦᐁᑕᒧᐊᐧᐨ ᒋᐱᐃᐧᐣᑕᒧᐊᐧᐨ.”
ᔓᓫᒪᐣ ᑭᐃᓇᑯᓂᑫ ᐃᓂᐁᐧᓂᐊᐧᐣ ᑲᑭᐃᔑᐅᓇᒋᑫᐊᐧᐨ ᑲᑭᓇᑕᐁᐧᐣᑕᑯᓯᐊᐧᐨ ᐅᒧᐡᑭᓀᐱᐦᐃᑫᐠ ᒋᐅᒋᑎᐸᐦᐃᑫᐣᑕᐧ ᐅᒧᐡᑭᓀᐱᐦᐃᑫᑕᒪᑯᐃᐧᓂᐊᐧ ᐁᑲ ᐃᓴᐣ ᐃᐁᐧ ᒋᑭᑐᑕᐃᐧᑕᐧᐸᐣ, ᐁᑲᐧ ᒥᓇ ᑲᒧᐡᑭᓀᐱᐦᐃᑫᐊᐧᐨ ᑲᐃᐧᐣ ᐅᑲᓇᐊᐧᐸᒥᑯᓯᓇᐊᐧ ᒋᑭᑎᐸᐦᐃᑫᐦᐃᑕᐧᐸᐣ ᒋᒧᐡᑭᓀᐱᐦᐃᑫᑕᒪᐃᐧᑕᐧ.
ᐅᑭᑲᓄᓇᐣ ᑕᐡ ᑎᐸᑯᓂᑫᐃᐧ ᐊᓄᑭᓇᑲᓇᐠ ᒋᓇᓇᑕᐃᐧᑭᑫᐣᑕᒧᐊᐧᐨ ᐊᓂᐣ ᑫᑭᐅᐣᒋᐃᐧᒋᐦᐃᑕᐧᐸᐣ ᐅᒧᐡᑭᓀᐱᐦᐃᑫᐠ ᒋᑭ ᑭᐁᐧᒥᓂᑕᐧᐸᐣ
ᐅᑎᐸᐦᐃᑫᐦᐃᑯᐃᐧᓂᐊᐧ, ᐁᑲᐧ ᒥᓇ ᒋᓇᓇᑐᓇᒧᐊᐧᐨ ᒪᓯᓇᐦᐃᑲᓇᐣ ᑲᑭᒪᒪᓯᓇᐦᐊᒧᐊᐧᐨ ᐊᓂᐣ ᑲᑭᐊᐃᓇᑕᒪᐊᐧᐊᐧᑯᐸᓀᐣ ᐅᒧᐡᑭᓀᐱᐦᐃᑫᐣ
ᐃᑭᐁᐧᓂᐊᐧᐠ ᐅᑕᔭᒥᑕᒪᑫᐠ, ᒥᓇ ᐅᒧᐡᑭᓀᐱᐦᐃᑫᑕᒪᑫᐠ ᓇᑕᐁᐧᑕᑲᐧᓄᐣ ᒋᒥᓇᑲᓄᐊᐧᐨ ᑲᓂᑲᓂᐡᑲᒧᐊᐧᐨ ᑫᐃᓇᔓᐊᐧᓂᐊᐧᐠ.

ᐸᐧᐣᑌᐣ ᒥᓇ ᑲᓇᑕ (ᑭᒋᐅᑕᔭᒥᑕᒪᑫ) ᒪᓯᓇᐦᐃᑲᑌ ᐃᐧᐊᐧᐸᑕᒪᐣ ᐃᒪ ᐱᐊᐧᐱᑯᐠ: href="http://www.canlii.org/en/mb/mbqb/doc/2014/2014mbqb113/2014mbqb113.html" title="http://www.canlii.org/en/mb/mbqb/doc/2014/2014mbqb113/2014mbqb113.html" rel="nofollow">http://www.canlii.org/en/mb/mbqb/doc/2014/2014mbqb113/2014mbqb113.html.

ᐁᑲᐧ ᒥᓇ ᐊᓂᔑᓂᓂᐃᐧ ᐃᐡᑯᓄᑲᒥᑯᐣ ᑲᐅᒋᓇᓇᑲᒋᒋᑲᑌᑭᐣ ᒪᔭᑦ ᑲᓂᑲᓂᐡᑲᐠ ᐃᒪ ᑲᔦ ᐅᑭᒪᑕᓄᑲᑕᐣ ᐅᓇᓇᑕᐃᐧᑭᑫᒋᑫᐃᐧᐣ ᑭᓇᐧᕑᐊ ᑎᐸᑯᓂᑫᐃᐧ ᐱᒧᒋᑫᐃᐧ ᐊᓄᑭᐃᐧᓂ ᑭᔑᐣ ᒥᓇ ᒣᒍᕑ ᑲᐱᒧᑐᐊᐧᐨ ᑲᑭᐅᐣᒋᐸᑭᑎᓇᒪᑫᐊᐧᐸᐣ ᔓᓂᔭᐃᐧ ᐊᐃᐧᐦᐊᓱᒥᐁᐧᐃᐧᓇᐣ ᒥᓇ ᑲᑭᐸᑭᑎᓇᐊᐧᐨ ᔓᓂᔭᐣ ᑲᑭᐅᐣᒋᒥᓂᑕᐧᐸᐣ ᐅᒧᐡᑭᓀᐱᐦᐃᑫᐠ ᒣᑲᐧᐨ ᐊᐱ ᑲᑭᔭᓂ ᒪᒧᐡᑭᓀᐱᐦᐃᑫᐦᐃᑕᐧᐸᐣ.

ᐊᓂᔑᓇᐯ ᐊᐢᑭ ᐱᒧᒋᑫᐃᐧᐣ ᒥᓇ ᒋᕑᐃᑎ #3 ᐅᔕᔑᑭᒪᐊᐧᐣ ᑲᑭᓇ ᐅᒧᐡᑭᓀᐱᐦᐃᑫᐠ ᑫᑯᓇᐣ ᑲᐃᐧᓇᓇᑕᐃᐧᑭᑫᑕᒧᐊᐧᐨ ᐅᐁᐧᓂ ᐅᒋ ᐅᑎᐸᐦᐃᑫᐦᐃᑯᐃᐧᓂᐊᐧ ᒣᑲᐧᐨ ᑲᑭᒧᐡᑭᓀᐱᐦᐃᑫᑕᒪᐃᐧᑕᐧᐸᐣ ᒋᔑᑭᑐᐊᐧᐨ ᐅᒪ ᒧᐡᑭᓀᐱᐦᐃᑫ ᓇᓇᑕᐃᐧᑭᑫᒋᑫᐃᐧᓂᐠ ᐁᑲ ᑲᑎᐸᐦᐃᑲᑌᐠ ᑭᑐᐃᐧᐣ ᑲᐃᔑᑭᑐᓇᓂᐊᐧᐠ 1-877-635-2648. ᑕᓂᐸᐸᑭᑎᓂᑲᑌᐊᐧᐣ ᐅᐡᑭ ᐃᐧᐣᑕᒪᑫᐃᐧᓇᐣ ᐊᐱ ᐊᓂᐊᔭᒪᑲᑭᐣ ᐅᐁᐧ ᐅᐣᒋ ᐅᒧᐡᑭᓀᐱᐦᐃᑫᐠ ᒋᑭᑫᐣᑕᒧᓂᑕᐧ ᐃᒪ ᐱᐊᐧᐱᑯᐠ ᐃᓇᐱᐣ href="http://www.iap-pei.ca" title="www.iap-pei.ca" rel="nofollow">www.iap-pei.ca.


Email to a Friend
qr code
add to del.icio.us

Stumble It!

Post new comment

Comment policy

All comments submitted to Wawatay News Online must have a correct name, location and email address of the user. Wawatay will not approve comments without the required information.

The approval of comments will also be subjected to relevancy, laws of defamation and good taste.

Once posted, comments become the property of Wawatay News. Wawatay News reserves the right to publish or use this comment in any way in the future for online use, in print, and by any other media at the discretion of Wawatay News.

The content of this field is kept private and will not be shown publicly.